বৃহজ্জাবাল

.. বৃহজ্জাবালোপনিষত্

..যজ্জ্ঞানাগ্নিঃ স্বাতিরিক্তভ্রমং ভস্ম করোতি
তত্ .
বৃহজ্জাবালনিগমশিরোবেদ্যমহং মহঃ ..
ॐ ভদ্রং কর্ণেভিঃ শৃণুযাম দেবাঃ . ভদ্রং
পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ . ব্যশেম দেবহিতং
যদাযুঃ ..
স্বস্তি ন ইন্দ্রো বৃদ্ধশ্রবাঃ . স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ . স্বস্তি নো বৃহস্পতির্দধাতু ..
ॐ   শান্তিঃ   শান্তিঃ   শান্তিঃ ..
ॐ আপো বা ইদমসত্সলিলমেব . স প্রজাপতিরেকঃ পুষ্করপর্ণে
সমভবত্ .
তস্যান্তর্মনসি কামঃ সমবর্তত ইদং সৃজেযমিতি .
তস্মাদ্যত্পুরুষো
মনসাভিগচ্ছতি . তদ্বাচা বদতি . তত্কর্মণা করোতি .
তদেষাভ্যনূক্তা .
কামস্তদগ্রে সমবর্ততাধি . মনসো রেতঃ প্রথমং যদাসীত্ .
সতো বন্ধুমসতি নিরবিন্দন্ . হৃদি প্রতীষ্যা কবযো
মনীষেতি .
উপৈনং তদুপনমতি . যত্কামো ভবতি . য এবং বেদ . স
তপোঽতপ্যত .
স তপস্তপ্ত্বা . স এতং ভুসুণ্ডঃ কালাগ্নিরুদ্রমগমদাগত্য ভো
বিভূতের্মাহাত্ম্যং ব্রূহীতি তথেতি প্রত্যবোচদ্ভুসুণ্ডং
বক্ষ্যমাণং কিমিতি
বিভূতিরুদ্রাক্ষযোর্মাহাত্ম্যং বভাণেতি আদাবেব পৈপ্পলাদেন
সহোক্তমিতি
তত্ফলশ্রুতিরিতি তস্যোর্ধ্বং কিং বদামেতি .
বৃহজ্জাবালাভিধাং মুক্তিশ্রুতিং
মমোপদেশং কুরুষ্বেতি . ॐ তদেতি . সদ্যোজাতাত্পৃথিবী .
তস্যাঃ স্যান্নিবৃত্তিঃ .
তস্যাঃ কপিলবর্ণানন্দা . তদ্গোমযেন বিভূতির্জাতা .
বামদেবাদুদকম্ .
তস্মাত্প্রতিষ্ঠা . তস্যাঃ কৃষ্ণবর্ণাভদ্রা . তদ্গোমযেন
ভসিতং জাতম্ .
অঘোরাদ্বহ্নিঃ . তস্মাদ্বিদ্যা . তস্যা রক্তবর্ণা সুরভিঃ .
তদ্গোমযেন ভস্ম জাতম্ .
তত্পুরুষাদ্বাযুঃ . তস্মাচ্ছান্তিঃ . তস্যাঃ শ্বেতবর্ণা
সুশীলা . তস্যা
গোমযেন ক্ষারং জাতম্ . ঈশানাদাকাশম্ .
তস্মাচ্ছান্ত্যতীতা .
তস্যাশ্চিত্রবর্ণা সুমনাঃ . তদ্গোমযেন রক্ষা জাতা .
বিভূতির্ভসিতং ভস্ম
ক্ষারং রক্ষেতি ভস্মনো ভবন্তি পঞ্চ নামানি .
পঞ্চভির্নামভির্ভৃশমৈশ্বর্যকারণাদ্ভূতিঃ . ভস্ম
সর্বাঘভক্ষণাত্ .
ভাসনাদ্ভসিতম্ . ক্ষারণদাপদাং ক্ষারম্ .
ভূতপ্রেতপিশাচব্রহ্মরাক্ষসাপস্মারভবভীতিভ্যোঽভিরক্ষণ
অদ্রক্ষেতি ..
প্রথমং ব্রাহ্মণম্ .. ১..
অথ ভুসুণ্ডঃ কালাগ্নিরুদ্রমগ্নীষোমাত্মকং ভস্মস্নানবিধিং
পপ্রচ্ছ .
অগ্নির্যথৈকো ভুবনং প্রবিষ্টো রূপং রূপং প্রতিরূপো বভূব .
একং ভস্ম সর্বভূতান্তরাত্মা রূপং রূপং প্রতিরূপো
বহিশ্চ ..
অগ্নীষোমাত্মকং বিশ্বমিত্যগ্নিরাচক্ষতে .
রৌদ্রী ঘোরা যা তৈজসী তনূঃ . সোমঃ শক্ত্যমৃতমযঃ
শক্তিকরী তনূঃ .
অমৃতং যত্প্রতিষ্ঠা সা তেজোবিদ্যাকলা স্বযম্ .
স্থূলসূক্ষ্মেষু ভূতেষু স এব রসতেজসী .. ১..
দ্বিবিধা তেজসো বৃত্তিঃ সূর্যাত্মা চানলাত্মিকা .
তথৈব রসশক্তিশ্চ সোমাত্মা চানলাত্মিকা .. ২..
বৈদ্যুদাদিমযং তেজো মধুরাদিমযো রসঃ .
তেজোরসবিভেদৈস্তু বৃত্তমেতচ্চরাচরম্ .. ৩..
অগ্নেরমৃতনিষ্পত্তিরমৃতেনাগ্নিরেধতে .
অত এব হবিঃ ক্লৃপ্তমগ্নীষোমাত্মকং জগত্ .. ৪..
ঊর্ধ্বশক্তিমযং সোম অধোশক্তিমযোঽনলঃ .
তাভ্যাং সংপুটিতস্তস্মাচ্ছশ্বদ্বিশ্বমিদং জগত্ .. ৫..
অগ্নেরূর্ধ্বং ভবত্যেষা যাবত্সৌম্যং পরামৃতম্ .
যাবদগ্ন্যাত্মকং সৌম্যমমৃতং বিসৃত্যধঃ .. ৬..
অত এব হি কালাগ্নিরধস্তাচ্ছক্তিরূর্ধ্বগা .
যাবদাদহনশ্চোর্ধ্বমধস্তাত্পাবনং ভবেত্ .. ৭..
আধারশক্ত্যাবধৃতঃ কালাগ্নিরযমূর্ধ্বগঃ .
তথৈব নিম্নগঃ সোমঃ শিবশক্তিপদাস্পদঃ .. ৮..
শিবশ্চোর্ধ্বমযঃ শক্তিরূর্ধ্বশক্তিমযঃ শিবঃ .
তদিত্থং শিবশক্তিভ্যাং নাব্যাপ্তমিহ কিংচন .. ৯..
অসকৃচ্চাগ্নিনা দগ্ধং জগত্তদ্ভস্মসাত্কৃতম্ .
অগ্নের্বীর্যমিদং প্রাহুস্তদ্বীর্যং ভস্ম যত্ততঃ .. ১০..
যশ্চেত্থং ভস্মসদ্ভাবং জ্ঞাত্বাভিস্নাতি ভস্মনা .
অগ্নিরিত্যাদিভির্মন্ত্রৈর্দগ্ধপাপঃ স উচ্যতে .. ১১..
অগ্নের্বীর্যং চ তদ্ভস্ম সোমেনাপ্লাবিতং পুনঃ .
অযোগযুক্ত্যা প্রকৃতেরধিকারায কল্পতে .. ১২..
যোগযুক্ত্যা তু তদ্ভস্ম প্লাব্যমানং সমন্ততঃ .
শাক্তেনামৃতবর্ষেণ হ্যধিকারান্নিবর্ততে .. ১৩..
অতো মৃত্যুঞ্জযাযেত্থমমৃতপ্লাবনং সতাম্ .
শিবশক্ত্যমৃতস্পর্শে লব্ধ এব কুতো মৃতিঃ .. ১৪..
যো বেদ গহনং গুহ্যং পাবনং চ তথোদিতম্ .
অগ্নীষোমপুটং কৃত্বা ন স ভূযোঽভিজাযতে .. ১৫..
শিবাগ্নিনা তনুং দগ্ধ্বা শক্তিসোমামৃতেন যঃ .
প্লাবযেদ্যোগমার্গেণ সোঽমৃতত্বায কল্পতে সোঽমৃত্বায কল্পত
ইতি .. ১৬..
দ্বিতীযং ব্রাহ্মণম্ .. ২..
অথ ভুসুণ্ডঃ কালাগ্নিরুদ্রং বিভূতিযোগমনুব্রূহীতি হোবাচ
বিকটাঙ্গামুন্মত্তাং মহাখলাং মলিনামশিবাদিচিহ্নান্বিতাং
পুনর্ধেনুং কৃশাঙ্গাং বত্সহীনামশান্তামদুঘ্ধদোহিনীং
নিরিন্দ্রিযাং জগ্ধতৃণাং কেশচেলাস্থিভক্ষিণীং সন্ধিনীং
নবপ্রসূতাং রোগার্তাং গাং বিহায
প্রশস্তগোমযমাহরেদ্গোমযং স্বস্থং গ্রাহ্যং শুভে স্থানে বা
পতিতমপরিত্যজ্যাত ঊর্ধ্বং মর্দযেদ্গব্যেন গোমযগ্রহণং কপিলা
বা ধবলা বা অলাভে তদন্যা গৌঃ স্যাদ্দোষবর্জিতা
কপিলাগোর্ভস্মোক্তং লব্ধং গোভস্ম নো চেদন্যগোক্ষারং যত্র
ক্বাপি স্থিতং চ যত্তন্ন হি ধার্যং সংস্কারসহিতং
ধার্যম্ .
তত্রৈতে শ্লোকা ভবন্তি .
বিদ্যাশক্তিঃ সমস্তানাং শক্তিরিত্যভিধীযতে .
গুণত্রযাশ্রযা বিদ্যা সা বিদ্যা চ তদাশ্রযা .. ১..
গুণত্রযমিদং ধেনুর্বিদ্যাভূদ্গোমযং শুভম্ .
মূত্রং চোপনিষত্প্রোক্তং কুর্যাদ্ভস্ম ততঃ পরম্ ..
বত্সস্তু স্মৃতযশ্চাস্য তত্সংভূতং তু গোমযম্ .
আগাব ইতি মন্ত্রেণ ধেনুং তত্রাভিমন্ত্রযেত্ .. ৩..
গাবো ভগ গাবো ইতি প্রাশযেত্তর্পণং জলম্ .
উপোষ্য চ চতুর্দশ্যাং শুক্লে কৃষ্ণেঽথবা ব্রতী .. ৪..
পরেদ্যুঃ প্রাতরুত্থায শুচির্ভূত্বা সমাহিতঃ .
কৃতস্নানো ধৌতবস্ত্রঃ পযোর্ধং চ সৃজেচ্চ গাম্ .. ৫..
উত্থাপ্য গাং প্রযত্নেন গাযত্র্যা মূত্রমাহরেত্ .
সৌবর্ণে রাজতে তাম্রে ধারযেন্মৃণ্মযে ঘটে .. ৬..
পৌষ্করেঽথ পলাশে বা পাত্রে গোশৃঙ্গ এব বা .
আদধীত হি গোমূত্রং গন্ধদ্বারেতি গোমযম্ .. ৭..
অভূমিপাতং গৃহ্ণীযাত্পাত্রে পূর্বোদিতে গৃহী .
গোমযং শোধযেদ্বিদ্বান্শ্রীর্মে ভজতুমন্ত্রতঃ .. ৮..
অলক্ষ্মীর্ম ইতি মন্ত্রেণ গোমযং ধান্যবর্জিতম্ .
সংত্বাসিংচামি মন্ত্রেণ গোমযে ক্ষিপেত্ .. ৯..
পঞ্চানাং ত্বিতি মন্ত্রেণ পিণ্ডানাং চ চতুর্দশ .
কুর্যাত্সংশোধ্য কিরণৈঃ সৌরকৈরাহরেত্ততঃ .. ১০..
নিদধ্যাদথ পূর্বোক্তপাত্রে গোমযপিণ্ডকান্ .
স্বগৃহ্যোক্তবিধানেন প্রতিষ্ঠাপ্যাগ্নিমীজযেত্ .. ১১..
পিণ্ডাংশ্চ নিক্ষিপেত্তত্র আদ্যন্তং প্রণবেন তু .
ষডক্ষরস্য সূক্তস্য ব্যাকৃতস্য তথাক্ষরৈঃ .. ১২..
স্বাহান্তে জুহুযাত্তত্র বর্ণদেবায পিণ্ডকান্ .
আঘারাবাজ্যভাগৌ চ প্রক্ষিপেদ্ব্যাহৃতীঃ সুধীঃ .. ১৩..
ততো নিধনপতযে ত্রযোবিংশজ্জুহোতি চ .
হোতব্যাঃ পঞ্চ ব্রহ্মাণি নমো হিরণ্যবাহবে .. ১৪..
ইতি সর্বাহুতির্হুত্বা চতুর্থ্যন্তৈশ্চ মন্ত্রকৈঃ .
ঋতংসত্যং কদ্রুদ্রায যস্য বকঙ্কতীতি চ .. ১৫..
এতৈশ্চ জুহুযাদ্বিদ্বাননাজ্ঞাতত্রযং তথা .
ব্যাহৃতীরথ হুত্বা চ ততঃ স্বিষ্টকৃতং হুনেত্ .. ১৬..
হোমশেষং তু নির্বর্ত্য পূর্ণপাত্রোদকং তথা .
পূর্ণমসীতি যজুষা জলেনান্যেন বৃংহযেত্ .. ১৭..
ব্রাহ্মণেষ্বমৃতমিতি তজ্জলং শিরসি ক্ষিপেত্ .
প্রাচ্যামিতি দিশাং লিঙ্গৈর্দিক্ষু তোযং বিনিক্ষিপেত্ .. ১৮..
ব্রহ্মণে দক্ষিণাং দত্ত্বা শান্ত্যৈ পুলকমাহরেত্ .
আহরিষ্যামি দেবানাং সর্বেষাং কর্মগুপ্তযে .. ১৯..
জাতবেদসমেনং ত্বাং পুলকৈশ্ছাদযাম্যহম্ .
মন্ত্রেণানেন তং বহ্নিং পুলকৈশ্ছাদযেত্ততঃ .. ২০..
ত্রিদিনং জ্বলনস্থিত্যৈ ছাদনং পুলকৈঃ স্মৃতম্ .
ব্রাহ্মণান্ভোজযেদ্ভক্ত্যা স্বযং ভুঞ্জীত বাগ্যতঃ .. ২১..
ভস্মাধিক্যমভীপ্সুস্তু অধিকং গোমযং হরেত্ .
দিনত্রযেণ যদি বা একস্মিন্দিবসেঽথবা .. ২২..
তৃতীযে বা চতুর্থে বা প্রাতঃ স্নাত্বা সিতাম্বরঃ .
শুক্লযজ্ঞোপবীতী চ শুক্লমাল্যানুলেপনঃ .. ২৩..
শুক্লদন্তো ভস্মদিগ্ধো মন্ত্রেণানেন মন্ত্রবিত্ .
ॐ তদ্ব্রহ্মেতি চোচ্চার্য পৌলকং ভস্ম সংত্যজেত্ .. ২৪..
তত্র চাবাহনমুখানুপচারাংস্তু ষোডশ .
কুর্যাদ্ব্যাহৃতিভিস্ত্বেবং ততোঽগ্নিমুপসংহরেত্ .. ২৫..
অগ্নির্ভস্মেতি মন্ত্রেণ গৃহ্ণীযাদ্ভস্ম চোত্তরম্ .
অগ্নিরিত্যাদিমন্ত্রেণ প্রমৃজ্য চ ততঃ পরম্ .. ২৬..
সংযোজ্য গন্ধসলিলৈঃ কপিলামূত্রকেণ বা .
চন্দ্রকুঙ্কুমকাশ্মীরমুশিরং চন্দনং তথা .. ২৭..
অগরুত্রিতযং চৈব চূর্ণযিত্বা তু সূক্ষ্মতঃ .
ক্ষিপেদ্ভস্মনি তচ্চূর্ণমোমিতি ব্রহ্মমন্ত্রতঃ .. ২৮..
প্রণবেনাহরেদ্বিদ্বান্বৃহতো বটকানথ .
অণোরণীযনিতি হি মন্ত্রেণ চ বিচক্ষণঃ .. ২৯..
ইত্থং ভস্ম সুসম্পাদ্য শুষ্কমাদয মন্ত্রবিত্ .
প্রণবেন বিমৃজ্যাথ সপ্তপ্রণবমন্ত্রিতম্ .. ৩০..
ঈশানেতি শিরোদেশে মুখং তত্পুরুষেণ তু .
উরুদেশমঘোরেণ গুহ্যং বামেন মন্ত্রযেত্ .. ৩১..
সদ্যোজাতেন বৈ পাদান্সর্বাঙ্গং প্রণবেন তু .
তত উদ্ধূল্য সর্বাঙ্গমাপাদতলমস্তকম্ .. ৩২..
আচম্য বসনং ধৌতং ততশ্চৈতত্প্রধারযেত্ .
পুনরাচম্য কর্ম স্বং কর্তুমর্হসি সত্তম .. ৩৩..
অথ চতুর্বিধং ভস্ম কল্পম্ .
প্রথমমনুকল্পম্ . দ্বিতীযমুপকল্পম্ .
উপোপকল্পং তৃতীযম্ . অকল্পং চতুর্থম্ .
অগ্নিহোত্রং সমুদ্ভূতং বিরজানলজমনুকল্পম্ .
বনে শুষ্কং শকৃত্সংগৃহ্য কল্পোক্তবিধিনা
কল্পিতমুপকল্পং স্যাত্ .
অরণ্যে শুষ্কগোমযং চূর্ণীকৃত্য গোমূত্রৈঃ পিণ্ডীকৃত্য
যথাকল্পং সংস্কৃতমুপোপকল্পম্ .  শিবালযস্থমকল্পং
শতকল্পং চ .
ইত্থং চতুর্বিধং ভস্ম পাপং নিকৃন্তযেন্মোক্ষং দদাতীতি
ভগবান্কালাগ্নিরুদ্রঃ .. ৩৪..
ইতি তৃতীযং ব্রাহ্মণম্ .. ৩..
অথ ভুসুণ্ডঃ কালাগ্নিরুদ্রং ভস্মস্নানবিধিং ব্রূহীতি
হোবাচাথ প্রণবেন বিমৃজ্যাথ
সপ্তপ্রণবেনাভিমন্ত্রিতমাগমেন তু তেনৈব দিগ্বন্ধনং
কারযেত্পুনরপি তেনাস্ত্রমন্ত্রেণাঙ্গানি
মূর্ধাদীন্যুদ্ধূলযেন্মলস্নানমিদমীশানাদ্যৈঃ
পঞ্চভির্মন্ত্রৈস্তনুং ক্রমাদ্ধূলযেত্ .
ঈশানেতি শিরোদেশং মুখং তত্পুরুষেণ তু . ঊরুদেশমঘোরেণ
গুহ্যকং বামদেবতঃ .
সদ্যোজাতেন বৈ পাদো সর্বাঙ্গং প্রণবেন তু . আপাদতলমস্তকং
সর্বাঙ্গং তত উদ্ধূলাচম্য
বসনং ধৌতং শ্বেতং প্রধারযেদ্বিধিস্নানমিদম্ ..
তত্র শ্লোকা ভবন্তি .
ভস্মমুষ্টিং সমাদায সংহিতামন্ত্রমন্ত্রিতাম্ .
মস্তকাত্পাদপর্যন্তং মলস্নানং পুরোদিতম্ .. ১..
তন্মন্ত্রেণৈব কর্তব্যং বিধিস্নানং সমাচরেত্ .
ঈশানে পঞ্চধা ভস্ম বিকিরেন্মূর্ধ্নি যত্রতঃ .. ২..
মুখে চতুর্থবক্ত্রেণ অঘোরেণাষ্টধা হৃদি .
বামেন গুহ্যদেশে তু ত্রিদশস্থানভেদতঃ .. ৩..
অষ্টাবন্তেন সাধ্যেন পাদাবদ্ধূল্য যত্রতঃ .
সর্বাঙ্গোদ্ধূলনং কার্যং রাজন্যস্য যথাবিধি .. ৪..
মুখং বিনা চ তত্সর্বমুদ্ধূল্য ক্রমযোগতঃ .
সন্ধ্যাদ্বযে নিশীথে চ তথা পূর্বাবসানযোঃ .. ৫..
সুপ্ত্বা ভুক্ত্বা পযঃ পীত্বা কৃত্বা চাবশ্যকাদিকম্ .
স্ত্রিযং নপুংসকং গৃধ্রং বিডালং বকমূষিকম্ .. ৬..
স্পৃষ্ট্বা তথাবিধানন্যান্ভস্মস্নানং সমাচরেত্ .
দেবাগ্নিগুরুবৃদ্ধানাং সমীপেঽন্ত্যজদর্শনে .. ৭..
অশুদ্ধভূতলে মার্গে কুর্যানোদ্ধূলনং ব্রতী .
শঙ্খতোযেন মূলেন ভস্মনা মিশ্রণং ভবেত্ .. ৮..
যোজিতং চন্দনেনৈব বারিণা ভস্মসংযুতম্ .
চন্দনেন সমালিম্পেজ্জ্ঞানদং চূর্ণমেব তত্ .. ৯..
মধ্যাহ্নাত্প্রাগ্জলৈর্যুক্তং তোযং তদনুবর্জযেত্ ..
অথ ভুসুণ্ডো ভগবন্তং কালাগ্নিরুদ্রং ত্রিপুণ্ড্রবিধিং
পপ্রচ্ছ ..
তত্রৈতে শ্লোকা ভবন্তি .
ত্রিপুণ্ড্রং কারযেত্পশ্চাদ্ব্রহ্মবিষ্ণুশিবাত্মকম্ .
মধ্যাঙ্গুলিভিরাদায তিসৃভির্মূলমন্ত্রতঃ .. ১০..
অনামামধ্যমাঙ্গুষ্ঠৈরথবা স্যাত্ত্রিপুণ্ড্রকম্ .
উদ্ধূলযেন্মুখং বিপ্রঃ ক্ষত্রিযস্তচ্ছিরোদিনম্ .. ১১..
দ্বাত্রিংশস্থানকে চার্ধং ষোডশস্থানকেঽপি বা .
অষ্টস্থানে তথা চৈব পঞ্চস্থানেঽপি যোজযেত্ .. ১২..
উত্তমাঙ্গে ললাটে চ কর্ণযোর্নেত্রযোস্তথা .
নাসাবক্রে গলে চৈবমংসদ্বযমতঃ পরম্ .. ১৩..
কূর্পরে মণিবন্ধে চ হৃদযে পার্শ্বযোর্দ্বযোঃ .
নাভৌ গুহ্যদ্বযে চৈবমূর্বোঃ স্ফিগ্বিম্বজানুনী .. ১৪..
জঙ্ঘাদ্বযে চ পাদৌ চ দ্বাত্রিংশত্স্থানমুত্তমম্ .
অষ্টমূর্ত্যষ্টবিদ্যেশান্দিক্পালান্বসুভিঃ সহ .. ১৫..
ধরো ধ্রুবশ্চ সোমশ্চ কৃপশ্চৈবানিলোঽনলঃ .
প্রত্যূপশ্চ প্রভাসশ্চ বসবোঽষ্টাবিতীরিতাঃ .. ১৬..
এতেষাং নামমন্ত্রেণ ত্রিপুণ্ড্রান্ধারযেদ্বুধঃ .
বিদধ্যাত্ষোডশস্থানে ত্রিপুণ্ড্রং তু সমাহিতঃ .. ১৭..
শীর্ষকে চ ললাটে চ কর্ণে কণ্ঠেংঽসকদ্বযে .
কূর্পরে মণিবন্ধে চ হৃদযে নাভিপার্শ্বযোঃ .. ১৮..
পৃষ্ঠে চৈকং প্রতিস্থানং জপেত্তত্রাধিদেবতাঃ .
শিবং শক্তিং চ সাদাখ্যমীশং বিদ্যাখ্যমেব চ .. ১৯..
বামাদিনবশক্তীশ্চ এতাঃ ষোডশ দেবতাঃ .
নাসত্যো দস্রকশ্চৈব অশ্বিনৌ দ্বৌ সমীরিতৌ .. ২০..
অথবা মূর্ধ্ন্যলীকে চ কর্ণযোঃ শ্বসনে তথা .
বাহুদ্বযে চ হৃদযে নাভ্যামূর্বোর্যুগে তথা .. ২১..
জানুদ্বযে চ পদযোঃ পৃষ্ঠভাগে চ ষোডশ .
শিবশ্চেন্দ্রশ্চ রুদ্রার্কৌ বিঘ্নেশো বিষ্ণুরেব চ .. ২২..
শ্রীশ্চৈব হৃদযেশশ্চ তথা নাভৌ প্রজাপতিঃ .
নাগশ্চ নাগকন্যাশ্চ উভে চ ঋষিকন্যকে .. ২৩..
পাদযোশ্চ সমুদ্রাশ্চ তীর্থাঃ পৃষ্ঠেঽপি চ স্থিতাঃ .
এবং বা ষোডশস্থানমষ্টস্থানম্থোচ্যতে .. ২৪..
গুরুস্থানং ললাটং চ কর্ণদ্বযমনন্তরম্ .
অসযুগ্মং চ হৃদযং নাভিরিত্যষ্টমং ভবেত্ .. ২৫..
ব্রহ্মা চ ঋষযঃ সপ্ত দেবতাশ্চ প্রকীর্তিতাঃ .
অথবা মস্তকং বাহূ হৃদযং নাভিরেব চ .. ২৬..
পঞ্চস্থানান্যমূন্যাহুর্ভস্মতত্ত্ববিদো জনাঃ .
যথাসম্ভবতঃ কুর্যাদ্দেশকলাদ্যপেক্ষযা .. ২৭..
উদ্ধূলনেঽপ্যশক্তশ্চেত্ত্রিপুণ্ড্রাদীনি কারযেত্ .
ললাটে হৃদযে নাভৌ গলে চ মণিবন্ধযোঃ .. ২৮..
বাহুমধ্যে বাহুমূলে পৃষ্ঠে চৈব চ শীর্ষকে ..
ললাটে ব্রহ্মণে নমঃ . হৃদযে হব্যবাহনায নমঃ .
নাভৌ স্কন্দায নমঃ . গলে বিষ্ণবে নমঃ .
মধ্যে প্রভঞ্জনায নমঃ . মণিবন্ধে বসুভ্যো নমঃ .
পৃষ্ঠে হরযে নমঃ . কুকুদি শম্ভবে নমঃ .
শিরসি পরমাত্মনে নমঃ . ইত্যাদিস্থানেষু ত্রিপুণ্ড্রং
ধারযেত্ ..
ত্রিনেত্রং ত্রিগুণাধারং ত্রযাণাং জনকং প্রভুম্ .
স্মরন্নমঃ শিবাযেতি ললাটে তত্ত্রিপুণ্ড্রকম্ .. ২৯..
কূর্পরাধঃ পিতৃভ্যাং তু ঈশানাভ্যাং তথোপরি .
ঈশাভ্যাং নম ইত্যুক্ত্বা পার্শ্বযোশ্চ ত্রিপুণ্ড্রকম্ .. ৩০..
স্বচ্ছাভ্যাং নম ইত্যুক্ত্বা ধারযেত্তত্প্রকোষ্ঠযোঃ .
ভীমাযেতি তথা পৃষ্ঠে শিবাযেতি চ পার্শ্বযোঃ .. ৩১..
নীলকণ্ঠায শিরসি ক্ষিপেত্সর্বাত্মনে নমঃ .
পাপং নাশযতে কৃত্স্নমপি জন্মান্তরার্জিতম্ .. ৩২..
কণ্ঠোপরি কৃতং পাপং নষ্টং স্যাত্তত্র ধারণাত্ .
কর্ণে তু ধারণাত্কর্ণরোগাদিকৃতপাতকম্ .. ৩৩..
বাহ্বোবাহুকৃতং পাপং বক্ষঃসু মনসা কৃতম্ .
নাভ্যাং শিশ্নকৃতং পাপং পৃষ্ঠে গুদকৃতং তথা .. ৩৪..
পার্শ্বযোর্ধারণাত্পাপং পরস্ত্র্যালিঙ্গনাদিকম্ .
তদ্ভস্মধারণং কুর্যাত্সর্বত্রৈব ত্রিপুণ্ড্রকম্ .. ৩৫..
ব্রহ্মবিষ্ণুমহেশানাং ত্রয্যগ্নীনাং চ ধারণম্ .
গুণলোকত্রযাণাং চ ধারণং তেন বৈ শ্রুতম্ .. ৩৬..
ইতি চতুর্থং ব্রাহ্মণম্ .. ৪..
মানস্তোকেন মন্ত্রেণ মন্ত্রিতং ভস্ম ধারযেত্ .
ঊর্ধ্বপুণ্ড্রং ভবেত্সামং মধ্যপুণ্ড্রং ত্রিযাযুষম্ .. ১..
ত্রিযাযুষাণি কুরুতে ললাটে চ ভুজদ্বযে .
নাভৌ শিরসি হৃত্পার্শ্বে ব্রাহ্মণাঃ ক্ষত্রিযাস্তথা .. ২..
ত্রৈবর্ণিকানাং সর্বেষামগ্নিহোত্রসমুদ্ভবম্ .
ইদং মুখ্যং গৃহস্থানাং বিরজানলজং ভবেত্ .. ৩..
বিরজানলজং চৈব ধার্যং প্রোক্তং মহর্ষিভিঃ .
ঔপাসনসমুত্পন্নং গৃহস্থানাং বিশেষতঃ .. ৪..
সমিদগ্নিসমুত্পন্নং ধার্যং বৈ ব্রহ্মচারিণা .
শূদ্রাণাং শ্রোত্রিযাগারপচনাগ্নিসমুদ্ভবম্ .. ৫..
অন্যেষামপি সর্বেষাং ধার্যং চৈবানলোদ্ভবম্ .
যতীনাং জ্ঞানদং প্রোক্তং বনস্থানাং বিরক্তিদম্ .. ৬..
অতিবর্ণাশ্রমাণাং তু শ্মশানাগ্নিসমুদ্ভবম্ .
সর্বেষাং দেবালযস্থং ভস্ম শিবাগ্নিজং শিবযোগিনাম্ .
শিবালযস্থং তল্লিঙ্গলিপ্তং বা মন্ত্রসংস্কারদগ্ধং বা ..
তত্রৈতে শ্লোকা ভবন্তি .
তেনাধীতং শ্রুতং তেন তেন সর্বমনুষ্ঠিতম্ .
যেন বিপ্রেণ শিরসি ত্রিপুণ্ড্রং ভস্মনা ধৃতম্ .. ৭..
ত্যক্তবর্ণাশ্রমাচারো লুপ্তসর্বক্রিযোঽপি যঃ .
সকৃত্তির্যক্ত্রিপুণ্ড্রাঙ্কধারণাত্সোঽপি পূজ্যতে .. ৮..
যে ভস্মধারণং ত্যক্ত্বা কর্ম কুর্বন্তি মানবাঃ .
তেষাং নাস্তি বিনির্মোক্ষঃ সংসারাজ্জন্মকোটিভিঃ .. ৯..
মহাপাতকযুক্তানাং পূর্বজন্মার্জিতাগসাম্ .
ত্রিপুণ্ড্রোদ্ধূলনদ্বেষো জাযতে সুদৃঢং বুধাঃ .. ১০..
যেষাং কোপো ভবেদ্ব্রহ্মং৅ল্ললাটে ভস্মদর্শনাত্ .
তেষামুত্পত্তিসাঙ্কর্যমনুমেযং বিপশ্চিতা .. ১১..
যেষাং নাস্তি মুনে শ্রদ্ধা শ্রৌতে ভস্মনি সর্বদা .
গর্ভাধানাদিসংস্কারস্তেষাং নাস্তীতি নিশ্চযঃ .. ১২..
যে ভস্মধারিণং দৃষ্ট্বা নরাঃ কুর্বন্তি তাডনম্ .
তেষাং চণ্ডালতো জন্ম ব্রহ্মন্নূহ্যং বিপশ্চিতা .. ১৩..
যেষাং ক্রোধো ভবেদ্ভস্মধারণে তত্প্রমাণকে .
তে মহাপাতকৈর্যুক্তা ইতি শাস্ত্রস্য নিশ্চযঃ .. ১৪..
ত্রিপুণ্ড্঱কং যে বিনিন্দন্তি নিন্দন্তি শিবমেব তে .
ধারযন্তি চ যে ভক্ত্যা ধারযন্তি শিবং চ তে .. ১৫..
ধিগ্ভস্মরহিতং ভালং ধিগ্গ্রামমশিবালযম্ .
ধিগনীশার্চনং জন্ম ধিগ্বিদ্যামশিবাশ্রযাম্ .. ১৬..
রুদ্রাগ্নের্যত্পরং বীর্যং তদ্ভস্ম পরিকীর্তিতম্ .
তস্মাত্সর্বেষু কালেষু বীর্যবান্ভস্মসংযুতঃ .. ১৭..
ভস্মনিষ্ঠস্য দহ্যন্তে দোষা ভস্মাগ্নিসঙ্গমাত্ .
ভস্মস্নানবিশুদ্ধাত্মা ভস্মনিষ্ঠ ইতি স্মৃতঃ .. ১৮..
ভস্মসন্দিগ্ধসর্বাঙ্গো ভস্মদীপ্তত্রিপুণ্ড্রকঃ .
ভস্মশাযী চ পুরুষো ভস্মনিষ্ঠ ইতি স্মৃতঃ .. ১৯..
ইতি পঞ্চমং ব্রাহ্মণম্ .. ৫..
অথ ভুসুণ্ডঃ কালাগ্নিরুদ্রং নামপঞ্চকস্য মাহাত্ম্যং
ব্রূহীতি হোবাচ . অথ বসিষ্ঠবংশজস্য শতভার্যাসমেতস্য
ধনঞ্জযস্য ব্রাহ্মণস্য জ্যেষ্ঠভার্যাপুত্রঃ করুণ ইতি নাম
তস্য শুচিস্মিতা ভার্যা . অসৌ করুণো ভ্রাতৃবৈরমসহমানো
ভবানীতটস্থং নৃসিংহমগমত্ . তত্র
দেবসমীপেঽন্যেনোপাযনার্থং
সমর্পিতং জম্বীরফলং গৃহীত্বাজিঘ্রত্তদা তত্রস্থা
অশপন্পাপ
মক্ষিকো ভব বর্ষাণাং শতমিতি . সোঽপি শাপমাদায মক্ষিকঃ
সন্স্বচেষ্টিতং তস্যৈ নিবেদ্য মাং রক্ষেতি স্বভার্যামবদত্তদা
মক্ষিকোঽভবত্তমেবং জ্ঞাত্বা জ্ঞাতযস্তৈলমধ্যে হ্যমারযন্ত্সা
মৃতং পতিমাদাযারুন্ধতীমগমদ্ভো শুচিস্মিতে
শোকেনালমরুন্ধত্যাহামুং
জীবযাম্যদ্য বিভূতিমাদাযেতি এষাগ্নিহোত্রজং ভস্ম ..
মৃত্যুঞ্জযেন মন্ত্রেণ মৃতজন্তৌ তদাক্ষিপত্ .
মন্দবাযুস্তদা জজ্ঞে ব্যজনেন শুচিস্মিতে .. ১..
উদতিষ্ঠত্তদা জন্তুর্ভস্মনোঽস্য প্রভাবতঃ .
ততো বর্ষশতে পূর্ণে জ্ঞাতিরেকো হ্যমারযত্ .. ২..
ভস্মৈব জীবযামাস কাশ্যাং পঞ্চ তদাভবন্ .
দেবানপি তথাভূতান্মামপ্যেতাদৃশং পুরা .. ৩..
তস্মাত্তু ভস্মনাং জন্তুং জীবযামি তদানঘে .
ইত্যেবমুক্ত্বা ভগবান্দধীচিঃ সমজাযত .. ৪..
স্বরূপং চ ততো গত্বা স্বমাশ্রমপদং যযাবিতি ..
ইদানীমস্য ভস্মনঃ সর্বাঘভক্ষণসামর্থ্যং
বিধত্ত ইত্যাহ . শ্রীগৌতমবিবাহকালে তামহল্যাং
দৃষ্ট্বা সর্বে দেবাঃ কামাতুরা অভবন্ তদা
নষ্টজ্ঞানা দুর্বাসসং গত্বা পপ্রচ্ছুস্তদ্দোষং
শমযিষ্যাঅমীত্যুবাচ ততঃ শতরুদ্রেণ মন্ত্রেণ
মন্ত্রিতং ভস্ম বৈ পুরা মযাপি দত্তং ব্রহ্মহত্যাদি শান্তম্ .
ইত্যেবমুক্ত্বা দুর্বাসা দত্তবান্ভস্ম চোত্তমম্ .
জাতা মদ্বচনাত্সর্বে যূযং তেঽধিকতেজসঃ .. ৫..
শতরুদ্রেণ মন্ত্রেণ ভস্মোদ্ধূলিতবিগ্রহাঃ .
নির্ধূতরজসঃ সর্বে তত্ক্ষণাচ্চ বযং মুনে .. ৬..
আশ্চর্যমেতজ্জানীমো ভস্মসামর্থ্যমীদৃশম্ .
অস্য ভস্মনঃ শক্তিমন্যাং শৃণু .
এতদেব হরিশঙ্করযোর্জ্ঞানপ্রদম্ .
ব্রহ্মহত্যাদি পাপনাশকম্ .
মহাবিভূতিদমিতি শিববক্ষসি স্থিতং নখেনাদায
প্রণবেনাভিমন্ত্র্য গাযত্র্যা পঞ্চাক্ষরেণাভিমন্ত্র্য
হরির্মস্তকগাত্রেষু সমর্পযেত্ . তথা হৃদি ধ্যাযস্বেতি
হরিমুক্ত্বা হরঃ স্বহৃদি ধ্যাত্বা দৃষ্টো দৃষ্ট ইতি
শিবমাহ .
ততো ভস্ম ভক্ষযেতি হরিমাহ হরস্ততঃ .
ভক্ষযিষ্যে শিবং ভস্ম স্নাত্বাহং ভস্মনা পুরা .. ৭..
পৃষ্টেশ্বরং ভক্তিগম্যং ভস্মাভক্ষযদচ্যুতঃ .
তত্রাশ্চর্যমতীবাসীত্প্রতিবিম্বসমদ্যুতিঃ .. ৮..
বাসুদেবঃ শুদ্ধমুক্তাফলবর্ণোঽভবত্ক্ষণাত্ .
তদাপ্রভৃতি শুক্লাভো বাসুদেবঃ প্রসন্নবান্ .. ৯..
ন শক্যং ভস্মনো জ্ঞানং প্রভাবং তে কুতো বিভো .
নমস্তেঽস্তু নমস্তেঽস্তু ত্বামহং শরণং গতঃ .. ১০..
ত্বত্পাদযুগলে শম্ভো ভক্তিরস্তু সদা মম .
ভস্মধারণসম্পন্নো মম ভক্তো ভবিষ্যতি .. ১১..
অত এবৈষা ভূতির্ভূতিকরীত্যুক্তা . অস্য পুরস্তাদ্বসব
আসন্রুদ্রা দক্ষিণত আদিত্যাঃ পশ্চাদ্বিশ্বেদেবা
উত্তরতো ব্রহ্মবিষ্ণুমহেশ্বরা যাভ্যাং সূর্যাচন্দ্রমসৌ
পার্শ্বযোস্তদেতদৃচাভ্যুক্তম্ .
ঋচো অক্ষরে পরমে ব্যোমন্ যস্মিন্দেবা অধিবিশ্বে নিষেদুঃ .
যস্তন্ন বেদ কিমৃচা করিষ্যতি য ইত্তদ্বিদুস্ত ইমে সমাসতে .
য এতদ্বৃহজ্জাবালং সার্বকামিকং মোক্ষদ্বারমৃঙ্মযং
যজুর্মযং সামমযং ব্রহ্মমযমমৃতমযং ভবতি .
য এতদ্বৃহজ্জাবালং বালো বা বেদ স মহান্ভবতি .
স গুরুঃ সর্বেষাং মন্ত্রাণামুপদেষ্টা ভবতি .
মৃত্যুতারকং গুরুণা লব্ধং কণ্ঠে বাহৌ শিখাযাং
বা বধ্নীত . সপ্তদ্বীপবতী ভূভির্দক্ষিণার্থং নাবকল্পতে .
তস্মাচ্ছ্রদ্ধযা যাং কাঞ্চিদ্গাং দদ্যাত্সা দক্ষিণা ভবতি
.. ১২..
ইতি ষষ্ঠং ব্রাহ্মণম্ .. ৬..
অথ জনকো বৈদেহো যাজ্ঞবল্ক্যমুপসমেত্যোবাচ
ভগবান্ ত্রিপুণ্ড্রবিধিং নো ব্রূহীতি স হোবাচ
সদ্যোজাতাদিপঞ্চব্রহ্মমন্ত্রৈঃ পরিগৃহ্যাগ্নিরিতি
ভস্মেত্যভিমন্ত্র্য মানস্তোক ইতি সমুদ্ধৃত্য
ত্রিযাযুষমিতি জলেন সংমৃজ্য ত্র্যম্বকমিতি
শিরোললাটবক্ষঃস্কন্ধেষু ধৃত্বা পূতো ভবতি
মোক্ষী ভবতি . শতরুদ্রেণ যত্ফলমবপ্নোতি তত্ফলমশ্নুতে
স এষ ভস্মজ্যোতিরিতি বৈ যাজ্ঞবল্ক্যঃ .. ১..
জনকো হ বৈদেহঃ স হোবাচ যাজ্ঞবল্ক্যং ভস্মধারণাত্কিং
ফলমশ্নুত ইতি স হোবাচ তদ্ভস্মধারণাদেব
মুক্তির্ভবতি তদ্ভস্মধারণাদেব শিবসাযুজ্যমবাপ্নোতি
ন স পুনরাবর্ততে ন স পুনরাবর্ততে স এষ ভস্মজ্যোতিরিতি
বৈ যাজ্ঞবল্ক্যঃ .. ২..
জনকো হ বৈদেহঃ স হোবাচ যাজ্ঞবল্ক্যং ভস্মধারণাত্কিং
ফলমশ্নুতে ন বেতি তত্র পরমহংসানামসংবর্তক-
আরুণিশ্বেতকেতুদুর্বাসঋভুনিদাঘজডভরতদত্তাত্রেয-
রৈবতকভুসুণ্ডপ্রভৃতযো বিভূতিধারণাদেবমুক্তাঃ স্যুঃ
স এষ ভস্মজ্যোতিরিতি বৈ যাজ্ঞবল্ক্যঃ .. ৩..
জনকো হ বৈদেহঃ স হোবাচ যাজ্ঞবল্ক্য ভস্মস্নানেন
কিং জাযত ইতি যস্য কস্যচিচ্ছরীরে যাবন্তো রোমকূপাস্তাবন্তি
লিঙ্গানি ভূত্বা তিষ্ঠন্তি ব্রাহ্মণো বা ক্ষত্রিযো বা বৈশ্যো বা
শূদ্রো বা তদ্ভস্মধারণাদেতচ্ছব্দস্য রূপং
যস্যাং তস্যাং হ্যেবাবতিষ্ঠতে .. ৪..
জনকো  হ বৈদেহঃ স হোবাচ পৈপ্পলাদেন সহ
প্রজাপতিলোঅকং জগাম তং গত্বোবাচ ভো প্রজাপতে
ত্রিপুণ্ড্রস্য মাহাত্ম্যং ব্রূহীতি তং প্রজাপতিরব্রবীদ্-
যথৈবেশ্বরস্য মাহাত্ম্যং তথৈব ত্রিপুণ্ড্রস্যেতি .. ৫..
অথ পৈপ্পলাদো বৈকুণ্ঠং জগাম তং গত্বোবাচ
ভো বিষ্ণো ত্রিপুণ্ড্রস্য মাহাত্ম্যং ব্রূহীতি যথৈবেশ্বরস্য
মাহাত্ম্যং তথৈব ত্রিপুণ্ড্রকস্যেতি বিষ্ণুরাহ .. ৬..
অথ পৈপ্পলাদঃ কালাগ্নিরুদ্রং পরিসমেত্যোবাচাধীহি
ভগবন্ ত্রিপুণ্ড্রস্য বিধিমিতি ত্রিপুণ্ড্রস্য বিধির্মযা
বক্তুং ন শক্য ইতি সত্যমিতি হোবাচাথ ভস্মচ্ছন্নঃ
সংসারান্মুচ্যতে ভস্মশয্যাশযানস্তচ্ছব্দগোচরঃ
শিবসাযুজ্যমবাপ্নোতি ন স পুনরাবর্ততে রুদ্রাধ্যাযী
সন্নমৃতত্বং চ গচ্ছতি স এষ ভস্মজ্যোতির্বিভূতি-
ধারণাদ্ব্রহ্মৈকত্বং চ গচ্ছতি বিভূতিধারণাদেব
সর্বেষু তীর্থেষু স্নাতো ভবতি বিভূতিধারণাদ্বারাণস্যাং
স্নানেন যত্ফলমবাপ্নোতি তত্ফলমশ্নুতে স এষ
ভস্মজ্যোতির্যস্য কস্যচিচ্ছরীরে ত্রিপুণ্ড্রস্য লক্ষ্ম বর্ততে
প্রথমা প্রজাপতির্দ্বিতীযা বিষ্ণুস্তৃতীযা সদাশিব ইতি
স এষ ভস্মজ্যোতিরিতি স এষ ভস্মজ্যোতিরিতি .. ৭..
অথ কালাগ্নিরুদ্রং ভগবন্তং সনত্কুমারঃ
পপ্রচ্ছাধীহি ভগবন্রুদ্রাক্ষধারণবিধিং
স হোবাচ রুদ্রস্য নযনাদুত্পন্না রুদ্রাক্ষা ইতি
লোকে খ্যাযন্তে সদাশিবঃ সংহারকালে সংহারং
কৃত্বা সংহারাক্ষং মুকুলীকরোতি তন্নযনাজ্জাতা
রুদ্রাক্ষা ইতি হোবাচ তস্মাদ্রুদ্রাক্ষত্বমিতি তদ্রুদ্রাক্ষে
বাগ্বিষযে কৃতে দশগোপ্রদানেন যত্ফলমবাপ্নোতি
তত্ফলমশ্নুতে স এষ ভস্মজ্যোতী রুদ্রাক্ষ ইতি
তদ্রুদ্রাক্ষং করেণ স্পৃষ্ট্বা ধারণমাত্রেণ
দ্বিসহস্রগোপ্রদানফলং ভবতি . তদ্রুদ্রাক্ষে
একাদশরুদ্রত্বং চ গচ্ছতি . তদ্রুদ্রাক্ষে শিরসি
ধার্যমাণে কোটিগোপ্রদানফলং ভবতি . এতেষাং
স্থানানাং কর্ণযোঃ ফলং বক্তুং ন শক্যমিতি হোবাচ .
মূর্ধ্নি চত্বারিংশচ্ছিখাযামেকং ত্রযং বা
শ্রোত্রযোর্দ্বাদশ কর্ণে দ্বাত্রিংশদ্বাহ্বোঃ ষোডশ
ষোডশ দ্বাদশ দ্বাদশ মণিবন্ধযোঃ ষট্
ষডঙ্গুষ্ঠযোস্ততঃ সন্ধ্যাং সকুশোঽহরহরুপা-
সীতাগ্নির্জ্যোতিরিত্যাদিভিরগ্নৌ জুহুযাত্ .. ৮..
ইতি সপ্তমং ব্রাহ্মণম্ .. ৭..
অথ বৃহজ্জাবালস্য ফলং নো ব্রূহি ভগবন্নিতি
স হোবাচ য এতদ্বৃহজ্জাবালং নিত্যমধীতে
সোঽগ্নিপূতো ভবতি স বাযুপূতো ভবতি স আদিত্যপূতো ভবতি
স সোমপূতো ভবতি স ব্রহ্মপূতো ভবতি স বিষ্ণুপূতো ভবতি
স রুদ্রপূতো ভবতি স সর্বপূতো ভবতি স সর্বপূতো ভবতি .. ১..
য এতদ্বৃহজ্জাবালং নিত্যমধীতে সোঽগ্নিং স্তম্ভযতি
স বাযুং স্তম্ভযতি স আদিত্যং স্তম্ভযতি স সোমং স্তম্ভযতি
স উদকং স্তম্ভযতি স  সর্বান্দেবান্স্তম্ভযতি স
সর্বান্গ্রহান্স্তম্ভযতি স বিষং স্তম্ভযতি স বিষং
স্তম্ভযতি .. ২..
য এতদ্বৃহজ্জাবালং নিত্যমধীতে স মৃত্যুং তরতি স
পাপ্মানং
তরতি স ব্রহ্মহত্যাং তরতি স ভ্রূণহত্যাং তরতি স
বীরহত্যাং
তরতি স সর্বহত্যাং তরতি স সংসারং তরতি স সর্বং তরতি
স সর্বং তরতি .. ৩..
য এতদ্বৃহজ্জাবালং নিত্যমধীতে স ভূর্লোকং জযতি স
ভুবর্লোকং জযতি
স সুবর্লোকং জযতি স মহর্লোকং জযতি স তপোলোকং জযতি
স জনোলোকং জযতি স সত্যলোকং জযতি স সর্বাংল্লোকাঞ্জযতি
.. ৪..
য এতদ্বৃহজ্জাবালং নিত্যমধীতে স ঋচোঽধীতে স
যজূংষ্যধীতে
স সামান্যধীতে সোঽথর্বণমধীতে সোঽঙ্গিরসমধীতে স শাখা
অধীতে স কল্পানধীতে স নারশংসীরধীতে স পুরণান্যধীতে
স ব্রহ্মপ্রণবমধীতে স ব্রহ্মপ্রণবমধীতে .. ৫..
অনুপনীতশতমেকমেকেনোপনীতেন তত্সমমুপনীতশতমেকমেকেন
গৃহস্থেন তত্সমং গৃহস্থশতমেকমেকেন বানপ্রস্থেন
তত্সমং বানপ্রস্থশতমেকেমেকেন যতিনা তত্সমং যতীনাং তু
শতং পূর্ণমেকমেকেন রুদ্রজাপকেন তত্সমং
রুদ্রজাপকশতমেকেমেকেন
অথর্বশিরঃশিখাধ্যাপকেন তত্সমমথর্বশিরঃশাখা-
ধ্যাপকশতমেকমেকেন বৃহজ্জাবালোপনিষদধ্যাপকেন
তত্সম.ম্ তদ্বা এতত্পরং ধাম বৃহজ্জবালোপনীষজ্জপশীলস্য
যত্র ন সূর্যস্তপতি যত্র ন বাযুর্বাতি যত্র ন চন্দ্রমা ভাতি
যত্র ন নক্ষত্রাণি ভান্তি যত্র নাগ্নির্দহতি যত্র ন মৃত্যুঃ
প্রবিশতি
যত্র ন দুঃখানি প্রবিশন্তি সদানন্দং পরমানন্দং শান্তং
শাশ্বতং সদাশিবং ব্রহ্মাদিবন্দিতং যোগিধ্যেযং পরং পদং
যত্র গত্বা ন নিবর্তন্তে যোগিনস্তদেতদৃচাভ্যুক্তম্ . তদ্বিষ্ণোঃ
পরমং পদং সদা পশ্যন্তি সূরযঃ . দিবীব চক্ষু–?–
তম্ ..
তদ্বিপ্রাসো বিপন্যবো জাগৃবাংসঃ সমিন্ধতে . বিষ্ণোর্যত্পরমং
পদম্ ..
ॐ সত্যমিত্যুপনিষত্ .. ৬..
ইত্যষ্টমং ব্রাহ্মণম্ .. ৮..
ॐ ভদ্রং কর্ণেভিঃ শৃণুযাম দেবাঃ .
ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ .
ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .
স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ .
স্বস্তি নো বৃহস্পতিদধাতু ..
ॐ   শান্তিঃ   শান্তিঃ   শান্তিঃ ..

ইত্যথর্ববেদীয বৃহজ্জাবালোপনিষত্সমাপ্তা ..