জাবালদর্শন

.. জাবালদর্শনোপনিষত্ ..
যমাদ্যষ্টাঙ্গযোগেদ্ধং ব্রহ্মমাত্রপ্রবোধতঃ .
যোগিনো যত্পদং যান্তি তত্কৈবল্যপদং ভজে ..
ॐ আপ্যাযন্তু মমাঙ্গানি বাক্প্রাণশ্চক্ষুঃ শ্রোত্রমথো বলমিন্দ্রিযাণি চ ..
সর্বাণি সর্বং ব্রহ্মোপনিষদং মাহং ব্রহ্ম নিরাকুর্যাং মা মা ব্রহ্ম
নিরাকরোদনিরাকরণমস্ত্বনিরাকরণং মেস্তু তদাত্মনি নিরতে য উপনিষত্সু
ধর্মাস্তে মযি সন্তু তে মযি সন্তু ..
ॐ শান্তিঃ শান্তিঃ শান্তিঃ ..
হরিঃ ॐ .. দত্তাত্রেযো মহাযোগী ভগবান্ভূতভাবনঃ .
চতুর্ভুজো মহাবিষ্ণুর্যোগসাম্রাজ্যদীক্ষিতঃ .. ১..
তস্য শিষ্যো মুনিবরঃ সাংকৃতির্নাম ভক্তিমান্ .
পপ্রচ্ছ গুরুমেকান্তে প্রাঞ্জলির্বিনযান্বিতঃ .. ২..
ভগবন্ব্রূহি মে যোগং সাষ্টাঙ্গং সপ্রপঞ্চকম্ .
যেন বিজ্ঞাতমাত্রেণ জীবন্মুক্তো ভবাম্যহম্ .. ৩..
সাংকৃতে শ্রুণু বক্ষ্যামি যোগং সাষ্টাঙ্গদর্শনম্ .
যমশ্চ নিযমশ্চৈব তথৈবাসনমেব চ .. ৪..
প্রাণাযামস্তথা ব্রহ্মন্প্রত্যাহারস্ততঃ পরম্ .
ধারণা চ তথা ধ্যানং সমাধিশ্চাষ্টমং মুনে .. ৫..
অহিংসা সত্যমস্তেযং ব্রহ্মচর্যং দযার্জবম্ .
ক্ষমা ধৃতির্মিতাহারঃ শৌচং চৈব যমা দশ .. ৬..
বেদোক্তেন প্রকারেণ বিনা সত্যং তপোধন .
কাযেন মনসা বাচা হিংসাঽহিংসা ন চান্যথা .. ৭..
আত্মা সর্বগতোঽচ্ছেদ্যো ন গ্রাহ্য ইতি মে মতিঃ .
স চাহিংসা বরা প্রোক্তা মুনে বেদান্তবেদিভিঃ .. ৮..
চক্ষুরাদীন্দ্রিযৈর্দৃষ্টং শ্রুতং ঘ্রাতং মুনীশ্বর .
তস্যৈবোক্তির্ভবেত্সত্যং বিপ্র তন্নান্যথা ভবেত্ .. ৯..
সর্বং সত্যং পরং ব্রহ্ম ন চান্যদিতি যা মতিঃ .
তচ্চ সত্যং বরং প্রোক্তং বেদান্তজ্ঞানপারগৈঃ .. ১০..
অন্যদীযে তৃণে রত্নে কাঞ্চনে মৌক্তিকেঽপি চ .
মনসা বিনিবৃত্তির্যা তদস্তেযং বিদুর্বুধাঃ .. ১১..
আত্মন্যনাত্মভাবেন ব্যবহারবিবর্জিতম্ .
যত্তদস্তেযমিত্যুক্তমাত্মবিদ্ভির্মহামতে .. ১২..
কাযেন বাচা মনসা স্ত্রীণাং পরিবিবর্জনম্ .
ঋতৌ ভার্যাং তদা স্বস্য ব্রহ্মচর্যং তদুচ্যতে .. ১৩..
ব্রহ্মভাবে মনশ্চারং ব্রহ্মচর্যং পরন্তপ .. ১৪..
স্বাত্মবত্সর্বভূতেষু কাযেন মনসা গিরা .
অনুজ্ঞা যা দযা সৈব প্রোক্তা বেদান্তবেদিভিঃ .. ১৫..
পুত্রে মিত্রে কলত্রে চ রিপৌ স্বাত্মনি সন্ততম্ .
একরূপং মুনে যত্তদার্জবং প্রোচ্যতে মযা .. ১৬..
কাযেন মনসা বাচা শত্রুভিঃ পরিপীডিতে .
বুদ্ধিক্ষোভনিবৃত্তির্যা ক্ষমা সা মুনিপুঙ্গব .. ১৭..
বেদাদেব বিনির্মোক্ষঃ সংসারস্য ন চান্যথা .
ইতি বিজ্ঞাননিষ্পত্তির্ধৃতিঃ প্রোক্তা হি বৈদিকৈঃ .
অহমাত্মা ন চান্যোঽস্মীত্যেবমপ্রচ্যুতা মতিঃ .. ১৮..
অল্পমৃষ্টাশনাভ্যাং চ চতুর্থাংশাবশেষকম্ .
তস্মাদ্যোগানুগুণ্যেন ভোজনং মিতভোজনম্ .. ১৯..
স্বদেহমলনির্মোক্ষো মৃজ্জলাভ্যাং মহামুনে .
যত্তচ্ছৌচং ভবেদ্বাহ্যং মানসং মননং বিদুঃ .
অহং শুদ্ধ ইতি জ্ঞানং শৌচমাহুর্মনীষিণঃ .. ২০..
অত্যন্তমলিনো দেহো দেহী চাত্যন্তনির্মলঃ .
উভযোরন্তরং জ্ঞাত্বা কস্য শৌচং বিধীযতে .. ২১..
জ্ঞানশৌচং পরিত্যজ্য বাহ্যে যো রমতে নরঃ .
স মূঢঃ কা~চনং ত্যক্ত্বা লোষ্ঠং গৃহ্ণাতি সুব্রত .. ২২..
জ্ঞানামৃতেন তৃপ্তস্য কৃতকৃত্যস্য যোগিনঃ .
ন চাস্তি কিংচিত্কর্তব্যমস্তি চেন্ন স তত্ত্ববিত্ .. ২৩..
লোকত্রযেঽপি কর্তব্যং কিংচিন্নাস্ত্যাত্মবেদিনাম্ .. ২৪..
তস্মাত্সর্বপ্রযত্নেন মুনেঽহিংসাদিসাধনৈঃ .
আত্মানমক্ষরং ব্রহ্ম বিদ্ধি জ্ঞানাত্তু বেদনাত্ .. ২৫..
ইতি প্রথমঃ খণ্ডঃ .. ১..
তপঃ সন্তোষমাস্তিক্যং দানমীশ্বরপূজনম্ .
সিদ্ধান্তশ্রবণং চৈব হ্রীর্মতিশ্চ জপো ব্রতম্ .. ১..
এতে চ নিযমাঃ প্রোক্তাস্তান্বক্ষ্যামি ক্রমাচ্ছৃণু .. ২..
বেদোক্তেন প্রকারেণ কৃচ্ছ্রচান্দ্রযণাদিভিঃ .
শরীরশোষণং যত্তত্তপ ইত্যুচ্যতে বুধৈঃ .. ৩..
কো বা মোক্ষঃ কথং তেন সংসারং প্রতিপন্নবান্ .
ইত্যালোকনমর্থজ্ঞাস্তপঃ শংসন্তি পণ্ডিতাঃ .. ৪..
যদৃচ্ছালাভতো নিত্যং প্রীতির্যা জাযতে নৃণাম্ .
তত্সন্তোষং বিদুঃ প্রাজ্ঞাঃ পরিজ্ঞানৈকতত্পরাঃ .. ৫..
ব্রহ্মাদিলোকপর্যন্তাদ্বিরক্ত্যা যল্লভেত্প্রিযম্ .
সর্বত্র বিগতস্নেহঃ সংতোষং পরমং বিদুঃ .
শ্রৌতে স্মার্তে চ বিশ্বাসো যত্তদাস্তিক্যমুচ্যতে .. ৬..
ন্যাযার্জিতধনং শ্রান্তে শ্রদ্ধযা বৈদিকে জনে .
অন্যদ্বা যত্প্রদীযন্তে তদ্দানং প্রোচ্যতে মযা .. ৭..
রাগাদ্যপেতং হৃদযং বাগদুষ্টানৃতাদিনা .
হিংসাদিরহিতং কর্ম যত্তদীশ্বরপূজনম্ .. ৮..
সত্যং জ্ঞানমনন্তং চ পরানন্দং পরং ধ্রুবম্ .
প্রত্যগিত্যবগন্তব্যং বেদান্তশ্রবণং বুধাঃ .. ৯..
বেদলৌকিকমার্গেষু কুত্সিতং কর্ম যদ্ভবেত্ .
তস্মিন্ভবতি যা লজ্জা হ্রীঃ সৈবেতি প্রকীর্তিতা .
বৈদিকেষু চ সর্বেষু শ্রদ্ধা যা সা মতির্ভবেত্ .. ১০..
গুরুণা চোপদিষ্টোঽপি তত্র সংবন্ধবর্জিতঃ .
বেদোক্তেনৈব মার্গেণ মন্ত্রাভ্যাসো জপঃ স্মৃতঃ .. ১১..
কল্পসূত্রে তথা বেদে ধর্মশাস্ত্রে পুরাণকে .
ইতিহাসে চ বৃত্তির্যা স জপঃ প্রোচ্যতে মযা .. ১২..
জপস্তু দ্বিবিধঃ প্রোক্তো বাচিকো মানসস্তথা .. ১৩..
বাচিকোপাংশুরুচ্চৈশ্চ দ্বিবিধঃ পরিকীর্তিতঃ .
মানসোমননধ্যানভেদাদ্দ্বৈবিধ্যমাশ্রিতঃ .. ১৪..
উচ্চৈর্জপাদুপাংশুশ্চ সহস্রগুণমুচ্যতে .
মানসশ্চ তথোপাংশোঃ সহস্রগুণমুচ্যতে .. ১৫..
উচ্চৈর্জপশ্চ সর্বেষাং যথোক্তফলদো ভবেত্ .
নীচৈঃশ্রোত্রেণ চেন্মন্ত্রঃ শ্রুতশ্চেন্নিষ্ফলং ভবেত্ .. ১৬.. ইতি..
ইতি দ্বিতীযঃ খণ্ডঃ .. ২..
স্বস্তিকং গোমুখং পদ্মং বীরসিংহাসনে তথা .
ভদ্রং মুক্তাসনং চৈব মযূরাসনমেব চ .. ১..
সুখাসনসমাখ্যং চ নবমং মুনিপুঙ্গব .
জানূর্বোরন্তরে কৃত্বা সম্যক্ পাদতলে উভে .. ২..
সমগ্রীবশিরঃকাযঃ স্বস্তিকং নিত্যমভ্যসেত্ .
সব্যে দক্ষিণগুল্ফং তু পৃষ্ঠপার্শ্বে নিযোজযেত্ .. ৩..
দক্ষিণেঽপি তথা সব্যং গোমুখং তত্প্রচক্ষতে .
অঙ্গুষ্ঠাবধি গৃহ্ণীযাদ্ধস্তাভ্যাং ব্যুত্ক্রমেণ তু .. ৪..
ঊর্বোরুপরি বিপ্রেন্দ্র কৃত্বা পাদতলদ্বযম্ .
পদ্মাসনং ভবেত্প্রাজ্ঞ সর্বরোগভযাপহম্ .. ৫..
দক্ষিণেতরপাদং তু দক্ষিণোরুণি বিন্যসেত্ .
ঋজুকাযঃ সমাসীনো বীরাসনমুদাহৃতম্ .. ৬..
গুল্ফৌ তু বৃষণস্যাধঃ সীবন্যাঃ পার্শ্বযোঃ ক্ষিপেত্ .
পার্শ্বপাদৌ চ পাণিভ্যাং দৃঢং বদ্ধ্বা সুনিশ্চলম্ .
ভদ্রাসনং ভবেদেতদ্বিষরোগবিনাশনম্ .. ৭..
নিপীড্য সীবনীং সূক্ষ্মং দক্ষিণেতরগুল্ফতঃ .
বামং যাম্যেন গুল্ফেন মুক্তাসনমিদং ভবেত্ .. ৮..
মেঢ্রাদুপরি নিক্ষিপ্য সব্যং গুল্ফং ততোপরি .
গুল্ফান্তরং চ সংক্ষিপ্য মুক্তাসনমিদং মুনে .. ৯..
কূর্পরাগ্রে মুনিশ্রেষ্ঠ নিক্ষিপেন্নাভিপার্শ্বযোঃ .
ভূম্যাং পাণিতলদ্বন্দ্বং নিক্ষিপ্যৈকাগ্রমানসঃ .. ১০..
সমুন্নতশিরঃপাদো দণ্ডবদ্ব্যোম্নিসংস্থিতঃ .
মযূরাসনমেতত্স্যাত্সর্বপাপপ্রণাশনম্ .. ১১..
যেন কেন প্রকারেণ সুখং ধৈর্যং চ জাযতে .
তত্সুখাসনমিত্যুক্তমশক্তস্তত্সমাশ্রযেত্ .. ১২..
আসনং বিজিতং যেন জিতং তেন জগত্ত্রযম্ .
অনেন বিধিনা যুক্তঃ প্রাণাযামং সদা কুরু .. ১৩.. ইতি..
ইতি তৃতীযঃ খণ্ডঃ .. ৩..
শরীরং তাবদেব স্যাত্ষণ্ণবত্যঙ্গুলাত্মকম্ .
দেহমধ্যে শিখিস্থানং তপ্তজাম্বূনদপ্রভম্ .. ১..
ত্রিকোণং মনুজানাং তু সত্যমুক্তং হি সাংকৃতে .
গুদাত্তু দ্ব্যঙ্গুলাদূর্ধ্বং মেঢ্রাত্তু দ্ব্যন্ঙ্গুলাদধঃ .. ২..
দেহমধ্যং মুনিপ্রোক্তমনুজানীহি সাংকৃতে .
কন্দস্থানং মুনিশ্রেষ্ঠ মূলাধারান্নবাঙ্গুলম্ .. ৩..
চতুরঙ্গুলমাযামবিস্তারং মুনিপুঙ্গব .
কুক্কুটাণ্ডসমাকারং ভূষিতং তু ত্বগাদিভিঃ .. ৪..
তন্মধ্যে নাভিরিত্যুক্তং যোগজ্ঞৈর্মুনিপুঙ্গব .
কন্দমধ্যস্থিতা নাডী সুষুম্নেতি প্রকীর্তিতা .. ৫..
তিষ্ঠন্তি পরিতস্তস্যা নাডযো মুনিপুঙ্গব .
দ্বিসপ্ততিসহস্রাণি তাসাং মুখ্যাশ্চতুর্দশ .. ৬..
সুষুম্না পিঙ্গলা তদ্বদিডা চৈব সরস্বতী .
পূষা চ বরুণা চৈব হস্তিজিহ্বা যশস্বিনী .. ৭..
অলম্বুসা কুহুশ্চৈব বিশ্বোদরী তপস্বিনী .
শঙ্খিনী চৈব গান্ধারা ইতি মুখ্যাশ্চতুর্দশ .. ৮..
তাসাং মুখ্যতমাস্তিস্রস্তিসৃষ্বেকোত্তমোত্তমা .
ব্রহ্মনাডীতি সা প্রোক্তা মুনে বেদান্তবেদিভিঃ .. ৯..
পৃষ্ঠমধ্যস্থিতেনান্স্থা বীণাদণ্ডেন সুব্রত .
সহ মস্তকপর্যন্তং সুষুম্না সুপ্রতিষ্ঠিতা .. ১০..
নাভিকন্দাদধঃ স্থানং কুণ্ডল্যা দ্ব্যঙ্গুলং মুনে .
অষ্টপ্রকৃতিরূপা সা কুণ্ডলী মুনিসত্তম .. ১১..
যথাবদ্বাযুচেষ্টাং চ জলান্নাদীনি নিত্যশঃ .
পরিতঃ কন্দপার্শ্বেষু নিরুধ্যৈব সদা স্থিতা .. ১২..
স্বমুখেন সমাবেষ্ট্য ব্রহ্মরন্ধ্রমুখং মুনে .
সুষুম্নাযা ইডা সব্যে দক্ষিণে পিঙ্গলা স্থিতা .. ১৩..
সরস্বতী কুহুশ্চৈব সুষুম্নাপার্শ্বযোঃ স্থিতে .
গান্ধারা হস্তিজিহ্বা চ ইডাযাঃ পৃষ্ঠপার্শ্বযোঃ .. ১৪..
পূষা যশস্বিনী চৈব পিঙ্গলা পৃষ্ঠপূর্বযোঃ .
কুহোশ্চ হস্তিজিহ্বাযা মধ্যে বিশ্বোদরী স্থিতা .. ১৫..
যশস্বিন্যাঃ কুহোর্মধ্যে বরুণা সুপ্রতিষ্ঠিতা .
পূষাশ্চ সরস্বত্যা মধ্যে প্রোক্তা যশস্বিনী .. ১৬..
গান্ধারাযাঃ সরস্বত্যা মধ্যে প্রোক্তা চ শঙ্খিনী .
অলম্বুসা স্থিতা পাযুপর্যন্তং কন্দমধ্যগা .. ১৭..
পূর্বভাগে সুষুম্নাযা রাকাযাঃ সংস্থিতা কুহূঃ .
অধশ্চোর্ধ্বং স্থিতা নাডী যাম্যনাসান্তমিষ্যতে .. ১৮..
ইঅডা তু সব্যনাসান্তং সংস্থিতা মুনিপুঙ্গব .
যশস্বিনী চ বামস্য পাদাঙ্গুষ্ঠান্তমিষ্যতে .. ১৯..
পূষা বামাক্ষিপর্যন্তা পিঙ্গলাযাস্তু পৃষ্ঠতঃ .
পযস্বিনী চ যাম্যস্য কর্ণান্তং প্রোচ্যতে বুধৈঃ .. ২০..
সরস্বতী তথা চোর্ধ্বগতা জিহ্বা তথা মুনে .
হস্তিজিহ্বা তথা সব্যপাদাঙ্গুষ্ঠান্তমিষ্যতে .. ২১..
শঙ্খিনী নাম যা নাডী সব্যকর্ণান্তমিষ্যতে .
গান্ধারা সব্যনেত্রান্তা প্রোক্তা বেদান্তবেদিভিঃ .. ২২..
বিশ্বোদরাভিধা নাডী কন্দমধ্যে ব্যবস্থিতা .
প্রাণোঽপানস্তথা ব্যানঃ সমানোদান এব চ .. ২৩..
নাগঃ কূর্মশ্চ কৃকরো দেবদত্তো ধনঞ্জযঃ .
এতে নাডীষু সর্বাসু চরন্তি দশ বাযবঃ .. ২৪..
তেষু প্রাণাদযঃ পঞ্চ মুখ্যাঃ পঞ্চসু সুব্রত .
প্রাণসংজ্ঞস্তথাপানঃ পূজ্যঃ প্রাণস্তযোর্মুনে .. ২৫..
আস্যনাসিকযোর্মধ্যে নাভিমধ্যে তথা হৃদি .
প্রাণসংজ্ঞোঽনিলো নিত্যং বর্ততে মুনিসত্তম .. ২৬..
অপানো বর্ততে নিত্যং গুদমধ্যোরুজানুষু .
উদরে সকলে কট্যাং নাভৌ জঙ্ঘে চ সুব্রত .. ২৭..
ব্যানঃ শ্রোত্রাক্ষিমধ্যে চ কুকুভ্দ্যাং গুল্ফযোরপি .
প্রাণস্থানে গলে চৈব বর্ততে মুনিপুঙ্গব .. ২৮..
উদানসংজ্ঞো বিজ্ঞেযঃ পাদযোর্হস্তযোরপি .
সমানঃ সর্বদেহেষু ব্যাপ্য তিষ্ঠত্যসংশযঃ .. ২৯..
নাগাদিবাযবঃ পঞ্চত্বগস্থ্যাদিষু সংস্থিতাঃ .
নিঃশ্বাসোচ্ছ্বাসকাসাশ্চ প্রাণকর্ম হি সাংকৃতে .. ৩০..
অপানাখ্যস্য বাযোস্তু বিণ্মূত্রাদিবিসর্জনম্ .
সমানঃ সর্বসামীপ্যং করোতি মুনিপুঙ্গব .. ৩১..
উদান ঊর্ধ্বগমনং করোত্যেব ন সংশযঃ .
ব্যানো বিবাদকৃত্প্রোক্তো মুনে বেদান্তবেদিভিঃ .. ৩২..
উদ্গারাদিগুণঃ প্রোক্তো ব্যানাখ্যস্য মহামুনে .
ধনঞ্জযস্য শোভাদি কর্ম প্রোক্তং হি সাংকৃতে .. ৩৩..
নিমীলনাদি কূর্মস্য ক্ষুধা তু কৃকরস্য চ .
দেবদত্তস্য বিপ্রেন্দ্র তন্দ্রীকর্ম প্রকীর্তিতম্ .. ৩৪..
সুষুম্নাযাঃ শিবো দেব ইডাযা দেবতা হরিঃ .
পিঙ্গলাযা বিরঞ্চিঃ স্যাত্সরস্বত্যা বিরাণ্মুনে .. ৩৫..
পূষাধিদেবতা প্রোক্তা বরুণা বাযুদেবতা .
হস্তিজিহ্বাভিধাযাস্তু বরুণো দেবতা ভবেত্ .. ৩৬..
যশস্বিন্যা মুনিশ্রেষ্ঠ ভগবান্ভাস্করস্তথা .
অলম্বুসাযা অবাত্মা বরুণঃ পরিকীর্তিতঃ .. ৩৭..
কুহোঃ ক্ষুদ্দেবতা প্রোক্তা গান্ধারী চন্দ্রদেবতা .
শঙ্খিন্যাশ্চন্দ্রমাস্তদ্বত্পযস্বিন্যাঃ প্রজাপতিঃ .. ৩৮..
বিশ্বোদরাভিধাযাস্তু ভগবান্পাবকঃ পতিঃ .
ইডাযাং চন্দ্রমা নিত্যং চরত্যেব মহামুনে .. ৩৯..
পিঙ্গলাযাং রবিস্তদ্বন্মুনে বেদবিদাং বর .
পিঙ্গলাযামিডাযাং তু বাযোঃ সংক্রমণং তু যত্ .. ৪০..
তদুত্তরাযণং প্রোক্তং মুনে বেদান্তবেদিভিঃ .
ইডাযাং পিঙ্গলাযাং তু প্রাণসংক্রমণং মুনে .. ৪১..
দক্ষিণাযনমিত্যুক্তং পিঙ্গলাযামিতি শ্রুতিঃ .
ইডাপিঙ্গলযোঃ সংধিং যদা প্রাণঃ সমাগতঃ .. ৪২..
অমাবাস্যা তদা প্রোক্তা দেহে দেহভৃতাং বর .
মূলাধারং যদা প্রাণঃ প্রবিষ্টঃ পণ্ডিতোত্তম .. ৪৩..
তদাদ্যং বিষুবং প্রোক্তং তপসৈস্তাপতোত্তম .
প্রাণসংজ্ঞো মুনিশ্রেষ্ঠ মূর্ধানং প্রাবিশদ্যদা .. ৪৪..
তদন্ত্যং বিষুবং প্রোক্তং তাপসৈস্তত্ত্বচিন্তকৈঃ .
নিঃশ্বাসোচ্ছ্বাসনং সর্বং মাসানাং সংক্রমো ভবেত্ .. ৪৫..
ইডাযাঃ কুণ্ডলীস্থানং যদা প্রাণঃ সমাগতঃ .
সোমগ্রহণমিত্যুক্তং তদা তত্ত্ববিদাং বর .. ৪৬..
যদা পিঙ্গলযা প্রাণঃ কুণ্ডলীস্থানমাগতঃ .
তদাতদা ভবেত্সূর্যগ্রহণ মুনিপুঙ্গব .. ৪৭..
শ্রীপর্বতং শিরঃস্থানে কেদারং তু ললাটকে .
বারাণসী মহাপ্রাজ্ঞ ভ্রুবোর্ঘ্রাণস্য মধ্যমে .. ৪৮..
কুরুক্ষেত্রং কুচস্থানে প্রযাগং হৃত্সরোরুহে .
চিদম্বরং তু হৃন্মধ্যে আধারে কমলালযম্ .. ৪৯..
আত্মতীর্থং সমুত্সৃজ্য বহিস্তীর্থানি যো ব্রজেত্ .
করস্থং স মহারত্নং ত্যক্ত্বা কাচং বিমার্গতে .. ৫০..
ভাবতীর্থং পরং তীর্থং প্রমাণং সর্বকর্মসু .
অন্যথালিঙ্গ্যতে কান্তা অন্যথালিঙ্গ্যতে সুতা .. ৫১..
তীর্থানি তোযপূর্ণানি দেবান্কাষ্ঠাদিনির্মিতান্ .
যোগিনো ন প্রপূজ্যন্তে স্বাত্মপ্রত্যযকারণাত্ .. ৫২..
বহিস্তীর্থাত্পরং তীর্থমন্তস্তীর্থং মহামুনে .
আত্মতীর্থং মহাতীর্থমন্যত্তীর্থং নিরর্থকম্ .. ৫৩..
চিত্তমন্তর্গতং দুষ্টং তীর্থস্নানৈর্ন শুদ্ধ্যতি .
শতশোঽপি জলৈর্ধৌতং সুরাভাণ্ডমিবশুচি .. ৫৪..
বিষুবাযনকালেষু গ্রহণে চান্তরে সদা .
বারাণস্যাদিকে স্থানে স্নাত্বা শুদ্ধো ভবেন্নরঃ .. ৫৫..
জ্ঞানযোগপরাণাং তু পাদপ্রক্ষালিতং জলম্ .
ভাবশুদ্ধ্যর্থমজ্ঞানাং তত্তীর্থং মুনিপুঙ্গব .. ৫৬..
তীর্থে জ্ঞানে জপে যজ্ঞে কাষ্ঠে পাষাণকে সদা .
শিবং পশ্যতি মূঢাত্মা শিবে দেহে প্রতিষ্ঠিতে .. ৫৭..
অন্তস্থং মাং পরিত্যজ্য বহিষ্ঠং যস্তু সেবতে .
হস্তস্থং পিণ্ডমুত্সৃজ্য লিহেত্কূর্পরমাত্মনঃ .. ৫৮..
শিবমাত্মনি পশ্যন্তি প্রতিমাসু ন যোগিনঃ .
অজ্ঞানং ভাবনার্থায প্রতিমাঃ পরিকল্পিতাঃ .. ৫৯..
অপূর্বমপরং ব্রহ্ম স্বাত্মানং সত্যমদ্বযম্ .
প্রজ্ঞানঘনমানন্দং যঃ পশ্যতি স পশ্যতি .. ৬০..
নাডীপুঞ্জং সদা সারং নরভাবং মহামুনে .
সমুত্সৃজ্যাত্মনাত্মানমহমিত্যেব ধারয .. ৬১..
অশরীরং শরীরেষু মহান্তং বিভুমীশ্বরম্ .
আনন্দমক্ষরং সাক্ষান্মত্বা ধীরো ন শোচতি .. ৬২..
বিভেদজনকে জ্ঞানে নষ্টে জ্ঞানবলান্মুনে .
আত্মনো ব্রহ্মণো ভেদমসন্তং কিং করিষ্যতি .. ৬৩.. ইতি..
ইতি চতুর্থঃ খণ্ডঃ .. ৪..
সম্যক্কথয মে ব্রহ্মনাডীশুদ্ধিং সমাসতঃ .
যথা শুদ্ধ্যা সদা ধ্যাযঞ্জীবন্মুক্তো ভবাম্যহম্ .. ১..
সাংকৃতে শ্রুণু বক্ষ্যামি নাডীশুদ্ধিং সমাসতঃ .
বিধ্যুক্তকর্মসংযুক্তঃ কামসংকল্পবর্জিতঃ .. ২..
যমাদ্যষ্টাঙ্গসংযুক্তঃ শান্তঃ সত্যপরাযণঃ .
স্বাত্মন্যবস্থিতঃ সম্যগ্জ্ঞানিভিশ্চ সুশিক্ষিতঃ .. ৩..
পর্বতাগ্রে নদীতীরে বিল্বমূলে বনেঽথবা .
মনোরমে শুচৌ দেশে মঠং কৃত্বা সমাহিতঃ .. ৪..
আরভ্য চাসনং পশ্চাত্প্রাঙ্মুখোদঙ্মুখোঽপি বা .
সমগ্রীবশিরঃকাযঃ সংবৃতাস্যঃ সুনিশ্চলঃ .. ৫..
নাসাগ্রে শশভৃদ্বিম্বে বিন্দুমধ্যে তুরীযকম্ .
স্রবন্তমমৃতং পশ্যেন্নেত্রাভ্যাং সুসমাহিতঃ .. ৬..
ইডযা প্রাণমাকৃষ্য পূরযিত্বোদরে স্থিতম্ .
ততোঽগ্নিং দেহমধ্যস্থং ধ্যাযঞ্জ্বালাবলীযুতম্ .. ৭..
বিন্দুনাদসমাযুক্তমগ্নিবীজং বিচিন্তযেত্ .
পশ্চাদ্বিরেচযেত্সম্যক্প্রাণং পিঙ্গলযা বুধঃ .. ৮..
পুনঃ পিঙ্গলযাপূর্য বহ্নিবীজমনুস্মরেত্ .
পুনর্বিরচযেদ্ধীমানিডযৈব শনৈঃ শনৈঃ .. ৯..
ত্রিচতুর্বাসরং বাথ ত্রিচতুর্বারমেব চ .
ষট্কৃত্বা বিচরেন্নিত্যং রহস্যেবং ত্রিসন্ধিষু .. ১০..
নাডীশুদ্ধিমবাপ্নোতি পৃথক্ চিহ্নোপলক্ষিতঃ .
শরীরলঘুতা দীপ্তির্বহ্নের্জাঠরবর্তিনঃ .. ১১..
নাদাভিব্যক্তিরিত্যেতচ্চিহ্নং তত্সিদ্ধিসূচকম্ .
যাবদেতানি সংপশ্যেত্তাবদেবং সমাচরেত্ .. ১২..
অথবৈতত্পরিত্যজ্য স্বাত্মশুদ্ধিং সমাচরেত্ .
আত্মা শুদ্ধঃ সদা নিত্যঃ সুখরূপঃ স্বযংপ্রভঃ .. ১৩..
অজ্ঞানান্মলিনো ভাতি জ্ঞানচ্ছুদ্ধো ভবত্যযম্ .
অজ্ঞানমলপঙ্কং যঃ ক্ষালযেজ্জ্ঞানতো যতঃ .
স এব সর্বদা শুদ্ধো নান্যঃ কর্মরতো হি সঃ .. ১৪.. ইতি..
ইতি পঞ্চমঃ খণ্ডঃ .. ৫..
প্রাণাযামক্রমং বক্ষ্যে সাংকৃতে শ্রুণু সাদরম্ .
প্রাণাযাম ইতি প্রোক্তো রেচপূরককুম্ভকৈঃ .. ১..
বর্ণত্রযাত্মকাঃ প্রোক্তা রেচপূরককুম্ভকাঃ .
স এষ প্রণবঃ প্রোক্তঃ প্রাণাযামস্তু তন্মযঃ .. ২..
ইডযা বাযুমাকৃষ্য পূরযিত্বোদরে স্থিতম্ .
শনৈঃ ষোডশভির্মাত্রৈরকারং তত্র সংস্মরেত্ .. ৩..
পূরিতং ধারযেত্পশ্চাচ্চতুঃষষ্ট্যা তু মাত্রযা .
উকারমূর্তিমন্ত্রাপি সংস্মরন্প্রণবং জপেত্ .. ৪..
যাবদ্বা শক্যতে তাবদ্ধারযেজ্জপতত্পরঃ .
পূরিতং রেচযেত্পশ্চান্মকারেণানিলং বুধঃ .. ৫..
শনৈঃ পিঙ্গলযা তত্র দ্বাত্রিংশন্মাত্রযা পুনঃ .
প্রাণাযামো ভবেদেবং ততশ্চৈবং সমভ্যসেত্ .. ৬..
পুনঃ পিঙ্গলযাপূর্য মাত্রৈঃ ষোডশভিস্তথা .
অকারমূর্তিমত্রাপি স্মরেদেকাগ্রমানসঃ .. ৭..
ধারযেত্পূরিতং বিদ্বান্প্রণবং সংজপন্বশী .
উকারমূর্তিং স ধ্যাযংশ্চতুঃষষ্ট্যা তু মাত্রযা .. ৮..
মকারং তু স্মরন্পশ্চাদ্রেচযেদিডযানিলম্ .
এবমেব পুনঃ কুর্যাদিডযাপূর্য বুদ্ধিমান্ .. ৯..
এবং সমভ্যসেন্নিত্যং প্রাণাযামং মুনীশ্বর .
এবমভ্যাসতো নিত্যং ষণ্মাসাদ্যত্নবান্ভবেত্ .. ১০..
বত্সরাদ্ব্রহ্মবিদ্বান্স্যাত্তস্মান্নিত্যং সমভ্যসেত্ .
যোগাভ্যাসরতো নিত্যং স্বধর্মনিরতশ্চ যঃ .. ১১..
প্রাণসংযমনেনৈব জ্ঞানান্মুক্তো ভবিষ্যতি .
বাহ্যাদাপূরণং বাযোঃরুদরে পূরকো হি সঃ .. ১২..
সংপূর্ণকুম্ভবদ্বাযোর্ধারণং কুম্ভকো ভবেত্ .
বহির্বিরচনং বাযোরুদরাদ্রচেকঃ স্মৃতঃ .. ১৩..
প্রস্বেদজনকো যস্তু প্রাণাযামেষু সোঽধমঃ .
কংপনং মধ্যমং বিদ্যাদুত্থানং চোত্তমং বিদুঃ .. ১৪..
পূর্বংপূর্বং প্রকুর্বীত যাবদুত্থানসংভবঃ .
সংভবত্যুত্তমে প্রাজ্ঞঃ প্রাণাযামে সুখী ভবেত্ .. ১৫..
প্রাণাযমেন চিত্তং তু শুদ্ধং ভবতি সুব্রত .
চিত্তে শুদ্ধে শুচিঃ সাক্ষাত্প্রত্যগ্জ্যোতির্ব্যবস্থিতঃ .. ১৬..
প্রাণশ্চিত্তেন সংযুক্তঃ পরমাত্মনি তিষ্ঠতি .
প্রাণাযামপরস্যাস্য পুরুষস্য মহাত্মনঃ .. ১৭..
দেহশ্চোত্তিষ্ঠতে তেন কিংচিজ্জ্ঞানাদ্বিমুক্ততা .
রেচকং পূরকং মুক্ত্বা কুম্ভকং নিত্যমভ্যসেত্ .. ১৮..
সর্বপাপবিনির্মুক্তঃ সম্যগ্জ্ঞানমবাপ্নুযাত্ .
মনোজবত্বমাপ্নোতি পলিতাদি চ নশ্যতি .. ১৯..
প্রাণাযামৈকনিষ্ঠস্য ন কিংচিদপি দুর্লভম্ .
তস্মাত্সর্বপ্রযত্নেন প্রাণাযামান্সমভ্যসেত্ .. ২০..
বিনিযোগান্প্রবক্ষ্যামি প্রাণাযামস্য সুব্রত .
সন্ধ্যযোর্ব্রাহ্মকালেঽপি মধ্যাহ্নে বাথবা সদা .. ২১..
বাহ্যং প্রাণং সমাকৃষ্য পূরযিত্বোদরেণ চ .
নাসাগ্রে নাভিমধ্যে চ পাদাঙ্গুষ্ঠে চ ধারযেত্ .. ২২..
সর্বরোগবিনির্মুক্তো জীবেদ্বর্ষশতং নরঃ .
নাসাগ্রধারণাদ্বাপি জিতো ভবতি সুব্রত .. ২৩..
সর্বরোগনিবৃত্তিঃ স্যান্নাভিমধ্যে তু ধারণাত্ .
শরীরলঘুতা বিপ্র পাদাঙ্গুষ্ঠনিরোধনাত্ .. ২৪..
জিহ্বযা বাযুমাকৃষ্য যঃ পিবেত্সততং নরঃ .
শ্রমদাহবিনির্মুক্তো যোগী নীরোগতামিযাত্ .. ২৫..
জিহ্বযা বাযুমাকৃষ্য জিহ্বামূলে নিরোধযেত্ .
পিবেদমৃতমব্যগ্রং সকলং সুখমাপ্নুযাত্ .. ২৬..
ইডযা বাযুমাকৃষ্য ভ্রুবোর্মধ্যে নিরোধযেত্ .
যঃ পিবেদমৃতং শুদ্ধং ব্যাধিভির্মুচ্যতে হি সঃ .. ২৭..
ইডযা বেদতত্ত্বজ্ঞস্তথা পিঙ্গলযৈব চ .
নাভৌ নিরোধযেত্তেন ব্যাধিভির্মুচ্যতে নরঃ .. ২৮..
মাসমাত্রং ত্রিসন্ধ্যাযাং জিহ্বযারোপ্য মারুতম্ .
অমৃতং চ পিবেন্নাভৌ মন্দংমন্দং নিরোধযেত্ .. ২৯..
বাতজাঃ পিত্তজা দোষা নশ্যন্ত্যেব ন সংশযঃ .
নাসাভ্যাং বাযুমাকৃষ্য নেত্রদ্বন্দ্বে নিরোধযেত্ .. ৩০..
নেত্ররোগা বিনশ্যন্তি তথা শ্রোত্রনিরোধনাত্ .
তথা বাযুং সমারোপ্য ধারযেচ্ছিরসি স্থিতম্ .. ৩১..
শিরোরোগা বিনশ্যন্তি সত্যমুক্তং হি সাংকৃতে .
স্বস্তিকাসনমাস্থায সমাহিতমনাস্তথা .. ৩২..
অপানমূর্ধ্বমুত্থাপ্য প্রণবেন শনৈঃ শনৈঃ .
হস্তাভ্যাং ধারযেত্সম্যক্কর্ণাদিকরণানি চ .. ৩৩..
অঙ্গুষ্ঠাভ্যাং মুনে শ্রোত্রে তর্জনীভ্যাং তু চক্ষুষী .
নাসাপুটবধানাভ্যাং প্রচ্ছাদ্য করণানি বৈ .. ৩৪..
আনন্দাবির্ভবো যাবত্তাবন্মূর্ধনি ধারণাত্ .
প্রাণঃ প্রযাত্যনেনৈব ব্রহ্মরন্ধ্রং মহামুনে .. ৩৫..
ব্রহ্মরন্ধ্রং গতে বাযৌ নাদশ্চোত্পদ্যতেঽনঘ .
শঙ্খধ্বনিনিভশ্চাদৌ মধ্যে মেঘধ্বনির্যথা .. ৩৬..
শিরোমধ্যগতে বাযৌ গিরিপ্রস্রবণং যথা .
পশ্চাত্প্রীতো মহাপ্রাজ্ঞঃ সাক্ষাদাত্মোন্মুখো ভবেত্ .. ৩৭..
পুনস্তজ্জ্ঞাননিষ্পত্তির্যোগাত্সংসারনিহ্নুতিঃ .
দক্ষিণোত্তরগুল্ফেন সীবিনীং পীডযেত্স্থিরম্ .. ৩৮..
সব্যেতরেণ গুল্ফেন পীডযেদ্বুদ্ধিমান্নরঃ .
জান্বোরধঃ স্থিতাং সন্ধিং স্মৃত্বা দেবং ত্রিযম্বকম্ .. ৩৯..
বিনাযকং চ সংস্মৃত্য তথা বাগীশ্বরীং পুনঃ .
লিঙ্গনালাত্সমাকৃষ্য বাযুমপ্যগ্রতো মুনে .. ৪০..
প্রণবেন নিযুক্তেন বিন্দুযুক্তেন বুদ্ধিমান্ .
মূলাধারস্য বিপ্রেন্দ্র মধ্যে তং তু নিরোধযেত্ .. ৪১..
নিরুধ্য বাযুনা দীপ্তো বহ্নিরূহতি কুণ্ডলীম্ .
পুনঃ সুষুম্নযা বাযুর্বহ্নিনা সহ গচ্ছতি .. ৪২..
এবমভ্যাসতস্তস্য জিতো বাযুর্ভবেদ্ভৃশম্ .
প্রস্বেদঃ প্রথমঃ পশ্চাত্কম্পনং মুনিপুঙ্গব .. ৪৩..
উত্থানং চ শরীরস্য চিহ্নমেতজ্জিতেঽনলে .
এবমভ্যাসতস্তস্য মূলরোগো বিনশ্যতি .. ৪৪..
ভগন্দরং চ নষ্টং স্যাত্সর্বরোগাশ্চ সাংকৃতে .
পাতকানি বিনশ্যন্তি ক্ষুদ্রাণি চ মহান্তি চ .. ৪৫..
নষ্টে পাপে বিশুদ্ধং স্যাচ্চিত্তদর্পণমদ্ভুতম্ .
পুনর্ব্রহ্মাদিভোগেভ্যো বৈরাগ্যং জযতে হৃদি .. ৪৬..
বিরক্তস্য তু সংসারাজ্জ্ঞানং কৈবল্যসাধনম্ .
তেন পাপাপহানিঃ স্যাজ্জ্ঞাত্বা দেবং সদাশিবম্ .. ৪৭..
জ্ঞানামৃতরসো যেন সকৃদাস্বাদিতো ভবেত্ .
স সর্বকার্যমুত্সৃজ্য তত্রৈব পরিধাবতি .. ৪৮..
জ্ঞানস্বরূপমেবাহুর্জগদেতদ্বিলক্ষণম্ .
অর্থস্বরূপমজ্ঞানাত্পশ্যন্ত্যন্যে কুদৃষ্টযঃ .. ৪৯..
আত্মস্বরূপবিজ্ঞানাদজ্ঞানস্য পরিক্ষযঃ .
ক্ষীণেঽজ্ঞানে মহাপ্রাজ্ঞ রাগাদীনাং পরিক্ষযঃ .. ৫০..
রাগাদ্যসংভবে প্রাজ্ঞ পুণ্যপাপবিমর্দনম্ .
তযোর্নাশে শরীরেণ ন পুনঃ সংপ্রযুজ্যতে .. ৫১.. ইতি..
ইতি ষষ্ঠঃ খণ্ডঃ .. ৬..
অথাতঃ সংপ্রবক্ষ্যামি প্রত্যাহারং মহামুনে .
ইন্দ্রিযাণাং বিচরতাং বিষযেষু স্বভাবতঃ .. ১..
বলাদাহরণাং তেষাং প্রত্যাহারঃ স উচ্যতে .
যত্পশ্যতি তু তত্সর্বং ব্রহ্ম পশ্যন্সমাহিতঃ .. ২..
প্রত্যাহারো ভবেদেষ ব্রহ্মবিদ্ভিঃ পুরোদিতঃ .
যদ্যচ্ছুদ্ধমশুদ্ধং বা করোত্যামরণান্তিকম্ .. ৩..
তত্সর্বং ব্রহ্মণে কুর্যাত্প্রত্যাহারঃ স উচ্যতে .
অথবা নিত্যকর্মাণি ব্রহ্মারাধনবুদ্ধিতঃ .. ৪..
কাম্যানি চ তথা কুর্যাত্প্রত্যাহারঃ স উচ্যতে .
অথবা বাযুমাকৃষ্য স্থানাত্স্থানং নিরোধযেত্ .. ৫..
দন্তমূলাত্তথা কণ্ঠে কণ্ঠাদুরসি মারুতম্ .
উরোদেশাত্সমাকৃষ্য নাভিদেশে নিরোধযেত্ .. ৬..
নাভিদেশাত্সমাকৃষ্য কুণ্ডল্যাং তু নিরোধযেত্ .
কুণ্ডলীদেশতো বিদ্বান্মূলাধারে নিরোধযেত্ .. ৭..
অথাপানাত্কটিদ্বন্দ্বে তথোরৌ চ সুমধ্যমে .
তস্মাজ্জানুদ্বযে জঙ্ঘে পাদাঙ্গুষ্ঠে নিরোধযেত্ .. ৮..
প্রত্যাহারোঽযমুক্তস্তু প্রত্যাহারস্মরৈঃ পুরা .
এবমভ্যাসযুক্তস্য পুরুষস্য মহাত্মনঃ .. ৯..
সর্বপাপানি নশ্যন্তি ভবরোগশ্চ সুব্রত .
নাসাভ্যাং বাযুমাকৃষ্য নিশ্চলঃ স্বস্তিকাসনঃ .. ১০..
পূরযেদনিলং বিদ্বানাপাদতলমস্তকম্ .
পশ্চাত্পাদদ্বযে তদ্বন্মূলাধরে তথৈব চ .. ১১..
নাভিকন্দে চ হৃন্মধ্যে কণ্ঠমূলে চ তালুকে .
ভ্রুবোর্মধ্যে ললাটে চ তথা মূর্ধনি ধারযেত্ .. ১২..
দেহে স্বাত্মমতিং বিদ্বান্সমাকৃষ্য সমাহিতঃ .
আত্মনাত্মনি নির্দ্বন্দ্বে নির্বিকল্পে নিরোধযেত্ .. ১৩..
প্রত্যাহারঃ সমাখ্যাতঃ সাক্ষাদ্বেদান্তবেদিভিঃ .
এবমভ্যসতস্তস্য ন কিংচিদপি দুর্লভম্ .. ১৪.. ইতি..
ইতি সপ্তমঃ খণ্ডঃ .. ৭..
অথাতঃ সংপ্রবক্ষ্যামি ধারণাঃ পঞ্চ সুব্রত .
দেহমধ্যগতে ব্যোম্নি বাহ্যাকাশং তু ধারযেত্ .. ১..
প্রাণে বাহ্যানিলং তদ্বজ্জ্বলনে চাগ্নিমৌদরে .
তোযং তোযাংশকে ভূমিং ভূমিভাগে মহামুনে .. ২..
হযবরলকারাখ্যং মন্ত্রমুচ্চারযেত্ক্রমাত্ .
ধারণৈষা পরা প্রোক্তা সর্বপাপবিশোধিনী .. ৩..
জান্বন্তং পৃথিবী হ্যংশো হ্যপাং পয্বন্তমুচ্যতে .
হৃদযাংশস্তথাগ্নংশো ভ্রূমধ্যান্তোঽনিলাংশকঃ .. ৪..
আকাশাংশস্তথা প্রাজ্ঞ মূর্ধাংশঃ পরিকীর্তিতঃ .
ব্রহ্মাণং পৃথিবীভাগে বিষ্ণুং তোযাংশকে তথা .. ৫..
অগ্ন্যংশে চে মহেশানমীশ্বরং চানিলাংশকে .
আকাশাংশে মহাপ্রাজ্ঞ ধারযেত্তু সদাশিবম্ .. ৬..
অথবা তব বক্ষ্যামি ধারণাং মুনিপুঙ্গব .
পুরুষে সর্বশাস্তারং বোধানন্দমযং শিবম্ .. ৭..
ধারযেদ্বুদ্ধিমান্নিত্যং সর্বপাপবিশুদ্ধযে .
ব্রহ্মাদিকার্যরূপাণি স্বে স্বে সংহৃত্য কারণে .. ৮..
সর্বকারণমব্যক্তমনিরূপ্যমচেতনম্ .
সাক্ষাদাত্মনি সংপূর্ণে ধারযেত্প্রণবেন তু .
ইন্দ্রিযাণি সমাহৃত্য মনসাত্মনি যোজযেত্ .. ৯.. ইতি..
ইত্যষ্টমঃ খণ্ডঃ .. ৮..
অথাতঃ সংপ্রবক্ষ্যামি ধ্যানং সংসারনাশনম্ .
ঋতং সত্যং পরং ব্রহ্ম সর্বসংসারভেষজম্ .. ১..
ঊর্ধ্বরেতং বিশ্বরূপং বিরূপাক্ষং মহেশ্বরম্ .
সোঽহমিত্যাদরেণৈব ধ্যাযেদোগীশ্বরেশ্বরম্ .. ২..
অথবা সত্যমীশানং জ্ঞানমানন্দমদ্বযম্ .
অত্যর্থমচলং নিত্যমাদিমধ্যান্তবর্জিতম্ .. ৩..
তথা স্থূলমনাকাশমসংস্পৃশ্যমচাক্ষুষম্ .
ন রসং ন চ গন্ধাখ্যমপ্রমেযমনূপমম্ .. ৪..
আত্মানং সচ্চিদানন্দমনন্তং ব্রহ্ম সুব্রত .
অহমস্মীত্যভিধ্যাযেদ্ধ্যেযাতীতং বিমুক্তযে .. ৫..
এবমভ্যাসযুক্তস্য পুরুষস্য মহাত্মনঃ .
ক্রমাদ্বেদান্তবিজ্ঞানং বিজাযেত ন সংশযঃ .. ৬.. ইতি..
ইতি নবমঃ খণ্ডঃ .. ৯..
অথাতঃ সংপ্রবক্ষ্যামি সমাধিং ভবনাশনম্ .
সমাধিঃ সংবিদুত্পত্তিঃ পরজীবৈকতাং প্রতি .. ১..
নিত্যঃ সর্বগতো হ্যাত্মা কূটস্থো দোষবর্জিতঃ .
একঃ সন্ভিদ্যতে ভ্রান্ত্যা মাযযা ন স্বরূপতঃ .. ২..
তস্মাদদ্বৈতমেবাস্তি ন প্রপঞ্চো ন সংসৃতিঃ .
যথাকাশো ঘটাকাশো মঠাকাশ ইতীরিতঃ .. ৩..
তথা ভ্রান্তৈর্দ্বিধা প্রোক্তো হ্যাত্মা জীবেশ্বরাত্মনা .
নাহং দেহো ন চ প্রাণো নেন্দ্রিযাণি মনো নহি .. ৪..
সদা সাক্ষিস্বরূপত্বাচ্ছিব এবাস্মি কেবলঃ .
ইতি ধীর্যা মুনিশ্রেষ্ঠ সা সমাধিরিহোচ্যতে .. ৫..
সাহং ব্রহ্ম ন সংসারী ন মত্তোঽন্যঃ কদাচন .
যথা ফেনতরঙ্গাদি সমুদ্রাদুত্থিতং পুনঃ .. ৬..
সমুদ্রে লীযতে তদ্বজ্জগন্ময্যনুলীযতে .
তস্মান্মনঃ পৃথঙ্ নাস্তি জগন্মাযা চ নাস্তি হি .. ৭..
যস্যৈবং পরমাত্মাযং প্রত্যগ্ভূতঃ প্রকাশিতঃ .
স তু যাতি চ পুংভাবং স্বযং সাক্ষাত্পরামৃতম্ .. ৮..
যদা মনসি চৈতন্যং ভাতি সর্বত্রগং সদা .
যোগিনোঽব্যবধানেন তদা সংপদ্যতে স্বযম্ .. ৯..
যদা সর্বাণি ভূতানি স্বাত্মন্যেব হি পশ্যতি .
সর্বভূতেষু চাত্মানং ব্রহ্ম সংপদ্যতে তদা .. ১০..
যদা সর্বাণি ভূতানি সমাধিস্থো ন পশ্যতি .
একীভূতঃ পরেণাঽসৌ তদা ভবতি কেবলঃ .. ১১..
যদা পশ্যতি চাত্মানং কেবলং পরমার্থতঃ .
মাযামাত্রং জগত্কৃত্স্নং তদা ভবতি নির্বৃতিঃ .. ১২..
এবমুক্ত্বা স ভগবান্দত্তাত্রেযো মহামুনিঃ .
সাংকৃতিঃ স্বস্বরূপেণ সুখমাস্তেঽতিনির্ভযঃ .. ১৩.. ইতি..
ইতি দশমঃ খণ্ডঃ .. ১০..
ॐ আপ্যাযন্তু মমাঙ্গানি বাক্প্রাণশ্চক্ষুঃ শ্রোত্রমথো বলমিন্দ্রিযাণি চ ..
সর্বাণি সর্বং ব্রহ্মোপনিষদং মাহং ব্রহ্ম নিরাকুর্যাং মা মা ব্রহ্ম
নিরাকরোদনিরাকরণমস্ত্বনিরাকরণং মেস্তু তদাত্মনি নিরতে য উপনিষত্সু
ধর্মাস্তে মযি সন্তু তে মযি সন্তু ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি শ্রীজাবালদর্শনোপনিষত্সমাপ্তা ..