ভস্ম

||ভস্মজাবালোপনিষত্ ||

যত্সাম্যজ্ঞানকালাগ্নিস্বাতিরিক্তাস্তিতাভ্রমম্ |
করোতি ভস্ম নিঃশেষং তদ্ব্রহ্মৈবাস্মি কেবলম্ ||
ॐ ভদ্রং কর্ণেভিঃ শৃণুযাম দেবাঃ ||ভদ্রং পশ্যেমাক্ষভির্যজত্রাঃ ||
স্থিরৈরঙ্গৈস্তুষ্টুবাঁসস্তনূভিঃ ||ব্যশেম দেবহিতং যদাযুঃ ||
স্বস্তি ন ইন্দ্রো বৃদ্ধশ্রবাঃ ||স্বস্তি নঃ পূষা বিশ্ববেদাঃ ||
স্বস্তি নস্তার্ক্ষ্যো অরিষ্টনেমিঃ ||স্বস্তি নো বৃহস্পতির্দধাতু ||
ॐ শান্তিঃ শান্তিঃ শান্তিঃ ||
হরিঃ ॐ ||অথ জাবালো ভুসুণ্ডঃ কৈলাসশিখরাবাসমোংকারস্বরূপিণং
মহাদেবমুমার্ধকৃতশেখরং সোমসূর্যাগ্নিনযনমনন্তেন্দুরবিপ্রভং
ব্যাঘ্রচর্মাম্বরধরং মৃগহস্তং ভস্মোদ্ধূলিতবিগ্রহং
তির্যক্ত্রিপুণ্ড্ররেখাবিরাজমানভালপ্রদেশং স্মিতসংপূর্ণপঞ্চবিধ-
পঞ্চাননং বীরাসনারূঢমপ্রমেযমনাদ্যনন্তং নিষ্কলং নির্গুণং
শাতং নিরঞ্জনমনামযং হুংফট্কুর্বাণং শিবনামান্যনিশমুচ্চরন্তং
হিরণ্যবাহুং হিরণ্যরূপং হিরণ্যবর্ণং হিরণ্যনিধিমদ্বৈতং চতুর্থং
ব্রহ্মবিষ্ণুরুদ্রাতীতমেকমাশাস্যং ভগবন্তং শিবং প্রণম্য
মুহুর্মুহুরভ্যর্চ্য শ্রীফলদলৈস্তেন ভস্মনা চ নতোত্তমাঙ্গঃ
কৃতাঞ্জলিপুটঃ পপ্রচ্ছাধীহি ভগবন্বেদসারমুদ্ধৃত্য
ত্রিপুণ্ড্রবিধিং যস্মাদন্যানপ্রেক্ষমেব মোক্ষোপলব্ধিঃ |
কিং ভস্মনো দ্রব্যম্ | কানি স্থানানি | মনবোঽপ্যত্র কে বা |
কতি বা তস্য ধারণম্ | কে বাত্রাধিকারিণঃ | নিযমস্তেষাং
কো বা | মামন্তেবাসিনমনুশাসযামোক্ষমিতি | অথ স হোবাচ
ভগবান্পরমেশ্বরঃ পরমকারুণিকঃ প্রমথান্সুরানপি
সোঽন্বীক্ষ্য পূতং প্রাতরুদযাদ্গোমযং ব্রহ্মপর্ণে নিধায
ত্র্যম্বকমিতি মন্ত্রেণ শোষযেত্ | যেন কেনাপি তেজসা
তত্স্বগৃহ্যোক্তমার্গেণ প্রতিষ্ঠাপ্য বহ্নিং তত্র তদ্গোমযদ্রব্যং
নিধায সোমায স্বাহেতি মন্ত্রেণ ততস্তিলব্রীহিভিঃ সাজ্যৈর্জুহুযাত্ |
অযং তেনাষ্টোত্তরসহস্রং সার্ধমেতদ্বা | তত্রাজ্যস্য পর্ণমযী
জুহূর্ভবতি | তেন ন পাপং শৃণোতি | তদ্ঘোমমন্ত্রস্র্যম্বকমিত্যেব
অন্তে স্বিষ্টকৃত্পূর্ণাহুতিস্তেনৈবাষ্টদিক্ষু বলিপ্রদানম্ |
তদ্ভস্ম গাযত্র্যা সংপ্রোক্ষ্য তদ্ধৈমে রাজতে তাম্রে মৃণ্মযে
বা পাত্রে নিধায রুদ্রমন্ত্রৈঃ পুনরভ্যুক্ষ্য শুদ্ধদেশে সংস্থাপযেত্ |
ততো ভোজযেদ্ব্রাহ্মণান্ | ততঃ স্বযং পূতো ভবতি | মানস্তোক ইতি সদ্যো
জাতমিত্যাদি পঞ্চব্রহ্মমন্ত্রৈর্ভস্ম সংগৃহ্যাগ্নিরিতি ভস্ম বাযুরিতি
ভস্ম জলমিতি ভস্ম স্থলমিতি ভস্ম ব্যোমেতি ভস্ম দেবা ভস্ম
ঋষযো ভস্ম |  সর্বং হ বা এতদিদং ভস্ম | পূতং পাবনং নমামি
সদ্যঃ সমস্তাঘশাসকমিতি শিরসাভিনম্য | পূতে বামহস্তে
বামদেবাযেতি নিধায ত্র্যম্বকমিতি সংপ্রোক্ষ্য শুদ্ধং শুদ্ধেনেতি
সংমৃজ্য সংশোধ্য তেনৈবাপাদশীর্ষমুদ্ধূলনমাচরেত্ |
তত্র ব্রহ্মমন্ত্রাঃ পঞ্চ | ততঃ শেষস্য ভস্মনো বিনিযোগঃ |
তর্জনীমধ্যমানামিকাভিরগ্নের্ভস্মাসীতি ভস্ম সংগৃহ্য
মূর্ধানমিতি মূর্ধন্যগ্রে ন্যসেত্ | ত্র্যম্বকমিতি ললাটে
নীলগ্রীবাযেতি কণ্ঠে কণ্ঠস্য দক্ষিণে পার্শ্বে ত্র্যাযুষমিতি
বামেতি কপোলযোঃ কালাযেতি নেত্রযোস্ত্রিলোচনাযেতি শ্রোত্রযোঃ
শৃণবামেতি বক্ত্রে প্রব্রবামেতি হৃদযে আত্মন ইতি নাভৌ
নাভিরিতি মন্ত্রেণ দক্ষিণভুজমূলে ভবাযেতি তন্মধ্যে রুদ্রাযেতি
তন্মণিবন্ধে শর্বাযেতি তত্করপৃষ্ঠে পশুপতয ইতি বামবাহুমূলে
উগ্রাযেতি তন্মধ্যে অগ্রেবধাযেতি তন্মণিবন্ধে দূরেবধাযেতি
তত্করপৃষ্ঠে নমো হন্ত্র ইতি অংসে শঙ্করাযেতি যথাক্রমং
ভস্ম ধৃত্বা সোমাযেতি শিবং নত্বা ততঃ প্রক্ষাল্য তদ্ভস্মাপঃ
পুনন্ত্বিতি পিবেত্ | নাধো ত্যাজ্যং নাধো ত্যাজ্যম্ |
এতন্মধ্যাহ্নসাযাহ্নেষু ত্রিকালেষু বিধিবদ্ভস্মধারণমপ্রমাদেন
কার্যম্ | প্রমাদাত্পতিতো ভবতি | ব্রাহ্মণানামযমেব ধর্মোঽযমেব
ধর্মঃ | এবং ভস্মধারণমকৃত্বা নাশ্নীযাদাপোঽন্নমন্যদ্বা |
প্রমাদাত্ত্যক্ত্বা ভস্মধারণং ন গাযত্রীং জপেত্ | ন জুহুযাদগ্নৌ
তর্পযেদ্দেবানৃষীন্পিত্রাদীন্ |
অযমেব ধর্মঃ সনাতনঃ সর্বপাপনাশকো মোক্ষহেতুঃ | নিত্যোঽযং ধর্মো
ব্রাহ্মণানাং ব্রহ্মচারিগৃহিবানপ্রস্থযতীনাম্ | এতদকরণে
প্রত্যবৈতি ব্রাহ্মণঃ | অকৃত্বা প্রমাদেনৈতদষ্টোত্তরশতং
জলমধ্যে স্থিত্বা গাযত্রীং জপ্ত্বোপোষণেনৈকেন শুদ্ধো ভবতি |
যতির্ভস্মধারণং ত্যক্ত্বৈকদোপোষ্য দ্বাদশসহস্রপ্রণবং
জপ্ত্বা শুদ্ধো ভবতি | অন্যথেন্দ্রো যতীন্সালাবৃকেভ্যঃ
পাতযতি | ভস্মনো যদ্যভাবস্তদা নর্যভস্মদাহনজন্যমন্যদ্বাবশ্যং
মন্ত্রপূতং ধার্যম্ |
এতত্প্রাতঃ প্রযুঞ্জানো রত্রিকৃতাত্পাপাত্পূতো ভবতি |
স্বর্ণস্তেযাত্প্রমুচ্যতে | মধ্যন্দিনে মাধ্যন্দিনং
কৃত্বোপস্থানান্তং ধ্যাযমান আদিত্যাভিমুখোঽধীযানঃ
সুরাপানাত্পূতো ভবতি | স্বর্ণস্তেযাত্পূতো ভবতি |
ব্রাহ্মণবধাত্পূতো ভবতি | গোবধাত্পূতো ভবতি |
অশ্ববধাত্পূতো ভবতি | গুরুবধাত্পূতো ভবতি |
মাতৃবধাত্পূতো ভবতি | পিতৃবধাত্পূতো ভবতি |
ত্রিকালমেতত্প্রযুঞ্জানঃ সর্ববেদপারাযণফলমবাপ্নোতি |
সর্বতীর্থফলমশ্নুতে | অনপব্রুবঃ সর্বমাযুরেতি |
বিন্দতে প্রাজাপত্যং রাযস্পোষং গৌপত্যম্ |
এবমাবর্তযেদুপনিষদমিত্যাহ ভগবান্সদাশিবঃ
সাম্বঃ সদাশিবঃ সাম্বঃ ||
ইতি প্রথমোঽধ্যাযঃ ||১||
অথ ভুসুণ্ডো জাবালো মহাদেবং সাম্বং প্রণম্য পুনঃ
পপ্রচ্ছ কিং নিত্যং ব্রাহ্মণানাং কর্তব্যং যদকরণে
প্রত্যবৈতি ব্রাহ্মণঃ | কঃ পূজনীযঃ | কো বা ধ্যেযঃ | কঃ
স্মর্তব্যঃ | কথং ধ্যেযঃ | ক্ব স্থাতব্যমেতদ্ব্রূহীতি | সমাসেন
তং হোবাচ | প্রাগুদযান্নির্বর্ত্য শৌচাদিকং ততঃ স্নাযাত্ |
মার্জনং রুদ্রসূক্তৈঃ | ততশ্চাহতং বাসঃ পরিধত্তে পাপ্মনোপহৃত্যৈ |
উদ্যন্তমাদিত্যমভিধ্যাযন্নুদ্ধূলিতাঙ্গং কৃত্বা যথাস্থানং
ভস্মনা ত্রিপুণ্ড্রং শ্বেতেনৈব রুদ্রাক্ষাঞ্ছ্বেতান্বিভৃযাত্ |
নৈতত্সংমর্শঃ | তথান্যে | মূর্ধ্নি চত্বারিংশত্ | শিখাযামেকং
ত্রযং বা | শ্রোত্রযোর্দ্বাদশ | কণ্ঠে দ্বাত্রিংশত্ | বাহ্বোঃ
ষোডশষোডশ |  দ্বাদশদ্বাদশ মণিবন্ধযোঃ | ষট্ষডঙ্গুষ্ঠযোঃ |
ততঃ সন্ধ্যাং সকুশোঽহরহরুপাসীত | অগ্নির্জ্যোতিরিত্যাদিভিরগ্নৌ জুহুযাত্ |
শিবলিঙ্গং ত্রিসন্ধ্যমভ্যর্চ্য কুশেষ্বাসীনো ধ্যাত্বা সাম্বং
মামেব বৃষভারূঢং হিরণ্যবাহুং হিরণ্যবর্ণং হিরণ্যরূপং
পশুপাশবিমোচকং পুরুষং কৃষ্ণপিঙ্গলমূর্ধ্বরেতং বিরূপাক্ষং
বিশ্বরূপং সহস্রাক্ষং সহস্রশীর্ষং সহস্রচরণং বিশ্বতোবাহুং
বিশ্বাত্মানমেকমদ্বৈতং নিষ্কলং নিষ্ক্রিযং শান্তং শিবমক্ষরমব্যযং
হরিহরহিরণ্যগর্ভস্রষ্টারমপ্রমেযমনাদ্যন্তং রুদ্রসূক্তৈরভিষিচ্য
সিতেন ভস্মনা শ্রীফলদলৈশ্চ ত্রিশাখৈরার্দ্রৈরনার্দ্রৈর্বা |
নৈতত্র সংস্পর্শঃ | তত্পূজাসাধনং কল্পযেচ্চ নৈবেদ্যম্ |
ততশ্চৈকাদশগুণরুদ্রো জপনীযঃ | একগুণোঽনন্তঃ | ষডক্ষরোঽষ্টাক্ষরো
বা শৈবো মন্ত্রো জপনীযঃ |  ওমিত্যগ্রে ব্যাহরেত্ | নম ইতি পশ্চাত্ |
ততঃ শিবাযেত্যক্ষরত্রযম্ | ওমিত্যগ্রে ব্যাহরেত্ | নম ইতি পশ্চাত্ |
ততো মহাদেবযেতি পঞ্চাক্ষরাণি | নাতস্তারকঃ পরমো মন্ত্রঃ |  তারকোঽযং
পঞ্চাক্ষরঃ | কোঽযং শৈবো মনুঃ | শৈবস্তারকোঽযমুপদিশ্যতে
মনুরবিমুক্তে শৈবেভ্যো জীবেভ্যঃ |  শৈবোঽযমেব মন্ত্রস্তারযতি |
স এব ব্রহ্মোপদেশঃ |
ব্রহ্ম সোমোঽহং পবনঃ সোমোঽহং পবতে সোমোঽহং
জনিতা মতীনাং সোমোঽহং জনিতা পৃথিব্যাঃ সোমোঽহং
জনিতাঽগ্নেঃ সোমোঽহং জনিতা সূর্যস্য সোমোঽহং
জনিতেন্দ্রস্য সোমোঽহং জনিতোত বিষ্ণোঃ সোমোঽহমেব
জনিতা স যশ্চন্দ্রমসো দেবানাং ভূর্ভুবস্বরাদীনাং
সর্বেষাং লোকানাং চ | বিশ্বং ভূতং ভুবনং চিত্রং
বহুধা জাতং জাযমানং চ যত্সর্বস্য সোমোঽহমেব
জনিতা বিশ্বাধিকো রুদ্রো মহর্ষিঃ | হিরণ্যগর্ভাদীনহং
জাযমানান্পশ্যামি | যো রুদ্রো অগ্নৌ যো অপ্সু য ওষধীষু
যো রুদ্রো বিশ্বা ভুবনা বিবেশৈবমেব | অযমেবাত্মান্তরাত্মা
ব্রহ্মজ্যোতির্যস্মান্ন মত্তোঽন্যঃ পরঃ | অহমেব পরো বিশ্বাধিকঃ |
মামেব বিদিত্বামৃতত্বমেতি | তরতি শোকম্ | মামেব বিদিত্বা
সাংসৃতিকীং রুজং দ্রাবযতি | তস্মাদহং রুদ্রো যঃ সর্বেষাং
পরমা গতিঃ | সোঽহং সর্বাকারঃ | যতো বা ইমানি ভূতানি জাযন্তে |
যেন জাতানি জীবন্তি | যত্প্রযন্ত্যভিসংবিশন্তি | তং মামেব
বিদিত্বোপাসীত | ভূতেভির্দেবেভিরভিষ্টুতোঽহমেব | ভীষাস্মাদ্বাতঃ
পবতে | ভীষোদেতি সূর্যঃ | ভীষাস্মাদগ্নিশ্চেন্দ্রশ্চ | সোমোঽত
এব যোঽহং সর্বেষামধিষ্ঠাতা সর্বেষাং চ ভূতানাং
পালকঃ | সোঽহং পৃথিবী | সোঽহমাপঃ | সোঽহং তেজঃ | সোঽহং বাযুঃ |
সোঽহং কালঃ | সোঽহং দিশঃ | সোঽহমাত্মা | মযি সর্বং প্রতিষ্ঠিতম্ |
ব্রহ্মবিদাপ্নোতি পরম্ | ব্রহ্মা শিবো মে অস্তু সদাশিবোম্ |
অচক্ষুর্বিশ্বতশ্চক্ষুরকর্ণো বিশ্বতঃ কর্ণোঽপাদো
বিশ্বতঃপাদোঽপাণির্বিশ্বতঃপাণিরাহমশিরা বিশ্বতঃশিরা
বিদ্যামন্ত্রৈকসংশ্রযো বিদ্যারূপো বিদ্যামযো বিশ্বেশ্বরোঽহমজরোঽহম্ |
মামেবং বিদিত্বা সংসৃতিপাশাত্প্রমুচ্যতে | তস্মাদহং
পশুপাশবিমোচকঃ | পশবশ্চামানবান্তং মধ্যবর্তিনশ্চ
যুক্তাত্মানো যতন্তে মামেব প্রাপ্তুম্ | প্রাপ্যন্তে মাং ন পুনরাবর্তন্তে |
ত্রিশূলগাং কাশীমধিশ্রিত্য ত্যক্তাসবোঽপি ময্যেব সংবিশন্তি |
প্রজ্বলবহ্নিগং হবির্যথা ন যজমানমাসাদযতি তথাসৌ ত্যক্ত্বা
কুণপং ন তত্তাদৃশং পুরা প্রাপ্নুবন্তি | এষ এবাদেশঃ | এষ
উপদেশঃ | এষ এব পরমো ধর্মঃ | সত্যাত্তত্র কদাচিন্ন প্রমদিতব্যং
তত্রোদ্ধূলনত্রিপুণ্ড্রাভ্যাম্ | তথা রুদ্রাদ্যাক্ষধারণাত্তথা
মদর্চনাচ্চ | প্রমাদেনাপি নান্তর্দেবসদনে পুরীষং কুর্যাত্ |
ব্রতান্ন প্রমদিতব্যম্ | তদ্ধি তপস্তদ্ধি তপঃ কাশ্যামেব মুক্তিকামানাম্ |
ন তত্ত্যাজ্যং ন তত্ত্যাজ্যং মোচকোঽহমবিমুক্তে নিবসতাম্ |
নাবিমুক্তাত্পরমং স্থানম্ | নাবিমুক্তাত্পরমং স্থানম্ |
কাশ্যাং স্থানানি চত্বারি | তেষামভ্যর্হিতমন্তর্গৃহম্ |
তত্রাপ্যবিমুক্তমভ্যর্হিতম্ | তত্র স্থানানি পঞ্চ | তন্মধ্যে
শিবাগারমভ্যর্হিতম্ | তত্র প্রাচ্যামৈশ্বর্যস্থানম্ |
দক্ষিণাযাং বিচালনস্থানম্ | পশ্চিমাযাং বৈরাগ্যস্থানম্ |
উত্তরাযাং জ্ঞানস্থানম্ | তস্মিন্যদন্তর্নির্লিপ্তমব্যযমনাদ্যন্ত-
মশেষবেদবেদান্তবেদ্যমনির্দেশ্যমনিরুক্তমপ্রচ্যবমাশাস্যমদ্বৈতং
সর্বাধারমনাধারমনিরীক্ষ্যমহরহর্ব্রহ্মবিষ্ণুপুরন্দরাদ্যমরবরসেবিতং
মামেব জ্যোতিঃস্বরূপং লিঙ্গং মামেবোপাসিতব্যং তদেবোপাসিতব্যম্ |
নৈব ভাবযন্তি তল্লিঙ্গং ভানুশ্চন্দ্রোঽগ্নির্বাযুঃ |
স্বপ্রকাশং বিশ্বেশ্বরাভিধং পাতালমধিতিষ্ঠতি |
তদেবাহম্ | তত্রার্চিতোঽহম্ | সাক্ষাদর্চিতঃ |
ত্রিশাখৈর্বিল্বদলৈর্দীপ্তৈর্বা যোঽভিসংপূজযেন্মন্মনা
ময্যাহিতাসুর্ময্যেবার্পিতাখিলকর্মা ভস্মদিগ্ধাঙ্গো
রুদ্রাক্ষভূষণো মামেব সর্বভাবেন প্রপন্নো
মদেকপূজানিরতঃ  সংপূজযেত্ | তদহমশ্নামি |
তং মোচযামি সংসৃতিপাশাত্ | অহরহরভ্যর্চ্য
বিশ্বেশ্বরং লিঙ্গং তত্র রুদ্রসূক্তৈরভিষিচ্য তদেব
স্নপনপযস্ত্রিঃ পীত্বা মহাপাতকেভ্যো মুচ্যতে | ন
শোকমাপ্নোতি | মুচ্যতে সংসারবন্ধনাত্ | তদনভ্যর্চ্য
নাশ্নীযাত্ফলমন্নমন্যদ্বা | যদশ্নীযাদ্রেতোভক্ষীভবেত্ |
নাপঃ পিবেত্ | যদি পিবেত্পূযপো ভবেত্ | প্রমাদেনৈকদা
ত্বনভ্যর্চ্য মাং ভুক্ত্বা ভোজযিত্বা কেশান্বাপযিত্বা
গব্যানাং পঞ্চ সংগৃহ্যোপোষ্য জলে রুদ্রস্নানম্ |
জপেত্ত্রিবারং রুদ্রানুবাকম্ | আদিত্যং পশ্যন্নভিধ্যায-
ন্স্বকৃতকর্মকৃদ্রৌদ্রেরেব মন্ত্রৈঃ কুর্যান্মার্জনম্ |
ততো ভোজযিত্বা ব্রাহ্মণান্পূতো ভবতি | অন্যথা পরেতো
যাতনামশ্নুতে | পত্রৈঃ ফলৈর্বা জলৈর্বান্যৈর্বাভিপূজ্য
বিশ্বেশ্বরং মাং ততোঽশ্নীযাত্ | কাপিলেন পযসাভিষিচ্য
রুদ্রসূক্তেন মামেব শিবলিঙ্গরূপিণং ব্রহ্মহত্যাযাঃ
পূতো ভবতি | কাপিলেনাজ্যেনাভিষিচ্য স্বর্ণস্তেযাত্পূতো ভবতি |
মধুনাভিষিচ্য গুরুদারগমনাত্পূতো ভবতি | সিতযা
শর্করযাভিষিচ্য সর্বজীববধাত্পূতো ভবতি |
ক্ষীরাদিভিরেতৈরভিষিচ্য সর্বানবাপ্নোতি কামান্ |
ইত্যেকৈকং মহান্প্রস্থশতং মহান্প্রস্থশতমানৈঃ
শতৈরভিপূজ্য মুক্তো ভবতি সংসারবন্ধনাত্ | মামেব
শিবলিঙ্গরূপিণমার্দ্রাযাং পৌর্ণমাস্যাং বামাবাস্যাযাং
বা মহাব্যতীপাতে গ্রহণে সংক্রান্তাবভিষিচ্য তিলৈঃ
সতণ্ডুলৈঃ সযবৈঃ সংপূজ্য বিল্বদলৈরভ্যর্চ্য কাপিলেনাজ্যান্বিত-
গন্ধসারধূপৈঃ পরিকল্প্য দীপং নৈবেদ্যং সাজ্যমুপহারং
কল্পযিত্বা দদ্যাত্পুষ্পাঞ্জলিম্ | এবং প্রযতোঽভ্যর্চ্য মম
সাযুজ্যমেতি | শতৈর্মহাপ্রস্থৈরখণ্ডৈস্তণ্ডুলৈরভিষিচ্য
চন্দ্রলোককামশ্চন্দ্রলোকমবাপ্নোতি | তিলৈরেতাবদ্ভিরভিষিচ্য
বাযুলোককামো বাযুলোকমবাপ্নোতি | মাষৈরেতাবদ্ভিরভিষিচ্য
বরুণলোককামো বরুণলোকমবাপ্নোতি | যবৈরেতাবদ্ভিরভিষিচ্য
সূর্যলোককামঃ সূর্যলোকমবাপ্নোতি | এতৈরেতাবদ্ভির্দ্বিগুণৈরভিষিচ্য
স্বর্গলোককামঃ স্বর্গলোকমবাপ্নোতি | এতৈরেতাবদ্ভিশ্চতুর্গুণৈরভিষিচ্য
চতুর্জালং ব্রহ্মকোশং যন্মৃত্যুর্নাবপশ্যতি | তমতীত্য মল্লোককামো
মল্লোকমবাপ্নোতি  নান্যং মল্লোকাত্পরম্ | যমবাপ্য ন শোচতি |
ন স পুনরাবর্ততে ন স পুনরাবর্ততে | লিঙ্গরূপিণং মাং সংপূজ্য
চিন্তযন্তি যোগিনঃ সিদ্ধাঃ সিদ্ধিং গতাঃ | যজন্তি যজ্বানঃ |
মামেব স্তুবন্তি বেদাঃ সাঙ্গাঃ সোপনিষদঃ সেতিহাসঃ |
ন মত্তোঽন্যদহমেব সর্বম্ | মযি সর্বং প্রতিষ্ঠিতম্ |
ততঃ কাশ্যাং প্রযতৈরেবাহমন্বহং পূজ্যঃ | তত্র গণা
রৌদ্রাননা নানামুখা নানাশস্ত্রধারিণো নানারূপধরা
নানাচিহ্নিতাঃ | তে সর্বে ভস্মদিগ্ধাঙ্গা রুদ্রাক্ষাভরণাঃ
কৃতাঞ্জলযো নিত্যমভিধ্যাযন্তি | তত্র পূর্বস্যং দিশি ব্রহ্মা
কৃতাঞ্জলিরহর্নিশং মামুপাস্তে | দক্ষিণস্যাং দিশি
বিষ্ণুঃ কৃত্বৈব মূর্ধাঞ্জলিং মামুপাস্তে | প্রতীচ্যামিন্দ্রঃ
সন্নতাঙ্গ উপাস্তে | উদীচ্যামগ্নিকাযমুমানুরক্তা হেমাঙ্গবিভূষণা
হেমবস্ত্রা মামুপাসতে মামেব বেদাশ্চতুর্মূর্তিধরাঃ | দক্ষিণাযাং দিশি
মুক্তিস্থানং তন্মুক্তিমণ্ডপসংজ্ঞিতম্ | তত্রানেকগণাঃ পালকাঃ
সাযুধাঃ পাপঘাতকাঃ | তত্র ঋষযঃ শাংভবাঃ পাশুপতা
মহাশৈবা বেদাবতংসং শৈবং পঞ্চাক্ষরং জপন্তস্তারকং
সপ্রণবং মোদমানাস্তিষ্ঠন্তি | তত্রৈকা রত্নবেদিকা | তত্রাহমাসীনঃ
কাশ্যাং ত্যক্তকুণপাঞ্ছৈবানানীয স্বস্যাঙ্কে সংনিবেশ্য
ভসিতরুদ্রাক্ষভূষিতানুপস্পৃশ্য মা ভূদেতেষাং জন্ম
মৃতিশ্চেতি তারকং শবং মনুমুপদিশামি |
ততস্তে মুক্তা মামনুবিশন্তি বিজ্ঞানমযেনাঙ্গেন |
ন পুনরাবর্তন্তে হুতাশনপ্রতিষ্ঠং হবিরিব তত্রৈব
মুক্ত্যর্থমুপদিশ্যতে শৈবোঽযং মন্ত্রঃ পঞ্চাক্ষরঃ |
তন্মুক্তিস্থানম্ | তত ওঙ্কাররূপম্ | ততো মদর্পিতকর্মণাং
মদাবিষ্টচেতসাং মদ্রূপতা ভবতি | নান্যেষমিযং
ব্রহ্মবিদ্যেযং ব্রহ্মবিদ্যা | মুমুক্ষবঃ কাশ্যামেবাসীনা
বীর্যবন্তো বিদ্যাবন্তঃ | বিজ্ঞানমযং ব্রহ্মকোশম্ |
চতুর্জালং ব্রহ্মকোশম্ | যন্মৃত্যুর্নাবপশ্যতি | যং ব্রহ্মা
নাবপশ্যতি | যং বিষ্ণুর্নাবপশ্যতি | যমিন্দ্রাগ্নী নাবপশ্যেতাম্ |
যং বরুণাদযো নাবপশ্যন্তি | তমেব তত্তেজ প্লুষ্টবিড্ভাবং
হৈমমুমাং সংশ্লিষ্য বসন্তং চন্দ্রকোটিসমপ্রভং
চন্দ্রকিরীটং সোমসূর্যাগ্নিনযনং ভূতিভূষিতবিগ্রহং
শিবং মামেবমভিধ্যাযন্তো মুক্তকিল্বিষাস্ত্যক্তবন্ধা
ময্যেব লীনা ভবন্তি | যে চান্যে কাশ্যাং পুরীষ কারিণঃ
প্রতিগ্রহরতাস্ত্যক্তভস্মধারণাস্ত্যক্তরুদ্রাক্ষধারণাস্ত্যক্ত-
সোমবারব্রতাস্ত্যক্তগ্রহযাগাস্ত্যক্তবিশ্বেশ্বরার্চনাস্ত্যক্ত-
পঞ্চাক্ষরজপাস্ত্যক্তভৈরবার্চনা ভৈরবীং ঘোরাদিযাতনাং
নানাবিধাং কাশ্যাং পরেতা ভুক্ত্বা ততঃ শুদ্ধা মাং প্রপদ্যন্তে
চ | অন্তর্গৃহে রেতো মূত্রং পুরীষং বা বিসৃজন্তি তদা তেন সিঞ্চন্তে
পিতৄন্ | তমেব পাপকারিণং মৃতং পশ্যন্নীললোহিতো ভৈরবস্তং
পাতযত্যস্রমণ্ডলে জ্বলজ্জ্বলনকুণ্ডেষ্বন্যেষ্বপি | ততশ্চাপ্রমাদেন
নিবসেদপ্রমাদেন নিবসেত্কাশ্যাং লিঙ্গরূপিণ্যামিত্যুপনিষত্ ||
ॐ ভদ্রং কর্ণেভিঃ শৃণুযাম দেবাঃ ||ভদ্রং পশ্যেমাক্ষভির্যজত্রাঃ ||
স্থিরৈরঙ্গৈস্তুষ্টুবাঁসস্তনূভিঃ ||ব্যশেম দেবহিতং যদাযুঃ ||
স্বস্তি ন ইন্দ্রো বৃদ্ধশ্রবাঃ ||স্বস্তি নঃ পূষা বিশ্ববেদাঃ ||
স্বস্তি নস্তার্ক্ষ্যো অরিষ্টনেমিঃ ||স্বস্তি নো বৃহস্পতির্দধাতু ||
ॐ শান্তিঃ শান্তিঃ শান্তিঃ ||হরিঃ ॐ তত্সত্ ||
ইতি ভস্মজাবালোপনিষত্সমাপ্তা ||