পরম

.. পরমহংসপরিব্রাজকোপনিষত্ ..

পারিব্রাজ্যধর্মবন্তো যজ্জ্ঞানাদ্ব্রহ্মতাং যযুঃ .
তদ্ব্রহ্ম প্রণবৈকার্থং তুর্যতুর্যং হরিং ভজে ..
ॐ ভদ্রং কর্ণেভিঃ শৃণুযাম দেবাঃ .. ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ .. ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .. স্বস্তি নঃ পূষা বিশ্ববেদাঃ ..
স্বস্তি নস্তার্ক্ষ্যো অরিষ্টনেমিঃ .. স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
হরিঃ ॐ অথ পিতামহঃ স্বপিতরমাদিনারাযণমুপসমেত্য
প্রণম্য পপ্রচ্ছ ভগবংস্ত্বন্মুখাদ্বর্ণাশ্রমধর্মক্রমং
সর্বং শ্রুতং বিদিতমবগতম্ . ইদানীং পরমহংসপরিব্রাজকলক্ষণং
বিদিতুমিচ্ছামি কঃ পরিব্রজনাধিকারী কীদৃশং পরিব্রাজকলক্ষণং
কঃ পরমহংসঃ পরিব্রাজকত্বং কথং তত্সর্বং মে ব্রূহীতি .
স হোবাচ ভগবানাদিনারাযণঃ . সদ্গুরুসমীপে সকলবিদ্যাপরিশ্রমজ্ঞো
ভূত্বা বিদ্বান্সর্বমৈহিকামুষ্মিকসুখশ্রমং জ্ঞাত্বৈষণাত্রয-
বাসনাত্রযমমত্বাহঙ্কারাদিকং বমনান্নমিব হেযমধিগম্য
মোক্ষমার্গৈকসাধনো ব্রহ্মচর্যং সমাপ্য গৃহী ভবেত্ .
গ্রামাচ্ছ্রোত্রিযাগারাদগ্নিমাহৃত্য স্ববিধ্যুক্তক্রমেণ
পূর্ববদগ্নিমাজিঘ্রেত্ . যদ্যাতুরো বাগ্নিং ন বিন্দেদপ্সু জুহুযাত্ .
আপো বৈ সর্বা দেবতাঃ সর্বাভ্যো দেবতাভ্যো জুহোমি স্বাহেতি
হুত্বোধৃত্য প্রাশ্নীযাত্ সাজ্যং হবিরনামযম্ .
এষ বিধির্বীরাধ্বানে বাঽনাশকে বা সংপ্রবেশে বাগ্নিপ্রবেশে
বা মহাপ্রস্থানে বা . যদ্যাতুরঃ স্যান্মনসা বাচা সংন্যসেদেষ
পন্থাঃ . স্বস্থক্রমেণৈব চেদাত্মশ্রাদ্ধং বিরজাহোমং
কৃত্বাগ্নিমাত্মন্যারোপ্য লৌকিকবৈদিকসামর্থ্যং স্বচতুর্দশ-
করণপ্রবৃত্তিং চ পুত্রে সমারোপ্য তদভাবে শিষ্যে বা তদভাবে
স্বাত্মন্যেব বা ব্রহ্মাত্বং যজ্ঞস্ত্বমিত্যভিমন্ত্র্য ব্রহ্মভাবনযা
ধ্যাত্বা সাবিত্রীপ্রবেশপূর্বকমপ্সু সর্ববিদ্যার্থস্বরূপাং ব্রাহ্মণ্যাধারাং
বেদমাতরং ক্রমাদ্ব্যাহৃতিষু ত্রিষু প্রবিলাপ্য ব্যাহৃতিত্রযমকারোকারমকারেষু
প্রবিলাপ্য তত্সাবধানেনাপঃ প্রাশ্য প্রণবেন শিখামুত্কৃষ্য যজ্ঞোপবীতং
ছিত্ত্বা বস্ত্রমপি ভূমৌ বাপ্সু বা বিসৃজ্য ॐ ভূঃ স্বাহা ॐ ভুবঃ স্বাহা
ॐ সুবঃ স্বাহেত্যনেন জাতরূপধরো ভূত্বা স্বং রূপং ধ্যাযন্পুনঃ পৃথক্
প্রণবব্যাহৃতিপূর্বকং মনসা বচসাপি সংন্যস্তং মযা সংন্যস্তং
মযা সংন্যস্তং মযেতি মন্দ্রমধ্যমতারধ্বনিভিস্ত্রিবারং ত্রিগুণীকৃত-
প্রেষোচ্চারণং কৃত্বা প্রণবৈকধ্যানপরাযণঃ সন্নভযং সর্বভূতেভ্যো
মত্তঃ স্বাহেত্যূর্ধ্ববাহুর্ভূত্বা ব্রহ্মাহমস্মীতি তত্ত্বমস্যাদিবাক্যার্থ-
স্বরূপানুসন্ধানং কুর্বন্নুদীচিং দিশং গচ্ছেত্ .
জাতরূপধরশ্চরেত্ . এষ সংন্যাসঃ . তদধিকারী
ন ভবেদ্যদি গৃহস্থপ্রার্থনাপূর্বকমভযং সর্বভূতেভ্যো
মত্তঃ সর্বং প্রবর্ততে সখা মা গোপাযৌজঃ সখা যোঽসীন্দ্রস্য
বজ্রোঽসি বার্ত্রঘ্নঃ শর্ম মে ভব যত্পাপং তন্নিবারযেত্যনেন
মন্ত্রেণ প্রণবপূর্বকং সলক্ষণং বৈণবং দণ্ডং কটিসূত্রং
কৌপীনং কমণ্ডলুং বিবর্ণবস্ত্রমেকং পরিগৃহ্য সদ্গুরুমুপগম্য
নত্বা গুরুমুখাত্তত্ত্বমসীতি মহাবাক্যং প্রণবপূর্বকমুপলভ্যাথ
জীর্ণবল্কলাজিনং ধৃত্বাথ জলাবতরণমূর্ধ্বগমনমেকভিক্ষাং
পরিত্যজ্য ত্রিকালস্নানমাচরন্বেদান্তশ্রবণপূর্বকং প্রণবানুষ্ঠানং
কুর্বন্ব্রহ্মমার্গে সম্যক্ সংপন্নঃ স্বাভিমতমাত্মনি গোপযিত্বা
নির্মমোঽধ্যাত্মনিষ্ঠঃ কামক্রোধলোভমোহমদমাত্সর্যদম্ভ-
দর্পাহ্ঙ্কারাসূযাগর্বেচ্ছাদ্বেষহর্ষামর্ষমমত্বাদীংশ্চ
হিত্বা জ্ঞানবৈরাগ্যযুক্তো বিত্তস্ত্রীপরাঙ্মুখঃ শুদ্ধমানসঃ
সর্বোপনিষদর্থমালোচ্য ব্রহ্মচর্যাপরিগ্রহাহিংসাসত্যং যত্নেন
রক্ষঞ্জিতেন্দ্রিযো বহিরন্তঃস্নেহবর্জিতঃ শরীরসংধারণার্থং বা ত্রিষু
বর্ণেষ্বভিশস্তপতিতবর্জিতেষু পশুরদ্রোহী ভৈক্ষমাণো ব্রহ্মভূযায ভবতি .
সর্বেষু কালেষু লাভালাভৌ সমৌ কৃত্বা পরপাত্রমাধূকরে-
ণান্নমশ্নন্মেদোবৃদ্ধিমকুর্বন্কৃশীভূত্বা ব্রহ্মাহমস্মীতি
ভাবযন্গুর্বর্থং গ্রামমুপেত্য ধ্রুবশীলোঽষ্টৌ মাস্যেকাকী
চরেদ্বাবেবাচরেত্ . যদালংবুদ্ধির্ভবেত্তদা কুটীচকো বা বহূদকো
বা হংসো বা পরমহংসো বা তত্তন্মন্ত্রপূর্বকং কটিসূত্রং কৌপীনং
দণ্ডং কমণ্ডলুং সর্বমপ্সু বিসৃজ্যাথ জাতরূপধরশ্চরেত্ .
গ্রাম একরাত্রং তীর্থে ত্রিরাত্রং পতনে পঞ্চরাত্রং ক্ষেত্রে সপ্তরাত্র-
মনিকেতঃ স্থিরমতিরনগ্নিসেবী নির্বিকারো নিযমানিযমমুত্সৃজ্য
প্রাণসংধারণার্থমযমেব লাভালাভৌ সমৌ কৃত্বা গোবৃত্ত্যা
ভৈক্ষ্যমাচরন্নুদকস্থলকমণ্ডলুরবাধকরহস্যস্থলবাসো
ন পুনর্লাভালাভরতঃ শুভাশুভকর্মনির্মূলনপরঃ সর্বত্র
ভূতলশযনঃ ক্ষৌরকর্মপরিত্যক্তো যুক্তচাতুর্মাস্যব্রতনিযমঃ
শুক্লধ্যানপরাযণোঽর্থস্ত্রীপুরপরাঙ্মুখোঽনুন্মত্তোওঽপ্যুন্মত্তব-
দাচরন্নব্যক্তলিঙ্গোঽব্যক্তাচারো দিবানক্তসমত্বেনাস্বপ্নঃ
স্বরূপানুসন্ধানব্রহ্মপ্রণবধ্যানমার্গেণাবহিতঃ সংন্যাসেন
দেহত্যাগং করোতি স পরমহংসপরিব্রাজকো ভবতি . ভগবন্ ব্রহ্মপ্রণবঃ
কীদৃশ ইতি ব্রহ্মা পৃচ্ছতি . স হোবাচ নারাযণঃ . ব্রহ্মপ্রণবঃ
ষোডশমাত্রাত্মকঃ সোঽবস্থাচতুষ্টযচতুষ্টযগোচরঃ .
জাগ্রদবস্থাযাং জাগ্রদাদিচরস্রোঽবস্থাঃ স্বপ্নে স্বপ্নাদিচতস্রোঽবস্থাঃ
সুষুপ্তৌ সুষুপ্ত্যাদিচতস্রোঽবস্থাস্তুরীযে তুরীযাদিচতস্রোঽবস্থা ভবন্তীতি .
জাগ্রদবস্থাযাং বিশ্বস্য চাতুর্বিধ্যং বিশ্ববিশ্বো বিশ্বতৈজসো বিশ্বপ্রাজ্ঞো
বিশ্বতুরীয ইতি . স্বপ্নাবস্থাযাং তৈজসস্য চাতুর্বিধ্যং তৈজসবিশ্বস্তৈজস-
তৈজসস্তৈজসপ্রাজ্ঞস্তৈজসতুরীয ইতি . সুষুপ্ত্যবস্থাযাং প্রাজ্ঞস্য চাতুর্বিধ্যং
প্রাজ্ঞবিশ্বঃ প্রাজ্ঞতৈজসঃ প্রাজ্ঞপ্রাজ্ঞঃ প্রাজ্ঞতুরীয ইতি.
তুরীযাবস্থাযাং তুরীযস্য চাতুর্বিধ্যং তুরীযবিশ্বস্তুরীযতৈজস-
স্তুরীযপ্রাজ্ঞস্তুরীযতুরীয ইতি . তে ক্রমেণ ষোডশমাত্রারূঢাঃ
অকারে জাগ্রদ্বিশ্ব উকারে জাগ্রত্তৈজসো মকারে জাগ্রত্প্রাজ্ঞ
অর্ধমাত্রাযাং জাগ্রত্তুরীযো বিন্দৌ স্বপ্নবিশ্বোনাদে স্বপ্নতৈজসঃ
কলাযাং স্বপ্নপ্রাজ্ঞঃ কলাতীতে স্বপ্নতুরীযঃ শান্তৌ সুষুপ্তবিশ্বঃ
শান্ত্যতীতে সুষুপ্ততৈজস উন্মন্যাং সুষুপ্তপ্রাজ্ঞো মনোন্মন্যাং
সুষুপ্ততুরীযঃ তুর্যাং তুরীযবিশ্বোমধ্যমাযাং তুরীযতৈজসঃ পশ্যন্ত্যাং
তুরীযপ্রাজ্ঞঃ পরাযাং তুরীযতুরীযঃ . জাগ্রন্মাত্রাচতুষ্টযমকারাংশং
স্বপ্নমাত্রাচতুষ্টযমুকারাংশং সুষুপ্তিমাত্রাচতুষ্টযং
মকারাংশং তুরীযমাত্রাচতুষ্টযমর্ধমাত্রাংশম্ .
অযমেব ব্রহ্মপ্রণবঃ . স পরমহংসতুরীযাতীতাবধূতৈরুপাস্যঃ .
তেনৈব ব্রহ্ম প্রকাশতে  তেন বিদেহমুক্তিঃ . ভগবন্ কথমযজ্ঞোপবীত্যশিখী
সর্বকর্মপরিত্যক্তঃ কথং ব্রহ্মনিষ্ঠাপরঃ কথং ব্রাহ্মণ ইতি ব্রহ্মা
পৃচ্ছতি . স হোবাচ বিষ্ণুর্ভোভোঽর্ভক যস্যাস্ত্যদ্বৈতমাত্মজ্ঞানং
তদেব যজ্ঞোপবীতম্ . তস্য ধ্যননিষ্ঠৈব শিখা . তত্কর্ম স পবিত্রম্ .
স সর্বকর্মকৃত্ . স ব্রাহ্মণঃ . স ব্রহ্মনিষ্ঠাপরঃ . স দেবঃ . স ঋষিঃ .
স তপস্বী . স শ্রেষ্ঠঃ . স এব সর্বজ্যেষ্ঠঃ . স এব জগদ্গুরুঃ . স এবাহং বিদ্ধি .
লোকে পরমহংসপরিব্রাজকো দুর্লভতরো যদ্যেকোঽস্তি . স এব নিত্যপূতঃ . স এব
বেদপুরুষো মহাপুরুষো যস্তচ্চিত্তং ময্যেবাবতিষ্ঠতে . অহং চ তস্মিন্নেবাবস্থিতঃ .
স এব নিত্যতৃপ্তঃ . স শীতোষ্ণসুখদুঃখমানাবমানবর্জিতঃ . স নিন্দামর্ষ-
সহিষ্ণুঃ . স ষডূর্মিবর্জিতঃ . ষড্ভাববিকারশূন্যঃ . স জ্যেষ্ঠাজ্যেষ্ঠ-
ব্যবধানরহিতঃ . স স্বব্যতিরেকেণ নান্যদ্রষ্টা . আশাংবরো ননমস্কারো
নস্বাহাকারো নস্বধাকারশ্চ নবিসর্জনপরো নিন্দাস্তুতিব্যতিরিক্তো নমন্ত্রতন্ত্রোপাসকো
দেবান্তরধ্যানশূন্যো লক্ষ্যালক্ষ্যনিবর্তকঃ সর্বোপরতঃ সসচ্চিদানন্দাদ্বযচিদ্ঘনঃ
সংপূর্ণানন্দৈকবোধো ব্রহ্মৈবাহমস্মীত্যনবরতং ব্রহ্মপ্রণবানুসংধানেন যঃ
কৃতকৃত্যো ভবতি স হ পরমহংসপরিব্রাডিত্যুপনিষত্ .. হরিঃ ॐ তত্সত্ .
ॐ ভদ্রং কর্ণেভিঃ শৃণুযাম দেবাঃ .. ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ .. ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .. স্বস্তি নঃ পূষা বিশ্ববেদাঃ ..
স্বস্তি নস্তার্ক্ষ্যো অরিষ্টনেমিঃ .. স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
ইতি পরমহংসপরিব্রাজকোপনিষত্সমাপ্তা ..