ভিক্ষুক্

.. ভিক্ষুকোপনিষত্ || ৬৩ || ..

ভিক্ষূণাং পটলং যত্র বিশ্রান্তিমগমত্সদা |
তন্ত্রৈপদং ব্রহ্মতত্ত্বং ব্রহ্মমাত্রং করোতু মাম্ ||

ॐ পূর্ণমদঃ পূর্ণমিদং
পূর্ণাত্ পূর্ণমুদচ্যতে |
পূর্ণস্য পূর্ণমাদায
পূর্ণমেবাবশিষ্যতে ||
ॐ শান্তিঃ শান্তিঃ শান্তিঃ ||

ॐ অথ ভিক্ষূণাং মোক্ষার্থিনাং
কুটীচকবহূদকহংসপরমহংসাশ্বেতি চত্বারঃ |
কুটীচকা নাম গৌতমভরদ্বাজযাজ্ঞবল্ক্যবসিষ্ট –
প্রভৃতযোঽষ্টৌ গ্রাসাংশ্বরন্তো
যোগমার্গে মোক্ষমেব প্রার্থযন্তে |
অথ বহূদকা নাম ত্রিদণ্ডকমণ্ডলুশিখা –
যজ্ঞোপবীতকাষাযবস্ত্রধারিণো
ব্রহ্মর্ষিগৃহে মধুমাংসং বর্জযিত্বাষ্টৌ
গ্রাসান্ভৈক্ষাচরণং কৃত্বা
যোগমার্গে মোক্ষমেব প্রার্থযন্তে |
অথ হংসা নাম গ্রাম একরাত্রং নগরে পঞ্চরাত্রং
ক্ষেত্রে সপ্তরাত্রং তদুপরি ন বসেযুঃ |
গোমূত্রগোমযাহারিণো নিত্যং চান্দ্রাযণপরাযণা
যোগমার্গে মোক্ষমেব প্রার্থযন্তে |
অথ পরমহংসা নাম সংবর্তকারুণিশ্বেতকেতুজডভরত –
দত্তাত্রেযশুকবামদেবহারীতকপ্রভৃতযোঽষ্টৌ
গ্রাসাংশ্বরন্তো
যোগমার্গে মোক্ষমেব প্রার্থযন্তে |
বৃক্ষমূলে শূন্যগৃহে শ্মশানবাসিনো বা
সাম্বরা বা দিগম্বরা বা |
ন তেষাং ধর্মাধর্মৌ লাভালাভৌ
শুদ্ধাশুদ্ধৌ দ্বৈতবর্জিতা সমলোষ্টাশ্মকাঞ্চনাঃ
সর্ববর্ণেষু ভৈক্ষাচরণং কৃত্বা সর্বত্রাত্মৈবেতি পশ্যন্তি |
অথ জাতরূপধরা নির্দ্বন্দ্বা নিষ্পরিগ্রহাঃ
শুক্লধ্যানপরাযণা আত্মনিষ্টাঃ প্রাণসংধারণার্থে
যথোক্তকালে ভৈক্ষমাচরন্তঃ শূন্যাগারদেবগৃহ –
তৃণকূটবল্মীকবৃক্ষমূলকুলালশালাগ্নিহোত্রশালানদীপুলিন –
গিরিকন্দরকুহরকোটরনির্ঝরস্থণ্ডিলে তত্র ব্রহ্মমার্গে
সম্যক্সংপন্নাঃ শুদ্ধমানসাঃ পরমহংসাচরণেন
সংন্যাসেন দেহত্যাগং কুর্বন্তি তে পরমহংসা নামেত্যুপনিষত্ ||

ॐ পূর্ণমদঃ পূর্ণমিদং
পূর্ণাত্ পূর্ণমুদচ্যতে |
পূর্ণস্য পূর্ণমাদায
পূর্ণমেবাবশিষ্যতে ||
ॐ শান্তিঃ শান্তিঃ শান্তিঃ ||

ইতি ভিক্ষুকোপনিষত্সমাপ্তা ||