নারদ-পরিব্রাজক

.. নারদপরিব্রাজকোপনিষত্ ..

পারিব্রাজ্যধর্মপূগালঙ্কারা যত্প্রবোধতঃ .
দশপ্রণবলক্ষ্যার্থং যান্তি তং রামমাশ্রযে ..
ॐ ভদ্রং কর্ণেভিঃ শৃণুযাম দেবাঃ ..
ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ ..
ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ ..
স্বস্তি নঃ পূষা বিশ্বদেবাঃ ..
স্বস্তি নস্তার্ক্ষ্যো অরিষ্টনেমিঃ ..
স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
পরিব্রাট্ত্রিশিখী সীতাচূডানির্বাণমণ্ডলম্
দক্ষিণা শরভং স্কন্দং মহানারাযণাদ্বযম্ ..
অথ কদাচিত্পরিব্রাজকাভরণো নারদঃ সর্বলোকসংচারং
কুর্বন্নপূর্বপুণ্যস্থলানি পুণ্যতীর্থানি তীর্থীকুর্বন্নবলোক্য
চিত্তশুদ্ধিং প্রাপ্য নির্বৈরঃ শান্তো দান্তঃ সর্বতো
নির্বেদমাসাদ্য স্বরূপানুসন্ধানমনুসন্ধয
নিযমানন্দবিশেষগণ্যং মুনিজনৈরুপসংকীর্ণং
নৈমিষারণ্যং পুণ্যস্থলমবলোক্য সরিগমপধনিস-
সংজ্ঞৈর্বৈরাগ্যবোধকরৈঃ স্বরবিশেষৈঃ প্রাপঞ্চিক-
পরাঙ্মুখাইর্হরিকথালাপৈঃ স্থাবরজঙ্গমনামকৈ-
র্ভগবদ্ভক্তিবিশেষাইর্নরমৃগকিংপুরুষামরকিংনর-
অপ্সরোগণান্সংমোহযন্নাগতং ব্রহ্মাত্মজং ভগবদ্ভক্তং
নারদমবলোক্য দ্বাদশবর্ষসত্রযাগোপস্থিতাঃ
শ্রুতাধ্যযনসংপন্নাঃ সর্বজ্ঞাস্তপোনিষ্ঠাপরাশ্চ
জ্ঞানবৈরাগ্যসংপন্নাঃ শৌনকাদিমহর্ষযঃ
প্রত্যুত্থানং কৃত্বা নত্বা যথোচিতাতিথ্যপূর্বকমুপবেশযিত্বা
স্বযং সর্বেঽপ্যুপবিষ্টা ভো ভগবন্ব্রহ্মপুত্র কথং
মুক্ত্যুপাযোঽস্মাকং বক্তব্য ইত্যুক্তস্তান্স হোবাচ নারদঃ
সত্কুলভবোপনীতঃ সম্যগুপনযনপূর্বকং চতুশ্চত্বারিংশত্-
সংস্কারসংপন্নঃ স্বাভিমতৈকগুরুসমীপে স্বশাখাধ্যযন-
পূর্বকং সর্ববিদ্যাভ্যাসং কৃত্বা দ্বাদশবর্ষশুশ্রূষা-
পূর্বকং ব্রহ্মচর্যং পঞ্চবিংশতিবত্সরং গার্হস্থ্যং
পঞ্চবিংশতিবত্সরং বানপ্রস্থাশ্রমং তদ্বিধিবত্ক্রমান্নির্বর্ত্য
চতুর্বিধব্রহ্মচর্যং ষড্বিধং গার্হস্থ্যং চতুর্বিধং
বানপ্রস্থধর্মং সম্যগভ্যস্য তদুচিতং কর্ম সর্বং নির্বর্ত্য
সাধনচতুষ্টযসংপন্নঃ সর্বসংসারোপরি মনোবাক্কায-
কর্মভির্যথাশানিবৃত্তস্তথা বাসনৈষণোপর্যপি নির্বৈরঃ
শান্তো দান্তঃ সংন্যাসী পরমহংসাশ্রমেণাস্খলিতস্বস্বরূপ-
ধ্যানেন দেহত্যাগং করোতি স মুক্তো ভবতি স মুক্তো ভবতীত্যুপনিষত্ ..
ইতি প্রথমোপদেশঃ .. ১..
অথ হৈনং ভগবন্তং নারদং সর্বে শৌনকাদযঃ
পপ্রচ্ছুর্ভো ভগবন্সংন্যাসবিধিং নো ব্রূহীতি
তানবলোক্য নারদস্তত্স্বরূপং সর্বং পিতামহমুখেনৈব
জ্ঞাতুমুচিতমিত্যুক্ত্বা সত্রযাগপূর্ত্যনন্তরং তৈঃ সহ
সত্যলোকং গত্বা বিধিবদ্ব্রহ্মনিষ্ঠাপরং পরমেষ্ঠিনং
নত্বা স্তুত্বা যথোচিতং তদাজ্ঞযা তৈঃ সহোপবিশ্য
নারদঃ পিতামহমুবাচ গুরুস্ত্বং জনকস্ত্বং সর্ববিদ্যা-
রহসজ্ঞঃ সর্বজ্ঞস্ত্বমতো মত্তো মদিষ্টং রহস্যমেকং
বক্তব্যং ত্বদ্বিনা মদভিমতরহস্যং বক্তুং কঃ সমর্থঃ .
কিমিতিচেত্পারিব্রাজ্যস্বরূপক্রমং নো ব্রূহীতি নারদেন
প্রার্থিতঃ পরমেষ্ঠি সর্বতঃ সর্বানবলোক্য মুহূর্তমাত্রং
সমাধিনিষ্ঠো ভূত্বা সংসারাতিনিবৃত্যন্বেষণ ইতি
নিশ্চিত্য নারদমবলোক্য তমাহ পিতামহঃ .
পুরা মত্পুত্র পুরুষসূক্তোপনিষদ্রহস্যপ্রকারং
নিরতিশযাকারাবলম্বিনা বিরাট্পুরুষেণোপদিষ্টং রহস্যং
তে বিবিচ্যোচ্যতে তত্ক্রমমতিরহস্যং বাঢমবহিতো ভূত্বা
শ্রূযতাং ভো নারদ বিধিবদাদাবনুপনীতোপনযানন্তরং
তত্সত্কুলপ্রসূতঃ পিতৃমাতৃবিধেযঃ পিতৃসমীপাদন্যত্র
সত্সংপ্রদাযস্থং শ্রদ্ধাবন্তং সত্কুলভবং শ্রোত্রিযং
শাস্ত্রবাত্সল্যং গুণবন্তমকুটিলং সদ্গুরুমাসাদ্য নত্বা
যথোপযোগশুশ্রূষাপূর্বকং স্বাভিমতং বিজ্ঞাপ্য
দ্বাদশবর্ষসেবাপুরঃসরং সর্ববিদ্যাভ্যাসং কৃত্বা
তদনুজ্ঞযা স্বকুলানুরূপামভিমতকন্যাং বিবাহ্য
পঞ্চবিংশতিবত্সরং গুরুকুলবাসং কৃত্বাথ গুর্বনুজ্ঞযা
গৃহস্থোচিতকর্ম কুর্বন্দৌর্ব্রাহ্মণ্যনিবৃত্তিমেত্য
স্ববংশবৃদ্ধিকামঃ পুত্রমেকমাসাদ্য গার্হস্থ্যোচিত-
পঞ্চবিংশতিবত্সরং তীর্ত্বা ততঃ পঞ্চচিংশতিবত্সরপর্যন্তং
ত্রিষবণমুদকস্পর্শনপূর্বকং চতুর্থকালমেকবারমাহার-
মাহরন্নযমেক এব বনস্থো ভূত্বা পুরগ্রামপ্রাক্তনসঞ্চারং
বিহায নিকারবিরহিততদাশ্রিতকর্মোচিতকৃত্যং নির্বর্ত্য
দৃষ্টশ্রবণবিষযবৈতৃষ্ণ্যমেত্য চত্বারিংশত্সংকার-
সংপন্নঃ সর্বতো বিরক্তশ্চিত্তশুদ্ধিমেত্যাশাসূযের্ষ্যাহঙ্কারং
দগ্ধ্বা সাধনচতুষ্টযসংপন্নঃ সংন্যস্তুমর্হতীত্যুপনিষত্ ..
ইতি দ্বিতীযোপদেশঃ .. ২..
অথ হৈনং নারদঃ পিতামহং পপ্রচ্ছ ভগবন্কেন
সংন্যাসাধিকারী বেত্যেবমাদৌ সংন্যাসাধিকারিণং
নিরূপ্য পশ্চাত্সংন্যাসবিধিরুচ্যতে অবহিতঃ শৃণু .
অথ ষণ্ডঃ পতিতোঽঙ্গবিকলঃ স্ত্রৈণো বধিরোঽর্ভকো
মূকঃ পাষণ্ডশ্চক্রী লিঙ্গী বৈখানসহরদ্বিজৌ
ভৃতকাধ্যাপকঃ শিপিবিষ্টোঽনগ্নিকো বৈরাগ্যবন্তোঽপ্যেতে
ন সংন্যাসার্হাঃ সংন্যস্তা যদ্যপি মহাবাক্যোপদেশেন
অধিকারিণঃ পূর্বসংন্যাসী পরমহংসাধিকারী ..–
পরেণৈবাত্মনশ্চাপি পরস্যৈবাত্মনা তথা .
অভযং সমবাপ্নোতি স পরিব্রাডিতি স্মৃতিঃ .. ১..
ষণ্ডোঽথ বিকলোঽপ্যন্ধো বালকশ্চাপি পাতকী .
পতিতশ্চ পরদ্বারী বৈখানসহরদ্বিজৌ .. ২..
চক্রী লিঙ্গী চ পাষণ্ডী শিপিবিষ্টোঽপ্যনগ্নিকঃ .
দ্বিত্রিবারেণ সংন্যস্তো ভৃতকাধ্যাপকোঽপি চ .
এতে নার্হন্তি সংন্যাসমাতুরেণ বিনা ক্রমম্ .. ৩..
আতুরকালঃ কথমার্যসংমতঃ ..–
প্রাণস্যোত্ক্রমণাসন্নকালস্ত্বাতুরসংজ্ঞকঃ .
নেতরস্ত্বাতুরঃ কালো মুক্তিমার্গপ্রবর্তকঃ .. ৪..
আতুরেঽপি চ সংন্যাসে তত্তন্মন্ত্রপুরঃসরম্ .
মন্ত্রাবৃত্তিং চ কৃত্বৈব সংন্যসেদ্বিধিবদ্বুধঃ .. ৫..
আতুরেঽপি ক্রমে বাপি প্রৈষভেদো ন কুত্রচিত্ .
ন মন্ত্রং কর্মরহিতং কর্ম মন্ত্রমপেক্ষতে .. ৬..
অকর্ম মন্ত্ররহিতং নাতো মন্ত্রং পরিত্যজেত্ .
মন্ত্রং বিনা কর্ম কুর্যাদ্ভস্মন্যাহুতিবদ্ভবেত্ .. ৭..
বিধ্যুক্তকর্মসংক্ষেপাত্সংন্যাসস্ত্বাতুরঃ স্মৃতঃ .
তস্মাদাতুরসংন্যাসে মন্ত্রাবৃত্তিবিধির্মুনে .. ৮..
আহিতাগ্নির্বিরক্তশ্চেদ্দেশান্তরগতো যদি .
প্রাজাপত্যেষ্টিমপ্স্বেব নির্বৃত্যৈবাথ সংন্যসেত্ .. ৯..
মনসা বাথ বিধ্যুক্তমন্ত্রাবৃত্ত্যাথবা জলে .
শ্রুত্যনুষ্ঠানমার্গেণ কর্মানুষ্ঠানমেব বা .. ১০..
সমাপ্য সংন্যসেদ্বিদ্বান্নো চেত্পাতিত্যমাপ্নুযাত্ .. ১১..
যদা মনসি সঞ্জাতং বৈতৃষ্ণ্যং সর্ববস্তুষু .
তদা সংন্যাসমিচ্ছেত পতিতঃ স্যাদ্বিপর্যযে .. ১২..
বিরক্তঃ প্রব্রজেদ্ধীমান্সরক্তস্তু গৃহে বসেত্ .
সরাগো নরকং যাতি প্রব্রজন্হি দ্বিজাধমঃ .. ১৩..
যস্যৈতানি সুগুপ্তানি জিহ্বোপস্থোদরং করঃ .
সংন্যসেদকৃতোদ্বাহো ব্রাহ্মণো ব্রহ্মচর্যবান্ .. ১৪..
সংসারমেব নিঃসারং দৃষ্ট্বা সারদিদৃক্ষযা .
প্রব্রজন্ত্যকৃতোদ্বাহাঃ পরং বৈরাগ্যমাশ্রিতাঃ .. ১৫..
প্রবৃত্তিলক্ষণং কর্ম জ্ঞানং সংন্যাসলক্ষণম্ .
তস্মাজ্জ্ঞানং পুরস্কৃত্য সংন্যসেদিহ বুদ্ধিবান্ .. ১৬..
যদা তু বিদিতং তত্ত্বং পরং ব্রহ্ম সনাতনম্ .
তদৈকদণ্ডং সংগৃহ্য সোপবীতাং শিখাং ত্যজেত্ .. ১৭..
পরমাত্মনি যো রক্তো বিরক্তোঽপরমাত্মনি .
সর্বৈষণাবিনির্মুক্তঃ স ভৈক্ষং ভোক্তুমর্হতি .. ১৮..
পূজিতো বন্দিতশ্চৈব সুপ্রসন্নো যথা ভবেত্ .
তথা চেত্তাড্যমানস্তু তদা ভবতি ভৈক্ষভুক্ .. ১৯..
অহমেবাক্ষরং ব্রহ্ম বাসুদেবাখ্যমদ্বযম্ .
ইতি ভাবো ধ্রুবো যস্য তদা ভবতি ভৈক্ষভুক্ .. ২০..
যস্মিঞ্শান্তিঃ শমঃ শৌচং সত্যং সন্তোষ আর্জবম্ .
অকিঞ্চনমদম্ভশ্চ স কৈবল্যাশ্রমে বসেত্ .. ২১..
যদা ন কুরুতে ভাবং সর্বভূতেষু পাপকম্ .
কর্মণা মনসা বাচা তদা ভবতি ভৈক্ষভুক্ .. ২২..
দশলক্ষণকং ধর্মমনুতিষ্ঠন্সমাহিতঃ .
বেদান্তান্বিধিবচ্ছৃত্বা সংন্যস্তেদনৃণো দ্বিজঃ .. ২৩..
ধৃতিঃ ক্ষমা দমোঽস্তেযং শৌচমিন্দ্রিযনিগ্রহঃ .
ধীর্বিদ্যা সত্যমক্রোধো দশকং ধর্মলক্ষণম্ .. ২৪..
অতীতান্ন স্মরেদ্ভোগান্ন তথানাগতানপি .
প্রাপ্তাংশ্চ নামিনন্দেদ্যঃ স কৈবল্যাশ্রমে বসেত্ .. ২৫..
অন্তস্থানীন্দ্রিযাণ্যন্তর্বহিষ্ঠান্বিষযান্বহিঃ .
শক্নোতি যঃ সদা কর্তুং স কৈবল্যাশ্রমে বসেত্ .. ২৬..
প্রাণে গতে যথা দেহঃ সুখং দুঃখং ন বিন্দতি .
তথা চেত্প্রাণযুক্তোঽপি স কৈবল্যাশ্রমে বসেত্ .. ২৭..
কৌপীনযুগলং কন্থা দণ্ড একঃ পরিগ্রহঃ .
যতেঃ পরমহংসস্য নাধিকং তু বিধীযতে .. ২৮..
যদি বা কুরুতে রাগাদধিকস্য পরিগ্রহম্ .
রৌরবং নরকং গত্বা তির্যগ্যোনিষু জাযতে .. ২৯..
বিশীর্ণান্যমলান্যেব চেলানি গ্রথিতানি তু .
কৃত্বা কন্থাং বহির্বাসো ধারযেদ্ধাতুরঞ্জিতম্ .. ৩০..
একবাসা অবাসা বা একদৃষ্টিরলোলুপঃ .
এক এব চরেন্নিত্যং বর্ষাস্বেকত্র সংবসেত্ .. ৩১..
কুটুম্বং পুত্রদারাংশ্চ বেদাঙ্গানি চ সর্বশঃ .
যজ্ঞং যজ্ঞোপবীতং চ ত্যক্ত্বা গূঢশ্চরেএদ্যতিঃ .. ৩২..
কামঃ ক্রোধস্তথা দর্পো লোভমোহাদযশ্চ যে .
তাংস্তু দোষান্পরিত্যজ্য পরিব্রাণ্নির্মমো ভবেত্ .. ৩৩..
রাগদ্বেষবিযুক্তাত্মা সমলোষ্টাশ্মকাঞ্চনঃ .
প্রাণিহিংসানিবৃত্তশ্চ মুনিঃ স্যাত্সর্বনিঃস্পৃহঃ .. ৩৪..
দম্ভাহঙ্কারনির্মুক্তো হিংসাপৈশূন্যবর্জিতঃ .
আত্মজ্ঞানগুণোপেতো যতির্মোক্ষমবাপ্নুযাত্ .. ৩৫..
ইন্দ্রিযাণাং প্রসঙ্গেন দোষমৃচ্ছত্যসংশযঃ .
সংনিযম্য তু তান্যেব ততঃ সিদ্ধিং নিগচ্ছতি .. ৩৬..
ন জাতু কামঃ কামানামুপভোগেন শাম্যতি .
হবিষা কৃষ্ণবর্ত্মেব ভূয এবাভিবর্ধতে .. ৩৭..
শ্রুত্বা স্পৃষ্ট্বা চ ভুক্ত্বা চ দৃষ্ট্বা ঘ্রাত্বা চ যো নরঃ .
ন হৃষ্যতি গ্লাযতি বা স বিজ্ঞেযো জিতেন্দ্রিযঃ .. ৩৮..
যস্য বাঙ্মনসী শুদ্ধে সম্যগ্গুপ্তে চ সর্বদা .
স বৈ সর্বমবাপ্নোতি বেদান্তোপগতং ফলম্ .. ৩৯..
সংমানাদ্ব্রাহ্মণো নিত্যমুদ্বিজেত বিষাদিব .
অমৃতস্যেব চাকাঙ্ক্ষেদবমানস্য সর্বদা .. ৪০..
সুখং হ্যবমতঃ শেতে সুখং চ প্রতিবুধ্যতে .
সুখং চরতি লোকেঽস্মিন্নবমন্তা বিনশ্যতি .. ৪১..
অতিবাদাংস্তিতিক্ষেত নাবমন্যেত কঞ্চন .
ন চেমং দেহমাশ্রিত্য বৈরং কুর্বীত কেনচিত্ .. ৪২..
ক্রুধ্যন্তং ন প্রতিক্রুধ্যেদাক্রুষ্টঃ কুশলং বদেত্ .
সপ্তদ্বারাবকীর্ণাং চ ন বাচমনৃতাং বদেত্ .. ৪৩..
অধ্যাত্মরতিরাসীনো নিরপেক্ষো নিরাশিষঃ .
আত্মনৈব সহাযেন সুখার্থী বিচরেদিহ .. ৪৪..
ইন্দ্রিযাণাং নিরোধেন রাগদ্বেষক্ষযেণ চ .
অহিংসযা চ ভূতানামমৃতত্বায কল্পতে .. ৪৫..
অস্থিস্থূণং স্নাযুবদ্ধং মাংসশোণিতলেপিতম্ .
চর্মাববদ্ধং দুর্গন্ধি পূর্ণং মূত্রপুরীষযোঃ .. ৪৬..
জরাশোকসমাবিষ্টং রোগাযতনমাতুরম্ .
রজস্বলমনিত্যং চ ভূতাবাসৈমং ত্যজেত্ .. ৪৭..
মাংসাসৃক্পূযবিণ্মূত্রস্নাযুমজ্জাস্থিসংহতৌ .
দেহে চেত্প্রীতিমান্মূঢো ভবিতা নরকেঽপি সঃ .. ৪৮..
সা কালপুত্রপদবী সা মাহাবীচিবাগুরা .
সাসিপত্রবনশ্রেণী যা দেহেঽহমিতি স্থিতিঃ .. ৪৯..
সা ত্যাজ্যা সর্বযত্নেন সর্বনাশেঽপ্যুপস্থিতে .
স্প্রষ্টব্যা সা ন ভব্যেন সশ্বমাংসেব পুল্কসী .. ৫০..
প্রিযেষু স্বেষু সুকৃতমপ্রিযেষু চ দুষ্কৃতম্ .
বিসৃজ্য ধ্যানযোগেন ব্রহ্মাপ্যেতি সনাতনম্ .. ৫১..
অনেন বিধিনা সর্বাংস্ত্যক্ত্বা সঙ্গাঞ্শনৈঃ শনৈঃ .
সর্বদ্বন্দ্বৈর্বিনির্মুক্তো ব্রহ্মণ্যেবাবতিষ্ঠতে .. ৫২..
এক এব চরেন্নিত্যং সিদ্ধ্যর্থমসহাযকঃ .
সিদ্ধিমেকস্য পশ্যন্হি ন জহাতি ন হীযতে .. ৫৩..
কপালং বৃক্ষমূলানি কুচেলান্যসহাযতা .
সমতা চৈব সর্বস্মিন্নৈতন্মুক্তস্য লক্ষণম্ .. ৫৪..
সর্বভূতহিতঃ শান্তস্ত্রিদণ্ডী সকমণ্ডলুঃ .
একারামঃ পরিব্রজ্য ভিক্ষার্থং গ্রামমাবিশেত্ .. ৫৫..
একো ভিক্ষুর্যথোক্তঃ স্যাদ্বাবেব মিথুনং স্মৃতম্ .
ত্রযো গ্রামঃ সমাখ্যাত ঊর্ধ্বং তু নগরাযতে .. ৫৬..
নগরং ন হি কর্তব্যং গ্রামো বা মিথুনং তথা .
এতত্ত্রযং প্রকুর্বাণঃ স্বধর্মাচ্চ্যবতে যতিঃ .. ৫৭..
রাজবার্তাদিতেষাং স্যাদ্ভিক্ষাবার্তা পরস্পরম্ .
স্নেহপৈশূন্যমাত্সর্যং সংনিকর্ষান্ন সংশযঃ .. ৫৮..
একাকী নিঃস্পৃহস্তিষ্ঠেন হি কেন সহালপেত্ .
দদ্যান্নারাযণেত্যেব প্রতিবাক্যং সদা যতিঃ .. ৫৯..
একাকী চিন্তযেদ্ব্রহ্ম মনোবাক্কাযকর্মভিঃ .
মৃত্যুং চ নাভিনন্দেত জীবিতং বা কথংচন .. ৬০..
কালমেব প্রতীক্ষেত যাবদাযুঃ সমাপ্যতে .
নাভিনন্দেত মরণং নাভিনন্দেত জীবিতম্ .. ৬১..
অজিহ্বঃ ষণ্ডকঃ পঙ্গুরন্ধো বধির এব চ .
মুগ্ধশ্চ মুচ্যতে ভিক্ষুঃ ষড্ভিরেতৈর্ন সংশযঃ .. ৬২..
ইদমিষ্টমিদং নেতি যোঽশ্নন্নপি ন সজ্জতি .
হিতং সত্যং মিতং বক্তি তমজিহ্বং প্রচক্ষতে .. ৬৩..
অদ্যজাতাং যথা নারীং তথা ষোডশবার্ষিকীম্ .
শতবর্ষং চ যো দৃষ্ট্বা নির্বিকারঃ স ষণ্ডকঃ .. ৬৪..
ভিক্ষার্থমটনং যস্য বিণ্মূত্রকরণায চ .
যোজনান্ন পরং যাতি সর্বথা পঙ্গুরেব সঃ .. ৬৫..
তিষ্ঠতো ব্রজতো বাপি যস্য চক্ষুর্ন দূরগম্ .
চতুর্যুগাং ভুবং মুক্ত্বা পরিব্রাট্ সোঽন্ধ উচ্যতে .. ৬৬..
হিতাহিতং মনোরামং বচঃ শোকাবহং তু যত্ .
শ্রুত্বাপি ন শৃণোতীব বধিরঃ স প্রকীর্তিতঃ .. ৬৭..
সান্নিধ্যে বিষযাণাং যঃ সমর্থো বিকলেন্দ্রিযঃ .
সুপ্তবদ্বর্ততে নিত্যং স ভিক্ষুর্মুগ্ধ উচ্যতে .. ৬৮..
নটাদিপ্রেক্ষণং দ্যূতং প্রমদাসুহৃদং তথা .
ভক্ষ্যং ভোজ্যমুদক্যাং চ ষণ্ন পশ্যেত্কদাচন .. ৬৯..
রাগং দ্বেষং মদং মাযাং দ্রোহং মোহং পরাত্মসু .
ষডেতানি যতির্নিত্যং মনসাপি ন চিন্তযেত্ .. ৭০..
মঞ্চকং শুক্লবস্ত্রং চ স্ত্রীকথালৌল্যমেব চ .
দিবা স্বাপং চ যানং চ যতীনাং পাতকানি ষট্ .. ৭১..
দূরযাত্রাং প্রযত্নেন বর্জযেদাত্মচিন্তকঃ .
সদোপনিষদং বিদ্যামভ্যসেন্মুক্তিহৈতুকীম্ .. ৭২..
ন তীর্থসেবী নিত্যং স্যান্নোপবাসপরো যতিঃ .
ন চাধ্যযনশীলঃ স্যান্ন ব্যাখ্যানপরো ভবেত্ .. ৭৩..
অপাপমশঠং বৃত্তমজিহ্মং নিত্যমাচরেত্ .
ইন্দ্রিযাণি সমাহৃত্য কূর্মোঽঙ্গানীব সর্বশঃ .. ৭৪..
ক্ষীণেন্দ্রিযমনোবৃত্তির্নিরাশীর্নিষ্পরিগ্রহঃ .
নির্দ্বন্দ্বো নির্নমস্কারো নিঃস্বধাকার এব চ .. ৭৫..
নির্মমো নিরহঙ্কারো নিরপেক্ষো নিরাশিষঃ .
বিবিক্তদেশসংসক্তো মুচ্যতে নাত্র সংশয ইতি .. ৭৬..
অপ্রমত্তঃ কর্মভক্তিজ্ঞানসংপন্নঃ স্বতন্ত্রো
বৈরাগ্যমেত্য ব্রহ্মচারী গৃহী বানপ্রস্থো বা
মুখ্যবৃত্তিকা চেদ্ব্রহ্মচর্যং সমাপ্য গৃহী
ভবেদ্গৃহাদ্বনী ভূত্বা প্রব্রজেদ্যদিবেতরতথা
ব্রহ্মচর্যাদেব প্রব্রজেদ্গৃহাদ্বা বনাদ্বাথ
পুনরব্রতী বা ব্রতী বা স্নাতকো বাঽস্নাতকো
বোত্সন্নাগ্নিরনগ্নিকো বা যদহরেব বিরজেত্তদহরেব
প্রব্রজেত্তদ্ধৈকে প্রাজাপত্যামেবেষ্টিং কুর্বন্যথবা
ন কুর্যাদগ্নেয্যমেব কুর্যাদগ্নির্হিপ্রাণঃ প্রাণমেবৈতযা
করোতি তস্মাত্ত্রৈধাতবীযামেব কুর্যাদেতৈব ত্রযো ধাতবো
যদুত সত্ত্বং রজস্তম ইতি ..
অযং তে যোনিরৃত্বিযো যতো জাতো অরোচথাঃ .
তং জানন্নগ্ন আরোহাথানো বর্ধযা রযিমিত্যনেন
মন্ত্রেণাগ্নিমাজিঘ্রেদেশ বা অগ্নের্যোনির্যঃ প্রাণঃ
প্রাণং গচ্ছ স্বাং যোনিং গচ্ছ
স্বাহেত্যেবমেবৈতদাহবনীযাদগ্নিমাহৃত্য
পূর্ববদগ্নিমাজিঘ্রেদ্যদগ্নিং ন বিন্দেদপ্সু জুহুযাদাপো
বৈ সর্বা দেবতাঃ সর্বাভ্যো দেবতাভ্যো জুহোমি স্বাহেতি
হুত্বোধৃত্য তদুদকং প্রাশ্নীযাত্সাজ্যং হবিরনামযং
মোদমিতি শিখাং যজ্ঞোপবীতং পিতরং পুত্রং কলত্রং কর্ম
চাধ্যযনং মন্ত্রান্তরং বিসৃজ্যৈব
পরিব্রজত্যাত্মবিন্মোক্ষমন্ত্রৈস্ত্রৈধাতবীযৈর্বিধেস্তদ্ব্রহ্ম
তদুপাসিতব্যমেবৈতদিতি ..
পিতামহং পুনঃ পপ্রচ্ছ নারদঃ কথমযজ্ঞোপবীতী
ব্রাহ্মণ ইতি .. তমাহ পিতামহঃ ..
সশিখং বপনং কৃত্বা বহিঃসূত্রং ত্যজেদ্বুধঃ .
যদক্ষরং পরং ব্রহ্ম তত্সূত্রমিতি ধারযেত্ .. ৭৭..
সূচনাত্সূত্রমিত্যাহুঃ সূত্রং নাম পরং পদম্ .
তত্সূত্রং বিদিতং যেন স বিপ্রো বেদপারগঃ .. ৭৮..
যেন সর্বমিদং প্রোতং সূত্রে মণিগণা ইব .
তত্সূত্রং ধারযেদ্যোগী যোগবিত্তত্ত্বদর্শনঃ .. ৭৯..
বহিঃসূত্রং ত্যজেদ্বিদ্বান্যোগমুত্তমমাস্থিতঃ .
ব্রহ্মভাবমিদং সূত্রং ধারযেদ্যঃ সচেতনঃ .
ধারণাত্তস্য সূত্রস্য নোচ্ছিষ্টো নাশুচির্ভবেত্ .. ৮০..
সূত্রমন্তর্গতং যেষাং জ্ঞানযজ্ঞোপবীতিনাম্ .
তে বৈ সূত্রবিদো লোকে তে চ যজ্ঞোপবীতিনঃ .. ৮১..
জ্ঞানশিখিনো জ্ঞাননিষ্ঠা জ্ঞানযজ্ঞোপবীতিনঃ .
জ্ঞানমেব পরং তেষাং পবিত্রং জ্ঞানমুচ্যতে .. ৮২..
অগ্নেরিব শিখা নান্যা যস্য জ্ঞানমযী শিখা .
স শিখীত্যুচ্যতে বিদ্বান্নেতরে কেশধারিণঃ .. ৮৩..
কর্মণ্যধিকৃতা যে তু বৈদিকে ব্রাহ্মণাদযঃ .
তেভির্ধার্যমিদং সূত্রং ক্রিযাঙ্গং তদ্ধি বৈ স্মৃতম্ .. ৮৪..
শিখা জ্ঞানমযী যস্য উপবীতং চ তন্মযম্ .
ব্রাহ্মণ্যং সকলং তস্য ইতি ব্রহ্মবিদো বিদুরিতি .. ৮৫..
তদেতদ্বিজ্ঞায ব্রাহ্মণঃ পরিব্রজ্য পরিব্রাডেকশাটী
মুণ্ডোঽপরিগ্রহঃ শরীরক্লেশাসহিষ্ণুশ্চেদথবা
যথাবিধিশ্চেজ্জাতরূপধরো ভূত্বা সপুত্রমিত্রকলত্রাপ্ত-
বন্ধাদ্বীনি স্বাধ্যাযং সর্বকর্মাণি সংন্যস্যাযং
ব্রহ্মাণ্ডং চ সর্বং কৌপীনং দণ্ডমাচ্ছাদনং
চ ত্যক্ত্বা দ্বন্দ্বসহিষ্ণুর্ন শীতং ন চোষ্ণং ন সুখং
ন দুঃখং ন নিদ্রা ন মানাবমানে চ ষডূর্মিবর্জিতো নিন্দাহঙ্কারমত্সরগর্বদম্ভের্ষ্যাসূযেচ্ছাদ্বেষ-
সুখদুঃখকামক্রোধলোভমোহাদীন্বিসৃজ্য স্ববপুঃ
শবাকারমিব স্মৃত্বা স্বব্যতিরিক্তং সর্বমন্তর্বহিরমন্যমানঃ
কস্যাপি বন্দনমকৃত্বা ন নমস্কারো ন স্বাহাকারো
ন স্বধাকারো ন নিন্দাস্তুতির্যাদৃচ্ছিকো ভবেদ্যদৃচ্ছা-
লাভসন্তুষ্টঃ সুবর্ণাদীন্ন পরিগ্রহেন্নাবাহনং ন বিসর্জনং
ন মন্ত্রং নামন্ত্রং ন ধ্যানং নোপাসনং ন লক্ষ্যং নালক্ষ্যং
ন পৃথক্ নাপৃথক্ ন ত্বন্যত্র সর্বত্রানিকেতঃ স্থিরমতিঃ শূন্যাগারবৃক্ষমূলদেবগৃহতৃণকূটকুলালশালাগ্নিহোত্র-
শালাগ্নিদিগন্তরনদীতটপুলিনভূগৃহকন্দরনির্ঝরস্থণ্ডিলেষু বনে বা শ্বেতকেতুঋভুনিদাঘঋষভদুর্বাসঃসংবর্তকদত্তাত্রেযরৈবতক-
বদব্যক্তলিঙ্গোঽব্যক্তাচারো বালোন্মত্তপিশাচবদনুন্মত্তোন্মত্ত-
বদাচরংস্ত্রিদণ্ডং শিক্যং পাত্রং কমণ্ডলুং কটিসূত্রং চ তত্সর্বং
ভূঃস্বাহেত্যপ্সু পরিত্যজ্য কটিসূত্রং চ কৌওপীনং দণ্ডং বস্ত্রং
কমণ্ডলুং সর্বমপ্সু বিসৃজ্যাথ জাতরূপধরশ্চরেদাত্মানমন্বিচ্ছেদ্যথা
জাতরূপধরো নির্দ্বন্দ্বো নিষ্পরিগ্রহস্তত্ত্বব্রহ্মমার্গে সম্যক্ সংপন্নঃ
শুদ্ধমানসঃ প্রাণসন্ধারণার্থং যথোক্তকালে করপাত্রেণান্যেন বা
যাচিতাহারমাহরন্ লাভলাভে সমো ভূত্বা নির্মমঃ
শুক্লধ্যানপরাযণোঽধ্যাত্মনিষ্ঠঃ শুভাশুভকর্মনির্মূলনপরঃ
সংন্যস্য পূর্ণানন্দৈকবোধস্তদ্ব্রহ্মাহমস্মীতি
ব্রহ্মপ্রণবমনুস্মরন্ভ্রমরকীটন্যাযেন শরীরত্রযমুত্সৃজ্য
সংন্যাসেনৈব দেহত্যাগং করোতি স কৃতকৃত্যো ভবতীত্যুপনিষত্ ..
ইতি তৃতীযোপদেশঃ .. ৩..
ত্যক্ত্বা লোকাংশ্চ বেদাংশ্চ বিষযানিন্দ্রিযাণি চ .
আত্মন্যেব স্থিতো যস্তু স যাতি পরমাং গতিম্ .. ১..
নামগোত্রাদিবরণং দেশং কালং শ্রুতং কুলম্ .
যযো বৃত্তং ব্রতং শীলং খ্যাপযেন্নৈব সদ্যতিঃ .. ২..
ন সম্ভাষেত্স্ত্রিযং কাঞ্চিত্পূর্বদৃষ্টাং চ ন স্মরেত্ .
কথাং চ বর্জযেত্তাসাং ন পশ্যেল্লিখিতামপি .. ৩..
এতচ্চতুষ্টযং মোহাত্স্ত্রীণামাচরতো যতেঃ .
চিত্তং বিক্রিযতেঽবশ্যং তদ্বিকারাত্প্রণশ্যতি .. ৪..
তৃষ্ণা ক্রোধোঽনৃতং মাযা লোভমোহৌ প্রিযাপ্রিযে .
শিল্পং ব্যাখ্যানযোগশ্চ কামো রাগপরিগ্রহঃ .. ৫..
অহঙ্কারো মমত্বং চ চিকিত্সা ধর্মসাহসম্ .
প্রাযশ্চিত্তং প্রবাসশ্চ মন্ত্রৌষধগরাশিষঃ .. ৬..
প্রতিষিদ্ধানি চৈতানি সেবমানো ব্রজেদধঃ .
আগচ্ছ গচ্ছ তিষ্ঠেতি স্বাগতং সুহৃদোঽপি বা .. ৭..
সন্মাননং চ ন ব্রূযান্মুনির্মোক্ষপরাযণঃ .
প্রতিগ্রহং ন গৃহ্ণীযান্নৈব চান্যং প্রদাপযেত্ .. ৮..
প্রেরযেদ্বা তযা ভিক্ষুঃ স্বপ্নেঽপি ন কদাচন .
জাযাভ্রাতৃসুতাদীনাং বন্ধূনাং চ শুভাশুভম্ .. ৯..
শ্রুত্বা দৃষ্ট্বা ন কম্পেত শোকহর্ষৌ ত্যজেদ্যতিঃ .
অহিংসাসত্যমস্তেযব্রহ্মচর্যাপরিগ্রহঃ .. ১০..
অনৌদ্ধত্ত্যমদীনত্বং প্রসাদঃ স্থৈর্যমার্জবম্ .
অস্নেহো গুরুশুশ্রূষা শ্রদ্ধা ক্ষান্তির্দমঃ শমঃ .. ১১..
উপেক্ষা ধৈর্যমাধুর্যে তিতিক্ষা করুণা তথা .
হ্রীস্তথা জ্ঞানবিজ্ঞানে যোগো লঘ্বশনং ধৃতিঃ .. ১২..
এষ স্বধর্মো বিখ্যাতো যতীনাং নিযতাত্মনাম্ .
নির্দ্বন্দ্বো নিত্যসত্ত্বস্থঃ সর্বত্র সমদর্শনঃ .. ১৩..
তুরীযঃ পরমো হংসঃ সাক্ষান্নারাযণো যতিঃ .
একরাত্রং বসেদ্গ্রামে নগরে পঞ্চরাত্রকম্ .. ১৪..
বর্ষাভ্যোঽন্যত্র বর্ষাসু মাসাংশ্চ চতুরো বসেত্ .
দ্বিরাত্রং বা বসেদ্গ্রামে ভিক্ষুর্যদি বসেত্তদা .. ১৫..
রাগাদযঃ প্রসজ্যেরংস্তেনাসৌ নারকী ভবেত্ .
গ্রামান্তে নির্জনে দেশে নিযতাত্মাঽনিকেতনঃ .. ১৬..
পর্যটেত্কীটবদ্ভূমৌ বর্ষাস্বেকত্র সংবসেত্ .
একবাসা অবাসা বা একদৃষ্টিরলোলুপঃ .. ১৭..
অদূষযন্সতাং মার্গং ধ্যানযুক্তো মহীং চরেত্ .
শুচৌ দেশে সদা ভিক্ষুঃ স্বধর্মমনুপালযন্ .. ১৮..
পর্যটেত সদা যোগী বীক্ষযন্বসুধাতলম্ .
ন রাত্রৌ ন চ মধ্যাহ্নে সন্ধ্যযোর্নৈব পর্যটন্ .. ১৯..
ন শূন্যে ন চ দুর্গে বা প্রাণিবাধাকরে ন চ .
একরাত্রং বসেদ্গ্রামে পত্তনে তু দিনত্রযম্ .. ২০..
পুরে দিনদ্বযং ভিক্ষুর্নগরে পঞ্চরাত্রকম্ .
বর্ষাস্বেকত্র তিষ্ঠেত স্থানে পুণ্যজলাবৃতে .. ২১..
আত্মবত্সর্বভূতানি পশ্যন্ভিক্ষুশ্চরেন্মহীম্ .
অন্ধবত্কুঞ্জবচ্চৈব বধিরোন্মত্তমূকবত্ .. ২২..
স্নানং ত্রিষবণং প্রোক্তং বহূদকবনস্থযোঃ .
হংসে তু সকৃদেব স্যাত্পরহংসে ন বিদ্যতে .. ২৩..
মৌনং যোগাসনং যোগস্তিতিক্ষৈকান্তশীলতা .
নিঃস্পৃহত্বং সমত্বং চ সপ্তৈতান্যৈকদণ্ডিনাম্ .. ২৪..
পরহংসাশ্রমস্থো হি স্নানাদেরবিধানতঃ .
অশেষচিত্তবৃত্তীনাং ত্যাগং কেবলমাচরেত্ .. ২৫..
ত্বঙ্মাংসরুধিরস্নাযুমজ্জামেদোস্থিসংহতৌ .
বিণ্মূত্রপূযে রমতাং ক্রিমীণাং কিযদন্তরম্ .. ২৬..
ক্ব শরীরমশেষাণাং শ্লেষ্মাদীনাং মহাচযঃ .
ক্ব চাঙ্গশোভাসৌভাগ্যকমনীযাদযো গুণাঃ .. ২৭..
মাংসাসৃক্পূযবিণ্মূত্রস্নাযুমজ্জাস্থিসংহতৌ .
দেহে চেত্প্রীতিমান্মূঢো ভবিতা নরকেঽপি সঃ .. ২৮..
স্ত্রীণামবাচ্যদেশস্য ক্লিন্ননাডীব্রণস্য চ .
অভেদেঽপি মনোমেদাজ্জনঃ প্রাযেণ বঞ্চ্যতে .. ২৯..
চর্মখণ্ডং দ্বিধা ভিন্নমপানোদ্গারধূপিতম্ .
যে রমন্তি নমস্তেভ্যঃ সাহসং কিমতঃ পরম্ .. ৩০..
ন তস্য বিদ্যতে কার্যং ন লিঙ্গং বা বিপশ্চিতঃ .
নির্মমো নির্ভযঃ শান্তো নির্দ্বন্দ্বোঽবর্ণভোজনঃ .. ৩১..
মুনিঃ কৌপীনবাসাঃ স্যান্নগ্নো বা ধ্যানতত্পরঃ .
এবং জ্ঞানপরো যোগী ব্রহ্মভূযায কল্পতে .. ৩২..
লিঙ্গে সত্যপি খল্বস্মিঞ্জ্ঞানমেব হি কারণম্ .
নির্মোক্ষাযেহ ভূতানাং লিঙ্গগ্রামো নিরর্থকঃ .. ৩৩..
যন্ন সন্তং ন চাসন্তং নাশ্রুতং ন বহুশ্রুতম্ .
ন সুবৃত্তং ন দুর্বৃত্তং বেদ কশ্চিত্স ব্রাহ্মণঃ .. ৩৪..
তস্মাদলিঙ্গো ধর্মজ্ঞো ব্রহ্মবৃত্তমনুব্রতম্ .
গূঢধর্মাশ্রিতো বিদ্বানজ্ঞানচরিতং চরেত্ .. ৩৫..
সন্দিগ্ধঃ সর্বভূতানাং বর্ণাশ্রমবিবর্জিতঃ .
অন্ধবজ্জডবচ্চাপি মূকবচ্চ মহীং চরেত্ .. ৩৬..
তং দৃষ্ট্বা শান্তমনসং স্পৃহযন্তি দিবৌকসঃ .
লিঙ্গাভাবাত্তু কৈবল্যমিতি ব্রহ্মানুশাসনমিতি .. ৩৭..
অথ নারদঃ পিতামহং সংন্যাসবিধিং নো ব্রূহীতি পপ্রচ্ছ .
পিতামহস্তথেত্যঙ্গীকৃত্যাতুরে বা ক্রমে বাপি
তুরীযাশ্রমস্বীকারারার্থং কৃচ্ছ্রপ্রাযশ্চিত্ত-
পূর্বকমষ্টশ্রাদ্ধং কুর্যাদ্দেবর্ষিদিব্যমনুষ্য-
ভূতপিতৃমাত্রাত্মেত্যষ্টশ্রাদ্ধানি কুর্যাত্ .
প্রথমং সত্যবসুসংজ্ঞকান্বিশ্বান্দেবান্দেবশ্রাদ্ধে
ব্রহ্মবিষ্ণুমহেশ্বরানৃষিশ্রাদ্ধে দেবর্ষিক্ষত্রিযর্ষি-
মনুষ্যর্ষীন্ দিব্যশ্রাদ্ধে বসুরুদ্রাদুত্যরূপান্মনুষ্যশ্রাদ্ধে সনকসনন্দনসনত্কুমারসনত্সুজাতান্ভূতশ্রাদ্ধে
মাতৃপিতামহীপ্রপিতামহীরাত্মশ্রাদ্ধে
আত্মপিতৃপিতামহাঞ্জীবত্পিতৃকশ্চেত্পিতরং ত্যক্ত্বা
আত্মপিতামহপ্রপিতামহানিতি সর্বত্র যুগ্মক্লৃপ্ত্যা
ব্রাহ্মণানর্চযেদেকাধ্বরপক্ষেঽষ্টাধ্বরপক্ষে বা স্বশাখানুগতমন্ত্রৈরষ্টশ্রাদ্ধান্যষ্টদিনেষু বা
একদিনে বা পিতৃযাগোক্তবিধানেন ব্রাহ্মণানভ্যর্চ্য
মুক্ত্যন্তং যথাবিধি নির্বর্ত্য পিণ্ডপ্রদানানি নির্বর্ত্য
দক্ষিণাতাংবূলৈস্তোষযিত্বা ব্রাহ্মণন্প্রেষযিত্বা
শেষকর্মসিদ্ধ্যর্থং সপ্তকেশান্বিসৃজ্য
–‘শেষকর্মপ্রসিদ্ধ্যর্থং কেশান্সপ্তাষ্ট বা দ্বিজঃ .
সংক্ষিপ্য বাপযেত্পূর্বং কেশশ্মশ্রুনখানি চে’তি
সপ্তকেশান্সংরক্ষ্য কক্ষোপস্থবর্জং ক্ষৌরপূর্বকং
স্নাত্বা সাযংসন্ধ্যাবন্দনং নির্বর্ত্য সহস্রগাযত্রীং
জপ্ত্বা ব্রহ্মযজ্ঞং নির্বর্ত্য স্বাধীনাগ্নিমুপস্থাপ্য
স্বশাখোপসংহরণং কৃত্বা তদুক্তপ্রকারেণাজ্যাহুতি-
মাজ্যভাগান্তং হুত্বাহুতিবিধি, ন্ সমাপ্যাত্মাদিভিস্ত্রিবারং
সক্তুপ্রাশনং কৃত্বাচমনপূর্বকমগ্নিং সংরক্ষ্য
স্বযমগ্নেরুত্তরতঃ কৃষ্ণজিনোপরি স্থিত্বা পুরাণশ্রবণপূর্বকং
জাগরণং কৃত্বা চতুর্থযামান্তে স্নাত্বা তদগ্নৌ চরুং
শ্রপযিত্বা পুরুষসূক্তেনান্নস্য ষোডশাহুতির্হুত্বা
বিরজাহোমং কৃত্বা অথাচম্য সদক্ষিণং বস্ত্রং সুবর্ণপাত্রং
ধেনুং দত্বা সমাপ্য ব্রহ্মোদ্বাসনং কৃত্বা .
সংমাসিঞ্চন্তু মরুতঃ সমিন্দ্রঃ সংবৃহস্পতিঃ .
সংমাযমগ্নিঃ সিঞ্চত্বাযুষা চ ধনেন চ
বলেন চাযুষ্মন্তঃ করোতু মেতি .
যা তে অগ্নে যজ্ঞিযা তনূস্তযেহ্যারোহাত্মাত্মানম্ .
অচ্ছা বসূনি কৃণ্বন্নস্মে নর্যা পুরূণি .
যজ্ঞো ভূত্বা যজ্ঞমাসীদ স্বাং যোনিং জাতবেদো ভুব
আজাযমানঃ স ক্ষয এধীত্যনেনাগ্নিমাত্মন্যারোপ্য
ধ্যাত্বাগ্নিং প্রদক্ষিণনমস্কারপূর্বকমুদ্বাস্য
প্রাতঃসন্ধ্যামুপাস্য সহস্রগাযত্রীপূর্বকং
সূর্যোপস্থানং কৃত্বা নাভিদঘ্নোদকমুপবিশ্য
অষ্টদিক্পালকার্ঘ্যপূর্বকং গাযত্র্যুদ্বাসনং
কৃত্বা সাবিত্রীং ব্যাহৃতিষু প্রবেশযিত্বা .
অহং বৃক্ষস্য রেরিব . কীর্তিঃ পৃষ্ঠং গিরেরিব .
ঊর্ধ্বপবিত্রো বাজিনীবস্বমৃতমস্মি .
দ্রবিণং মে সবর্চসং সুমেধা অমৃতোক্ষিতঃ .
ইতি ত্রিশঙ্কোর্বেদানুবচনম্ .
যশ্ছন্দসামৃষভো বিশ্বরূপঃ . ছন্দোভ্যোধ্যমৃতাত্সংবভূব .
স মেন্দ্রো মেধযা স্পৃণোতু . অমৃতস্য দেবধারণো ভূযাসম্ .
শরীরং মে বিচর্ষণম্ . জিহ্বা মে মধুমত্তমা .
কর্ণাভ্যাং ভূরি বিশ্রবম্ . ব্রহ্মণঃ কোশোঽসি মেধযাপিহিতঃ .
শ্রুতং মে গোপায . দারেষণাযাশ্চ বিত্তেষণাযাশ্চ
লোকেষণাযাশ্চ ব্যুত্থিতোঽহং ॐ ভূঃ সংন্যস্তং মযা
ॐ ভুবঃ সংন্যস্তং মযা ॐ সুবঃ সংন্যস্তং মযা
ॐ ভূর্ভুবঃসুবঃ সংন্যস্তং মযেতি মন্দ্রমধ্যমতালজ-
ধ্বনিভির্মনসা বাচোচ্চার্যাভযং সর্বভূতেভ্যো
মত্তঃ সর্বং প্রবর্ততে স্বহেত্যনেন জলং প্রাশ্য প্রাচ্যাং দিশি
পূর্ণাঞ্জলিং প্রক্ষিপ্যোংস্বাহেতি শিখামুত্পাঠ্য .
যজ্ঞোপবীতং পরমং পবিত্রং প্রজাপতের্যত্সহজং পুরস্তাত্ .
আযুষ্যমগ্র্যং প্রতিমুঞ্চ্য শুভ্রং যজ্ঞোপবীতং বলমস্তু তেজঃ .
যজ্ঞোপবীত বহির্ন নিবসেত্ত্বমন্তঃ প্রবিশ্য মধ্যে হ্যজস্রং
পরমং পবিত্রং যশো বলং জ্ঞানবৈরাগ্যং মেধাং প্রযচ্ছেতি
যজ্ঞোপবীতং ছিত্ত্বা উদকাঞ্জলিনা সহ ॐ ভূঃ সমুদ্রং গচ্ছ
স্বাহেত্যপ্সু জুহুযাদোং ভূঃ সংন্যস্তং মযা ॐ ভুবঃ সংন্যস্তং মযা
ॐ সুবঃ সংন্যস্তং মযেতি ত্রিরুক্ত্বা ত্রিবারমভিমন্ত্র্য তজ্জলং
প্রাশ্যাচম্য ॐ ভূঃ স্বাহেত্যপ্সু বস্ত্রং কটিসূত্রমপি বিসৃজ্য
সর্বকর্মনির্বর্তকোঽহমিতি স্মৃত্বা জাতরূপধরো ভূত্বা
স্বরূপানুসন্ধানপূর্বকমূর্ধ্ববাহুরুদীচীং
গচ্ছেত্পূর্ববদ্বিদ্বত্সংন্যাসী চেদ্গুরোঃ সকাশাত্প্রণব-
মহাবাক্যোপদেশং প্রাপ্য যথাসুখং বিহরন্মত্তঃ কশ্চিন্নান্যো
ব্যতিরিক্ত ইতি ফলপত্রোদকাহারঃ পর্বতবনদেবালযেষু
সংচরেত্সংন্যস্যাথ দিগংবরঃ সকলসংচারকঃ
সর্বদানন্দস্বানুভবৈকপূর্ণহৃদযঃ কর্মাতিদূরলাভঃ
প্রাণাযামপরাযণঃ ফলরসত্বক্পত্রমূলোদকৈর্মোক্ষার্থী
গিরিকন্দরেষু বিসৃজেদ্দেহং স্মরংস্তারকম্ .
বিবিদিষাসংন্যাসী চেচ্ছতপথং গত্বাচার্যাদিভির্বিপ্রৈস্তিষ্ঠ তিষ্ঠ মহাভাগ দণ্ডং বস্ত্রং কমণ্ডলুং গৃহাণ প্রণব মহাবাক্যগ্রহণার্থং
গুরুনিকটমাগচ্ছেত্যাচার্যৈর্দণ্ডকটিসূত্রকৌপীনং
শাটীমেকাং কমণ্ডলুং পাদাদিমস্তকপ্রমাণমব্রণং
সমং সৌম্যমকাকপৃষ্ঠং সলক্ষণং বৈণবং
দণ্ডমেকমাচমনপূর্বকং সখা মা গোপাযৌজঃ
সখাযোঽসীন্দ্রস্য বজ্রোঽসি বার্ত্রগ্নঃ শর্ম মে ভব
যত্পাপং তন্নিবারযেতি দণ্ডং পরিগ্রহেজ্জগজ্জীবনং
জীবনাধারভূতং মা তে মা মন্ত্রযস্ব সর্বদা
সর্বসৌম্যেতি প্রণবপূর্বকং কমণ্ডলুং পরিগ্রহ্য
কৌপীনাধারং কটিসূত্রমোমিতি গুহ্যাচ্ছাদকং
কৌপীনমোমিতি শীতবাতোষ্ণত্রাণকরং দেহৈকরক্ষণমোমিতি
কটিসূত্রকৌপীনবস্ত্রমাচমনপূর্বকং যোগপট্টাভিষিক্তো
ভূত্বা কৃতার্থোঽহমিতি মত্বা স্বাশ্রমাচারপরো ভবেদিত্যুপনিষত্ ..
ইতি চতুর্থোপদেশঃ .. ৪..
অথ হৈনং পিতামহং নারদঃ পপ্রচ্ছ
ভগবন্সর্বকর্মনিবর্তকঃ সংন্যাস ইতি ত্বযৈবোক্তঃ
পুনঃ স্বাশ্রমাচারপরো ভবেদিত্যুচ্যতে .
ততঃ পিতামহ উবাচ .
শরীরস্য দেহিনো জাগ্রত্স্বপ্নসুষুপ্তিতুরীযাবস্থাঃ
সন্তি তদধীনাঃ কর্মজ্ঞানবৈরাগ্যপ্রবর্তকাঃ
পুরুষা জন্তবস্তদনুকূলাচারাঃ সন্তি তথৈব
চেদ্ভগবন্সংন্যাসাঃ কতিভেদাস্তদনুষ্ঠানভেদাঃ
কীদৃশাস্তত্ত্বতোঽস্মাকং বক্তুমর্হসীতি .
তথেত্যঙ্গীকৃত্য তু পিতামহেন সংন্যাসভেদৈরাচারভেদ৛্
কথমিতি চেত্তত্ত্বতস্ত্বেক এব সংন্যাসঃ অজ্ঞানেনাশক্তিবশা-
ত্কর্মলোপশ্চ ত্রৈবিধ্যমেত্য বৈরাগ্যসংন্যাসো
জ্ঞানবৈরাগ্যসংন্যাসঃ কর্মসংন্যাসশ্চেতি
চাতুর্বিধ্যমুপাগতস্তদ্যথেতি দুষ্টমদনাভাচ্চেতি
বিষযবৈতৃষ্ণ্যমেত্য প্রাক্পুণ্যকর্মবশাত্সংন্যস্তঃ
স বৈরাগ্যসংন্যাসী শাস্ত্রজ্ঞানাত্পাপপুণ্যলোকানুভব-
শ্রবণাত্প্রপঞ্চোপরতঃ ক্রোধের্ষ্যাসূযাহঙ্কারা-
ভিমানাত্মকসর্বসংসারং নির্বৃত্য দারেষণাধনেষণা-
লোকেষণাত্মকদেহবাসনাং শাস্ত্রবাসনাং লোকবাসনাং
ত্যক্ত্বা বমনান্নমিব প্রকৃতীযং সর্বমিদং হেযং মত্বা
সাধনচতুষ্টযসংপন্নো যঃ সংন্যসতি স এব জ্ঞানসংন্যাসী .
ক্রমেণ সর্বমভ্যস্য সর্বমনুভূয জ্ঞানবৈরাগ্যাভ্যাং
স্বরূপানুসন্ধানেন দেহমাত্রাবশিষ্টঃ সংন্যস্য
জাতরূপধরো ভবতি স জ্ঞানবৈরাগ্যসংন্যাসী .
ব্রহ্মচর্যং সমাপ্য গৃহী ভূত্বা বানপ্রস্থাশ্রমমেত্য
বৈরাগ্যভাবেঽপ্যাশ্রমক্রমানুসারেণ যঃ
সংন্যস্যতি স কর্মসংন্যাসী .
ব্রহ্মচর্যেণ সংন্যস্য সংন্যাসাজ্জাতরূপধরো
বৈরাগ্যসংন্যাসী .
বিদ্বত্সংন্যাসী জ্ঞানসংন্যাসী বিবিদিষাসংন্যাসী
কর্মসংন্যাসী .
কর্মসংন্যাসোঽপি দ্বিবিধঃ নিমিত্তসংন্যাসোঽনিমিত্তসংন্যাসশ্চেতি .
নিমিত্তস্ত্বাতুরঃ . অনিমিত্তঃ ক্রমসংন্যাসঃ .
আতুরঃ সর্বকর্মলোপঃ প্রাণস্যোত্ক্রমণকালসংন্যাসঃ
স নিমিত্তসংন্যাসঃ .
দৃঢাঙ্গো ভূত্বা সর্বং কৃতকং নশ্বরমিতি দেহাদিকং
সর্বং হেযং প্রাপ্য .
হংসঃ শুচিষদ্বসুরন্তরিক্ষসদ্ধোতা বেদিষদতিধির্দুরোণসত্ .
নৃষদ্বরসদৃতসদ্ব্যোমসদব্জা গোজা ঋতজা অদ্রিজা ঋতং বৃহত্ .
ব্রহ্মব্যতিরিক্তং সর্বং নশ্বরমিতি নিশ্চিত্যাথো ক্রমেণ যঃ সংন্যস্যতি
স সংন্যাসোঽনিমিত্তসংন্যাসঃ .
সংন্যাসঃ ষড্বিধো ভবতি .
কুটীচকো বহূদকো হংসঃ পরমহংসঃ তুরীযাতীতোঽবধূতশ্চেতি .
কুটীচকঃ শিখাযজ্ঞোপবীতী দণ্ডকমণ্ডলুধরঃ কৌপীনকন্থাধরঃ
পিতৃমাতৃগুর্বারাধনপরঃ পিঠরখনিত্রশিক্যাদিমন্ত্রসাধনপর
একত্রান্নাদনপরঃ শ্বেতোর্ধ্বপুণ্ড্রধারী ত্রিদণ্ডঃ .
বহূদকঃ শিখাদিকন্থাধরস্ত্রিপুণ্ড্রধারী কুটীচকবত্সর্বসমো
মধুকরবৃত্ত্যাষ্টকবলাশী হংসো জটাধারী ত্রিপুণ্ড্রোর্ধ্বপুণ্ড্রধারী
অসংক্লৃপ্তমাধুকরান্নাশী কৌপীনখণ্ডতুণ্ডধারী .
পরমহংসঃ শিখাযজ্ঞোপবীতরহিতঃ পঞ্চগৃহেশ্বেকরাত্রান্নাদনপরঃ
করপাত্রী এককৌপীনধারী শাটীমেকামেকং বৈণবং দণ্ডমেকশাটীধরো
বা ভস্মোদ্ধূলনপরঃ সর্বত্যাগী .
তুরীযাতীতো গোমুখঃ ফলাহারী . অন্নাহারী চেদ্গৃহত্রযে দেহমাত্রাবশিষ্টো
দিগংবরঃ কুণপবচ্ছরীরবৃত্তিকঃ .
অবধূতস্ত্বনিযমোঽভিশস্তপতিতবর্জনপূর্বকং সর্ববর্ণেষ্বজগর-
বৃত্ত্যাহারপরঃ স্বরূপানুসন্ধানপরঃ .
আতুরো জীবতি চেত্ক্রমসংন্যাসঃ কর্তব্যঃ
কুটীচকবহূদকহংসানাং ব্রহ্মচ-
র্যাশ্রমাদিতুরীযাশ্রমবত্ কুটীচকাদীনাং
সংন্যাসবিধিঃ .
পরমহংসাদিত্রযাণাং ন কটীসূত্রং ন কৌপীনং
ন বস্ত্রং ন কমণ্ডলুর্ন দণ্ডঃ সার্ববর্ণৈক-
ভৈক্ষাটনপরত্বং জাতরূপধরত্বং বিধিঃ .
সংন্যাসকালেঽপ্যলংবুদ্ধিপর্যন্তমধীত্য
তদনন্তরং কটীসূত্রং কৌপীনং দণ্ডং বস্ত্রং
কমণ্ডলুং সর্বমপ্সু বিসৃজ্যাথ জাতরূপধরশ্চরেন্ন
কন্থাবেশো নাধ্যেতব্যো ন শ্রোতব্যমন্যত্কিঞ্চিত্প্রণবাদন্যং
ন তর্কং পঠেন্ন শব্দমপি বৃহচ্ছব্দান্নাধ্যাপযেন্ন
মহদ্বাচোবিগ্লাপনং গিরা পাণ্যাদিনা সংভাষণং
নান্যস্মাদ্বা বিশেষেণ ন শূদ্রস্ত্রীপতিতোদক্যাসংভাষণং
ন যতের্দেবপূজা নোত্সবদর্শনং তীর্থযাত্রাবৃত্তিঃ .
পুনর্যতিবিশেষঃ .
কুটীচস্যৈকত্র ভিক্ষা বহূদকস্যাসংক্লৃপ্তং
মাধুকরং হংসস্যাষ্টগৃহেষ্বষ্টকবলং
পরমহংসস্য পঞ্চগৃহেষু করপাত্রং
ফলাহারো গোমুখং তুরীযাতীতস্যাবধূতস্যাজগরবৃত্তিঃ
সার্ববর্ণিকেষু যতির্নৈকরাত্রং বসেন্ন কস্যাপি
নমেত্তুরীযাতীতাবধূতযোর্ন জ্যেষ্ঠো যো ন স্বরূপজ্ঞঃ
স জ্যেষ্ঠোঽপি কনিষ্ঠো হস্তাভ্যাং নদ্যুত্তরণং
ন কুর্যান্ন বৃক্ষমারোহেন্ন যানাদিরূঢো ন
ক্রযবিক্রযপরো ন কিঞ্চিদ্বিনিমযপরো ন দাম্ভিকো
নানৃতবাদী ন যতেঃ কিংচিত্কর্তব্যমস্ত্যস্তিচেত্সাংকর্যম্ .
তস্মান্মননাদৌ সংন্যাসিনামধিকারঃ .
আতুরকুটীচকযোর্ভূর্লোকো বহূদকস্য
স্বর্গলোকো হংসস্য তপোলোকঃ পরমহংসস্য
সত্যলোকস্তুরীযাতীতাবধূতযোঃ স্বাত্মন্যেব
কৈবল্যং স্বরূপানুসন্ধানেন ভ্রমরকীটন্যাযবত্ .
যং যং বাপি স্মরন্ভাবং ত্যজত্যন্তে কলেবরম্ .
তং তমেব সমাপ্নোতি নান্যথা শ্রুতিশাসনম্ .
তদেবং জ্ঞাত্বা স্বরূপানুসন্ধানং বিনান্যথাচারপরো
ন ভবেত্তদাচারবশাত্তত্তল্লোকপ্রাপ্তির্জ্ঞান-
বৈরাগ্যসংপন্নস্য স্বস্মিন্নেব মুক্তিরিতি ন সর্বত্রাচারপ্রসক্তি-
স্তদাচারঃ . জাগ্রত্স্বপ্নসুষুপ্তেষ্বেকশরীরস্য জাগ্রত্কালে
বিশ্বঃ স্বপ্নকালে তৈজসঃ সুষুপ্তিকালে প্রাজ্ঞঃ
অবস্থাভেদাদবস্থেশ্বরভেদঃ কার্যভেদাত্কারণভেদস্তাসু
চতুর্দশকারণানাং বাহ্যবৃত্তযোঽতর্বৃতযস্তেষা-
মুপাদানকারণম্ .
বৃত্তযশ্চত্বারঃ মনোবুদ্ধিরহঙ্কারশ্চিত্তং চেতি .
তত্তদ্বৃত্তিব্যাপারভেদেন পৃথগাচারভেদঃ .
নেত্রস্থং জাগরিতং বিদ্যাত্কণ্ঠে স্বপ্নং সমাবিশত্ .
সুষুপ্তং হৃদযস্থং তু তুরীযং মূর্ধ্নি সংস্থিতম্ .
তুরীযমক্ষরমিতি জ্ঞাত্বা জাগরিতে সুষুপ্ত্যবস্থাপন্ন
ইব যদ্যচ্ছৃতং যদ্যদৃষ্টং তত্সত্সর্বমবিজ্ঞাতমিব
যো বসেত্তস্য স্বপ্নাবস্থাযামপি তাদৃগবস্থা ভবতি .
স জীবন্মুক্ত ইতি বদন্তি . সর্বশ্রুত্যর্থপ্রতিপাদনমপি তস্যৈব
মুক্তিরিতি . ভিক্ষুর্নৈহিকামুষ্মিকাপেক্ষঃ . যদ্যপেক্ষাস্তি
তদনুরূপো ভবতি . স্বরূপানুসন্ধানব্যতিরিক্তান্যশাস্ত্রা-
ভ্যাসৈরুষ্ট্রকুঙ্কুমভারবদ্ব্যর্থো ন যোগশাস্ত্র-
প্রবৃত্তির্ন সাঙ্খ্যশাস্ত্রাভ্যাসো ন মন্ত্রতন্ত্রব্যাপারঃ .
ইতরশাস্ত্রপ্রবৃত্তির্যতেরস্তি চেচ্ছবালঙ্কারবচ্চর্মকারব-
দতিবিদূরকর্মাচারবিদ্যাদূরো ন প্রণবকীর্তনপরো যদ্যত্কর্ম
করোতি তত্তত্ফলমনুভবতি এরণ্ডতৈলফেনবদতঃ সর্বং পরিত্যজ্য
তত্প্রসক্তং মনোদণ্ডং করপাত্রং দিগম্বরং দৃষ্ট্বা
পরিব্রজেদ্ভিক্ষুঃ . বালোন্মত্তপিশাচবন্মরণং জীবিতং বা ন
কাঙ্ক্ষেত কালমেব প্রতীক্ষেত নির্দেশভৃতকন্যাযেন পরিব্রাডিতি .
তিতিক্ষাজ্ঞানবৈরাগ্যশমাদিগুণবর্জিতঃ .
ভিক্ষামাত্রেণ জীবি স্যাত্স যতির্যতিবৃত্তিহা .. ১..
ন দণ্ডধারণেন ন মুণ্ডনেন ন বেষেণ ন দম্ভাচারেণ
মুক্তিঃ . জ্ঞানদণ্ডো ধৃতো যেন একদণ্ডী স উচ্যতে .
কাষ্ঠদণ্ডো ধৃতো যেন সর্বাশী জ্ঞানবর্জিতঃ .
স যাতি নরকান্ঘোরান্মহারৌরবসংজ্ঞিতান্ .. ২..
প্রতিষ্ঠা সূকরীবিষ্ঠাসমা গীতা মহর্ষিভিঃ .
তস্মাদেনাং পরিত্যজ্য কীটবত্পর্যটেদ্যতিঃ .. ৩..
অযাচিতং যথালাভং ভোজনাচ্ছাদনং ভবেত্ .
পরেচ্ছযা চ দিগ্বাসাঃ স্নানং কুর্যাত্পরেচ্ছযা .. ৪..
স্বপ্নেঽপি যো যুক্তঃ স্যাজ্জাগ্রতীব বিশেষতঃ .
ঈদৃক্চেষ্টঃ স্মৃতঃ শ্রেষ্ঠো বরিষ্ঠো ব্রহ্মবাদিনাম্ .. ৫..
অলাভে ন বিষাদী স্যাল্লাভে চৈব ন হর্ষযেত্ .
প্রাণযাত্রিকমাত্রঃ স্যান্মাত্রাসঙ্গাদ্বিনির্গতঃ .. ৬..
অভিপূজিতলাভাংশ্চ জুগুপ্সেতৈব সর্বশঃ .
অভিপূজিতলাভৈস্তু যতির্মুক্তোঽপি বধ্যতে .. ৭..
প্রাণযাত্রানিমিত্তং চ ব্যঙ্গারে ভুক্তবজ্জনে .
কালে প্রশস্তে বর্ণানাং ভিক্ষার্থং পর্যটেদ্গৃহান্ .. ৮..
পাণিপাত্রশ্চরন্যোগী নাসকৃদ্ভৈক্ষমাচরেত্ .
তিষ্ঠন্ভুঞ্জ্যাচ্চরন্ভুঞ্জ্যান্মধ্যেনাচমনং তথা .. ৯..
অব্ধিবদ্ধৃতমর্যাদা ভবন্তি বিশাদাশযাঃ .
নিযতিং ন বিমুঞ্চন্তি মহান্তো ভাস্করা এব .. ১০..
আস্যেন তু যদাহারং গোবন্মৃগযতে মুনিঃ .
তদা সমঃ স্যাত্সর্বেষু সোঽমৃতত্বায কল্পতে .. ১১..
অনিন্দ্যং বৈ ব্রজন্গেহং নিন্দ্যং গেহং তু বর্জযেত্ .
অনাবৃতে বিশেদ্দ্বারি গেহে নৈবাবৃতে ব্রজেত্ .. ১২..
পাংসুনা চ প্রতিচ্ছন্নশূন্যাগারপ্রতিশ্রযঃ .
বৃক্ষমূলনিকেতো বা ত্যক্তসর্বপ্রিযাপ্রিযঃ .. ১৩..
যত্রাস্তমিতশাযী স্যান্নিরগ্নিরনিকেতনঃ .
যথালব্ধোপজীবী স্যান্মুনির্দান্তো জিতেন্দ্রিযঃ .. ১৪..
নিষ্ক্রম্য বনমাস্থায জ্ঞানযজ্ঞো জিতেন্দ্রিযঃ .
কালকাঙ্ক্ষী চরন্নেব ব্রহ্মভূযায কল্পতে .. ১৫..
অভযং সর্বভূতেভ্যো দত্ত্বা চরতি যো মুনিঃ .
ন তস্য সর্বভূতেভ্যো ভযমুত্পদ্যতে ক্বচিত্ .. ১৬..
নির্মানশ্চানহঙ্কারো নির্দ্বন্দ্বশ্ছিন্নসংশযঃ .
নৈব ক্রুধ্যতি ন দ্বেষ্টি নানৃতং ভাষতে গিরা .. ১৭..
পুণ্যাযতনচারী চ ভূতানামবিহিংসকঃ .
কালে প্রাপ্তে ভবদ্ভৈক্ষং কল্প্যতে ব্রহ্মভূযসে .. ১৮..
বানপ্রস্থগৃহস্থাভ্যাং ন সংসৃজ্যেত কর্হিচিত্ .
অজ্ঞাতচর্যাং লিপ্সেত ন চৈনং হর্ষ আবিশেত্ .. ১৯..
অধ্বা সূর্যেণ নির্দিষ্টঃ কীটবদ্বিচরেন্মহীম্ .
আশীর্যুক্তানি কর্মাণি হিংসাযুক্তানি যানি চ .. ২০..
লোকসংগ্রহযুক্তানি নৈব কুর্যান্ন কারযেত্ .
নাসচ্ছাত্রেষু সজ্জেত নোপজীবেত জীবিকাম্ .
অতিবাদাংস্ত্যজেত্তর্কান্পক্ষং কঞ্চন নাশ্রযেত্ .. ২১..
ন শিষ্যাননুবধ্নীত গ্রন্থান্নৈবাভ্যসেদ্বহূন্ .
ন ব্যাখ্যামুপযুঞ্জীত নারম্ভানারভেত্ক্বচিত্ .. ২২..
অব্যক্তলিঙ্গোঽব্যক্তার্থো মুনিরুন্মত্তবালবত্ .
কবির্মূকবদাত্মানং তদ্দৃষ্ট্যা দর্শযেন্নৃণাম্ .. ২৩..
ন কুর্যান্ন বদেত্কিঞ্চিন্ন ধ্যাযেত্সাধ্বসাধু বা .
আত্মারামোঽনযা বৃত্ত্যা বিচরেজ্জডবন্মুনিঃ .. ২৪..
একশ্চরেন্মহীমেতাং নিঃসঙ্গঃ সংযতেন্দ্রিযঃ .
আত্মক্রীড আত্মরতিরাত্মবান্সমদর্শনঃ .. ২৫..
বুধো বালকবত্ক্রীডেত্কুশলো জডবচ্চরেত্ .
বদেদুন্মত্তবদ্বিদ্বান্ গোচর্যাং নৈগমশ্চরেত্ ..২৬..
ক্ষিপ্রোঽবমানিতোঽসদ্ভিঃ প্রলব্ধোঽসূযিতোঽপি বা .
তাডিতঃ সংনিরুদ্ধো বা বৃত্ত্যা বা পরিহাপিতঃ .. ২৭..
বিষ্ঠিতো মূত্রিতো বাজ্ঞৈর্বহুধৈবং প্রকম্পিতঃ .
শ্রেযস্কামঃ কৃচ্ছ্রগত আত্মনাত্মানমুদ্ধরেত্ .. ২৮..
সংমাননং পরাং হানিং যোগর্দ্ধেঃ কুরুতে যতঃ .
জনেনাবমতো যোগী যোগসিদ্ধিং চ বিন্দতি .. ২৯..
তথা চরেত বৈ যোগী সতাং ধর্মমদূষযন্ .
জনা যথাবমন্যেরন্গচ্ছেযুর্নৈব সঙ্গতিম্ .. ৩০..
জরাযুজাণ্ডজাদীনাং বাঙ্মনঃকাযকর্মভিঃ .
যুক্তঃ কুর্বীত ন দ্রোহং সর্বসঙ্গাংশ্চ বর্জযেত্ .. ৩১..
কামক্রোধৌ তথা দর্পলোভমোহাদযশ্চ যে .
তাংস্তু দোষান্পরিত্যজ্য পরিব্রাড্ ভযবর্জিতঃ .. ৩২..
ভৈক্ষাশনং চ মৌনিত্বং তপো ধ্যানং বিশেষতঃ .
সম্যগ্জ্ঞানং চ বৈরাগ্যং ধর্মোঽযং ভিক্ষুকে মতঃ .. ৩৩..
কাষাযবাসাঃ সততং ধ্যানযোগপরাযণঃ .
গ্রামান্তে বৃক্ষমূলে বা বসেদ্দেবালযেঽপি বা .. ৩৪..
ভৈক্ষেণ বর্তযেন্নিত্যং নৈকান্নাশী ভবেত্ক্বচিত্ .
চিত্তশুদ্ধির্ভবেদ্যাবত্তাবন্নিত্যং চরেত্সুধীঃ .. ৩৫..
ততঃ প্রব্রজ্য শুদ্ধাত্মা সংচরেদ্যত্র কুত্রচিত্ .
বহিরন্তশ্চ সর্বত্র সংপশ্যন্হি জনার্দনম্ .. ৩৬..
সর্বত্র বিচরেন্মৌনী বাযুবদ্বীতকল্মষঃ .
সমদুঃখসুখঃ ক্ষান্তো হস্তপ্রাপ্তং চ ভক্ষযেত্ .. ৩৭..
নির্বৈরেণ সমং পশ্যন্দ্বিজগোশ্বমৃগাদিষু .
ভাবযন্মনসা বিষ্ণুং পরমাত্মানমীশ্বরম্ .. ৩৮..
চিন্মযং পরমানন্দং ব্রহ্মৈবাহমিতি স্মরন্ .
জ্ঞাত্বৈবং মনোদণ্ডং ধৃত্বা আশানিবৃত্তো ভূত্বা
আশাম্বরধরো ভূত্বা সর্বদা মনোবাক্কাযকর্মভিঃ
সর্বসংসারমুত্সৃজ্য প্রপঞ্চাবাঙ্মুখঃ
স্বরূপানুসন্ধানেন ভ্রমরকীটন্যাযেন মুক্তো
ভবতীত্যুপনিষত্ ..
ইতি পঞ্চমোপদেশঃ .. ৫..
অথ নারদঃ পিতামহমুবাচ .
ভগবন্ তদভ্যাসবশাত্ ভ্রমকীটন্যাযবত্তদভ্যাসঃ কথমিতি .
তমাহ পিতামহঃ .
সত্যবাগ্জ্ঞানবৈরাগ্যাভ্যাং বিশিষ্টদেহাবশিষ্টো
বসেত্ . জ্ঞানং শরীরং বৈরাগ্যং জীবনং বিদ্ধি
শান্তিদান্তী নেত্রে মনোমুখং বুদ্ধিঃ কলা
পঞ্চবিংশতিতত্ত্বান্যবযব অবস্থা
পঞ্চমহাভূতানি কর্ম ভক্তিজ্ঞানবৈরাগ্যং শাখা
জাগ্রত্স্বপ্নসুষুপ্তিতুরীযাশ্চতুর্দশকরণানি
পঙ্কস্তম্ভাকারাণীতি . এবমপি নাবমতিপঙ্কং কর্ণধার
ইব যন্তেব গজং স্ববুদ্ধ্যা বশীকৃত্য স্বব্যতিরিক্তং সর্বং
কৃতকং নশ্বরমিতি মত্বা বিরক্তঃ পুরুষঃ  সর্বদা
ব্রহ্মাহমিতি ব্যবহরেন্নান্যত্কিঞ্চিদ্বেদিতব্যং স্বব্যতিরেকেণ .
জীবন্মুক্তো বসেত্কৃতকৃত্যো ভবতি . ন নাহং ব্রহ্মেতি
ব্যবহরেত্কিন্তু ব্রহ্মাহমস্মীত্যজস্রং জাগ্রত্স্বপ্নসুষুপ্তিষু .
তুরীযাবস্থাং প্রাপ্য তুরীযাতীতত্বং ব্রজেদ্দিবা জাগ্রন্নক্তং
স্বপ্নং সুষুপ্তমর্ধরাত্রং গতমিত্যেকাবস্থাযাং
চতস্রোঽবস্থাস্ত্বেকৈককরণাধীনানাং চতুর্দশকরণানাং ব্যাপারশ্চক্ষুরাদীনাম্ .
চক্ষুষো রূপগ্রহণং শ্রোত্রযোঃ শব্দগ্রহণং
জিহ্বাযা রসাস্বাদনং ঘ্রাণস্য গন্ধগ্রহণং
বচসো বাগ্ব্যাপারঃ পাণেরাদানং পাদযোঃ সংচারঃ
পাযোরুত্সর্গ উপস্থস্যানন্দগ্রহণং ত্বচঃ স্পর্শগ্রহণম্ .
তদধীনা চ বিষযগ্রহণবুদ্ধিঃ বুদ্ধ্যা বুদ্ধ্যতি
চিত্তেন চেতযত্যহঙ্কারেণাহঙ্করোতি . বিসৃজ্য জীব
এতান্দেহাভিমানেন জীবো ভবতি . গৃহাভিমানেন গৃহস্থ
ইব শরীরে জীবঃ সংচরতি . প্রাগ্দলে পুণ্যাবৃত্তিরাগ্নেযাং
নিদ্রালস্যৌ দক্ষিণাযাং ক্রৌর্যবুদ্ধির্নৈরৃত্যাং পাপবুদ্ধিঃ
পশ্চিমে ক্রীডারতির্বাযব্যাং গমনে বুদ্ধিরুত্তরে শান্তিরীশান্যে
জ্ঞানং কর্ণিকাযাং বৈরাগ্যং কেসরেষ্বাত্মচিন্তা ইত্যেবং
বক্ত্রং জ্ঞাত্বা জীবদবস্থাং প্রথমং জাগ্রদ্দ্বিতীযং
স্বপ্নং তৃতীযং সুষুপ্তং চতুর্থং তুরীযং চতুর্ভির্বিরহিতং
তুরীযাতীতম্ . বিশ্বতৈজসপ্রাজ্ঞতটস্থভেদৈরেক এব একো দেবঃ
সাক্ষী নির্গুণশ্চ তদ্ব্রহ্মাহমিতি ব্যাহরেত্ .
নো চেজ্জাগ্রদবস্থাযাং জাগ্রদাদিচতস্রোঽবস্থাঃ স্বপ্নে
স্বপ্নাদিচতস্রোঽবস্থাঃ সুষুপ্তে সুষুপ্ত্যাদিচতস্রোঽবস্থাঃ
তুরীযে তুরীযাদিচতস্রোঽবস্থাঃ নত্বেবং তুরীযাতীতস্য নির্গুণস্য .
স্থূলসূক্ষ্মকারণরূপৈর্বিশ্বতৈজসপ্রাজ্ঞেশ্বরৈঃ
সর্বাবস্থাসু সাক্ষী ত্বেক এবাবতিষ্ঠতে . উত তটস্থো দ্রষ্টা
তটস্থো ন দ্রষ্টা দ্রষ্টৃত্বান্ন দ্রষ্টৈব কর্তৃত্বভোক্তৃত্ব
অহঙ্কারাদিভিঃ স্পৃষ্টো জীবঃ জীবেতরো ন স্পৃষ্টঃ . জীবোঽপি
ন স্পৃষ্ট ইতি চেন্ন . জীবাভিমানেন ক্ষেত্রাভিমানঃ .
শরীরাভিমানেন জীবত্বম্ . জীবত্বং ঘটাকাশমহাকাশব-
দ্ব্যবধানেঽস্তি . ব্যবধানবশাদেব হংসঃ সোঽহমিতি
মন্ত্রেণোচ্ছ্বাসনিঃশ্বাসব্যপদেশেনানুসন্ধানং করোতি .
এবং বিজ্ঞায শরীরাভিমানং ত্যজেন্ন শরীরাভিমানী ভবতি .
স এব ব্রহ্মেত্যুচ্যতে.
ত্যক্তসঙ্গো জিতক্রোধো লঘ্বাহারো জিতেন্দ্রিযঃ .
পিধায বুদ্ধ্যা দ্বারাণি মনো ধ্যানে নিবেশযেত্ .. ১..
শূন্যেষ্বেবাবকাশেষু গুহাসু চ বনেষু চ .
নিত্যযুক্তঃ সদা যোগী ধ্যানং সম্যগুপক্রমেত্ .. ২..
আতিথ্যশ্রাদ্ধযজ্ঞেষু দেবযাত্রোত্সবেষু চ .
মহাজনেষু সিদ্ধ্যর্থী ন গচ্ছেদ্যোগবিত্ক্বচিত্ .. ৩..
যথৈনমবমন্যন্তে জনাঃ পরিভবন্তি চ .
তথা যুক্তশ্চেদ্যোগী সতাং বর্ত্ম ন দূষযেত্ .. ৪..
বাগ্দণ্ডঃ কর্মদণ্ডশ্চ মনোদণ্ডশ্চ তে ত্রযঃ .
যস্যৈতে নিযতা দণ্ডাঃ স ত্রিদণ্ডী মহাযতিঃ .. ৫..
বিধূমে চ প্রশান্তাগ্নৌ যস্তু মাধুকরীং চরেত্ .
গৃহে চ বিপ্র্মুখ্যানাং যতিঃ সর্বোত্তমঃ স্মৃতঃ .. ৬..
দণ্ডভিক্ষাং চ যঃ কুর্যাত্স্বধর্মে ব্যসনং বিনা .
যস্তিষ্ঠতি ন বৈরাগ্যং যাতি নীচযতির্হি সঃ .. ৭..
যস্মিন্গৃহে বিশেষেণ লভেদ্ভিক্ষাং চ বাসনাত্ .
তত্র নো যাতি যো ভূযঃ স যতির্নেতরঃ স্মৃতঃ .. ৮..
যঃ শরীরেন্দ্রিযাদিভ্যো বিহীনং সর্বসাক্ষিণম্ .
পারমার্থিক বিজ্ঞানং সুখাত্মানং স্বযংপ্রভম্ .. ৯..
পরতত্ত্বং বিজানাতি সোঽতিবর্ণাশ্রমী ভবেত্ .
বর্ণাশ্রমাদযো দেহে মাযযা পরিকল্পিতাঃ .. ১০..
নাত্মনো বোধরূপস্য মম তে সন্তি সর্বদা .
ইতি যো বেদ বেদান্তৈঃ সোঽতিবর্ণাশ্রমী ভবেত্ .. ১১..
যস্য বর্ণাশ্রমাচারো গলিতঃ স্বাত্মদর্শনাত্ .
স বর্ণানাশ্রমান্সর্বানতীত্য স্বাত্মনি স্থিতঃ .. ১২..
যোঽতীত্য স্বাশ্রমান্বর্ণানাত্মন্যেব স্থিতঃ পুমান্ .
সোঽতিবর্ণাশ্রমী প্রোক্তঃ সর্ববেদার্থবেদিভিঃ .. ১৩..
তস্মাদন্যগতা বর্ণা আশ্রমা অপি নারদ .
আত্মন্যারোপিতাঃ সর্বে ভ্রান্ত্যা তেনাত্মবেদিনা .. ১৪..
ন বিধির্ন নিষেধশ্চ বর্জ্যাবর্জ্য কল্পনা .
ব্রহ্মবিজ্ঞানিনামস্তি তথা নান্যচ্চ নারদ .. ১৫..
বিরজ্য সর্বভূতেভ্য আবিরিঞ্চিপদাদপি .
ঘৃণাং বিপাঠ্য সর্বস্মিন্পুত্রমিত্রাদিকেষ্বপি .. ১৬..
শ্রদ্ধালুর্মুক্তিমার্গেষু বেদান্তজ্ঞানলিপ্সযা .
উপাযনকরো ভূত্বা গুরুং ব্রহ্মবিদং ব্রজেত্ .. ১৭..
সেবাভিঃ পরিতোষ্যৈনং চিরকালং সমাহিতঃ .
সদা বেদান্তবাক্যার্থং শ্রুণুযাত্সুসমাহিতঃ .. ১৮..
নির্মমো নিরহঙ্কারঃ সর্বসঙ্গবিবর্জিতঃ .
সদা শান্ত্যাদিযুক্তঃ সন্নাত্মন্বাত্মানমীক্ষতে .. ১৯..
সংসারদোষদৃষ্ট্যৈব বিরক্তির্জাযতে সদা .
বিরক্তস্য তু সংসারাত্সংন্যাসঃ স্যান্ন সংশযঃ .. ২০..
মুমুক্ষুঃ পরহংসাখ্যঃ সাক্ষান্মোক্ষৈকসাধনম্ .
অভ্যসেদ্ব্রহ্মবিজ্ঞানং বেদান্তশ্রবণাদিনা .. ২১..
ব্রহ্মবিজ্ঞানলাভায পরহংস সমাহ্বযঃ .
শান্তিদান্ত্যাদিভিঃ সর্বৈঃ সাধনৈঃ সহিতো ভবেত্ .. ২২..
বেদান্তাভ্যাসনিরতঃ শান্তো দান্তো জিতেন্দ্রিযঃ .
নির্ভযো নির্মমো নিত্যো নির্দ্বন্দ্বো নিষ্পরিগ্রহঃ .. ২৩..
জীর্ণকৌপীনবাসাঃ স্যান্মুণ্ডী নগ্নোঽথবা ভবেত্ .
প্রাজ্ঞো বেদান্তবিদ্যোগী নির্মমো নিরহঙ্কৃতিঃ .. ২৪..
মিত্রাদিষু সমো মৈত্রঃ সমস্তেষ্বেব জন্তুষু .
একো জ্ঞানী প্রশান্তাত্মা স সন্তরতি নেতরঃ .. ২৫..
গুরূণাং চ হিতে যুক্তস্তত্র সংবত্সরং বসেত্ .
নিযমেষ্বপ্রমাত্তস্তু যমেষু চ সদাভবেত্ .. ২৬..
প্রাপ্য চান্তে ততশ্চৈব জ্ঞানযোগমনুত্তমম্ .
অবিরোধেন ধর্মস্য সংচরেত্পৃথিবীমিমাম্ .. ২৭..
ততঃ সংবত্সরস্যান্তে জ্ঞানযোগমনুত্তমম্ .
আশ্রমত্রযমুত্সৃজ্য প্রাপ্তশ্চ পরমাশ্রমম্ .. ২৮..
অনুজ্ঞাপ্য গুরূংশ্চৈব চরেদ্ধি পৃথিবীমিমাম্ .
ত্যক্তসঙ্গো জিতক্রোধো লঘ্বাহারো জিতেন্দ্রিযঃ .. ২৯..
দ্বাবিমৌ ন বিরজ্যেতে বিপরীতেন কর্মণা .
নিরারম্ভো গৃহস্থশ্চ কার্যবাংশ্চৈব ভিক্ষুকঃ .. ৩০..
মাদ্যতি প্রমদাং দৃষ্ট্বা সুরাং পীত্বা চ মাদ্যতি .
তস্মাদ্দৃষ্টিবিষং নারীং দূরতঃ পরিবর্জযেত্ .. ৩১..
সংভাষণং সহ স্ত্রীভিরালাপঃ প্রেক্ষণং তথা .
নৃত্তং গানং সহাসং চ পরিবাদাংশ্চ বর্জযেত্ .. ৩২..
ন স্নানং ন জপঃ পূজা ন হোমো নৈব সাধনম্ .
নাগ্নিকার্যাদিকার্যং চ নৈতস্যাস্তীহ নারদ .. ৩৩..
নার্চনং পিতৃকার্যং চ তীর্থযাত্রা ব্রতানি চ .
ধর্মাধর্মাদিকং নাস্তি ন বিধির্লৌকিকী ক্রিযা .. ৩৪..
সন্ত্যজেত্সর্বকর্মাণি লোকাচারং চ সর্বশঃ .
কৃমীকীটপতঙ্গাশ্চ তথা যোগী বনস্পতীন্ .. ৩৫..
ন নাশযেদ্বুধো জীবন্পরমার্থমতির্যতিঃ .
নিত্যমন্তর্মুখঃ স্বচ্ছঃ প্রশান্তাত্মা স্বপূর্ণধীঃ .. ৩৬..
অন্তঃসঙ্গপরিত্যাগী লোকে বিহর নারদ .
নারাজকে জনপদে চরত্যেকচরো মুনিঃ .. ৩৭..
নিঃস্তুতির্নির্নমস্কারো নিঃস্বধাকার এব চ .
চলাচলনিকেতশ্চ  যতির্যাদৃচ্ছিকো ভবেদিত্যুপনিষত্ ..
ইতি ষষ্ঠোপদেশঃ .. ৬..
অথ যতের্নিযমঃ কথমিতি পৃষ্টং নারদং পিতামহঃ
পুরস্কৃত্য বিরক্তঃ সন্যো বর্ষাসু ধ্রুবশীলোঽষ্টৌ
মাস্যেকাকী চরন্নেকত্র নিবসেদ্ভিক্ষুর্ভযাত্সারঙ্গবদেকত্র
ন তিষ্ঠেস্বগমননিরোধগ্রহণং ন কুর্যাদ্ধস্তাভ্যাং
নদ্যুত্তরণং ন কুর্যান্ন বৃক্ষারোহণমপি ন
দেবোত্সবদর্শনং কুর্যান্নৈকত্রাশী ন বাহ্যদেবার্চনং
কুর্যাত্স্বব্যতিরিক্তং সর্বং ত্যক্ত্বা মধুকরবৃত্ত্যাহারমহারন্কৃশো
ভূত্বা মেদোবৃদ্ধিমকুর্বন্নাজ্যং রুধিরমিব ত্যজেদেকত্রান্নং
পললমিব গন্ধলেপনমশুদ্ধিলেপনমৈব ক্ষারমন্ত্যজমিব
বস্ত্রমুচ্ছিষ্টপাত্রমিবাভ্যঙ্গং স্ত্রীসঙ্গমিব
মিত্রাহ্লাদকং মূত্রমিব স্পৃহাং গোমাংসমিব জ্ঞাতচরদেশং
চণ্ডালবাটিকামিব স্ত্রিযমহিমিব সুবর্ণং কালকূটমিব
সভাস্থলং স্মশানস্থলমিব রাজধানীং কুম্ভীপাকমিব
শবপিণ্ডবদেকত্রান্নং ন দেহান্তরদর্শনং প্রপঞ্চবৃত্তিং
পরিত্যজ্য স্বদেশমুত্সৃজ্য জ্ঞাতচরদেশং বিহায
বিস্মৃতপদার্থং পুনঃ প্রাপ্তহর্ষ ইব স্বমানন্দমনুস্মর-
ন্স্বশরীরাভিমানদেশবিস্মরণং মত্বা শবমিব হেযমুপগম্য
কারাগৃহবিনির্মুক্তচোরবত্পুত্রাপ্তবন্ধুভবস্থলং
বিহায দূরতো বসেত্ .
অযত্নেন প্রাপ্তমাহরন্ব্রহ্মপ্রণবধ্যানানুসন্ধানপরো
ভূত্বা সর্বকর্মনির্মুক্তঃ কামক্রোধলোভমোহমদ-
মাত্সর্যাদিকং দগ্ধ্বা ত্রিগুণাতীতঃ ষডূর্মিরহিতঃ
ষড্ভাববিকারশূন্যঃ . সত্যবাক্ছুচিরদ্রোহী গ্রাম
একরাত্রং পত্তনে পঞ্চরাত্রং ক্ষেত্রে পঞ্চরাত্রং তীর্থে
পঞ্চরাত্রমনিকেতঃ স্থিরমতির্নানৃতবাদী গিরিকন্দরেষু
বসেদেক এব দ্বৌ বা চরেত্ গ্রামং ত্রিভির্নগরং চতুর্ভি-
র্গ্রামমিত্যেকশ্চরেত্ . ভিক্ষুশ্চতুর্দশকরণানাং
ন তত্রাবকাশং দদ্যাদবিচ্ছিন্নজ্ঞানাদ্বৈরাগ্যসংপত্তি-
মনুভূয মত্তো ন কশ্চিন্নান্যো ব্যতিরিক্ত ইত্যাত্মন্যালোচ্য
সর্বতঃ স্বরূপমেব পশ্যঞ্জীবন্মুক্তিমবাপ্য প্রারব্ধ-
প্রতিভাসনাশপর্যন্তং চতুর্বিধং স্বরূপং জ্ঞাত্বা
দেহপতনপর্যন্তং স্বরূপানুসন্ধানেন বসেত্ .
ত্রিষবণস্নানং কুটীচকস্য বহূদকস্য দ্বিবারং
হংসস্যৈকবারং পরমহংসস্য মানসস্নানং
তুরীযাতীতস্য ভস্মস্নানমবধূতস্য বাযব্যস্নানং
ঊর্ধ্বপুণ্ড্রং কুটীচকস্য ত্রিপুণ্ড্রং বহূদকস্য
ঊর্ধ্বপুণ্ড্রং ত্রিপুণ্ড্রং হংসস্য ভস্মোদ্ধূলনং
পরমহংসস্য তুরীযাতীতস্য তিলকপুণ্ড্রমবধূতস্য ন
কিঞ্চিত্ . তুরীযাতীতাবধূতযোঃ ঋতুক্ষৌরং কুটীচকস্য
ঋতুদ্বযক্ষৌরং বহূদকস্য ন ক্ষৌরং হংসস্য
পরমহংসস্য চ ন ক্ষৌরম্ . অস্তিচেদযনক্ষৌরম্ .
তুরীযাতীতাবধূতযোঃ ন ক্ষৌরম্ . কুটীচকস্যৈকান্নং
মাধুকরং বহূদকস্য হংসপরমহংসযোঃ করপাত্রং
তুরীযাতীতস্য গোমুখং অবধূতস্যাজগরবৃত্তিঃ . শাটিদ্বযং
কুটীচকস্য বহূদকস্যৈকশাটী হংসস্য খণ্ডং
দিগংবরং পরমহংসস্য এককৌপীনং বা তুরীযাতীতাবধূতযো-
র্জাতরূপধরত্বং হংসপরমহংসযোরজিনং ন ত্বন্যেষাম্ .
কুটীচকবহূদকযোর্দেবার্চনং হংসপরমহংসযো-
র্মানসার্চনং তুরীযাতীতাবধূতযোঃ সোহংভাবনা .
কুটীচকবহূদকযোর্মন্ত্রজপাধিকারো হংসপরমহংসযো-
র্ধ্যানাধিকারস্তুরীযাতীতাবধূতযোর্ন ত্বন্যাধিকার-
স্তুরীযাতীতাবধূতযোর্মহাবাক্যোপদেশাধিকারঃ
পরমহংসস্যাপি . কুটীচকবহূদকহংসানাং
নান্যস্যোপদেশাধিকারঃ. কুটীচকবহূদকযোর্মানুষপ্রণবঃ
হংসপরমহংসযোরান্তরপ্রণবঃ তুরীযাতীতাবধূতযোর্ব্রহ্মপ্রণবঃ .
কুটীচকবহূদকযোঃ শ্রবণং হংসপরমহংসযোর্মননং
তুরীযাতীতাবধূতযোর্নিদিধ্যাসঃ . সর্বেষামাত্মনুসন্ধানং
বিধিরিত্যেব মুমুক্ষুঃ সর্বদা সংসারতারকং তারকমনুস্মর-
ঞ্জীবন্মুক্তো বসেদধিকারবিশেষেণ কৈবল্যপ্রাপ্ত্যুপায-
মন্বিষ্যেদ্যতিরিত্যুপনিষত্ ..
ইতি সপ্তমোপদেশঃ .. ৭..
অথ হৈনং ভগবন্তং পরমেষ্ঠিনং নারদঃ
পপ্রচ্ছ সংসারতারকং প্রসন্নো ব্রূহীতি .
তথেতি পরমেষ্ঠী বক্তুমুচক্রমে ওমিতি ব্রহ্মেতি
ব্যষ্টিসমষ্টিপ্রকারেণ . কা ব্যষ্টিঃ কা
সমষ্টিঃ সংহারপ্রণবঃ সৃষ্টিপ্রণব-
শ্চান্তর্বহিশ্চোভযাত্মকত্বাত্ত্রিবিধো
ব্রহ্মপ্রণবঃ . অন্তঃপ্রণবো ব্যাবহারিকপ্রণবঃ .
বাহ্যপ্রণব আর্ষপ্রণবঃ . উভযাত্মকো
বিরাট্প্রণবঃ . সংহারপ্রণবো ব্রহ্মপ্রণব
অর্ধমাত্রাপ্রণবঃ . ওমিতিব্রহ্ম . ওমিত্যেকাক্ষর-
মন্তঃপ্রণবং বিদ্ধি . সচাষ্টধা ভিদ্যতে .
অকারোকারমকারার্ধমাত্রানাদবিন্দুকলাশক্তিশ্চেতি .
তত্র চত্বার অকারশ্চাযুতাবযবান্বিত উকারঃ
সহস্রাবযবান্বিতো মকারঃ শতাবযবোপেতোঽর্ধমাত্রা-
প্রণবোঽনন্তাবযবাকারঃ . সগুণো বিরাট্প্রণবঃ সংহারো
নির্গুণপ্রণব উভযাত্মকোত্পত্তিপ্রণবো যথাপ্লুতো
বিরাট্প্লুতঃ প্লুতসংহারো বিরাট্প্রণবঃ ষোডশমাত্রাত্মকঃ
ষট্ত্রিংশত্তত্ত্বাতীতঃ . ষোডশমাত্রাত্মকত্বং
কথমিত্যুচ্যতে . অকারঃ প্রথমোকারো দ্বিতীযা মকার-
স্তৃতীযার্ধমাত্রা চতুর্থী নাদঃ পঞ্চমী বিন্দুঃ
ষষ্ঠী কলা সপ্তমী কলাতীতাষ্টমী শান্তির্নবমী
শান্ত্যতীতা দশমী উন্মন্যেকাদশী মনোন্মনী দ্বাদশী
পুরী ত্রযোদশী মধ্যমা চতুর্দশী পশ্যন্তী পঞ্চদশী
পরা . ষোডশী পুনশ্চতুঃষষ্টিমাত্রা প্রকৃতি-
পুরুষদ্বৈবিধ্যমাসাদ্যাষ্টাবিংশত্যুত্তরভেদমাত্রা-
স্বরূপমাসাদ্য সগুণনির্গুণত্বমুপেত্যৈকোঽপি ব্রহ্মপ্রণবঃ
সর্বাধারঃ পরংজ্যোতিরেষ সর্বেশ্বরো বিভুঃ . সর্বদেবমযঃ
সর্বপ্রপঞ্চাধারগর্ভিতঃ .. ১..
সর্বাক্ষরমযঃ কালঃ সর্বাগমমযঃ শিবঃ .
সর্বশ্রুত্যুত্তমো মৃগ্যঃ সকলোপনিষন্মযঃ .. ২..
ভূতং ভব্যং ভবিষ্যদ্যত্ত্রিকালোদিতমব্যযম্ .
তদপ্যোঙ্কারমেবাযং বিদ্ধি মোক্ষপ্রদাযকম্ .. ৩..
তমেবাত্মানমিত্যেতদ্ব্রহ্মশব্দেন বর্ণিতম্ .
তদেকমমৃতমজরমনুভূয তথোমিতি .. ৪..
সশরীরং সমারোপ্য তন্মযত্বং তথোমিতি .
ত্রিশরীরং তমাত্মানং পরংব্রহ্ম বিনিশ্চিনু .. ৫..
পরংব্রহ্মানুসন্দধ্যাদ্বিশ্বাদীনাং ক্রমঃ ক্রমাত্ .
স্থূলত্বাত্স্থূলভুক্ত্বাচ্চ সূক্ষ্মত্বাত্সূক্ষ্মভুক্ পরম্ .. ৬..
ঐকত্বানন্দভোগাচ্চ সোঽযমাত্মা চতুর্বিধঃ .
চতুষ্পাজ্জাগরিতঃ স্থূলঃ স্থূলপ্রজ্ঞো হি বিশ্বভুক্ .. ৭..
একোনবিংশতিমুখঃ সাষ্টাঙ্গঃ সর্বগঃ প্রভু .
স্থূলভুক্ চতুরাত্মাথ বিশ্বো বৈশ্বানরঃ পুমান্ .. ৮..
বিশ্বজিত্প্রথমঃ পাদঃ স্বপ্নস্থানগতঃ প্রভুঃ .
সূক্ষ্মপ্রজ্ঞঃ স্বতোঽষ্টাঙ্গ একো নান্যঃ পরংতপ .. ৯..
সূক্ষ্মভুক্ চতুরাত্মাথ তৈজসো ভূতরাডযম্ .
হিরণ্যগর্ভঃ স্থূলোঽন্তর্দ্বিতীযঃ পাদ উচ্যতে .. ১০..
কামং কামযতে যাবদ্যত্র সুপ্তো ন কঞ্চন .
স্বপ্নং পশ্যতি নৈবাত্র তত্সুষুপ্তমপি স্ফুটম্ .. ১১..
একীভূতঃ সুষুপ্তস্থঃ প্রজ্ঞানঘনবান্সুখী .
নিত্যানন্দমযোঽপ্যাত্মা সর্বজীবান্তরস্থিতঃ .. ১২..
তথাপ্যানন্দভুক্ চেতোমুখঃ সর্বগতোঽব্যযঃ .
চতুরাত্মেশ্বরঃ প্রাজ্ঞস্তৃতীযঃ পাদসংজ্ঞিতঃ .. ১৩..
এষ সর্বেশ্বরশ্চৈষ সর্বজ্ঞঃ সূক্ষ্মভাবনঃ .
এষোঽন্তর্যাম্যেষ যোনিঃ সর্বস্য প্রভবাপ্যযৌ .. ১৪..
ভূতানাং ত্রযমপ্যেতত্সর্বোপরমবাধকম্ .
তত্সুষুপ্তং হি যত্স্বপ্নং মাযামাত্রং প্রকীর্তিতম্ .. ১৫..
চতুর্থশ্চতুরাত্মাপি সচ্চিদেকরসো হ্যযম্ .
তুরীযাবসিতত্ত্বাচ্চ একৈকত্বনুসারতঃ .. ১৬..
জ্ঞাতানুজ্ঞাত্রননুজ্ঞাতৃবিকল্পজ্ঞানসাধনম্ .
বিকল্পত্রযমত্রাপি সুষুপ্তং স্বপ্নমান্তরম্ .. ১৭..
মাযামাত্রং বিদিত্বৈবং সচ্চিদেকরসো হ্যযম্ .
বিভক্তো হ্যযমাদেশো ন স্থূলপ্রজ্ঞমন্বহম্ .. ১৮..
ন সূক্ষ্মপ্রজ্ঞমত্যন্তং ন প্রজ্ঞং ন ক্বচিন্মুনে .
নৈবাপ্রজ্ঞং নোভযতঃপ্রজ্ঞং ন প্রজ্ঞমান্তরম্ .. ১৯..
নাপ্রজ্ঞমপি ন প্রজ্ঞাঘনং চাদৃষ্টমেব চ .
তদলক্ষণমগ্রাহ্যং যদ্ব্যবহার্যমচিন্ত্য-
মব্যপদেশ্যমেকাত্মপ্রত্যযসারং প্রপঞ্চোপশমং
শিবং শান্তমদ্বৈতং চতুর্থং মন্যন্তে স ব্রহ্ম
প্রণবঃ স বিজ্ঞেযো নাপরস্তুরীযঃ সর্বত্র
ভানুবন্মুমুক্ষূণামাধারঃ স্বযংজ্যোতির্ব্রহ্মাকাশঃ
সর্বদা বিরাজতে পরংব্রহ্মত্বাদিত্যুপনিষত্ ..
ইতি অষ্টমোপদেশঃ .. ৮..
অথ ব্রহ্মস্বরূপং কথমিতি নারদঃ পপ্রচ্ছ .
তং হোবাচ পিতামহঃ কিং ব্রহ্মস্বরূপমিতি .
অন্যোসাবন্যোহমস্মীতি যে বিদুস্তে পশবো ন স্বভাব-
পশবস্তমেবং জ্ঞাত্বা বিদ্বান্মৃত্যুমুখাত্প্রমুচ্যতে
নান্যঃ পন্থা বিদ্যতেঽযনায .
কালঃ স্বভাবো নিযতির্যদৃচ্ছা
        ভূতানি যোনিঃ পুরুষ ইতি চিন্ত্যম্ .
সংযোগ এষাং নত্বাত্মভাবা-
       দাত্মা হ্যনীশঃ সুখদুঃখহেতোঃ .. ১..
তে ধ্যানযোগানুগতা অপশ্যন্
       দেবাত্মশক্তিং স্বগুণৈর্নিগূঢাম্ .
যঃ কারণানি নিখিলানি তানি
       কালাত্মযুক্তান্যধিতিষ্ঠত্যেকঃ .. ২..
তমেকস্মিংস্ত্রিবৃতং ষোডশান্তং
       শতার্ধারং বিংশপ্রতিত্যরাভিঃ .
অষ্টকৈঃ ষড্ভির্বিশ্বরূপৈকপাশং
       ত্রিমার্গভেদং দ্বিনিমিত্তৈকমোহম্ .. ৩..
পঞ্চস্রোতোম্বুং পঞ্চযোন্যুগ্রবক্ত্রাং
       পঞ্চপ্রাণোর্মিং পঞ্চবুদ্ধ্যাদিমূলাম্ .
পঞ্চাবর্তাং পঞ্চদুঃখৌঘবেগাং
       পঞ্চশদ্ভেদাং পঞ্চপর্বামধীমঃ .. ৪..
সর্বাজীবে সর্বসংস্থে বৃহন্তে
       তস্মিন্হংসো ভ্রাম্যতে ব্রহ্মচক্রে .
পৃথগাত্মানং প্রেরিতারং চ মত্বা
       জুষ্টস্ততস্তেনামৃতত্বমেতি .. ৫..
উদ্গীথমেতত্পরমং তু ব্রহ্ম
       তস্মিংস্ত্রযং স্বপ্রতিষ্ঠাক্ষরং চ .
অত্রান্তরং বেদবিদো বিদিত্বা
       লীনাঃ পরে ব্রহ্মণি তত্পরাযণাঃ .. ৬..
সংযুক্তমেতত্ক্ষরমক্ষরং চ
       ব্যক্তাব্যক্তং ভরতে বিশ্বমীশঃ .
অনীশশ্চাত্মা বধ্যতে ভোক্তৃভাবা-
       জ্জ্ঞাত্বা দেবং মুচ্যতে সর্বপাশৈঃ .. ৭..
জ্ঞাজ্ঞৌ দ্বাবজাবীশনীশাবজা
       হ্যেকা ভোক্তৃভোগার্থযুক্তা .
অনন্তশ্চাত্মা বিশ্বরূপো হ্যকর্তা
       ত্রযং যদা বিন্দতে ব্রহ্মমেতত্ .. ৮..
ক্ষরং প্রধানমমৃতাক্ষরং হরঃ
       ক্ষরাত্মানাবীশতে দেব একঃ .
তস্যাভিধ্যানাদ্যোজনাত্তত্ত্বভাবা-
       দ্ভূযশ্চান্তে বিশ্বমাযানিবৃত্তিঃ .. ৯..
জ্ঞাত্বা দেবং মুচ্যতে সর্বপাশৈঃ
       ক্ষীণৈঃ ক্লেশৈর্জন্মমৃত্যুপ্রহাণিঃ .
তস্যাভিধ্যানাত্তৃতযং দেহভেদে
       বিশ্বৈশ্বর্যং কেবল আত্মকামঃ .. ১০..
এতজ্জ্ঞেযং নিত্যমেবাত্মসংস্থং
       নাতঃ পরং বেদিতব্যং হি কিঞ্চিত্ .
ভোক্তা ভোগ্যং প্রেরিতারং চ মত্বা
       সর্বং প্রোক্তং ত্রিবিধং ব্রহ্মমেতত্ .. ১১..
আত্মবিদ্যা তপোমূলং তদ্ব্রহ্মোপনিষত্পরম্ .
য এবং বিদিত্বা স্বরূপমেবানুচিন্তযং-
স্তত্র কো মোহঃ কঃ শোক একত্বমনুপশ্যতঃ .. ১২..
তস্মাবিরাড্ভূতং ভব্যং
       ভবিষ্যদ্ভবত্যনশ্বরস্বরূপম্ .
অণোরণীযান্মহতো মহীযা-
       নাত্মাস্য জন্তোর্নিহিতো গুহাযাম্ .
তমক্রতুং পশ্যতি বীতশোকো
       ধাতুঃপ্রসাদান্মহিমানমীশম্ .. ১৩..
অপাণিপাদো জবনো গ্রহীতা
       পশ্যত্যচক্ষুঃ স শ্রুণোত্যকর্ণঃ .
স বেত্তি বেদ্যং ন চ তস্যাস্তি বেত্তা
       তমাহুরগ্র্যং পুরুষং মহান্তম্ .. ১৪..
অশরীরং শরীরেষ্বনবস্থেশ্ববস্থিতম্ .
মহান্তং বিভুমাত্মানং মত্বা ধীরো ন শোচতি .. ১৫..
সর্বস্য ধাতারমচিন্ত্যশক্তিং
       সর্বাগমান্তার্থবিশেষবেদ্যম্ .
পরাত্পরং পরমং বেদিতব্যং
       সর্বাবসানে সকৃদ্বেদিতব্যম্ .. ১৬..
কবিং পুরাণং পুরুষোত্তমোত্তমং
       সর্বেশ্বরং সর্বদেবৈরুপাস্যম্ .
অনাদি মধ্যান্তমনন্তমব্যযং
       শিবাচ্যুতাম্ভোরুহগর্ভভূধরম্ .. ১৭..
স্বেনাবৃতং সর্বমিদং প্রপঞ্চং
       পঞ্চাত্মকং পঞ্চসু বর্তমানম্ .
পঞ্চীকৃতানন্তভবপ্রপঞ্চং
       পঞ্চীকৃতস্বাবযবৈরসংবৃতম্ .
পরাত্পরং যন্মহতো মহান্তং
       স্বরূপতেজোমযশাশ্বতং শিবম্ .. ১৭..
নাবিরতো দুশ্চরিতান্নাশান্তো নাসমাহিতঃ .
নাশান্তমনসো বাপি প্রজ্ঞানেনৈনমাপ্নুযাত্ .. ১৮..
নান্তঃপ্রজ্ঞং ন বহিঃপ্রজ্ঞং ন স্থূলং নাস্থূলং
ন জ্ঞানং নাজ্ঞানং নোভযতঃপ্রজ্ঞমগ্রাহ্য-
মব্যবহার্যং স্বান্তঃস্থিতঃ স্বযমেবেতি য এবং বেদ
স মুক্তো ভবতি স মুক্তো ভবতীত্যাহ ভগবান্পিতামহঃ .
স্বস্বরূপজ্ঞঃ পরিব্রাট্ পরিব্রাডেকাকী চরতি
ভযত্রস্তসারঙ্গবত্তিষ্ঠতি . গমনবিরোধং ন করোতি .
স্বশরীরব্যতিরিক্তং সর্বং ত্যক্ত্বা ষ্ট্পদবৃত্ত্যা স্থিত্বা
স্বরূপানুসন্ধানং কুর্বন্সর্বমনন্যবুদ্ধ্যা
স্বস্মিন্নেব মুক্তো ভবতি . স পরিব্রাট্ সর্বক্রিযাকারকনিবর্তকো
গুরুশিষ্যশাস্ত্রাদিবিনির্মুক্তঃ সর্বসংসারং বিসৃজ্য
চামোহিতঃ পরিব্রাট্ কথং নির্ধনিকঃ সুখী ধনবা-
ঞ্জ্ঞানাজ্ঞানোভযাতীতঃ সুখদুঃখাতীতঃ
স্বযংজ্যোতিপ্রকাশঃ সর্ববেদ্যঃ সর্বজ্ঞঃ সর্বসিদ্ধিদঃ
সর্বেশ্বরঃ সোঽহমিতি . তদ্বিষ্ণোঃ পরমং পদং যত্র
গত্বা ন নিবর্তন্তে যোগিনঃ . সূর্যো ন তত্র ভাতি
ন শশাঙ্কোঽপি ন স পুনরাবর্ততে ন স পুনরাবর্ততে
তত্কৈবল্যমিত্যুপনিষত্ ..
ইতি নবমোপদেশঃ .. ৯..
ॐ ভদ্রং কর্ণেভিঃ শ্রুণুযাম দেবা .
ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ .
ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবাঃ .
স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ .
স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
.. ইতি নারদপরিব্রাজকোপনিষত্সমাপ্তা ..