নাদবিন্দূ

.. নাদবিন্দূপনিষত্ ..
.. নাদবিন্দূপনিষত্ ..
( ঋগ্বেদীয যোগোপনিষত্)

বৈরাজাত্মোপাসনযা সঞ্জাতজ্ঞানবহ্নিনা .
দগ্ধ্বা কর্মত্রযং যোগী যত্পদং যাতি তদ্ভজে ..

ॐ বাঙ্মে মনসি প্রতিষ্ঠিতা . মনো মে বাচি প্রতিষ্টিতম্ .
        আবিরাবীর্ম এধি . বেদস্য মা আণীস্থঃ .শ্রুতং মে মা
প্রহাসীঃ .
        অনেনাধীতেনাহোরাত্রান্সন্দধামি .
        ঋতং বদিষ্যামি . সত্যং বদিষ্যামি .
        তন্মামবতু . তদ্বক্তারমবতু .
        অবতু মামবতু বক্তারম্ ..
ॐ শান্তিঃ শান্তিঃ শান্তিঃ ..

ॐ অকারো দক্ষিণঃ পক্ষ উকারস্তূত্তরঃ স্মৃতঃ .
মকারং পুচ্ছমিত্যাহুরর্ধমাত্রা তু মস্তকম্ .. ১..
পাদাদিকং গুণাস্তস্য শরীরং তত্ত্বমুচ্যতে .
ধর্মোঽস্য দক্ষিণশ্চক্ষুরধর্মো যোঽপরঃ স্মৃতঃ .. ২..
ভূর্লোকঃ পাদযোস্তস্য ভুবর্লোকস্তু জানুনি .
সুবর্লোকঃ কটীদেশে নাভিদেশে মহর্জগত্ .. ৩..
জনোলোকস্তু হৃদ্দেশে কণ্ঠে লোকস্তপস্ততঃ .
ভ্রুবোর্ললাটমধ্যে তু সত্যলোকো ব্যবস্থিতঃ .. ৪..
সহস্রার্ণমতীবাত্র মন্ত্র এষ প্রদর্শিতঃ .
এবমেতাং সমারূঢো হংসযোগবিচক্ষণঃ .. ৫..
ন ভিদ্যতে কর্মচারৈঃ পাপকোটিশতৈরপি .
আগ্নেযী প্রথমা মাত্রা বাযব্যেষা তথাপরা .. ৬..
ভানুমণ্ডলসংকাশা ভবেন্মাত্রা তথোত্তরা .
পরমা চার্ধমাত্রা যা বারুণীং তাং বিদুর্বুধাঃ .. ৭..
কালত্রযেঽপি যত্রেমা মাত্রা নূনং প্রতিষ্ঠিতাঃ .
এষ ওঙ্কার আখ্যাতো ধারণাভির্নিবোধত .. ৮..
ঘোষিণী প্রথমা মাত্রা বিদ্যুন্মাত্রা তথাঽপরা .
পতঙ্গিনী তৃতীযা স্যাচ্চতুর্থী বাযুবেগিনী .. ৯..
পঞ্চমী নামধেযা তু ষষ্ঠী চৈন্দ্র্যভিধীযতে .
সপ্তমী বৈষ্ণবী নাম অষ্টমী শাঙ্করীতি চ .. ১০..
নবমী মহতী নাম ধৃতিস্তু দশমী মতা .
একাদশী ভবেন্নারী ব্রাহ্মী তু দ্বাদশী পরা .. ১১..
প্রথমাযাং তু মাত্রাযাং যদি প্রাণৈর্বিযুজ্যতে .
ভরতে বর্ষরাজাসৌ সার্বভৌমঃ প্রজাযতে .. ১২..
দ্বিতীযাযাং সমুত্ক্রান্তো ভবেদ্যক্ষো মহাত্মবান্ .
বিদ্যাধরস্তৃতীযাযাং গান্ধর্বস্তু চতুর্থিকা .. ১৩..
পঞ্চম্যামথ মাত্রাযাং যদি প্রাণৈর্বিযুজ্যতে .
উষিতঃ সহ দেবত্বং সোমলোকে মহীযতে .. ১৪..
ষষ্ঠ্যামিন্দ্রস্য সাযুজ্যং সপ্তম্যাং বৈষ্ণবং পদম্ .
অষ্টম্যাং ব্রজতে রুদ্রং পশূনাং চ পতিং তথা .. ১৫..
নবম্যাং তু মহর্লোকং দশম্যাং তু জনং ব্রজেত্ .
একাদশ্যাং তপোলোকং দ্বাদশ্যাং ব্রহ্ম শাশ্বতম্ .. ১৬..
ততঃ পরতরং শুদ্ধং ব্যাপকং নির্মলং শিবম্ .
সদোদিতং পরং ব্রহ্ম জ্যোতিষামুদযো যতঃ .. ১৭..
অতীন্দ্রিযং গুণাতীতং মনো লীনং যদা ভবেত্ .
অনূপমং শিবং শান্তং যোগযুক্তং সদা বিশেত্ .. ১৮..
তদ্যুক্তস্তন্মযো জন্তুঃ শনৈর্মুঞ্চেত্কলেবরম্ .
সংস্থিতো যোগচারেণ সর্বসঙ্গবিবর্জিতঃ .. ১৯..
ততো বিলীনপাশোঽসৌ বিমলঃ কমলাপ্রভুঃ .
তেনৈব ব্রহ্মভাবেন পরমানন্দমশ্নুতে .. ২০..
আত্মানং সততং জ্ঞাত্বা কালং নয মহামতে .
প্রারব্ধমখিলং ভুঞ্জন্নোদ্বেগং কর্তুমর্হসি .. ২১..
উত্পন্নে তত্ত্ববিজ্ঞানে প্রারব্ধং নৈব মুঞ্চতি .
তত্ত্বজ্ঞানোদযাদূর্ধ্বং প্রারব্ধং নৈব বিদ্যতে .. ২২..
দেহাদীনামসত্ত্বাত্তু যথা স্বপ্নো বিবোধতঃ .
কর্ম জন্মান্তরীযং যত্প্রারব্ধমিতি কীর্তিতম্ .. ২৩..
তত্তু জন্মান্তরাভাবাত্পুংসো নৈবাস্তি কর্হিচিত্ .
স্বপ্নদেহো যথাধ্যস্তস্তথৈবাযং হি দেহকঃ .. ২৪..
অধ্যস্তস্য কুতো জন্ম জন্মাভাবে কুতঃ স্থিতিঃ .
উপাদানং প্রপঞ্চস্য মৃদ্ভাণ্ডস্যেব পশ্যতি .. ২৫..
অজ্ঞানং চেতি বেদান্তৈস্তস্মিন্নষ্টে ক্ব বিশ্বতা .
যথা রজ্জুঅং পরিত্যজ্য সর্পং গৃহ্ণাতি বৈ ভ্রমাত্ .. ২৬..
তদ্বত্সত্যমবিজ্ঞায জগত্পশ্যতি মূঢধীঃ .
রজ্জুখণ্ডে পরিজ্ঞাতে সর্পরূপং ন তিষ্ঠতি .. ২৭..
অধিষ্ঠানে তথা জ্ঞাতে প্রপঞ্চে শূন্যতাং গতে .
দেহস্যাপি প্রপঞ্চত্বাত্প্রারব্ধাবস্থিতিঃ কৃতঃ .. ২৮..
অজ্ঞানজনবোধার্থং প্রারব্ধমিতি চোচ্যতে .
ততঃ কালবশাদেব প্রারব্ধে তু ক্ষযং গতে .. ২৯..
ব্রহ্মপ্রণবসন্ধানং নাদো জ্যোতির্মযঃ শিবঃ .
স্বযমাবির্ভবেদাত্মা মেঘাপাযেংঽশুমানিব .. ৩০..
সিদ্ধাসনে স্থিতো যোগী মুদ্রাং সন্ধায বৈষ্ণবীম্ .
শৃণুযাদ্দক্ষিণে কর্ণে নাদমন্তর্গতং সদা .. ৩১..
অভ্যস্যমানো নাদোঽযং বাহ্যমাবৃণুতে ধ্বনিম্ .
পক্ষাদ্বিপক্ষমখিলং জিত্বা তুর্যপদং ব্রজেত্ .. ৩২..
শ্রূযতে প্রথমাভ্যাসে নাদো নানাবিধো মহান্ .
বর্ধমানস্তথাভ্যাসে শ্রূযতে সূক্ষ্মসূক্ষ্মতঃ .. ৩৩..
আদৌ জলধিমূতভেরীনির্ঝরসম্ভবঃ .
মধ্যে মর্দলশব্দাভো ঘণ্টাকাহলজস্তথা .. ৩৪..
অন্তে তু কিঙ্কিণীবংশবীণাভ্রমরনিঃস্বনঃ .
ইতি নানাবিধা নাদাঃ শ্রূযন্তে সূক্ষ্মসূক্ষ্মতঃ .. ৩৫..
মহতি শ্রূযমাণে তু মহাভের্যাদিকধ্বনৌ .
তত্র সূক্ষ্মং সূক্ষ্মতরং নাদমেব পরামৃশেত্ .. ৩৬..
ঘনমুত্সৃজ্য বা সূক্ষ্মে সূক্ষ্মমুত্সৃজ্য বা ঘনে .
রমমাণমপি ক্ষিপ্তং মনো নান্যত্র চালযেত্ .. ৩৭..
যত্র কুত্রাপি বা নাদে লগতি প্রথমং মনঃ .
তত্র তত্র স্থিরীভূত্বা তেন সার্ধং বিলীযতে .. ৩৮..
বিস্মৃত্য সকলং বাহ্যং নাদে দুগ্ধাম্বুবন্মনঃ .
একীভূযাথ সহসা চিদাকাশে বিলীযতে .. ৩৯..
উদাসীনস্ততো ভূত্বা সদাভ্যাসেন সংযমী .
উন্মনীকারকং সদ্যো নাদমেবাবধারযেত্ .. ৪০..
সর্বচিন্তাং সমুত্সৃজ্য সর্বচেষ্টাবিবর্জিতঃ .
নাদমেবানুসংদধ্যান্নাদে চিত্তং বিলীযতে .. ৪১..
মকরন্দং পিবন্ভৃঙ্গো গন্ধান্নাপেক্ষতে তথা .
নাদাসক্তং সদা চিত্তং বিষযং ন হি কাঙ্ক্ষতি .. ৪২..
বদ্ধঃ সুনাদগন্ধেন সদ্যঃ সংত্যক্তচাপলঃ .
নাদগ্রহণতশ্চিত্তমন্তরঙ্গভুজঙ্গমঃ .. ৪৩..
বিস্মৃত্য বিশ্বমেকাগ্রঃ কুত্রচিন্ন হি ধাবতি .
মনোমত্তগজেন্দ্রস্য বিষযোদ্যানচারিণঃ .. ৪৪..
নিযামনসমর্থোঽযং নিনাদো নিশিতাঙ্কুশঃ .
নাদোঽন্তরঙ্গসারঙ্গবন্ধনে বাগুরাযতে .. ৪৫..
অন্তরঙ্গসমুদ্রস্য রোধে বেলাযতেঽপি চ .
ব্রহ্মপ্রণবসংলগ্ননাদো জ্যোতির্মযাত্মকঃ .. ৪৬..
মনস্তত্র লযং যাতি তদ্বিষ্ণোঃ পরমং পদম্ .
তাবদাকাশসঙ্কল্পো যাবচ্ছব্দঃ প্রবততে .. ৪৭..
নিঃশব্দং তত্পরং ব্রহ্ম পরমাত্মা সমীর্যতে .
নাদো যাবন্মনস্তাবন্নাদান্তেঽপি মনোন্মনী .. ৪৮..
সশব্দশ্চাক্ষরে ক্ষীণে নিঃশব্দং পরমং পদম্ .
সদা নাদানুসন্ধানাত্সংক্ষীণা বাসনা ভবেত্ .. ৪৯..
নিরঞ্জনে বিলীযেতে মনোবাযূ ন সংশযঃ .
নাদকোটিসহস্রাণি বিন্দুকোটিশতানি চ .. ৫০..
সর্বে তত্র লযং যান্তি ব্রহ্মপ্রণবনাদকে .
সর্বাবস্থাবিনির্মুক্তঃ সর্বচিন্তাবিবর্জিতঃ .. ৫১..
মৃতবত্তিষ্ঠতে যোগী স মুক্তো নাত্র সংশযঃ .
শঙ্খদুন্দুভিনাদং চ ন শ্রুণোতি কদাচন .. ৫২..
কাষ্ঠবজ্জ্ঞাযতে দেহ উন্মন্যাবস্থযা ধ্রুবম্ .
ন জানাতি স শীতোষ্ণং ন দুঃখং ন সুখং তথা .. ৫৩..
ন মানং নাবমানং চ সংত্যক্ত্বা তু সমাধিনা .
অবস্থাত্রযমন্বেতি ন চিত্তং যোগিনঃ সদা .. ৫৪..
জাগ্রন্নিদ্রাবিনির্মুক্তঃ স্বরূপাবস্থতামিযাত্ .. ৫৫..
দৃষ্টিঃ স্থিরা যস্য বিনা সদৃশ্যম্
       বাযুঃ স্থিরো যস্য বিনা প্রযত্নম্ .
চিত্তং স্থিরং যস্য বিনাবলম্বম্
       স ব্রহ্মতারান্তরনাদরূপঃ .. ৫৬..
ইত্যুপনিষত্ ..
ॐ বাঙ্মে মনসীতি শান্তিঃ ..

ইতি নাদবিন্দূপনিষত্সমাপ্তা ..