ব্রহ্মবিন্দূ

.. ব্রহ্মবিন্দূপনিষত্   ১১ ..

অমৃতবিন্দূপনিষদ্বেদ্যং যত্পরমাক্ষরম্ .
তদেব হি ত্রিপাদ্রামচন্দ্রাখ্যং নঃ পরা গতিঃ ..
ॐ সহনাববত্বিতি শান্তিঃ ..
ॐ মনো হি দ্বিবিধং প্রোক্তং শুদ্ধং চাশুদ্ধমেব চ .
অশুদ্ধং কামসঙ্কল্পং শুদ্ধং কামবিবর্জিতম্ .. ১..
মন এব মনুষ্যাণাং কারণং বন্ধমোক্ষযোঃ .
বন্ধায বিষযাসক্তং মুক্ত্যৈ নির্বিষযং স্মৃতম্ .. ২..
যতো নির্বিষযস্যাস্য মনসো মুক্তিরিষ্যতে .
তস্মান্নির্বিষযং নিত্যং মনঃ কার্যং মুমুক্ষুণা .. ৩..
নিরস্তবিষযাসঙ্গং সন্নিরুদ্ধং মনো হৃদি .
যদা যাত্যুন্মনীভাবং তদা তত্পরমং পদম্ .. ৪..
তাবদেব নিরোদ্ধব্যং যাবদ্ধৃদি গতং ক্ষযম্ .
এতজ্জ্ঞানং চ ধ্যানং চ অতোঽন্যো গ্রন্থবিস্তরঃ .. ৫..
নৈব চিন্ত্যং ন বাচিন্ত্যমচিন্ত্যং চিন্ত্যমেব চ .
পক্ষপাত বিনির্মুক্তং ব্রহ্ম সংপদ্যতে তদা .. ৬..
স্বরেণ সন্ধ্যযেদ্যোগমস্বরং ভাবযেত্পরম্ .
অস্বরেণ হি ভাবেন ভাবো নাভাব ইষ্যতে .. ৭..
তদেব নিষ্কলং ব্রহ্ম নির্বিকল্পং নিরঞ্জনম্ .
তদ্ব্রহ্মাহমিতি জ্ঞাত্বা ব্রহ্ম সংপদ্যতে ধ্রুবম্ .. ৮..
নির্বিকল্পমনন্তং চ হেতুদৃষ্টান্তবর্জিতম্ .
অপ্রমেযমনাদিং চ জ্ঞাত্বা চ পরমং শিবম্ .. ৯..
ন নিরোধো ন চোত্পত্তির্ন বদ্ধো ন চ সাধকঃ .
ন মুমুক্ষুর্ন বৈ মুক্ত ইত্যেষা পরমার্থতা .. ১০..
এক এবাত্মা মন্তব্যো জাগ্রত্স্বপ্নসুষুপ্তিষু .
স্থানত্রযাদ্ব্যতীতস্য পুনর্জন্ম ন বিদ্যতে .. ১১..
এক এব হি ভূতাত্মা ভূতে ভূতে ব্যবস্থিতঃ .
একধা বহুধা চৈব দৃশ্যতে জলচন্দ্রবত্ .. ১২..
ঘটসংবৃতমাকাশং লীযমানে ঘটে যথা .
ঘটো লীযেত নাকাশং তদ্বজ্জীবো নভোপমঃ .. ১৩..
ঘটবদ্বিধাকারং ভিদ্যমানং পুনঃ পুনঃ .
তদ্ভগ্নং ন চ জানাতি স জানাতি চ নিত্যশঃ .. ১৪..
শব্দমাযাবৃতো যাবত্তাবত্তিষ্ঠতি পুষ্করে .
ভিন্নে তমসি চৈকত্বমেক এবানুপশ্যতি .. ১৫..
শব্দাক্ষরং পরং ব্রহ্ম তস্মিন্ক্ষীণে যদক্ষরম্ .
তদ্বিদ্বানক্ষরং ধ্যাযেদ্যদীচ্ছেচ্ছান্তিমাত্মনঃ .. ১৬..
দ্বে বিদ্যে বেদিতব্যে তু শব্দব্রহ্ম পরং চ যত্ .
শব্দব্রহ্মণি নিষ্ণাতঃ পরং ব্রহ্মাধিগচ্ছতি .. ১৭..
গ্রন্থমভ্যস্য মেধাবী জ্ঞানবিজ্ঞানতত্পরঃ .
পলালমিব ধান্যার্থী ত্যজেদ্গ্রন্থমশেষতঃ .. ১৮..
গবামনেকবর্ণানাং ক্ষীরস্যাপ্যেকবর্ণতা .
ক্ষীরবত্পশ্যতে জ্ঞানং লিঙ্গিনস্তু গবাং যথা .. ১৯..
ঘৃতমিব পযসি নিগূঢং ভূতে ভূতে চ বসতি বিজ্ঞানম্ .
সততং মন্থযিতব্যং মনসা মন্থানভূতেন .. ২০..
জ্ঞাননেত্রং সমাধায চোদ্ধরেদ্বহ্নিবত্পরম্ .
নিষ্কলং নির্মলং শান্তং তদ্ব্রহ্মাহমিতি স্মৃতম্ .. ২১..
সর্বভূতাধিবাসং চ যদ্ভূতেষু বসত্যপি .
সর্বানুগ্রাহকত্বেন তদস্ম্যহং বাসুদেবঃ তদস্ম্যহং বাসুদেব
ইতি .. ২২..
ॐ সহনাববত্বিতি শান্তিঃ ..
ইতি ব্রহ্মবিন্দূপনিষত্সমাপ্তা ..