ত্রিপুরাতাপিনি

.. ত্রিপুরাতাপিন্যুপনিষত্ ..

ত্রিপুরাতাপিনীবিদ্যাবেদ্যচিচ্ছক্তিবিগ্রহম্ .
বস্তুতশ্চিন্মাত্ররূপং পরং তত্ত্বং ভজাম্যহম্ ..
ॐ ভদ্রং কর্ণেভিঃ শৃণুযাম দেবাঃ .. ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ .. ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .. স্বস্তি নঃ পূষা বিশ্ববেদাঃ ..
স্বস্তি নস্তার্ক্ষ্যো অরিষ্টনেমিঃ .. স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
হরিঃ ॐ .. অথৈতস্মিন্নন্তরে ভগবান্প্রাজাপত্যং বৈষ্ণবং বিলযকারণং
রূপমাশ্রিত্য ত্রিপুরাভিধা ভগবতীত্যেবমাদিশক্ত্যা ভূর্ভুবঃ স্বস্ত্রীণি
স্বর্গভূপাতালানি ত্রিপুরাণি হরমাযাত্মকেন হীঙ্কারেণ হৃল্লেখাখ্যা
ভগবতী ত্রিকূটাবসানে নিলযে বিলযে ধাম্নি মহসা ঘোরেণ প্রাপ্নোতি . সৈবেযং
ভগবতী ত্রিপুরেতি ব্যাপঠ্যতে . তত্সবিতুর্বরেণ্যং ভর্গো দেবস্য ধীমহি . ধিযো যো
নঃ প্রচোদযাত্ পরো রজসে সাবদোম্ . জাতবেদসে সুনবাম সোমমরাতীযতো
নিদহাতি বেদ . স নঃ পর্ষদতি দুর্গাণি বিশ্বা নাবেব সিন্ধুং দুরিতাত্যগ্নিঃ .
ত্র্যম্বকং যজামহে সুগন্ধিং পুষ্টিবর্ধনম্ . উর্বারুকমিব বন্ধনা-
ন্মৃত্যোর্মুক্ষীয মামৃতাত্ . শতাক্ষরী পরমা বিদ্যা ত্রযীমযী সাষ্টার্ণা
ত্রিপুরা পরমেশ্বরী . আদ্যানি চত্বারি পদানি পরব্রহ্মবিকাসীনি . দ্বিতীযানি
শক্ত্যাখ্যানি . তৃতীযানি শৈবানি . তত্র লোকা বেদাঃ শাস্ত্রাণি পুরাণানি
ধর্মাণি বৈ চিকিত্সিতানি জ্যোতীংষি শিবশক্তিযোগাদিত্যেবং ঘটনা ব্যাপঠ্যতে .
অথৈতস্য পরং গহ্বরং ব্যাখ্যাস্যামো মহামনুসমুদ্ভবং তদিতি . ব্রহ্ম
শাশ্বতম্ . পরো ভগবান্নির্লক্ষণো নিরঞ্জনো নিরুপাধিরাধিরহিতো দেবঃ .
উন্মীলতে পশ্যতি বিকাসতে চৈতন্যভাবং কামযত ইতি . স একো দেবঃ শিবরূপী
দৃশ্যত্বেন বিকাসতে যতিষু যজ্ঞেষু যোগিষু কামযতে .
কামং জাযতে স এষ নিরঞ্জনোঽকামত্বেনোজ্জৃম্ভতে .
অকচটতপযশান্সৃজতে . তস্মাদীশ্বরঃ কামোঽভিধীযতে .
তত্পরিভাষযা কামঃ ককারং ব্যাপ্নোতি . কাম এবেদং
তত্তদিতি ককারো গৃহ্যতে . ভস্মাত্তত্পদার্থ ইতি য এবং বেদ .
সবিতুর্বরেণ্যমিতি ষূঙ্ প্রাণিপ্রসবে সবিতা প্রাণিনঃ সূতে
প্রসূতে শক্তিম্ . সূতে ত্রিপুরা শক্তিরাদ্যেযং ত্রিপুরা
পরমেশ্বরী মহাকুণ্ডলিনী দেবী . জাতবেদসমণ্ডলং যোঽধীতে
সর্বং ব্যাপ্যতে . ত্রিকোণশক্তিরেকারেণ মহাভাগেন প্রসূতে .
তস্মাদেকার এব গৃহ্যতে . বরেণ্যং শ্রেষ্ঠং ভজনীযমক্ষরং
নমস্কার্যম্ . তস্মাদ্বরেণ্যমেকারাক্ষরং গৃহ্যত ইতি
য এবং বেদ . ভর্গো দেবস্য ধীমহীত্যেবং ব্যাখ্যাস্যামঃ .
ধকারো ধারণা . ধিযৈব ধার্যতে ভগবান্পরমেশ্বরঃ .
ভর্গো দেবো মধ্যবর্তি তুরীযমক্ষরং সাক্ষাত্তুরীযং সর্বং
সর্বান্তর্ভূতম্ . তুরীযাক্ষরমীকারং পদানাং
মধ্যবর্তীত্যেবং ব্যাখ্যাতং ভর্গোরূপং ব্যাচক্ষতে .
তস্মাদ্ভর্গো দেবস্য ধীমহীত্যেবমীকারাক্ষরং গৃহ্যতে .
মহীত্যস্য ব্যাখ্যানং মহত্ত্বং জডত্বং কাঠিন্যং বিদ্যতে
যস্মিন্নক্ষতেরেতন্মহি লকারঃ পরং ধাম . কাঠিন্যাঢ্যং
সসাগরং সপর্বতং স সপ্তদ্বীপং সকাননমুজ্জ্বলদ্রূপং
মণ্ডলমেবোক্তং লকারেণ .
পৃথ্বী দেবী মহীত্যনেন ব্যাচক্ষতে . ধিযো যো নঃ প্রচোদযাত্ .
পরমাত্মা সদাশিব আদিভূতঃ পরঃ . স্থাণুভূতেন লকারেণ
জ্যোতির্লিঙ্গমাত্মানং ধিযো বুদ্ধযঃ পরে বস্তুনি ধ্যানেচ্ছারহিতং
নির্বিকল্পকে প্রচোদযাত্প্রেরযেদিত্যুচ্চারণরহিতং চেতসৈব
চিন্তযিত্বা ভাবযেদিতি . পরো রজসে সাবদোমিতি তদবসানে পরং
জ্যোতিরমলং হৃদি দৈবতং চৈতন্যং চিল্লিঙ্গং হৃদযাগারবাসিনী
হৃল্লেখেত্যাদিনা স্পষ্টং বাগ্ভবকূটং পঞ্চাক্ষরং
পঞ্চভূতজনকং পঞ্চকলামযং ব্যাপঠ্যত ইতি . য এবং বেদ .
অথ তু পরং কামকলাভূতং কামকূটমাহুঃ . তত্সবিতুর্বরেণ্য-
মিত্যাদিদ্বাত্রিংশদক্ষরীং পঠিত্বা তদিতি পরমাত্মা সদাশিবোঽকশরং
বিমলং নিরুপাধিতাদাত্ন্যপ্রতিপাদনেন হকারাক্ষরং শিবরূপং
নিরক্ষরমক্ষরং ব্যালিখ্যত ইতি . তত্পরাগব্যাবৃত্তিমাদায শক্তিং দর্শযতি .
তত্সবিতুরিতি পূর্বেণাধ্বনা সূর্যাধশ্চন্দ্রিকাং ব্যালিখ্য
মূলাদিব্রহ্মরন্ধ্রগং সাক্ষরমদ্বিতীযমাচক্ষত ইত্যাহ ভগবন্তং
দেবং শিবশক্ত্যাত্মকমেবোদিতম্ .
শিবোঽযং পরমং দেবং শক্তিরেষা তু জীবজ্জা .
সূর্যাচন্দ্রমসোর্যোগাদ্ধংসস্ততত্পদমুচ্যতে .. ১..
তস্মাদুজ্জৃম্ভতে কামঃ কামাত্কামঃ পরঃ শিবঃ .
কার্ণোঽযং কামদেবোঽযং বরেণ্যং ভর্গ উচ্যতে .. ২..
তত্সবিতুর্বরেণ্যং ভর্গো দেবঃ ক্ষীরং সেচনীযমক্ষরং
সমধুঘ্নমক্ষরং পরমাত্মজীবাত্মনোর্যোগাত্তদিতি
স্পষ্টমক্ষরং তৃতীযং হ ইতি তদেব সদাশিব এব
নিষ্কল্মষ আদ্যো দেবোঽন্ত্যমক্ষরং ব্যাক্রিযতে .
পরমং পদং ধীতি ধারণং বিদ্যতে জডত্বধারণং
মহীতি লকারঃ শিবাধস্তাত্তু লকারার্থঃ স্পষ্টমন্ত্যমক্ষরং
পরমং চৈতন্যং ধিযো যো নঃ প্রচোদযাত্পরো রজসে সাবদোমিত্যেবং
কূটং কামকলালযং ষডধ্বপরিবর্তকো বৈষ্ণবং পরমং
ধামৈতি ভগবাংশ্চৈতস্মাদ্য এবং বেদ . অথৈতস্মাদপরং
তৃতীযং শক্তিকূটং প্রতিপদ্যতে . দ্বাত্রিংশদক্ষর্যা গাযত্র্যা
তত্সবিতুর্বরেণ্যং তস্মাদাত্মন আকাশ আকাশাদ্বাযুঃ স্ফুরতি
তদধীনং বরেণ্যং সমুদীযমানং সবিতুর্বা যোগ্যো জীবাত্মপরমাত্ম-
সমুদ্ভবস্তং প্রকাশশক্তিরূপং জীবাক্ষরং স্পষ্টমাপদ্যতে .
ভর্গো দেবস্য ধীত্যনেনাধাররূপশিবাত্মাক্ষরং গণ্যতে .
মহীত্যাদিনাশেষং কাম্যং রমণীযং দৃশ্যং শক্তিকূটং
স্পষ্টীকৃতমিতি . এবং পঞ্চদশাক্ষরং ত্রৈপুরং যোঽধীতে স
সর্বান্কামানবাপ্নোতি . স সর্বাংল্লোকাঞ্জযতি . স সর্বা বাচো বিজৃম্ভযতি .
স রুদ্রত্বং প্রাপ্নোতি . স বৈষ্ণবং ধাম ভিত্ত্বা পরং ব্রহ্ম প্রাপ্নোতি .
য এবং বেদ . ইত্যাদ্যাং বিদ্যামভিধাযৈতস্যাঃ শক্তিকূটং
শক্তিশিবাদ্যং লোপামুদ্রেযম্ .
দ্বিতীযে ধামনি পূর্বেণৈব মনুনা বিন্দুহীনা শক্তিভূতহৃল্লেখা
ক্রোধমুনিনাধিষ্ঠিতা . তৃতীযে ধামনি পূর্বস্যা এব বিদ্যাযা
যদ্বাগ্ভবকূটং তেনৈব মানবীং চান্দ্রীং কৌবেরীং বিদ্যামাচক্ষতে .
মদনাধঃ শিবং বাগ্ভবম্ . তদূর্ধ্বং কামকলামযম্ .
শক্ত্যূর্ধ্বং শক্তিমিতি মানবী বিদ্যা . চতুর্থে ধামনি
শিবশক্ত্যাখ্যমন্যত্তৃতীযং চেযং চান্দ্রী বিদ্যা . পঞ্চমে ধামনি
ধ্যেযেযং চান্দ্রী কামাধঃ শিবাদ্যকামা . সৈব কৌবেরি ষষ্ঠে
ধামনি ব্যাচক্ষত ইতি . য এবং বেদ . হিত্বেকারং তুরীযস্বরং সর্বাদৌ
সূর্যাচন্দ্রমস্কেন কামেশ্বর্যেবাগস্ত্যসংজ্ঞা . সপ্তমে ধামনি
তৃতীযমেতস্যা এব পূর্বোক্তাযাঃ কামাদ্যং দ্বিধাধঃ কং মদনকলাদ্যং
শক্তিবীজং বাগ্ভবাদ্যং তযোরর্ধাবশিরস্কং কৃত্বা নন্দিবিদ্যেযম্ .
অষ্টমে ধামনি বাগ্ভবমাগস্ত্যং বাগর্থকলামযং কামকলাভিধং
সকলমাযাশক্তিঃ প্রভাকরী বিদ্যেযম্ . নবমে ধামনি পুনরাগস্ত্যং
বাগ্ভবং শক্তিমন্মথশিবশক্তিমন্মথোর্বীমাযাকামকলালযং
চন্দ্রসূর্যানঙ্গধূর্জটিমহিমালযং তৃতীযং ষণ্মুখীযং বিদ্যা .
দশমে ধামনি বিদ্যাপ্রকাশিতযা ভূয এবাগস্ত্যবিদ্যাং পঠিত্বা ভূয
এবেমামন্ত্যমাযাং পরমশিববিদ্যেযমেকাদশে ধামনি ভূয এবাগস্ত্যং
পঠিত্বা এতস্যা এব বাগ্ভবং যদ্ধনজং কামকলালযং চ তত্সহজং কৃত্বা
লোপামুদ্রাযাঃ শক্তিকূটরাজং পঠিত্বা বৈষ্ণবী বিদ্যা দ্বাদশে ধামনি
ব্যাচক্ষত ইতি . য এবং বেদ .
তান্হোবাচ . ভগবান্সর্বে যূযং শ্রুত্বা পূর্বাং কামাখ্যাং
তুরীযরূপাং তুরীযাতীতাং সর্বোত্কটাং সর্বমন্ত্রাসনগতাং
পীঠোপপীঠদেবতাপরিবৃতাং সকলকলাব্যাপিনীং দেবতাং সামোদাং
সপরাগাং সহৃদযাং সামৃতাং সকলাং সেন্দ্রিযাং সদোদিতাং
পরাং বিদ্যাং স্পষ্টীকৃত্বা হৃদযে নিধায বিজ্ঞাযানিলযং
গমযিত্বা ত্রিকূটাং ত্রিপুরাং পরমাং মাযাং শ্রেষ্ঠাং পরাং
বৈষ্ণবীং সংনিধায হৃদযকমলকর্ণিকাযাং পরাং ভগবতীং
লক্ষ্মীং মাযাং সদোদিতাং মহাবশ্যকরীং মদনোন্মাদনকারিণীং
ধনুর্বাণধারিণীং বাগ্বিজৃম্ভিণীং চন্দ্রমণ্ডলমধ্যবর্তিনীং
চন্দ্রকলাং সপ্তদশীং মহানিত্যোপস্থিতাং পাশাঙ্কুশমনোজ্ঞ-
পাণিপল্লবাং সমুদ্যদর্কনিভাং ত্রিনেত্রাং বিচিন্ত্য দেবীং মহালক্ষ্মীং
সর্বলক্ষ্মীমযীং সর্বলক্ষণসংপন্নাং হৃদযে চৈতন্যরূপিণীং
নিরঞ্জনাং ত্রিকূটাখ্যাং স্মিতমুখীং সুন্দরীং মহামাযাং
সর্বসুভগাং মহাকুণ্ডলিনীং ত্রিপীঠমধ্যবর্তিনীমকথাদিশ্রীপীঠে
পরাং ভৈরবীং চিত্কলাং মহাত্রিপুরাং দেবীং ধ্যাযেন্মহাধ্যান-
যোগেনেযমেবং বেদেতি মহোপনিষত্ .. ইতি প্রথমোপনিষত্ .. ১..
অথাতো জাতবেদসে সুনবাম সোমমিত্যাদি পঠিত্বা ত্রৈপুরী ব্যক্তির্লক্ষ্যতে .
জাতবেদস ইত্যেকর্চসূক্তস্যাদ্যমধ্যমাবসানেষু তত্র স্থানেষু
বিলীনং বীজসাগররূপং ব্যাচক্ষ্বেত্যৃষয ঊচুঃ . তান্হোবাচ
ভগবাঞ্জাতবেদসে সুনবাম সোমং তদত্যম্রবাণীং বিলোমেন পঠিত্বা
প্রথমস্যাদ্যং তদেবং দীর্ঘং দ্বিতীযস্যাদ্যং সুনবাম সোমমিত্যনেন
কৌলং বামং শ্রেষ্ঠং সোমং মহাসৌভাগ্যমাচক্ষতে . স
সর্বসংপত্তিভূতং প্রথমং নিবৃত্তিকারণং দ্বিতীযং স্থিতিকারণং
তৃতীযং সর্গকারণমিত্যনেন করশুদ্ধিং কৃত্বা ত্রিপুরাবিদ্যাং
স্পষ্টীকৃত্বা জাতবেদসে সুনবাম সোমমিত্যাদি পঠিত্বা মহাবিদ্যেশ্বরী-
বিদ্যামাচক্ষতে ত্রিপুরেশ্বরীং জাতবেদস ইতি . জাতে আদ্যক্ষরে মাতৃকাযাঃ
শিরসি বৈন্দবমমৃতরূপিণীং কুণ্ডলিনীং ত্রিকোণরূপিণীং চেতি বাক্যার্থঃ .
এবং প্রথমস্যাদ্যং বাগ্ভবম্ . দ্বিতীযং কামকলালযম্ . জাত
ইত্যনেন পরমাত্মনো জৃম্ভণম্ . জাত ইত্যাদিনা পরমাত্মা শিব উচ্যতে .
জাতমাত্রেণ কামী কামযতে কামমিত্যাদিনা পূর্ণং ব্যাচক্ষতে .
তদেব সুনবাম গোত্রারূঢং মধ্যবর্তিনামৃতমধ্যেনার্ণেন
মন্ত্রার্ণান্স্পষ্টীকৃত্বা . গোত্রেতি নামগোত্রাযামিত্যাদিনা স্পষ্টং
কামকলালযং শেষং বামমিত্যাদিনা . পূর্বেণাধ্বনা বিদ্যেযং
সর্বরক্ষাকরী ব্যাচক্ষতে . এবমেতেন বিদ্যাং ত্রিপুরেশীং স্পষ্টীকৃত্বা
জাতবেদস ইত্যাদিনা জাতো দেব এক ঈশ্বরঃ পরমো জ্যোতির্মন্ত্রতো বেতি তুরীযং
বরং দত্ত্বা বিন্দুপূর্ণজ্যোতিঃস্থানং কৃত্বা প্রথমস্যাদ্যং দ্বিতীযং চ
তৃতীযং চ সর্বরক্ষাকরীসংবন্ধং কৃত্বা বিদ্যামাত্মাসনরূপিণীং
স্পষ্টীকৃত্বা জাতবেদসে সুনবাম সোমমিত্যাদি পঠিত্বা রক্ষাকরীং
বিদ্যাং স্মৃত্বাদ্যন্তযোর্ধাম্নোঃ শক্তিশিবরূপিণীং বিনিযোজ্য স ইতি
শক্ত্যাত্মকং বর্ণং সোমমিতি শৈবাত্মকং ধাম জানীযাত্ . যো জানীতে
স সুভগো ভবতি . এবমেতাং চক্রাসনগতাং ত্রিপুরবাসিনীং সদোদিতাং
শিবশক্ত্যাত্মিকমবেদিতাং জাতবেদাঃ শিব ইতি সেতি
শক্ত্যাত্মাক্ষরমিতি শিবাদিশক্ত্যন্তরালভূতাং ত্রিকূটাদিচারিণীং
সূর্যাচন্দ্রনমস্কাং মন্ত্রাসনগতাং ত্রিপুরং মহালক্ষ্মীং
সদোদিতাং স্পষ্টীকৃত্বা জাতবেদসে সুনবাম সোমমিত্যাদি
পঠিত্বা পূর্বং সদাত্মাসনরূপাং বিদ্যাং স্মৃত্বা বেদ ইত্যাদিনা
বিশ্বাহসংততোদযবৈন্দবমুপরি বিন্যস্য সিদ্ধাসনস্থাং ত্রিপুরাং
মালিনীং বিদ্যাং স্পষ্টীকৃত্বা জাতবেদসে সুনবাম সোমমিত্যাদি
পঠিত্বা ত্রিপুরাং সুন্দরীং শ্রিত্বা কলে অক্ষরে বিচিন্ত্য মূর্তিভূতাং
মূর্তিরূপিণীং সর্ববিদ্যেশ্বরীং ত্রিপুরাং বিদ্যাং স্পষ্টীকৃত্বা
জাতবেদস ইত্যাদি পঠিত্বা ত্রিপুরাং লক্ষ্মীং শ্রিত্বাগ্নিং নিদহাতি
সৈবেযমগ্ন্যাননে জ্বলতীতি বিচিন্ত্য ত্রিজ্যোতিষমীশ্বরীং ত্রিপুরামম্বাং
বিদ্যাং স্পষ্টীকুর্যাত্ . এবমেতেন স নঃ পর্ষদতি দুর্গাণি
বিশ্বেত্যাদিপরপ্রকাশিনী প্রত্যগ্ভূতা কার্যা . বিদ্যেযমাহ্বানকর্মাণি
সর্বতো ধীরেতি ব্যাচক্ষতে . এবমেতদ্বিদ্যাষ্টকং মহামাযা-
দেব্যঙ্গভূতং ব্যাচক্ষতে . দেবা হ বৈ ভগবন্তমব্রুবন্মহাচক্রনাযকং
নো ব্রূহীতি সার্বকামিকং সর্বারাধ্যং সর্বরূপং বিশ্বতোমুখং
মোক্ষদ্বারং যদ্যোগিন উপবিশ্য পরং ব্রহ্ম ভিত্ত্বা নির্বাণমুপবিশন্তি .
তান্হোবাচ ভগবাঞ্শ্রীচক্রং ব্যাখ্যাস্যাম ইতি . ত্রিকোণং ত্র্যস্রং কৃত্বা
তদন্তর্মধ্যবৃত্তমানযষ্টিরেখামাকৃষ্য বিশালং নীত্বাগ্রতো
যোনিং কৃত্বা পূর্বযোন্যগ্ররূপিণীং মানযষ্টিং কৃত্বা তাং সর্বোর্ধ্বাং
নীত্বা যোনিং কৃত্বাদ্যং ত্রিকোণং চক্রং ভবতি . দ্বিতীযমন্তরালং ভবতি .
তৃতীযমষ্টযোন্যঙ্কিতং ভবতি . অথাষ্টারচক্রাদ্যন্তবিদিক্কোণাগ্রতো
রেখাং নীত্বা সাধ্যাদ্যাকর্ষণবদ্ধরেখাং নীত্বেত্যেবমথোর্ধ্ব-
সংপুটযোন্যঙ্কিতং কৃত্বা কক্ষাভ্য ঊর্ধ্বগরেখাচতুষ্টযং
কৃত্বা যথাক্রমেণ মানযষ্টিদ্বযেন দশযোন্যঙ্কিতং চক্রং ভবতি .
অনেনৈব প্রকারেণ পুনর্দশারচক্রং ভবতি . মধ্যত্রিকোণাগ্রচতুষ্টযা-
দ্রেখাচরাগ্রকোণেষু সংযোজ্য তদ্দশারাংশতোনীতাং মানযষ্টিরেখাং
যোজযিত্বা চতুর্দশারং চক্রং ভবতি . ততোঽষ্টপত্রসংবৃতং চক্রং ভবতি .
ষোডশপত্রসংবৃতং চক্রং চতুর্দ্বারং ভবতি . ততঃ পার্থিবং চক্রং
চতুর্দ্বারং ভবতি . এবং সৃষ্টিযোগেন চক্রং ব্যাখ্যাতম্ . নবাত্মকং
চক্রং প্রাতিলোম্যেন বা বচ্মি . প্রথমং চক্রং ত্রৈলোক্যমোহনং ভবতি .
সাণিমাদ্যষ্টকং ভবতি . সমাত্রষ্টকং ভবতি . সসর্বসংক্ষোভিণ্যাদিদশকং
ভবতি . সপ্রকটং ভবতি . ত্রিপুরযাধিষ্ঠিতং ভবতি . সসর্বসংক্ষোভিণীমুদ্রযা
জুষ্টং ভবতি . দ্বিতীযং সর্বাশাপরিপূরকং চক্রং ভবতি .
সকামাদ্যাকর্ষিণীষোডশকং ভবতি . সগুপ্তং ভবতি . ত্রিপুরেশ্বর্যাধিষ্ঠিতং
ভবতি . সর্ববিদ্রাবিণীমুদ্রযা জুষ্টং ভবতি . তৃতীযং সর্বসংক্ষোভণং চক্রং ভবতি . সানঙ্গকুসুমাদ্যষ্টকং ভবতি . সগুপ্ততরং ভবতি .
ত্রিপুরসুন্দর্যাধিষ্ঠিতং ভবতি . সর্বাকর্ষিণীমুদ্রযা জুষ্টং ভবতি .
তুরীযং সর্বসৌভাগ্যদাযকং চক্রং ভবতি .
সসর্বসংক্ষোভিণ্যাদিদ্বিসপ্তকং ভবতি . সসংপ্রদাযং ভবতি .
ত্রিপুরবাসিন্যাধিষ্ঠিতং ভবতি . সসর্ববশংকরিণীমুদ্রযা
জুষ্টং ভবতি . তুরীযান্তং সর্বার্থসাধকং চক্রং ভবতি .
সসর্বসিদ্ধিপ্রদাদিদশকং ভবতি . সকলকৌলং ভবতি .
ত্রিপুরামহালক্ষ্ম্যাধিষ্ঠিতং ভবতি . মহোন্মাদিনীমুদ্রযা
জুষ্টং ভবতি . ষষ্ঠং সর্বরক্ষাকরং চক্রং ভবতি .
সসর্বজ্ঞত্বাদিদশকং ভবতি . সনিগর্ভং ভবতি .
ত্রিপুরমালিন্যাধিষ্ঠিতং ভবতি . মহাঙ্কুশমুদ্রযা জুষ্টং
ভবতি . সপ্তমং সর্বরোগহরং চক্রং ভবতি . সর্ববশিন্যাদ্যষ্টকং
ভবতি . সরহস্যং ভবতি . ত্রিপুরসিদ্ধ্যাধিষ্ঠিতং ভবতি .
সখেচরীমুদ্রযা জুষ্টং ভবতি . অষ্টমং সর্বসিদ্ধিপ্রদং
চক্রং ভবতি . সাযুধচতুষ্টযং ভবতি . সপরাপররহস্যং
ভবতি . ত্রিপুরাম্বযাধিষ্ঠিতং ভবতি . বীজমুদ্রযাধিষ্ঠিতং
ভবতি . নবমং চক্রনাযকং সর্বানন্দমযং চক্রং ভবতি .
সকামেশ্বর্যাদিত্রিকং ভবতি . সাতিরহস্যং ভবতি . মহাত্রিপুর-
সুন্দর্যাধিষ্ঠিতং ভবতি . যোনিমুদ্রযা জুষ্টং ভবতি .
সংক্রামন্তি বৈ সর্বাণি চ্ছন্দাংসি চকারাণি . তদেব চক্রং
শ্রীচক্রম্ . তস্য নাভ্যামগ্নিমণ্ডলে সূর্যাচন্দ্রমসৌ ..
তত্রোংকারপীঠং পূজযিত্বা তত্রাক্ষরং বিন্দুরূপং তদন্তর্গত-
ব্যোমরূপিণীং বিদ্যাং পরমাং স্মৃত্বা মহাত্রিপুরসুন্দরীমাবাহ্য .
ক্ষীরেণ স্নাপিতে দেবি চন্দনেন বিলেপিতে . বিল্বপত্রার্চিতে দেবি দুর্গেঽহং
শরণং গতঃ . ইত্যেকযর্চা প্রার্থ্য মাযালক্ষ্মী তন্ত্রেণ
পূজযেদিতি ভগবানব্রবীত্ . এতৈর্মন্ত্রৈর্ভগবতীং যজেত্ . ততো দেবী
প্রীতা ভবতি . স্বাত্মানং দর্শযতি . তস্মাদ্য এতৈর্মন্ত্রৈর্যজতি স
ব্রহ্ম পশ্যতি . স সর্বং পশ্যতি . সোঽমৃতত্বং চ গচ্ছতি .
য এবং বেদেতি মহোপনিষত্ ..
ইতি দ্বিতীযোপনিষত্ .. ২..
দেবা হ বৈ মুদ্রাঃ সৃজেমেতি ভগবন্তমব্রুবন্ .
তান্হোবাচ ভগবানবনিকৃতজানুমণ্ডলং বিস্তীর্য
পদ্মাসনং কৃত্বা মুদ্রাঃ সৃজতেতি . স সর্বানাকর্ষযতি
যো যোনিমুদ্রামধীতে . স সর্বং বেত্তি . স সর্বফলমশ্নুতে .
স সর্বান্ভঞ্জযতি . স বিদ্বেষিণং স্তম্ভযতি . মধ্যমে
অনামিকোপরি বিন্যস্য কনিষ্ঠিকাঙ্গুষ্ঠতোঽধীতে
মুক্তযোস্তর্জন্যোর্দণ্ডবদধস্তাদেবংবিধা প্রথমা সংপদ্যতে .
সৈব মিলিতমধ্যমা দ্বিতীযা . তৃতীযাঙ্কুশাকৃতিরিতি .
প্রাতিলোম্যেন পাণী সঙ্ঘর্ষযিত্বাঙ্গুষ্ঠৌ সাগ্রিমৌ
সমাধায তুরীযা . পরস্পরং কনীযসেদং মধ্যমাবদ্ধে
অনামিকে দণ্ডিন্যৌ তর্জন্যাবালিঙ্গ্যাবষ্টভ্য মধ্যমানখ-
মিলিতাঙ্গুষ্ঠৌ পঞ্চমী . সৈবাগ্রেঽঙ্কুশাকৃতিঃ ষষ্ঠী .
দক্ষিণশযে বামবাহুং কৃত্বান্যোন্যানামিকে কনীযসীমধ্যগতে
মধ্যমে তর্জন্যাক্রান্তে সরলাস্বঙ্গুষ্ঠৌ খেচরী সপ্তমী .
সর্বোর্ধ্বে সর্বসংহৃতি স্বমধ্যমানামিকান্তরে কনীযসি
পার্শ্বযোস্তর্জন্যাবঙ্কুশাঢ্যে যুক্তা সাঙ্গুষ্ঠযোগতোঽন্যোন্যং
সমমঞ্জলিং কৃত্বাষ্টমী . পরস্পরমধ্যমাপৃষ্ঠবর্তিন্যাবনামিকে
তর্জন্যাক্রান্তে সমে মধ্যমে আদাযাঙ্গুষ্ঠৌ মধ্যবর্তিনৌ
নবমী প্রতিপদ্যত ইতি .
সৈবেযং কনীযসে সমে অন্তরিতেঽঙ্গুষ্ঠৌ সমাবন্তরিতৌ
কৃত্বা ত্রিখণ্ডাপদ্যত ইতি . পঞ্চ বাণাঃ পঞ্চাদ্যা
মুদ্রাঃ স্পষ্টাঃ . ক্রোমঙ্কুশা . হসখ্ফ্রেং খেচরী .
হংস্রৌ বীজাষ্টমী বাগ্ভবাদ্যা নবমী দশমী চ
সংপদ্যত ইতি . য এবং বেদ . অথাতঃ কামকলাভূতং চক্রং
ব্যাখ্যাস্যামো হ্রীং ক্লীমৈং ব্লূ৅ং স্রৌমেতে পঞ্চ কামাঃ
সর্বচক্রং ব্যাবর্তন্তে . মধ্যমং কামং সর্বাবসানে
সংপুটীকৃত্য ব্লূঙ্কারেণ সংপুটং ব্যাপ্তং কৃত্বা দ্বিরৈন্দবেন
মধ্যবর্তিনা সাধ্যং বদ্ধ্বা ভূর্জপত্রে যজতি . তচ্চক্রং
যো বেত্তি স সর্বং বেত্তি . স সকলা৅ংল্লোকানাকর্ষযতি . স সর্বং
স্তম্ভযতি . নীলীযুক্তং চক্রং শত্রূন্মারযতি . গতিং
স্তম্ভযতি . লাক্ষাযুক্তং কৃত্বা সকললোকং বশীকরোতি .
নবলক্ষজপং কৃত্বা রুদ্রত্বং প্রাপ্নোতি . মাতৃকযা বেষ্টিতং
কৃত্বা বিজযী ভবতি . ভগাঙ্ককুণ্ডং কৃত্বাগ্নিমাধায পুরুষো
হবিষা হুত্বা যোষিতো বশীকরোতি . বর্তুলে হুত্বা শ্রিযমতুলং
প্রাপ্নোতি . চতুরস্রে হুত্বা বৃষ্টির্ভবতি . ত্রিকোণে হুত্বা
শত্রূন্মারযতি . গতিং স্তম্ভযতি . পুষ্পাণি হুত্বা বিজযী ভবতি .
মহারসৈর্হুত্বা পরমানন্দনির্ভরো ভবতি . গণানাং ত্বা গণপতিং
হবামহে কবিং কবীনামুপমশ্রবস্তমম্ . জ্যেষ্ঠরাজং
ব্রহ্মণাং ব্রহ্মণস্পত আ নঃ শ্রুণ্বন্নূতিভিঃ সীদ সাদনম্ .
ইত্যেবমাদ্যমক্ষরং তদন্ত্যবিন্দুপূর্ণমিত্যনেনাঙ্গং স্পৃশতি .
গং গণেশায নম ইতি গণেশং নমস্কুর্বীত . ॐ নমো ভগবতে
ভস্মাঙ্গরাগাযোগ্রতেজসে হনহন দহদহ পচপচ মথমথ
বিধ্বংসযবিধ্বংসয হলভঞ্জন শূলমূলে ব্যঞ্জনসিদ্ধিং কুরুকুরু
সমুদ্রং পূর্বপ্রতিষ্ঠিঅতং শোষযশোষয স্তম্ভযস্তম্ভয
পরমন্ত্রপরযন্ত্রপরতন্ত্রপরদূতপরকটকপরচ্ছেদনকর
বিদারযবিদারয চ্ছিন্ধিচ্ছিন্ধি হ্রীং ফট্ স্বাহা . অনেন ক্ষেত্রাধ্যক্ষং
পূজযেদিতি . কুলকুমারি বিদ্মহে মন্ত্রকোটিসুধীমহি . তন্নঃ কৌলিঃ প্রচোদযাত্ .
ইতি কুমার্যর্চনং কৃত্বা যো বৈ সাধকোঽভিলিখতি সোঽমৃতত্বং গচ্ছতি .
স যশ আপ্নোতি . স পরমাযুষ্যমথ বা পরং ব্রহ্ম ভিত্ত্বা তিষ্ঠতি .
য এবং বেদেতি মহোপনিষত্ .
ইতি তৃতীযোপনিষত্ .. ৩..
দেবা হ বৈ ভগবন্তমব্রুবন্দেব গাযত্রং হৃদযং নো
ব্যাখ্যাতং ত্রৈপুরং সর্বোত্তমম্ . জাতবেদসসূক্তেনাখ্যাতং
নস্ত্রৈপুরাষ্টকম্ . যদিষ্ট্বা মুচ্যতে যোগী জন্মসংসারবন্ধনাত্ .
অথ মৃত্যুংজযং নো ব্রূহীত্যেবং ব্রুবতাং সর্বেষাং দেবানাং
শ্রুত্বেদং বাক্যমথাতস্ত্র্যম্বকেনানুষ্টুভেন মৃত্যুংজযং দর্শযতি .
কস্মাত্ত্র্যম্বকমিতি . ত্রযাণাং পুরাণামম্বকং স্বামিনং তস্মাদুচ্যতে
ত্র্যম্বকমিতি . অথ কস্মাদুচ্যতে যজামহ ইতি . যজামহে সেবামহে বস্তু
মহেত্যক্ষরদ্বযেন কূটত্বেনাক্ষরৈকেণ মৃত্যুংজযমিত্যুচ্যতে .
তস্মাদুচ্যতে যজামহ ইতি . অথ কস্মাদুচ্যতে সুগন্ধিমিতি . সর্বতো যশ
আপ্নোতি . তস্মাদুচ্যতে সুগন্ধিমিতি . অথ কস্মাদুচ্যতে পুষ্টিবর্ধনমিতি .
যত্সর্বাংল্লোকান্সৃজতি যত্সর্বাংল্লোকাংস্তারযতি যত্সর্বাংল্লোকান্ব্যাপ্নোতি
তস্মাদুচ্যতে পুষ্টিবর্ধনমিতি . অথ কস্মাদুচ্যতে উর্বারুকমিব
বন্ধনান্মৃত্যোর্মুক্ষীযেতি . সংলগ্নত্বাদুর্বারুকমিব মৃত্যোঃ সংসারবন্ধনাত্সংলগ্নত্বাদ্বদ্ধত্বান্মোক্ষীভবতি মুক্তো ভবতি .
অথ কস্মাদুচ্যতে মামৃতাদিতি অমৃতত্বং প্রাপ্নোত্যক্ষরং
প্রাপ্নোতি স্বযং রুদ্রো ভবতি .
দেবা হ বৈ ভগবন্তমূচুঃ সর্বং নো ব্যাখ্যাতম্ .
অথ কৈর্মন্ত্রৈঃ স্তুতা ভগবতী স্বাত্মানং দর্শযতি
তান্সর্বাঞ্ছৈবান্বৈষ্ণবান্সৌরান্গাণেশান্নো
ব্রূহীতি . স হোবাচ ভগবাংস্ত্র্যম্বকেনানুষ্টুভেন
মৃত্যুংজযমুপাসযেত্ . পূর্বেণাধ্বনা ব্যাপ্তমেকাক্ষরমিতি
স্মৃতম্ . ॐ নমঃ শিবাযেতি যাজুষমন্ত্রোপাসকো
রুদ্রত্বং প্রাপ্নোতি . কল্যাণং প্রাপ্নোতি . য এবং বেদ . তদ্বিষ্ণোঃ
পরমং পদং সদা পশ্যন্তি সূরযঃ . দিবীব চক্ষুরাততম্ .
বিষ্ণোঃ সর্বতোমুখস্য স্নেহো যথা পললপিণ্ডমোতপ্রোতমনুব্যাপ্তং
ব্যতিরিক্তং ব্যাপ্নুত ইতি ব্যাপ্নুবতো বিষ্ণোস্তত্পরমং পদং পরং ব্যোমেতি
পরমং পদং পশ্যন্তি বীক্ষন্তে . সূরযো ব্রহ্মাদযো দেবাস ইতি
সদা হৃদয অদধতে . তস্মাদ্বিষ্ণোঃ স্বরূপং বসতি তিষ্ঠতি
ভূতেশ্বিতি বাসুদেব ইতি . ॐ নম ইতি ত্রীণ্যক্ষরাণি . ভগবত ইতি
চত্বারি . বাসুদেবাযেতি পঞ্চাক্ষরাণি . এতদ্বৈ বাসুদেবস্য
দ্বাদশার্ণমভ্যেতি . সোপপ্লবং তরতি . স সর্বমাযুরেতি . বিন্দতে
প্রাজাপত্যং রাযস্পোষং গৌপত্যং চ তমশ্নুতে প্রত্যগানন্দং
ব্রহ্মপুরুষং প্রণবস্বরূপমকার উকারো মকার ইতি . তানেকধা
সংভবতি তদোমিতি . হংসঃ শুচিষদ্বসুরন্তরিক্ষসদ্ধোতা
বেদিষদতিথির্দুরোণসত্ . নৃষদ্বরসদৃতসদ্ব্যোমসদব্জা গোজা
ঋতজা অদ্রিজা ঋতং বৃহত্ . হংস ইত্যেতন্মনোরক্ষরদ্বিতীযেন
প্রভাপুঞ্জেন সৌরেণ ধৃতমব্জা গোজা ঋতজা অদ্রিজা ঋতং
সত্যা-প্রভা-পুঞ্জি-ন্যুষা-সন্ধ্যা-প্রজ্ঞাভিঃ
শক্তিভিঃ পূর্বং সৌরমধীযানঃ সর্বং ফলমশ্নুতে .
স ব্যোম্নি পরমে ধামনি সৌরে নিবসতে .
গণানাং ত্বতি ত্রৈষ্টুভেন পূর্বেণাধ্বনা মনুনৈকার্ণেন
গণাধিপমভ্যর্চ্য গণেশত্বং প্রাপ্নোতি . অথ গাযত্রী
সাবিত্রী সরস্বত্যজপা মাতৃকা প্রোক্তা তযা সর্বমিদং ব্যাপ্তম্ .
ঐং বাগীশ্বরি বিদ্মহে ক্লীং কামেশ্বরী ধীমহি . সৌস্তন্নঃ শক্তিঃ
প্রচোদযাদিতি . গাযত্রী প্রাতঃ সাবিত্রী মধ্যন্দিনে সরস্বতী সাযমিতি
নিরন্তরমজপা . হংস ইত্যেব মাতৃকা . পঞ্চাশদ্বর্ণবিগ্রহেণা-
কারাদিক্ষকারান্তেন ব্যাপ্তানি ভুবনানি শাস্ত্রাণি
চ্ছন্দাংসীত্যেবং ভগবতীং সর্বং ব্যাপ্নোতীত্যেব তস্যৈ বৈ নমোনম ইতি .
তান্ভগবানব্রবীদেতৈর্মন্ত্রৈর্নিত্যং দেবীং যঃ স্তৌতি স সর্বং পশ্যতি .
সোঽমৃতত্বং চ গচ্ছতি . য এবং বেদেত্যুপনিষত্ ..
ইতি তুরীযোপনিষত্ .. ৪..
দেবা হ বৈ ভগবন্তমব্রুবন্স্বামিন্নঃ কথিতং স্ফুটং
ক্রিযাকাণ্ডং সবিষযং ত্রৈপুরমিতি . অথ পরমনির্বিশেষং
কথযস্বেতি . তান্হোবাচ ভগবাংস্তুরীযযা মাযযান্ত্যযা
নির্দিষ্টং পরমং ব্রহ্মেতি . পরমপুরুষং চিদ্রূপং
পরমাত্মেতি . শ্রোতা মন্তা দ্রষ্টাদেষ্টা স্প্রষ্টাঘোষ্টা
বিজ্ঞাতা প্রজ্ঞাতা সর্বেষাং পুরুষাণামন্তঃপুরুষঃ
স আত্মা স বিজ্ঞেয ইতি . ন তত্র লোকা অলোকা ন তত্র দেবা অদেবাঃ
পশবোঽপশবস্তাপসো ন তাপসঃ পৌল্কসো ন পৌল্কসো
বিপ্রা ন বিপ্রাঃ . স ইত্যেকমেব পরং ব্রহ্ম বিভ্রাজতে নির্বাণম্ .
ন তত্র দেবা ঋষযঃ পিতর ঈশতে প্রতিবুদ্ধঃ সর্ববিদ্যেতি .
তত্রৈতে শ্লোকা ভবন্তি .
অতো নির্বিষযং নিত্যং মনঃ কার্যং মুমুক্ষুণা .
যতো নির্বিষযো নাম মনসো মুক্তিরিষ্যতে .. ১..
মনো হি দ্বিবিধং প্রোক্তং শুদ্ধং চাশুদ্ধমেব চ .
অশুদ্ধং কামসংকল্পং শুদ্ধং কামবিবর্জিতম্ .. ২..
মন এব মনুষ্যাণাং কারণং বন্ধমোক্ষযোঃ .
বন্ধনং বিষযাসক্তং মুক্ত্যৈ নির্বিষযং মনঃ .. ৩..
নিরস্তবিষযাসঙ্গং সংনিরুধ্য মনো হৃদি .
যদা যাত্যমনীভাবস্তদা তত্পরমং পদম্ .. ৪..
তাবদেব নিরোদ্ধব্যং যাবদ্হৃদিগতং ক্ষযম্ .
এতজ্জ্ঞানং চ ধ্যানং চ শেষোঽন্যো গ্রন্থবিস্তরঃ .. ৫..
নৈব চিন্ত্যং ন চাচিন্ত্যং ন চিন্ত্যং চিন্ত্যমেব চ .
পক্ষপাতবিনির্মুক্তং ব্রহ্ম সংপদ্যতে ধ্রুবম্ .. ৬..
স্বরেণ সল্লযেদ্যোগী স্বরং সংভাবযেত্পরম্ .
অস্বরেণ তু ভাবেন ন ভাবো ভাব ইষ্যতে .. ৭..
তদেব নিষ্কলং ব্রহ্ম নির্বিকল্পং নিরঞ্জনম্ .
তদ্ব্রহ্মাহমিতি জ্ঞাত্বা ব্রহ্ম সংপদ্যতে ক্রমাত্ .. ৮..
নির্বিকল্পমনন্তং চ হেতুদৃষ্টান্তবর্জিতম্ .
অপ্রমেযমনাদ্যন্তং যজ্জ্ঞাত্বা মুচ্যতে বুধঃ .. ৯..
ন নিরোধো ন চোত্পত্তির্ন বদ্ধো ন চ সাধকঃ .
ন মুমুক্ষুর্ন বৈ মুক্ত ইত্যেষা পরমার্থতা .. ১০..
এক এবাত্মা মন্তব্যো জাগ্রত্স্বপ্নসুষুপ্তিষু .
স্থানত্রযব্যতীতস্য পুনর্জন্ম ন বিদ্যতে .. ১২..
এক এব হি ভূতাত্মা ভূতেভূতে ব্যবস্থিতঃ .
একধা বহুধা চৈব দৃশ্যতে জলচন্দ্রবত্ .. ১২..
ঘটসংবৃতমাকাশং নীযমানে ঘটে যথা .
ঘটো নীযেত নাকাশং তথা জীবো নভোপমঃ .. ১৩..
ঘটবদ্বিবিধাকারং ভিদ্যমাং পুনঃ পুনঃ .
তদ্ভেদে চ ন জানাতি স জানাতি চ নিত্যশঃ .. ১৪..
শব্দমাযাবৃতো যাবত্তাবত্তিষ্ঠতি পুষ্কলে .
ভিন্নে তমসি চৈকত্বমেক এবানুপশ্যতি .. ১৫..
শব্দার্ণমপরং ব্রহ্ম তস্মিন্ক্ষীণে যদক্ষরম্ .
তদ্বিদ্বানক্ষরং ধ্যাযেদ্যদীচ্ছেচ্ছান্তিমাত্মনঃ .. ১৬..
দ্বে ব্রহ্মণী হি মন্তব্যে শব্দব্রহ্ম পরং চ যত্ .
শব্দব্রহ্মণি নিষ্ণাতঃ পরং ব্রহ্মাধিগচ্ছতি .. ১৭..
গ্রন্থমভ্যস্য মেধাবী জ্ঞানবিজ্ঞানতত্পরঃ .
পলালমিব ধান্যার্থী ত্যজেদ্গ্রন্থমশেষতঃ .. ১৮..
গবামনেকবর্ণানাং ক্ষীরস্যাপ্যেকবর্ণতা .
ক্ষীরবত্পশ্যতি জ্ঞানী লিঙ্গিনস্তু গবাং যথা .. ১৯..
জ্ঞাননেত্রং সমাধায স মহত্পরমং পদম্ .
নিষ্কলং নিশ্চলং শান্তং ব্রহ্মাহমিতি সংস্মরেত্ .. ২০..
ইত্যেকং পরব্রহ্মরূপং সর্বভূতাধিবাসং তুরীযং
জানীতে সোঽক্ষরে পরমে ব্যোমন্যধিবসতি . য এতাং বিদ্যাং
তুরীযাং ব্রহ্মযোনিস্বরূপাং তামিহাযুষে শরণমহং
প্রপদ্যে . আকাশাদ্যনুক্রমেণ সর্বেষাং বা এতদ্ভূতানামাকাশঃ
পরাযণম্ . সর্বাণি হ বা ইমানি ভূতান্যাকাশাদেব জাযন্তে .
আকাশ এব লীযন্তে . তস্মাদেব জাতানি জীবন্তি . তস্মাদাকাশজং
বীজং বিন্দ্যাত্ . তদেবাকাশপীঠং স্পার্শনং পীঠং
তেজঃপীঠমমৃতপীঠং রত্নপীঠং জানীযাত্ . যো জানীতে
সোঽমৃতত্বং চ গচ্ছতি . তস্মাদেতাং তুরীযাং শ্রীকামরাজীযামেকাদশধা
ভিন্নমেকাক্ষরং ব্রহ্মেতি যো জানীতে স তুরীযং পদং প্রাপ্নোতি .
য এবং বেদেতি মহোপনিষত্ ..
ইতি পঞ্চমোপনিষত্ .. ৫..
ॐ ভদ্রং কর্ণেভিঃ শৃণুযাম দেবাঃ .. ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ .. ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .. স্বস্তি নঃ পূষা বিশ্ববেদাঃ ..
স্বস্তি নস্তার্ক্ষ্যো অরিষ্টনেমিঃ .. স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
.. ইতি শ্রীত্রিপুরাতাপিন্যুপনিষত্সমাপ্তা ..