পরব্রহ্ম

.. পরব্রহ্মোপনিষত্ ..

পরব্রহ্মোপনিষদি বেদ্যাখণ্ডসুখাকৃতি .
পরিব্রাজকহৃদ্গেযং পরিতস্ত্রৈপদং ভজে ..
ॐ ভদ্রং কর্ণেভিঃ শৃণুযাম দেবাঃ .. ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ .. ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .. স্বস্তি নঃ পূষা বিশ্ববেদাঃ ..
স্বস্তি নস্তার্ক্ষ্যো অরিষ্টনেমিঃ .. স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
হরিঃ ॐ .. অথ হৈনং মহাশালঃ শৌনকোঽঙ্গিরসং ভগবন্তং পিপ্পলাদং
বিধিবদুপসন্নঃ পপ্রচ্ছ দিব্যে ব্রহ্মপুরে কে সংপ্রতিষ্ঠিতা ভবন্তি . কথং
সৃজ্যন্তে . নিত্যাত্মন এষ মহিমা . বিভজ্য এষ মহিমা বিভুঃ . ক এষঃ .
তস্মৈ স হোবাচ . এতত্সত্যং যত্প্রব্রবীমি ব্রহ্মবিদ্যাং বরিষ্ঠাং দেবেভ্যঃ
প্রাণেভ্যঃ . পরব্রহ্মপুরে বিরজং নিষ্কলং শুভমক্ষরং বিরজং বিভাতি .
স নিযচ্ছতি মধুকরঃ শ্বেব বিকর্মকঃ . অকর্মা স্বামীব স্থিতঃ . কর্মতরঃ
কর্ষকবত্ফলমনুভবতি . কর্মমর্মজ্ঞাতা কর্ম করোতি . কর্মমর্ম জ্ঞাত্বা
কর্ম কুর্যাত্ . কো জালং বিক্ষিপেদেকো নৈনমপকর্ষত্যপকর্ষতি . প্রাণদেবা-
শ্চত্বারঃ . তাঃ সর্বা নাড্যঃ সুষুপ্তশ্যেনাকাশবত্ . যথা শ্যেনঃ
খমাশ্রিত্য যাতি স্বমালযং কুলাযম্ . এবং সুষুপ্তং ব্রূত . অযং চ পরশ্চ
স সর্বত্র হিরণ্মযে পরে কোশে . অমৃতা হ্যেষা নাডী ত্রযং সংচরতি . তস্য
ত্রিপাদং ব্রহ্ম . এষাত্রেষ্য ততোঽনুতিষ্ঠতি . অন্যত্র ব্রূত . অযং চ পরং চ
সর্বত্র হিরণ্মযে কোশে .
যথৈষ দেবদত্তো যষ্ট্যা চ তাড্যমানো নৈবৈতি .
এবমিষ্টাপূর্তকর্মশুভাশুভৈর্ন লিপ্যতে . যথা
কুমারকো নিষ্কাম আনন্দমভিযাতি . তথৈষ দেবঃ
স্বপ্ন আনন্দমভিযাতি বেদ এব পরং জ্যোতিঃ . জ্যোতিষামা
জ্যোতিরানন্দযত্যেবমেব . তত্পরং যচ্চিত্তং পরমাত্মান-
মানন্দযতি . শুভ্রবর্ণমাজাযতেশ্বরাত্ . ভূযস্তেনৈব
মার্গেণ স্বপ্নস্থানং নিযচ্ছতি . জলূকাভাববদ্যথা-
কামমাজাযতেশ্বরাত্ . তাবতাত্মানমানন্দযতি . পরসন্ধি
যদপরসন্ধীতি . তত্পরং নাপরং ত্যজতি . তদৈব কপালষ্টকং
সন্ধায য এষ স্তন ইবাবলম্বতে সেন্দ্রযোনিঃ স বেদযোনিরিতি .
অত্র জাগ্রতি . শুভাশুভাতিরিক্তঃ শুভাশুভৈরপি কর্মভির্ন লিপ্যতে .
য এষ দেবোঽন্যদেবাস্য সংপ্রসাদোঽন্তর্যাম্যসঙ্গচিদ্রূপঃ
পুরুষঃ . প্রণবহংসঃ পরং ব্রহ্ম . ন প্রাণহংসঃ . প্রণবো
জীবঃ . আদ্যা দেবতা নিবেদযতি . য এবং বেদ . তত্কথং নিবেদযতে .
জীবস্য ব্রহ্মত্বমাপাদযতি . সত্ত্বমথাস্য পুরুষস্যান্তঃ
শিখোপবীতত্বং ব্রাহ্মণস্য . মুমুক্ষোরন্তঃ শিখোপবীতধারণম্ .
বহির্লক্ষ্যমাণশিখাযজ্ঞোপবীতধারণং কর্মিণো গৃহস্থস্য .
অন্তরুপবীতলক্ষণং তু বহিস্তন্তুবদব্যক্তমন্তস্তত্ত্বমেলনম্ .
ন সন্নাসন্ন সদসদ্ভিন্নাভিন্নং ন চোভযম্ . ন সভাগং
ন নির্ভাগং ন চাপ্যুভযরূপকম্ ..
ব্রহ্মাত্মৈকত্ববিজ্ঞানং হেযং মিথ্যত্বকারণাদিতি .
পঞ্চপাদ্ব্রহ্মণো ন কিংচন . চতুষ্পাদন্তর্বর্তিনোঽন্ত-
র্জীবব্রহ্মণশ্চত্বারি স্থানানি . নাভিহৃদযকণ্ঠমূর্ধসু
জাগ্রত্স্বপ্নসুষুপ্তিতুরীযাবস্থাঃ . আহবনীযগার্হপত্য-
দক্ষিণসভ্যাগ্নিষু . জাগরিতে ব্রহ্মা স্বপ্নে বিষ্ণুঃ
সুষুপ্তৌ রুদ্রস্তুরীযমক্ষরং চিন্মযম্ . তস্মাচ্চতুরবস্থা .
চতুরঙ্গুলবেষ্টনমিব ষণ্ণবতিতত্ত্বানি তন্তুবদ্বিভজ্য তদা
হিতং ত্রিগুণীকৃত্য দ্বাত্রিংশত্তত্ত্বনিষ্কর্ষমাপাদ্য
জ্ঞানপূতং ত্রিগুণস্বরূপং ত্রিমূর্তিত্বং পৃথগ্বিজ্ঞায
নবব্রহ্মাখ্যনবগুণোপেতং জ্ঞাত্বা নবমানমিতস্ত্রিগুণীকৃত্য
সূর্যেন্দ্বগ্নিকলাস্বরূপত্বেনৈকীকৃত্যাদ্যন্তরেকত্বমপি মধ্যে
ত্রিরাবৃত্য ব্রহ্মবিষ্ণুমহেশ্বরত্বমনুসংধাযাদ্যন্তমেকীকৃত্য
চিদ্গ্রন্থাবদ্বৈতগ্রন্থিং কৃত্বা নাভ্যাদিব্রহ্মবিলপ্রমাণং
পৃথক্ পৃথক্ সপ্তবিংশতিতত্ত্বসংবন্ধং ত্রিগুণোপেতং
ত্রিমূর্তিলক্ষণলক্ষিতমপ্যেকত্বমাপাদ্য বামাংসাদিদক্ষিণকণ্ঠ্যন্তং
বিভাব্যাদ্যন্তগ্রহসংমেলনমেকং জ্ঞাত্বা মূলমেকং সত্যং
মৃণ্মযং বিজ্ঞাতং স্যাদ্বাচারম্ভণং বিকারো নামধেযং মৃত্তিকেত্যেব সত্যম্ .
হংসেতি বর্ণদ্বযেনান্তঃ শিখোপবীতিত্বং নিশ্চিত্য ব্রাহ্মণত্বং ব্রহ্মধ্যানার্হত্বং
যতিত্বমলক্ষিতান্তঃশিখোপবীতিত্বমেবং বহির্লক্ষিতকর্মশিখা জ্ঞানোপবীতং
গৃহস্থস্যাভাসব্রহ্মণত্বস্য কেশসমূহশিখাপ্রত্যক্ষকার্পাসতন্তু-
কৃতোপবীতত্বং চতুর্গুণীকৃত্য চতুর্বিংশতিতত্ত্বাপাদনতন্তুকৃত্ত্বং
নবতত্ত্বমেকমেব .. পরংব্রহ্ম তত্প্রতিসরযোগ্যত্বাদ্বহুমার্গপ্রবৃত্তিং
কল্পযন্তি . সর্বেষাং ব্রহ্মাদীনাং দেবর্ষীণাং মনুষ্যাণাং মূর্তিরেকা .
ব্রহ্মৈকমেব . ব্রাহ্মণত্বমেকমেব . বর্ণাশ্রমাচারবিশেষাঃ পৃথক্পৃথক্
শিখাবর্ণাশ্রমিণামেককৈব . অপবর্গস্য যতেঃ শিখাযজ্ঞোপবীতমূলং
প্রণবমেকমেব বদন্তি . হংসঃ শিখা . প্রণব উপবীতম্ . নাদঃ সংধানম্ .
এষ ধর্মো নেতরো ধর্মঃ . তত্কথমিতি . প্রণবহংসো নাদস্ত্রিবৃত্সূত্রং
স্বহৃদি চৈতন্যে তিষ্ঠতি ত্রিবিধং ব্রহ্ম . তদ্বিদ্ধি প্রাপঞ্চিকশিখোপবীতং ত্যজেত্ .
সশিখং বপনং কৃত্বা বহিঃসূত্রং ত্যজেদ্বুধঃ .
যদক্ষরং পরংব্রহ্ম তত্সূত্রমিতি ধারযেত্ .. ১..
পুনর্জন্মনিবৃত্যর্থং মোক্ষস্যাহর্নিশং স্মরেত্ .
সূচনাত্সূত্রমিত্যুক্তং সূত্রং নাম পরং পদম্ .. ২..
তত্সূত্রং বিদিতং যেন স মুমুক্ষুঃ স ভিক্ষুকঃ .
স বেদবিত্সদাচারঃ স বিপ্রঃ পঙ্ক্তিপাবনঃ .. ৩..
যেন সর্বমিদং প্রোতং সূত্রে মণিগণা ইব .
তত্সূত্রং ধারযেদ্যোগী যোগবিদ্ব্রাহ্মণো যতিঃ .. ৪..
বহিঃসূত্রং ত্যজেদ্বিপ্রো যোগবিজ্ঞানতত্পরঃ .
ব্রহ্মভাবমিদং সূত্রং ধারযেদ্যঃ স মুক্তিভাক্ .. ৫..
নাশুচিত্বং ন চোচ্ছিষ্টং তস্য সূত্রস্য ধারণাত্ .
সূত্রমন্তর্গতং যেষাং জ্ঞানযজ্ঞোপবীতিনাম্ .. ৬..
যে তু সূত্রবিদো লোকে তে চ যজ্ঞোপবীতিনঃ .
জ্ঞানশিখিনো জ্ঞাননিষ্ঠা জ্ঞানযজ্ঞোপবীতিনঃ .
জ্ঞানমেব পরং তেষাং পবিত্রং জ্ঞানমীরিতম্ .. ৭..
অগ্নেরিব শিখা নান্যা যস্য জ্ঞানমযী শিখা .
স শিখীত্যুচ্যতে বিদ্বান্নেতরে কেশধারিণঃ .. ৮..
কর্মণ্যধিকৃতঃ যে তু বৈদিকে লৌকিকেঽপি বা .
ব্রাহ্মণাভাসমাত্রেণ জীবন্তে কুক্ষিপূরকাঃ .
ব্রজন্তে নিরযং তে তু পুনর্জন্মনি জন্মনি .. ৯..
বামাংসদক্ষকণ্ঠ্যন্তং ব্রহ্মসূত্রং তু সব্যতঃ .
অন্তর্বহিরিবাত্যর্থং তত্ত্বতন্তুসমন্বিতম্ .. ১০..
নাভ্যাদিব্রহ্মরন্ধ্রান্তপ্রমাণং ধারযেত্সুধীঃ .
তেভির্ধার্যমিদং সূত্রং ক্রিযাঙ্গং তন্তুনির্মিতম্ .. ১১..
শিখা জ্ঞানমযী যস্য উপবীতং চ তন্মযম্ .
ব্রাহ্মণ্যং সকলং তস্য নেতরেষাং তু কিংচন .. ১২..
ইদং যজ্ঞোপবীতং তু পরমং যত্পরাযণম্ .
বিদ্বান্যজ্ঞোপবীতী সংধারযেদ্যঃ স মুক্তিভাক্ .. ১৩..
বহিরন্তশ্চোপবীতী বিপ্রঃ সংন্যস্তুমর্হতি .
একযজ্ঞোপবীতী তু নৈব সংন্যস্তুমর্হতি .. ১৪..
তস্মাত্সর্বপ্রযত্নেন মোক্ষাপেক্ষী ভবেদ্যতিঃ .
বহিঃসূত্রং পরিত্যজ্য স্বান্তঃসূত্রং তু ধারযেত্ .. ১৫..
বহিঃপ্রপঞ্চশিখোপবীতিত্বমনাদৃত্য প্রণবহংসশিখোপবীতিত্বমবলম্ব্য
মোক্ষসাধনং কুর্যাদিত্যাহ ভগবাঞ্ছৌনক ইত্যুপনিষত্ ..
ॐ ভদ্রং কর্ণেভিঃ শৃণুযাম দেবাঃ .. ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ .. ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .. স্বস্তি নঃ পূষা বিশ্ববেদাঃ ..
স্বস্তি নস্তার্ক্ষ্যো অরিষ্টনেমিঃ .. স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি পরব্রহ্মোপনিষত্সমাপ্তা..