তুরীযাতীত

.. তুরীযাতীতোপনিষত্ ..
ॐ তুরীযাতীতোপনিষদ্বেদ্যং যত্পরমাক্ষরম্ .
তত্তুর্যাতীতচিন্মাত্রং স্বমাত্রং চিন্তযেঽন্বহম্ ..
তুরীযাতীতসংন্যাসপরিব্রাজাক্ষমালিকা .
অব্যক্তৈকাক্ষরং পূর্ণা সূর্যাক্ষ্যধ্যাত্মকুণ্ডিকা ..
হরিঃ ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
অথ তুরীযাতীতাবধূতানাং কোঽযং মার্গস্তেষাং কা
স্থিতিরিতি পিতামহো ভগবন্তং পিতরমাদিনারাযণং
পরিসমেত্যোবাচ.
তমাহ ভগবন্নারাযণো যোঽযমবধূতমার্গস্থো লোকে
দুর্লভতরো নতু বাহুল্যো যদ্যেকো ভবতি স এব নিত্যপূতঃ স এব
বৈরাগ্যমূর্তিঃ স এব জ্ঞানাকারঃ স এব বেদপুরুষ ইতি
জ্ঞানিনো মন্যন্তে .
মহাপুরুষো যস্তচ্চিত্তং ময্যেবাবতিষ্ঠতে .
অহং চ তস্মিন্নেবাবস্থিতঃ সোঽযমাদৌ তাবত্ক্রমেণ
কুটীচকো বহূদকত্বং প্রাপ্য বহূদকো হংসত্বমবলম্ব্য
হংসঃ পরমহংসো ভূত্বা স্বরূপানুসন্ধানেন
সর্বপ্রপঞ্চং বিদিত্বা দণ্ডকমণ্ডলুকটিসূত্র-
কৌপীনাচ্ছাদনং স্ববিধ্যুক্তক্রিযাদিকং সর্বমপ্সু
সংন্যস্য দিগম্বরো ভূত্বা বিবর্ণজীর্ণবল্কলাজিন-
পরিগ্রহমপি সংত্যজ্য তদূর্ধ্বমমন্ত্রবদাচরন্ক্ষৌরা-
ভ্যঙ্গস্নানোর্ধ্বপুণ্ড্রাদিকং বিহায লৌকিকবৈদিকম-
প্যুপসংহৃত্য সর্বত্র পুণ্যাপুণ্যবর্জিতো জ্ঞানাজ্ঞানমপি
বিহায শীতোষ্ণসুখদুঃখমানাবমানং নির্জিত্য বাসনাত্রয-
পূর্বকং নিন্দানিন্দাগর্বমত্সরদম্ভদর্পদ্বেষকামক্রোধলোভ
মোহহর্ষামর্ষাসূযাত্মসংরক্ষণাদিকং দগ্ধ্বা স্ববপুঃ
কুণপাকারমিব পশ্যন্নযত্নেনানিযমেন লাভালাভৌ সমৌ
কৃত্বা গোবৃত্ত্যা প্রাণসন্ধারণং কুর্বন্যত্প্রাপ্তং তেনৈব
নির্লোলুপঃ সর্ববিদ্যাপাণ্ডিত্যপ্রপঞ্চং ভস্মীকৃত্য স্বরূপং
গোপযিত্বা জ্যেষ্ঠাজ্যেষ্ঠত্বানপলাপকঃ সর্বোত্কৃষ্টত্ব-
সর্বাত্মকত্বাদ্বৈতং কল্পযিত্বা মত্তো ব্যতিরিক্তঃ কশ্চিন্না-
ন্যোঽস্তীতি দেবগুহ্যাদিধনমাত্মন্যুপসংহৃত্য দুঃখেন নোদ্বিগ্নঃ
সুখেন নানুমোদকো রাগে নিঃস্পৃহঃ সর্বত্র শুভাশুভযো-
রনভিস্নেহঃ সর্বেন্দ্রিযোপরমঃ স্বপূর্বাপন্নাশ্রমাচারবিদ্যা-
ধর্মপ্রাভবমননুস্মরন্ত্যক্তবর্ণাশ্রমাচারঃ সর্বদা
দিবানক্তসমত্বেনাস্বপ্নঃ সর্বদাসংচারশীলো
দেহমাত্রবশিষ্টো জলস্থলকমণ্ডলুঃ সর্বদানুন্মত্তো
বালোন্মত্তপিশাচবদেকাকী সংচরন্নসংভাষণপরঃ
স্বরূপধ্যানেন নিরালম্বমবলম্ব্য স্বাত্মনিষ্ঠানুকূলেন
সর্বং বিস্মৃত্য তুরীযাতীতাবধূতবেষেণাদ্বৈতনিষ্ঠাপরঃ
প্রণবাত্মকত্বেন দেহত্যাগং করোতি যঃ সোঽবধূতঃ  স
কৃতকৃত্যো ভবতীত্যুপনিষত্ ..
ॐ তত্সত্ ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণামেবাশিষ্যতে ..
ॐ শান্তিঃ শান্তিঃ শান্তিঃ ..
ইতি তুরীযাতীতোপনিষত্সমাপ্তা ..