ত্রিপুর

.. ত্রিপুরোপনিষত্ ..

ত্রিপুরোপনিষদ্বেদ্যপারমৈশ্বর্যবৈভবম্ .
অখণ্ডানন্দসাম্রাজ্যং রামচন্দ্রপদং ভজে ..
ॐ বাঙ্মে মনসি প্রতিষ্ঠিতা | মনো মে বাচি প্রতিষ্ঠিতম্ |
আবিরাবীর্ম এধি | বেদস্য ম আণীস্থঃ | শ্রুতং মে মা প্রহাসীঃ |
অনেনাধীতেনাহোরাত্রান্ সংদধামি | ঋতং বদিষ্যামি |
সত্যং বদিষ্যামি | তন্মামবতু | তদ্বক্তারমবতু | অবতু মাম্ |
অবতু বক্তারম্ | অবতু বক্তারম্ |
ॐ শান্তিঃ শান্তিঃ শান্তিঃ ||

ॐ তিস্রঃ পুরাস্ত্রিপথা বিশ্বচর্ষণা অত্রাকথা অক্ষরাঃ
সন্নিবিষ্টাঃ |
অধিষ্ঠাযৈনা অজরা পুরাণী মহত্তরা মহিমা দেবতানাম্ || ১||

নবযোনির্নবচক্রাণি দধিরে নবৈব যোগা নব যোগিন্যশ্চ |
নবানাং চক্রা অধিনাথাঃ স্যোনা নব মুদ্রা নব ভদ্রা মহীনাম্ ||
২||

একা সা আসীত্ প্রথমা সা নবাসীদাসোনবিংশাদাসোনত্রিংশত্ |
চত্বারিংশাদথ তিস্রঃ সমিধা উশতীরিব মাতরো মা বিশন্তু ||
৩||

ঊর্ধ্বজ্বলজ্বলনং জ্যোতিরগ্রে তমো বৈ তিরশ্শ্চীনমজরং
তদ্রজোঽভূত্ |
আনন্দনং মোদনং জ্যোতিরিন্দো রেতা উ বৈ মণ্ডলা মণ্ডযন্তি || ৪||

তিস্রশ্চ [যাস্তিস্রো ]রেখাঃ সদনানি
ভূমেস্ত্রিবিষ্টপাস্ত্রিগুণাস্ত্রিপ্রকারাঃ .
এতত্পুরং [এতত্ত্রযং ]পূরকং পূরকাণামত্র [
পূরকাণাং মন্ত্রী ]প্রথতে মদনো মদন্যা || ৫||

মদন্তিকা মানিনী মংগলা চ সুভগা চ সা সুন্দরী সিদ্ধিমত্তা |
লজ্জা মতিস্তুষ্টিরিষ্টা চ পুষ্টা লক্ষ্মীরুমা ললিতা লালপন্তী
|| ৬||

ইমাং বিজ্ঞায সুধযা মদন্তী পরিসৃতা তর্পযন্তঃ স্বপীঠম্ |
নাকস্য পৃষ্ঠে বসন্তি পরং ধাম ত্রৈপুরং চাবিশন্তি || ৭||

কামো যোনিঃ  কামকলা ব্রজপাণির্গুহা হসা মাতরিশ্বাভ্রমিন্দ্রঃ |
পুনর্গুহা সকলা মাযযা চ পূরূচ্যেষা বিশ্বমাতাদিবিদ্যা || ৮||

ষষ্ঠং সপ্তমমথ বহ্নিসারথিমস্যা মূলত্রিক্রমা দেশযন্তঃ |
কথ্যং কবিং কল্পকং কামমীশং তুষ্টুবাংসো অমৃতত্বং
ভজন্তে || ৯||

ত্রিবিষ্টপং ত্রিমুখং বিশ্বমাতুর্নবরেখাঃ স্বরমধ্যং তদীলে  |
[পুরং হন্ত্রীমুখং বিশ্বমাতূ রবে রেখা স্বরমধ্যং
তদেষা . ]
বৃহত্তিথির্দশা পঞ্চাদি নিত্যা সা ষোডশী পুরমধ্যং বিভর্তি
|| ১০||

যদ্বা মণ্ডলাদ্বা স্তনবিংবমেকং মুখং চাধস্ত্রীণি গুহা সদনানি |
কামী কলাং কাম্যরূপাং বিদিত্বা [চিকিত্বা ]নরো জাযতে
কামরূপশ্চ কাম্যঃ [কামঃ ]|| ১১||

পরিসৃতম্ ঝষমাদ্যং [ঝষমাজং ]ফলং চ
ভক্তানি যোনীঃ
সুপরিষ্কৃতাশ্চ .
নিবেদযন্দেবতাযৈ মহত্যৈ স্বাত্মীকৃতে সুকৃতে সিদ্ধিমেতি || ১২||

সৃণ্যেব সিতযা বিশ্বচর্ষণিঃ পাশেনৈব প্রতিবধ্নাত্যভীকাম্ |
ইষুভিঃ পঞ্চভির্ধনুষা চ বিধ্যত্যাদিশক্তিররুণা
বিশ্বজন্যা || ১৩||

ভগঃ শক্তির্ভগবান্কাম ঈশ উভা দাতারাবিহ সৌভগানাম্ |
সমপ্রধানৌ সমসত্বৌ সমোজৌ তযোঃ শক্তিরজরা বিশ্বযোনিঃ ||
১৪||

পরিস্রুতা হবিষা ভাবিতেন প্রসঙ্কোচে গলিতে বৈমনস্কঃ |
শর্বঃ সর্বস্য জগতো বিধাতা ধর্তা হর্তা বিশ্বরূপত্বমেতি || ১৫||

ইযং মহোপনিষত্ত্রৈপুর্যা যামক্ষরং পরমো গীর্ভিরীট্টে |
এষর্গ্যজুঃ পরমেতচ্চ সামাযমথর্বেযমন্যা চ বিদ্যা || ১৬||

ॐ হ্রীম্ ॐ হ্রীমিত্যুপনিষত্ ||

ॐ বাঙ্মে মনসি প্রতিষ্ঠিতা | মনো মে বাচি প্রতিষ্ঠিতম্ |
আবিরাবীর্ম এধি | বেদস্য ম আণীস্থঃ | শ্রুতং মে মা প্রহাসীঃ |
অনেনাধীতেনাহোরাত্রান্ সংদধামি | ঋতং বদিষ্যামি |
সত্যং বদিষ্যামি | তন্মামবতু | তদ্বক্তারমবতু | অবতু মাম্ |
অবতু বক্তারম্ | অবতু বক্তারম্ |
ॐ শান্তিঃ শান্তিঃ শান্তিঃ ||
|| ইতি  ত্রিপুরোপনিষত্  ||