পরমহংস

.. পরমহংস ..

 পরমহংসোপনিষত্

ॐ ভদ্রং কর্ণেভিঃ শৃণুযাম দেবাঃ ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবংসস্তনূভির্ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবঃ স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যোঽরিষ্টনেমিঃ স্বস্তি নো বৃহস্পতির্দধাতু .

          ॐ শান্তিঃ শান্তিঃ শান্তিঃ.
          হরিঃ ॐ ..

অথ যোগিনং পরমহংসনং কোঽযং মার্নস্তেষং কা স্থিতিরিতি নারদো
ভগবন্তমুপগত্যোবাচ . তং ভগবানাঃ . যোঽযং পরমহংসমার্গো
লোকে দুর্লভতরো ন তু বাহুল্যো যদ্যেকো ভবতি স এব নিত্যপূতস্থঃ
স এব বেদপুরুষ ইতি বিদুষো মন্যন্তে মহাপুরুষো যচ্চিত্তং
তত্সর্বদা ময্যেবাবতিষ্টতে তস্মাদহং চ তস্মিন্নেবাবস্থীযতে .
অসৌ স্বপুত্রমিত্রকলত্রবন্ব্বাদীঞ্শিখাযজ্ঞোপবীতে
স্বাধ্যাযং চ সর্বকর্মাণি
সংন্যস্যাযং ব্রহ্মাণ্ডং চ হিত্বা কৌপীনং দণ্ডমাচ্ছাদনং চ
স্বশরীরোপভোগার্থায চ লোকস্যোপকারার্থায চ পরিগ্রহেত্তচ্চ ন
মুখ্যোঽস্তি কোঽযং মুখ্য ইতি চেদযং মুখ্যঃ .. ১..

ন দণ্ডং ন শিখং ন যজ্ঞোপবীতং ন চাচ্ছাদনং চরতি পরমহংসঃ .
ন শিতং ন চোষ্ণং ন সুখং ন দুঃখং ন মানাবমানে চ ষডূর্মিবর্জং
নিন্দাগর্বমত্সরদম্মদর্পেচ্ছাদ্বেষসুখদুঃখকামকোধলোভমোহহর্ষসু
উযাহংকারাদীংশ্চ হিত্বা স্ববপুঃ কুণপমিব দৃষ্যতে
যতস্তদ্বপুরপধ্বস্তং সংশযবিপরীতমিথ্যাজ্ঞানানাং যো হেতুস্তেন
নিত্যনিবৃত্তস্তন্নিত্যবোধস্তত্স্বযমেবাবস্থিতিস্তং
শন্তমচলমদ্বযানন্দবিজ্ঞানঘন এবাস্মি .
তদেব মম পরম্ধাম তদেব শিখা চ তদেবোপবীত চ .
পরমাত্মাত্মনোরেকত্বজ্ঞানেন তযোর্ভেদ এব বিভগ্নঃ সা সধ্যা .. ২..

সর্বান্কামান্পরিত্যজ্য অদ্বৈতে পরমস্থিতিঃ .
জ্ঞানদণ্ডো ধৃতো যেন একদণ্ডো স উচ্যতে ..
কাষ্ঠদণ্ডো ধৃতো যেন সর্বাশি জ্ঞানবর্জিতঃ .
স যাতি নরকান্ধোরান্মহারৌরবসংজ্ঞকান্ ..
ইদমন্তরং জ্ঞাত্বা স পরমহংসঃ .. ৩..

আশাম্বরো ন নমর্কারো ন স্বধাকারো ন নিন্দা ন স্তুতির্যাদৃচ্ছিকো
ভবেদ্ভিক্ষুর্নাঽঽবাহনং ন বিসর্জনং ন মন্ত্রং ন ধ্যানং
নোপাসনং চ ন লক্ষ্যং নাকক্ষ্যং ন পৃথগ্নাপৃথগহং
ন ন ত্বং ন সর্ব চানিকেতস্থিতিরেব ভিক্ষুঃ সৌবর্ণাদীনং
নৈব পরিগ্নহেন্ন লোকং নাবলোকং চাঽঽবাধকং ক ইতি
চেদ্বাধকোঽস্ত্যেব যস্মাদ্ভিক্ষুর্হিরণ্যং রসেন দৃষ্টং
চ স ব্রহ্মহা ভবেত্ .
যস্মাদ্ভিক্ষুর্হিরণ্যং রসেন গ্রাহ্যং চ স আত্মহা ভবেত্ .
তস্মাদ্ভিক্ষুর্হিরণ্যং রসেন ন দৃষ্টং চ ন
স্পৃষ্টং চ ন গ্রাহ্যং চ . সর্বে কামা মনোগতা
ব্যাবর্তন্তে . দুঃখে নোদ্বিগ্নঃ সুখে ন স্পৃহা ত্যাগো রাগে সর্বত্র
শুভাশুভযোরনভিস্নেহো ন দ্বেষ্টি ন মোদং চ . সর্বেষামিন্দ্রিযাণাং
গতিরুপরমতে য আত্মন্যেবাবস্থীযতে
যত্পূর্ণানন্দৈকবোধস্তদব্রহ্মাহমস্মীতি
কৃতকৃত্যো ভবতি কৃতকৃত্যো ভবতি .. ৪..

ॐ ভদ্রং কর্ণেভিঃ শৃণুযাম দেবাঃ ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবংসস্তনূভির্ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবঃ স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যোঽরিষ্টনেমিঃ স্বস্তি নো বৃহস্পতির্দধাতু .

          ॐ শান্তিঃ শান্তিঃ শান্তিঃ.
          হরিঃ ॐ ..

          ইতি শ্রীপরমহংসোপনিষত্সমাপ্তা ..