জাবালি

.. জাবাল্যুপনিষত্  ..

জাবাল্যুপনিষদ্বেদ্যপদতত্ত্বস্বরূপকম্ .
পারমৈশ্বর্যবিভবং রামচন্দ্রপদং ভজে ..
ॐ আপ্যাযন্তু মামাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ .. সর্বাণি সর্বং
ব্রহ্মোপনিষদং মাহং ব্রহ্ম নিরাকুর্যাং মা মা
ব্রহ্ম নিরাকরোদনিরাকরণমস্ত্বনিরাকরণং মেস্তু
তদাত্মনি নিরতে য উপনিষত্সু ধর্মাস্তে মযি সন্তু তে মযি সন্তু ..
ॐ শান্তিঃ শান্তিঃ শান্তিঃ ..
হরিঃ ॐ .. অথ হৈনং ভগবন্তং জাবালিং পৈপ্পলাদিঃ
পপ্রচ্ছ ভগবন্মে ব্রূহি পরমতত্ত্বরহস্যম্ . কিং
তত্ত্বং কো জীবঃ কঃ পশুঃ ক ঈশঃ কো মোক্ষোপায ইতি .
স তং হোবাচ সাধু পৃষ্টং সর্বং নিবেদযামি
যথাজ্ঞাতমিতি . পুনঃ স তমুবাচ কুতস্ত্বযা জ্ঞাতমিতি .
পুনঃ স তমুবাচ ষডাননাদিতি . পুনঃ স তমুবাচ
তেনাথ কুতো জ্ঞাতমিতি . পুনঃ স তমুবাচ তেনেশানাদিতি .
পুনঃ স তমুবাচ কথং তস্মাত্তেন জ্ঞাতমিতি . পুনঃ স
তমুবাচ তদু[পাসনাদিতি . পুনঃ স তমুবাচ ভগবন্কৃপযা
মে সরহস্যং সর্বং নিবেদযেতি . স তেন পৃষ্টঃ সর্বং
নিবেদযামাস তত্ত্বম্ . পশুপতিরহঙ্কারাবিষ্টঃ
সংসারী জীবঃ স এব পশুঃ . সর্বজ্ঞঃ পঞ্চকৃত্যসংপন্নঃ
সর্বেশ্বর ঈশঃ পশুপতিঃ . কে পশব ইতি পুনঃ স তমুবাচ জীবাঃ
পশব উক্তাঃ . তত্পতিত্বাত্পশুপতিঃ . স পুনস্তং হোবাচ কথং
জীবাঃ পশব ইতি . কথং তত্পতিরিতি . স তমুবাচ যথা তৃণাশিনো
বিবেকহীনাঃ পরপ্রেষ্যাঃ কৃষ্যাদিকর্মসু নিযুক্তাঃ
সকলদুঃখসহাঃ স্বস্বামিবধ্যমানা গবাদযঃ পশবঃ .
যথা তত্স্বামিন ইব সর্বজ্ঞ ঈশঃ পশুপতিঃ . তজ্জ্ঞানং
কেনোপাযেন জাযতে . পুনঃ স তমুবাচ বিভূতিধারণাদেব .
তত্প্রকারঃ কথমিতি . কুত্রকুত্র ধার্যম্ . পুনঃ স তমুবাচ
সদ্যোজাতাদিপঞ্চব্রহ্মমন্ত্রৈর্ভস্ম সংগৃহ্যাগ্নিরিতি
ভস্মেত্যনেনাভিমন্ত্র্য মানস্তোক ইতি সমুদ্ধৃত্য জলেন
সংসৃজ্য ত্র্যাযুপমিতি শিরোললাটবক্ষঃস্কন্ধেষ্বিতি
তিসৃভিস্ত্র্যাযুপৈস্ত্রিযম্বকৈস্তিস্রো রেখাঃ প্রকুর্বীত .
ব্রতমেতচ্ছাম্ভবং সর্বেষু বেদেষু বেদবাদিভিরুক্তং
ভবতি . তত্সমাচরেন্মুমুক্ষুর্ন পুনর্ভবায . অথ
সনত্কুমারঃ প্রমাণং পৃচ্ছতি . ত্রিপুণ্ড্রধারণস্য
ত্রিধঃ রেখা আললাটাদাচক্ষুষোরাভ্রুবোর্মধ্যতশ্চ .
যাস্য প্রথমা রেখা সা গার্হপত্যশ্চাকারো রজো ভূর্লোকঃ
স্বাত্মা ক্রিযাশক্তিঃ ঋগ্বেদঃ প্রাতঃসবনং প্রজাপতির্দেবো
দেবতেতি . যাস্য দ্বিতীযা রেখা সা দক্ষিণাগ্নিরুকারঃ
সত্বমন্তরিক্ষমন্তরাত্মা চেচ্ছাশক্তির্যজুর্বেদো
মাধ্যন্দিনসবনং বিষ্ণুর্দেবো দেবতেতি . যাস্য তৃতীযা রেখা
সাহবনীযো মকারস্তমো দ্যৌর্লোকঃ পরমাত্মা জ্ঞানশক্তিঃ
সামবেদস্তৃতীযসবনং মহাদেবো দেবতেতি ত্রিপুণ্ড্রং ভস্মনা
করোতি . যো বিদ্বান্ব্রহ্মচারী গৃহী বানপ্রস্থো যতির্বা স
মহাপাতকোপপাতকেভ্যঃ পূতো ভবতি . স সর্বান্দেবান্ধ্যাতো
ভবতি . স সর্বেষু তীর্থেষু স্নাতো ভবতি . স সকলরুদ্রমন্ত্রজাপী
ভবতি . ন স পুনরাবর্ততে ন স পুনরাবর্ততে .. ইতি . ॐ সত্যমিত্যুপনিষত্ ..
ॐ আপ্যাযন্তু মামাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ .. সর্বাণি সর্বং
ব্রহ্মোপনিষদং মাহং ব্রহ্ম নিরাকুর্যাং মা মা
ব্রহ্ম নিরাকরোদনিরাকরণমস্ত্বনিরাকরণং মেস্তু
তদাত্মনি নিরতে য উপনিষত্সু ধর্মাস্তে মযি সন্তু তে মযি সন্তু ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি শ্রীজাবাল্যুপনিষত্সমাপ্তা ..