নৃসিংহতাপিনী

.. নৃসিংহতাপিন্যুপনিষত্ ..
       .. নৃসিংহপূর্বতাপিন্যুপনিষত্ ..

যত্তুর্যোঙ্কারাগ্রপরাভূমিস্থিরবরাসনম্ .
প্রতিযোগিবিনির্মুক্ততুর্যংতুর্যমহং মহঃ ..
ॐ ভদ্রং কর্ণেভিঃ শৃণুযাম দেবাঃ .
ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ .
ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবাঃ .
স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ .
স্বস্তি নো বৃহস্পতির্দধাতু .
ॐ   শান্তিঃ   শান্তিঃ   শান্তিঃ ..
ॐ আপো বা ইদমাসংস্তত্সলিলমেব .
স প্রজাপতিরেকঃ পুষ্করপর্ণে সমভবত্ .
তস্যান্তর্মনসি কামঃ সমবর্তত ইদং সৃজেযমিতি .
তস্মাদ্যত্পুরুষো মনসাভিগচ্ছতি তদ্বাচা বদতি
তত্কর্মণা করোতি তদেষভ্যনূক্তা .
কামস্তদগ্রে সমবর্ততাধি মনসো রেতঃ প্রথমং যদাসীত্ .
সতো বন্ধুমসতি নিরবিন্দন্হৃদি প্রতীষ্যা কবযো মনীষেতি
উপৈনং তদুপনমতি যত্কামো ভবতি য এবং বেদ
স তপোঽতপ্যত স তপস্তপ্ত্বা স এতং মন্ত্ররাজং
নারসিংহমানুষ্টভমপশ্যত্তেন বৈ সর্বমিদমসৃজত
যদিদং কিঞ্চ . তস্মাত্সর্বমানুষ্টুভমিত্যাচক্ষতে
যদিদং কিঞ্চ . অনুষ্টুভো বা ইমানি ভূতানি জাযন্তে
অনুষ্টুভা জাতানি জীবন্তি অনুষ্টুভং প্রযন্ত্যভিসংবিশন্তি
তস্যৈশা ভবতি অনুষ্টুপ্প্রথমা ভবতি
অনুষ্টুবুত্তমা ভবতি বাগ্বা অনুষ্টুপ্ বাচৈব প্রযন্তি
বাচোদ্যন্তি পরমা বা এষা ছন্দসাং যদনুষ্টুবিতি .. ১..
সসাগরাং সপর্বতাং সপ্তদ্বীপাং বসুন্ধরাং তত্সাম্নঃ
প্রথমং পাদং জানীযাত্
যক্ষগন্ধর্বাপ্সরোগণসেবিতমন্তরিক্ষং
তত্সাম্নো দ্বিতীতযং পাদং জানীযাদ্বসুরুদ্রাদিত্যৈঃ
সর্বৈর্দেবৈঃ সেবিতং দিবং তত্সাম্নস্তৃতীযং পাদং জানীযাত্
ব্রহ্মস্বরূপং নিরঞ্জনং পরমং ব্যোমকং তত্সাম্নশ্চতুর্থং
পাদং জানীযাদ্যো জানীতে সোঽমৃতত্বং চ গচ্ছতি
ঋগ্যজুঃসামাথর্বাণশ্চত্বারো বেদাঃ সাঙ্গাঃ
সশাখাশ্চত্বারঃ পাদা ভবন্তি কিং ধ্যানং কিং দৈবতং
কান্যঙ্গানি কানি দৈবতানি কিং ছন্দঃ ক ঋষিরিতি .. ২..
স হোবাচ প্রজাপতিঃ স যো হ বৈ সাবিত্র্যস্যাষ্টাক্ষরং
পদং শ্রিযাভিষিক্তং তত্সাম্নোঽঙ্গং বেদ শ্রিযা
হৈবাভিষিচ্যতে সর্বে বেদাঃ প্রাণবাদিকাস্তং প্রবণং
তত্সাম্নোঽঙ্গং বেদ স ত্রীংল্লোকাঞ্জযতি চতুর্বিংশত্যক্ষরা
মহালক্ষ্মীর্যজুস্তত্সাম্নোঽঙ্গং বেদ স আযুর্যশঃকীর্তি-
জ্ঞানৈশ্বৈর্যবান্ভবতি তস্মাদিদং সাঙ্গং সাম
জানীযাদ্যো জানীতে সোঽমৃতত্বং চ গচ্ছতি  সাবিত্রীং
প্রণবং যজুর্লক্ষ্মীং স্ত্রীশূদ্রায নেচ্ছন্তি
দ্বাত্রিংশদক্ষরং সাম জানীযাদ্যো জানীতে
সোঽমৃতত্বং চ গচ্ছতি সাবিত্রীং লক্ষ্মীং যজুঃ প্রণবং
যদি জানীযাত্ স্ত্রী শূদ্রঃ স মৃতোঽধো গচ্ছতি
তস্মাত্সর্বদা নাচষ্টে যদ্যাচষ্টে
স আচার্যস্তেনৈব স মৃতোঽধো গচ্ছতি .. ৩..
স হোবাচ প্রজাপতিঃ অগ্নির্বৈ দেবা ইদং সর্বং বিশ্বা
ভূতানি প্রাণা বা ইন্দ্রিযাণি পশবোঽন্নমভৃতং
সম্রাট্ স্বরাড্বিরাট্ তত্সাম্নঃ প্রথমং পাদং জানীযাত্
ঋগ্যজুঃসামাথর্বরূপঃ সূর্যোঽন্তরাদিত্যে হিরণ্মযঃ
পুরুষস্তত্সাম্নো দ্বিতীযং পাদং জানীযাত্ য ওষধীনাং
প্রভুর্ভবতি তারাধিপতিঃ সোমস্তত্সাম্নস্তৃতীযং পাদং
জানীযাত্ স ব্রহ্মা স শিবঃ স হরিঃ সেন্দ্রঃ সোঽক্ষরঃ
পরমঃ স্বরাট্ তত্সাম্নশ্চতুর্থং পাদং জানীযাদ্যো জানীতে
সোঽমৃতত্বং চ গচ্ছতি উগ্রং প্রথমস্যাদ্যং জ্বলং
দ্বিতীযস্যাদ্যং নৃসিংহং তৃতীযস্যাদ্যং মৃত্যুং
চতুর্থস্যাদ্যং সাম জানীযাদ্যো জানীতে সোঽমৃতত্বং চ
গচ্ছতি তস্মাদিদং সাম যত্র কুত্রচিন্নাচষ্টে যদি
দাতুমপেক্ষতে পুত্রায শুশ্রূষবে দাস্যত্যন্যস্মৈ
শিষ্যায বা চেতি .. ৪..
স হোবাচ প্রজাপতিঃ ক্ষীরোদার্ণবশাযিনং নৃকেসরিবিগ্রহং
যোগিধ্যেযং পরং পদং সাম জানীযাদ্যো জানীতে সোঽমৃতত্বং
চ গচ্ছতি বীরং প্রথমাস্যাদ্যার্ধ্যান্ত্যং তং স
দ্বিতীযস্যাদ্যার্ধ্যান্ত্যং হং ভী তৃতীযস্যাদ্যার্ধ্যান্ত্যং
মৃত্যুং চতুর্থস্যাদ্যার্ধ্যান্ত্যং সাম তু জানীযাদ্যো জানীতে
সোঽমৃতত্বং চ গচ্ছতি তস্মাদিদং সাম যেন
কেনচিদাচার্যমুখেন যো জানীতে স তেনৈব শরীরেণ
সংসারান্মুচ্যতে মোচযতি মুমুক্ষুর্ভবতি জপাত্তেনৈব শরীরেণ
দেবতাদর্শনং করোতি তস্মাদিদমেব মুখ্যদ্বারং কলৌ
নান্যেষং ভবতি
তস্মাদিদং সাঙ্গং সাম জানীযাদ্যো জানীতে সোঽমৃতত্বং চ
গচ্ছতি .. ৫..
ঋতং সত্যং পরং ব্রহ্ম পুরুষং কৃষ্ণপিঙ্গলম্ .
ঊর্ধ্বরেতং বিরূপাক্ষং শঙ্করং নীললোহিতম্ ..
উমাপতিঃ পশুপতিঃ পিনাকী হ্যমিতদ্যুতিঃ .
ঈশানঃ সর্ববিদ্যানামীশ্বরঃ সর্বভূতানাং
ব্রহ্মাধিপতির্ব্রহ্মণোঽধিপতির্যো বৈ যজুর্বেদবাচ্যস্ত্বং
সাম জানীযাদ্যো জানীতে সোঽমৃতত্বং চ গচ্ছতি
মহাপ্রথমান্তার্ধস্যাদ্যন্তবতো দ্বিতীযান্তার্ধস্যাদ্যং
ষণং তৃতীযান্তার্ধস্যাদ্যং নাম চতুর্থান্তর্ধস্যাদ্যং
সাম জানীতে সোঽমৃতত্বং চ গচ্ছতি তস্মাদিদং সাম
সচ্চিদানন্দমযং পরং ব্রহ্ম তমেববংবিদ্বানমৃত
ইহ ভবতি তস্মাদিদং সাঙ্গং সাম জানীযাদ্যো জানীতে
সোঽমৃতত্বং চ গচ্ছতি .. ৬..
বিশ্বসৃজ এতেন বৈ বিশ্বমিদমসৃজন্ত যদ্বিশ্বমসৃজন্ত
তস্মাদ্বিশ্বসৃজো বিশ্বমেনাননু প্রজাযতে ব্রহ্মণঃ
সলোকতাং সার্ষ্টিতাং সাযুজ্যং যান্তি তস্মাদিদং
সাঙ্গং জানীযাদ্যো জানীতে সোঽমৃতত্বং চ গচ্ছতি
বিষ্ণুং প্রথমান্ত্যং মুখং দ্বিতীযান্ত্যং ভদ্রং
তৃতীযান্ত্যং ম্যহং চতুর্থ্যান্তং সাম জানীযাদ্যো
জানীতে সোঽমৃতত্বং চ গচ্ছতি স্ত্রীপুংসযোর্বা ইহৈব
স্থাতুমপেক্ষতে তস্মৈ সর্বৈশ্বৈর্যং দদাতি যত্র কুত্রাপি
ম্রিযতে দেহান্তে দেবঃ পরমং ব্রহ্ম তারকং ব্যাচষ্টে
যেনাসাবমৃতীভূত্বা সোঽমৃতত্বং চ গচ্ছতি
তস্মাদিদং সাম মধ্যগং জপতি তস্মাদিদং সামাঙ্গং
প্রজাপতিস্তস্মাদিদং সামাঙ্গং প্রজাপতির্য এবং বেদেতি
মহোপনিষত্ . য এতাং মহোপনিষদং বেদ স
কৃতপুরশ্চরণো মহাবিষ্ণুর্ভবতি মহাবিষ্ণুর্ভবতি .. ৭..
ইতি প্রথমোপনিষত্ .. ১..
দেবা হ বৈ মৃত্যোঃ পাপ্মভ্যঃ সংসারাচ্চ বিভীযুস্তে
প্রজাপতিমুপাধাবংস্তেভ্য এতং মন্ত্ররাজং
নারসিংহমানুষ্টুভং প্রাযচ্ছত্তেন বৈ তে মৃত্যুমজযন্
পাপ্মানং চাতরন্সংসারং চাতরংস্তস্মাদ্যো মৃত্যোঃ
পাপ্মভ্যঃ সংসারাচ্চ বিভীযাত্স এতং মন্ত্ররাজং
নারসিংহমানুষ্টুভং প্রতিগৃহ্ণীযাত্স মৃত্যুং তরতি
স পাপ্মানং তরতি স সংসারং তরতি তস্য হ বৈ প্রণবস্য
যা পূর্বা মাত্রা পৃথিব্যকারঃ স ঋগ্ভিরৃগ্বেদো ব্রহ্মা
বসবো গাযত্রী গার্হপত্যঃ সা সাম্নঃ প্রথমঃ পাদো ভবতি
দ্বিতীযান্তরিক্ষং স উকারঃ স যজুভির্যজুর্বেদো বিষ্ণুরুদ্রা-
স্ত্রিষ্টুব্দক্ষিণাগ্নিঃ সা সাম্নো দ্বিতীযঃ পাদো ভবতি
তৃতীযা দ্যৌঃ স মকারঃ স সামভিঃ সামবেদো রুদ্রা
আদিত্যা জগত্যাহবনীযঃ সা সাম্নস্তৃতীযঃ পাদো ভবতি
যাবসানেঽস্য চতুর্থ্যর্ধমাত্রা স সোমলোক ওঙ্কারঃ
সোঽথর্বণৈর্মন্ত্রৈরথর্ববেদঃ সংবর্তকোঽগ্নির্মরুতো
বিরাডেকর্ষির্ভাস্বতী স্মৃতা সা সাম্নশ্চতুর্থঃ
পাদো ভবতি .. ১..
অষ্টাক্ষরঃ প্রথমঃ পাদো ভবত্যষ্টাক্ষরাস্ত্রযঃ
পাদা ভবন্ত্যেবং দ্বাত্রিংশদক্ষরাণি সংপদ্যন্তে
দ্বাত্রিংশদক্ষরা বা অনুষ্টুব্ভবত্যনুষ্টুভা
সর্বমিদং সৃষ্টমনুষ্টুভা সর্বমুপসংহৃতং
তস্য হৈতস্য পঞ্চাঙ্গানি ভবন্তি চত্বারঃ
পাদাশ্চত্বারঙ্গানি ভবন্তি সপ্রণবং সর্বং
পঞ্চমং ভবতি হৃদযায নমঃ শিরসে স্বাহা
শিখাযৈ বষট্ কবচায হুং অস্ত্রায ফডিতি
প্রথমং প্রথমেন সংযুজ্যতে দ্বিতীযং দ্বিতীযেন
তৃতীযং তৃতীযেন চতুর্থং চতুর্থেন পঞ্চমং
পঞ্চমেন ব্যতিষজতি ব্যতিষিক্তা বা ইমে
লোকাস্তস্মাদ্ব্যতিষিক্তান্যঙ্গানি ভবন্তি
ওমিত্যেতদক্ষরমিদং সর্বং তস্মাত্প্রত্যক্ষরমুভযত
ওঙ্কারো ভবতি অক্ষরাণাং ন্যাসমুপদিশন্তি
ব্রহ্মবাদিনঃ .. ২..
তস্য হ বা উগ্রং প্রথমং স্থানং জানীযাদ্যো
জানীতে সোঽমৃতত্বং চ গচ্ছতি বীরং দ্বিতীযং স্থানং
মহাবিষ্ণুং তৃতীযং স্থানং জ্বলন্তং চতুর্থং
স্থানং সর্বতোমুখং পঞ্চমং স্থানং নৃসিংহং
ষষ্ঠং স্থানং ভীষণং সপ্তমং স্থানং
ভদ্রমষ্টমং স্থানং মৃত্যুমৃত্যুং নবমং স্থানং
নমামি দশমং স্থানমমেকাদশং স্থানং
জানীযাদ্যো জানীতে সোঽমৃতত্বং চ গচ্ছতি একাদশপদা
বা অনুষ্টুব্ভবত্যনুষ্টুভা সর্বমিদং সৃষ্টমনুষ্টুভা
সর্বমিদমুপসংহৃতং তস্মাত্সর্বানুষ্টুভং জানীযাদ্যো
জানীতে সোঽমৃতত্বং চ গচ্ছতি .. ৩..
দেব হ বৈ প্রজাপতিমব্রুবন্নথ কস্মাদুচ্যত
উগ্রমিতি স হোবাচ প্রজাপতির্যস্মাত্স্বমহিম্না
সর্বাং৅ল্লোকান্সর্বান্দেবান্সর্বানাত্মনঃ সর্বাণি
ভূতান্যুদ্বৃহ্ণাত্যজস্রং সৃজতি বিসৃজতি
বাসযত্ত্যুদ্গ্রাহ্যত উদ্গৃহ্যতে স্তুহি শ্রুতং গর্তসদং
যুবানং মৃগং ন ভীমমুপহন্ত্রুমুগ্রং
মৃডাজরিত্রে রুদ্রস্তবানো অন্যন্তে অস্মন্নিবপন্তু সেনাঃ
তস্মাদুচ্যত উগ্রমিতি ..
অথ কস্মাদুচ্যতে বীরমিতি যস্মাত্স্বমহিম্না
সর্বাং৅ল্লোকান্সর্বান্দেবান্সর্বানাত্মনঃ সর্বাণি
ভূতানি বিরমতি বিরামযত্যজস্রং সৃজতি বিসৃজতি বাসযতি
যতো বীরঃ কর্মণ্যঃ সুদৃক্ষো যুক্তগ্রাব জাযতে
দেবকামস্তস্মাদুচ্যতে বীরমিতি ..
অথ কস্মাদুচ্যতে মহাবিষ্ণুমিতি যস্মাত্স্বমহিম্না
সর্বাং৅ল্লোকান্সর্বান্দেবান্সর্বানাত্মনঃ সর্বাণি
ভূতানি ব্যাপ্নোতি ব্যাপযতি স্নেহো যথা পললপিণ্ডং
শান্তমূলমোতং প্রোতমনুব্যাসং ব্যতিষিক্তো ব্যাপযতে
যস্মান্ন জাতঃ পরো অন্যো অস্তি য আবিবেশ ভুবনানি বিশ্বা
প্রজাপতিঃ প্রজযা সংবিদানঃ ত্রীণি জ্যোতীংষি সচতে
সষোডষীং তস্মাদুচ্যতে মহাবিষ্ণুমিতি ..
অথ কস্মাদুচ্যতে জ্বলন্তমিতি যস্মাত্স্বমহিম্না
সর্বা৅ংল্লোকান্সর্বান্দেবান্সর্বানাত্মনঃ সর্বাণি
স্বতেজসা জ্বলতি জ্বালযতি জ্বাল্যতে জ্বালযতে সবিতা প্রসবিতা
দীপ্তো দীপযন্দীপ্যমানঃ জ্বলং জ্বলিতা
তপন্বিতপন্ত্সংতপন্রোচনো
রোচমানঃ শোভনঃ শোভমানঃ কল্যাণস্তস্মাদুচ্যতে
জ্বলন্তমিতি ..
অথ কস্মাদুচ্যতে সর্বতোমুখমিতি যস্মাত্স্বমহিম্না
সর্বাং৅ল্লোকান্সর্বান্দেবান্সর্বানাত্মনঃ সর্বাণি ভূতানি
স্বযমনিন্দ্রিযোঽপি সর্বতঃ পশ্যতি সর্বতঃ শৃণোতি
সর্বতো গচ্ছতি সর্বত আদত্তে সর্বগঃ সর্বগতস্তিষ্ঠতি .
একঃ পুরস্তাদ্য ইদং বভূব যতো বভূব ভুবনস্য গোপাঃ .
যমপ্যেতি ভুবনং সাংপরাযে নমামি তমহং
সর্বতোমুখমিতি তস্মাদুচ্যতে সর্বতোমুখমিতি ..
অথ কস্মাদুচ্যতে নৃসিংহমিতি যস্মাত্সর্বেষাং ভূতানাং
না বীর্যতমঃ শ্রেষ্ঠতমশ্চ সিংহো বীর্যতমঃ
শ্রেষ্ঠতমশ্চ . তস্মান্নৃসিংহ আসীত্পরমেশ্বরো
জগদ্ধিতং বা এতদ্রূপং যদক্ষরং ভবতি প্রতদ্বিষ্ণুস্তবতে
বীর্যায মৃগো ন ভীমঃ কুচরো গিরিষ্ঠাঃ . যস্যোরুষু
ত্রিষু বিক্রমণেষ্বধিক্ষিযন্তি ভুবনানি বিশ্বা তস্মাদুচ্যতে
নৃসিংহমিতি ..
অথ কস্মাদুচ্যতে ভীষণমিতি যস্মাদ্ভীষণং
যস্য রূপং দৃষ্ট্বা সর্বে লোকাঃ সর্বে দেবাঃ
সর্বাণি ভূতানি ভীত্যা পলাযন্তে স্বযং যতঃ কুতশ্চ
ন বিভেতি ভীষাস্মত্দ্বাতঃ পবতে ভীষোদেতি সূর্যঃ
ভীষাস্মাদগ্নিশ্চেন্দ্রস্য মৃত্যুর্ধাবতি পঞ্চম
ইতি তস্মাদুচ্যতে ভীষণমিতি ..
অথ কস্মাদুচ্যতে ভদ্রমিতি যস্মাত্স্বযং ভদ্রো ভূত্বা
সর্বদা ভদ্রং দদাতি রোচনো রোচমানঃ শোভনঃ
শোভমানঃ কল্যাণঃ . ভদ্রং কর্ণেভিঃ শৃণুযাম
দেবাঃ ভদ্রং পশ্যেমাক্ষভির্যজত্রাঃ
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং
যদাযুঃ তস্মাদুচ্যতে ভদ্রমিতি ..
অথ কস্মাদুচ্যতে মৃত্যুমৃত্যুমিতি যস্মাত্স্বমহিম্না
স্বভক্তানাং স্মৃত এব মৃত্যুমপমৃত্যুং চ মারযতি .
য আত্মদা বলদা যস্য বিশ্ব উপাসতে প্রশিষং যস্য
দেবাঃ যস্য ছাযামৃতং যো মৃত্যুমৃত্যুঃ কস্মৈ
দেবায হবিষা বিধেম তস্মাদুচ্যতে মৃত্যুমৃত্যুমিতি ..
অথ কস্মাদুচ্যতে নমামীতি যস্মাদ্যং সর্বে দেবা নমন্তি
মুমুক্ষবো ব্রহ্মবাদিনশ্চ . প্র নূনং ব্রহ্মণস্পতির্মন্ত্রং
বদত্যুক্থ্যং যস্মিন্নিন্দ্রো বরুণো মিত্রো অর্যমা দেবা ওকাংসি
চক্রিরে তস্মাদুচ্যতে নমামীতি ..
অথ কস্মাদুচ্যতেঽহমিতি . অহমস্মি প্রথমজা ঋতাস্য
পূর্বং দেবেভ্যো অমৃতস্য নাভিঃ . যো মা দদাতি স
ইদেবমাবাঃ অহমন্নমন্নমদন্তমদ্মি অহং বিশ্বং
ভুবনমভ্যভবাং সুবর্ণজ্যোতির্য এবং বেদেতি মহোপনিষত্ ..
৪..
ইতি দ্বিতীযোপনিষত্ .. ২..
দেবা হ বৈ প্রজাপতিমব্রুবন্নানুষ্টুভস্য
মন্ত্ররাজস্য নারসিংহস্য শক্তিং বীজং নো
ব্রূহি ভগবন্নিতি স হোবাচ প্রজাপতির্মাযা বা
এষা নারসিংহী সর্বমিদং সৃজতি সর্বমিদং রক্ষতি
সর্বমিদং সংহরতি তস্মান্মাযামেতাং শক্তিং
বিদ্যাদ্য এঅতাং মাযাং শক্তিং বেদ স পাপ্মানং
তরতি স মৃত্যুং তরতি স সংসারং তরতি সোঽমৃতত্বং
চ গচ্ছতি মহতীং শ্রিযমশ্নুতে মীমাংসন্তে
ব্রহ্মবাদিনো হ্রস্বা দীর্ঘা প্লুতা চেতি ..
যদি হ্রস্বা ভবতি সর্বং পাপ্মানং দহত্যমৃতত্বং
চ গচ্ছতি যদি দীর্ঘা ভবতি মহতীং
শ্রিযমাপ্নোত্যমৃতত্বং চ গচ্ছতি যদি প্লুতা ভবতি
জ্ঞানবান্ভবত্যমৃতত্বং চ গচ্ছতি তদেতদৃষিণোক্তং
নিদর্শনং স ঈং পাহি য ঋজীষী তরুত্রঃ শ্রিযং
লক্ষ্মীমৌপলামম্বিকাং গাং ষষ্ঠীং চ
যামিন্দ্রসেনেত্যুদাহুঃ তাং বিদ্যাং ব্রহ্মযোনিং
সরূপামীআযুষে শরণমহং প্রপদ্যে সর্বেষাং বা
এতদ্ভূতানামাকাশঃ পরাযণং সর্বাণি হ বা ইমানি
ভূতান্যাকাশাদেব জাযন্ত আকাশাদেব জাতানি
জীবন্ত্যাকাশং প্রযত্যভিসংবিশন্তি তস্মাদাকাশং
বীজং বিদ্যাত্তদেব জ্যাযস্তদেতদৃষিণোক্তং নিদর্শনং
হংসঃ শুচিষদ্বসুরন্তরিক্ষসদ্ধোত
বেদিষদতিথির্দুরোণসত্ ..
নৃষদ্বরসদৃতসদ্ব্যোমসদব্জাগোজা ঋতজা অদ্রিজা
ঋতং বৃহত্ ..
য এবং বেদেতি মহোপনিষত্ ..
ইতি তৃতীযোপনিষত্ .. ৩..
দেবা হ বৈ প্রজাপতিমব্রুবন্ননুষ্টুভস্য
মন্ত্ররাজস্য নারসিংহস্যাঙ্গমন্ত্রান্নো
ব্রূহি ভগব ইতি স হোবাচ প্রজাপতিঃ প্রণবং
সাবিত্রীং যজুর্লক্ষ্মীং নৃসিংহগাযত্রীমিত্যঙ্গানি
জানীযাদ্যো জানীতে সোঽমৃতত্বং চ গচ্ছতি .. ১..
ওমিত্যেতদক্ষরমিদং সর্বং তস্যোপব্যাখ্যানং
ভূতং ভবদ্ভবিষ্যদিতি সর্বমোঙ্কার এব
যচ্চান্যত্ত্রিকালাতীতং তদপ্যোঙ্কার এব সর্বং
হ্যেতদ্ব্রহ্মাযমাত্মা ব্রহ্ম সোঽযমাত্মা
চতুষ্পাজ্জাগরিতস্থানো বহিঃপ্রজ্ঞঃ সপ্তাঙ্গ
একোনবিংশতিমুখঃ স্থূলভুগ্বৈশ্বানরঃ
প্রথমঃ পাদঃ . স্বপ্নস্থানোঽন্তপ্রজ্ঞঃ
সপ্তাঙ্গ একোনবিংশতিমুখঃ প্রবিবিক্তভুক্তৈজসো
দ্বিতীযঃ পাদঃ . যত্র সুপ্তো ন কঞ্চন কামং
কামযতে ন কঞ্চন স্বপ্নং পশ্যতি তত্সুষুপ্তং
সুষুপ্তস্থান একীভূতঃ প্রজ্ঞানঘন একানন্দমযো
হ্যানন্দভুক্ চেতোমুখঃ প্রাজ্ঞস্তৃতীযো পাদঃ .
এষ সর্বেশ্বর এষ সর্বজ্ঞ এষোঽন্তর্যাম্যেষ
যোনিঃ সর্বস্য প্রভবাপ্যযৌ হি ভূতানাং
নান্তঃপ্রজ্ঞং ন বহিঃপ্রজ্ঞং নোভযতঃপ্রজ্ঞং
ন প্রজ্ঞং নাপ্রজ্ঞং ন প্রজ্ঞানঘনমদৃষ্ট-
মব্যবহার্যমগ্রাহ্যমলক্ষণমচিন্ত্যমব্যপদেশ্য-
মৈকাত্ম্যপ্রত্যযসারং প্রপঞ্চোপশমং শান্তং
শিবমদ্বৈতং চতুর্থং মন্যন্তে স আত্মা স বিজ্ঞেযঃ .. ২..
অথ সাবিত্রী গাযত্র্যা যজুষা প্রোক্তা তযা
সর্বমিদং ব্যাপ্তং ঘৃণিরিতি দ্বে অক্ষরে সূর্য
ইতি ত্রীণি এতদ্বৈ সাবিত্রস্যাষ্টাক্ষরং পদং
শ্রিযাভিষিক্তং য এবং বেদ শ্রিযা হৈবাভিষিচ্যতে .
তদেতদৃচাভ্যুক্তং ঋচো অক্ষরে পরমে
ব্যোমন্যস্মিন্দেবা অধিবিশ্বে নিষেদুঃ . যস্তন্ন বেদ
কিমৃচা করিষ্যতি য ইত্তদ্বিদুস্ত ইমে সমাসত
ইতি ন হ বা এতস্যর্চা ন যজুষা ন সাম্নার্থোঽস্তি
যঃ সাবিত্রং বেদেতি . ॐভূর্লক্ষ্মীর্ভুবর্লক্ষ্মীঃ
স্বর্লক্ষ্মীঃ কালকর্ণী তন্নো মহালক্ষ্মীঃ
প্রচোদযাত্ ইত্যেষা বৈ মহাঅলক্ষ্মীর্যজুর্গাযত্রী
চতুর্বিংশত্যক্ষরা ভবতি . গাযত্রী বা ইদং সর্বং
যদিদং কিঞ্চ তস্মাদ্য এতাং মহালক্ষ্মীং
যাজুষীং বেদ মহতীং শ্রিযমশ্নুতে .
ॐ নৃসিংহায বিদ্মহে বজ্রনখায ধীমহি .
তন্নঃ সিংহঃ প্রচোদযাত্ ইত্যেষা বৈ নৃসিংহগাযত্রী
দেবানাং বেদানাং নিদানং ভবতি য এবং বেদ
নিদানবান্ভবতি .. ৩..
দেবা হ বৈ প্রজাপতিমব্রুবন্নথ কৈর্মন্ত্রৈঃ
স্তুতো দেবঃ প্রীতো ভবতি স্বাত্মানং দর্শযতি
তন্নো ব্রূহি ভগবন্নিতি স হোবাচ প্রজাপতিঃ .
ॐ যো হ বৈ নৃসিংহো দেবো ভগবান্যশ্চ
ব্রহ্মা বূর্ভুবঃ স্বস্তস্মৈ বৈ নমো নমঃ .. ১..
[যথা প্রথমমন্ত্রোক্তাবাদ্যন্তৌ তথা
সর্বমন্ত্রেষু দ্রষ্টব্যৌ].. যশ্চ বিষ্ণুঃ .. ২..
যশ্চ মহেশ্বরঃ .. ৩.. যশ্চ পুরুষঃ .. ৪..
যশ্চেশ্বরঃ .. ৫.. যা সরস্বতী .. ৬.. যা শ্রীঃ .. ৭..
যা গৌরী .. ৮.. যা প্রকৃতিঃ .. ৯.. যা বিদ্যা .. ১০..
যশ্চোঙ্কারঃ .. ১১.. যাশতস্রোঽর্ধমাত্রাঃ .. ১২..
যে বেদাঃ সাঙ্গাঃ সশাখাঃ সেতিহাসাঃ .. ১৩..
যে চ পঞ্চাগ্নযঃ .. ১৪.. যাঃ সপ্ত মহাব্যাহৃতযঃ .. ১৫..
যে চাষ্টৌ লোকপালাঃ .. ১৬.. যে চাষ্টৌ বসবঃ .. ১৭..
যে চৈকাদশ রুদ্রাঃ .. ১৮.. যে চ দ্বাদশাদিত্যাঃ .. ১৯..
যে চাষ্টৌ গ্রহাঃ .. ২০.. যানি চ পঞ্চমহাভূতানি .. ২১..
যশ্চ কালঃ .. ২২.. যশ্চ মনুঃ .. ২৩.. যশ্চ মৃত্যুঃ .. ২৪..
যশ্চ যমঃ .. ২৫.. যশ্চান্তকঃ .. ২৬.. যশ্চ প্রাণঃ .. ২৭..
যশ্চ সূর্যঃ .. ২৮.. যশ্চ সোমঃ .. ২৯..
যশ্চ বিরাট্ পুরুষঃ .. ৩০..  যশ্চ জীবঃ .. ৩১..
যচ্চ সর্বম্ .. ৩২.. ইতি দ্বাত্রিংশত্ ইতি
তান্প্রজাপতিরব্রবীদেতৈর্মন্ত্রৈর্নিত্যং দেবং স্তুবধ্বম্ .
ততো দেবঃ প্রীতো ভবতি স্বাত্মানং দর্শযতি তস্মাদ্য
এতৈর্মন্ত্রৈর্নিত্যং দেবং স্তৌতি স দেবং পশ্যতি সোঽমৃতত্বং
চ গচ্ছতি য এবং বেদেতি মহোপনিষত্ ..
ইতি চতুর্থ্যুপনিষত্ .. ৪..
দেবা হ বৈ প্রজাপতিমব্রুবন্নানুষ্টুভস্য
মন্ত্ররাজস্য নারসিংহস্য মহাচক্রং নাম
চক্রং নো ব্রূহি ভগব ইতি সার্বকামিকং মোক্ষদ্বারং
উদ্যোগিন উপদিশন্তি স হোবাচ প্রজাপতিঃ ষডক্ষরং
বা এতত্সুদর্শনং মহাচক্রং তস্মাত্ষডরং
ভবতি ষট্পত্রং চক্রং ভবতি ষড্বা ঋতব ঋতুভিঃ
সংমিতং ভবতি মধ্যে নাভির্ভবতি নাভ্যাং বা এতে অরাঃ
প্রতিষ্ঠিতা মাযযা এতত্সর্বং বেষ্টিতং ভবতি
নাত্মানং মাযা স্পৃশতি তস্মান্মাযযা বহির্বেষ্টিতং
ভবতি . অথাষ্টারমষ্টপত্রং চক্রং ভবত্যষ্টাক্ষরা
বৈ গাযত্রী গাযত্র্যা সংমিতং ভবতি বহির্মাযযা
বেষ্টিতং ভবতি ক্ষেত্রং ক্ষেত্রং বৈ মাযৈষা সম্পদ্যতে .
অথ দ্বাদশারং দ্বাদশপত্রং চক্রং ভবতি
দ্বাদশাক্ষরা বৈ জগতী জগত্যা সংমিতং ভবতি
বহির্মাযযা বেষ্টিতং ভবতি . অথ ষোডশারং
ষোডশপত্রং চক্রং ভবতি ষোডশকালো বৈ পুরুষঃ
পুরুষ এবেদং সর্বং পুরুষেণ সংমিতং ভবতি
ষোডশকালো বৈ পুরুষঃ পুরুষ এবেদং সর্বং
পুরুষেণ সংমিতং ভবতি মাযযা বহির্বেষ্টিতং
ভবতি . অথ দ্বাত্রিংশদরং দ্বাত্রিংশত্পত্রং চক্রং
ভবতি দ্বাত্রিংশদক্ষরা বা অনুষ্টুব্ভবত্যনুষ্টুভা
সর্বমিদং ভবতি বহির্মাযযা বেষ্টিতং ভবত্যরৈর্বা
এতত্সুবদ্ধং ভবতি বেদা বা এতে অরাঃ পত্রৈর্বা
এতত্সর্বতঃ পরিক্রামতি ছন্দাংসি বৈ পত্রাণি .. ১..
এতত্সুদর্শনং মহাচক্রং তস্য মধ্যে নাভ্যাং
তারকং যদক্ষরং নারসিংহমেকাক্ষরং
তদ্ভবতি ষট্সু পত্রেষু ষডক্ষরং সুদর্শনং
ভবত্যষ্টসু পত্রেষ্বষ্টাক্ষরং নারাযণং
ভবতি দ্বাদশসু পত্রেষু দ্বাদশাক্ষরং বাসুদেবং
ভবতি ষোডশসু পত্রেষু মাতৃকাদ্যাঃ সবিন্দুকাঃ
ষোডশ স্বরা ভবন্তি দ্বাত্রিংশত্সু পত্রেষু
দ্বাত্রিংশদক্ষরং মন্ত্ররাজং নারসিংহমানুষ্টুভং
ভবতি তদ্বা এতত্সুদর্শনং নাম চক্রং সার্বকামিকং
মোক্ষদ্বারমৃঙ্মযং যজুর্মযং সামমযং
ব্রহ্মমযমমৃতমযং ভবতি তস্য পুরস্তাদ্বসব
আসতে রুদ্রা দক্ষিণত আদিত্যাঃ পশ্চাদ্বিশ্বেদেবা
উত্তরতো ব্রহ্মবিষ্ণুমহেশ্বরা নাভ্যাং সূর্যাচন্দ্রমসৌ
পার্শ্বযোস্তদেতদৃচাভ্যুক্তম্ . ঋচো অক্ষরে পরমে
ব্যোমন্যস্মিন্দেবা অধিবিশ্বে নিষেদুঃ . যস্তন্ন বেদ
কিমৃচা করিষ্যতি য ইত্তদ্বিদুস্ত ইমে সমাসত ইতি
তদেতত্সুদর্শনং মহাচক্রে বালো বা যুবা বা
বেদ স মহান্ভবতি স গুরুঃ সর্বেষাং
মন্ত্রাণামুপদেষ্টা ভবত্যনুষ্টুভা হোমং
কুর্যাদনুষ্টুভার্চনং কুর্যাত্তদেতদ্রক্ষোঘ্নং
মৃত্যুতারকং গুরুণা লব্ধং কণ্ঠে বাহৌ
শিখাযাং বা বধ্নীত সপ্তদ্বীপবতী ভূমির্দক্ষিণার্থং
নাবকল্পতে তস্মাচ্ছ্রদ্ধযা যাং কাঞ্চিদ্গাং
দদ্যাত্স দক্ষিণা ভবতি .. ২..
দেবা হ বৈ প্রজাপতিমব্রুবন্নানুষ্টুভস্য
মন্ত্ররাজস্য নারসিংহস্য ফলং নো ব্রূহি
ভগব ইতি স হোবাচ প্রজাপতির্য এতং মন্ত্ররাজং
নারসিংহমানুষ্টুভং নিত্যমধীতে  সোঽগ্নোপূতো
ভবতি স বাযুপূতো ভবতি স আদিত্যপূতো ভবতি
স সোমপূতো ভবতি স সত্যপূতো ভবতি স ব্রহ্মপূতো
ভবতি স বিষ্ণুপূতো ভবতি স রুদ্রপূতো ভবতি
স সর্বপূতো ভবতি স সর্বপূতো ভবতি .. ৩..
য এতং মন্ত্ররাজং নারসিংহমানুষ্টুভং
নিত্যমধীতে স মৃত্যুং তরতি স পাপ্মানং তরতি
স ভ্রূণহত্যাং তরতি স বীরহত্যাং তরতি স সর্বহত্যাং
তরতি স সংসারং তরতি স সর্বং তরতি স সর্বং তরতি .. ৪..
য এতং মন্ত্ররাজং নারসিংহমানুষ্টুভং
নিত্যমধীতে সোঽগ্নিং স্তম্ভযতি স বাযুং স্তম্ভযতি
স আদিত্যং স্তম্ভযতি স স্তোমং স্তম্ভযতি স উদকং
স্তম্ভযতি স সর্বান্দেবাংস্তম্ভযতি স
সর্বান্গ্রহাংস্তম্ভযতি স বিষং স্তম্ভযতি
স বিষং স্তম্ভযতি .. ৫..
য এতং মন্ত্ররাজং নারসিংহমানুষ্টুভং
নিত্যমধীতে স দেবানাকর্ষযতি স যক্ষানাকর্ষযতি
স নাগানাকর্ষযতি স গ্রহানাকর্ষযতি  স
মনুষ্যানাকর্ষযতি স সর্বানাকর্ষযতি স
সর্বানাকর্ষযতি .. ৬..
য এতং মন্ত্ররাজং নারসিংহমানুষ্টুভং
নিত্যমধীতে স ভূর্লোকং জযতি স ভুবর্লোকং জযতি
স স্বর্লোকং জযতি স মহর্লোকং জযতি স জনোলোকং
জযতি স তপোলোকং জযতি স সত্যলোকং জযতি স
সর্বাংল্লোকাঞ্জযতি স সর্বাংল্লোকাঞ্জযতি .. ৭..
য এতং মন্ত্ররাজমানুষ্টুভং নিত্যমধীতে
সোঽগ্নিষ্টোমেন যজতে স উক্থ্যেন যজতে স ষোডশিনা
যজতে স বাজপেযেন যজতে সোঽতিরাত্রেণ যজতে
সোঽপ্তোর্যামেণ যজতে সোঽশ্বমেধেন যজতে স সর্বৈঃ
ক্রতুভির্যজতে স সর্বৈঃ ক্রতুভির্যজতে .. ৮..
য এতং মন্ত্ররাজং নারসিংহমানুষ্টুভং
নিত্যমধীতে স ঋচোঽধীতে স যজূংষ্যধীতে স
সামান্যধীতে সোঽথর্বণমধীতে সোঽঙ্গিরসমধীতে
স শাখা অধীতে স পুরাণান্যধীতে স কল্পানধীতে
স গাথামধীতে স নারাশংসীরধীতে স প্রণবমধীতে
যঃ প্রণবমধীতে স সর্বমধীতে স সর্বমধীতে .. ৯..
অনুপনীতশতমেকমেকেনোপনীতেন তত্সমমুপনীতশতমেকমেকেন
গৃহস্থেন তত্সমং গৃহস্থশতমেকমেকেন
বানপ্রস্থেন তত্সমং বানপ্রস্থশতমেকমেকেন
যতিনা তত্সমং যতীনাং তু শতং পূর্ণমেকমেকেন
রুদ্রজাপকেন তত্সমং রুদ্রজাপকশতমেকমেকেন-
অথর্বশিরঃশিখাধ্যাপকেন তত্সমমথর্বশিরঃ-
শিখাধ্যাপকশতমেকমেকেন তাপনীযোপনিষদ-
ধ্যাপকেন তত্সমং তাপনীযোপনিষদধ্যাপক-
শতমেকমেকেন মন্ত্ররাজধ্যাপকেন তত্সমং তদ্বা
এতত্পরমং ধাম মন্ত্ররাজাধ্যাপকস্য যত্র ন
সূর্যস্তপতি যত্র ন বাযুর্বাতি যত্র ন চন্দ্রমা ভাতি
যত্র ন নক্ষত্রাণি ভান্তি যত্র নাগ্নির্দহতি যত্র ন
মৃত্যুঃ প্রবিশতি যত্র ন দুঃখং সদানন্দং
পরমানন্দং শান্তং শাশ্বতং সদাশিবং
ব্রহ্মাদিবন্দিতং যোগিধ্যেযং পরমং পদং যত্র
গত্বা ন নিবর্তন্তে যোগিনঃ ..
তদেতদৃচাভ্যুক্তম্ .
তদ্বিষ্ণোঃ পরমং পদং সদা পশ্যন্তি সূরযঃ .
দিবীব চক্ষুরাততম্ . তদ্বিপ্রাসো বিপন্যবো জাগৃবাংসঃ
সমিন্ধতে . বিষ্ণোর্যত্পরমং পদম্ .
তদেতন্নিষ্কামস্য ভবতি তদেতন্নিষ্কামস্য ভবতি
য এবং বেদেতি মহোপনিষত্ .. ১০..
ইতি পঞ্চমোপনিষত্ .. ৫..
ইতি নৃসিংহপূর্বতাপিন্যুপনিষত্ ..

.. নৃসিংহোত্তরতাপিন্যুপনিষত্ ..
নৃসিংহোত্তরতাপিন্যাং তুর্যতুর্যাত্মকং মহঃ .
পরমাদ্বৈতসাম্রাজ্যং প্রত্যক্ষমুপলভ্যতে ..
ॐ দেবা হ বৈ প্রজাপতিমব্রুবন্নণোরণীযাং-
সমিমমাত্মানমোঙ্কারং নো ব্যাচক্ষ্বেতি
তথেত্যোমিত্যেতদক্ষরমিদং সর্বং তস্যোপব্যাখ্যানং
ভূতং ভবদ্ভবিষ্যদিতি সর্বমোঙ্কার এব
যচ্চান্যত্ত্রিকালাতীতং তদপ্যোঙ্কার এব সর্বং
হ্যেতদ্ব্রহ্মাযমাত্মা ব্রহ্ম তমেতমাত্মানমোমিতি
ব্রহ্মণৈকীকৃত্য ব্রহ্ম চাত্মানমোমিত্যেকীকৃত্য
তদেকমজরমমৃতমভযমোমিত্যনুভূয
তস্মিন্নিদং সর্বং ত্রিশরীরমারোপ্য তন্মযং হি
তদেবেতি সংহরেদোমিতি তং বা এতং ত্রিশরীরমাত্মানং
ত্রিশরীরং পরং ব্রহ্মানুসন্দধ্যাত্স্থূলত্বাত্-
স্থূলভুক্ত্বাচ্চ সূক্ষ্মত্বাত্সূক্ষ্মভুক্ত্বা-
চ্চৈক্যাদানন্দভোগাচ্চ সোঽযমাত্মা
চতুষ্পাজ্জাগরিতস্থানঃ স্থূলপ্রজ্ঞঃ সপ্তাঙ্গ
একোনবিংশতিমুখঃ স্থূলভুক্ চতুরাত্মা বিশ্বো
বৈশ্বানরঃ প্রথমঃ পাদঃ ..
স্বপ্নস্থানঃ সূক্ষ্মপ্রজ্ঞঃ সপ্তাঙ্গ
একোনবিংশতিমুখঃ সূক্ষ্মভুক্ চতুরাত্মা
তৈজসো হিরণ্যগর্ভো দ্বিতীযঃ পাদঃ ..
যত্র সুপ্তো ন কঞ্চন কামং কামযতে ন
কঞ্চন স্বপ্নং পশ্যতি তত্সুষুপ্তং
সুষুপ্তস্থান একীভূতঃ প্রজ্ঞানঘন
এবানন্দমযো হ্যানন্দভুক্ চেতোমুখশ্চতুরাত্মা
প্রাজ্ঞ ঈশ্বরস্তৃতীযঃ পাদঃ ..
এষ সর্বেশ্বর এষ সর্বজ্ঞ এষোঽন্তর্যামেষ
যোনিঃ সর্বস্য প্রভবাপ্যযৌ হি ভূতানং
ত্রযমপ্যেতত্সুষুপ্তং স্বপ্নং মাযামাত্রং
চিদেকরসো হ্যযমাত্মাথ তুরীযশ্চতুরাত্মা
তুরীযাবসিতত্বাদেকৈকস্যোতানুজ্ঞাত্রনুজ্ঞাবিকল্পৈ-
স্ত্রযমপ্যত্রাপিসুষুপ্তং স্বপ্নং মাযামাত্রং
চিদেকরসো হ্যযমাত্মাথাযমাদেশো ন
স্থূলপ্রজ্ঞং ন সূক্ষ্মপ্রজ্ঞং নোভযতঃপ্রজ্ঞং
ন প্রজ্ঞং নাপ্রজ্ঞং ন প্রজ্ঞানঘন-
মদৃষ্টমব্যবহার্যমগ্রাহ্যমলক্ষণ-
মচিন্ত্যমচিন্ত্যমব্যপদেশ্যমৈকাত্ম্যপ্রত্যযসারং
প্রপঞ্চোপশমং শিবং শান্তমদ্বৈতং চতুর্থং
মন্যন্তে স আত্মা স বিজ্ঞেয ঈশ্বরগ্রাসস্তুরীযস্তুরীযঃ ..
ইতি প্রথমঃ খণ্ডঃ .. ১..
তং বা এতমাত্মানং জাগ্রত্যস্বপ্নমসুষুপ্তং
স্বপ্নে জাগ্রতমসুষুপ্তং সুষুপ্তে জাগ্রতমস্বপ্নং
তুরীযে জাগ্রতমস্বপ্নমসুষুপ্তব্যভিচারিণং
নিত্যানন্দং সদেকরসং হ্যেব চক্ষুষো দ্রষ্টা
শ্রোত্রস্য দ্রষ্টা বাচো দ্রষ্টা মনসো দ্রষ্টা
বুদ্ধের্দ্রষ্টা প্রাণস্য দ্রষ্টা তমসো দ্রষ্টা
সর্বস্য দ্রষ্টা ততঃ সর্বস্মাদন্যো বিলক্ষণচক্ষুষঃ
সাক্ষী শ্রোত্রস্য সাক্ষী বাচঃ সাক্ষী মনসঃ সাক্ষীঃ
বুদ্ধেঃ সাক্ষী প্রাণস্য সাক্ষী তমসঃ সাক্ষী
সর্বস্য সাক্ষী ততোঽবিক্রিযো মহাচৈতন্যোঽস্মাত্সর্বস্মাত্প্রিযতম
আনন্দঘনং হ্যেবমস্মাত্সর্বস্মাত্পুরতঃ
সুবিভাতমেকরসমেবাজরমমৃতমভযং
ব্রহ্মৈবাপ্যজযৈনং চতুষ্পাদং মাত্রাভিরোঙ্কারেণ
চৈকীকুর্যাজ্জাগরিতস্থানশ্চতুরাত্মা বিশ্বো
বৈশ্বানরশ্চতূরূপোঙ্কার এব চতূরূপো
হ্যযমকারঃ স্থূলসূক্ষ্মবীজসাক্ষিভিরকাররূপৈ-
রাপ্তেরাদিমত্ত্বাদ্বা স্থূলত্বাত্সূক্ষ্মত্বাদ্-
বীজত্বাত্সাক্ষিত্বাচ্চাপ্নোতি হ বা ইদং সর্বমাদিশ্চ
ভবতি য এবং বেদ ..
স্বপ্নস্থানশ্চতুরাত্মা তৈজসো হিরণ্যগর্ভশ্চতূরূপ
উকার এব চতূরূপো হ্যযমুকারঃ স্থূলসূক্ষ্মবীজ-
সাক্ষিভিরুকাররূপৈরুত্কর্ষাদুভযত্বাত্স্থূলত্বাত্-
সূক্ষ্মত্বাদ্বীজত্বাত্সাক্ষিত্বাচ্চোত্কর্ষতি হ বৈ
জ্ঞানসন্ততিং সমানশ্চ ভবতি য এবং বেদ ..
সুষুপ্তস্থানশ্চতুরাত্ম প্রাজ্ঞৈইশ্বরশ্চতুরূপো
মকার এব চতূরূপো হ্যযং মকারঃ স্থূলসূক্ষ্ম-
বীজসাক্ষিভির্মকাররূপৈর্মিতেরপীতের্বা স্থূলত্বাত্-
সূক্ষ্মত্বাদ্বীজত্বাত্সাক্ষিত্বাচ্চ মিনোতি হ বা
ইদং সর্বমপীতিশ্চ ভবতি য এবং বেদ ..
মাত্রামাত্রাঃ প্রতিমাত্রাঃ কুর্যাদথ তুরীয ঈশ্বরগ্রাসঃ
স স্বরাট্ স্বযমীশ্বরঃ স্বপ্রকাশশ্চতুরাত্মো-
তানুজ্ঞাত্রনুজ্ঞাবিকল্পৈরোতো হ্যযমাত্মা হ্যথৈবেদং
সর্বমন্তকালে কালাগ্নিঃ সূর্যোস্রৈরনুজ্ঞাতো হ্যযমাত্মা
হ্যস্য সর্বস্য স্বাত্মানং দদাতীদং সর্বং
স্বাত্মানমেব করোতি যথা তমঃ সবিতনুজ্ঞকরসো
হ্যযমাত্মা চিদ্রূপ এব যথা দাহ্যং দগ্ধ্বাগ্নিরবিকল্পো
হ্যযমাত্মা বাঙ্মনোঽগোচরত্বাচ্চিদ্রূপশ্চতূরূপ
ॐকার এব চতূরূপো হ্যযমোঙ্কার ওতানুজ্ঞাত্রনুজ্ঞা-
বিকল্পৈরোঙ্কাররূপৈরাত্মৈব নামরূপাত্মকং হীদং
সর্বং তুরীযত্বাচ্চিদ্রূপত্বাচ্চোতত্বাদনুজ্ঞাতৃত্বাদ-
নুজ্ঞানত্বাদবিকল্পরূপত্বাচ্চাবিকল্পরূপং হীদং
সর্বং নৈব তত্র কাচন ভিদাস্ত্যথ তস্যাযমাদেশো
মাত্রশ্চতুর্থো ব্যবহার্যঃ প্রপঞ্চোপশমঃ
শিবোঽদ্বৈত ॐকার আত্মৈব সংবিশত্যাত্মনাত্মানং
য এবং বেদৈষ বীরো নারসিংহেন বানুষ্টুভা
মন্ত্ররাজেন তুরীযং বিদ্যাদেষ হ্যাত্মানং প্রকাশযতি
সর্বসংহারসমর্থঃ পরিভবাসহঃ প্রভুর্ব্যাপ্তঃ
সদোজ্জ্বলোঽবিদ্যাতত্কার্যহীনঃ স্বাত্মবন্ধহরঃ সর্বদা
দ্বৈতরহিত আনন্দরূপঃ সর্বাধিষ্ঠানঃ সন্মাত্রো
নিরস্তাবিদ্যাতমোমোহোঽহমেবেতি তস্মাদেবমেবেমমাত্মানং
পরং ব্রহ্মানুসন্দধ্যাদেষ বীরো নৃসিংহ এবেতি ..
ইতি দ্বিতীযঃ খণ্ডঃ .. ২..
তস্য হ বৈ প্রণবস্য যা পূর্বা মাত্রা সা প্রথমঃ
পাদো ভবতি দ্বিতীযা দ্বিতীযস্য তৃতীযা তৃতীযস্য
চতুর্থ্যোতানুজ্ঞাত্রনুজ্ঞাবিকল্পরূপা তযা তুরীযং
চতুরাত্মানমন্বিষ্য চতুর্থপাদেন চ তযা
তুরীযেণানুচিন্তযন্গ্রসেত্তস্য হ বা এতস্য প্রণবস্য
যা পূর্বা মাত্রা সা পৃথিব্যকারঃ স ঋগ্ভিরৃগ্বেদো
ব্রহ্মা বসবো গাযত্রী গার্হপত্যঃ সা প্রথমঃ পাদো
ভবতি চ সর্বেষু পাদেষু চতুরাত্মা স্থূলসূক্ষ্ম-
বীজসাক্ষিভির্দ্বিতীযান্তরিক্ষং স উকারঃ  স যজুভির্-
যজুর্বেদো বিষ্ণুরুদ্রাস্ত্রিষ্টুব্দক্ষিণাগ্নিঃ সা দ্বিতীযঃ
পাদো ভবতি চ সর্বেষু পাদেষু চতুরাত্মা
স্থূলসূক্ষ্মবীজসাক্ষিভিস্তৃতীযা দ্যৌঃ স মকারঃ
স সামভিঃ সামবেদো রুদ্রাদিত্যা জগত্যাহবনীযঃ সা
তৃতীযঃ পাদো ভবতি ভবতি চ সর্বেষু পাদেষু
চতুরাত্মা স্থূলসূক্ষ্মবীজসাক্ষিভির্যাবসানেঽস্য
চতুর্থ্যর্ধমাত্রা সা সোমলোক ॐকারঃ সাথর্বণৈ-
র্মন্ত্রৈরথর্ববেদঃ সংবর্তকোঽগ্নির্মরুতো বিরাডেকর্ষির্ভাস্বতী
স্মৃতা চতুর্থঃ পাদো ভবতি ভবতি চ সর্বেষু পাদেষু
চতুরাত্মা স্থূলসূক্ষ্মবীজসাক্ষিভির্মাত্রামাত্রাঃ
প্রতিমাত্রাঃ কৃত্বোতনুজ্ঞাত্রনুজ্ঞাবিকল্পরূপং
চিন্তযন্গ্রসেজ্জ্ঞোঽমৃতো হুতসংবিত্কঃ শুদ্ধঃ সংবিষ্টো
নির্বিগ্ন ইমমসুনিযমেঽনুভূযেহেদং সর্বং দৃষ্ট্বা স
প্রপঞ্চহীনোঽথ সকলঃ সাধারোঽমৃতমযশ্চতুরাত্মাথ
মহাপীঠে সপরিবারং তমেতং চতুঃসপ্তাত্মানং
চতুরাত্মানং মূলাগ্নাবগ্নিরূপং প্রণবং
সন্দধ্যাত্সপ্তাত্মানং চতুরাত্মানমকারং রুদ্রং
ভ্রূমধ্যে সপ্তাত্মানং চতুরাত্মানং চতুঃসপ্তাত্মানং
চতুরাত্মানমোঙ্কারং সর্বেশ্বরং দ্বাদশান্তে
সপ্তাত্মানং চতুরাত্মানং চতুঃসপ্তাত্মানমোঙ্কারং
তুরীযমানন্দামৃতরূপং ষোডশান্তেঽথানন্দামৃতেনৈ-
তাংশ্চতুর্ধা সংপূজ্য তথা ব্রহ্মাণমেব বিষ্ণুমেব
রুদ্রমেব বিভক্তাংস্ত্রীনেবাবিভক্তাংস্ত্রীনেব লিঙ্গরূপনেব
চ সংপূজ্যোপহারৈশ্চতুর্ধাথ লিঙ্গাত্সংহৃত্য
তেজসা শরীরত্রযং সংব্যাপ্য তদধিষ্ঠানমাত্মানং
সংজ্বাল্য তত্তেজ আত্মচৈতন্যরূপং বলমবষ্টভ্য
গুণৈরৈক্যং সংপাদ্য মহাস্থূলং মহাসূক্ষ্মে
মহাসূক্ষ্মং মহাকারণে চ সংহৃত্য মাত্রাভিরোতা-
নুজ্ঞাত্রনুজ্ঞাবিকল্পরূপং চিন্তযন্গ্রসেত্ ..
ইতি তৃতীযঃ খণ্ডঃ .. ৩..
তং বা এতমাত্মানং পরমং ব্রহ্মোঙ্কারং
তুরীযোঙ্কারাগ্রবিদ্যোতমনুষ্টুভা নত্বা প্রসাদ্যোমিতি
সংহৃত্যাহমিত্যনুসন্দধ্যাদথৈতমেবাত্মানং
পরমং ব্রহ্মোঙ্কারং তুরীযোঙ্কারাগ্রবিদ্যোতমেকা-
দশাত্মানং নারসিংহং নত্বোমিতি সংহরন্নানুসন্দধ্যা-
দথৈতমেবমাত্মানং পরমং ব্রহ্মোঙ্কারং
তুরীযোঙ্কারাগ্রবিদ্যোতং প্রণবেন সংচিন্ত্যানুষ্টুভা
নত্বা সচ্চিদানন্দপূর্ণাত্মসু নবাত্মকং
সচ্চিদানন্দপূর্ণাত্মানং পরং ব্রহ্ম সংভাব্যাহ-
মিত্যাত্মানমাদায মনসা ব্রহ্মণৈকীকুর্যাদ্যদনুষ্টুভৈব
বা এষ উপবসন্নেষ হি সর্বত্র সর্বদা সর্বাত্মা সন্
সর্বমত্তি নৃসিংহোঽসৌ পরমেশ্বরোঽসৌ হি সর্বত্র সর্বদা
সর্বাত্মা সন্ত্সর্বমত্তি নৃসিংহ এবৈকল এষ তুরীয
এঅষ এবোগ্র এষ এব বীর এষ এব মহানেষ এব বিষ্ণুরেষ
এব জ্বলন্নেষ এব সর্বতোমুখ এষ এষ নৃসিংহ এষ এব
ভীষণ এষ এব ভদ্র এষ এব মৃত্যুমৃত্যুরেষ এব
নমাম্যেষ এবাহমেবং যোগারূঢো ব্রহ্মণ্যেবানুষ্টুভং
সন্দধ্যাদোঙ্কার ইতি .. তদেতৌ শ্লোকৌ ভবতঃ ..
সংস্তভ্য সিংহ স্বসুতান্গুণার্থা-
      ন্সংযোজ্য শৃঙ্গৈরৃষভস্য হত্বা ..
বশ্যাং স্ফুরন্তীমসতীং নিপীড্য
      সংভক্ষ্য সিংহেন স এষ বীরঃ ..
শৃঙ্গপ্রোতান্পাদান্স্পৃষ্ট্বা হত্বা তানগ্রসত্স্বযম্ .
নত্বা চ বহুধা দৃষ্ট্বা নৃসিংহঃ স্বযমুদ্বভাবিতি ..
ইতি চতুর্থঃ খণ্ডঃ .. ৪..
অথৈষ উ এব অকার আপ্ততমার্থ আত্মন্যেব
নৃসিংহে দেবে ব্রহ্মণি বর্তত এষ হ্যেবাপ্ততম
এষ হি সাক্ষ্যেষ ঈশ্বরস্তত্সর্বগতো নহীদং
সর্বমেষ হি ব্যাপ্ততমৈদং সর্বং যদযমাত্মা
মাযামাত্র এষ এবোগ্র এষ হি ব্যাপ্ততম এষ
এব বীর এষ হি ব্যাপ্ততম এষ এব মহানেষ
হি ব্যাপ্ততম এষ এব বিষ্ণুরেষ হি ব্যাপ্ততম
এষ এব জ্বলন্নেষ হি ব্যাপ্ততম এষ এব
সর্বতোমুখ এষ হি ব্যাপ্ততম এষ এব নৃসিংহ
এষ হি ব্যাপ্ততম এষ এব ভীষণ এষ হি
ব্যাপ্ততম এষ এব ভদ্র এষ হি ব্যাপ্ততম
এষ এব মৃত্যুমৃত্যুরেষ হি ব্যাপ্ততম এষ
এব নমাম্যেষ হি ব্যাপ্ততম এষ এবাহমেষ
হি ব্যাপ্ততম আত্মৈব নৃসিংহো দেবো ব্রহ্ম ভবতি
য এবং বেদ সোঽকামো নিষ্কাম আপ্তকাম
আত্মকামেন তস্য প্রাণা উত্ক্রামন্ত্যত্রৈব
সমবলীযন্তে ব্রহ্মৈব সন্ব্রহ্মাপ্যেত্যথৈষ
এবোঙ্কার উত্কৃষ্টতমার্থ আত্মন্যেব নৃসিংহে
দেবে ব্রহ্মণি বর্ততে তস্মাদেষ সত্যস্বরূপো ন
হ্যন্যদস্ত্যপ্রমেযমনাত্মপ্রকাশমেষ হি
স্বপ্রকাশোঽসঙ্গোঽন্যন্ন বীক্ষত আত্মাতো
নান্যথা প্রাপ্তিরাত্মমাত্রং হ্যেতদুত্কৃষ্টমেষ
এবোগ্র এষ হ্যেবোত্কৃষ্ট এষ এব বিষ্ণুরেষ
হ্যেবোত্কৃষ্ট এষ এব জ্বলন্নেষ হ্যেবোত্কৃষ্ট
এষ এব সর্বতোমুখ এষ হ্যেবোত্কৃষ্ট এষ এব
নৃসিংহ এষ হ্যেবোত্কৃষ্ট এষ এব ভীষণ
এষ হ্যেবোত্কৃষ্ট এষ এব ভদ্র এষ হ্যেবোত্কৃষ্ট
এষ এব মৃত্যুমৃত্যুরেষ হ্যেবোত্কৃষ্ট এষ
এব নমাম্যেষ হ্যেবোত্কৃষ্ট এষ এবাহমেষ
হ্যেবোত্কৃষ্টস্তস্মাদাত্মানমেবৈনং জানীযাদাত্মৈব
নৃসিংহো দেবো ব্রহ্ম ভবতি য এবং বেদ সোঽকামো
নিষ্কাম আপ্তকাম আত্মকামো ন তস্য প্রাণা
উত্ক্রামন্ত্যত্রৈব সমবলীযন্তে ব্রহ্মৈব
সন্ব্রহ্মাপ্যেত্যথৈষ এব মকারো মহাবিভূত্যর্থ
আত্মন্যৈব নৃসিংহে দেবে ব্রহ্মণি বর্ততে তস্মাদযমনল্পো
ভিন্নরূপঃ স্বপ্রকাশো ব্রহ্মৈবাপ্ততম
উত্কৃষ্টতম এতদেব ব্রহ্মাপি সর্বজ্ঞং মহামাযং
মহাবিভূত্যেতদেবোগ্রমেতদ্ধি মহাবিভূত্যেতদেব
বীরমেতদ্ধি মহাবিভূত্যতদেব মহদেতদ্ধি
মহাবিভূত্যেতদেব বিষ্ণ্বেতদ্ধি মহাবিভূত্যেতদেব
জ্বলদেতদ্ধি মহাবিভূত্যেতদেব সর্বতোমুখমেতদ্ধি
মহাবিভূত্যেতদেব নৃসিংহমেতদ্ধি মহাবিভূত্যেতদেব
ভীষণমেতদ্ধি মহাবিভূত্যেতদেব ভদ্রমেতদ্ধি
মহাবিভূত্যেতদেব মৃত্যুমৃত্য্বেতদ্ধি মহাবিভূত্যেতদেব
নমাম্যেতদ্ধি মহাবিভূত্যেতদেবাহমেতদ্ধি মহাবিভূতি
তস্মাদকারোকারাভ্যামিমমাত্মানমাপ্ততমমুত্কৃষ্টতমং
চিন্মাত্রং সর্বদ্রষ্টারং সর্বসাক্ষিণং সর্বগ্রাসং
সর্বপ্রেমাস্পদং সচ্চিদানন্দমাত্রমেকরসং
পুরতোঽস্মাত্সর্বস্মাত্সুবিভাতমন্বিষ্যাপ্ততমমুত্কৃষ্টতমং
মহামাযং মহাবিভূতি সচ্চিদানন্দমাত্রমেকরসং
পুরমেব ব্রহ্ম মকারেণ জানীযাদাত্মৈব নৃসিংহো দেবঃ
পরমেব ব্রহ্ম ভবতি য এবং বেদ সোঽকামো নিষ্কাম
আপ্তকাম আত্মকামো ন তস্য প্রাণা উত্ক্রামন্ত্যত্রৈব
সমবলীযন্তে ব্রহ্মৈব সন্ব্রহ্মাপ্যেতীতি হ প্রজাপতিরুবাচ
প্রজাপতিরুবাচ ..
ইতি পঞ্চমঃ খণ্ডঃ .. ৫..
তে দেবা ইমমাত্মানং জ্ঞাতুমৈচ্ছংস্তান্হাসুরঃ
পাপ্মা পরিজগ্রাহ ত ঐক্ষন্তহন্তৈনমাসুরং
পাপ্মানং গ্রসাম ইত্যেতমেবোঙ্কারাগ্রবিদ্যোতং
তুরীযতুরীযমাত্মানমুগ্রমনুগ্রং বীরমবীরং
মহান্তমমহান্তং বিষ্ণুমবিষ্ণুং
জ্বলন্তমজ্বলন্তং সর্বতোমুখমসর্বতোমুখং
নৃসিংহমনৃসিংহং ভীষণমভীষণং
ভদ্রমভদ্রং মৃত্যুমৃত্যুমমৃত্যুমৃত্যুং
নমাম্যনমাম্যহমনহং নৃসিংহানুষ্টুভৈব
বুবুধিরে তেভ্যো হাসাবাসুরঃ পাপ্মা
সচ্চিদানন্দঘনজ্যোতিরভবত্তস্মাদপক্বকষায
ইমমেবোঙ্কারাগ্রবিদ্যোতং তুরীযতুরীযমাত্মানং
নৃসিংহানুষ্টুভৈব জানীযাত্তস্যাসুরঃ পাপ্মা
সচ্চিদানন্দঘনজ্যোতির্ভবতি তে দেবা জ্যোতিরুত্তিতীর্ষবো
দ্বিতীযাদ্ভযমেব পশ্যন্ত ইমমেবোঙ্কারাগ্রবিদ্যোতং
তুরীযতুরীযমাত্মানমনুষ্টুভান্বিষ্য প্রণবেনৈব
তস্মিন্নবস্থিতাস্তেভ্যস্তজ্জ্যোতিরস্য সর্বস্য পুরতঃ
সুবিভাতমবিভাতমদ্বৈতমচিন্ত্যমলিঙ্গং
স্বপ্রকাশমানন্দঘনং শূন্যমভবদেবংবিত্স্বপ্রকাশং
পরমেব ব্রহ্ম ভবতি তে দেবাঃ পুত্রৈষণাযাশ্চ
বিত্তৈষণাযাশ্চ লোকৈষণাযাশ্চ সসাধনেভ্যো
ব্যুত্থায নিরাকারা নিষ্পরিগ্রহা অশিখা অযজ্ঞোপবীতা
অন্ধা বধিরা মুগ্ধাঃ ক্লীবা মূকা উন্মত্ত ইব
পরিবর্তমানাঃ শান্তা দান্তা উপরতাস্তিতিক্ষবঃ
সমাহিতা আত্মরতয আত্মক্রীডা আত্মমিথুনা
আত্মানন্দাঃ প্রণবমেব পরং ব্রহ্মাত্মপ্রকাশং
শূন্যং জানন্তস্তত্রৈব পরিসমাপ্তাস্তস্মাদ্দেবানাং
ব্রতমাচরন্নোঙ্কারে পরে ব্রহ্মণি পর্যবসিতো ভবেত্স
আত্মন্যেবাত্মানং পরং ব্রহ্ম পশ্যতি ..
তদেষ শ্লোকঃ ..
শৃঙ্গেশ্বশৃঙ্গং সংযোজ্য সিংহং শৃঙ্গেষু যোজযেত্ .
শৃঙ্গাভ্যাং শৃঙ্গমাবধ্য ত্রযো দেব উপাসত ইতি ..
ইতি ষষ্ঠঃ খণ্ডঃ .. ৬..
দেবা হ বৈ প্রজাপতিমব্রুবন্ ভূয এব নো
ভগবান্বিজ্ঞাপযত্বিতি তথেত্যজত্বাদমরত্বাদ-
জরত্বাদমৃতত্বাদশোকত্বাদমোহত্বাদনশনাযত্বাদ-
পিপাসত্বাদদ্বৈতত্বাচ্চাকরেণেমমাত্মান-
মন্বিষ্যোত্কৃষ্টত্বাদুত্পাদকত্বাদুত্প্রবেষ্টত্বাদু-
ত্থাপযিতৃত্বাদুদ্দ্রষ্টৃত্বাদুত্কর্তৃত্বাদুত্পথ-
বারকত্বাদ্দুদ্গ্রাসত্বাদুদ্ভ্রান্তত্বাদুত্তীর্ণবিকৃতত্বা-
চ্চোঙ্কারেণেমমাত্মানং পরমং ব্রহ্ম
নৃসিংহমন্বিষ্যাকারেণেমমাত্মানমুকারং
পূর্বার্হমাকৃষ্য সিংহীকৃত্যোত্তরার্ধেন তং
সিংহমাকৃষ্য মহত্ত্বান্মহস্ত্বান্মানত্বা-
ন্মুক্তত্বান্মহাদেবত্বান্মহেশ্বরত্বান্মহাসত্ত্বা-
ন্মহাচিত্ত্বান্মহানন্দত্বান্মহপ্রভুত্বাচ্চ
মকারার্ধেনানেনাত্মনৈকীকুর্যাদশরীরো
নিরিন্দ্রিযোঽপ্রাণোঽতমাঃ সচ্চিদানন্দমাত্রঃ
স স্বরাড্ ভবতি য এবং বেদ কস্ত্বমিত্যহমিতি
হোবাচৈবমেবেদং সর্বং তস্মাদহমিতি সর্বাভিধানং
তস্যাদিরযমকারঃ স এব ভবতি সর্বং হ্যযমাত্মানং
হি সর্বান্তরো ন হীদং সর্বমহমিতি হোবাচৈব
নিরাত্মকমাত্মৈবেদং সর্বং তস্মাত্সর্বাত্মকেনাকারেণ
সর্বাত্মকমাত্মানমন্বিচ্ছেদ্ব্রহ্মৈবেদং সর্বং
সচ্চিদানন্দরূপং সচ্চিদানন্দরূপমিদং সর্বং
সদ্ধীদং সর্বং সত্সদিতি চিদ্ধীদং সর্বং কাশতে
প্রকাশতে চেতি কিং সদিতীদমিদং নেত্যনুভূতিরিতি
কৈষেতীযমিযং নেত্যবচনেনৈবানুভবন্নুবাচিঅবমেব
চিদানন্দাবপ্যবচনেনৈবানুভবন্নুবাচ সর্বমন্যদিতি
স পরমানন্দস্য ব্রহ্মণো নাম ব্রহ্মেতি তস্যান্ত্যোঽযং
মকারঃ স এব ভবতি তস্মান্মকারেণ পরমং
ব্রহ্মান্বিচ্ছেত্কিমিদমেবমিত্যুকার ইত্যেবাহাবিচিকিত্স-
ন্নকারেণেমমাত্মানমন্বিষ্য মকারেণ ব্রহ্মণানু-
সন্দধ্যাদুকারেণাবিচিকিত্সন্নশরীরোঽনিন্দ্রিযোঽপ্রাণোঽতমাঃ
সচ্চিদানন্দমাত্রঃ স স্বরাড্ ভবতি য এবং বেদ
ব্রহ্ম বা ইদং সর্বমত্তৃত্বাদুগ্রত্বাদ্বীরত্বান্মহত্বাদ্-
বিষ্ণুত্বাজ্জ্বলত্বাত্সর্বতোমুখত্বান্নৃসিংহত্বাদ্ভীষণত্বা-
দ্ভদ্রত্বান্মৃত্যুমৃত্যুত্বান্নমামিত্বাদহংবাদিতি সততং
হ্যেতদ্ব্রহ্মোগ্রত্বাদ্বীরত্বান্মহত্ত্বাদ্বিষ্ণুত্বাজ্জ্বলত্বা-
সর্বতোমুখত্বান্নৃসিংহত্বাদ্ভীষণত্বাদ্ভদ্রত্বা-
ন্মৃত্যুমৃত্যুত্বান্নমামিত্বাদিতি তস্মাদকারেণ পরমং
ব্রহ্মান্বিষ্য মকারেণ মন আদ্যবিতারং মন আদিসাক্ষিণ-
মন্বিচ্ছেত্স যদৈতত্সর্বমপেক্ষতে তদৈতত্সর্বমস্মিন্প্রবিশতি
স যদা প্রতিবুধ্যতে তদেতত্সর্বমস্মাদেবোত্তিষ্ঠতি তদেব
তত্সর্বং নিরূহ্য প্রত্যূহ্য সংপীড্য সংজ্বাল্য সংভক্ষ্য
স্বাত্মানমেবৈষা দদাত্যত্যুগ্রোঽতিবীরোতিমহানিতি
বিষ্ণুরতিজ্বলন্নতিসর্বতোমুখোঽতিনৃসিংহোঽতিভীষণোঽতি-
ভদ্রোতিমৃত্যুমৃত্যুরতিনমামত্যহং ভূত্বা স্বে মহিম্নি
সদা সমাসতে তস্মাদেনমকারার্থেন পরেণ
ব্রহ্মণৈকীকুর্যাদুকারেণাবিচিকিত্সন্নশরীরো
নিরিন্দ্রিযোঽপ্রাণোঽমনঃ সচ্চিদানন্দমাত্রঃ স স্বরাড্ ভবতি
য এবং বেদ..
তদেষ শ্লোকঃ ..
শৃঙ্গং শৃঙ্গার্ধমাকৃষ্য শৃঙ্গেণানেন যোজযেত্ .
শৃঙ্গমেনং পরে শৃঙ্গে তমনেনাপি যোজযেত্ ..
ইতি সপ্তমঃ খণ্ডঃ .. ৭..
অথ তুরীযেণোতশ্চ প্রোতশ্চ হ্যযমাত্মা
নৃসিংহোঽস্মিন্সর্বমযং সর্বাত্মানং হি
সর্বং নৈবাতোঽদ্বযো হ্যযমাত্মৈকল এবাববিকল্পো
ন হি বস্তু সদযং হ্যোত ইব সদ্ধনোঽযং চিদ্ধন
আনন্দঘন এবৈকরসোঽব্যবহার্যঃ কেনচনাদ্বিতীয
ওতশ্চ প্রোতশ্চৈষ ওঙ্কার এবং নৈবমিতি পৃষ্ট
ওমিত্যেবাহ বাগ্বা ওঙ্কারো বাগেবেদং সর্বং ন
হ্যশব্দমিবেহাস্তি চিন্মযো হ্যযমোঙ্কারশ্চিন্মযমিদং
সর্বং তস্মাত্পরমেশ্বর এবৈকমেব তদ্ভবত্যেত-
দমৃতমযমেতদ্ব্রহ্মাভযং বৈ ব্রহ্ম ভবতি
য এবং বেদেতি রহস্যমনুজ্ঞাতা হ্যযমাত্মৈষ
হ্যস্য সর্বস্য স্বাত্মানমনুজানাতি ন হীদং সর্বং
স্বত আত্মবিন্ন হ্যযমোতো নানুজ্ঞাতাসঙ্গত্বাদ-
বিকারিত্বাদসত্ত্বাদন্যস্যানুজ্ঞাতা হ্যযমোঙ্কার
ওমিতি হ্যনুজানাতি বাগ্বা ওঙ্কারো বাগেবেদং
সর্বমনুজানাতি চিন্মযো হ্যযমোঙ্কারশ্চিদ্ধীদং
সর্বং নিরাত্মকমাত্মসাত্করোতি তস্মাত্পরমেশ্বর
এবৈকমেব তদ্ভবত্যেতদমৃতমভযমেতদ্ব্রহ্মাভযং
বৈ ব্রহ্মাভযং হি বৈ ব্রহ্ম ভবতি য এবং বেদেতি
রহস্যমনুজ্ঞৈকরসো হ্যযমাত্মা প্রজ্ঞানঘন
এবাযং যস্মাত্সর্বাত্পুরতঃ সুবিভাতোঽতশ্চিদ্ধন
এব ন হ্যযমোতো নানুজ্ঞাতৈতদাত্ম্যং হীদং সর্বং
সদিবানুজ্ঞৈকরসো হ্যযমোঙ্কার ওমিতি হ্যেবান্নুজানাতি
বাগ্বা ওঙ্কারো বাগেব হ্যনুজানাতি চিন্মযো
হ্যযমোঙ্কারশ্চিদেব হ্যনুজ্ঞাতা তস্মাত্পরমেশ্বর
এবৈকমেব তদ্ভবত্যেতদমৃতমভযমেতদ্ব্রহ্মাভযং
বৈ ব্রহ্মাভযং হি বৈ ব্রহ্ম ভবতি য এবং বেদেতি
রহস্যমবিকল্পো হ্যযমাত্মাঽদ্বিতীযত্বাদবিকল্পো
হ্যযমোঙ্কারোঽদ্বিতীযত্বাদেব চিন্মযো হ্যযমোঙ্কার-
স্তস্মাত্পরমেশ্বর এবৈকমেব তদ্ভবত্যবিকল্পোঽপি
নাত্র কাচন ভিদাস্তি নৈব তত্র কাচন ভিদাস্ত্যত্র
হি ভিদামিব মন্যমানঃ শতধা সহস্রধা ভিন্নো
মৃত্যোঃ স মৃত্যুমাপ্নোতি তদেতদদ্বযং স্বপ্রকাশং
মহানন্দমাত্মাইবৈতদমৃতমভযমেতদ্ব্রহ্মাভযং
বৈ ব্রহ্মাভযং হি বৈ ব্রহ্ম ভবতি য এবং বেদেতি
রহস্যম্ ..
ইত্যষ্টমঃ খণ্ডঃ .. ৮..
দেবা হ বৈ প্রজাপতিমব্রুবন্নিমমেব নো
ভগবন্নোঙ্কারমাত্মানমুপদিশেতি
তথেত্যুপদ্রষ্টানুমন্তৈষ আত্মা
নৃসিংহশ্চিদ্রূপ এবাবিকারো হ্যুপলব্ধঃ
সর্বস্য সর্বত্র ন হ্যস্তি দ্বৈতসিদ্ধিরাত্মৈব
সিদ্ধোঽদ্বিতীযো মাযযা হ্যন্যদিব স বা এষ
আত্মা পর এষৈব সর্বং তথাহি প্রজ্ঞেনৈষা
বিদ্যা জগত্সর্বমাত্মা পরমাত্মৈব
স্বপ্রকাশোঽপ্যবিষযজ্ঞানত্বাজ্জানন্নেব
হ্যন্যত্রান্যন্ন বিজানাত্যনুভুতের্মাযা চ
তমোরূপানুভূতিস্তদেতজ্জডং মোহাত্মকম-
নন্তমিদং রূপস্যাস্য ব্যঞ্জিকা নিত্যনিবৃত্তাপি
মূঢৈরাত্মেব দৃষ্টাস্য সত্ত্বমসত্ত্বং চ
দর্শযতি সিদ্ধত্বাসিদ্ধত্বাভ্যাং স্বতন্ত্রা-
স্বতন্ত্রত্বনে সৈষা বটবীজসামান্যবদনেক-
বটশক্তিরেকৈব তদ্যথা বটবীজসামন্যমেক-
মনেকান্স্বাব্যতিরিক্তান্বটান্সবীজানুত্পাদ্য তত্র
তত্র পূর্ণং সত্তিষ্ঠত্যেবমেবৈষা মাযা
স্বাব্যতিরিক্তানি পূর্ণানি ক্ষেত্রাণি দর্শযিত্বা
জীবেশাবভাসেন করোতি মাযা চাবিদ্যা চ
স্বযমেব ভবতি সৈষা চিত্রা সুদৃঢা
বহ্বঙ্কুরা স্বযং গুণভিন্নাঙ্কুরেষ্বপি
গুণভিন্না সর্বত্র ব্রহ্মবিষ্ণুশিবরূপিণী
চৈতন্যদীপ্তা তস্মাদাত্মন এব ত্রৈবিধ্যং
সর্বত্র যোনিত্বমভিমন্তা জীবো নিযন্তেশ্বরঃ
সর্বাহংমানী হিরণ্যগর্ভস্ত্রিরূপ ঈশ্বর-
বদ্ব্যক্তচৈতন্যঃসর্বগো হ্যেষ ঈশ্বরঃ
ক্রিযাজ্ঞানাত্মা সর্বং সর্বমযং সর্বে জীবাঃ
সর্বমযাঃ সর্বাস্ববস্থাসু তথাপ্যল্পাঃ
স বা এষ ভূতানিন্দ্রিযাণি বিরাজং দেবতাঃ
কোশাংশ্চ সৃষ্ট্বা প্রবিশ্যামূঢো
মূঢ ইব ব্যবহরন্নাস্তে মাযযৈব তস্মাদদ্বয
এবাযমাত্মা সন্মাত্রো নিত্যঃ শুদ্ধো বুদ্ধঃ
সত্যো মুক্তো নিরঞ্জনো বিভুরদ্বযানন্দঃ পরঃ
প্রত্যগেকরসঃ প্রমাণৈরেতৈরবগতঃ সত্তামাত্রং
হীদং সর্বং সদেব পুরস্তাত্সিদ্ধং হি ব্রহ্ম ন
হ্যত্র কিঞ্চানুভূযতে নাবিদ্যানুভবাত্মা
ন স্বপ্রকাশে সর্বসাক্ষিণ্যবিক্রিযেঽদ্বযে
পশ্যতেহাপি সন্মাত্রমসদন্যত্সত্যং হীত্থং
পুরস্তাদযোনি স্বাত্মস্থমানন্দচিদ্ধনং
সিদ্ধং হ্যসিদ্ধং তদ্বিষ্ণুরীশানো ব্রহ্মান্যদপি
সর্বং সর্বগতং সর্বমত এব শুদ্ধোঽবাধ্যস্বরূপো
বুদ্ধঃ সুখস্বরূপ আত্মা ন হ্যেতন্নিরাত্মকমপি
নাত্মা পুরতো হি সিদ্ধো ন হীদং সর্বং কদাচিদাত্মা
হি স্বমহিমস্থো নিরপেক্ষ এক এব সাক্ষী স্বপ্রকাশঃ
কিং তন্নিত্যমাত্মাত্র হ্যেব ন বিচিকিত্সমেতদ্ধীদং
সর্বং সাধযতি দ্রষ্টা দ্রষ্টুঃ সাক্ষ্যবিক্রিযঃ
সিদ্ধো নিরবদ্যো বাহ্যাভ্যন্তরবীক্ষণাত্সুবিস্ফুটতমঃ
স পরতাদ্ব্রূতৈষ দৃষ্টোঽদৃষ্টোঽব্যবহার্যোঽপ্যল্পো
নাল্পঃ সাক্ষ্যবিশেষোঽনন্যোঽসুখদুঃখোঽদ্বযঃ
পরমাত্মা সর্বজ্ঞোঽনন্তোঽভিন্নোঽদ্বযঃ সর্বদা
সংবিত্তির্মাযযা নাসংবিত্তিঃ স্বপ্রকাশে যূযমেব
দৃষ্টাঃ কিমদ্বযেন দ্বিতীযমেব ন যূযমেব
ব্রূহ্যেব ভগবন্নিতি দেবা ঊচুর্যূযমেব দৃশ্যতে
চেন্নাত্মজ্ঞা অসঙ্গো হ্যযমাত্মাতো যূযমেব
স্বপ্রকাশা ইদং হি সত্সংবিন্মযত্বাদ্যূযমেব
নেতি হোচুর্হন্তাসঙ্গা বযমিতি হোচুঃ কথং
পশ্যন্তীতি হোবাচ ন বযং বিদ্ম ইতি হোচুস্ততো
যূযমেব স্বপ্রকাশা ইতি হোবাচ ন চ
সত্সংবিন্মযা এতৌ হি পুরস্তাত্সুবিভাতমব্যবহার্য-
মেবাদ্বযং জ্ঞাতো নৈষ বিজ্ঞাতো বিদিতাবিদিতাত্পর
ইতি হোচুঃ স হোবাচ তদ্বা এতদ্ব্রহ্মাদ্বযং
ব্রহ্মত্বান্নিত্যং শুদ্ধং বুদ্ধং মুক্তং সত্যং
সূক্ষ্মং পরিপূর্ণমদ্বযং সদানন্দচিন্মাত্র-
মাত্মৈবাব্যবহার্যং কেন চ তত্তদেতদাত্মান-
মোমিত্যপশ্যন্তঃ পশ্যত তদেতত্সত্যমাত্মা
ব্রহ্মৈব ব্রহ্মাত্মৈবাত্র হ্যেব ন বিচিকিত্স্যমিত্যোং
সত্যং তদেতত্পণ্ডিতা এব পশ্যন্ত্যেতদ্ধ্যশব্দ-
মস্পর্শমরূপমরসমগন্ধমবক্তব্যমন-
দাতব্যমগন্তব্যমবিসর্জযিতব্যমনানন্দযিতব্য-
মমন্তব্যমবোদ্ধব্যমমনহঙ্কর্তযিতব্যম-
চেতযিতব্যমপ্রাণযিতব্যমনপানযিতব্যম-
ব্যানযিতব্যমনুদানযিতব্যমসমানযিতব্যম-
নিন্দ্রিযমবিষযমকরণমলক্ষণমসঙ্গম-
গুণমবিক্রিযমব্যপদেশ্যমসত্ত্বমরস্কম-
তমস্কমমাযমভযমপ্যৌপনিষদমেব
সুবিভাতং সকৃদ্বিভাতং পুরতোঽস্মাত্সর্বস্মা-
ত্সুবিভাতমদ্বযং পশ্যত হংসঃ সোঽহমিতি স
হোবাচ কিমেষ দৃষ্টোঽদৃষ্টো বেতি দৃষ্টো
বিদিতাবিদিতাত্পর ইতি হোচুঃ ক্বৈষা কথমিতি হোচুঃ
কিং তেন ন কিংচনেতি হোচুর্যূযমেবাশ্চর্যরূপা
ইতি হোবাচ ন চেত্যাহুরোমিত্যনুজানীধ্বং ব্রূতৈনমিতি
জ্ঞাতোঽজ্ঞাতশ্চেতি হোচুর্নচৈনমিতি হোচুরিতি
ব্রূতৈবৈবমাত্মসিদ্ধমিতি হোবাচ পশ্যাম
এব ভগবো ন চ বযং পশ্যামো নৈব বযং বক্তুং
শক্নুমো নমস্তেঽস্তু ভগবন্ প্রসীদেতি হোচুর্ন
ভেতব্যং পৃচ্ছতেতি হোবাচ ক্বৈষনুজ্ঞেত্যেষ
এবাত্মেতি হোবাচ তে হোচুর্নমস্তুভ্যং বযং ত ইতি হ
প্রজাপতির্দেবাননু শশাসানুশশাসেতি ..
তদেষ শ্লোকঃ ..
ওতমোতেন জানীযাদনুজ্ঞাতারমান্তরম্ .
অনুজ্ঞামদ্বযং লব্ধ্বা উপদ্রষ্টারমাব্রজেত্ ..
ইতি নবমঃ খণ্ডঃ .. ৯..
ॐ ভদ্রং কর্ণেভিঃ শৃণুযাম দেবাঃ .
ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ .
ব্যশেম দেবহিতং যদাযুঃ .
ॐ স্বস্তি ন ইন্দ্রো বৃদ্ধশ্রবাঃ .
স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ .
স্বস্তি নো বৃহস্পতির্দধাতু ..
ॐ  শান্তিঃ  শান্তিঃ  শান্তিঃ ..
ইতি নৃসিংহোত্তরতাপিন্যুপনিষত্সমাপ্তা ..