ধ্যানবিন্দূ

.. ধ্যানবিন্দূপনিষত্ ..

ধ্যাত্বা যদ্ব্রহ্মমাত্রং তে স্বাবশেষধিযা যযুঃ .
যোগতত্ত্বজ্ঞানফলং তত্স্বমাত্রং বিচিন্তযে ..
ॐ সহ নাববতু .. সহ নৌ ভুনক্তু ..
সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
যদি শৈলসমং পাপং বিস্তীর্ণং বহুযোজনম্ .
ভিদ্যতে ধ্যানযোগেন নান্যো ভেদো কদাচন .. ১..
বীজাক্ষরং পরং বিন্দুং নাদো তস্যোপরি স্থিতম্ .
সশব্দং চাক্ষরে ক্ষীণে নিঃশব্দং পরমং পদম্ .. ২..
অনাহতং তু যচ্ছব্দং তস্য শব্দস্য যত্পরম্ .
তত্পরং বিন্দতে যস্তু স যোগী ছিন্নসংশযঃ .. ৩..
বালাগ্রশতসাহস্রং তস্য ভাগস্য ভাগিনঃ .
তস্য ভাগস্য ভাগার্ধং তত্ক্ষযে তু নিরঞ্জনম্ .. ৪..
পুষ্পমধ্যে যথা গন্ধঃ পযোমধ্যে যথা ঘৃতম্ .
তিলমধ্যে যথা তৈলং পাষাণাষ্বিব কাঞ্চনম্ .. ৫..
এবং সর্বাণি ভূতানি মণৌ সূত্র ইবাত্মনি .
স্থিরবুদ্ধিরসংমূঢো ব্রহ্মবিদ্ব্রহ্মণিস্থিতঃ .. ৬..
তিলানাং তু যথা তৈলং পুষ্পে গন্ধ ইবাশ্রিতঃ .
পুরুষস্য শরীরে তু সবাহ্যাভ্যন্তরে স্থিতঃ .. ৭..
বৃক্ষং তু সকলং বিদ্যাচ্ছাযা তস্যৈব নিষ্কলা .
সকলে নিষ্কলে ভাবে সর্বত্রাত্মা ব্যবস্থিতঃ .. ৮..
ওমিত্যেকাক্ষরং ব্রহ্ম ধ্যেযং সর্বমুমুক্ষিভিঃ .
পৃথিব্যগ্নিশ্চ ঋগ্বেদো ভূরিত্যেব পিতামহঃ .. ৯..
অকারে তু লযং প্রাপ্তে প্রথমে প্রণবাংশকে .
অন্তরিক্ষং যজুর্বাযুর্ভুবো বিষ্ণুর্জনার্দনঃ .. ১০..
উকারে তু লযং প্রাপ্তে দ্বিতীযে প্রণবাংশকে .
দ্যৌঃ সূর্যঃ সামবেদশ্চ স্বরিত্যেব মহেশ্বরঃ .. ১১..
মকারে তু লযং প্রাপ্তে তৃতীযে প্রণবাংশকে .
অকারঃ পীতবর্ণঃ  স্যাদ্রজোগুণ উদীরিতঃ .. ১২..
উকারঃ সাত্ত্বিকঃ শুক্লো মকারঃ কৃষ্ণতামসঃ .
অষ্টাঙ্গং চ চতুষ্পাদং ত্রিস্থানং পঞ্চদৈবতম্ .. ১৩..
ওঙ্কারং যো ন জানাতি ব্রহ্মণো ন ভবেত্তু সঃ .
প্রণবো ধনুঃ শরো হ্যাত্মা ব্রহ্ম তল্লক্ষ্যমুচ্যতে .. ১৪..
অপ্রমত্তেন বেদ্ধব্যং শরবত্তন্মযো ভবেত্ .
নিবর্তন্তে ক্রিযাঃ সর্বাস্তস্মিন্দৃষ্টে পরাবরে .. ১৫..
ওঙ্কারপ্রভবা দেবা ওঙ্কারপ্রভবাঃ স্বরাঃ .
ওঙ্কারপ্রভবং সর্বং ত্রৈলোক্যং সচরাচরম্ .. ১৬..
হ্রস্বো দহতি পাপানি দীর্ঘঃ সম্পত্প্রদোঽব্যযঃ .
অর্ধমাত্রা সমাযুক্তঃ প্রণবো মোক্ষদাযকঃ .. ১৭..
তৈলধারামিবাচ্ছিন্নং দীর্ঘঘণ্টানিনাদবত্ .
অবাচ্যং প্রণবস্যাগ্রং যস্তং বেদ স বেদবিত্ .. ১৮..
হৃত্পদ্মকর্ণিকামধ্যে স্থিরদীপনিভাকৃতিম্ .
অঙ্গুষ্ঠমাত্রমচলং ধ্যাযেদোঙ্কারমীশ্বরম্ .. ১৯..
ইডযা বাযুমাপুর্য পূরযিত্বোদরস্থিতম্ .
ওঙ্কারং দেহমধ্যস্থং ধ্যাযেজ্জ্বালবলীবৃতম্ .. ২০..
ব্রহ্মা পূরক ইত্যুক্তো বিষ্ণুঃ কুম্ভক উচ্যতে .
রেচো রুদ্র ইতি প্রোক্তঃ প্রাণাযামস্য দেবতাঃ .. ২১..
আত্মানমরণিং কৃত্বা প্রণবং চোত্তরারণিম্ .
ধ্যাননির্মথনাভ্যাসাদেব পশ্যেন্নিগূঢবত্ .. ২২..
ওঙ্কারধ্বনিনাদেন বাযোঃ সংহরণান্তিকম্ .
যাবদ্বলং সমাদধ্যাত্সম্যঙ্নাদলযাবধি .. ২৩..
গমাগমস্থং গমনাদিশূন্য-
           মোঙ্কারমেকং রবিকোটিদীপ্তিম্ .
পশ্যন্তি যে সর্বজনান্তরস্থং
           হংসাত্মকং তে বিরজা ভবন্তি .. ২৪..
যন্মনস্ত্রিজগত্সৃষ্টিস্থিতিব্যসনকর্মকৃত্ .
তন্মনো বিলযং যাতি তদ্বিষ্ণোঃ পরমং পদম্ .. ২৫..
অষ্টপত্রং তু হৃত্পদ্মং দ্বাত্রিংশত্কেসরান্বিতম্ .
তস্য মধ্যে স্থিতো ভানুর্ভানুমধ্যগতঃ শশী .. ২৬..
শশিমধ্যগতো বহ্নির্বহ্নিমধ্যগতা প্রভা .
প্রভামধ্যগতং পীঠং নানারত্নপ্রবেষ্টিতম্ .. ২৭..
তস্য মধ্যগতং দেবং বাসুদেবং নিরঞ্জনম্ .
শ্রীবত্সকৌস্তুভোরস্কং মুক্তামণিবিভূষিতম্ .. ২৮..
শুদ্ধস্ফটিকসংকাশং চন্দ্রকোটিসমপ্রভম্ .
এবং ধ্যাযেন্মহাবিষ্ণুমেবং বা বিনযান্বিতঃ .. ২৯..
অতসীপুষ্পসংকাশং নাভিস্থানে প্রতিষ্ঠিতম্ .
চতুর্ভুজং মহাবিষ্ণুং পূরকেণ বিচিন্তযেত্ .. ৩০..
কুম্ভকেন হৃদিস্থানে চিন্তযেত্কমলাসনম্ .
ব্রহ্মাণং রক্তগৌরাভং চতুর্বক্ত্রং পিতামহম্ .. ৩১..
রেচকেন তু বিদ্যাত্মা ললাটস্থং ত্রিলোচনম্ .
শুদ্ধস্ফটিকসংকাশং নিষ্কলং পাপনাশনম্ .. ৩২..
অঞ্জপত্রমধঃপুষ্পমূর্ধ্বনালমধোমুখম্ .
কদলীপুষ্পসংকাশং সর্ববেদমযং শিবম্ .. ৩৩..
শতারং শতপত্রাঢ্যং বিকীর্ণাম্বুজকর্ণিকম্ .
তত্রার্কচন্দ্রবহ্নীনামুপর্যুপরি চিন্তযেত্ .. ৩৪..
পদ্মস্যোদ্ঘাটনং কৃত্বা বোধচন্দ্রাগ্নিসূর্যকম্ .
তস্য হৃদ্বীজমাহৃত্য আত্মানং চরতে ধ্রুবম্ .. ৩৫..
ত্রিস্থানং চ ত্রিমাত্রং চ ত্রিব্রহ্ম চ ত্রযাক্ষরম্ .
ত্রিমাত্রমর্ধমাত্রং বা যস্তং বেদ স বেদবিত্ .. ৩৬..
তৈলধারমিবাচ্ছিন্নদীর্ঘঘণ্টানিনাদবত্ .
বিন্দুনাদকলাতীতং যস্তং বেদ স বেদবিত্ .. ৩৭..
যথৈবত্পলনালেন তোযমাকর্ষযেন্নরঃ .
তথৈবওত্কর্ষযেদ্বাযুং যোগী যোগপথে স্থিতঃ .. ৩৮..
অর্ধমাত্রাত্মকং কৃত্বা কোশীভূতং তু পঙ্কজম্ .
কর্ষযেন্নলমাত্রেণ ভ্রুবোর্মধ্যে লযং নযেত্ .. ৩৯..
ভ্রুবোর্মধ্যে ললাটে তু নাসিকাযাস্তু মূলতঃ .
জানীযাদমৃতং স্থানং তদ্ব্রহ্মাযতনং মহত্ .. ৪০..
আসনং প্রাণসংরোধঃ প্রত্যাহারশ্চ ধারণা .
ধ্যানং সমাধিরেতানি যোগাঙ্গানি ভবন্তি ষট্ .. ৪১..
আসনানি চ তাবন্তি যাবন্ত্যো জীবজাতযঃ .
এতেষানতুলান্ভেদান্বিজানাতি মহেশ্বরঃ .. ৪২..
ছিদ্রং ভদ্রং তথা সিংহং পদ্মং চেতি চতুষ্টযম্ .
আধারং প্রথমং চক্রং স্বাধিষ্ঠানং দ্বিতীযকম্ .. ৪৩..
যোনিস্থানং তযোর্মধ্যে কামরূপং নিগদ্যতে .
আধারাখ্যে গুদস্থানে পঙ্কজং যচ্চতুর্দলম্ .. ৪৪..
তন্মধ্যে প্রোচ্যতে যোনিঃ কামাখ্যা সিদ্ধবন্দিতা .
যোনিমধ্যে স্থিতং লিঙ্গং পশ্চিমাভিমুখং তথা .. ৪৫..
মস্তকে মণিবদ্ভিন্নং যো জানাতি স যোগবিত্ .
তপ্তচামীকরাকারং তডিল্লেখেব বিস্ফুরত্ .. ৪৬..
চতুরস্রমুপর্যগ্নেরধো মেঢ্রাত্প্রতিষ্ঠিতম্ .
স্বশব্দেন ভবেত্প্রাণঃ স্বাধিষ্ঠানং তদাশ্রযম্ .. ৪৭..
স্বাধিষ্ঠানং ততশ্চক্রং মেঢ্রমেব নিগদ্যতে .
মণিবত্তন্তুনা যত্র বাযুনা পূরিতং বপুঃ .. ৪৮..
তন্নাভিমণ্ডলং চক্রং প্রোচ্যতে মণিপূরকম্ .
দ্বাদশারমহাচক্রে পুণ্যপাপনিযন্ত্রিতঃ .. ৪৯..
তাবজ্জীবো ভ্রমত্যেবং যাবত্তত্ত্বং ন বিন্দতি .
ঊর্ধ্বং মেঢ্রাদথো নাভেঃ কন্দো যোঽস্তি খগাণ্ডবত্ .. ৫০..
তত্র নাড্যঃ সমুত্পন্নাঃ সহস্রাণি দ্বিসপ্ততিঃ .
তেষু নাডীসহস্রেষু দ্বিসপ্ততিরুদাহৃতাঃ .. ৫১..
প্রধানাঃ প্রাণবাহিন্যো ভূযস্তত্র দশ স্মৃতাঃ .
ইডা চ পিঙ্গলা চৈব সুষুম্না চ তৃতীযকা .. ৫২..
গান্ধারী হস্তিজিহ্বা চ পূষা চৈব যশস্বিনি .
অলম্বুসা কুহূরত্র শঙ্খিনী দশমী স্মৃতা .. ৫৩..
এবং নাডীমযং চক্রং বিজ্ঞেযং যোগিনা সদা .
সততং প্রাণবাহিন্যঃ সোম সূর্যাগ্নিদেবতাঃ .. ৫৪..
ইডাপিঙ্গলাসুষুম্নাস্তিস্রো নাড্যঃ প্রকীর্তিতাঃ .
ইডা বামে স্থিতা ভাগে পিঙ্গলা দক্ষিণে স্থিতা .. ৫৫..
সুষুম্না মধ্যদেশে তু প্রাণমার্গাস্ত্রযঃ স্মৃতাঃ .
প্রাণোঽপানঃ সমানশ্চোদানো ব্যানস্তথৈব চ .. ৫৬..
নাগঃ কূর্মঃ কৃকরকো দেবদত্তো ধনঞ্জযঃ .
প্রাণাদ্যাঃ পঞ্চ বিখ্যাতা নাগাদ্যাঃ পঞ্চ বাযবঃ .. ৫৭..
এতে নাডীসহস্রেষু বর্তন্তে জীবরূপিণঃ .
প্রাণাপানবশো জীবো হ্যধশ্চোর্ধ্বং প্রধাবতি .. ৫৮..
বামদক্ষিণমার্গেণ চঞ্চলত্বান্ন দৃশ্যতে .
আক্ষিপ্তো ভুজদণ্ডেন যথোচ্চলতি কন্দুকঃ .. ৫৯..
প্রাণাপানসমাক্ষিপ্তস্তদ্বজ্জীবো ন বিশ্রমেত্ .
অপানাত্কর্ষতি প্রাণোঽপানঃ প্রাণাচ্চ কর্ষতি .. ৬০..
খগরজ্জুবদিত্যেতদ্যো জানাতি স যোগবিত্ .
হকারেণ বহির্যাতি সকারেণ বিশেত্পুনঃ .. ৬১..
হংসহংসেত্যমং মন্ত্রং জীবো জপতি সর্বদা .
শতানি ষট্দিবারাত্রং সহস্রাণেকবিংশতিঃ .. ৬২..
এতন্সঙ্খ্যান্বিতং মন্ত্রং জীবো জপতি সর্বদা .
অজপা নাম গাযত্রী যোগিনাং মোক্ষদা সদা .. ৬৩..
অস্যাঃ সঙ্কল্পমাত্রেণ নরঃ পাপৈঃ প্রমুচ্যতে .
অনযা সদৃশী বিদ্যা অনযা সদৃশো জপঃ .. ৬৪..
অনযা সদৃশং পুণ্যং ন ভূতং ন ভবিষ্যতি .
যেন মার্গেণ গন্তব্যং ব্রহ্মস্থানং নিরামযম্ .. ৬৫..
মুখেনাচ্ছাদ্য তদ্দ্বারং প্রসুপ্তা পরমেশ্বরী .
প্রবুদ্ধা বহ্নিযোগেন মনসা মরুতা সহ .. ৬৬..
সূচিবদ্গুণমাদায ব্রজত্যূর্ধ্বং সুষুম্নযা .
উদ্ঘাটযেত্কপাটং তু যথা কুঞ্চিকযা হঠাত্ .. ৬৭..
কুণ্ডলিন্যা তযা যোগী মোক্ষদ্বারং বিভেদযেত্ .. ৬৮..
কৃত্বা সংপুটিতৌ করৌ দৃঢতরং বধ্বাথ পদ্মাসনম্ .
গাঢং বক্ষসি সন্নিধায চুবুকং ধ্যানং চ তচ্চেতসি ..
বারংবারমমপাতমূর্ধ্বমনিলং প্রোচ্চারযন্পূরিতম্ .
মুঞ্চন্প্রাণমুপৈতি বোধমতুলং শক্তিপ্রভাবান্নরঃ .. ৬৯..
পদ্মাসনস্থিতো যোগী নাডীদ্বারেষু পূরযন্ .
মারুতং কুম্ভযন্যস্তু স মুক্তো নাত্র সংশযঃ .. ৭০..
অঙ্গানাং মর্দনং কৃত্বা শ্রমজাতেন বারিণা .
কট্বম্ললবণত্যাগী ক্ষীরপানরতঃ সুখী .. ৭১..
ব্রহ্মচারী মিতাহারী যোগী যোগপরাযণঃ .
অব্দাদূর্ধ্বং ভবেত্সিদ্ধো নাত্র কার্যাং বিচারণা .. ৭২..
কন্দোর্ধ্বকুণ্ডলী শক্তিঃ স যোগী সিদ্ধিভাজনম্ .
অপানপ্রাণযোরৈক্যং ক্ষযন্মূত্রপুরীষযোঃ .. ৭৩..
যুবা ভবতি বৃদ্ধোঽপি সততং মূলবন্ধনাত্ .
পার্ষ্ণিভাগেন সংপীড্য যোনিমাকুঞ্চযেদ্গুদম্ .. ৭৪..
অপানমূর্ধ্বমুত্কৃষ্য মূলবন্ধোঽযমুচ্যতে .
উড্যাণং কুরুতে যস্মাদবিশ্রান্তমহাখগঃ .. ৭৫..
উড্ডিযাণং তদেব স্যাত্তত্র বন্ধো বিধীযতে .
উদরে পশ্চিমং তাণং নাভেরূর্ধ্বং তু কারযেত্ .. ৭৬..
উড্ডিযাণোঽপ্যযং বন্ধো মৃত্যুমাতঙ্গকেসরী .
বধ্নাতি হি শিরোজাতমধোগামিনভোজলম্ .. ৭৭..
ততো জালন্ধরো বন্ধঃ কর্মদুঃখৌঘনাশনঃ .
জালন্ধরে কৃতে বন্ধে কর্ণসংকোচলক্ষণে .. ৭৮..
ন পীযূষং পতত্যগ্নৌ ন চ বাযুঃ প্রধাবতি .
কপালকুহরে জিহ্বা প্রবিষ্টা বিপরীতগা .. ৭৯..
ভ্রুবোরন্তর্গতা দৃষ্টির্মুদ্রা ভবতি খেচরী .
ন রোগো মরণং তস্য ন নিদ্রা ন ক্ষুধা তৃষা .. ৮০..
ন চ মূর্চ্ছা ভবেত্তস্য যো মুদ্রাং বেত্তি খেচরীম্ .
পীড্যতে ন চ রোগেণ লিপ্যতে ন চ কর্মণা .. ৮১..
বধ্যতে ন চ কালেন যস্য মুদ্রস্তি খেচরী .
চিত্তং চরতি খে যস্মাজ্জিহ্বা ভবতি খেগতা .. ৮২..
তেনৈষা খেচরী নাম মুদ্রা সিদ্ধনমস্কৃতা .
খেচর্যা মুদ্রযা যস্য বিবরং লম্বিকোর্ধ্বতঃ .. ৮৩..
বিন্দুঃ ক্ষরতি নো যস্য কামিন্যালিঙ্গিতস্য চ .
যাবদ্বিন্দুঃ স্থিতো দেহে তাবন্মৃত্যুভযং কুতঃ .. ৮৪..
যাবদ্বদ্ধা নভোমুদ্রা তাবদ্বিন্দুর্ন গচ্ছতি .
গলিতোঽপি যদা বিন্দুঃ সংপ্রাপ্তো যোনিমণ্ডলে .. ৮৫..
ব্রজত্যূর্ধ্বং হঠাচ্ছক্ত্যা নিবদ্ধো যোনিমুদ্রযা .
স এব দ্বিবিধো বিন্দুঃ পাণ্ডরো লোহিতস্তথা .. ৮৬..
পাণ্ডরং শুক্রমিত্যাহুর্লোহিতাখ্যং মহারজঃ .
বিদ্রুমদ্রুমসংকাশং যোনিস্থানে স্থিতং রজঃ .. ৮৭..
শশিস্থানে বসেদ্বিন্দুঃস্তযোরৈক্যং সুদুর্লভম্ .
বিন্দুঃ শিবো রজঃ শক্তির্বিন্দুরিন্দূ রজো রবিঃ .. ৮৮..
উভযওঃ সঙ্গমাদেব প্রাপ্যতে পরমং বপুঃ .
বাযুনা শক্তিচালেন প্রেরিতং খে যথা রজঃ .. ৮৯..
রবিণৈকত্বমাযাতি ভবেদ্দিব্যং বপুস্তদা .
শুক্লং চন্দ্রেণ সংযুক্তং রজঃ সূর্যসমন্বিতম্ .. ৯০..
দ্বযোঃ সমরসীভাবং যো জানাতি স যোগবিত্ .
শোধনং মলজালানাং ঘটনং চন্দ্রসূর্যযোঃ .. ৯১..
রসানাং শোষণং সম্যঙ্মহামুদ্রাভিধীযতে .. ৯২..
বক্ষোন্যস্তহনুর্নিপীড্য সুষিরং যোনেশ্চ বামাঙ্ঘ্রিণা
হস্তাভ্যামনুধারযন্প্রবিততং পাদং তথা দক্ষিণম্ ..
আপূর্য শ্বসনেন কুক্ষিযুগলং বধ্বা শনৈরেচযে-
দেষা পাতকনাশিনী ননু মহামুদ্রা নৃণাং প্রোচ্যতে .. ৯৩..
অথাত্মনির্ণযং ব্যাখ্যাস্যে ..
হৃদিস্থানে অষ্টদলপদ্মং বর্ততে তন্মধ্যে রেখাবলযং
কৃত্বা জীবাত্মরূপং জ্যোতীরূপমণুমাত্রং বর্ততে তস্মিন্সর্বং
প্রতিষ্ঠিতং ভবতি সর্বং জানাতি সর্বং করোতি সর্বমেতচ্চরিতমহং
কর্তাঽহং ভোক্তা সুখী দুঃখী কাণঃ খঞ্জো বধিরো মূকঃ কৃশঃ
স্থূলোঽনেন প্রকারেণ স্বতন্ত্রবাদেন বর্ততে ..
পূর্বদলে বিশ্রমতে পূর্বং দলং শ্বেতবর্ণং তদা ভক্তিপুরঃসরং
ধর্মে মতির্ভবতি ..
যদাঽগ্নেযদলে বিশ্রমতে তদাগ্নেযদলং রক্তবর্ণং তদা নিদ্রালস্য
মতির্ভবতি ..
যদা দক্ষিণদলে বিশ্রমতে তদ্দক্ষিণদলং কৃষ্ণবর্ণং তদা
দ্বেষকোপমতির্ভবতি ..
যদা নৈরৃতদলে বিশ্রমতে তন্নৈরৃতদলং নীলবর্ণং তদা
পাপকর্মহিংসামতির্ভবতি ..
যদা পশ্চিমদলে বিশ্রমতে তত্পশ্চিমদলং স্ফটিকবর্ণং তদা
ক্রীডাবিনোদে মতির্ভবতি ..
যদা বাযব্যদলে বিশ্রমতে বাযব্যদলং মাণিক্যবর্ণং তদা
গমনচলনবৈরাগ্যমতির্ভবতি ..
যদোত্তরদলে বিশ্রমতে তদুত্তরদলং পীতবর্ণং তদা সুখশৃঙ্গার-
মতির্ভবতি ..
যদেশানদলে বিশ্রমতে তদীশানদলং বৈডূর্যবর্ণং তদা
দানাদিকৃপামতির্ভবতি ..
যদা সন্ধিসন্ধিষু মতির্ভবতি তদা বাতপিত্তশ্লেষ্মমহাব্যাধি-
প্রকোপো ভবতি ..
যদা মধ্যে তিষ্ঠতি তদা সর্বং জানাতি গাযতি নৃত্যতি পঠত্যানন্দং
করোতি ..
যদা নেত্রশ্রমো ভবতি শ্রমনির্ভরণার্থং প্রথমরেখাবলযং
কৃত্বা মধ্যে নিমজ্জনং কুরুতে প্রথমরেখাবন্ধূকপুষ্পবর্ণং
তদা নিদ্রাবস্থা ভবতি ..
নিদ্রাবস্থামধ্যে স্বপ্নাবস্থা ভবতি ..
স্বপ্নাবস্থামধ্যে দৃষ্টং শ্রুতমনুমানসংভববার্তা
ইত্যাদিকল্পনাং করোতি তদাদিশ্রমো ভবতি ..
শ্রমনির্হরণার্থং দ্বিতীযরেখাবলযং কৃত্বা মধ্যে
নিমজ্জনং কুরুতে দ্বিতীযরেখা ইন্দ্রকোপবর্ণং তদা
সুষুপ্ত্যবস্থা ভবতি সুষুপ্তৌ কেবলপরমেশ্বরসম্বন্ধিনী
বুদ্দির্ভবতি নিত্যবোধস্বরূপা ভবতি পশ্চাত্পরমেশ্বর-
স্বরূপেণ প্রাপ্তির্ভবতি ..
তৃতীযরেখাবলযং কৃত্বা মধ্যে নিমজ্জনং কুরুতে তৃতীযরেখা
পদ্মরাগবর্ণং তদা তুরীযাবস্থা ভবতি তুরীযে কেবলপরমাত্ম-
সম্বন্ধিনী ভবতি নিত্যবোধস্বরূপা ভবতি তদা শনৈঃ
শনৈরুপরমেদ্বুদ্ধ্যা ধৃতিগৃহীতযাত্মসংস্থং মনঃ
কৃত্বা ন কিঞ্চিদপি চিন্তযেত্তদা প্রাণাপানযোরৈক্যং কৃত্বা
সর্বং বিশ্বমাত্মস্বরূপেণ লক্ষ্যং ধারযতি . যদা
তুরীযাতীতাবস্থা তদা সর্বেষামানন্দস্বরূপো ভবতি
দ্বন্দ্বাতীতো ভবতি যাবদ্দেহধারণা বর্ততে তাবত্তিষ্ঠতি
পশ্চাত্পরমাত্মস্বরূপেণ প্রাপ্তির্ভবতি ইত্যনেন প্রকারেণ
মোক্ষো ভবতীদমেবাত্মদর্শনোপাযং ভবন্তি ..
চতুষ্পথসমাযুক্তমহাদ্বারগবাযুনা .
সহ স্থিতত্রিকোণার্ধগমনে দৃশ্যতেঽচ্যুতঃ .. ৯৪..
পূর্বোক্তত্রিকোণস্থানাদুপরি পৃথিব্যাদিপঞ্চবর্ণকং ধ্যেযম্ .
প্রাণাদিপঞ্চবাযুশ্চ বীজং বর্ণং চ স্থানকম্ .
যকারং প্রাণবীজং চ নীলজীমূতসন্নিভম্ .
রকারমগ্নিবীজং চ অপানাদিত্যসংনিভম্ .. ৯৫..
লকারং পৃথিবীরূপং ব্যানং বন্ধূকসংনিভম্ .
বকারং জীববীজং চ উদানং শঙ্খবর্ণকম্ .. ৯৬..
হকারং বিযত্স্বরূপং চ সমানং স্ফটিকপ্রভম্ .
হৃন্নাভিনাসাকর্ণং চ পাদাঙ্গুষ্ঠাদিসংস্থিতম্ .. ৯৭..
দ্বিসপ্ততিসহস্রাণি নাডীমার্গেষু বর্ততে .
অষ্টাবিংশতিকোটীষু রোমকূপেষু সংস্থিতাঃ .. ৯৮..
সমানপ্রাণ একস্তু জীবঃ স এক এব হি .
রেচকাদি ত্রযং কুর্যাদ্দৃঢচিত্তঃ সমাহিতঃ .. ৯৯..
শনৈঃ সমস্তমাকৃষ্য হৃত্সরোরুহকোটরে .
প্রাণাপানৌ চ বধ্বা তু প্রণবেন সমুচ্চরেত্ .. ১০০..
কর্ণসঙ্কোচনং কৃত্বা লিঙ্গসঙ্কোচনং তথা .
মূলাধারাত্সুষুম্না চ পদ্মতন্তুনিভা শুভা .. ১০১..
অমূর্তো বর্ততে নাদো বীণাদণ্ডসমুত্থিতঃ .
শঙ্খনাদিভিশ্চৈব মধ্যমেব ধ্বনির্যথা .. ১০২..
ব্যোমরন্ধ্রগতো নাদো মাযূরং নাদমেব চ .
কপালকুহরে মধ্যে চতুর্দ্বারস্য মধ্যমে .. ১০৩..
তদাত্মা রাজতে তত্র যথা ব্যোম্নি দিবাকরঃ .
কোদণ্ডদ্বযমধ্যে তু ব্রহ্মরন্ধ্রেষু শক্তিতঃ .. ১০৪..
স্বাত্মানং পুরুষং পশ্যেন্মনস্তত্র লযং গতম্ .
রত্নানি জ্যোত্স্নিনাদং তু বিন্দুমাহেশ্বরং পদম্ .
য এবং বেদ পুরুষঃ স কৈবল্যং সমশ্নুত ইত্যুপনিষত্ .. ১০৫..
ॐ সহ নাববতু .. সহ নৌ ভুনক্তু ..
সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
ইতি ধ্যানবিন্দূপনিষত্সমাপ্তা ..