ছান্দোগ্য

|| ছান্দোগ্যোপনিষদ্ ||

ॐ  আপ্যাযন্তু মমাঙ্গানি বাক্প্রাণশ্চ্ক্ষুঃ
শ্রোত্রমথো বলমিন্দ্রিযাণি চ সর্বাণি |
সর্বং ব্রহ্মৌপনিষদং মাহং ব্রহ্ম নিরাকুর্যাং মা মা ব্রহ্ম
নিরাকরোদনিকারণমস্ত্বনিকারণং মেঽস্তু |
তদাত্মনি নিরতে য উপনিষত্সু ধর্মাস্তে
মযি সন্তু তে মযি সন্তু ||

|| ॐ শান্তিঃ শান্তিঃ শান্তিঃ ||

——————————————————————————–

 || প্রথমোঽধ্যাযঃ ||

|| প্রথমঃ খণ্ডঃ ||

ওমিত্যেতদক্ষরমুদ্গীথমুপাসীত | 
ওমিতি হ্যুদ্গাযতি তস্যোপব্যাখ্যানম্  || ১. ১. ১||

এষাং ভূতানাং পৃথিবী রসঃ পৃথিব্যা অপো রসঃ |
অপামোষধযো রস ওষধীনাং পুরুষো রসঃ
পুরুষস্য বাগ্রসো বাচ ঋগ্রস ঋচঃ সাম রসঃ
সাম্ন উদ্গীথো রসঃ  || ১. ১. ২||

স এষ রসানাঁরসতমঃ পরমঃ পরার্ধ্যোঽষ্টমো
যদুদ্গীথঃ  || ১. ১. ৩||

কতমা কতমর্ক্কতমত্কতমত্সাম কতমঃ কতম উদ্গীথ
ইতি বিমৃষ্টং ভবতি  || ১. ১. ৪||

বাগেবর্ক্প্রাণঃ সামোমিত্যেতদক্ষরমুদ্গীথঃ |
তদ্বা এতন্মিথুনং যদ্বাক্চ প্রাণশ্চর্ক্চ সাম চ  || ১. ১. ৫||

তদেতন্মিথুনমোমিত্যেতস্মিন্নক্ষরে সঁসৃজ্যতে
যদা বৈ মিথুনৌ সমাগচ্ছত আপযতো বৈ
তাবন্যোন্যস্য কামম্ || ১. ১. ৬||

আপযিতা হ বৈ কামানাং ভবতি য এতদেবং
বিদ্বানক্ষরমুদ্গীথমুপাস্তে  || ১. ১. ৭||

তদ্বা এতদনুজ্ঞাক্ষরং যদ্ধি কিংচানুজানাত্যোমিত্যেব
তদাহৈষো এব সমৃদ্ধির্যদনুজ্ঞা সমর্ধযিতা হ বৈ
কামানাং ভবতি য এতদেবং বিদ্বানক্ষরমুদ্গীথমুপাস্তে  || ১. ১. ৮||

তেনেযং ত্রযীবিদ্যা বর্ততে ওমিত্যাশ্রাবযত্যোমিতি
শঁসত্যোমিত্যুদ্গাযত্যেতস্যৈবাক্ষরস্যাপচিত্যৈ মহিম্না
রসেন || ১. ১. ৯||

তেনোভৌ কুরুতো যশ্চৈতদেবং বেদ যশ্চ ন বেদ |
নানা তু বিদ্যা চাবিদ্যা চ যদেব বিদ্যযা করোতি
শ্রদ্ধযোপনিষদা তদেব বীর্যবত্তরং ভবতীতি
খল্বেতস্যৈবাক্ষরস্যোপব্যাখ্যানং ভবতি  || ১. ১. ১০||

|| ইতি প্রথমঃ খণ্ডঃ ||

|| দ্বিতীযঃ খণ্ডঃ ||

দেবাসুরা হ বৈ যত্র সংযেতিরে  উভযে প্রাজাপত্যাস্তদ্ধ
দেবা উদ্গীথমাজহ্রুরনেনৈনানভিভবিষ্যাম ইতি  || ১. ২. ১||

তে হ নাসিক্যং প্রাণমুদ্গীথমুপাসাংচক্রিরে
তঁ হাসুরাঃ পাপ্মনা বিবিধুস্তস্মাত্তেনোভযং জিঘ্রতি
সুরভি চ দুর্গন্ধি চ পাপ্মনা হ্যেষ বিদ্ধঃ  || ১. ২. ২||

অথ হ বাচমুদ্গীথমুপাসাংচক্রিরে তাঁ হাসুরাঃ পাপ্মনা
বিবিধুস্তস্মাত্তযোভযং বদতি সত্যং চানৃতং চ
পাপ্মনা হ্যেষা বিদ্ধা  || ১. ২. ৩||

অথ হ চক্ষুরুদ্গীথমুপাসাংচক্রিরে তদ্ধাসুরাঃ
পাপ্মনা বিবিধুস্তস্মাত্তেনোভযং পশ্যতি দর্শনীযং
চাদর্শনীযং চ পাপ্মনা হ্যেতদ্বিদ্ধম্ || ১. ২. ৪||

অথ হ শ্রোত্রমুদ্গীথমুপাসাংচক্রিরে তদ্ধাসুরাঃ
পাপ্মনা বিবিধুস্তস্মাত্তেনোভযঁ শৃণোতি শ্রবণীযং
চাশ্রবণীযং চ পাপ্মনা হ্যেতদ্বিদ্ধম্  || ১. ২. ৫||

অথ হ মন উদ্গীথমুপাসাংচক্রিরে তদ্ধাসুরাঃ
পাপ্মনা বিবিধুস্তস্মাত্তেনোভযঁসংকল্পতে সংকল্পনীযংচ
চাসংকল্পনীযং চ পাপ্মনা হ্যেতদ্বিদ্ধম্  || ১. ২. ৬||

অথ হ য এবাযং মুখ্যঃ প্রাণস্তমুদ্গীথমুপাসাংচক্রিরে
তঁহাসুরা ঋত্বা বিদধ্বংসুর্যথাশ্মানমাখণমৃত্বা
বিধ্বঁসেতৈবম্  || ১. ২. ৭||

যথাশ্মানমাখণমৃত্বা বিধ্বঁসত এবঁ হৈব
স বিধ্বঁসতে য এবংবিদি পাপং কামযতে
যশ্চৈনমভিদাসতি স এষোঽশ্মাখণঃ  || ১. ২. ৮||

নৈবৈতেন সুরভি ন দুর্গন্ধি বিজানাত্যপহতপাপ্মা হ্যেষ
তেন যদশ্নাতি যত্পিবতি তেনেতরান্প্রাণানবতি এতমু
এবান্ততোঽবিত্ত্বোত্ক্রমতি ব্যাদদাত্যেবান্তত ইতি || ১. ২. ৯||

তঁ হাঙ্গিরা উদ্গীথমুপাসাংচক্র এতমু এবাঙ্গিরসং
মন্যন্তেঽঙ্গানাং যদ্রসঃ || ১. ২. ১০||
 
তেন তঁ হ বৃহস্পতিরুদ্গীথমুপাসাংচক্র এতমু এব বৃহস্পতিং
মন্যন্তে বাগ্ঘি বৃহতী তস্যা এষ পতিঃ  || ১. ২. ১১ ||

তেন তঁ হাযাস্য উদ্গীথমুপাসাংচক্র এতমু এবাযাস্যং
মন্যন্ত আস্যাদ্যদযতে  || ১. ২. ১২||

তেন তঁহ বকো দাল্ভ্যো বিদাংচকার |
স হ নৈমিশীযানামুদ্গাতা বভূব স হ স্মৈভ্যঃ
কামানাগাযতি  || ১. ২. ১৩||

আগাতা হ বৈ কামানাং ভবতি য এতদেবং
বিদ্বানক্ষরমুদ্গীথমুপাস্ত ইত্যধ্যাত্মম্  || ১. ২. ১৪||

|| ইতি দ্বিতীযঃ খণ্ডঃ ||

|| তৃতীযঃ খণ্ডঃ ||

অথাধিদৈবতং য এবাসৌ তপতি
তমুদ্গীথমুপাসীতোদ্যন্বা এষ প্রজাভ্য উদ্গাযতি |
উদ্যঁস্তমো ভযমপহন্ত্যপহন্তা হ বৈ ভযস্য
তমসো ভবতি য এবং বেদ  || ১. ৩. ১||

সমান উ এবাযং চাসৌ চোষ্ণোঽযমুষ্ণোঽসৌ
স্বর ইতীমমাচক্ষতে স্বর ইতি প্রত্যাস্বর ইত্যমুং
তস্মাদ্বা এতমিমমমুং চোদ্গীথমুপাসীত  || ১. ৩. ২||

অথ খলু ব্যানমেবোদ্গীথমুপাসীত যদ্বৈ প্রাণিতি
স প্রাণো যদপানিতি সোঽপানঃ  |
অথ যঃ প্রাণাপানযোঃ সংধিঃ স ব্যানো যো ব্যানঃ
সা বাক্ |
তস্মাদপ্রাণন্ননপানন্বাচমভিব্যাহরতি  || ১. ৩. ৩||

যা বাক্সর্ক্তস্মাদপ্রাণন্ননপানন্নৃচমভিব্যাহরতি
যর্ক্তত্সাম তস্মাদপ্রাণন্ননপানন্সাম গাযতি
যত্সাম স উদ্গীথস্তস্মাদপ্রাণন্ননপানন্নুদ্গাযতি  || ১. ৩. ৪||

অতো যান্যন্যানি বীর্যবন্তি কর্মাণি যথাগ্নের্মন্থনমাজেঃ
সরণং দৃঢস্য ধনুষ আযমনমপ্রাণন্ননপানঁস্তানি
করোত্যেতস্য হেতোর্ব্যানমেবোদ্গীথমুপাসীত || ১. ৩. ৫||

অথ খলূদ্গীথাক্ষরাণ্যুপাসীতোদ্গীথ ইতি
প্রাণ এবোত্প্রাণেন হ্যুত্তিষ্ঠতি বাগ্গীর্বাচো হ
গির ইত্যাচক্ষতেঽন্নং থমন্নে হীদঁসর্বঁস্থিতম্ || ১. ৩. ৬||

দ্যৌরেবোদন্তরিক্ষং গীঃ পৃথিবী থমাদিত্য
এবোদ্বাযুর্গীরগ্নিস্থঁ সামবেদ এবোদ্যজুর্বেদো
গীরৃগ্বেদস্থং দুগ্ধেঽস্মৈ বাগ্দোহং যো বাচো
দোহোঽন্নবানন্নাদো ভবতি য এতান্যেবং
বিদ্বানুদ্গীথাক্ষরাণ্যুপাস্ত উদ্গীথ ইতি  || ১. ৩. ৭||

অথ খল্বাশীঃসমৃদ্ধিরুপসরণানীত্যুপাসীত
যেন সাম্না স্তোষ্যন্স্যাত্তত্সামোপধাবেত্ || ১. ৩. ৮|| 

যস্যামৃচি তামৃচং  যদার্ষেযং তমৃষিং  যাং
দেবতামভিষ্টোষ্যন্স্যাত্তাং দেবতামুপধাবেত্  || ১. ৩. ৯||

যেন চ্ছন্দসা স্তোষ্যন্স্যাত্তচ্ছন্দ উপধাবেদ্যেন
স্তোমেন স্তোষ্যমাণঃ স্যাত্তঁস্তোমমুপধাবেত্  || ১. ৩. ১০||

যাং দিশমভিষ্টোষ্যন্স্যাত্তাং দিশমুপধাবেত্  || ১. ৩. ১১||

আত্মানমন্তত উপসৃত্য স্তুবীত কামং
ধ্যাযন্নপ্রমত্তোঽভ্যাশো হ যদস্মৈ স কামঃ সমৃধ্যেত
যত্কামঃ স্তুবীতেতি যত্কামঃ স্তুবীতেতি  || ১. ৩. ১২||

|| ইতি তৃতীযঃ খণ্ডঃ ||

|| চতুর্থঃ খণ্ডঃ ||

ওমিত্যেতদক্ষরমুদ্গীথমুপাসীতোমিতি হ্যুদ্গাযতি
তস্যোপব্যাখ্যানম্  || ১. ৪. ১||

দেবা বৈ মৃত্যোর্বিভ্যতস্ত্রযীং বিদ্যাং প্রাবিশঁস্তে
ছন্দোভিরচ্ছাদযন্যদেভিরচ্ছাদযঁস্তচ্ছন্দসাং
ছন্দস্ত্বম্  || ১. ৪. ২||

তানু তত্র মৃত্যুর্যথা মত্স্যমুদকে পরিপশ্যেদেবং
পর্যপশ্যদৃচি সাম্নি যজুষি |
তে নু বিদিত্বোর্ধ্বা ঋচঃ সাম্নো যজুষঃ স্বরমেব
প্রাবিশন্ || ১. ৪. ৩||

যদা বা ঋচমাপ্নোত্যোমিত্যেবাতিস্বরত্যেবঁসামৈবং
যজুরেষ উ স্বরো যদেতদক্ষরমেতদমৃতমভযং তত্প্রবিশ্য
দেবা অমৃতা অভযা অভবন্  || ১. ৪. ৪||

স য এতদেবং বিদ্বানক্ষরং প্রণৌত্যেতদেবাক্ষরঁ
স্বরমমৃতমভযং প্রবিশতি তত্প্রবিশ্য যদমৃতা
দেবাস্তদমৃতো ভবতি  || ১. ৪. ৫||

|| ইতি চতুর্থঃ খণ্ডঃ ||

|| পঞ্চমঃ খণ্ডঃ ||

অথ খলু য উদ্গীথঃ স প্রণবো যঃ প্রণবঃ স উদ্গীথ
ইত্যসৌ বা আদিত্য উদ্গীথ এষ প্রণব ওমিতি
হ্যেষ স্বরন্নেতি  || ১. ৫. ১||

এতমু এবাহমভ্যগাসিষং তস্মান্মম ত্বমেকোঽসীতি
হ কৌষীতকিঃ পুত্রমুবাচ রশ্মীঁস্ত্বং পর্যাবর্তযাদ্বহবো
বৈ তে ভবিষ্যন্তীত্যধিদৈবতম্  || ১. ৫. ২||

অথাধ্যাত্মং য এবাযং মুখ্যঃ
প্রাণস্তমুদ্গীথমুপাসীতোমিতি হ্যেষ স্বরন্নেতি  || ১. ৫. ৩||

এতমু এবাহমভ্যগাসিষং তস্মান্মম ত্বমেকোঽসীতি হ
কৌষীতকিঃ পুত্রমুবাচ প্রাণাঁস্ত্বং
ভূমানমভিগাযতাদ্বহবো বৈ মে ভবিষ্যন্তীতি  || ১. ৫. ৪||

অথ খলু য উদ্গীথঃ স প্রণবো যঃ প্রণবঃ
স উদ্গীথ ইতি হোতৃষদনাদ্ধৈবাপি
দুরুদ্গীথমনুসমাহরতীত্যনুসমাহরতীতি  ||| ১. ৫. ৫||

|| ইতি পঞ্চমঃ খণ্ডঃ ||

|| ষষ্ঠঃ খণ্ডঃ ||

ইযমেবর্গগ্নিঃ সাম তদেতদেতস্যামৃচ্যধ্যূঢ়ঁ সাম
তস্মাদৃচ্যধ্যূঢঁসাম গীযত ইযমেব
সাগ্নিরমস্তত্সাম  || ১. ৬. ১||

অন্তরিক্ষমেবর্গ্বাযুঃ সাম তদেতদেতস্যামৃচ্যধ্যূঢঁ সাম
তস্মাদৃচ্যধ্যূঢঁ সাম গীযতেঽন্তরিক্ষমেব সা
বাযুরমস্তত্সাম  || ১. ৬. ২||

দ্যৌরেবর্গাদিত্যঃ সাম তদেতদেতস্যামৃচ্যধ্যূঢঁ সাম
তস্মাদৃচ্যধ্যূঢঁ সাম গীযতে দ্যৌরেব
সাদিত্যোঽমস্তত্সাম  || ১. ৬. ৩||

নক্ষত্রান্যেবর্ক্চন্দ্রমাঃ সাম তদেতদেতস্যামৃচ্যধ্যূঢঁ সাম
তস্মাদৃচ্যধ্যূঢঁ সাম গীযতে নক্ষত্রাণ্যেব সা চন্দ্রমা
অমস্তত্সাম  || ১. ৬. ৪||

অথ যদেতদাদিত্যস্য শুক্লং ভাঃ সৈবর্গথ যন্নীলং পরঃ
কৃষ্ণং তত্সাম তদেতদেতস্যামৃচ্যধ্যূঢঁ সাম
তস্মাদৃচ্যধ্যূঢঁ সাম গীযতে  || ১. ৬. ৫||
 
অথ যদেবৈতদাদিত্যস্য শুক্লং ভাঃ সৈব
সাথ যন্নীলং পরঃ কৃষ্ণং তদমস্তত্সামাথ
য এষোঽন্তরাদিত্যে হিরণ্মযঃ পুরুষো দৃশ্যতে
হিরণ্যশ্মশ্রুর্হিরণ্যকেশ আপ্রণস্বাত্সর্ব এব
সুবর্ণঃ  || ১. ৬. ৬||

তস্য যথা কপ্যাসং পুণ্ডরীকমেবমক্ষিণী
তস্যোদিতি নাম স এষ সর্বেভ্যঃ পাপ্মভ্য উদিত
উদেতি হ বৈ সর্বেভ্যঃ পাপ্মভ্যো য এবং বেদ  || ১. ৬. ৭||

তস্যর্ক্চ সাম চ গেষ্ণৌ
তস্মাদুদ্গীথস্তস্মাত্ত্বেবোদ্গাতৈতস্য হি গাতা
স এষ যে চামুষ্মাত্পরাঞ্চো লোকাস্তেষাং চেষ্টে
দেবকামানাং চেত্যধিদৈবতম্ || ১. ৬. ৮||

|| ইতি ষষ্ঠঃ খণ্ডঃ ||

|| সপ্তমঃ খণ্ডঃ ||

অথাধ্যাত্মং বাগেবর্ক্প্রাণঃ সাম তদেতদেতস্যামৃচ্যধ্যূঢঁ
সাম তস্মাদৃচ্যধ্যূঢঁসাম গীযতে|
বাগেব সা প্রাণোঽমস্তত্সাম || ১. ৭. ১||

চক্ষুরেবর্গাত্মা সাম তদেতদেতস্যামৃচ্যধ্যূঢঁসাম
তস্মাদৃচ্যধ্যূঢঁসাম গীযতে |
চক্ষুরেব সাত্মামস্তত্সাম  || ১. ৭. ২||

শ্রোত্রমেবর্ঙ্মনঃ সাম তদেতদেতস্যামৃচ্যধ্যূঢঁসাম
তস্মাদৃচ্যধ্যূঢঁসাম গীযতে  |
শ্রোত্রমেব সা মনোঽমস্তত্সাম   || ১. ৭. ৩||

অথ যদেতদক্ষ্ণঃ শুক্লং ভাঃ সৈবর্গথ যন্নীলং পরঃ
কৃষ্ণং তত্সাম তদেতদেতস্যামৃচ্যধ্যূঢঁসাম
তস্মাদৃচ্যধ্যূঢঁসাম গীযতে |
অথ যদেবৈতদক্ষ্ণঃ শুক্লং ভাঃ সৈব সাথ যন্নীলং পরঃ
কৃষ্ণং তদমস্তত্সাম   || ১. ৭. ৪||

অথ য এষোঽন্তরক্ষিণি পুরুষো দৃশ্যতে সৈবর্ক্তত্সাম
তদুক্থং তদ্যজুস্তদ্ব্রহ্ম তস্যৈতস্য তদেব রূপং যদমুষ্য রূপং 
যাবমুষ্য গেষ্ণৌ তৌ  গেষ্ণৌ যন্নাম তন্নাম  || ১. ৭. ৫||

স এষ যে চৈতস্মাদর্বাঞ্চো লোকাস্তেষাং চেষ্টে মনুষ্যকামানাং
চেতি তদ্য ইমে বীণাযাং গাযন্ত্যেতং তে গাযন্তি
তস্মাত্তে ধনসনযঃ || ১. ৭. ৬||

অথ য এতদেবং বিদ্বান্সাম গাযত্যুভৌ স গাযতি
সোঽমুনৈব স এষ চামুষ্মাত্পরাঞ্চো
লোকাস্তাঁশ্চাপ্নোতি দেবকামাঁশ্চ  || ১. ৭. ৭||

অথানেনৈব যে চৈতস্মাদর্বাঞ্চো লোকাস্তাঁশ্চাপ্নোতি
মনুষ্যকামাঁশ্চ তস্মাদু হৈবংবিদুদ্গাতা ব্রূযাত্ || ১. ৭. ৮||

কং তে কামমাগাযানীত্যেষ হ্যেব কামাগানস্যেষ্টে য
এবং বিদ্বান্সাম গাযতি সাম গাযতি  || ১. ৭. ৯||

|| ইতি সপ্তমঃ খণ্ডঃ ||

|| অষ্টমঃ খণ্ডঃ ||

ত্রযো হোদ্গীথে কুশলা বভূবুঃ শিলকঃ শালাবত্যশ্চৈকিতাযনো
দাল্ভ্যঃ প্রবাহণো জৈবলিরিতি তে হোচুরুদ্গীথে
বৈ কুশলাঃ স্মো হন্তোদ্গীথে কথাং বদাম ইতি || ১. ৮. ১|| 

তথেতি হ সমুপবিবিশুঃ স হ প্রাবহণো জৈবলিরুবাচ 
ভগবন্তাবগ্রে বদতাং ব্রাহ্মণযোর্বদতোর্বাচঁ শ্রোষ্যামীতি
|| ১. ৮. ২||

স হ শিলকঃ শালাবত্যশ্চৈকিতাযনং দাল্ভ্যমুবাচ
হন্ত ত্বা পৃচ্ছানীতি  পৃচ্ছেতি হোবাচ  || ১. ৮. ৩||

কা সাম্নো গতিরিতি স্বর ইতি হোবাচ স্বরস্য কা
গতিরিতি   প্রাণ ইতি হোবাচ প্রাণস্য কা
গতিরিত্যন্নমিতি হোবাচান্নস্য কা গতিরিত্যাপ
ইতি হোবাচ  || ১. ৮. ৪||

অপাং কা গতিরিত্যসৌ লোক ইতি হোবাচামুষ্য লোকস্য
কা গতিরিতি ন স্বর্গং লোকমিতি নযেদিতি হোবাচ স্বর্গং
বযং লোকঁ সামাভিসংস্থাপযামঃ স্বর্গসঁস্তাবঁহি
সামেতি  || ১. ৮. ৫||

তঁ হ শিলকঃ শালাবত্যশ্চৈকিতাযনং
দাল্ভ্যমুবাচাপ্রতিষ্ঠিতং বৈ কিল তে দাল্ভ্য সাম  
যস্ত্বেতর্হি ব্রূযান্মূর্ধা তে বিপতিষ্যতীতি মূর্ধা তে
বিপতেদিতি || ১. ৮. ৬||

হন্তাহমেতদ্ভগবতো বেদানীতি বিদ্ধীতি হোবাচামুষ্য
লোকস্য কা গতিরিত্যযং লোক ইতি হোবাচাস্য লোকস্য
কা গতিরিতি ন প্রতিষ্ঠাং লোকমিতি নযেদিতি হোবাচ  
প্রতিষ্ঠাং বযং লোকঁ সামাভিসঁস্থাপযামঃ 
প্রতিষ্ঠাসঁস্তাবঁ হি সামেতি || ১. ৮. ৭||

তঁ হ প্রবাহণো জৈবলিরুবাচান্তবদ্বৈ কিল তে
শালাবত্য সাম   যস্ত্বেতর্হি ব্রূযান্মূর্ধা তে বিপতিষ্যতীতি
মূর্ধা তে বিপতেদিতি  হন্তাহমেতদ্ভগবতো বেদানীতি
বিদ্ধীতি হোবাচ  || ১. ৮. ৮||

|| ইতি অষ্টমঃ খণ্ডঃ ||

|| নবমঃ খণ্ডঃ ||

অস্য লোকস্য কা গতিরিত্যাকাশ ইতি হোবাচ  
সর্বাণি হ বা ইমানি ভূতান্যাকাশাদেব সমুত্পদ্যন্ত  
আকাশং প্রত্যস্তং যন্ত্যাকাশো হ্যেবৈভ্যো জ্যাযানকাশঃ
পরাযণম্ || ১. ৯. ১||

স এষ পরোবরীযানুদ্গীথঃ স এষোঽনন্তঃ পরোবরীযো
হাস্য ভবতি পরোবরীযসো হ লোকাঞ্জযতি
য এতদেবং বিদ্বান্পরোবরীযাঁসমুদ্গীথমুপাস্তে || ১. ৯. ২||

তঁ হৈতমতিধন্বা শৌনক উদরশাণ্ডিল্যাযোক্ত্বোবাচ  
যাবত্ত এনং প্রজাযামুদ্গীথং বেদিষ্যন্তে পরোবরীযো
হৈভ্যস্তাবদস্মিঁল্লোকে জীবনং ভবিষ্যতি || ১. ৯. ৩||

তথামুষ্মিঁল্লোকে লোক ইতি স য এতমেবং বিদ্বানুপাস্তে
পরোবরীয এব হাস্যাস্মিঁল্লোকে জীবনং ভবতি
তথামুষ্মিঁল্লোকে লোক ইতি লোকে লোক ইতি || ১. ৯. ৪||

|| ইতি নবমঃ খণ্ডঃ ||

|| দশমঃ খণ্ডঃ ||

মটচীহতেষু কুরুষ্বাটিক্যা সহ জাযযোষস্তির্হ
চাক্রাযণ ইভ্যগ্রামে প্রদ্রাণক উবাস || ১. ১০. ১|| 

স হেভ্যং কুল্মাষান্খাদন্তং বিভিক্ষে তঁ হোবাচ |  
নেতোঽন্যে বিদ্যন্তে যচ্চ যে ম ইম উপনিহিতা ইতি
|| ১. ১০. ২||

এতেষাং মে দেহীতি হোবাচ তানস্মৈ প্রদদৌ
হন্তানুপানমিত্যুচ্ছিষ্টং বৈ মে পীতঁস্যাদিতি হোবাচ
|| ১. ১০. ৩||

ন স্বিদেতেঽপ্যুচ্ছিষ্টা ইতি ন বা
অজীবিষ্যমিমানখাদন্নিতি হোবাচ কামো ম
উদপানমিতি || ১. ১০. ৪||

স হ খাদিত্বাতিশেষাঞ্জাযাযা আজহার সাগ্র এব
সুভিক্ষা বভূব তান্প্রতিগৃহ্য নিদধৌ || ১. ১০. ৫||

স হ প্রাতঃ সংজিহান উবাচ যদ্বতান্নস্য লভেমহি
লভেমহি ধনমাত্রাঁরাজাসৌ যক্ষ্যতে স মা
সর্বৈরার্ত্বিজ্যৈর্বৃণীতেতি || ১. ১০. ৬||

তং জাযোবাচ হন্ত পত ইম এব কুল্মাষা ইতি  
তান্খাদিত্বামুং যজ্ঞং বিততমেযায || ১. ১০. ৭||

তত্রোদ্গাতৄনাস্তাবে স্তোষ্যমাণানুপোপবিবেশ  
স হ প্রস্তোতারমুবাচ || ১. ১০. ৮||

প্রস্তোতর্যা দেবতা প্রস্তাবমন্বাযত্তা তাং চেদবিদ্বান্প্রস্তোষ্যসি
মূর্ধা তে বিপতিষ্যতীতি  || ১. ১০. ৯||

এবমেবোদ্গাতারমুবাচোদ্গাতর্যা দেবতোদ্গীথমন্বাযত্তা
তাং চেদবিদ্বানুদ্গাস্যসি মূর্ধা তে বিপতিষ্যতীতি || ১. ১০. ১০||

এবমেব প্রতিহর্তারমুবাচ প্রতিহর্তর্যা দেবতা
প্রতিহারমন্বাযত্তা তাং চেদবিদ্বান্প্রতিহরিষ্যসি মূর্ধা তে
বিপতিষ্যতীতি তে হ সমারতাস্তূষ্ণীমাসাংচক্রিরে
|| ১. ১০. ১১|| 

|| ইতি দশমঃ খণ্ডঃ ||

|| একাদশঃ খণ্ডঃ ||

অথ হৈনং যজমান উবাচ  ভগবন্তং বা অহং
বিবিদিষাণীত্যুষস্তিরস্মি চাক্রাযণ ইতি হোবাচ  || ১. ১১. ১||

স হোবাচ ভগবন্তং বা অহমেভিঃ সর্বৈরার্ত্বিজ্যৈঃ
পর্যৈষিষং ভগবতো বা অহমবিত্ত্যান্যানবৃষি || ১. ১১. ২||

ভগবাঁস্ত্বেব মে সর্বৈরার্ত্বিজ্যৈরিতি তথেত্যথ
তর্হ্যেত এব সমতিসৃষ্টাঃ  স্তুবতাং যাবত্ত্বেভ্যো ধনং
দদ্যাস্তাবন্মম দদ্যা ইতি তথেতি হ যজমান উবাচ
|| ১. ১১. ৩||

অথ হৈনং প্রস্তোতোপসসাদ প্রস্তোতর্যা দেবতা
প্রস্তাবমন্বাযত্তা তাং চেদবিদ্বান্প্রস্তোষ্যসি মূর্ধা তে
বিপতিষ্যতীতি মা ভগবানবোচত্কতমা সা দেবতেতি
|| ১. ১১. ৪||

প্রাণ ইতি হোবাচ সর্বাণি হ বা ইমানি ভূতানি
প্রাণমেবাভিসংবিশন্তি প্রাণমভ্যুজ্জিহতে সৈষা দেবতা
প্রস্তাবমন্বাযত্তা তাং চেদবিদ্বান্প্রাস্তোষ্যো
মূর্ধা তে ব্যপতিষ্যত্তথোক্তস্য মযেতি || ১. ১১. ৫||

অথ হৈনমুদ্গাতোপসসাদোদ্গাতর্যা দেবতোদ্গীথমন্বাযত্তা
তাং চেদবিদ্বানুদ্গাস্যসি মূর্ধা তে বিপতিষ্যতীতি
মা ভগবানবোচত্কতমা সা দেবতেতি || ১. ১১. ৬||

আদিত্য ইতি হোবাচ সর্বাণি হ বা ইমানি
ভূতান্যাদিত্যমুচ্চৈঃ সন্তং গাযন্তি সৈষা
দেবতোদ্গীথমন্বাযত্তা তাং চেদবিদ্বানুদগাস্যো
মূর্ধা তে ব্যপতিষ্যত্তথোক্তস্য মযেতি || ১. ১১. ৭||

অথ হৈনং প্রতিহর্তোপসসাদ প্রতিহর্তর্যা দেবতা
প্রতিহারমন্বাযত্তা তাং চেদবিদ্বান্প্রতিহরিষ্যসি
মূর্ধা তে বিপতিষ্যতীতি মা ভগবানবোচত্কতমা
সা দেবতেতি || ১. ১১. ৮||

অন্নমিতি হোবাচ সর্বাণি হ বা ইমানি ভূতন্যন্নমেব
প্রতিহরমাণানি জীবন্তি সৈষা দেবতা প্রতিহারমন্বাযত্তা  
তাং চেদবিদ্বান্প্রত্যহরিষ্যো মূর্ধা তে ব্যপতিষ্যত্তথোক্তস্য
মযেতি তথোক্তস্য মযেতি || ১. ১১. ৯||

|| ইতি একাদশঃ খণ্ডঃ ||

|| দ্বাদশঃ খণ্ডঃ ||

অথাতঃ শৌব উদ্গীথস্তদ্ধ বকো দাল্ভ্যো গ্লাবো বা
মৈত্রেযঃ স্বাধ্যাযমুদ্বব্রাজ || ১. ১২. ১||
 
তস্মৈ শ্বা শ্বেতঃ প্রাদুর্বভূব তমন্যে শ্বান
উপসমেত্যোচুরন্নং নো ভগবানাগাযত্বশনাযামবা
ইতি  || ১. ১২. ২||

তান্হোবাচেহৈব মা প্রাতরুপসমীযাতেতি তদ্ধ বকো দাল্ভ্যো
গ্লাবো বা মৈত্রেযঃ প্রতিপালযাংচকার  || ১. ১২. ৩||

তে হ যথৈবেদং বহিষ্পবমানেন স্তোষ্যমাণাঃ সঁরব্ধাঃ
সর্পন্তীত্যেবমাসসৃপুস্তে হ সমুপবিশ্য
হিং চক্রুঃ  || ১. ১২. ৪||

ও৩মদা৩মোং৩পিবা৩মোং৩ দেবো বরুণঃ
প্রজপতিঃ সবিতা২ন্নমিহা২হরদন্নপতে৩ঽন্নমিহা
২হরা২হরো৩মিতি || ১. ১২. ৫||

|| ইতি দ্বাদশঃ খণ্ডঃ ||

|| ত্রযোদশঃ খণ্ডঃ ||

অযং বাব লোকো হাউকারঃ বাযুর্হাইকারশ্চন্দ্রমা
অথকারঃ | আত্মেহকারোঽগ্নিরীকারঃ || ১. ১৩. ১||

আদিত্য ঊকারো নিহব একারো বিশ্বে দেবা
ঔহোযিকারঃ  প্রজপতির্হিংকারঃ প্রাণঃ স্বরোঽন্নং যা 
বাগ্বিরাট্ || ১. ১৩. ২||

অনিরুক্তস্ত্রযোদশঃ স্তোভঃ সংচরো হুংকারঃ  || ১. ১৩. ৩||
 
দুগ্ধেঽস্মৈ বাগ্দোহং যো বাচো দোহোঽন্নবানন্নাদো ভবতি  
য এতামেবঁসাম্নামুপনিষদং বেদোপনিষদং বেদেতি || ১. ১৩. ৪||

|| ইতি ত্রযোদশঃ খণ্ডঃ ||

 || ইতি প্রথমোঽধ্যাযঃ ||

——————————————————————————–

 || দ্বিতীযোঽধ্যাযঃ ||

|| প্রথমঃ খণ্ডঃ ||

সমস্তস্য খলু সাম্ন উপাসনঁ সাধু যত্খলু সাধু
তত্সামেত্যাচক্ষতে   যদসাধু তদসামেতি || ২. ১. ১||
 
তদুতাপ্যাহুঃ সাম্নৈনমুপাগাদিতি সাধুনৈনমুপাগাদিত্যেব
তদাহুরসাম্নৈনমুপাগাদিত্যসাধুনৈনমুপগাদিত্যেব
তদাহুঃ || ২. ১. ২||

অথোতাপ্যাহুঃ সাম নো বতেতি যত্সাধু ভবতি সাধু বতেত্যেব
তদাহুরসাম নো বতেতি যদসাধু ভবত্যসাধু বতেত্যেব
তদাহুঃ || ২. ১. ৩||

স য এতদেবং বিদ্বানসাধু সামেত্যুপাস্তেঽভ্যাশো হ যদেনঁ
সাধবো ধর্মা আ চ গচ্ছেযুরুপ চ নমেযুঃ || ২. ১. ৪||

|| ইতি প্রথমঃ খণ্ডঃ ||

|| দ্বিতীযঃ খণ্ডঃ ||

লোকেষু পঞ্চবিধঁ সামোপাসীত পৃথিবী হিংকারঃ  |
অগ্নিঃ প্রস্তাবোঽন্তরিক্ষমুদ্গীথ আদিত্যঃ প্রতিহারো
দ্যৌর্নিধনমিত্যূর্ধ্বেষু  || ২. ২. ১||

অথাবৃত্তেষু দ্যৌর্হিংকার আদিত্যঃ
প্রস্তাবোঽন্তরিক্ষমুদ্গীথোঽগ্নিঃ প্রতিহারঃ পৃথিবী
নিধনম্  || ২. ২. ২||

কল্পন্তে হাস্মৈ লোকা ঊর্ধ্বাশ্চাবৃত্তাশ্চ য এতদেবং
বিদ্বাঁল্লোকেষু পঞ্চবিধং সামোপাস্তে || ২. ২. ৩||

|| ইতি দ্বিতীযঃ খণ্ডঃ ||

|| তৃতীযঃ খণ্ডঃ ||

বৃষ্টৌ পঞ্চবিধঁ সামোপাসীত পুরোবাতো হিংকারো 
মেঘো জাযতে স প্রস্তাবো বর্ষতি স উদ্গীথো বিদ্যোততে
স্তনযতি স প্রতিহার উদ্গৃহ্ণাতি তন্নিধনম্ || ২. ৩. ১||

বর্ষতি হাস্মৈ বর্ষযতি হ য এতদেবং বিদ্বান্বৃষ্টৌ
পঞ্চবিধঁসামোপাস্তে || ২. ৩. ২||

|| ইতি তৃতীযঃ খণ্ডঃ ||

|| চতুর্থঃ খণ্ডঃ ||

সর্বাস্বপ্সু পঞ্চবিধঁসামোপাসীত মেঘো যত্সংপ্লবতে
স হিংকারো যদ্বর্ষতি স প্রস্তাবো যাঃ প্রাচ্যঃ স্যন্দন্তে
স উদ্গীথো যাঃ  প্রতীচ্যঃ স প্রতিহারঃ
সমুদ্রো নিধনম্ || ২. ৪. ১||

ন হাপ্সু প্রৈত্যপ্সুমান্ভবতি য এতদেবং বিদ্বান্সর্বাস্বপ্সু
পঞ্চবিধঁসামোপাস্তে  || ২. ৪. ২||

|| ইতি চতুর্থঃ খণ্ডঃ ||

|| পঞ্চমঃ খণ্ডঃ ||

ঋতুষু পঞ্চবিধঁ সামোপাসীত বসন্তো হিংকারঃ
গ্রীষ্মঃ  প্রস্তাবো বর্ষা উদ্গীথঃ শরত্প্রতিহারো
হেমন্তো নিধনম্ || ২. ৫. ১||

কল্পন্তে হাস্মা ঋতব ঋতুমান্ভবতি য এতদেবং
বিদ্বানৃতুষু পঞ্চবিধঁ সামোপাস্তে || ২. ৫. ২||

|| ইতি পঞ্চমঃ খণ্ডঃ ||

|| ষষ্ঠঃ খণ্ডঃ ||

পশুষু পঞ্চবিধঁ সামোপাসীতাজা হিংকারোঽবযঃ
প্রস্তাবো গাব উদ্গীথোঽশ্বাঃ প্রতিহারঃ
পুরুষো নিধনম্  || ২. ৬. ১||

ভবন্তি হাস্য পশবঃ পশুমান্ভবতি য এতদেবং
বিদ্বান্পশুষু পঞ্চবিধঁ সামোপাস্তে  || ২. ৬. ২||

|| ইতি ষষ্ঠঃ খণ্ডঃ ||

|| সপ্তমঃ খণ্ডঃ ||

প্রাণেষু পঞ্চবিধং পরোবরীযঃ সামোপাসীত প্রাণো
হিংকারো বাক্প্রস্তাবশ্চক্ষুরুদ্গীথঃ শ্রোত্রং প্রতিহারো
মনো নিধনং পরোবরীযাঁসি বা এতানি || ২. ৭. ১||

পরোবরীযো হাস্য ভবতি পরোবরীযসো হ লোকাঞ্জযতি
য এতদেবং বিদ্বান্প্রাণেষু পঞ্চবিধং পরোবরীযঃ
সামোপাস্ত ইতি তু পঞ্চবিধস্য || ২. ৭. ২||

|| ইতি সপ্তমঃ খণ্ডঃ ||

|| অষ্টমঃ খণ্ডঃ ||

অথ সপ্তবিধস্য বাচি সপ্তবিধ্ঁ সামোপাসীত
যত্কিংচ বাচো হুমিতি স হিংকারো যত্প্রেতি স প্রস্তাবো
যদেতি স আদিঃ   || ২. ৮. ১||

যদুদিতি স উদ্গীথো যত্প্রতীতি স প্রতিহারো
যদুপেতি স উপদ্রবো যন্নীতি তন্নিধনম্ || ২. ৮. ২||

দুগ্ধেঽস্মৈ বাগ্দোহং যো বাচো দোহোঽন্নবানন্নাদো ভবতি 
য এতদেবং বিদ্বান্বাচি সপ্তবিধঁ সামোপাস্তে  || ২. ৮. ৩||

|| ইতি অষ্টমঃ খণ্ডঃ ||

|| নবমঃ খণ্ডঃ ||

অথ খল্বমুমাদিত্যঁসপ্তবিধঁ সামোপাসীত সর্বদা
সমস্তেন সাম মাং প্রতি মাং প্রতীতি সর্বেণ
সমস্তেন সাম  || ২. ৯. ১||

তস্মিন্নিমানি সর্বাণি ভূতান্যন্বাযত্তানীতি
বিদ্যাত্তস্য যত্পুরোদযাত্স হিংকারস্তদস্য
পশবোঽন্বাযত্তাস্তস্মাত্তে হিং কুর্বন্তি
হিংকারভাজিনো হ্যেতস্য সাম্নঃ  || ২. ৯. ২||

অথ যত্প্রথমোদিতে স প্রস্তাবস্তদস্য মনুষ্যা
অন্বাযত্তাস্তস্মাত্তে প্রস্তুতিকামাঃ প্রশঁসাকামাঃ
প্রস্তাবভাজিনো  হ্যেতস্য সাম্নঃ  || ২. ৯. ৩||

অথ যত্সংগববেলাযাঁ স আদিস্তদস্য বযাঁস্যন্বাযত্তানি
তস্মাত্তান্যন্তরিক্ষেঽনারম্বণান্যাদাযাত্মানং
পরিপতন্ত্যাদিভাজীনি হ্যেতস্য সাম্নঃ  || ২. ৯. ৪||

অথ যত্সংপ্রতিমধ্যংদিনে  স উদ্গীথস্তদস্য
দেবা অন্বাযত্তাস্তস্মাত্তে সত্তমাঃ 
প্রাজাপত্যানামুদ্গীথভাজিনো হ্যেতস্য সাম্নঃ  || ২. ৯. ৫||

অথ যদূর্ধ্বং মধ্যংদিনাত্প্রাগপরাহ্ণাত্স
প্রতিহারস্তদস্য গর্ভা অন্বাযত্তাস্তস্মাত্তে
প্রতিহৃতানাবপদ্যন্তে প্রতিহারভাজিনো
হ্যেতস্য সাম্নঃ   || ২. ৯. ৬||

অথ যদূর্ধ্বমপরাহ্ণাত্প্রাগস্তমযাত্স
উপদ্রবস্তদস্যারণ্যা অন্বাযত্তাস্তস্মাত্তে পুরুষং
দৃষ্ট্বা কক্ষঁশ্বভ্রমিত্যুপদ্রবন্ত্যুপদ্রবভাজিনো
হ্যেতস্য সাম্নঃ  || ২. ৯. ৭||

অথ যত্প্রথমাস্তমিতে তন্নিধনং তদস্য
পিতরোঽন্বাযত্তাস্তস্মাত্তান্নিদধতি নিধনভাজিনো
হ্যেতস্য সাম্ন এবং খল্বমুমাদিত্যঁ সপ্তবিধঁ
সামোপাস্তে  || ২. ৯. ৮||

|| ইতি নবমঃ খণ্ডঃ ||

|| দশমঃ খণ্ডঃ ||

অথ খল্বাত্মসংমিতমতিমৃত্যু সপ্তবিধঁ
সামোপাসীত হিংকার ইতি ত্র্যক্ষরং প্রস্তাব
ইতি ত্র্যক্ষরং তত্সমম্   || ২. ১০. ১||

আদিরিতি দ্ব্যক্ষরং প্রতিহার ইতি চতুরক্ষরং
তত ইহৈকং তত্সমম্  || ২. ১০. ২||

উদ্গীথ ইতি ত্র্যক্ষরমুপদ্রব ইতি চতুরক্ষরং
ত্রিভিস্ত্রিভিঃ সমং ভবত্যক্ষরমতিশিষ্যতে
ত্র্যক্ষরং তত্সমম্ || ২. ১০. ৩||

নিধনমিতি ত্র্যক্ষরং তত্সমমেব ভবতি
তানি হ বা এতানি দ্বাবিঁশতিরক্ষরাণি  || ২. ১০. ৪||

একবিঁশত্যাদিত্যমাপ্নোত্যেকবিঁশো বা
ইতোঽসাবাদিত্যো দ্বাবিঁশেন পরমাদিত্যাজ্জযতি
তন্নাকং তদ্বিশোকম্  || ২. ১০. ৫||

আপ্নোতী হাদিত্যস্য জযং পরো হাস্যাদিত্যজযাজ্জযো
ভবতি য এতদেবং বিদ্বানাত্মসংমিতমতিমৃত্যু
সপ্তবিধঁ সামোপাস্তে সামোপাস্তে || ২. ১০. ৬||

|| ইতি দশমঃ খণ্ডঃ ||

|| একাদশঃ খণ্ডঃ ||

মনো হিংকারো বাক্প্রস্তাবশ্চক্ষুরুদ্গীথঃ শ্রোত্রং প্রতিহারঃ 
প্রাণো নিধনমেতদ্গাযত্রং প্রাণেষু প্রোতম্ || ২. ১১. ১||
 
স এবমেতদ্গাযত্রং প্রাণেষু প্রোতং বেদ প্রাণী ভবতি
সর্বমাযুরেতি জ্যোগ্জীবতি মহান্প্রজযা পশুভির্ভবতি
মহান্কীর্ত্যা মহামনাঃ স্যাত্তদ্ব্রতম্ || ২. ১১. ২||

|| ইতি একদশঃ খণ্ডঃ ||

|| দ্বাদশঃ খণ্ডঃ ||

অভিমন্থতি স হিংকারো ধূমো জাযতে স প্রস্তাবো
জ্বলতি স উদ্গীথোঽঙ্গারা ভবন্তি স প্রতিহার
উপশাম্যতি তন্নিধনঁ সঁশাম্যতি
তন্নিধনমেতদ্রথংতরমগ্নৌ প্রোতম্ || ২. ১২. ১||

স য এবমেতদ্রথংতরমগ্নৌ প্রোতং বেদ ব্রহ্মবর্চস্যন্নাদো
ভবতি সর্বমাযুরেতি জ্যোগ্জীবতি মহান্প্রজযা
পশুভির্ভবতি মহান্কীর্ত্যা   ন প্রত্যঙ্ঙগ্নিমাচামেন্ন
নিষ্ঠীবেত্তদ্ব্রতম্ || ২. ১২. ২||

|| ইতি দ্বাদশঃ খণ্ডঃ ||

|| ত্রযোদশঃ খণ্ডঃ ||

উপমন্ত্রযতে স হিংকারো জ্ঞপযতে স প্রস্তাবঃ
স্ত্রিযা সহ শেতে স উদ্গীথঃ প্রতি স্ত্রীং সহ শেতে
স প্রতিহারঃ কালং গচ্ছতি তন্নিধনং পারং গচ্ছতি
তন্নিধনমেতদ্বামদেব্যং মিথুনে প্রোতম্   || ২. ১৩. ১||

স য এবমেতদ্বামদেব্যং মিথুনে প্রোতং বেদ
মিথুনী ভবতি মিথুনান্মিথুনাত্প্রজাযতে
সর্বমাযুরেতি জ্যোগ্জীবতি মহান্প্রজযা পশুভির্ভবতি
মহান্কীর্ত্যা ন কাংচন পরিহরেত্তদ্ব্রতম্ || ২. ১৩. ২||

|| ইতি ত্রযোদশঃ খণ্ডঃ ||

|| চতুর্দশঃ খণ্ডঃ ||

উদ্যন্হিংকার উদিতঃ  প্রস্তাবো মধ্যংদিন উদ্গীথোঽপরাহ্ণঃ
প্রতিহারোঽস্তং যন্নিধনমেতদ্বৃহদাদিত্যে প্রোতম্ || ২. ১৪. ১||

স য এবমেতদ্বৃহদাদিত্যে প্রোতং বেদ তেজস্ব্যন্নাদো
ভবতি সর্বমাযুরেতি জ্যোগ্জীবতি মহান্প্রজযা
পশুভির্ভবতি মহান্কীর্ত্যা তপন্তং ন নিন্দেত্তদ্ব্রতম্ 
|| ২. ১৪. ২||

|| ইতি চতুর্দশঃ খণ্ডঃ ||

|| পঞ্চদশঃ খণ্ডঃ ||

অভ্রাণি সংপ্লবন্তে স হিংকারো মেঘো জাযতে
স প্রস্তাবো বর্ষতি স উদ্গীথো বিদ্যোততে স্তনযতি
স প্রতিহার উদ্গৃহ্ণাতি তন্নিধনমেতদ্বৈরূপং পর্জন্যে প্রোতম্
|| ২. ১৫. ১||

স য এবমেতদ্বৈরূপং পর্জন্যে প্রোতং বেদ
বিরূপাঁশ্চ সুরূপঁশ্চ পশূনবরুন্ধে
সর্বমাযুরেতি জ্যোগ্জীবতি মহান্প্রজযা পশুভির্ভবতি
মহান্কীর্ত্যা বর্ষন্তং ন নিন্দেত্তদ্ব্রতম্ || ২. ১৫. ২||

|| ইতি পঞ্চদশঃ খণ্ডঃ ||

|| ষোডশঃ খণ্ডঃ ||

বসন্তো হিংকারো গ্রীষ্মঃ  প্রস্তাবো বর্ষা উদ্গীথঃ
শরত্প্রতিহারো হেমন্তো নিধনমেতদ্বৈরাজমৃতুষু প্রোতম্
|| ২. ১৬. ১||

স য এবমেতদ্বৈরাজমৃতুষু প্রোতং বেদ বিরাজতি
প্রজযা পশুভির্ব্রহ্মবর্চসেন সর্বমাযুরেতি
জ্যোগ্জীবতি মহান্প্রজযা পশুভির্ভবতি
মহান্কীর্ত্যর্তূন্ন নিন্দেত্তদ্ব্রতম্ || ২. ১৬. ২||

|| ইতি ষোডশঃ খণ্ডঃ ||

|| সপ্তদশঃ খণ্ডঃ ||

পৃথিবী হিংকারোঽন্তরিক্ষং প্রস্তাবো দ্যৌরুদ্গীথো
দিশঃ  প্রতিহারঃ  সমুদ্রো নিধনমেতাঃ  শক্বর্যো
লোকেষু প্রোতাঃ  || ২. ১৭. ১||

স য এবমেতাঃ শক্বর্যো লোকেষু প্রোতা বেদ লোকী ভবতি
সর্বমাযুরেতি জ্যোগ্জীবতি মহান্প্রজযা পশুভির্ভবতি 
মহান্কীর্ত্যা লোকান্ন নিন্দেত্তদ্ব্রতম্ || ২. ১৭. ২||

|| ইতি সপ্তদশঃ খণ্ডঃ ||

|| অষ্টাদশঃ খণ্ডঃ ||

অজা হিংকারোঽবযঃ প্রস্তাবো গাব উদ্গীথোঽশ্বাঃ প্রতিহারঃ 
পুরুষো নিধনমেতা রেবত্যঃ পশুষু প্রোতাঃ || ২. ১৮. ১||

স য এবমেতা রেবত্যঃ পশুষু প্রোতা বেদ
পশুমান্ভবতি সর্বমাযুরেতি জ্যোগ্জীবতি
মহান্প্রজযা পশুভির্ভবতি মহান্কীর্ত্যা
পশূন্ন নিন্দেত্তদ্ব্রতম্  || ২. ১৮. ২||

|| ইতি অষ্টাদশঃ খণ্ডঃ ||

|| একোনবিংশঃ খণ্ডঃ ||

লোম হিংকারস্ত্বক্প্রস্তাবো মাঁসমুদ্গীথোস্থি
প্রতিহারো মজ্জা নিধনমেতদ্যজ্ঞাযজ্ঞীযমঙ্গেষু
প্রোতম্ || ২. ১৯. ১||

স য এবমেতদ্যজ্ঞাযজ্ঞীযমঙ্গেষু প্রোতং বেদাঙ্গী ভবতি 
নাঙ্গেন বিহূর্ছতি সর্বমাযুরেতি জ্যোগ্জীবতি
মহান্প্রজযা পশুভির্ভবতি মহান্কীর্ত্যা সংবত্সরং
মজ্জ্ঞো নাশ্নীযাত্তদ্ব্রতং মজ্জ্ঞো
নাশ্নীযাদিতি বা  || ২. ১৯. ২||

|| ইতি একোনবিংশঃ খণ্ডঃ ||

|| বিংশঃ খণ্ডঃ ||

অগ্নির্হিংকারো বাযুঃ প্রস্তাব আদিত্য উদ্গীথো
নক্ষত্রাণি প্রতিহারশ্চন্দ্রমা নিধনমেতদ্রাজনং
দেবতাসু প্রোতম্ || ২. ২০. ১||

স য এবমেতদ্রাজনং দেবতাসু প্রোতং বেদৈতাসামেব
দেবতানাঁসলোকতাঁসর্ষ্টিতাঁসাযুজ্যং গচ্ছতি
সর্বমাযুরেতি জ্যোগ্জীবতি মহান্প্রজযা পশুভির্ভবতি
মহান্কীর্ত্যা ব্রাহ্মণান্ন নিন্দেত্তদ্ব্রতম্ || ২. ২০. ২||

|| ইতি বিংশঃ খণ্ডঃ ||

|| একবিংশঃ খণ্ডঃ ||

ত্রযী বিদ্যা হিংকারস্ত্রয ইমে লোকাঃ স
প্রস্তাবোঽগ্নির্বাযুরাদিত্যঃ স উদ্গীথো নক্ষত্রাণি
বযাঁসি মরীচযঃ স প্রতিহারঃ সর্পা গন্ধর্বাঃ
পিতরস্তন্নিধনমেতত্সাম সর্বস্মিন্প্রোতম্ || ২. ২১. ১||

স য এবমেতত্সাম সর্বস্মিন্প্রোতং বেদ সর্বঁ হ
ভবতি || ২. ২১. ২||

তদেষ শ্লোকো যানি পঞ্চধা ত্রীণী ত্রীণি
তেভ্যো ন জ্যাযঃ পরমন্যদস্তি || ২. ২১. ৩||

যস্তদ্বেদ স বেদ সর্বঁ সর্বা দিশো বলিমস্মৈ হরন্তি
সর্বমস্মীত্যুপাসিত তদ্ব্রতং তদ্ব্রতম্ || ২. ২১. ৪||

|| ইতি একবিংশঃ খণ্ডঃ ||

|| দ্বাবিংশঃ খণ্ডঃ ||

বিনর্দি সাম্নো বৃণে পশব্যমিত্যগ্নেরুদ্গীথোঽনিরুক্তঃ
প্রজাপতের্নিরুক্তঃ সোমস্য মৃদু শ্লক্ষ্ণং বাযোঃ
শ্লক্ষ্ণং বলবদিন্দ্রস্য ক্রৌঞ্চং বৃহস্পতেরপধ্বান্তং
বরুণস্য তান্সর্বানেবোপসেবেত বারুণং ত্বেব বর্জযেত্ || ২. ২২. ১||

অমৃতত্বং দেবেভ্য আগাযানীত্যাগাযেত্স্বধাং
পিতৃভ্য আশাং মনুষ্যেভ্যস্তৃণোদকং পশুভ্যঃ
স্বর্গং লোকং যজমানাযান্নমাত্মন আগাযানীত্যেতানি
মনসা ধ্যাযন্নপ্রমত্তঃ স্তুবীত  || ২. ২২. ২||

সর্বে স্বরা ইন্দ্রস্যাত্মানঃ সর্ব ঊষ্মাণঃ
প্রজাপতেরাত্মানঃ সর্বে স্পর্শা মৃত্যোরাত্মানস্তং
যদি স্বরেষূপালভেতেন্দ্রঁশরণং প্রপন্নোঽভূবং
স ত্বা প্রতি বক্ষ্যতীত্যেনং ব্রূযাত্ || ২. ২২. ৩||

অথ যদ্যেনমূষ্মসূপালভেত প্রজাপতিঁশরণং
প্রপন্নোঽভূবং স ত্বা প্রতি পেক্ষ্যতীত্যেনং
ব্রূযাদথ যদ্যেনঁ স্পর্শেষূপালভেত মৃত্যুঁ শরণং
প্রপন্নোঽভূবং স ত্বা প্রতি ধক্ষ্যতীত্যেনং ব্রূযাত্ 
|| ২. ২২. ৪||

সর্বে স্বরা ঘোষবন্তো বলবন্তো বক্তব্যা ইন্দ্রে বলং
দদানীতি সর্ব ঊষ্মাণোঽগ্রস্তা অনিরস্তা বিবৃতা
বক্তব্যাঃ  প্রজাপতেরাত্মানং পরিদদানীতি সর্বে স্পর্শা
লেশেনানভিনিহিতা বক্তব্যা মৃত্যোরাত্মানং
পরিহরাণীতি  || ২. ২২. ৫||

|| ইতি দ্বাবিংশঃ খণ্ডঃ ||

|| ত্রযোবিংশঃ খণ্ডঃ ||

ত্রযো ধর্মস্কন্ধা যজ্ঞোঽধ্যযনং দানমিতি প্রথমস্তপ
এব দ্বিতীযো ব্রহ্মচার্যাচার্যকুলবাসী
তৃতীযোঽত্যন্তমাত্মানমাচার্যকুলেঽবসাদযন্সর্ব
এতে পুণ্যলোকা ভবন্তি ব্রহ্মসঁস্থোঽমৃতত্বমেতি  || ২. ২৩. ১||

প্রজাপতির্লোকানভ্যতপত্তেভ্যোঽভিতপ্তেভ্যস্ত্রযী বিদ্যা
সংপ্রাস্রবত্তামভ্যতপত্তস্যা অভিতপ্তাযা এতান্যক্ষরাণি
সংপ্রাস্র্বন্ত ভূর্ভুবঃ স্বরিতি  || ২. ২৩. ২||

তান্যভ্যতপত্তেভ্যোঽভিতপ্তেভ্য ॐকারঃ
সংপ্রাস্রবত্তদ্যথা শঙ্কুনা সর্বাণি পর্ণানি
সংতৃণ্ণান্যেবমোংকারেণ সর্বা বাক্সংতৃণ্ণোংকার এবেদঁ
সর্বমোংকার এবেদঁ সর্বম্ || ২. ২৩. ৩||

|| ইতি ত্রযোবিংশঃ খণ্ডঃ ||

|| চতুর্বিংশঃ খণ্ডঃ ||

ব্রহ্মবাদিনো বদন্তি যদ্বসূনাং প্রাতঃ সবনঁ রুদ্রাণাং
মাধ্যংদিনঁ সবনমাদিত্যানাং চ বিশ্বেষাং চ
দেবানাং তৃতীযসবনম্ || ২. ২৪. ১||

ক্ব তর্হি যজমানস্য লোক ইতি স যস্তং ন বিদ্যাত্কথং
কুর্যাদথ বিদ্বান্কুর্যাত্ || ২. ২৪. ২||

পুরা প্রাতরনুবাকস্যোপাকরণাজ্জঘনেন
গার্হপত্যস্যোদাঙ্মুখ উপবিশ্য স বাসবঁ
সামাভিগাযতি || ২. ২৪. ৩||

লো৩কদ্বারমপাবা৩র্ণূ ৩৩ পশ্যেম ত্বা বযঁ
রা ৩৩৩৩৩ হু ৩ ম্ আ ৩৩ জ্যা ৩ যো ৩ আ ৩২১১১
ইতি || ২. ২৪. ৪||

অথ জুহোতি নমোঽগ্নযে পৃথিবীক্ষিতে লোকক্ষিতে
লোকং মে যজমানায বিন্দৈষ বৈ যজমানস্য লোক
এতাস্মি  || ২. ২৪. ৫||

অত্র যজমানঃ  পরস্তাদাযুষঃ  স্বাহাপজহি
পরিঘমিত্যুক্ত্বোত্তিষ্ঠতি তস্মৈ বসবঃ প্রাতঃসবনঁ
সংপ্রযচ্ছন্তি  || ২. ২৪. ৬||

পুরা মাধ্যংদিনস্য
সবনস্যোপাকরণাজ্জঘনেনাগ্নীধ্রীযস্যোদঙ্মুখ
উপবিশ্য স রৌদ্রm +সামাভিগাযতি || ২. ২৪. ৭||

লো৩কদ্বারমপাবা৩র্ণূ৩৩ পশ্যেম ত্বা বযং
বৈরা৩৩৩৩৩ হু৩ম্ আ৩৩জ্যা ৩যো৩আ৩২১১১ইতি
|| ২. ২৪. ৮||

অথ জুহোতি নমো বাযবেঽন্তরিক্ষক্ষিতে লোকক্ষিতে
লোকং মে যজমানায বিন্দৈষ বৈ যজমানস্য লোক
এতাস্মি  || ২. ২৪. ৯||

অত্র যজমানঃ পরস্তাদাযুষঃ স্বাহাপজহি
পরিঘমিত্যুক্ত্বোত্তিষ্ঠতি তস্মৈ রুদ্রা
মাধ্যংদিনঁসবনঁসংপ্রযচ্ছন্তি  || ২. ২৪. ১০||

পুরা তৃতীযসবনস্যোপাকরণাজ্জঘনেনাহবনীযস্যোদঙ্মুখ
উপবিশ্য স আদিত্যঁস বৈশ্বদেবঁ সামাভিগাযতি 
|| ২. ২৪. ১১||

লো৩কদ্বারমপাবা৩র্ণূ৩৩পশ্যেম ত্বা বযঁ স্বারা
৩৩৩৩৩ হু৩ম্ আ৩৩ জ্যা৩ যো৩আ ৩২১১১ ইতি
|| ২. ২৪. ১২||

আদিত্যমথ বৈশ্বদেবং লো৩কদ্বারমপাবা৩র্ণূ৩৩ পশ্যেম
ত্বা বযঁসাম্রা৩৩৩৩৩ হু৩ম্ আ৩৩ জ্যা৩যো৩আ ৩২১১১
ইতি || ২. ২৪. ১৩||

অথ জুহোতি নম আদিত্যেভ্যশ্চ বিশ্বেভ্যশ্চ দেবেভ্যো
দিবিক্ষিদ্ভ্যো লোকক্ষিদ্ভ্যো লোকং মে যজমানায
বিন্দত  || ২. ২৪. ১৪||

এষ বৈ যজমানস্য লোক এতাস্ম্যত্র যজমানঃ
পরস্তাদাযুষঃ স্বাহাপহত পরিঘমিত্যুক্ত্বোত্তিষ্ঠতি
|| ২. ২৪. ১৫||

তস্মা আদিত্যাশ্চ বিশ্বে চ দেবাস্তৃতীযসবনঁ
সংপ্রযচ্ছন্ত্যেষ হ বৈ যজ্ঞস্য মাত্রাং বেদ য এবং বেদ
য এবং বেদ  || ২. ২৪. ১৬||

|| ইতি চতুর্বিংশঃ খণ্ডঃ ||

 || ইতি দ্বিতীযোঽধ্যাযঃ ||

——————————————————————————–

 || তৃতীযোঽধ্যাযঃ ||

|| প্রথমঃ খণ্ডঃ ||

অসৌ বা আদিত্যো দেবমধু তস্য দ্যৌরেব
তিরশ্চীনবঁশোঽন্তরিক্ষমপূপো মরীচযঃ পুত্রাঃ  || ৩. ১. ১||

তস্য যে প্রাঞ্চো রশ্মযস্তা এবাস্য প্রাচ্যো মধুনাড্যঃ | 
ঋচ এব মধুকৃত ঋগ্বেদ এব পুষ্পং তা অমৃতা
আপস্তা বা এতা ঋচঃ   || ৩. ১. ২||

এতমৃগ্বেদমভ্যতপঁস্তস্যাভিতপ্তস্য যশস্তেজ
ইন্দ্রিযং বীর্যমন্নাদ্যঁরসোঽজাযত  || ৩. ১. ৩||

তদ্ব্যক্ষরত্তদাদিত্যমভিতোঽশ্রযত্তদ্বা
এতদ্যদেতদাদিত্যস্য রোহিতঁরূপম্ || ৩. ১. ৪||

|| ইতি প্রথমঃ খণ্ডঃ ||

|| দ্বিতীযঃ খণ্ডঃ ||

অথ যেঽস্য দক্ষিণা রশ্মযস্তা এবাস্য দক্ষিণা
মধুনাড্যো যজূঁষ্যেব মধুকৃতো যজুর্বেদ এব পুষ্পং
তা অমৃত আপঃ   || ৩. ২. ১||

তানি বা এতানি যজূঁষ্যেতং
যজুর্বেদমভ্যতপঁস্তস্যাভিতপ্তস্য যশস্তেজ ইন্দ্রিযং
বীর্যমন্নাদ্যঁরসোজাযত  || ৩. ২. ২||

তদ্ব্যক্ষরত্তদাদিত্যমভিতোঽশ্রযত্তদ্বা
এতদ্যদেতদাদিত্যস্য শুক্লঁ রূপম্ || ৩. ২. ৩||

|| ইতি দ্বিতীযঃ খণ্ডঃ ||

|| তৃতীযঃ খণ্ডঃ ||

অথ যেঽস্য প্রত্যঞ্চো রশ্মযস্তা এবাস্য প্রতীচ্যো
মধুনাড্যঃ সামান্যেব মধুকৃতঃ সামবেদ এব পুষ্পং  
তা অমৃতা আপঃ || ৩. ৩. ১||

তানি বা এতানি সামান্যেতঁ
সামবেদমভ্যতপঁস্তস্যাভিতপ্তস্য যশস্তেজ ইন্দ্রিযং
বীর্যমন্নাদ্যঁরসোঽজাযত  || ৩. ৩. ২||

তদ্ব্যক্ষরত্তদাদিত্যমভিতোঽশ্রযত্তদ্বা
এতদ্যদেতদাদিত্যস্য কৃষ্ণঁরূপম্ || ৩. ৩. ৩||

|| ইতি তৃতীযঃ খণ্ডঃ ||

|| চতুর্থঃ খণ্ডঃ ||

অথ যেঽস্যোদঞ্চো রশ্মযস্তা এবাস্যোদীচ্যো
মধুনাড্যোঽথর্বাঙ্গিরস এব মধুকৃত
ইতিহাসপুরাণং পুষ্পং তা অমৃতা আপঃ || ৩. ৪. ১||

তে বা এতেঽথর্বাঙ্গিরস এতদিতিহাসপূরাণমভ্যতপঁ  
স্তস্যাভিতপ্তস্য যশস্তেজ ইন্দ্রিযাং
বীর্যমন্নাদ্যঁরসোঽজাযত  || ৩. ৪. ২||

তদ্ব্যক্ষরত্তদাদিত্যমভিতোঽশ্রযত্তদ্বা
এতদ্যদেতদাদিত্যস্য পরং কৃষ্ণঁরূপম্ || ৩. ৪. ৩||

|| ইতি চতুর্থঃ খণ্ডঃ ||

|| পঞ্চমঃ খণ্ডঃ ||

অথ যেঽস্যোর্ধ্বা রশ্মযস্তা এবাস্যোর্ধ্বা
মধুনাড্যো গুহ্যা এবাদেশা মধুকৃতো ব্রহ্মৈব
পুষ্পং   তা অমৃতা আপঃ  || ৩. ৫. ১||

তে বা এতে গুহ্যা আদেশা এতদ্ব্রহ্মাভ্যতপঁ  
স্তস্যাভিতপ্তস্য যশস্তেজ ইন্দ্রিযং
বীর্যমন্নাদ্যঁরসোঽজাযত  || ৩. ৫. ২||

তদ্ব্যক্ষরত্তদাদিত্যমভিতোঽশ্রযত্তদ্বা
এতদ্যদেতদাদিত্যস্য মধ্যে ক্ষোভত ইব  || ৩. ৫. ৩||

তে বা এতে রসানাঁরসা বেদা হি রসাস্তেষামেতে
রসাস্তানি বা এতান্যমৃতানামমৃতানি বেদা
হ্যমৃতাস্তেষামেতান্যমৃতানি || ৩. ৫. ৪||

|| ইতি পঞ্চমঃ খণ্ডঃ ||

|| ষষ্ঠঃ খণ্ডঃ ||

তদ্যত্প্রথমমমৃতং তদ্বসব উপজীবন্ত্যগ্নিনা মুখেন ন বৈ
দেবা অশ্নন্তি ন পিবন্ত্যেতদেবামৃতং দৃষ্ট্বা
তৃপ্যন্তি || ৩. ৬. ১||

ত এতদেব রূপমভিসংবিশন্ত্যেতস্মাদ্রূপাদুদ্যন্তি || ৩. ৬. ২||

স য এতদেবমমৃতং বেদ বসূনামেবৈকো ভূত্বাগ্নিনৈব
মুখেনৈতদেবামৃতং দৃষ্ট্বা তৃপ্যতি স য এতদেব
রূপমভিসংবিশত্যেতস্মাদ্রূপাদুদেতি  || ৩. ৬. ৩||

স যাবদাদিত্যঃ পুরস্তাদুদেতা পশ্চাদস্তমেতা
বসূনামেব তাবদাধিপত্যঁস্বারাজ্যং পর্যেতা  || ৩. ৬. ৪||

|| ইতি ষষ্ঠঃ খণ্ডঃ ||

|| সপ্তমঃ খণ্ডঃ ||

অথ যদ্দ্বিতীযমমৃতং তদ্রুদ্রা উপজীবন্তীন্দ্রেণ
মুখেন ন বৈ দেবা অশ্নন্তি ন পিবন্ত্যেতদেবামৃতং
দৃষ্ট্বা তৃপ্যন্তি || ৩. ৭. ১||

ত এতদেব রূপমভিসংবিশন্ত্যেতস্মাদ্রূপাদুদ্যন্তি  || ৩. ৭. ২||

স য এতদেবমমৃতং বেদ রুদ্রাণামেবৈকো ভূত্বেন্দ্রেণৈব
মুখেনৈতদেবামৃতং দৃষ্ট্বা তৃপ্যতি স এতদেব
রূপমভিসংবিশত্যেতস্মাদ্রূপাদুদেতি  || ৩. ৭. ৩||

স যাবদাদিত্যঃ পুরস্তাদুদেতা পশ্চাদস্তমেতা
দ্বিস্তাবদ্দক্ষিণত উদেতোত্তরতোঽস্তমেতা রুদ্রাণামেব
তাবদাধিপত্যঁস্বারাজ্যং পর্যেতা || ৩. ৭. ৪||

|| ইতি সপ্তমঃ খণ্ডঃ ||

|| অষ্টমঃ খণ্ডঃ ||

অথ যত্তৃতীযমমৃতং তদাদিত্যা উপজীবন্তি বরুণেন
মুখেন ন বৈ দেবা অশ্নন্তি ন পিবন্ত্যেতদেবামৃতং
দৃষ্ট্বা তৃপ্যন্তি  || ৩. ৮. ১||

ত এতদেব রূপমভিসংবিশন্ত্যেতস্মাদ্রূপাদুদ্যন্তি  || ৩. ৮. ২||

স য এতদেবমমৃতং বেদাদিত্যানামেবৈকো ভূত্বা বরুণেনৈব
মুখেনৈতদেবামৃতং দৃষ্ট্বা তৃপ্যতি   স এতদেব
রূপমভিসংবিশত্যেতস্মাদ্রূপাদুদেতি  || ৩. ৮. ৩||

স যাবদাদিত্যো দক্ষিণত উদেতোত্তরতোঽস্তমেতা
দ্বিস্তাবত্পশ্চাদুদেতা পুরস্তাদস্তমেতাদিত্যানামেব
তাবদাধিপত্যঁস্বারাজ্যং পর্যেতা  || ৩. ৮. ৪||

|| ইতি অষ্টমঃ খণ্ডঃ ||

|| নবমঃ খণ্ডঃ ||

অথ যচ্চতুর্থমমৃতং তন্মরুত উপজীবন্তি সোমেন
মুখেন ন বৈ দেবা অশ্নন্তি ন পিবন্ত্যেতদেবামৃতং
দৃষ্ট্বা তৃপ্যন্তি  || ৩. ৯. ১||

ত এতদেব রূপমভিসংবিশন্ত্যেতস্মাদ্রূপাদুদ্যন্তি  || ৩. ৯. ২||

স য এতদেবমমৃতং বেদ মরুতামেবৈকো ভূত্বা সোমেনৈব
মুখেনৈতদেবামৃতং দৃষ্ট্বা তৃপ্যতি   স এতদেব
রূপমভিসংবিশত্যেতস্মাদ্রূপাদুদেতি  || ৩. ৯. ৩||

স যাবদাদিত্যঃ পশ্চাদুদেতা পুরস্তাদস্তমেতা
দ্বিস্তাবদুত্তরত উদেতা দক্ষিণতোঽস্তমেতা মরুতামেব
তাবদাধিপত্য্ঁস্বারাজ্যং পর্যেতা  || ৩. ৯. ৪||

|| ইতি নবমঃ খণ্ডঃ ||

|| দশমঃ খণ্ডঃ ||

অথ যত্পঞ্চমমমৃতং তত্সাধ্যা উপজীবন্তি ব্রহ্মণা
মুখেন  ন বৈ দেবা অশ্নন্তি ন পিবন্ত্যেতদেবামৃতং
দৃষ্ট্বা তৃপ্যন্তি  || ৩. ১০. ১||

ত এতদেব রূপমভিসংবিশন্ত্যেতস্মাদ্রূপাদুদ্যন্তি  || ৩. ১০. ২||

স য এতদেবমমৃতং বেদ সাধ্যানামেবৈকো ভূত্বা
ব্রহ্মণৈব মুখেনৈতদেবামৃতং দৃষ্ট্বা তৃপ্যতি স এতদেব
রূপমভিসংবিশত্যেতস্মাদ্রূপাদুদেতি  || ৩. ১০. ৩||

স যাবদাদিত্য উত্তরত উদেতা দক্ষিণতোঽস্তমেতা
দ্বিস্তাবদূর্ধ্বং উদেতার্বাগস্তমেতা সাধ্যানামেব
তাবদাধিপত্যঁস্বারাজ্যং পর্যেতা  || ৩. ১০. ৪||

|| ইতি দশমঃ খণ্ডঃ ||

|| একাদশঃ খণ্ডঃ ||

অথ তত ঊর্ধ্ব উদেত্য নৈবোদেতা নাস্তমেতৈকল এব
মধ্যে স্থাতা তদেষ শ্লোকঃ  || ৩. ১১. ১||

ন বৈ তত্র ন নিম্লোচ নোদিযায কদাচন |
দেবাস্তেনাহঁসত্যেন মা বিরাধিষি ব্রহ্মণেতি || ৩. ১১. ২|| 

ন হ বা অস্মা উদেতি ন নিম্লোচতি সকৃদ্দিবা হৈবাস্মৈ
ভবতি য এতামেবং ব্রহ্মোপনিষদং বেদ || ৩. ১১. ৩||

তদ্ধৈতদ্ব্রহ্মা প্রজাপতয উবাচ প্রজাপতির্মনবে 
মনুঃ প্রজাভ্যস্তদ্ধৈতদুদ্দালকাযারুণযে জ্যেষ্ঠায পুত্রায
পিতা ব্রহ্ম প্রোবাচ || ৩. ১১. ৪||

ইদং বাব তজ্জ্যেষ্ঠায পুত্রায পিতা ব্রহ্ম
প্রব্রূযাত্প্রণায্যায বান্তেবাসিনে || ৩. ১১. ৫||

নান্যস্মৈ কস্মৈচন যদ্যপ্যস্মা ইমামদ্ভিঃ পরিগৃহীতাং
ধনস্য পূর্ণাং দদ্যাদেতদেব ততো ভূয ইত্যেতদেব
ততো ভূয ইতি || ৩. ১১. ৬||

|| ইতি একাদশঃ খণ্ডঃ ||

|| দ্বাদশঃ খণ্ডঃ ||

গাযত্রী বা ঈদঁ সর্বং ভূতং যদিদং  কিং চ বাগ্বৈ গাযত্রী
বাগ্বা ইদঁ সর্বং ভূতং গাযতি চ ত্রাযতে চ || ৩. ১২. ১||

যা বৈ সা গাযত্রীযং বাব সা যেযং পৃথিব্যস্যাঁ হীদঁ
সর্বং ভূতং প্রতিষ্ঠিতমেতামেব নাতিশীযতে || ৩. ১২. ২||

যা বৈ সা পৃথিবীযং বাব সা যদিদমস্মিন্পুরুষে
শরীরমস্মিন্হীমে প্রাণাঃ প্রতিষ্ঠিতা এতদেব
নাতিশীযন্তে || ৩. ১২. ৩||

যদ্বৈ তত্পুরুষে শরীরমিদং বাব তদ্যদিদমস্মিন্নন্তঃ
পুরুষে হৃদযমস্মিন্হীমে প্রাণাঃ প্রতিষ্ঠিতা এতদেব
নাতিশীযন্তে || ৩. ১২. ৪||

সৈষা চতুষ্পদা ষড্বিধা গাযত্রী তদেতদৃচাভ্যনূক্তম্
|| ৩. ১২. ৫||

তাবানস্য মহিমা ততো জ্যাযাঁশ্চ পূরুষঃ |
পাদোঽস্য সর্বা ভূতানি ত্রিপাদস্যামৃতং দিবীতি || ৩. ১২. ৬||
 
যদ্বৈ তদ্ব্রহ্মেতীদং বাব তদ্যোযং বহির্ধা
পুরুষাদাকাশো যো বৈ স বহির্ধা পুরুষাদাকাশঃ || ৩. ১২. ৭||

অযং বাব স যোঽযমন্তঃ পুরুষ অকাশো যো বৈ সোঽন্তঃ
পুরুষ আকাশঃ  || ৩. ১২. ৮||

অযং বাব স যোঽযমন্তর্হৃদয আকাশস্তদেতত্পূর্ণমপ্রবর্তি 
পূর্ণমপ্রবর্তিনীঁশ্রিযং লভতে য এবং বেদ || ৩. ১২. ৯||

|| ইতি দ্বাদশঃ খণ্ডঃ ||

|| ত্রযোদশঃ খণ্ডঃ ||

তস্য হ বা এতস্য হৃদযস্য পঞ্চ দেবসুষযঃ 
স যোঽস্য প্রাঙ্সুষিঃ স প্রাণস্তচ্চক্ষুঃ 
স আদিত্যস্তদেতত্তেজোঽন্নাদ্যমিত্যুপাসীত 
তেজস্ব্যন্নাদো ভবতি য এবং বেদ || ৩. ১৩. ১||

অথ যোঽস্য দক্ষিণঃ  সুষিঃ  স ব্যানস্তচ্ছ্রোত্রঁ 
স চন্দ্রমাস্তদেতচ্ছ্রীশ্চ যশশ্চেত্যুপাসীত 
শ্রীমান্যশস্বী ভবতি য এবং বেদ || ৩. ১৩. ২||

অথ যোঽস্য প্রত্যঙ্সুষিঃ সোঽপানঃ 
সা বাক্সোঽগ্নিস্তদেতদ্ব্রহ্মবর্চসমন্নাদ্যমিত্যুপাসীত 
ব্রহ্মবর্চস্যন্নাদো ভবতি য এবং বেদ || ৩. ১৩. ৩||

অথ যোঽস্যোদঙ্সুষিঃ স সমানস্তন্মনঃ 
স পর্জন্যস্তদেতত্কীর্তিশ্চ ব্যুষ্টিশ্চেত্যুপাসীত 
কীর্তিমান্ব্যুষ্টিমান্ভবতি য এবং বেদ || ৩. ১৩. ৪||

অথ যোঽস্যোর্ধ্বঃ সুষিঃ স উদানঃ স বাযুঃ 
স আকাশস্তদেতদোজশ্চ মহশ্চেত্যুপাসীতৌজস্বী
মহস্বান্ভবতি য এবং বেদ || ৩. ১৩. ৫||

তে বা এতে পঞ্চ ব্রহ্মপুরুষাঃ স্বর্গস্য লোকস্য
দ্বারপাঃ স য এতানেবং পঞ্চ ব্রহ্মপুরুষান্স্বর্গস্য
লোকস্য দ্বারপান্বেদাস্য কুলে বীরো জাযতে প্রতিপদ্যতে
স্বর্গং লোকং য এতানেবং পঞ্চ ব্রহ্মপুরুষান্স্বর্গস্য
লোকস্য দ্বারপান্বেদ || ৩. ১৩. ৬||

অথ যদতঃ পরো দিবো জ্যোতির্দীপ্যতে বিশ্বতঃ পৃষ্ঠেষু
সর্বতঃ পৃষ্ঠেষ্বনুত্তমেষূত্তমেষু লোকেষ্বিদং বাব
তদ্যদিদমস্মিন্নন্তঃ পুরুষে জ্যোতিঃ || ৩. ১৩. ৭||
 
তস্যৈষা দৃষ্টির্যত্রিতদস্মিঞ্ছরীরে সঁস্পর্শেনোষ্ণিমানং
বিজানাতি তস্যৈষা শ্রুতির্যত্রৈতত্কর্ণাবপিগৃহ্য নিনদমিব
নদথুরিবাগ্নেরিব জ্বলত উপশৃণোতি  তদেতদ্দৃষ্টং চ
শ্রুতং চেত্যুপাসীত  চক্ষুষ্যঃ শ্রুতো ভবতি য এবং বেদ
য এবং বেদ  || ৩. ১৩. ৮||

|| ইতি ত্রযোদশঃ খণ্ডঃ ||

|| চতুর্দশঃ খণ্ডঃ ||

সর্বং খল্বিদং ব্রহ্ম তজ্জলানিতি শান্ত উপাসীত |
অথ খলু ক্রতুমযঃ পুরুষো যথাক্রতুরস্মিঁল্লোকে
পুরুষো ভবতি তথেতঃ প্রেত্য ভবতি  স ক্রতুং কুর্বীত 
|| ৩. ১৪. ১||

মনোমযঃ প্রাণশরীরো ভারূপঃ সত্যসংকল্প
আকাশাত্মা সর্বকর্মা সর্বকামঃ সর্বগন্ধঃ সর্বরসঃ
সর্বমিদমভ্যত্তোঽবাক্যনাদরঃ  || ৩. ১৪. ২||

এষ ম আত্মান্তর্হৃদযেঽণীযান্ব্রীহের্বা যবাদ্বা
সর্ষপাদ্বা শ্যামাকাদ্বা শ্যামাকতণ্ডুলাদ্বৈষ 
ম আত্মান্তর্হৃদযে জ্যাযান্পৃথিব্যা
জ্যাযানন্তরিক্ষাজ্জ্যাযান্দিবো জ্যাযানেভ্যো
লোকেভ্যঃ  || ৩. ১৪. ৩||

সর্বকর্মা সর্বকামঃ সর্বগন্ধঃ সর্বরসঃ
সর্বমিদমভ্যাত্তোঽবাক্যনাদর এষ ম আত্মান্তর্হৃদয 
এতদ্ব্রহ্মৈতমিতঃ প্রেত্যাভিসংভবিতাস্মীতি যস্য স্যাদদ্ধা
ন বিচিকিত্সাস্তীতি হ স্মাহ শাণ্ডিল্যঃ শাণ্ডিল্যঃ 
|| ৩. ১৪. ৪||

|| ইতি চতুর্দশঃ খণ্ডঃ ||

|| পঞ্চদশঃ খণ্ডঃ ||

অন্তরিক্ষোদরঃ কোশো ভূমিবুধ্নো ন জীর্যতি দিশো
হ্যস্য স্রক্তযো দ্যৌরস্যোত্তরং বিলঁ  স এষ কোশো
বসুধানস্তস্মিন্বিশ্বমিদঁ শ্রিতম্  || ৩. ১৫. ১||

তস্য প্রাচী দিগ্জুহূর্নাম সহমানা নাম দক্ষিণা 
রাজ্ঞী নাম প্রতীচী সুভূতা নামোদীচী তাসাং
বাযুর্বত্সঃ  স য এতমেবং বাযুং দিশাং বত্সং বেদ ন
পুত্ররোদঁ রোদিতি সোঽহমেতমেবং বাযুং দিশাং বত্সং
বেদ মা পুত্ররোদঁরুদম্ || ৩. ১৫. ২||

অরিষ্টং কোশং প্রপদ্যেঽমুনামুনামুনা 
প্রাণং প্রপদ্যেঽমুনামুনামুনা ভূঃ প্রপদ্যেঽমুনামুনামুনা 
ভুবঃ প্রপদ্যেঽমুনামুনামুনা স্বঃ প্রপদ্যেঽমুনামুনামুনা 
|| ৩. ১৫. ৩||

স যদবোচং প্রাণং প্রপদ্য ইতি প্রাণো বা ইদঁ সর্বং
ভূতং যদিদং কিংচ তমেব তত্প্রাপত্সি  || ৩. ১৫. ৪||

অথ যদবোচং ভূঃ প্রপদ্য ইতি পৃথিবীং প্রপদ্যেঽন্তরিক্ষং
প্রপদ্যে দিবং প্রপদ্য ইত্যেব তদবোচম্ || ৩. ১৫. ৫||

অথ যদবোচং ভুবঃ প্রপদ্য ইত্যগ্নিং প্রপদ্যে বাযুং
প্রপদ্য আদিত্যং প্রপদ্য ইত্যেব তদবোচম্ || ৩. ১৫. ৬||

অথ যদবোচঁস্বঃ প্রপদ্য ইত্যৃগ্বেদং প্রপদ্যে যজুর্বেদং প্রপদ্যে
সামবেদং প্রপদ্য ইত্যেব তদবোচং  তদবোচম্ || ৩. ১৫. ৭||

|| ইতি পঞ্চদশঃ খণ্ডঃ ||

|| ষোডশঃ খণ্ডঃ ||

পুরুষো বাব যজ্ঞস্তস্য যানি চতুর্বিঁশতি বর্ষাণি
তত্প্রাতঃসবনং চতুর্বিঁশত্যক্ষরা গাযত্রী গাযত্রং
প্রাতঃসবনং তদস্য বসবোঽন্বাযত্তাঃ  প্রাণা বাব বসব
এতে হীদঁসর্বং বাসযন্তি  || ৩. ১৬. ১||

তং চেদেতস্মিন্বযসি কিংচিদুপতপেত্স ব্রূযাত্প্রাণা
বসব ইদং মে প্রাতঃসবনং মাধ্যংদিনঁসবনমনুসংতনুতেতি
মাহং প্রাণানাং বসূনাং মধ্যে যজ্ঞো বিলোপ্সীযেত্যুদ্ধৈব
তত এত্যগদো হ ভবতি  || ৩. ১৬. ২||

অথ যানি চতুশ্চত্বারিঁশদ্বর্ষাণি তন্মাধ্যংদিনঁ
সবনং  চতুশ্চত্বারিঁশদক্ষরা ত্রিষ্টুপ্ত্রৈষ্টুভং
মাধ্যংদিনঁসবনং তদস্য রুদ্রা অন্বাযত্তাঃ  প্রাণা
বাব রুদ্রা  এতে হীদঁসর্বঁরোদযন্তি  || ৩. ১৬. ৩||

তং চেদেতস্মিন্বযসি কিংচিদুপতপেত্স ব্রূযাত্প্রাণা রুদ্রা
ইদং মে মাধ্যংদিনঁসবনং তৃতীযসবনমনুসংতনুতেতি
মাহং প্রাণানাঁরুদ্রাণাং মধ্যে যজ্ঞো বিলোপ্সীযেত্যুদ্ধৈব
তত এত্যগদো হ ভবতি  || ৩. ১৬. ৪||

অথ যান্যষ্টাচত্বারিঁশদ্বর্ষাণি
তত্তৃতীযসবনমষ্টাচত্বারিঁশদক্ষরা
জগতী জাগতং তৃতীযসবনং তদস্যাদিত্যা অন্বাযত্তাঃ
প্রাণা বাবাদিত্যা এতে হীদঁসর্বমাদদতে  || ৩. ১৬. ৫||

তং চেদেতস্মিন্বযসি কিংচিদুপতপেত্স ব্রূযাত্প্রাণা
অদিত্যা ইদং মে তৃতীযসবনমাযুরনুসংতনুতেতি মাহং
প্রাণানামাদিত্যানাং মধ্যে যজ্ঞো বিলোপ্সীযেত্যুদ্ধৈব
তত এত্যগদো হৈব ভবতি  || ৩. ১৬. ৬||

এতদ্ধ স্ম বৈ তদ্বিদ্বানাহ মহিদাস ঐতরেযঃ 
স কিং ম এতদুপতপসি যোঽহমনেন ন প্রেষ্যামীতি 
স হ ষোডশং বর্ষশতমজীবত্প্র হ ষোডশং
বর্ষশতং জীবতি য এবং বেদ  || ৩. ১৬. ৭||

|| ইতি ষোডশঃ খণ্ডঃ ||

|| সপ্তদশঃ খণ্ডঃ ||

স যদশিশিষতি যত্পিপাসতি যন্ন রমতে তা অস্য
দীক্ষাঃ  || ৩. ১৭. ১||

অথ যদশ্নাতি যত্পিবতি যদ্রমতে তদুপসদৈরেতি  || ৩. ১৭. ২||

অথ যদ্ধসতি যজ্জক্ষতি যন্মৈথুনং চরতি স্তুতশস্ত্রৈরেব
তদেতি  || ৩. ১৭. ৩||

অথ যত্তপো দানমার্জবমহিঁসা সত্যবচনমিতি
তা অস্য দক্ষিণাঃ  || ৩. ১৭. ৪||

তস্মাদাহুঃ সোষ্যত্যসোষ্টেতি পুনরুত্পাদনমেবাস্য
তন্মরণমেবাবভৃথঃ  || ৩. ১৭. ৫||

তদ্ধৈতদ্ঘোর্ আঙ্গিরসঃ কৃষ্ণায
দেবকীপুত্রাযোক্ত্বোবাচাপিপাস এব স বভূব 
সোঽন্তবেলাযামেতত্ত্রযং প্রতিপদ্যেতাক্ষিতমস্যচ্যুতমসি
প্রাণসঁশিতমসীতি তত্রৈতে দ্বে ঋচৌ ভবতঃ  || ৩. ১৭. ৬||

আদিত্প্রত্নস্য রেতসঃ |
উদ্বযং তমসস্পরি জ্যোতিঃ পশ্যন্ত উত্তরঁস্বঃ
পশ্যন্ত উত্তরং দেবং দেবত্রা সূর্যমগন্ম
জ্যোতিরুত্তমমিতি জ্যোতিরুত্তমমিতি  || ৩. ১৭. ৭||

|| ইতি সপ্তদশঃ খণ্ডঃ ||

|| অষ্টাদশঃ খণ্ডঃ ||

মনো ব্রহ্মেত্যুপাসীতেত্যধ্যাত্মমথাধিদৈবতমাকাশো
ব্রহ্মেত্যুভযমাদিষ্টং ভবত্যধ্যাত্মং চাধিদৈবতং চ 
|| ৩. ১৮. ১||

তদেতচ্চতুষ্পাদ্ব্রহ্ম বাক্পাদঃ প্রাণঃ পাদশ্চক্ষুঃ
পাদঃ শ্রোত্রং পাদ ইত্যধ্যাত্মমথাধিদৈবতমগ্নিঃ
পাদো বাযুঃ পাদা অদিত্যঃ পাদো দিশঃ পাদ
ইত্যুভযমেবাদিষ্টং ভবত্যধ্যাত্মং  চৈবাধিদৈবতং চ 
|| ৩. ১৮. ২||

বাগেব ব্রহ্মণশ্চতুর্থঃ পাদঃ সোঽগ্নিনা জ্যোতিষা
ভাতি চ তপতি চ ভাতি চ তপতি চ কীর্ত্যা যশসা
ব্রহ্মবর্চসেন য এবং বেদ  || ৩. ১৮. ৩||

প্রাণ এব ব্রহ্মণশ্চতুর্থঃ পাদঃ স বাযুনা জ্যোতিষা
ভাতি চ তপতি চ্  ভাতি চ তপতি চ কীর্ত্যা যশসা
ব্রহ্মবর্চসেন য এবং বেদ  || ৩. ১৮. ৪||

চক্ষুরেব ব্রহ্মণশ্চতুর্থঃ পাদঃ স আদিত্যেন জ্যোতিষা
ভাতি চ তপতি চ  ভাতি চ তপতি চ কীর্ত্যা যশসা
ব্রহ্মবর্চসেন য এবং বেদ  || ৩. ১৮. ৫||

শ্রোত্রমেব ব্রহ্মণশ্চতুর্থঃ পাদঃ স দিগ্ভির্জ্যোতিষা
ভাতি চ তপতি চ  ভাতি চ তপতি চ কীর্ত্যা যশসা
ব্রহ্মবর্চসেন য এবং বেদ য এবং বেদ  || ৩. ১৮. ৬||

|| ইতি অষ্টাদশঃ খণ্ডঃ ||

|| একোনবিংশঃ খণ্ডঃ ||

আদিত্যো ব্রহ্মেত্যাদেশস্তস্যোপব্যাখ্যানমসদেবেদমগ্র
আসীত্ | তত্সদাসীত্তত্সমভবত্তদাণ্ডং নিরবর্তত 
তত্সংবত্সরস্য মাত্রামশযত তন্নিরভিদ্যত তে আণ্ডকপালে
রজতং চ সুবর্ণং চাভবতাম্ || ৩. ১৯. ১||

তদ্যদ্রজতঁ সেযং পৃথিবী যত্সুবর্ণঁ সা দ্যৌর্যজ্জরাযু
তে পর্বতা  যদুল্বঁ সমেঘো নীহারো যা ধমনযস্তা
নদ্যো যদ্বাস্তেযমুদকঁ স সমুদ্রঃ  || ৩. ১৯. ২||

অথ যত্তদজাযত সোঽসাবাদিত্যস্তং জাযমানং ঘোষা
উলূলবোঽনূদতিষ্ঠন্ত্সর্বাণি চ ভূতানি সর্বে চ
কামাস্তস্মাত্তস্যোদযং প্রতি প্রত্যাযনং প্রতি ঘোষা
উলূলবোঽনূত্তিষ্ঠন্তি সর্বাণি চ ভূতানি সর্বে চ কামাঃ 
|| ৩. ১৯. ৩||

স য এতমেবং বিদ্বানাদিত্যং ব্রহ্মেত্যুপাস্তেঽভ্যাশো হ
যদেনঁ সাধবো ঘোষা আ চ গচ্ছেযুরুপ চ
নিম্রেডেরন্নিম্রেডেরন্ || ৩. ১৯. ৪||

|| ইতি একোনবিংশঃ খণ্ডঃ ||

 || ইতি তৃতীযোঽধ্যাযঃ ||

——————————————————————————–

 || চতুর্থোঽধ্যাযঃ ||

|| প্রথমঃ খণ্ডঃ ||

জানশ্রুতির্হ পৌত্রাযণঃ শ্রদ্ধাদেযো বহুদাযী বহুপাক্য আস
স হ সর্বত আবসথান্মাপযাংচক্রে সর্বত এব
মেঽন্নমত্স্যন্তীতি || ৪. ১. ১||

অথ হঁসা নিশাযামতিপেতুস্তদ্ধৈবঁ হঁ সোহঁ সমভ্যুবাদ
হো হোঽযি ভল্লাক্ষ ভল্লাক্ষ জানশ্রুতেঃ পৌত্রাযণস্য
সমং দিবা জ্যোতিরাততং তন্মা প্রসাঙ্ক্ষী স্তত্ত্বা
মা প্রধাক্ষীরিতি || ৪. ১. ২||

তমু হ পরঃ প্রত্যুবাচ কম্বর এনমেতত্সন্তঁ সযুগ্বানমিব
রৈক্বমাত্থেতি যো নু কথঁ সযুগ্বা রৈক্ব ইতি || ৪. ১. ৩||

যথা কৃতাযবিজিতাযাধরেযাঃ সংযন্ত্যেবমেনঁ সর্বং
তদভিসমৈতি যত্কিংচ প্রজাঃ সাধু কুর্বন্তি যস্তদ্বেদ
যত্স বেদ স মযৈতদুক্ত ইতি || ৪. ১. ৪||

তদু হ জানশ্রুতিঃ পৌত্রাযণ উপশুশ্রাব
স হ সংজিহান এব ক্ষত্তারমুবাচাঙ্গারে হ সযুগ্বানমিব
রৈক্বমাত্থেতি যো নু কথঁ সযুগ্বা রৈক্ব ইতি || ৪. ১. ৫||

যথা কৃতাযবিজিতাযাধরেযাঃ সংযন্ত্যেবমেনঁ সর্বং
তদভিসমৈতি যত্কিংচ প্রজাঃ সাধু কুর্বন্তি যস্তদ্বেদ
যত্স বেদ স মযৈতদুক্ত ইতি || ৪. ১. ৬||

স হ ক্ষত্তান্বিষ্য নাবিদমিতি প্রত্যেযায তঁ হোবাচ
যত্রারে ব্রাহ্মণস্যান্বেষণা তদেনমর্চ্ছেতি || ৪. ১. ৭||

সোঽধস্তাচ্ছকটস্য পামানং কষমাণমুপোপবিবেশ
তঁ হাভ্যুবাদ ত্বং নু ভগবঃ সযুগ্বা রৈক্ব
ইত্যহঁ হ্যরা৩ ইতি হ প্রতিজজ্ঞে স হ ক্ষত্তাবিদমিতি
প্রত্যেযায || ৪. ১. ৮ ||

|| ইতি প্রথমঃ খণ্ডঃ ||

|| দ্বিতীযঃ খণ্ডঃ ||

তদু হ জানশ্রুতিঃ পৌত্রাযণঃ ষট্শতানি গবাং
নিষ্কমশ্বতরীরথং তদাদায প্রতিচক্রমে তঁ হাভ্যুবাদ
|| ৪. ২. ১||

রৈক্বেমানি ষট্শতানি গবামযং নিষ্কোঽযমশ্বতরীরথোঽনু
ম এতাং ভগবো দেবতাঁ শাধি যাং দেবতামুপাস্স ইতি
|| ৪. ২. ২||

তমু হ পরঃ প্রত্যুবাচাহ হারেত্বা শূদ্র তবৈব সহ
গোভিরস্ত্বিতি তদু হ পুনরেব জানশ্রুতিঃ পৌত্রাযণঃ
সহস্রং গবাং নিষ্কমশ্বতরীরথং দুহিতরং তদাদায
প্রতিচক্রমে || ৪. ২. ৩||

তঁ হাভ্যুবাদ রৈক্বেদঁ সহস্রং গবামযং
নিষ্কোঽযমশ্বতরীরথ ইযং জাযাযং গ্রামো
যস্মিন্নাস্সেঽন্বেব মা ভগবঃ শাধীতি || ৪. ২. ৪ ||

তস্যা হ মুখমুপোদ্গৃহ্ণন্নুবাচাজহারেমাঃ শূদ্রানেনৈব
মুখেনালাপযিষ্যথা ইতি তে হৈতে রৈক্বপর্ণা নাম
মহাবৃষেষু যত্রাস্মা উবাস স তস্মৈ হোবাচ || ৪. ২. ৫ ||

|| ইতি দ্বিতীযঃ খণ্ডঃ ||

|| তৃতীযঃ খণ্ডঃ ||

বাযুর্বাব সংবর্গো যদা বা অগ্নিরুদ্বাযতি বাযুমেবাপ্যেতি
যদা সূর্যোঽস্তমেতি বাযুমেবাপ্যেতি যদা চন্দ্রোঽস্তমেতি
বাযুমেবাপ্যেতি || ৪. ৩. ১||

যদাপ উচ্ছুষ্যন্তি বাযুমেবাপিযন্তি
বাযুর্হ্যেবৈতান্সর্বান্সংবৃঙ্ক্ত ইত্যধিদৈবতম্ || ৪. ৩. ২||

অথাধ্যাত্মং প্রাণো বাব সংবর্গঃ স যদা স্বপিতি প্রাণমেব
বাগপ্যেতি প্রাণং চক্ষুঃ প্রাণঁ শ্রোত্রং প্রাণং মনঃ প্রাণো
হ্যেবৈতান্সর্বান্সংবৃঙ্ক্ত ইতি || ৪. ৩. ৩||

তৌ বা এতৌ দ্বৌ সম্বর্গৌ বাযুরেব দেবেষু প্রাণঃ প্রাণেষু
|| ৪. ৩. ৪||

অথ হ শৌনকং চ কাপেযমভিপ্রতারিণং চ কাক্ষসেনিং
পরিবিষ্যমাণৌ ব্রহ্মচারী বিভিক্ষে তস্মা উ হ ন দদতুঃ
|| ৪. ৩. ৫||

স হোবাচ মহাত্মনশ্চতুরো দেব একঃ কঃ স জগার
ভুবনস্য গোপাস্তং কাপেয নাভিপশ্যন্তি মর্ত্যা
অভিপ্রতারিন্বহুধা বসন্তং যস্মৈ বা এতদন্নং তস্মা
এতন্ন দত্তমিতি || ৪. ৩. ৬||

তদু হ শৌনকঃ কাপেযঃ প্রতিমন্বানঃ প্রত্যেযাযাত্মা দেবানাং
জনিতা প্রজানাঁ হিরণ্যদঁষ্ট্রো বভসোঽনসূরির্মহান্তমস্য
মহিমানমাহুরনদ্যমানো যদনন্নমত্তীতি বৈ বযং
ব্রহ্মচারিন্নেদমুপাস্মহে দত্তাস্মৈ ভিক্ষামিতি || ৪. ৩. ৭||

তস্ম উ হ দদুস্তে বা এতে পঞ্চান্যে পঞ্চান্যে দশ
সন্তস্তত্কৃতং তস্মাত্সর্বাসু দিক্ষ্বন্নমেব দশ কৃতঁ সৈষা
বিরাডন্নাদী তযেদঁ সর্বং দৃষ্টঁ সর্বমস্যেদং দৃষ্টং
ভবত্যন্নাদো ভবতি য এবং বেদ য এবং বেদ || ৪. ৩. ৮||

|| ইতি তৃতীযঃ খণ্ডঃ ||

|| চতুর্থঃ খণ্ডঃ ||

সত্যকামো হ জাবালো জবালাং মাতরমামন্ত্রযাংচক্রে
ব্রহ্মচর্যং ভবতি বিবত্স্যামি কিংগোত্রো ন্বহমস্মীতি
|| ৪. ৪. ১||

সা হৈনমুবাচ নাহমেতদ্বেদ তাত যদ্গোত্রস্ত্বমসি
বহ্বহং চরন্তী পরিচারিণী যৌবনে ত্বামলভে
সাহমেতন্ন বেদ যদ্গোত্রস্ত্বমসি জবালা তু নামাহমস্মি
সত্যকামো নাম ত্বমসি স সত্যকাম এব জাবালো
ব্রবীথা ইতি || ৪. ৪. ২||

স হ হারিদ্রুমতং গৌতমমেত্যোবাচ ব্রহ্মচর্যং ভগবতি
বত্স্যাম্যুপেযাং ভগবন্তমিতি || ৪. ৪. ৩||

তঁ হোবাচ কিংগোত্রো নু সোম্যাসীতি স হোবাচ
নাহমেতদ্বেদ ভো যদ্গোত্রোঽহমস্ম্যপৃচ্ছং মাতরঁ
সা মা প্রত্যব্রবীদ্বহ্বহং চরন্তী পরিচরিণী যৌবনে
ত্বামলভে সাহমেতন্ন বেদ যদ্গোত্রস্ত্বমসি জবালা তু
নামাহমস্মি সত্যকামো নাম ত্বমসীতি সোঽহঁ
সত্যকামো জাবালোঽস্মি ভো ইতি || ৪. ৪. ৪||

তঁ হোবাচ নৈতদব্রাহ্মণো বিবক্তুমর্হতি সমিধঁ
সোম্যাহরোপ ত্বা নেষ্যে ন সত্যাদগা ইতি তমুপনীয
কৃশানামবলানাং চতুঃশতা গা নিরাকৃত্যোবাচেমাঃ
সোম্যানুসংব্রজেতি তা অভিপ্রস্থাপযন্নুবাচ
নাসহস্রেণাবর্তেযেতি স হ বর্ষগণং প্রোবাস তা যদা
সহস্রঁ সংপেদুঃ || ৪. ৪. ৫||

|| ইতি চতুর্থঃ খণ্ডঃ ||

|| পঞ্চমঃ খণ্ডঃ ||

অথ হৈনমৃষভোঽভ্যুবাদ সত্যকাম৩ ইতি
ভগব ইতি হ প্রতিশুশ্রাব প্রাপ্তাঃ সোম্য সহস্রঁ স্মঃ
প্রাপয ন আচার্যকুলম্ || ৪. ৫. ১||

ব্রহ্মণশ্চ তে পাদং ব্রবাণীতি ব্রবীতু মে ভগবানিতি
তস্মৈ হোবাচ প্রাচী দিক্কলা প্রতীচী দিক্কলা
দক্ষিণা দিক্কলোদীচী দিক্কলৈষ বৈ সোম্য চতুষ্কলঃ
পাদো ব্রহ্মণঃ প্রকাশবান্নাম || ৪. ৫. ২||

স য এতমেবং বিদ্বাঁশ্চতুষ্কলং পাদং ব্রহ্মণঃ
প্রকাশবানিত্যুপাস্তে প্রকাশবানস্মিঁল্লোকে ভবতি
প্রকাশবতো হ লোকাঞ্জযতি য এতমেবং বিদ্বাঁশ্চতুষ্কলং
পাদং ব্রহ্মণঃ প্রকাশবানিত্যুপাস্তে || ৪. ৫. ৩||

|| ইতি পঞ্চমঃ খণ্ডঃ ||

|| ষষ্ঠঃ  খণ্ডঃ ||

অগ্নিষ্টে পাদং বক্তেতি স হ শ্বোভূতে গ
আভিপ্রস্থাপযাংচকার তা যত্রাভি সাযং
বভূবুস্তত্রাগ্নিমুপসমাধায গা উপরুধ্য সমিধমাধায
পশ্চাদগ্নেঃ  প্রাঙুপোপবিবেশ  || ৪. ৬. ১||

তমগ্নিরভ্যুবাদ সত্যকাম৩ ইতি ভগব ইতি
হ প্রতিশুশ্রাব  || ৪. ৬. ২||

ব্রহ্মণঃ সোম্য তে পাদং ব্রবাণীতি ব্রবীতু মে ভগবানিতি
তস্মৈ হোবাচ পৃথিবী কলান্তরিক্ষং কলা দ্যৌঃ কলা
সমুদ্রঃ কলৈষ বৈ সোম্য চতুষ্কলঃ পাদো
ব্রহ্মণোঽনন্তবান্নাম  || ৪. ৬. ৩||

স য এতমেবং বিদ্বাঁশ্চতুষ্কলং পাদং
ব্রহ্মণোঽনন্তবানিত্যুপাস্তেঽনন্তবানস্মিঁল্লোকে
ভবত্যনন্তবতো হ লোকাঞ্জযতি য এতমেবং বিদ্বাঁশ্চতুষ্কলং
পাদং ব্রহ্মণোঽনন্তবানিত্যুপাস্তে  || ৪. ৬. ৪||

|| ইতি ষষ্ঠঃ খণ্ডঃ ||

|| সপ্তমঃ খণ্ডঃ ||

হঁসস্তে পাদং বক্তেতি স হ শ্বোভূতে গা
অভিপ্রস্থাপযাংচকার তা যত্রাভি সাযং
বভূবুস্তত্রাগ্নিমুপসমাধায গা উপরুধ্য সমিধমাধায
পশ্চাদগ্নেঃ  প্রাঙুপোপবিবেশ || ৪. ৭. ১||

তঁহঁস উপনিপত্যাভ্যুবাদ সত্যকাম৩ ইতি ভগব
ইতি হ প্রতিশুশ্রাব || ৪. ৭. ২||

ব্রহ্মণঃ সোম্য তে পাদং ব্রবাণীতি ব্রবীতু মে ভগবানিতি
তস্মৈ হোবাচাগ্নিঃ কলা সূর্যঃ কলা চন্দ্রঃ কলা
বিদ্যুত্কলৈষ বৈ সোম্য চতুষ্কলঃ পাদো ব্রহ্মণো
জ্যোতিষ্মান্নাম || ৪. ৭. ৩||

স য এতমেবং বিদ্বাঁশ্চতুষ্কলং পাদং ব্রহ্মণো
জ্যোতিষ্মানিত্যুপাস্তে জ্যোতিষ্মানস্মিঁল্লোকে ভবতি
জ্যোতিষ্মতো হ লোকাঞ্জযতি য এতমেবং বিদ্বাঁশ্চতুষ্কলং
পাদং ব্রহ্মণো জ্যোতিষ্মানিত্যুপাস্তে || ৪. ৭. ৪||

|| ইতি সপ্তমঃ খণ্ডঃ ||

|| অষ্টমঃ খণ্ডঃ ||

মদ্গুষ্টে পাদং বক্তেতি স হ শ্বোভূতে গা অভিপ্রস্থাপযাংচকার
তা যত্রাভি সাযং বভূবুস্তত্রাগ্নিমুপসমাধায গা
উপরুধ্য সমিধমাধায পশ্চাদগ্নেঃ প্রাঙুপোপবিবেশ || ৪. ৮. ১||

তং মদ্গুরুপনিপত্যাভ্যুবাদ সত্যকাম৩ ইতি ভগব ইতি
হ প্রতিশুশ্রাব || ৪. ৮. ২||

ব্রহ্মণঃ সোম্য তে পাদং ব্রবাণীতি ব্রবীতু মে ভগবানিতি
তস্মৈ হোবাচ প্রাণঃ কলা চক্ষুঃ কলা শ্রোত্রং কলা মনঃ
কলৈষ বৈ সোম্য চতুষ্কলঃ পাদো ব্রহ্মণ আযতনবান্নাম
|| ৪. ৮. ৩||

স যৈ এতমেবং বিদ্বাঁশ্চতুষ্কলং পাদং ব্রহ্মণ
আযতনবানিত্যুপাস্ত আযতনবানস্মিঁল্লোকে
ভবত্যাযতনবতো হ লোকাঞ্জযতি য এতমেবং
বিদ্বাঁশ্চতুষ্কলং পাদং ব্রহ্মণ আযতনবানিত্যুপাস্তে
|| ৪. ৮. ৪||

|| ইতি অষ্টমঃ  খণ্ডঃ ||

|| নবমঃ খণ্ডঃ ||

প্রাপ হাচর্যকুলং তমাচর্যোঽভ্যুবাদ সত্যকাম৩ ইতি
ভগব ইতি হ প্রতিশুশ্রাব || ৪. ৯. ১||

ব্রহ্মবিদিব বৈ সোম্য ভাসি কো নু ত্বানুশশাসেত্যন্যে
মনুষ্যেভ্য ইতি হ প্রতিজজ্ঞে ভগবাঁস্ত্বেব মে কামে ব্রূযাত্
|| ৪. ৯. ২||

শ্রুতঁহ্যেব মে ভগবদ্দৃশেভ্য আচার্যাদ্ধৈব বিদ্যা বিদিতা
সাধিষ্ঠং প্রাপতীতি তস্মৈ হৈতদেবোবাচাত্র হ ন কিংচন
বীযাযেতি বীযাযেতি || ৪. ৯. ৩||

|| ইতি নবমঃ খণ্ডঃ ||

|| দশমঃ খণ্ডঃ ||

উপকোসলো হ বৈ কামলাযনঃ সত্যকামে জাবালে
ব্রহ্মচার্যমুবাস তস্য হ দ্বাদশ বার্ষাণ্যগ্নীন্পরিচচার
স হ স্মান্যানন্তেবাসিনঃ সমাবর্তযঁস্তং হ স্মৈব ন
সমাবর্তযতি || ৪. ১০. ১||
 
তং জাযোবাচ তপ্তো ব্রহ্মচারী কুশলমগ্নীন্পরিচচারীন্মা
ত্বাগ্নযঃ পরিপ্রবোচন্প্রব্রূহ্যস্মা ইতি তস্মৈ হাপ্রোচ্যৈব
প্রবাসাংচক্রে || ৪. ১০. ২||

স হ ব্যাধিনানশিতুং দধ্রে তমাচার্যজাযোবাচ
ব্রহ্মচারিন্নশান কিং নু নাশ্নাসীতি স হোবাচ
বহব ইমেঽস্মিন্পুরুষে কামা নানাত্যযা ব্যাধীভিঃ
প্রতিপূর্ণোঽস্মি নাশিষ্যামীতি || ৪. ১০. ৩||

অথ হাগ্নযঃ সমূদিরে তপ্তো ব্রহ্মচারী কুশলং নঃ
পর্যচারীদ্ধন্তাস্মৈ প্রব্রবামেতি তস্মৈ হোচুঃ প্রাণো ব্রহ্ম
কং ব্রহ্ম খং ব্রহ্মেতি || ৪. ১০. ৪||

স হোবাচ বিজানাম্যহং যত্প্রাণো ব্রহ্ম কং চ তু খং চ ন
বিজানামীতি তে হোচুর্যদ্বাব কং তদেব খং যদেব খং তদেব
কমিতি প্রাণং চ হাস্মৈ তদাকাশং চোচুঃ || ৪. ১০. ৫||

|| ইতি দশমঃ  খণ্ডঃ ||

|| একাদশঃ  খণ্ডঃ ||

অথ হৈনং গার্হপত্যোঽনুশশাস পৃথিব্যগ্নিরন্নমাদিত্য
ইতি য এষ আদিত্যে পুরুষো দৃশ্যতে সোঽহমস্মি স
এবাহমস্মীতি || ৪. ১১. ১||

স য এতমেবং বিদ্বানুপাস্তেঽপহতে পাপকৃত্যাং লোকী ভবতি
সর্বমাযুরেতি জ্যোগ্জীবতি নাস্যাবরপুরুষাঃ ক্ষীযন্ত উপ
বযং তং ভুঞ্জামোঽস্মিঁশ্চ লোকেঽমুষ্মিঁশ্চ য এতমেবং
বিদ্বানুপাস্তে || ৪. ১১. ২||

|| ইতি একাদশঃ খণ্ডঃ ||

|| দ্বাদশঃ খণ্ডঃ ||

অথ হৈনমন্বাহার্যপচনোঽনুশশাসাপো দিশো নক্ষত্রাণি
চন্দ্রমা ইতি য এষ চন্দ্রমসি পুরুষো দৃশ্যতে সোঽহমস্মি
স এবাহমস্মীতি || ৪. ১২. ১||

স য এতমেবং বিদ্বানুপাস্তেঽপহতে পাপকৃত্যাং লোকী ভবতি
সর্বমাযুরেতি জ্যোগ্জীবতি নাস্যাবরপুরুষাঃ ক্ষীযন্ত উপ
বযং তং ভুঞ্জামোঽস্মিঁশ্চ লোকেঽমুষ্মিঁশ্চ য এতমেবং
বিদ্বানুপাস্তে || ৪. ১২. ২||

|| ইতি দ্বাদশঃ খণ্ডঃ ||

|| ত্রযোদশঃ খণ্ডঃ ||

অথ হৈনমাহবনীযোঽনুশশাস প্রাণ আকাশো দ্যৌর্বিদ্যুদিতি
য এষ বিদ্যুতি পুরুষো দৃশ্যতে সোঽহমস্মি স
এবাহমস্মীতি || ৪. ১৩. ১||

স য এতমেবং বিদ্বানুপাস্তেঽপহতে পাপকৃত্যাং লোকী ভবতি
সর্বমযুরেতি জ্যোগ্জীবতি নাস্যাবরপুরুষাঃ ক্ষীযন্ত উপ
বযং তং ভুঞ্জামোঽস্মিঁশ্চ লোকেঽমুষ্মিঁশ্চ য এতমেবং
বিদ্বানুপাস্তে || ৪. ১৩. ২||

|| ইতি ত্রযোদশঃ  খণ্ডঃ ||

|| চতুর্দশঃ  খণ্ডঃ ||

তে হোচুরুপকোসলৈষা সোম্য তেঽস্মদ্বিদ্যাত্মবিদ্যা
চাচার্যস্তু তে গতিং বক্তেত্যাজগাম
হাস্যাচার্যস্তমাচার্যোঽভ্যুবাদোপকোসল৩ ইতি
|| ৪. ১৪. ১||

ভগব ইতি হ প্রতিশুশ্রাব ব্রহ্মবিদ ইব সোম্য তে মুখং ভাতি
কো নু ত্বানুশশাসেতি কো নু মানুশিষ্যাদ্ভো ইতীহাপেব
নিহ্নুত ইমে নূনমীদৃশা অন্যাদৃশা ইতীহাগ্নীনভ্যূদে
কিং নু সোম্য কিল তেঽবোচন্নিতি || ৪. ১৪. ২||

ইদমিতি হ প্রতিজজ্ঞে লোকান্বাব কিল সোম্য তেঽবোচন্নহং
তু তে তদ্বক্ষ্যামি যথা পুষ্করপলাশ আপো ন শ্লিষ্যন্ত
এবমেবংবিদি পাপং কর্ম ন শ্লিষ্যত ইতি ব্রবীতু মে
ভগবানিতি তস্মৈ হোবাচ || ৪. ১৪. ৩||

|| ইতি চতুর্দশঃ খণ্ডঃ ||

|| পঞ্জদশঃ  খণ্ডঃ ||

য এষোঽক্ষিণি পুরুষো দৃশ্যত এষ আত্মেতি
হোবাচৈতদমৃতমভযমেতদ্ব্রহ্মেতি
তদ্যদ্যপ্যস্মিন্সর্পির্বোদকং বা সিঞ্চতি বর্ত্মনী এব
গচ্ছতি || ৪. ১৫. ১||

এতঁ সংযদ্বাম ইত্যাচক্ষত এতঁ হি সর্বাণি
বামান্যভিসংযন্তি সর্বাণ্যেনং বামান্যভিসংযন্তি
য এবং বেদ || ৪. ১৫. ২||

এষ উ এব বামনীরেষ হি সর্বাণি বামানি নযতি
সর্বাণি বামানি নযতি য এবং বেদ || ৪. ১৫. ৩||

এষ উ এব ভামনীরেষ হি সর্বেষু লোকেষু ভাতি
সর্বেষু লোকেষু ভাতি য এবং বেদ || ৪. ১৫. ৪||

অথ যদু চৈবাস্মিঞ্ছব্যং কুর্বন্তি যদি চ
নার্চিষমেবাভিসংভবন্ত্যর্চিষোঽহরহ্ন
আপূর্যমাণপক্ষমাপূর্যমাণপক্ষাদ্যান্ষডুদঙ্ঙেতি
মাসাঁস্তান্মাসেভ্যঃ সংবত্সরঁ
সংবত্সরাদাদিত্যমাদিত্যাচ্চন্দ্রমসং চন্দ্রমসো বিদ্যুতং
তত্ পুরুষোঽমানবঃ স এনান্ব্রহ্ম গমযত্যেষ দেবপথো
ব্রহ্মপথ এতেন প্রতিপদ্যমানা ইমং মানবমাবর্তং নাবর্তন্তে
নাবর্তন্তে || ৪. ১৫. ৫||

|| ইতি পঞ্চদশঃ খণ্ডঃ ||

|| ষোডশঃ  খণ্ডঃ ||

এষ হ বৈ যজ্ঞো যোঽযং পবতে এষ হ যন্নিদঁ সর্বং পুনাতি
যদেষ যন্নিদঁ সর্বং পুনাতি তস্মাদেষ এব যজ্ঞস্তস্য
মনশ্চ বাক্চ বর্তনী || ৪. ১৬. ১||

তযোরন্যতরাং মনসা সঁস্করোতি ব্রহ্মা বাচা
হোতাধ্বর্যুরুদ্গাতান্যতরাঁস যত্রৌপাকৃতে প্রাতরনুবাকে
পুরা পরিধানীযাযা ব্রহ্মা ব্যবদতি || ৪. ১৬. ২||

অন্যতরামেব বর্তনীঁ সঁস্করোতি হীযতেঽন্যতরা
স যথৈকপাদ্ব্রজন্রথো বৈকেন চক্রেণ বর্তমানো
রিষ্যত্যেবমস্য যজ্ঞোরিষ্যতি যজ্ঞঁ রিষ্যন্তং
যজমানোঽনুরিষ্যতি স ইষ্ট্বা পাপীযান্ভবতি || ৪. ১৬. ৩||

অথ যত্রোপাকৃতে প্রাতরনুবাকে ন পুরা পরিধানীযাযা ব্রহ্মা
ব্যবদত্যুভে এব বর্তনী সঁস্কুর্বন্তি ন হীযতেঽন্যতরা
|| ৪. ১৬. ৪||

স যথোভযপাদ্ব্রজন্রথো বোভাভ্যাং চক্রাভ্যাং বর্তমানঃ
প্রতিতিষ্ঠত্যেবমস্য যজ্ঞঃ প্রতিতিষ্ঠতি যজ্ঞং প্রতিতিষ্ঠন্তং
যজমানোঽনুপ্রতিতিষ্ঠতি স ইষ্ট্বা শ্রেযান্ভবতি || ৪. ১৬. ৫||

|| ইতি ষোডশঃ  খণ্ডঃ ||

|| সপ্তদশঃ খণ্ডঃ ||

প্রজাপতির্লোকানভ্যতপত্তেষাং তপ্যমানানাঁ
রসান্প্রাবৃহদগ্নিং পৃথিব্যা বাযুমন্তরিক্ষাতাদিত্যং দিবঃ
|| ৪. ১৭. ১||

স এতাস্তিস্রো দেবতা অভ্যতপত্তাসাং তপ্যমানানাঁ
রসান্প্রাবৃহদগ্নেরৃচো বাযোর্যজূঁষি সামান্যাদিত্যাত্
|| ৪. ১৭. ২||

স এতাং ত্রযীং বিদ্যামভ্যতপত্তস্যাস্তপ্যমানাযা
রসান্প্রাবৃহদ্ভূরিত্যৃগ্ভ্যো ভুবরিতি যজুর্ভ্যঃ স্বরিতি
সামভ্যঃ || ৪. ১৭. ৩||

তদ্যদৃক্তো রিষ্যেদ্ভূঃ স্বাহেতি গার্হপত্যে জুহুযাদৃচামেব
তদ্রসেনর্চাং বীর্যেণর্চাং যজ্ঞস্য বিরিষ্টঁ সংদধাতি
|| ৪. ১৭. ৪||

স যদি যজুষ্টো রিষ্যেদ্ভুবঃ স্বাহেতি দক্ষিণাগ্নৌ
জুহুযাদ্যজুষামেব তদ্রসেন যজুষাং বীর্যেণ যজুষাং যজ্ঞস্য
বিরিষ্টঁ সংদধাতি || ৪. ১৭. ৫||

অথ যদি সামতো রিষ্যেত্স্বঃ স্বাহেত্যাহবনীযে
জুহুযাত্সাম্নামেব তদ্রসেন সাম্নাং বীর্যেণ সাম্নাং যজ্ঞস্য
বিরিষ্টং সংদধাতি || ৪. ১৭. ৬||

তদ্যথা লবণেন সুবর্ণঁ সংদধ্যাত্সুবর্ণেন রজতঁ
রজতেন ত্রপু ত্রপুণা সীসঁ সীসেন লোহং লোহেন দারু
দারু চর্মণা || ৪. ১৭. ৭||

এবমেষাং লোকানামাসাং দেবতানামস্যাস্ত্রয্যা বিদ্যাযা
বীর্যেণ যজ্ঞস্য বিরিষ্টঁ সংদধাতি ভেষজকৃতো হ বা
এষ যজ্ঞো যত্রৈবংবিদ্ব্রহ্মা ভবতি || ৪. ১৭. ৮||

এষ হ বা উদক্প্রবণো যজ্ঞো যত্রৈবংবিদ্ব্রহ্মা ভবত্যেবংবিদঁ
হ বা এষা ব্রহ্মাণমনুগাথা যতো যত আবর্ততে
তত্তদ্গচ্ছতি || ৪. ১৭. ৯||

মানবো ব্রহ্মৈবৈক ঋত্বিক্কুরূনশ্বাভিরক্ষত্যেবংবিদ্ধ
বৈ ব্রহ্মা যজ্ঞং যজমানঁ সর্বাঁশ্চর্ত্বিজোঽভিরক্ষতি
তস্মাদেবংবিদমেব ব্রহ্মাণং কুর্বীত নানেবংবিদং নানেবংবিদম্
|| ৪. ১৭. ১০||

 
 || ইতি চতুর্থোঽধ্যাযঃ ||

——————————————————————————–

 || পঞ্চমোঽধ্যাযঃ ||

|| প্রথমঃ খণ্ডঃ ||

যো হ বৈ জ্যেষ্ঠং চ শ্রেষ্ঠং চ বেদ জ্যেষ্ঠশ্চ হ বৈ শ্রেষ্ঠশ্চ
ভবতি প্রাণো বাব জ্যেষ্ঠশ্চ শ্রেষ্ঠশ্চ || ৫. ১. ১||

যো হ বৈ বসিষ্ঠং বেদ বসিষ্ঠো হ স্বানাং ভবতি
বাগ্বাব বসিষ্ঠঃ || ৫. ১. ২||

যো হ বৈ প্রতিষ্ঠাং বেদ প্রতি হ তিষ্ঠত্যস্মিঁশ্চ
লোকেঽমুষ্মিঁশ্চ চক্ষুর্বাব প্রতিষ্ঠা || ৫. ১. ৩||

যো হ বৈ সংপদং বেদ সঁহাস্মৈ কামাঃ পদ্যন্তে
দৈবাশ্চ মানুষাশ্চ শ্রোত্রং বাব সংপত্ || ৫. ১. ৪||
 
যো হ বা আযতনং বেদাযতনঁ হ স্বানাং ভবতি
মনো হ বা আযতনম্ || ৫. ১. ৫||
 
অথ হ প্রাণা অহঁশ্রেযসি ব্যূদিরেঽহঁশ্রেযানস্ম্যহঁ
শ্রেযানস্মীতি || ৫. ১. ৬||
 
তে হ প্রাণাঃ প্রজাপতিং পিতরমেত্যোচুর্ভগবন্কো নঃ
শ্রেষ্ঠ ইতি তান্হোবাচ যস্মিন্ব উত্ক্রান্তে শরীরং
পাপিষ্ঠতরমিব দৃশ্যেত স বঃ শ্রেষ্ঠ ইতি || ৫. ১. ৭||

সা হ বাগুচ্চক্রাম সা সংবত্সরং প্রোষ্য পর্যেত্যোবাচ
কথমশকতর্তে মজ্জীবিতুমিতি যথা কলা অবদন্তঃ
প্রাণন্তঃ প্রাণেন পশ্যন্তশ্চক্ষুষা শৃণ্বন্তঃ শ্রোত্রেণ
ধ্যাযন্তো মনসৈবমিতি প্রবিবেশ হ বাক্ || ৫. ১. ৮||

চক্ষুর্হোচ্চক্রাম তত্সংবত্সরং প্রোষ্য পর্যেত্যোবাচ
কথমশকতর্তে মজ্জীবিতুমিতি যথান্ধা অপশ্যন্তঃ
প্রাণন্তঃ প্রাণেন বদন্তো বাচা শৃণ্বন্তঃ শ্রোত্রেণ
ধ্যাযন্তো মনসৈবমিতি প্রবিবেশ হ চক্ষুঃ || ৫. ১. ৯||

শ্রোত্রঁ হোচ্চক্রাম তত্সংবত্সরং প্রোষ্য পর্যেত্যোবাচ
কথমশকতর্তে মজ্জীবিতুমিতি যথা বধিরা অশৃণ্বন্তঃ
প্রাণন্তঃ প্রাণেন বদন্তো বাচা পশ্যন্তশ্চক্ষুষা
ধ্যাযন্তো মনসৈবমিতি প্রবিবেশ হ শ্রোত্রম্ || ৫. ১. ১০||
 
মনো হোচ্চক্রাম তত্সংবত্সরং প্রোষ্য পর্যেত্যোবাচ
কথমশকতর্তে মজ্জীবিতুমিতি যথা বালা অমনসঃ
প্রাণন্তঃ প্রাণেন বদন্তো বাচা পশ্যন্তশ্চক্ষুষা
শৃণ্বন্তঃ শ্রোত্রেণৈবমিতি প্রবিবেশ হ মনঃ || ৫. ১. ১১||

অথ হ প্রাণ উচ্চিক্রমিষন্স যথা সুহযঃ
পড্বীশশঙ্কূন্সংখিদেদেবমিতরান্প্রাণান্সমখিদত্তঁ
হাভিসমেত্যোচুর্ভগবন্নেধি ত্বং নঃ শ্রেষ্ঠোঽসি
মোত্ক্রমীরিতি || ৫. ১. ১২||

অথ হৈনং বাগুবাচ যদহং বসিষ্ঠোঽস্মি ত্বং
তদ্বসিষ্ঠোঽসীত্যথ হৈনং চক্ষুরুবাচ যদহং
প্রতিষ্ঠাস্মি ত্বং তত্প্রতিষ্ঠাসীতি || ৫. ১. ১৩||

অথ হৈনঁশ্রোত্রমুবাচ যদহং সংপদস্মি ত্বং
তত্সংপদসীত্যথ হৈনং মন উবাচ যদহমাযতনমস্মি
ত্বং তদাযতনমসীতি || ৫. ১. ১৪||

ন বৈ বাচো ন চক্ষূঁষি ন শ্রোত্রাণি ন
মনাঁসীত্যাচক্ষতে প্রাণা ইত্যেবাচক্ষতে প্রাণো
হ্যেবৈতানি সর্বাণি ভবতি || ৫. ১. ১৫||

|| ইতি প্রথমঃ খণ্ডঃ ||

|| দ্বিতিযঃ খণ্ডঃ ||

স হোবাচ কিং মেঽন্নং ভবিষ্যতীতি যত্কিংচিদিদমা
শ্বভ্য আ শকুনিভ্য ইতি হোচুস্তদ্বা এতদনস্যান্নমনো
হ বৈ নাম প্রত্যক্ষং ন হ বা এবংবিদি কিংচনানন্নং
ভবতীতি || ৫. ২. ১||
 
স হোবাচ কিং মে বাসো ভবিষ্যতীত্যাপ ইতি
হোচুস্তস্মাদ্বা এতদশিষ্যন্তঃ
পুরস্তাচ্চোপরিষ্টাচ্চাদ্ভিঃ পরিদধতি
লম্ভুকো হ বাসো ভবত্যনগ্নো হ ভবতি || ৫. ২. ২||

তদ্ধৈতত্সত্যকামো জাবালো গোশ্রুতযে বৈযাঘ্রপদ্যাযোক্ত্বোবাচ
যদ্যপ্যেনচ্ছুষ্কায স্থাণবে ব্রূযাজ্জাযেরন্নেবাস্মিঞ্ছাখাঃ
প্ররোহেযুঃ পলাশানীতি || ৫. ২. ৩||

অথ যদি মহজ্জিগমিষেদমাবাস্যাযাং দীক্ষিত্বা পৌর্ণমাস্যাঁ
রাত্রৌ সর্বৌষধস্য মন্থং দধিমধুনোরুপমথ্য জ্যেষ্ঠায
শ্রেষ্ঠায স্বাহেত্যগ্নাবাজ্যস্য হুত্বা মন্থে
সংপাতমবনযেত্ || ৫. ২. ৪||
 
বসিষ্ঠায স্বাহেত্যগ্নাবাজ্যস্য হুত্বা মন্থে
সংপাতমবনযেত্প্রতিষ্ঠাযৈ স্বাহেত্যগ্নাবাজ্যস্য হুত্বা
মন্থে সংপাতমবনযেত্সংপদে স্বাহেত্যগ্নাবাজ্যস্য হুত্বা
মন্থে সংপাতমবনযেদাযতনায স্বাহেত্যগ্নাবাজ্যস্য হুত্বা
মন্থে সংপাতমবনযেত্ || ৫. ২. ৫||
 
অথ প্রতিসৃপ্যাঞ্জলৌ মন্থমাধায জপত্যমো নামাস্যমা
হি তে সর্বমিদঁ স হি জ্যেষ্ঠঃ শ্রেষ্ঠো রাজাধিপতিঃ
স মা জ্যৈষ্ঠ্যঁ শ্রৈষ্ঠ্যঁ রাজ্যমাধিপত্যং
গমযত্বহমেবেদঁ সর্বমসানীতি || ৫. ২. ৬||
 
অথ খল্বেতযর্চা পচ্ছ আচামতি তত্সবিতুর্বৃণীমহ
ইত্যাচামতি বযং দেবস্য ভোজনমিত্যাচামতি শ্রেষ্ঠঁ
সর্বধাতমমিত্যাচামতি তুরং ভগস্য ধীমহীতি সর্বং পিবতি
নির্ণিজ্য কঁসং চমসং বা পশ্চাদগ্নেঃ সংবিশতি চর্মণি বা
স্থণ্ডিলে বা বাচংযমোঽপ্রসাহঃ স যদি স্ত্রিযং
পশ্যেত্সমৃদ্ধং কর্মেতি বিদ্যাত্ || ৫. ২. ৭||
 
তদেষ শ্লোকো যদা কর্মসু কাম্যেষু স্ত্রিযঁ স্বপ্নেষু
পশ্যন্তি সমৃদ্ধিং তত্র জানীযাত্তস্মিন্স্বপ্ননিদর্শনে
তস্মিন্স্বপ্ননিদর্শনে  || ৫. ২. ৮||

|| ইতি দ্বিতীযঃ খণ্ডঃ ||

|| তৃতীযঃ খণ্ডঃ ||

শ্বেতকেতুর্হারুণেযঃ পঞ্চালানাঁ সমিতিমেযায
তঁ হ প্রবাহণো জৈবলিরুবাচ কুমারানু
ত্বাশিষত্পিতেত্যনু হি ভগব ইতি || ৫. ৩. ১||

বেত্থ যদিতোঽধি প্রজাঃ প্রযন্তীতি ন ভগব ইতি বেত্থ
যথা পুনরাবর্তন্ত৩ ইতি ন ভগব ইতি বেত্থ
পথোর্দেবযানস্য পিতৃযাণস্য চ ব্যাবর্তনা৩ ইতি
ন ভগব ইতি || ৫. ৩. ২||

বেত্থ যথাসৌ লোকো ন সংপূর্যত৩ ইতি ন ভগব ইতি
বেত্থ যথা পঞ্চম্যামাহুতাবাপঃ পুরুষবচসো
ভবন্তীতি নৈব ভগব ইতি || ৫. ৩. ৩ ||

অথানু কিমনুশিষ্ঠোঽবোচথা যো হীমানি ন
বিদ্যাত্কথঁ সোঽনুশিষ্টো ব্রুবীতেতি স হাযস্তঃ
পিতুরর্ধমেযায তঁ হোবাচাননুশিষ্য বাব কিল মা
ভগবানব্রবীদনু ত্বাশিষমিতি || ৫. ৩. ৪ ||

পঞ্চ মা রাজন্যবন্ধুঃ প্রশ্নানপ্রাক্ষীত্তেষাং
নৈকংচনাশকং বিবক্তুমিতি স হোবাচ যথা মা ত্বং
তদৈতানবদো যথাহমেষাং নৈকংচন বেদ
যদ্যহমিমানবেদিষ্যং কথং তে নাবক্ষ্যমিতি || ৫. ৩. ৫||
 
স হ গৌতমো রাজ্ঞোঽর্ধমেযায তস্মৈ হ প্রাপ্তাযার্হাং চকার
স হ প্রাতঃ সভাগ উদেযায তঁ হোবাচ মানুষস্য
ভগবন্গৌতম বিত্তস্য বরং বৃণীথা ইতি স হোবাচ তবৈব
রাজন্মানুষং বিত্তং যামেব কুমারস্যান্তে
বাচমভাষথাস্তামেব মে ব্রূহীতি স হ কৃচ্ছ্রী বভূব 
|| ৫. ৩. ৬||
 
তঁ হ চিরং বসেত্যাজ্ঞাপযাংচকার তঁ হোবাচ
যথা মা ত্বং গৌতমাবদো যথেযং ন প্রাক্ত্বত্তঃ পুরা বিদ্যা
ব্রাহ্মণান্গচ্ছতি তস্মাদু সর্বেষু লোকেষু ক্ষত্রস্যৈব
প্রশাসনমভূদিতি তস্মৈ হোবাচ || ৫. ৩. ৭

|| ইতি তৃতীযঃ খণ্ডঃ ||

|| চতুর্থঃ খণ্ডঃ ||

অসৌ বাব লোকো গৌতমাগ্নিস্তস্যাদিত্য এব
সমিদ্রশ্মযো ধূমোঽহরর্চিশ্চন্দ্রমা অঙ্গারা নক্ষত্রাণি
বিস্ফুলিঙ্গাঃ || ৫. ৪. ১||
 
তস্মিন্নেতস্মিন্নগ্নৌ দেবাঃ শ্রদ্ধাং জুহ্বতি
তস্যা অহুতেঃ সোমো রাজা সংভবতি || ৫. ৪. ২ ||

|| ইতি চতুর্থঃ খণ্ডঃ ||

|| পঞ্চমঃ খণ্ডঃ ||

পর্জন্যো বাব গৌতমাগ্নিস্তস্য বাযুরেব সমিদভ্রং ধূমো
বিদ্যুদর্চিরশনিরঙ্গারাহ্রাদনযো বিস্ফুলিঙ্গাঃ || ৫. ৫. ১||

তস্মিন্নেতস্মিন্নগ্নৌ দেবাঃ সোমঁ রাজানং জুহ্বতি
তস্যা আহুতের্বর্ষঁ সংভবতি || ৫. ৫. ২||

|| ইতি পঞ্চমঃ খণ্ডঃ ||

|| ষষ্ঠঃ খণ্ডঃ ||

পৃথিবী বাব গৌতমাগ্নিস্তস্যাঃ সংবত্সর এব
সমিদাকাশো ধূমো রাত্রিরর্চির্দিশোঽঙ্গারা
অবান্তরদিশো বিস্ফুলিঙ্গাঃ || ৫. ৬. ১||

তস্মিন্নেতস্মিন্নগ্নৌ দেবা বর্ষং জুহ্বতি
তস্যা আহুতেরন্নঁ সংভবতি || ৫. ৬. ২||

|| ইতি ষষ্ঠঃ খণ্ডঃ ||

|| সপ্তমঃ খণ্ডঃ ||

পুরুষো বাব গৌতমাগ্নিস্তস্য বাগেব সমিত্প্রাণো ধূমো
জিহ্বার্চিশ্চক্ষুরঙ্গারাঃ শ্রোত্রং বিস্ফুলিঙ্গাঃ || ৫. ৭. ১||

তস্মিন্নেতস্মিন্নগ্নৌ দেবা অন্নং জুহ্বতি তস্যা
আহুতে রেতঃ সম্ভবতি || ৫. ৭. ২||

|| ইতি সপতমঃ খণ্ডঃ ||

|| অষ্টমঃ খণ্ডঃ ||

যোষা বাব গৌতমাগ্নিস্তস্যা উপস্থ এব সমিদ্যদুপমন্ত্রযতে
স ধূমো যোনিরর্চির্যদন্তঃ করোতি তেঽঙ্গারা অভিনন্দা
বিস্ফুলিঙ্গাঃ || ৫. ৮. ১||
 
তস্মিন্নেতস্মিন্নগ্নৌ দেবা রেতো জুহ্বতি
তস্যা আহুতের্গর্ভঃ সংভবতি || ৫. ৮. ২ ||

|| ইতি অষ্টমঃ খণ্ডঃ ||

|| নবমঃ খণ্ডঃ ||

ইতি তু পঞ্চম্যামাহুতাবাপঃ পুরুষবচসো ভবন্তীতি
স উল্বাবৃতো গর্ভো দশ বা নব বা মাসানন্তঃ শযিত্বা
যাবদ্বাথ জাযতে || ৫. ৯. ১||

স জাতো যাবদাযুষং জীবতি তং প্রেতং দিষ্টমিতোঽগ্নয
এব হরন্তি যত এবেতো যতঃ সংভূতো ভবতি || ৫. ৯. ২||

|| ইতি নবমঃ খণ্ডঃ ||

|| দশমঃ খণ্ডঃ ||

তদ্য ইত্থং বিদুঃ| যে চেমেঽরণ্যে শ্রদ্ধা তপ ইত্যুপাসতে
তেঽর্চিষমভিসংভবন্ত্যর্চিষোঽহরহ্ন
আপূর্যমাণপক্ষমাপূর্যমাণপক্ষাদ্যান্ষডুদঙ্ঙেতি
মাসাঁস্তান্ || ৫. ১০. ১||

মাসেভ্যঃ সংবত্সরঁ সংবত্সরাদাদিত্যমাদিত্যাচ্চন্দ্রমসং
চন্দ্রমসো বিদ্যুতং তত্পুরুষোঽমানবঃ স এনান্ব্রহ্ম
গমযত্যেষ দেবযানঃ পন্থা ইতি || ৫. ১০. ২||

অথ য ইমে গ্রাম ইষ্টাপূর্তে দত্তমিত্যুপাসতে তে
ধূমমভিসংভবন্তি ধূমাদ্রাত্রিঁ
রাত্রেরপরপক্ষমপরপক্ষাদ্যান্ষড্দক্ষিণৈতি
মাসাঁস্তান্নৈতে সংবত্সরমভিপ্রাপ্নুবন্তি || ৫. ১০. ৩||

মাসেভ্যঃ পিতৃলোকং পিতৃলোকাদাকাশমাকাশাচ্চন্দ্রমসমেষ
সোমো রাজা তদ্দেবানামন্নং তং দেবা ভক্ষযন্তি || ৫. ১০. ৪||

তস্মিন্যবাত্সংপাতমুষিত্বাথৈতমেবাধ্বানং পুনর্নিবর্তন্তে
যথেতমাকাশমাকাশাদ্বাযুং বাযুর্ভূত্বা ধূমো ভবতি
ধূমো ভূত্বাভ্রং ভবতি || ৫. ১০. ৫||

অভ্রং ভূত্বা মেঘো ভবতি মেঘো ভূত্বা প্রবর্ষতি
ত ইহ ব্রীহিযবা ওষধিবনস্পতযস্তিলমাষা ইতি
জাযন্তেঽতো বৈ খলু দুর্নিষ্প্রপতরং যো যো হ্যন্নমত্তি
যো রেতঃ সিঞ্চতি তদ্ভূয এব ভবতি || ৫. ১০. ৬||

তদ্য ইহ রমণীযচরণা অভ্যাশো হ যত্তে রমণীযাং
যোনিমাপদ্যেরন্ব্রাহ্মণযোনিং বা ক্ষত্রিযযোনিং বা বৈশ্যযোনিং
বাথ য ইহ কপূযচরণা অভ্যাশো হ যত্তে কপূযাং
যোনিমাপদ্যেরঞ্শ্বযোনিং বা সূকরযোনিং বা
চণ্ডালযোনিং বা || ৫. ১০. ৭||

অথৈতযোঃ পথোর্ন কতরেণচন তানীমানি
ক্ষুদ্রাণ্যসকৃদাবর্তীনি ভূতানি ভবন্তি জাযস্ব
ম্রিযস্বেত্যেতত্তৃতীযঁস্থানং তেনাসৌ লোকো ন সংপূর্যতে 
তস্মাজ্জুগুপ্সেত তদেষ শ্লোকঃ || ৫. ১০. ৮||
 
স্তেনো হিরণ্যস্য সুরাং পিবঁশ্চ গুরোস্তল্পমাবসন্ব্রহ্মহা
চৈতে পতন্তি চত্বারঃ পঞ্চমশ্চাচরঁস্তৈরিতি || ৫. ১০. ৯||

অথ হ য এতানেবং পঞ্চাগ্নীন্বেদ ন সহ
তৈরপ্যাচরন্পাপ্মনা লিপ্যতে শুদ্ধঃ পূতঃ পুণ্যলোকো ভবতি
য এবং বেদ য এবং বেদ || ৫. ১০. ১০||

|| ইতি দশমঃ খণ্ডঃ ||

|| একাদশঃ খণ্ডঃ ||

প্রাচীনশাল ঔপমন্যবঃ সত্যযজ্ঞঃ
পৌলুষিরিন্দ্রদ্যুম্নো ভাল্লবেযো জনঃ শার্করাক্ষ্যো
বুডিল আশ্বতরাশ্বিস্তে হৈতে মহাশালা মহাশ্রোত্রিযাঃ
সমেত্য মীমাঁসাং চক্রুঃ কো ন আত্মা কিং ব্রহ্মেতি || ৫. ১১. ১||

তে হ সংপাদযাংচক্রুরুদ্দালকো বৈ ভগবন্তোঽযমারুণিঃ
সংপ্রতীমমাত্মানং বৈশ্বানরমধ্যেতি তঁ
হন্তাভ্যাগচ্ছামেতি তঁ হাভ্যাজগ্মুঃ || ৫. ১১. ২||

স হ সংপাদযাংচকার প্রক্ষ্যন্তি মামিমে
মহাশালা মহাশ্রোত্রিযাস্তেভ্যো ন সর্বমিব প্রতিপত্স্যে
হন্তাহমন্যমভ্যনুশাসানীতি || ৫. ১১. ৩||

তান্হোবাচাশ্বপতির্বৈ ভগবন্তোঽযং কৈকেযঃ
সংপ্রতীমমাত্মানং বৈশ্বানরমধ্যেতি
তঁহন্তাভ্যাগচ্ছামেতি তঁহাভ্যাজগ্মুঃ || ৫. ১১. ৪||

তেভ্যো হ প্রাপ্তেভ্যঃ পৃথগর্হাণি কারযাংচকার
স হ প্রাতঃ সংজিহান উবাচ ন মে স্তেনো জনপদে ন
কর্দর্যো ন মদ্যপো নানাহিতাগ্নির্নাবিদ্বান্ন স্বৈরী স্বৈরিণী
কুতো যক্ষ্যমাণো বৈ ভগবন্তোঽহমস্মি যাবদেকৈকস্মা
ঋত্বিজে ধনং দাস্যামি তাবদ্ভগবদ্ভ্যো দাস্যামি
বসন্তু ভগবন্ত ইতি || ৫. ১১. ৫||

তে হোচুর্যেন হৈবার্থেন পুরুষশ্চরেত্তঁহৈব
বদেদাত্মানমেবেমং বৈশ্বানরঁ সংপ্রত্যধ্যেষি তমেব নো
ব্রূহীতি || ৫. ১১. ৬||

তান্হোবাচ প্রাতর্বঃ প্রতিবক্তাস্মীতি তে হ সমিত্পাণযঃ
পূর্বাহ্ণে প্রতিচক্রমিরে তান্হানুপনীযৈবৈতদুবাচ || ৫. ১১. ৭||

|| ইতি একাদশঃ খণ্ডঃ ||

|| দ্বাদশঃ খণ্ডঃ ||

ঔপমন্যব কং ত্বমাত্মানমুপাস্স ইতি দিবমেব ভগবো
রাজন্নিতি হোবাচৈষ বৈ সুতেজা আত্মা বৈশ্বানরো যং
ত্বমাত্মানমুপাস্সে তস্মাত্তব সুতং প্রসুতমাসুতং কুলে
দৃশ্যতে || ৫. ১২. ১||

অত্স্যন্নং পশ্যসি প্রিযমত্ত্যন্নং পশ্যতি প্রিযং ভবত্যস্য
ব্রহ্মবর্চসং কুলে য এতমেবমাত্মানং বৈশ্বানরমুপাস্তে
মূধা ত্বেষ আত্মন ইতি হোবাচ মূর্ধা তে
ব্যপতিষ্যদ্যন্মাং নাগমিষ্য ইতি || ৫. ১২. ২||

|| ইতি দ্বাদশঃ খণ্ডঃ ||

|| ত্রযোদশঃ খণ্ডঃ ||

অথ হোবাচ সত্যযজ্ঞং পৌলুষিং প্রাচীনযোগ্য কং
ত্বমাত্মানমুপাস্স ইত্যাদিত্যমেব ভগবো রাজন্নিতি
হোবাচৈষ বৈ বিশ্বরূপ আত্মা বৈশ্বানরো যং
ত্বমাত্মানমুপাস্সে তস্মাত্তব বহু বিশ্বরূপং কুলে
দৃশ্যতে || ৫. ১৩. ১||

প্রবৃত্তোঽশ্বতরীরথো দাসীনিষ্কোঽত্স্যন্নং পশ্যসি
প্রিযমত্ত্যন্নং পশ্যতি প্রিযং ভবত্যস্য ব্রহ্মবর্চসং কুলে
য এতমেবমাত্মানং বৈশ্বানরমুপাস্তে চক্ষুষেতদাত্মন ইতি
হোবাচান্ধোঽভবিষ্যো যন্মাং নাগমিষ্য ইতি || ৫. ১৩. ২||

|| ইতি ত্রযোদশঃ খণ্ডঃ ||

|| চতুর্দশঃ খণ্ডঃ ||

অথ হোবাচেন্দ্রদ্যুম্নং ভাল্লবেযং বৈযাঘ্রপদ্য কং
ত্বমাত্মানমুপাস্স ইতি বাযুমেব ভগবো রাজন্নিতি
হোবাচৈষ বৈ পৃথগ্বর্ত্মাত্মা বৈশ্বানরো যং
ত্বমাত্মানমুপাস্সে তস্মাত্ত্বাং পৃথগ্বলয আযন্তি
পৃথগ্রথশ্রেণযোঽনুযন্তি || ৫. ১৪. ১||

অত্স্যন্নং পশ্যসি প্রিযমত্ত্যন্নং পশ্যতি প্রিযং ভবত্যস্য
ব্রহ্মবর্চসং কুলে য এতমেবমাত্মানং বৈশ্বানরমুপাস্তে
প্রাণস্ত্বেষ আত্মন ইতি হোবাচ প্রাণস্ত
উদক্রমিষ্যদ্যন্মাং নাগমিষ্য ইতি || ৫. ১৪. ২||

|| ইতি চতুর্দশঃ খণ্ডঃ ||

|| পঞ্চদশঃ খণ্ডঃ ||

অথ হোবাচ জনঁশার্করাক্ষ্য কং ত্বমাত্মানমুপাস্স
ইত্যাকাশমেব ভগবো রাজন্নিতি হোবাচৈষ বৈ বহুল
আত্মা বৈশ্বানরো যং ত্বমাত্মানমুপস্সে তস্মাত্ত্বং
বহুলোঽসি প্রজযা চ ধনেন চ || ৫. ১৫. ১||

অত্স্যন্নং পশ্যসি প্রিযমত্ত্যন্নং পশ্যতি প্রিযং ভবত্যস্য
ব্রহ্মবর্চসং কুলে য এতমেবমাত্মানং বৈশ্বানরমুপাস্তে
সংদেহস্ত্বেষ আত্মন ইতি হোবাচ সংদেহস্তে ব্যশীর্যদ্যন্মাং
নাগমিষ্য ইতি || ৫. ১৫. ২||

|| ইতি পঞ্চদশঃ খণ্ডঃ ||

|| ষোডশঃ খণ্ডঃ ||

অথ হোবাচ বুডিলমাশ্বতরাশ্বিং বৈযাঘ্রপদ্য কং
ত্বমাত্মানমুপাস্স ইত্যপ এব ভগবো রাজন্নিতি হোবাচৈষ
বৈ রযিরাত্মা বৈশ্বানরো যং ত্বমাত্মানমুপাস্সে
তস্মাত্ত্বঁরযিমান্পুষ্টিমানসি || ৫. ১৬. ১||

অত্স্যন্নং পশ্যসি প্রিযমত্ত্যন্নং পশ্যতি প্রিযং ভবত্যস্য
ব্রহ্মবর্চসং কুলে য এতমেবমাত্মানং বৈশ্বানরমুপাস্তে
বস্তিস্ত্বেষ আত্মন ইতি হোবাচ বস্তিস্তে ব্যভেত্স্যদ্যন্মাং
নাগমিষ্য ইতি || ৫. ১৬. ২||

|| ইতি ষোডশঃ খণ্ডঃ ||

|| সপ্তদশঃ খণ্ডঃ ||

অথ হোবাচোদ্দালকমারুণিং গৌতম কং ত্বমাত্মানমুপস্স
ইতি পৃথিবীমেব ভগবো রাজন্নিতি হোবাচৈষ বৈ
প্রতিষ্ঠাত্মা বৈশ্বানরো যং ত্বমাত্মানমুপাস্সে
তস্মাত্ত্বং প্রতিষ্ঠিতোঽসি প্রজযা চ পশুভিশ্চ ৫. ১৭. ১||

অত্স্যন্নং পশ্যসি প্রিযমত্ত্যন্নং পশ্যতি প্রিযং ভবত্যস্য
ব্রহ্মবর্চসং কুলে য এতমেবমাত্মানং বৈশ্বানরমুপাস্তে
পাদৌ ত্বেতাবাত্মন ইতি হোবাচ পাদৌ তে ব্যম্লাস্যেতাং
যন্মাং নাগমিষ্য ইতি ৫. ১৭. ২||

|| ইতি সপ্তদশঃ খণ্ডঃ ||

|| অষ্টাদশঃ খণ্ডঃ ||

 
তান্হোবাচৈতে বৈ খলু যূযং পৃথগিবেমমাত্মানং
বৈশ্বানরং বিদ্বাঁসোঽন্নমত্থ যস্ত্বেতমেবং
প্রাদেশমাত্রমভিবিমানমাত্মানং বৈশ্বানরমুপাস্তে স সর্বেষু
লোকেষু সর্বেষু ভূতেষু সর্বেষ্বাত্মস্বন্নমত্তি || ৫. ১৮. ১||
 
তস্য হ বা এতস্যাত্মনো বৈশ্বানরস্য মূর্ধৈব
সুতেজাশ্চক্ষুর্বিশ্বরূপঃ প্রাণঃ পৃথগ্বর্ত্মাত্মা সংদেহো
বহুলো বস্তিরেব রযিঃ পৃথিব্যেব পাদাবুর এব বেদির্লোমানি
বর্হির্হৃদযং গার্হপত্যো মনোঽন্বাহার্যপচন আস্যমাহবনীযঃ
|| ৫. ১৮. ২||
 

|| ইতি অষ্টাদশঃ খণ্ডঃ ||

|| একোনবিংশঃ খণ্ডঃ ||

তদ্যদ্ভক্তং প্রথমমাগচ্ছেত্তদ্ধোমীযঁ স যাং
প্রথমামাহুতিং জুহুযাত্তাং জুহুযাত্প্রাণায স্বাহেতি
প্রাণস্তৃপ্যতি || ৫. ১৯. ১||

প্রাণে তৃপ্যতি চক্ষুস্তৃপ্যতি চক্ষুষি
তৃপ্যত্যাদিত্যস্তৃপ্যত্যাদিত্যে তৃপ্যতি দ্যৌস্তৃপ্যতি
দিবি তৃপ্যন্ত্যাং যত্কিংচ দ্যৌশ্চাদিত্যশ্চাধিতিষ্ঠতস্তত্তৃপ্যতি
তস্যানুতৃপ্তিং তৃপ্যতি প্রজযা পশুভিরন্নাদ্যেন তেজসা
ব্রহ্মবর্চসেনেতি || ৫. ১৯. ২||

|| ইতি একোনবিংশঃ খণ্ডঃ ||

|| বিংশঃ খণ্ডঃ ||

অথ যাং দ্বিতীযাং জুহুযাত্তাং জুহুযাদ্ব্যানায স্বাহেতি
ব্যানস্তৃপ্যতি || ৫. ২০. ১||
 
ব্যানে তৃপ্যতি শ্রোত্রং তৃপ্যতি শ্রোত্রে তৃপ্যতি
চন্দ্রমাস্তৃপ্যতি চন্দ্রমসি তৃপ্যতি দিশস্তৃপ্যন্তি
দিক্ষু তৃপ্যন্তীষু যত্কিংচ দিশশ্চ চন্দ্রমাশ্চাধিতিষ্ঠন্তি
তত্তৃপ্যতি তস্যানু তৃপ্তিং তৃপ্যতি প্রজযা পশুভিরন্নাদ্যেন
তেজসা ব্রহ্মবর্চসেনেতি || ৫. ২০. ২||

|| ইতি বিংশঃ খণ্ডঃ ||

|| একবিংশঃ খণ্ডঃ ||

অথ যাং তৃতীযাং জুহুযাত্তাং জুহুযাদপানায
স্বাহেত্যপানস্তৃপ্যতি || ৫. ২১. ১||

অপানে তৃপ্যতি বাক্তৃপ্যতি বাচি তৃপ্যন্ত্যামগ্নিস্তৃপ্যত্যগ্নৌ
তৃপ্যতি পৃথিবী তৃপ্যতি পৃথিব্যাং তৃপ্যন্ত্যাং যত্কিংচ
পৃথিবী চাগ্নিশ্চাধিতিষ্ঠতস্তত্তৃপ্যতি
তস্যানু তৃপ্তিং তৃপ্যতি প্রজযা পশুভিরন্নাদ্যেন তেজসা
ব্রহ্মবর্চসেনেতি || ৫. ২১. ২||

|| ইতি একবিংশঃ খণ্ডঃ ||

|| দ্বাবিংশঃ খণ্ডঃ ||

অথ যাং চতুর্থীং জুহুযাত্তাং জুহুযাত্সমানায স্বাহেতি
সমানস্তৃপ্যতি || ৫. ২২. ১||

সমানে তৃপ্যতি মনস্তৃপ্যতি মনসি তৃপ্যতি পর্জন্যস্তৃপ্যতি
পর্জন্যে তৃপ্যতি বিদ্যুত্তৃপ্যতি বিদ্যুতি তৃপ্যন্ত্যাং যত্কিংচ
বিদ্যুচ্চ পর্জন্যশ্চাধিতিষ্ঠতস্তত্তৃপ্যতি তস্যানু তৃপ্তিং
তৃপ্যতি প্রজযা পশুভিরন্নাদ্যেন তেজসা ব্রহ্মবর্চসেনেতি
|| ৫. ২২. ২ ||

|| ইতি দ্বাবিংশঃ খণ্ডঃ ||

|| ত্রযোবিংশঃ খণ্ডঃ ||

অথ যাং পঞ্চমীং জুহুযাত্তাং জুহুযাদুদানায
স্বাহেত্যুদানস্তৃপ্যতি || ৫. ২৩. ১||

উদানে তৃপ্যতি ত্বক্তৃপ্যতি ত্বচি তৃপ্যন্ত্যাং বাযুস্তৃপ্যতি
বাযৌ তৃপ্যত্যাকাশস্তৃপ্যত্যাকাশে তৃপ্যতি যত্কিংচ
বাযুশ্চাকাশশ্চাধিতিষ্ঠতস্তত্তৃপ্যতি তস্যানু তৃপ্তিং
তৃপ্যতি প্রজযা পশুভিরন্নাদ্যেন তেজসা ব্রহ্মবর্চসেন
|| ৫. ২৩. ২||

|| ইতি ত্রযোবিংশঃ খণ্ডঃ ||

|| চতুর্বিংশঃ খণ্ডঃ ||

স য ইদমবিদ্বাগ্নিহোত্রং জুহোতি যথাঙ্গারানপোহ্য
ভস্মনি জুহুযাত্তাদৃক্তত্স্যাত্ || ৫. ২৪. ১||

অথ য এতদেবং বিদ্বানগ্নিহোত্রং জুহোতি তস্য সর্বেষু লোকেষু
সর্বেষু ভূতেষু সর্বেষ্বাত্মসু হুতং ভবতি || ৫. ২৪. ২||

তদ্যথেষীকাতূলমগ্নৌ প্রোতং প্রদূযেতৈবঁহাস্য সর্বে
পাপ্মানঃ প্রদূযন্তে য এতদেবং বিদ্বানগ্নিহোত্রং জুহোতি
|| ৫. ২৪. ৩||

তস্মাদু হৈবংবিদ্যদ্যপি চণ্ডালাযোচ্ছিষ্টং
প্রযচ্ছেদাত্মনি হৈবাস্য তদ্বৈশ্বানরে হুতঁ স্যাদিতি
তদেষ শ্লোকঃ || ৫. ২৪. ৪||

যথেহ ক্ষুধিতা বালা মাতরং পর্যুপাসত এবঁ সর্বাণি
ভূতান্যগ্নিহোত্রমুপাসত ইত্যগ্নিহোত্রমুপাসত ইতি || ৫. ২৪. ৫||

|| ইতি চতুর্বিংশঃ খণ্ডঃ ||

 || ইতি পঞ্চমোঽধ্যাযঃ ||

——————————————————————————–

 || ষষ্ঠোঽধ্যাযঃ ||

|| প্রথমঃ খণ্ডঃ ||

শ্বেতকেতুর্হারুণেয আস তঁ হ পিতোবাচ শ্বেতকেতো
বস ব্রহ্মচর্যং ন বৈ সোম্যাস্মত্কুলীনোঽননূচ্য
ব্রহ্মবন্ধুরিব ভবতীতি || ৬. ১. ১||

স হ দ্বাদশবর্ষ উপেত্য চতুর্বিঁশতিবর্ষঃ
সর্বান্বেদানধীত্য মহামনা অনূচানমানী স্তব্ধ
এযায তঁহ পিতোবাচ || ৬. ১. ২||

শ্বেতকেতো যন্নু সোম্যেদং মহামনা অনূচানমানী
স্তব্ধোঽস্যুত তমাদেশমপ্রাক্ষ্যঃ যেনাশ্রুতঁ শ্রুতং
ভবত্যমতং মতমবিজ্ঞাতং বিজ্ঞাতমিতি কথং নু ভগবঃ
স আদেশো ভবতীতি || ৬. ১. ৩||

যথা সোম্যৈকেন মৃত্পিণ্ডেন সর্বং মৃন্মযং বিজ্ঞাতঁ
স্যাদ্বাচারম্ভণং বিকারো নামধেযং মৃত্তিকেত্যেব সত্যম্
|| ৬. ১. ৪||

যথা সোম্যৈকেন লোহমণিনা সর্বং লোহমযং বিজ্ঞাতঁ
 স্যাদ্বাচারম্ভণং বিকারো নামধেযং লোহমিত্যেব
সত্যম্ || ৬. ১. ৫||

যথা সোম্যিকেন নখনিকৃন্তনেন সর্বং কার্ষ্ণাযসং বিজ্ঞাতঁ
স্যাদ্বাচারম্ভণং বিকারো নামধেযং কৃষ্ণাযসমিত্যেব
সত্যমেবঁসোম্য স আদেশো ভবতীতি || ৬. ১. ৬||

ন বৈ নূনং ভগবন্তস্ত এতদবেদিষুর্যদ্ধ্যেতদবেদিষ্যন্কথং
মে নাবক্ষ্যন্নিতি ভগবাঁস্ত্বেব মে তদ্ব্রবীত্বিতি তথা
সোম্যেতি হোবাচ || ৬. ১. ৭||

|| ইতি প্রথমঃ খণ্ডঃ ||

|| দ্বিতীযঃ খণ্ডঃ ||

সদেব সোম্যেদমগ্র আসীদেকমেবাদ্বিতীযম্ |
তদ্ধৈক আহুরসদেবেদমগ্র আসীদেকমেবাদ্বিতীযং
তস্মাদসতঃ সজ্জাযত || ৬. ২. ১||
 
কুতস্তু খলু সোম্যৈবঁস্যাদিতি হোবাচ কথমসতঃ
সজ্জাযেতেতি| সত্ত্বেব সোম্যেদমগ্র
আসীদেকমেবাদ্বিতীযম্ || ৬. ২. ২||

তদৈক্ষত বহু স্যাং প্রজাযেযেতি তত্তেজোঽসৃজত তত্তেজ
ঐক্ষত বহু স্যাং প্রজাযেযেতি তদপোঽসৃজত |
তস্মাদ্যত্র ক্বচ শোচতি স্বেদতে বা পুরুষস্তেজস এব
তদধ্যাপো জাযন্তে || ৬. ২. ৩||

তা আপ ঐক্ষন্ত বহ্ব্যঃ স্যাম প্রজাযেমহীতি তা
অন্নমসৃজন্ত তস্মাদ্যত্র ক্ব চ বর্ষতি তদেব ভূযিষ্ঠমন্নং
ভবত্যদ্ভ্য এব তদধ্যন্নাদ্যং জাযতে || ৬. ২. ৪||

|| ইতি দ্বিতীযঃ খণ্ডঃ ||

|| তৃতীযঃ খণ্ডঃ ||

তেষাং খল্বেষাং ভূতানাং ত্রীণ্যেব বীজানি
ভবন্ত্যাণ্ডজং জীবজমুদ্ভিজ্জমিতি || ৬. ৩. ১||

সেযং দেবতৈক্ষত হন্তাহমিমাস্তিস্রো দেবতা অনেন
জীবেনাত্মনানুপ্রবিশ্য নামরূপে ব্যাকরবাণীতি || ৬. ৩. ২||

তাসাং ত্রিবৃতং ত্রিবৃতমেকৈকাং করবাণীতি সেযং
দেবতেমাস্তিস্রো দেবতা অনেনৈব জীবেনাত্মনানুপ্রবিশ্য
নামরূপে ব্যাকরোত্ || ৬. ৩. ৩||
 
তাসাং ত্রিবৃতং ত্রিবৃতমেকৈকামকরোদ্যথা তু খলু
সোম্যেমাস্তিস্রো দেবতাস্ত্রিবৃত্ত্রিবৃদেকৈকা ভবতি
তন্মে বিজানীহীতি || ৬. ৩. ৪ ||

|| ইতি তৃতীযঃ খণ্ডঃ ||

|| চতুর্থঃ খণ্ডঃ ||

যদগ্নে রোহিতঁরূপং তেজসস্তদ্রূপং যচ্ছুক্লং তদপাং
যত্কৃষ্ণং তদন্নস্যাপাগাদগ্নেরগ্নিত্বং বাচারম্ভণং
বিকারো নামধেযং ত্রীণি রূপাণীত্যেব সত্যম্ || ৬. ৪. ১||
 
যদাদিত্যস্য রোহিতঁরূপং তেজসস্তদ্রূপং যচ্ছুক্লং তদপাং
যত্কৃষ্ণং তদন্নস্যাপাগাদাদিত্যাদাদিত্যত্বং বাচারম্ভণং
বিকারো নামধেযং ত্রীণি রূপাণীত্যেব সত্যম্ || ৬. ৪. ২||
 
যচ্ছন্দ্রমসো রোহিতঁরূপং তেজসস্তদ্রূপং যচ্ছুক্লং তদপাং
যত্কৃষ্ণং তদন্নস্যাপাগাচ্চন্দ্রাচ্চন্দ্রত্বং বাচারম্ভণং
বিকারো নামধেযং ত্রীণি রূপাণীত্যেব সত্যম্ || ৬. ৪. ৩||

যদ্বিদ্যুতো রোহিতঁরূপং তেজসস্তদ্রূপং যচ্ছুক্লং তদপাং
যত্কৃষ্ণং তদন্নস্যাপাগাদ্বিদ্যুতো বিদ্যুত্ত্বং বাচারম্ভণং
বিকারো নামধেযং ত্রীণি রূপাণীত্যেব সত্যম্ || ৬. ৪. ৪||
 
এতদ্ধ স্ম বৈ তদ্বিদ্বাঁস আহুঃ পূর্বে মহাশালা
মহাশ্রোত্রিযা ন নোঽদ্য
কশ্চনাশ্রুতমমতমবিজ্ঞাতমুদাহরিষ্যতীতি হ্যেভ্যো
বিদাংচক্রুঃ || ৬. ৪. ৫||

যদু রোহিতমিবাভূদিতি তেজসস্তদ্রূপমিতি তদ্বিদাংচক্রুর্যদু
শুক্লমিবাভূদিত্যপাঁরূপমিতি তদ্বিদাংচক্রুর্যদু
কৃষ্ণমিবাভূদিত্যন্নস্য রূপমিতি তদ্বিদাংচক্রুঃ || ৬. ৪. ৬||

যদ্ববিজ্ঞাতমিবাভূদিত্যেতাসামেব দেবতানাঁসমাস ইতি
তদ্বিদাংচক্রুর্যথা তু খলু সোম্যেমাস্তিস্রো দেবতাঃ
পুরুষং প্রাপ্য ত্রিবৃত্ত্রিবৃদেকৈকা ভবতি তন্মে বিজানীহীতি
|| ৬. ৪. ৭||

|| ইতি চতুর্থঃ খণ্ডঃ ||

|| পঞ্চমঃ খণ্ডঃ ||

অন্নমশিতং ত্রেধা বিধীযতে তস্য যঃ স্থবিষ্ঠো
ধাতুস্তত্পুরীষং ভবতি যো মধ্যমস্তন্মাঁসং
যোঽণিষ্ঠস্তন্মনঃ || ৬. ৫. ১||

আপঃ পীতাস্ত্রেধা বিধীযন্তে তাসাং যঃ স্থবিষ্ঠো
ধাতুস্তন্মূত্রং ভবতি যো মধ্যমস্তল্লোহিতং যোঽণিষ্ঠঃ
স প্রাণঃ || ৬. ৫. ২||

তেজোঽশিতং ত্রেধা বিধীযতে তস্য যঃ স্থবিষ্ঠো
ধাতুস্তদস্থি ভবতি যো মধ্যমঃ স মজ্জা
যোঽণিষ্ঠঃ সা বাক্ || ৬. ৫. ৩||

অন্নমযঁহি সোম্য মনঃ আপোমযঃ প্রাণস্তেজোমযী
বাগিতি ভূয এব মা ভগবান্বিজ্ঞাপযত্বিতি তথা
সোম্যেতি হোবাচ || ৬. ৫. ৪||

|| ইতি পঞ্চমঃ খণ্ডঃ ||

|| ষষ্ঠঃ খন্ডঃ ||

দধ্নঃ সোম্য মথ্যমানস্য যোঽণিমা স উর্ধ্বঃ সমুদীষতি
তত্সর্পির্ভবতি || ৬. ৬. ১||

এবমেব খলু সোম্যান্নস্যাশ্যমানস্য যোঽণিমা স উর্ধ্বঃ
সমুদীষতি তন্মনো ভবতি || ৬. ৬. ২||

অপাঁসোম্য পীযমানানাং যোঽণিমা স উর্ধ্বঃ সমুদীষতি
সা প্রাণো ভবতি || ৬. ৬. ৩ ||

তেজসঃ সোম্যাশ্যমানস্য যোঽণিমা স উর্ধ্বঃ সমুদীষতি
সা বাগ্ভবতি || ৬. ৬. ৪||

অন্নমযঁ হি সোম্য মন আপোমযঃ প্রাণস্তেজোমযী বাগিতি
ভূয এব মা ভগবান্বিজ্ঞাপযত্বিতি তথা সোম্যেতি হোবাচ
|| ৬. ৬. ৬||

|| ইতি ষষ্ঠঃ খণ্ডঃ ||

|| সপ্তমঃ খণ্ডঃ ||

ষোডশকলঃ সোম্য পুরুষঃ পঞ্চদশাহানি মাশীঃ
কামমপঃ পিবাপোমযঃ প্রাণো নপিবতো বিচ্ছেত্স্যত
ইতি || ৬. ৭. ১||
 
স হ পঞ্চদশাহানি নশাথ হৈনমুপসসাদ কিং ব্রবীমি
ভো ইত্যৃচঃ সোম্য যজূঁষি সামানীতি স হোবাচ ন বৈ
মা প্রতিভান্তি ভো ইতি || ৬. ৭. ২||

তঁ হোবাচ যথা সোম্য মহতোঽভ্যা হিতস্যৈকোঽঙ্গারঃ
খদ্যোতমাত্রঃ পরিশিষ্টঃ স্যাত্তেন ততোঽপি ন বহু
দহেদেবঁসোম্য তে ষোডশানাং কলানামেকা কলাতিশিষ্টা
স্যাত্তযৈতর্হি বেদান্নানুভবস্যশানাথ মে বিজ্ঞাস্যসীতি
|| ৬. ৭. ৩||

স হশাথ হৈনমুপসসাদ তঁ হ যত্কিংচ পপ্রচ্ছ
সর্বঁহ প্রতিপেদে || ৬. ৭. ৪||
 
তঁ হোবাচ যথা সোম্য মহতোঽভ্যাহিতস্যৈকমঙ্গারং
খদ্যোতমাত্রং পরিশিষ্টং তং তৃণৈরুপসমাধায
প্রাজ্বলযেত্তেন ততোঽপি বহু দহেত্ || ৬. ৭. ৫||

 এবঁ সোম্য তে ষোডশানাং কলানামেকা
কলাতিশিষ্টাভূত্সান্নেনোপসমাহিতা প্রাজ্বালী
তযৈতর্হি বেদাননুভবস্যন্নমযঁহি সোম্য মন আপোমযঃ
প্রাণস্তেজোমযী বাগিতি তদ্ধাস্য বিজজ্ঞাবিতি বিজজ্ঞাবিতি
|| ৬. ৭. ৬||

|| ইতি সপ্তমঃ খণ্ডঃ ||

|| অষমঃ খণ্ডঃ ||

উদ্দালকো হারুণিঃ শ্বেতকেতুং পুত্রমুবাচ স্বপ্নান্তং মে সোম্য
বিজানীহীতি যত্রৈতত্পুরুষঃ স্বপিতি নাম সতা সোম্য তদা
সংপন্নো ভবতি স্বমপীতো ভবতি তস্মাদেনঁ
স্বপিতীত্যাচক্ষতে স্বঁহ্যপীতো ভবতি || ৬. ৮. ১||

স যথা শকুনিঃ সূত্রেণ প্রবদ্ধো দিশং দিশং
পতিত্বান্যত্রাযতনমলব্ধ্বা বন্ধনমেবোপশ্রযত
এবমেব খলু সোম্য তন্মনো দিশং দিশং
পতিত্বান্যত্রাযতনমলব্ধ্বা প্রাণমেবোপশ্রযতে
প্রাণবন্ধনঁ হি সোম্য মন ইতি || ৬. ৮. ২ ||

অশনাপিপাসে মে সোম্য বিজানীহীতি
যত্রৈতত্পুরুষোঽশিশিষতি নামাপ এব তদশিতং নযন্তে
তদ্যথা গোনাযোঽশ্বনাযঃ পুরুষনায ইত্যেবং তদপ
আচক্ষতেঽশনাযেতি তত্রিতচ্ছুঙ্গমুত্পতিতঁ সোম্য
বিজানীহি নেদমমূলং ভবিষ্যতীতি || ৬. ৮. ৩||

তস্য ক্ব মূলঁ স্যাদন্যত্রান্নাদেবমেব খলু সোম্যান্নেন
শুঙ্গেনাপো মূলমন্বিচ্ছাদ্ভিঃ সোম্য শুঙ্গেন তেজো
মূলমন্বিচ্ছ তেজসা সোম্য শুঙ্গেন সন্মূলমন্বিচ্ছ
সন্মূলাঃ সোম্যেমাঃ সর্বাঃ প্রজাঃ সদাযতনাঃ
সত্প্রতিষ্ঠাঃ || ৬. ৮. ৪||
 
অথ যত্রৈতত্পুরুষঃ পিপাসতি নাম তেজ এব তত্পীতং নযতে
তদ্যথা গোনাযোঽশ্বনাযঃ পুরুষনায ইত্যেবং তত্তেজ
আচষ্ট উদন্যেতি তত্রৈতদেব শুঙ্গমুত্পতিতঁ সোম্য
বিজানীহি নেদমমূলং ভবিষ্যতীতি || ৬. ৮. ৫||
 
তস্য ক্ব মূলঁ স্যাদন্যত্রাদ্ভ্য্ঽদ্ভিঃ সোম্য শুঙ্গেন তেজো
মূলমন্বিচ্ছ তেজসা সোম্য শুঙ্গেন সন্মূলমন্বিচ্ছ
সন্মূলাঃ সোম্যেমাঃ সর্বাঃ প্রজাঃ সদাযতনাঃ সত্প্রতিষ্ঠা
যথা তু খলু সোম্যেমাস্তিস্রো দেবতাঃ পুরুষং প্রাপ্য
ত্রিবৃত্ত্রিবৃদেকৈকা ভবতি তদুক্তং পুরস্তাদেব ভবত্যস্য
সোম্য পুরুষস্য প্রযতো বাঙ্মনসি সংপদ্যতে মনঃ প্রাণে
প্রাণস্তেজসি তেজঃ পরস্যাং দেবতাযাম্ || ৬. ৮. ৬||
 
স য এষোঽণিমৈতদাত্ম্যমিদঁ সর্বং তত্সত্যঁ স
আত্মা তত্ত্বমসি শ্বেতকেতো ইতি ভূয এব মা
ভগবান্বিজ্ঞাপযত্বিতি তথা সোম্যেতি হোবাচ || ৬. ৮. ৭||

|| ইতি অষ্টমঃ খণ্ডঃ ||

|| নবমঃ খণ্ডঃ ||

যথা সোম্য মধু মধুকৃতো নিস্তিষ্ঠন্তি নানাত্যযানাং
বৃক্ষাণাঁরসান্সমবহারমেকতাঁরসং গমযন্তি || ৬. ৯. ১||
 
তে যথা তত্র ন বিবেকং লভন্তেঽমুষ্যাহং বৃক্ষস্য
রসোঽস্ম্যমুষ্যাহং বৃক্ষস্য রসোঽস্মীত্যেবমেব খলু
সোম্যেমাঃ সর্বাঃ প্রজাঃ সতি সংপদ্য ন বিদুঃ সতি
সংপদ্যামহ ইতি || ৬. ৯. ২ ||

ত ইহ ব্যঘ্রো বা সিঁহো বা বৃকো বা বরাহো বা কীটো বা
পতঙ্গো বা দঁশো বা মশকো বা যদ্যদ্ভবন্তি তদাভবন্তি
|| ৬. ৯. ৩ ||

স য এষোঽণিমৈতদাত্ম্যমিদঁ সর্বং তত্সত্যঁ স আত্মা
তত্ত্বমসি শ্বেতকেতো ইতি ভূয এব মা ভগবান্বিজ্ঞাপযত্বিতি
তথা সোম্যেতি হোবাচ || ৬. ৯. ৪||

|| ইতি নবমঃ খণ্ডঃ ||

|| দশমঃ খণ্ডঃ ||

ইমাঃ সোম্য নদ্যঃ পুরস্তাত্প্রাচ্যঃ স্যন্দন্তে
পশ্চাত্প্রতীচ্যস্তাঃ সমুদ্রাত্সমুদ্রমেবাপিযন্তি স সমুদ্র
এব ভবতি তা যথা তত্র ন বিদুরিযমহমস্মীযমহমস্মীতি
|| ৬. ১০. ১||
 
এবমেব খলু সোম্যেমাঃ সর্বাঃ প্রজাঃ সত আগম্য ন বিদুঃ
সত আগচ্ছামহ ইতি ত ইহ ব্যাঘ্রো বা সিঁহো বা
বৃকো বা বরাহো বা কীটো বা পতঙ্গো বা দঁশো বা মশকো বা
যদ্যদ্ভবন্তি তদাভবন্তি || ৬. ১০. ২||
 
স য এষোঽণিমৈতদাত্ম্যমিদঁ সর্বং তত্সত্যঁ স আত্মা
তত্ত্বমসি শ্বেতকেতো ইতি ভূয এব মা ভগবান্বিজ্ঞাপযত্বিতি
তথা সোম্যেতি হোবাচ || ৬. ১০. ৩||

|| ইতি দশমঃ খণ্ডঃ ||

|| একাদশঃ খণ্ডঃ ||

অস্য সোম্য মহতো বৃক্ষস্য যো মূলেঽভ্যাহন্যাজ্জীবন্স্রবেদ্যো
মধ্যেঽভ্যাহন্যাজ্জীবন্স্রবেদ্যোঽগ্রেঽভ্যাহন্যাজ্জীবন্স্রবেত্স
এষ জীবেনাত্মনানুপ্রভূতঃ পেপীযমানো মোদমানস্তিষ্ঠতি
|| ৬. ১১. ১||
 
অস্য যদেকাঁ শাখাং জীবো জহাত্যথ সা শুষ্যতি
দ্বিতীযাং জহাত্যথ সা শুষ্যতি তৃতীযাং জহাত্যথ সা
শুষ্যতি সর্বং জহাতি সর্বঃ শুষ্যতি || ৬. ১১. ২||

এবমেব খলু সোম্য বিদ্ধীতি হোবাচ জীবাপেতং বাব কিলেদং
ম্রিযতে ন জীবো ম্রিযতে ইতি স য এষোঽণিমৈতদাত্ম্যমিদঁ
সর্বং তত্সত্যঁ স আত্মা তত্ত্বমসি শ্বেতকেতো ইতি ভূয এব
মা ভগবান্বিজ্ঞাপযত্বিতি তথা সোম্যেতি হোবাচ || ৬. ১১. ৩||

|| ইতি একাদশঃ খণ্ডঃ ||

|| দ্বাদশঃ খণ্ডঃ ||

ন্যগ্রোধফলমত আহরেতীদং ভগব ইতি ভিন্দ্ধীতি ভিন্নং
ভগব ইতি কিমত্র পশ্যসীত্যণ্ব্য ইবেমা ধানা ভগব
ইত্যাসামঙ্গৈকাং ভিন্দ্ধীতি ভিন্না ভগব ইতি কিমত্র
পশ্যসীতি ন কিংচন ভগব ইতি || ৬. ১২. ১||

তঁ হোবাচ যং বৈ সোম্যৈতমণিমানং ন নিভালযস
এতস্য বৈ সোম্যৈষোঽণিম্ন এবং মহান্যগ্রোধস্তিষ্ঠতি
শ্রদ্ধত্স্ব সোম্যেতি || ৬. ১২. ২||

স য এষোঽণিমৈতদাত্ম্যমিদদ্ঁ সর্বং তত্সত্যঁ স আত্মা
তত্ত্বমসি শ্বেতকেতো ইতি ভূয এব মা ভগবান্বিজ্ঞাপযত্বিতি
তথা সোম্যেতি হোবাচ || ৬. ১২. ৩||

|| ইতি দ্বাদশঃ খণ্ডঃ ||

|| ত্রযোদশঃ খণ্ডঃ ||
 
লবণমেতদুদকেঽবধাযাথ মা প্রাতরুপসীদথা ইতি
স হ তথা চকার তঁ হোবাচ যদ্দোষা লবণমুদকেঽবাধা
অঙ্গ তদাহরেতি তদ্ধাবমৃশ্য ন বিবেদ || ৬. ১৩. ১||
 
যথা বিলীনমেবাঙ্গাস্যান্তাদাচামেতি কথমিতি লবণমিতি
মধ্যাদাচামেতি কথমিতি লবণমিত্যন্তাদাচামেতি
কথমিতি লবণমিত্যভিপ্রাস্যৈতদথ মোপসীদথা ইতি
তদ্ধ তথা চকার তচ্ছশ্বত্সংবর্ততে তঁ হোবাচাত্র
বাব কিল তত্সোম্য ন নিভালযসেঽত্রৈব কিলেতি || ৬. ১৩. ২||

স য এষোঽণিমৈতদাত্ম্যমিদঁ সর্বং তত্সত্যঁ স আত্মা
তত্ত্বমসি শ্বেতকেতো ইতি ভূয এব মা ভগবান্বিজ্ঞাপযত্বিতি
তথা সোম্যেতি হোবাচ || ৬. ১৩. ৩||

|| ইতি ত্রযোদশঃ খণ্ডঃ ||

|| চতুর্দশঃ খণ্ডঃ ||

যথা সোম্য পুরুষং গন্ধারেভ্যোঽভিনদ্ধাক্ষমানীয তং
ততোঽতিজনে বিসৃজেত্স যথা তত্র প্রাঙ্বোদঙ্বাধরাঙ্বা
প্রত্যঙ্বা প্রধ্মাযীতাভিনদ্ধাক্ষ আনীতোঽভিনদ্ধাক্ষো
বিসৃষ্টঃ || ৬. ১৪. ১||
 
তস্য যথাভিনহনং প্রমুচ্য প্রব্রূযাদেতাং দিশং গন্ধারা
এতাং দিশং ব্রজেতি স গ্রামাদ্গ্রামং পৃচ্ছন্পণ্ডিতো মেধাবী
গন্ধারানেবোপসংপদ্যেতৈবমেবেহাচার্যবান্পুরুষো বেদ
তস্য তাবদেব চিরং যাবন্ন বিমোক্ষ্যেঽথ সংপত্স্য ইতি
|| ৬. ১৪. ২||
 
স য এষোঽণিমৈতদাত্ম্যমিদঁ সর্বং তত্সত্যঁ স আত্মা
তত্ত্বমসি শ্বেতকেতো ইতি ভূয এব মা ভগবান্বিজ্ঞাপযত্বিতি
তথা সোম্যেতি হোবাচ || ৬. ১৪. ৩||

|| ইতি চতুর্দশঃ খণ্ডঃ ||

|| পঞ্চদশঃ খণ্ডঃ ||

পুরুষঁ সোম্যোতোপতাপিনং জ্ঞাতযঃ পর্যুপাসতে জানাসি
মাং জানাসি মামিতি তস্য যাবন্ন বাঙ্মনসি সংপদ্যতে
মনঃ প্রাণে প্রাণস্তেজসি তেজঃ পরস্যাং দেবতাযাং
তাবজ্জানাতি || ৬. ১৫. ১||
 
অথ যদাস্য বাঙ্মনসি সংপদ্যতে মনঃ প্রাণে প্রাণস্তেজসি
তেজঃ পরস্যাং দেবতাযামথ ন জানাতি || ৬. ১৫. ২||

স য এষোঽণিমৈতদাত্ম্যমিদঁ সর্বং তত্ সত্যঁ স আত্মা
তত্ত্বমসি শ্বেতকেতো ইতি ভূয এব মা ভগবান্বিজ্ঞাপযত্বিতি
তথা সোম্যেতি হোবাচ || ৬. ১৫. ৩||

|| ইতি পঞ্চদশঃ খণ্ডঃ ||

|| ষোডশঃ খণ্ডঃ ||

পুরুষঁ সোম্যোত
হস্তগৃহীতমানযন্ত্যপহার্ষীত্স্তেযমকার্ষীত্পরশুমস্মৈ
তপতেতি স যদি তস্য কর্তা ভবতি তত এবানৃতমাত্মানং
কুরুতে সোঽনৃতাভিসংধোঽনৃতেনাত্মানমন্তর্ধায
পরশুং তপ্তং প্রতিগৃহ্ণাতি স দহ্যতেঽথ হন্যতে || ৬. ১৬. ১||

অথ যদি তস্যাকর্তা ভবতি ততেব সত্যমাত্মানং কুরুতে
স সত্যাভিসন্ধঃ সত্যেনাত্মানমন্তর্ধায পরশুং তপ্তং
প্রতিগৃহ্ণাতি সন দহ্যতেঽথ মুচ্যতে || ৬. ১৬. ২||
 
স যথা তত্র নাদাহ্যেতৈতদাত্ম্যমিদঁ সর্বং তত্সত্যঁ স
আত্মা তত্ত্বমসি শ্বেতকেতো ইতি তদ্ধাস্য বিজজ্ঞাবিতি
বিজজ্ঞাবিতি || ৬. ১৬. ৩||

|| ইতি ষোডশঃ খণ্ডঃ ||

 || ইতি ষষ্ঠোঽধ্যাযঃ ||

——————————————————————————–

 || সপ্তমোঽধ্যাযঃ ||

|| প্রথমঃ খণ্ডঃ ||

অধীহি ভগব ইতি হোপসসাদ সনত্কুমারং নারদস্তঁ
হোবাচ যদ্বেত্থ তেন মোপসীদ ততস্ত ঊর্ধ্বং বক্ষ্যামীতি
স হোবাচ || ৭. ১. ১||

ঋগ্বেদং ভগবোঽধ্যেমি যজুর্বেদঁ সামবেদমাথর্বণং
চতুর্থমিতিহাসপুরাণং পঞ্চমং বেদানাং বেদং পিত্র্যঁ রাশিং
দৈবং নিধিং বাকোবাক্যমেকাযনং দেববিদ্যাং ব্রহ্মবিদ্যাং
ভূতবিদ্যাং ক্ষত্রবিদ্যাং নক্ষত্রবিদ্যাঁ
সর্পদেবজনবিদ্যামেতদ্ভগবোঽধ্যেমি || ৭. ১. ২||
 
সোঽহং ভগবো মন্ত্রবিদেবাস্মি নাত্মবিচ্ছ্রুতঁ হ্যেব মে
ভগবদ্দৃশেভ্যস্তরতি শোকমাত্মবিদিতি সোঽহং ভগবঃ
শোচামি তং মা ভগবাঞ্ছোকস্য পারং তারযত্বিতি
তঁ হোবাচ যদ্বৈ কিংচৈতদধ্যগীষ্ঠা নামৈবৈতত্ || ৭. ১. ৩||

নাম বা ঋগ্বেদো যজুর্বেদঃ সামবেদ আথর্বণশ্চতুর্থ
ইতিহাসপুরাণঃ পঞ্চমো বেদানাং বেদঃ পিত্র্যো রাশির্দৈবো
নিধির্বাকোবাক্যমেকাযনং দেববিদ্যা ব্রহ্মবিদ্যা ভূতবিদ্যা
ক্ষত্রবিদ্যা নক্ষত্রবিদ্যা সর্পদেবজনবিদ্যা
নামৈবৈতন্নামোপাস্স্বেতি || ৭. ১. ৪ ||

স যো নাম ব্রহ্মেত্যুপাস্তে যাবন্নাম্নো গতং তত্রাস্য
যথাকামচারো ভবতি যো নাম ব্রহ্মেত্যুপাস্তেঽস্তি
ভগবো নাম্নো ভূয ইতি নাম্নো বাব ভূযোঽস্তীতি তন্মে
ভগবান্ব্রবীত্বিতি || ৭. ১. ৫||

|| ইতি প্রথমঃ খণ্ডঃ ||

|| দ্বিতীযঃ খণ্ডঃ ||

বাগ্বাব নাম্নো ভূযসী বাগ্বা ঋগ্বেদং বিজ্ঞাপযতি যজুর্বেদঁ
সামবেদমাথর্বণং চতুর্থমিতিহাসপুরাণং পঞ্চমং বেদানাং বেদং
পিত্র্যঁরাশিং দৈবং নিধিং বাকোবাক্যমেকাযনং দেববিদ্যাং
ব্রহ্মবিদ্যাং ভূতবিদ্যাং ক্ষত্রবিদ্যাঁ সর্পদেবজনবিদ্যাং
দিবং চ পৃথিবীং চ বাযুং চাকাশং চাপশ্চ তেজশ্চ
দেবাঁশ্চ মনুষ্যাঁশ্চ পশূঁশ্চ বযাঁসি চ
তৃণবনস্পতীঞ্শ্বাপদান্যাকীটপতঙ্গপিপীলকং
ধর্মং চাধর্মং চ সত্যং চানৃতং চ সাধু চাসাধু চ
হৃদযজ্ঞং চাহৃদযজ্ঞং চ যদ্বৈ বাঙ্নাভবিষ্যন্ন ধর্মো
নাধর্মো ব্যজ্ঞাপযিষ্যন্ন সত্যং নানৃতং ন সাধু নাসাধু
ন হৃদযজ্ঞো নাহৃদযজ্ঞো বাগেবৈতত্সর্বং বিজ্ঞাপযতি
বাচমুপাস্স্বেতি || ৭. ২. ১||

স যো বাচং ব্রহ্মেত্যুপাস্তে যাবদ্বাচো গতং তত্রাস্য
যথাকামচারো ভবতি যো বাচং ব্রহ্মেত্যুপাস্তেঽস্তি
ভগবো বাচো ভূয ইতি বাচো বাব ভূযোঽস্তীতি তন্মে
ভগবান্ব্রবীত্বিতি || ৭. ২. ২||

|| ইতি দ্বিতীযঃ খণ্ডঃ ||

|| তৃতীযঃ খণ্ডঃ ||

মনো বাব বাচো ভূযো যথা বৈ দ্বে বামলকে দ্বে বা কোলে
দ্বৌ বাক্ষৌ মুষ্টিরনুভবত্যেবং বাচং চ নাম চ
মনোঽনুভবতি স যদা মনসা মনস্যতি
মন্ত্রানধীযীযেত্যথাধীতে কর্মাণি কুর্বীযেত্যথ কুরুতে
পুত্রাঁশ্চ পশূঁশ্চেচ্ছেযেত্যথেচ্ছত ইমং চ
লোকমমুং চেচ্ছেযেত্যথেচ্ছতে মনো হ্যাত্মা মনো হি লোকো
মনো হি ব্রহ্ম মন উপাস্স্বেতি || ৭. ৩. ১ ||

স যো মনো ব্রহ্মেত্যুপাস্তে যাবন্মনসো গতং তত্রাস্য
যথাকামচারো ভবতি যো মনো ব্রহ্মেত্যুপাস্তেঽস্তি
ভগবো মনসো ভূয ইতি মনসো বাব ভূযোঽস্তীতি
তন্মে ভগবান্ব্রবীত্বিতি || ৭. ৩. ২||

|| ইতি তৃতীযঃ খণ্ডঃ ||

|| চতুর্থঃ খণ্ডঃ ||

সংকল্পো বাব মনসো ভূযান্যদা বৈ সংকল্পযতেঽথ
মনস্যত্যথ বাচমীরযতি তামু নাম্নীরযতি নাম্নি
মন্ত্রা একং ভবন্তি মন্ত্রেষু কর্মাণি || ৭. ৪. ১||
 
তানি হ বা এতানি সংকল্পৈকাযনানি সংকল্পাত্মকানি
সংকল্পে প্রতিষ্ঠিতানি সমকৢপতাং দ্যাবাপৃথিবী
সমকল্পেতাং বাযুশ্চাকাশং চ সমকল্পন্তাপশ্চ
তেজশ্চ তেষাঁ সং কৢপ্ত্যৈ বর্ষঁ সংকল্পতে
বর্ষস্য সংকৢপ্ত্যা অন্নঁ সংকল্পতেঽন্নস্য সং কৢপ্ত্যৈ
প্রাণাঃ সংকল্পন্তে প্রাণানাঁ সং কৢপ্ত্যৈ মন্ত্রাঃ সংকল্পন্তে
মন্ত্রাণাঁ সং কৢপ্ত্যৈ কর্মাণি সংকল্পন্তে কর্মণাং
সংকৢপ্ত্যৈ লোকঃ সংকল্পতে লোকস্য সং কৢপ্ত্যৈ সর্বঁ
সংকল্পতে স এষ সংকল্পঃ সংকল্পমুপাস্স্বেতি || ৭. ৪. ২ ||

স যঃ সংকল্পং ব্রহ্মেত্যুপাস্তে সংকৢপ্তান্বৈ স লোকান্ধ্রুবান্ধ্রুবঃ
প্রতিষ্ঠিতান্ প্রতিষ্ঠিতোঽব্যথমানানব্যথমানোঽভিসিধ্যতি
যাবত্সংকল্পস্য গতং তত্রাস্য যথাকামচারো ভবতি যঃ
সংকল্পং ব্রহ্মেত্যুপাস্তেঽস্তি ভগবঃ সংকল্পাদ্ভূয ইতি
সংকল্পাদ্বাব ভূযোঽস্তীতি তন্মে ভগবান্ব্রবীত্বিতি || ৭. ৪. ৩||

|| ইতি চতুর্থঃ খণ্ডঃ ||

|| পঞ্চমঃ খণ্ডঃ ||

চিত্তং বাব সং কল্পাদ্ভূযো যদা বৈ চেতযতেঽথ
সংকল্পযতেঽথ মনস্যত্যথ বাচমীরযতি তামু নাম্নীরযতি
নাম্নি মন্ত্রা একং ভবন্তি মন্ত্রেষু কর্মাণি || ৭. ৫. ১||

তানি হ বা এতানি চিত্তৈকাযনানি চিত্তাত্মানি চিত্তে
প্রতিষ্ঠিতানি তস্মাদ্যদ্যপি বহুবিদচিত্তো ভবতি
নাযমস্তীত্যেবৈনমাহুর্যদযং বেদ যদ্বা অযং
বিদ্বান্নেত্থমচিত্তঃ স্যাদিত্যথ যদ্যল্পবিচ্চিত্তবান্ভবতি
তস্মা এবোত শুশ্রূষন্তে চিত্তঁহ্যেবৈষামেকাযনং
চিত্তমাত্মা চিত্তং প্রতিষ্ঠা চিত্তমুপাস্স্বেতি || ৭. ৫. ২ ||

স যশ্চিত্তং ব্রহ্মেত্যুপাস্তে চিত্তান্বৈ স লোকান্ধ্রুবান্ধ্রুবঃ
প্রতিষ্ঠিতান্প্রতিষ্ঠিতোঽব্যথমানানব্যথমানোঽভিসিধ্যতি
যাবচ্চিত্তস্য গতং তত্রাস্য যথাকামচারো ভবতি যশ্চিত্তং
ব্রহ্মেত্যুপাস্তেঽস্তি ভগবশ্চিত্তাদ্ভূয ইতি চিত্তাদ্বাব
ভূযোঽস্তীতি তন্মে ভগবান্ব্রবীত্বিতি || ৭. ৫. ৩||

|| ইতি পঞ্চমঃ খণ্ডঃ ||

|| ষষ্ঠঃ খণ্ডঃ ||

ধ্যানং বাব চিত্তাদ্ভূযো ধ্যাযতীব পৃথিবী
ধ্যাযতীবান্তরিক্ষং ধ্যাযতীব দ্যৌর্ধ্যাযন্তীবাপো
ধ্যাযন্তীব পর্বতা দেবমনুষ্যাস্তস্মাদ্য ইহ মনুষ্যাণাং
মহত্তাং প্রাপ্নুবন্তি ধ্যানাপাদাঁশা ইবৈব তে ভবন্ত্যথ
যেঽল্পাঃ কলহিনঃ পিশুনা উপবাদিনস্তেঽথ যে প্রভবো
ধ্যানাপাদাঁশা ইবৈব তে ভবন্তি ধ্যানমুপাস্স্বেতি || ৭. ৬. ১||
 
স যো ধ্যানং ব্রহ্মেত্যুপাস্তে যাবদ্ধ্যানস্য গতং তত্রাস্য
যথাকামচারো ভবতি যো ধ্যানং ব্রহ্মেত্যুপাস্তেঽস্তি
ভগবো ধ্যানাদ্ভূয ইতি ধ্যানাদ্বাব ভূযোঽস্তীতি
তন্মে ভগবান্ব্রবীত্বিতি || ৭. ৬. ২||

|| ইতি ষষ্ঠঃ খণ্ডঃ ||

|| সপ্তমঃ খণ্ডঃ ||

বিজ্ঞানং বাব ধ্যানাদ্ভূযঃ বিজ্ঞানেন বা ঋগ্বেদং বিজানাতি
যজুর্বেদঁ সামবেদমাথর্বণং চতুর্থমিতিহাসপুরাণং
পঞ্চমং বেদানাং বেদং পিত্র্যঁরাশিং দৈবং নিধিং
বাকোবাক্যমেকাযনং দেববিদ্যাং ব্রহ্মবিদ্যাং ভূতবিদ্যাং
ক্ষত্রবিদ্যাং নক্ষত্রবিদ্যাঁসর্পদেবজনবিদ্যাং দিবং চ
পৃথিবীং চ বাযুং চাকাশং চাপশ্চ তেজশ্চ দেবাঁশ্চ
মনুষ্যাঁশ্চ পশূঁশ্চ বযাঁসি চ
তৃণবনস্পতীঞ্ছ্বাপদান্যাকীটপতঙ্গপিপীলকং
ধর্মং চাধর্মং চ সত্যং চানৃতং চ সাধু চাসাধু চ
হৃদযজ্ঞং চাহৃদযজ্ঞং চান্নং চ রসং চেমং চ লোকমমুং
চ বিজ্ঞানেনৈব বিজানাতি বিজ্ঞানমুপাস্স্বেতি || ৭. ৭. ১ ||

স যো বিজ্ঞানং ব্রহ্মেত্যুপাস্তে বিজ্ঞানবতো বৈ স
লোকাঞ্জ্ঞানবতোঽভিসিধ্যতি যাবদ্বিজ্ঞানস্য গতং তত্রাস্য
যথাকামচারো ভবতি যো বিজ্ঞানং ব্রহ্মেত্যুপাস্তেঽস্তি ভগবো
বিজ্ঞানাদ্ভূয ইতি বিজ্ঞানাদ্বাব ভূযোঽস্তীতি তন্মে
ভগবান্ব্রবীত্বিতি || ৭. ৭. ২||

|| ইতি সপ্তমঃ খণ্ডঃ ||

|| অষ্টমঃ খণ্ডঃ ||

বলং বাব বিজ্ঞানাদ্ভূযোঽপি হ শতং বিজ্ঞানবতামেকো
বলবানাকম্পযতে স যদা বলী ভবত্যথোত্থাতা
ভবত্যুত্তিষ্ঠন্পরিচরিতা ভবতি পরিচরন্নুপসত্তা
ভবত্যুপসীদন্দ্রষ্টা ভবতি শ্রোতা ভবতি মন্তা ভবতি
বোদ্ধা ভবতি কর্তা ভবতি বিজ্ঞাতা ভবতি বলেন বৈ পৃথিবী
তিষ্ঠতি বলেনান্তরিক্ষং বলেন দ্যৌর্বলেন পর্বতা বলেন
দেবমনুষ্যা বলেন পশবশ্চ বযাঁসি চ তৃণবনস্পতযঃ
শ্বাপদান্যাকীটপতঙ্গপিপীলকং বলেন লোকস্তিষ্ঠতি
বলমুপাস্স্বেতি || ৭. ৮. ১||

স যো বলং ব্রহ্মেত্যুপাস্তে যাবদ্বলস্য গতং তত্রাস্য
যথাকামচারো ভবতি যো বলং ব্রহ্মেত্যুপাস্তেঽস্তি ভগবো
বলাদ্ভূয ইতি বলাদ্বাব ভূযোঽস্তীতি তন্মে
ভগবান্ব্রবীত্বিতি || ৭. ৮. ২||

|| ইতি অষ্টমঃ খণ্ডঃ ||

|| নবমঃ খণ্ডঃ ||

অন্নং বাব বলাদ্ভূযস্তস্মাদ্যদ্যপি দশ
রাত্রীর্নাশ্নীযাদ্যদ্যু হ
জীবেদথবাদ্রষ্টাশ্রোতামন্তাবোদ্ধাকর্তাবিজ্ঞাতা
ভবত্যথান্নস্যাযৈ দ্রষ্টা ভবতি শ্রোতা ভবতি মন্তা
ভবতি বোদ্ধা ভবতি কর্তা ভবতি বিজ্ঞাতা
ভবত্যন্নমুপাস্স্বেতি || ৭. ৯. ১||

স যোঽন্নং ব্রহ্মেত্যুপাস্তেঽন্নবতো বৈ স
লোকান্পানবতোঽভিসিধ্যতি  যাবদন্নস্য গতং তত্রাস্য
যথাকামচারো ভবতি যোঽন্নং ব্রহ্মেত্যুপাস্তেঽস্তি
ভগবোঽন্নাদ্ভূয ইত্যন্নাদ্বাব ভূযোঽস্তীতি তন্মে
ভগবান্ব্রবীত্বিতি || ৭. ৯. ২||

|| ইতি নবমঃ খণ্ডঃ ||

|| দশমঃ খণ্ডঃ ||

আপো বাবান্নাদ্ভূযস্তস্মাদ্যদা সুবৃষ্টির্ন ভবতি
ব্যাধীযন্তে প্রাণা অন্নং কনীযো ভবিষ্যতীত্যথ যদা
সুবৃষ্টির্ভবত্যানন্দিনঃ প্রাণা ভবন্ত্যন্নং বহু
ভবিষ্যতীত্যাপ এবেমা মূর্তা যেযং পৃথিবী যদন্তরিক্ষং
যদ্দ্যৌর্যত্পর্বতা যদ্দেবমনুষ্যাযত্পশবশ্চ বযাঁসি চ
তৃণবনস্পতযঃ শ্বাপদান্যাকীটপতঙ্গপিপীলকমাপ
এবেমা মূর্তা অপ উপাস্স্বেতি || ৭. ১০. ১||

স যোঽপো ব্রহ্মেত্যুপাস্ত আপ্নোতি সর্বান্কামাঁস্তৃপ্তিমান্ভবতি
যাবদপাং গতং তত্রাস্য যথাকামচারো ভবতি যোঽপো
ব্রহ্মেত্যুপাস্তেঽস্তি ভগবোঽদ্ভ্যো ভূয ইত্যদ্ভ্যো বাব
ভূযোঽস্তীতি তন্মে ভগবান্ব্রবীত্বিতি || ৭. ১০. ২||

|| ইতি দশমঃ খণ্ডঃ ||

|| একাদশঃ খণ্ডঃ ||

তেজো বাবাদ্ভ্যো ভূযস্তদ্বা এতদ্বাযুমাগৃহ্যাকাশমভিতপতি
তদাহুর্নিশোচতি নিতপতি বর্ষিষ্যতি বা ইতি তেজ এব
তত্পূর্বং দর্শযিত্বাথাপঃ সৃজতে তদেতদূর্ধ্বাভিশ্চ
তিরশ্চীভিশ্চ বিদ্যুদ্ভিরাহ্রাদাশ্চরন্তি তস্মাদাহুর্বিদ্যোততে
স্তনযতি বর্ষিষ্যতি বা ইতি তেজ এব তত্পূর্বং দর্শযিত্বাথাপঃ
সৃজতে তেজ উপাস্স্বেতি || ৭. ১১. ১||

স যস্তেজো ব্রহ্মেত্যুপাস্তে তেজস্বী বৈ স তেজস্বতো
লোকান্ভাস্বতোঽপহততমস্কানভিসিধ্যতি যাবত্তেজসো গতং
তত্রাস্য যথাকামচারো ভবতি যস্তেজো ব্রহ্মেত্যুপাস্তেঽস্তি
ভগবস্তেজসো ভূয ইতি তেজসো বাব ভূযোঽস্তীতি তন্মে
ভগবান্ব্রবীত্বিতি || ৭. ১১. ২||

|| ইতি একাদশঃ খণ্ডঃ ||

|| দ্বাদশঃ খণ্ডঃ ||

আকাশো বাব তেজসো ভূযানাকাশে বৈ সূর্যাচন্দ্রমসাবুভৌ
বিদ্যুন্নক্ষত্রাণ্যগ্নিরাকাশেনাহ্বযত্যাকাশেন
শৃণোত্যাকাশেন প্রতিশৃণোত্যাকাশে রমত আকাশে ন রমত
আকাশে জাযত আকাশমভিজাযত আকাশমুপাস্স্বেতি
|| ৭. ১২. ১||

স য আকাশং ব্রহ্মেত্যুপাস্ত আকাশবতো বৈ স
লোকান্প্রকাশবতোঽসংবাধানুরুগাযবতোঽভিসিধ্যতি
যাবদাকাশস্য গতং তত্রাস্য যথাকামচারো ভবতি
য আকাশং ব্রহ্মেত্যুপাস্তেঽস্তি ভগব আকাশাদ্ভূয ইতি
আকাশাদ্বাব ভূযোঽস্তীতি তন্মে ভগবান্ব্রবীত্বিতি
|| ৭. ১২. ২||

|| ইতি দ্বাদশঃ খণ্ডঃ ||

|| ত্রযোদশঃ খণ্ডঃ ||

স্মরো বাবাকাশাদ্ভূযস্তস্মাদ্যদ্যপি বহব আসীরন্ন
স্মরন্তো নৈব তে কংচন শৃণুযুর্ন মন্বীরন্ন বিজানীরন্যদা
বাব তে স্মরেযুরথ শৃণুযুরথ মন্বীরন্নথ বিজানীরন্স্মরেণ
বৈ পুত্রান্বিজানাতি স্মরেণ পশূন্স্মরমুপাস্স্বেতি || ৭. ১৩. ১||

স যঃ স্মরং ব্রহ্মেত্যুপাস্তে যাবত্স্মরস্য গতং তত্রাস্য
যথাকামচারো ভবতি যঃ স্মরং ব্রহ্মেত্যুপাস্তেঽস্তি ভগবঃ
স্মরাদ্ভূয ইতি স্মরাদ্বাব ভূযোঽস্তীতি তন্মে
ভগবান্ব্রবীত্বিতি || ৭. ১৩. ২||
 

|| ইতি ত্রযোদশঃ খণ্ডঃ ||
 

|| চতুর্দশঃ খণ্ডঃ ||

আশা বাব স্মরাদ্ভূযস্যাশেদ্ধো বৈ স্মরো মন্ত্রানধীতে
কর্মাণি কুরুতে পুত্রাঁশ্চ পশূঁশ্চেচ্ছত ইমং চ
লোকমমুং চেচ্ছত আশামুপাস্স্বেতি || ৭. ১৪. ১||

স য আশাং ব্রহ্মেত্যুপাস্ত আশযাস্য সর্বে কামাঃ
সমৃধ্যন্ত্যমোঘা হাস্যাশিষো ভবন্তি যাবদাশাযা
গতং তত্রাস্য যথাকামচারো ভবতি য আশাং
ব্রহ্মেত্যুপাস্তেঽস্তি ভগব আশাযা ভূয ইত্যাশাযা বাব
ভূযোঽস্তীতি তন্মে ভগবান্ব্রবীত্বিতি || ৭. ১৪. ২||

|| ইতি চতুর্দশঃ খণ্ডঃ ||

|| পঞ্চদশঃ খণ্ডঃ ||

প্রাণো বা আশাযা ভূযান্যথা বা অরা নাভৌ সমর্পিতা
এবমস্মিন্প্রাণে সর্বঁসমর্পিতং প্রাণঃ প্রাণেন যাতি
প্রাণঃ প্রাণং দদাতি প্রাণায দদাতি প্রাণো হ পিতা প্রাণো
মাতা প্রাণো ভ্রাতা প্রাণঃ স্বসা প্রাণ আচার্যঃ
প্রাণো ব্রাহ্মণঃ || ৭. ১৫. ১||

স যদি পিতরং বা মাতরং বা ভ্রাতরং বা স্বসারং বাচার্যং
বা ব্রাহ্মণং বা কিংচিদ্ভৃশমিব প্রত্যাহ
ধিক্ত্বাস্ত্বিত্যেবৈনমাহুঃ পিতৃহা বৈ ত্বমসি মাতৃহা বৈ
ত্বমসি ভ্রাতৃহা বৈ ত্বমসি স্বসৃহা বৈ ত্বমস্যাচার্যহা
বৈ ত্বমসি ব্রাহ্মণহা বৈ ত্বমসীতি || ৭. ১৫. ২||

অথ যদ্যপ্যেনানুত্ক্রান্তপ্রাণাঞ্ছূলেন সমাসং
ব্যতিষংদহেন্নৈবৈনং ব্রূযুঃ পিতৃহাসীতি ন মাতৃহাসীতি
ন ভ্রাতৃহাসীতি ন স্বসৃহাসীতি নাচার্যহাসীতি
ন ব্রাহ্মণহাসীতি || ৭. ১৫. ৩||

প্রাণো হ্যেবৈতানি সর্বাণি ভবতি স বা এষ এবং পশ্যন্নেবং
মন্বান এবং বিজানন্নতিবাদী ভবতি তং
চেদ্ব্রূযুরতিবাদ্যসীত্যতিবাদ্যস্মীতি ব্রূযান্নাপহ্নুবীত
|| ৭. ১৫. ৪||

|| ইতি পঞ্চদশঃ খণ্ডঃ ||

|| ষোডশঃ খণ্ডঃ ||

এষ তু বা অতিবদতি যঃ সত্যেনাতিবদতি সোঽহং ভগবঃ
সত্যেনাতিবদানীতি সত্যং ত্বেব বিজিজ্ঞাসিতব্যমিতি সত্যং
ভগবো বিজিজ্ঞাস ইতি || ৭. ১৬. ১||

|| ইতি ষোডশঃ খণ্ডঃ ||

|| সপ্তদশঃ খণ্ডঃ ||

যদা বৈ বিজানাত্যথ সত্যং বদতি নাবিজানন্সত্যং বদতি
বিজানন্নেব সত্যং বদতি বিজ্ঞানং ত্বেব বিজিজ্ঞাসিতব্যমিতি
বিজ্ঞানং ভগবো বিজিজ্ঞাস ইতি || ৭. ১৭. ১||

|| ইতি সপ্তদশঃ খণ্ডঃ ||

|| অষ্টাদশঃ খণ্ডঃ ||

যদা বৈ মনুতেঽথ বিজানাতি নামত্বা বিজানাতি মত্বৈব
বিজানাতি মতিস্ত্বেব বিজিজ্ঞাসিতব্যেতি মতিং ভগবো
বিজিজ্ঞাস ইতি || ৭. ১৮. ১||

|| ইতি অষ্টাদশঃ খণ্ডঃ ||

|| একোনবিংশতিতমঃ খণ্ডঃ ||

যদা বৈ শ্রদ্দধাত্যথ মনুতে নাশ্রদ্দধন্মনুতে
শ্রদ্দধদেব মনুতে শ্রদ্ধা ত্বেব বিজিজ্ঞাসিতব্যেতি
শ্রদ্ধাং ভগবো বিজিজ্ঞাস ইতি || ৭. ১৯. ১||

|| ইতি একোনবিংশতিতমঃ খণ্ডঃ ||

|| বিংশতিতমঃ খণ্ডঃ ||

যদা বৈ নিস্তিষ্ঠত্যথ শ্রদ্দধাতি
নানিস্তিষ্ঠঞ্ছ্রদ্দধাতি নিস্তিষ্ঠন্নেব শ্রদ্দধাতি
নিষ্ঠা ত্বেব বিজিজ্ঞাসিতব্যেতি নিষ্ঠাং ভগবো
বিজিজ্ঞাস ইতি || ৭. ২০. ১||

|| ইতি বিংশতিতমঃ খণ্ডঃ ||

|| একবিংশঃ খণ্ডঃ ||

যদা বৈ করোত্যথ নিস্তিষ্ঠতি নাকৃত্বা নিস্তিষ্ঠতি
কৃত্বৈব নিস্তিষ্ঠতি কৃতিস্ত্বেব বিজিজ্ঞাসিতব্যেতি
কৃতিং ভগবো বিজিজ্ঞাস ইতি || ৭. ২১. ১||

|| ইতি একবিংশঃ খণ্ডঃ ||

|| দ্বাবিংশঃ খণ্ডঃ ||

যদা বৈ সুখং লভতেঽথ করোতি নাসুখং লব্ধ্বা করোতি
সুখমেব লব্ধ্বা করোতি সুখং ত্বেব বিজিজ্ঞাসিতব্যমিতি
সুখং ভগবো বিজিজ্ঞাস ইতি || ৭. ২২. ১||

|| ইতি দ্বাবিংশঃ খণ্ডঃ ||

|| ত্রযোবিংশঃ খণ্ডঃ ||

যো বৈ ভূমা তত্সুখং নাল্পে সুখমস্তি ভূমৈব সুখং
ভূমা ত্বেব বিজিজ্ঞাসিতব্য ইতি ভূমানং ভগবো
বিজিজ্ঞাস ইতি || ৭. ২৩. ১||

|| ইতি ত্রযোবিংশঃ খণ্ডঃ ||

|| চতুর্বিংশঃ খণ্ডঃ ||

যত্র নান্যত্পশ্যতি নান্যচ্ছৃণোতি নান্যদ্বিজানাতি স
ভূমাথ যত্রান্যত্পশ্যত্যন্যচ্ছৃণোত্যন্যদ্বিজানাতি
তদল্পং যো বৈ ভূমা তদমৃতমথ যদল্পং তন্মর্ত্য্ঁ স
ভগবঃ কস্মিন্প্রতিষ্ঠিত ইতি স্বে মহিম্নি যদি বা
ন মহিম্নীতি || ৭. ২৪. ১||

গোঅশ্বমিহ মহিমেত্যাচক্ষতে হস্তিহিরণ্যং দাসভার্যং
ক্ষেত্রাণ্যাযতনানীতি নাহমেবং ব্রবীমি ব্রবীমীতি
হোবাচান্যোহ্যন্যস্মিন্প্রতিষ্ঠিত ইতি || ৭. ২৪. ২||

|| ইতি চতুর্বিংশঃ খণ্ডঃ ||

|| পঞ্চবিংশঃ খণ্ডঃ ||

স এবাধস্তাত্স উপরিষ্টাত্স পশ্চাত্স পুরস্তাত্স
দক্ষিণতঃ স উত্তরতঃ স এবেদঁ সর্বমিত্যথাতোঽহংকারাদেশ
এবাহমেবাধস্তাদহমুপরিষ্টাদহং পশ্চাদহং পুরস্তাদহং
দক্ষিণতোঽহমুত্তরতোঽহমেবেদঁ সর্বমিতি || ৭. ২৫. ১||
 
অথাত আত্মাদেশ এবাত্মৈবাধস্তাদাত্মোপরিষ্টাদাত্মা
পশ্চাদাত্মা পুরস্তাদাত্মা দক্ষিণত আত্মোত্তরত
আত্মৈবেদঁ সর্বমিতি স বা এষ এবং পশ্যন্নেবং মন্বান এবং
বিজানন্নাত্মরতিরাত্মক্রীড আত্মমিথুন আত্মানন্দঃ স
স্বরাড্ভবতি তস্য সর্বেষু লোকেষু কামচারো ভবতি
অথ যেঽন্যথাতো বিদুরন্যরাজানস্তে ক্ষয্যলোকা ভবন্তি
তেষাঁ সর্বেষু লোকেষ্বকামচারো ভবতি || ৭. ২৫. ২||

|| ইতি পঞ্চবিংশঃ খণ্ডঃ ||

|| ষড্বিংশঃ খণ্ডঃ ||

তস্য হ বা এতস্যৈবং পশ্যত এবং মন্বানস্যৈবং বিজানত
আত্মতঃ প্রাণ আত্মত আশাত্মতঃ স্মর আত্মত আকাশ
আত্মতস্তেজ আত্মত আপ আত্মত
আবির্ভাবতিরোভাবাবাত্মতোঽন্নমাত্মতো বলমাত্মতো
বিজ্ঞানমাত্মতো ধ্যানমাত্মতশ্চিত্তমাত্মতঃ
সংকল্প আত্মতো মন আত্মতো বাগাত্মতো নামাত্মতো মন্ত্রা
আত্মতঃ কর্মাণ্যাত্মত এবেদঁসর্বমিতি || ৭. ২৬. ১||

তদেষ শ্লোকো ন পশ্যো মৃত্যুং পশ্যতি ন রোগং নোত দুঃখতাঁ
সর্বঁ হ পশ্যঃ পশ্যতি সর্বমাপ্নোতি সর্বশ ইতি
স একধা ভবতি ত্রিধা ভবতি পঞ্চধা 
সপ্তধা নবধা চৈব পুনশ্চৈকাদশঃ স্মৃতঃ
শতং চ দশ চৈকশ্চ সহস্রাণি চ
বিঁশতিরাহারশুদ্ধৌ সত্ত্বশুদ্ধৌ ধ্রুবা স্মৃতিঃ
স্মৃতিলম্ভে সর্বগ্রন্থীনাং বিপ্রমোক্ষস্তস্মৈ
মৃদিতকষাযায তমসস্পারং দর্শযতি
ভগবান্সনত্কুমারস্তঁ স্কন্দ ইত্যাচক্ষতে
তঁ স্কন্দ ইত্যাচক্ষতে || ৭. ২৬. ২||

|| ইতি ষড্বিংশঃ খণ্ডঃ ||

 || ইতি সপ্তমোঽধ্যাযঃ ||

——————————————————————————–

 || অষ্টমোঽধ্যাযঃ ||

|| প্রথমঃ খণ্ডঃ ||

অথ যদিদমস্মিন্ব্রহ্মপুরে দহরং পুণ্ডরীকং বেশ্ম
দহরোঽস্মিন্নন্তরাকাশস্তস্মিন্যদন্তস্তদন্বেষ্টব্যং
তদ্বাব বিজিজ্ঞাসিতব্যমিতি || ৮. ১. ১||

তং চেদ্ব্রূযুর্যদিদমস্মিন্ব্রহ্মপুরে দহরং পুণ্ডরীকং বেশ্ম
দহরোঽস্মিন্নন্তরাকাশঃ কিং তদত্র বিদ্যতে যদন্বেষ্টব্যং
যদ্বাব বিজিজ্ঞাসিতব্যমিতি স ব্রূযাত্ || ৮. ১. ২||

যাবান্বা অযমাকাশস্তাবানেষোঽন্তর্হৃদয অকাশ
উভে অস্মিন্দ্যাবাপৃথিবী অন্তরেব সমাহিতে
উভাবগ্নিশ্চ বাযুশ্চ সূর্যাচন্দ্রমসাবুভৌ
বিদ্যুন্নক্ষত্রাণি যচ্চাস্যেহাস্তি যচ্চ নাস্তি সর্বং
তদস্মিন্সমাহিতমিতি || ৮. ১. ৩||
 
তং চেদ্ব্রূযুরস্মিঁশ্চেদিদং ব্রহ্মপুরে সর্বঁ সমাহিতঁ
সর্বাণি চ ভূতানি সর্বে চ কামা যদৈতজ্জরা বাপ্নোতি
প্রধ্বঁসতে বা কিং ততোঽতিশিষ্যত ইতি || ৮. ১. ৪||

স ব্রূযাত্নাস্য জরযৈতজ্জীর্যতি ন বধেনাস্য হন্যত
এতত্সত্যং ব্রহ্মপুরমস্মিকামাঃ সমাহিতাঃ এষ
আত্মাপহতপাপ্মা বিজরো বিমৃত্যুর্বিশোকো
বিজিঘত্সোঽপিপাসঃ সত্যকামঃ সত্যসংকল্পো যথা হ্যেবেহ
প্রজা অন্বাবিশন্তি যথানুশাসনম্ যং যমন্তমভিকামা
ভবন্তি যং জনপদং যং ক্ষেত্রভাগং তং তমেবোপজীবন্তি
|| ৮. ১. ৫||

তদ্যথেহ কর্মজিতো লোকঃ ক্ষীযত এবমেবামুত্র পুণ্যজিতো
লোকঃ ক্ষীযতে তদ্য ইহাত্মানমনুবিদ্য ব্রজন্ত্যেতাঁশ্চ
সত্যান্কামাঁস্তেষাঁ সর্বেষু লোকেষ্বকামচারো
ভবত্যথ য ইহাত্মানমনিবুদ্য ব্রজন্ত্যেতঁশ্চ
সত্যান্কামাঁস্তেষাঁ সর্বেষু লোকেষু কামচারো ভবতি
|| ৮. ১. ৬||

|| ইতি প্রথমঃ খণ্ডঃ ||

|| দ্বিতীযঃ খণ্ডঃ ||

স যদি পিতৃলোককামো ভবতি সংকল্পাদেবাস্য পিতরঃ
সমুত্তিষ্ঠন্তি তেন পিতৃলোকেন সংপন্নো মহীযতে || ৮. ২. ১||

অথ যদি মাতৃলোককামো ভবতি সংকল্পাদেবাস্য মাতরঃ
সমুত্তিষ্ঠন্তি তেন মাতৃলোকেন সংপন্নো মহীযতে || ৮. ২. ২||

অথ যদি ভ্রাতৃলোককামো ভবতি সংকল্পাদেবাস্য ভ্রাতরঃ
সমুত্তিষ্ঠন্তি তেন ভ্রাতৃলোকেন সংপন্নো মহীযতে || ৮. ২. ৩||||

অথ যদি স্বসৃলোককামো ভবতি সংকল্পাদেবাস্য স্বসারঃ
সমুত্তিষ্ঠন্তি তেন স্বসৃলোকেন সংপন্নো মহীযতে || ৮. ২. ৪||

অথ যদি সখিলোককামো ভবতি সংকল্পাদেবাস্য সখাযঃ
সমুত্তিষ্ঠন্তি তেন সখিলোকেন সংপন্নো মহীযতে || ৮. ২. ৫||

অথ যদি গন্ধমাল্যলোককামো ভবতি সংকল্পাদেবাস্য
গন্ধমাল্যে সমুত্তিষ্ঠতস্তেন গন্ধমাল্যলোকেন সংপন্নো
মহীযতে || ৮. ২. ৬||

অথ যদ্যন্নপানলোককামো ভবতি সংকল্পাদেবাস্যান্নপানে
সমুত্তিষ্ঠতস্তেনান্নপানলোকেন সংপন্নো মহীযতে || ৮. ২. ৭||

অথ যদি গীতবাদিত্রলোককামো ভবতি সংকল্পাদেবাস্য
গীতবাদিত্রে সমুত্তিষ্ঠতস্তেন গীতবাদিত্রলোকেন সংপন্নো
মহীযতে || ৮. ২. ৮||

অথ যদি স্ত্রীলোককামো ভবতি সংকল্পাদেবাস্য স্ত্রিযঃ
সমুত্তিষ্ঠন্তি তেন স্ত্রীলোকেন সংপন্নো মহীযতে || ৮. ২. ৯||

যং যমন্তমভিকামো ভবতি যং কামং কামযতে সোঽস্য
সংকল্পাদেব সমুত্তিষ্ঠতি তেন সংপন্নো মহীযতে || ৮. ২. ১০||

|| ইতি দ্বিতীযঃ খণ্ডঃ ||

|| তৃতীযঃ খণ্ডঃ ||

ত ইমে সত্যাঃ কামা অনৃতাপিধানাস্তেষাঁ সত্যানাঁ
সতামনৃতমপিধানং যো যো হ্যস্যেতঃ প্রৈতি ন তমিহ
দর্শনায লভতে || ৮. ৩. ১||

অথ যে চাস্যেহ জীবা যে চ প্রেতা যচ্চান্যদিচ্ছন্ন
লভতে সর্বং তদত্র গত্বা বিন্দতেঽত্র হ্যস্যৈতে সত্যাঃ
কামা অনৃতাপিধানাস্তদ্যথাপি হিরণ্যনিধিং নিহিতমক্ষেত্রজ্ঞা
উপর্যুপরি সঞ্চরন্তো ন বিন্দেযুরেবমেবেমাঃ সর্বাঃ প্রজা
অহরহর্গচ্ছন্ত্য এতং ব্রহ্মলোকং ন বিন্দন্ত্যনৃতেন হি
প্রত্যূঢাঃ || ৮. ৩. ২||

স বা এষ আত্মা হৃদি তস্যৈতদেব নিরুক্তঁ হৃদ্যযমিতি
তস্মাদ্ধৃদযমহরহর্বা এবংবিত্স্বর্গং লোকমেতি || ৮. ৩. ৩||

অথ য এষ সংপ্রসাদোঽস্মাচ্ছরীরাত্সমুত্থায পরং
জ্যোতিরুপসংপদ্য স্বেন রূপেণাভিনিষ্পদ্যত এষ আত্মেতি
হোবাচৈতদমৃতমভযমেতদ্ব্রহ্মেতি তস্য হ বা এতস্য
ব্রহ্মণো নাম সত্যমিতি || ৮. ৩. ৪||

তানি হ বা এতানি ত্রীণ্যক্ষরাণি সতীযমিতি
তদ্যত্সত্তদমৃতমথ যত্তি তন্মর্ত্যমথ যদ্যং তেনোভে
যচ্ছতি যদনেনোভে যচ্ছতি তস্মাদ্যমহরহর্বা
এবংবিত্স্বর্গং লোকমেতি || ৮. ৩. ৫||

|| ইতি তৃতীযঃ খণ্ডঃ ||

|| চতুর্থঃ খণ্ডঃ ||

অথ য আত্মা স সেতুর্ধৃতিরেষাং লোকানামসংভেদায
নৈতঁ সেতুমহোরাত্রে তরতো ন জরা ন মৃত্যুর্ন শোকো ন
সুকৃতং ন দুষ্কৃতঁ সর্বে পাপ্মানোঽতো
নিবর্তন্তেঽপহতপাপ্মা হ্যেষ ব্রহ্মলোকঃ || ৮. ৪. ১||

তস্মাদ্বা এতঁ সেতুং তীর্ত্বান্ধঃ সন্ননন্ধো ভবতি
বিদ্ধঃ সন্নবিদ্ধো ভবত্যুপতাপী সন্ননুপতাপী ভবতি
তস্মাদ্বা এতঁ সেতুং তীর্ত্বাপি নক্তমহরেবাভিনিষ্পদ্যতে
সকৃদ্বিভাতো হ্যেবৈষ ব্রহ্মলোকঃ || ৮. ৪. ২||

তদ্য এবৈতং ব্রহ্মলোকং ব্রহ্মচর্যেণানুবিন্দন্তি
তেষামেবৈষ ব্রহ্মলোকস্তেষাঁ সর্বেষু লোকেষু কামচারো
ভবতি || ৮. ৪. ৩||

|| ইতি চতুর্থঃ খণ্ডঃ ||

|| পঞ্চমঃ খণ্ডঃ ||

অথ যদ্যজ্ঞ ইত্যাচক্ষতে ব্রহ্মচর্যমেব তদ্ব্রহ্মচর্যেণ
হ্যেব যো জ্ঞাতা তং বিন্দতেঽথ যদিষ্টমিত্যাচক্ষতে
ব্রহ্মচর্যমেব তদ্ব্রহ্মচর্যেণ হ্যেবেষ্ট্বাত্মানমনুবিন্দতে
|| ৮. ৫. ১||

অথ যত্সত্ত্রাযণমিত্যাচক্ষতে ব্রহ্মচর্যমেব তদ্ব্রহ্মচর্যেণ
হ্যেব সত আত্মনস্ত্রাণং বিন্দতেঽথ যন্মৌনমিত্যাচক্ষতে
ব্রহ্মচর্যমেব তব্ব্রহ্মচর্যেণ হ্যেবাত্মানমনুবিদ্য মনুতে ‘ || ৮. ৫. ২||

অথ যদনাশকাযনমিত্যাচক্ষতে ব্রহ্মচর্যমেব তদেষ
হ্যাত্মা ন নশ্যতি যং ব্রহ্মচর্যেণানুবিন্দতেঽথ
যদরণ্যাযনমিত্যাচক্ষতে ব্রহ্মচর্যমেব তদরশ্চ হ বৈ
ণ্যশ্চার্ণবৌ ব্রহ্মলোকে তৃতীযস্যামিতো দিবি তদৈরং
মদীযঁ সরস্তদশ্বত্থঃ সোমসবনস্তদপরাজিতা
পূর্ব্রহ্মণঃ প্রভুবিমিতঁ হিরণ্মযম্ || ৮. ৫. ৩||

তদ্য এবৈতবরং চ ণ্যং চার্ণবৌ ব্রহ্মলোকে
ব্রহ্মচর্যেণানুবিন্দন্তি তেষামেবৈষ ব্রহ্মলোকস্তেষাঁ
সর্বেষু লোকেষু কামচারো ভবতি || ৮. ৫. ৪||

|| ইতি পঞ্চমঃ খণ্ডঃ ||

|| ষষ্ঠঃ খণ্ডঃ ||

অথ যা এতা হৃদযস্য নাড্যস্তাঃ পিঙ্গলস্যাণিম্নস্তিষ্ঠন্তি
শুক্লস্য নীলস্য পীতস্য লোহিতস্যেত্যসৌ বা আদিত্যঃ
পিঙ্গল এষ শুক্ল এষ নীল এষ পীত এষ লোহিতঃ
|| ৮. ৬. ১||

তদ্যথা মহাপথ আতত উভৌ গ্রামৌ গচ্ছতীমং চামুং
চৈবমেবৈতা আদিত্যস্য রশ্ময উভৌ লোকৌ গচ্ছন্তীমং চামুং
চামুষ্মাদাদিত্যাত্প্রতাযন্তে তা আসু নাডীষু সৃপ্তা
আভ্যো নাডীভ্যঃ প্রতাযন্তে তেঽমুষ্মিন্নাদিত্যে সৃপ্তাঃ
|| ৮. ৬. ২||

তদ্যত্রৈতত্সুপ্তঃ সমস্তঃ সংপ্রসন্নঃ স্বপ্নং ন বিজানাত্যাসু
তদা নাডীষু সৃপ্তো ভবতি তং ন কশ্চন পাপ্মা স্পৃশতি
তেজসা হি তদা সংপন্নো ভবতি || ৮. ৬. ৩||

অথ যত্রৈতদবলিমানং নীতো ভবতি তমভিত আসীনা
আহুর্জানাসি মাং জানাসি মামিতি স
যাবদস্মাচ্ছরীরাদনুত্ক্রান্তো ভবতি তাবজ্জানাতি
|| ৮. ৬. ৪||

অথ যত্রৈতদস্মাচ্ছরীরাদুত্ক্রামত্যথৈতৈরেব
রশ্মিভিরূর্ধ্বমাক্রমতে স ওমিতি বা হোদ্বা মীযতে
স যাবত্ক্ষিপ্যেন্মনস্তাবদাদিত্যং গচ্ছত্যেতদ্বৈ খলু
লোকদ্বারং বিদুষাং প্রপদনং নিরোধোঽবিদুষাম্ || ৮. ৬. ৫||

তদেষ শ্লোকঃ | শতং চৈকা চ হৃদযস্য নাড্যস্তাসাং
মূর্ধানমভিনিঃসৃতৈকা |  তযোর্ধ্বমাযন্নমৃতত্বমেতি
বিষ্বঙ্ঙন্যা উত্ক্রমণে ভবন্ত্যুত্ক্রমণে ভবন্তি || ৮. ৬. ৬||

|| ইতি ষষ্ঠঃ খণ্ডঃ ||

|| সপ্তমঃ খণ্ডঃ ||

য আত্মাপহতপাপ্মা বিজরো বিমৃত্যুর্বিশোকো
বিজিঘত্সোঽপিপাসঃ সত্যকামঃ সত্যসংকল্পঃ সোঽন্বেষ্টব্যঃ
স বিজিজ্ঞাসিতব্যঃ স সর্বাঁশ্চ লোকানাপ্নোতি
সর্বাঁশ্চ কামান্যস্তমাত্মানমনুবিদ্য বিজানাতীতি হ
প্রজাপতিরুবাচ || ৮. ৭. ১||

তদ্ধোভযে দেবাসুরা অনুবুবুধিরে তে হোচুর্হন্ত
তমাত্মানমন্বেচ্ছামো যমাত্মানমন্বিষ্য সর্বাঁশ্চ
লোকানাপ্নোতি সর্বাঁশ্চ কামানিতীন্দ্রো হৈব
দেবানামভিপ্রবব্রাজ বিরোচনোঽসুরাণাং তৌ
হাসংবিদানাবেব সমিত্পাণী প্রজাপতিসকাশমাজগ্মতুঃ
|| ৮. ৭. ২||

তৌ হ দ্বাত্রিঁশতং বর্ষাণি ব্রহ্মচর্যমূষতুস্তৌ হ
প্রজাপতিরুবাচ কিমিচ্ছন্তাবাস্তমিতি তৌ হোচতুর্য
আত্মাপহতপাপ্মা বিজরো বিমৃত্যুর্বিশোকো
বিজিঘত্সোঽপিপাসঃ সত্যকামঃ সত্যসংকল্পঃ সোঽন্বেষ্টব্যঃ
স বিজিজ্ঞাসিতব্যঃ স সর্বাঁশ্চ লোকানাপ্নোতি সর্বাঁশ্চ
কামান্যস্তমাত্মানমনুবিদ্য বিজানাতীতি ভগবতো বচো
বেদযন্তে তমিচ্ছন্তাববাস্তমিতি || ৮. ৭. ৩||

তৌ হ প্রজাপতিরুবাচ য এষোঽক্ষিণি পুরুষো দৃশ্যত
এষ আত্মেতি হোবাচৈতদমৃতমভযমেতদ্ব্রহ্মেত্যথ যোঽযং
ভগবোঽপ্সু পরিখ্যাযতে যশ্চাযমাদর্শে কতম এষ
ইত্যেষ উ এবৈষু সর্বেষ্বন্তেষু পরিখ্যাযত ইতি হোবাচ
|| ৮. ৭. ৪||

|| ইতি সপ্তমঃ খণ্ডঃ ||

|| অষ্টমঃ খণ্ডঃ ||

উদশরাব আত্মানমবেক্ষ্য যদাত্মনো ন বিজানীথস্তন্মে
প্রব্রূতমিতি তৌ হোদশরাবেঽবেক্ষাংচক্রাতে তৌ হ
প্রজাপতিরুবাচ কিং পশ্যথ ইতি তৌ হোচতুঃ
সর্বমেবেদমাবাং ভগব আত্মানং পশ্যাব আ লোমভ্যঃ আ
নখেভ্যঃ প্রতিরূপমিতি || ৮. ৮. ১||

তৌ হ প্রজাপতিরুবাচ সাধ্বলংকৃতৌ সুবসনৌ পরিষ্কৃতৌ
ভূত্বোদশরাবেঽবেক্ষেথামিতি তৌ হ সাধ্বলংকৃতৌ
সুবসনৌ পরিষ্কৃতৌ ভূত্বোদশরাবেঽবেক্ষাংচক্রাতে
তৌ হ প্রজাপতিরুবাচ কিং পশ্যথ ইতি || ৮. ৮. ২||

তৌ হোচতুর্যথৈবেদমাবাং ভগবঃ সাধ্বলংকৃতৌ সুবসনৌ
পরিষ্কৃতৌ স্ব এবমেবেমৌ ভগবঃ সাধ্বলংকৃতৌ সুবসনৌ
পরিষ্কৃতাবিত্যেষ আত্মেতি হোবাচৈতদমৃতমভযমেতদ্ব্রহ্মেতি
তৌ হ শান্তহৃদযৌ প্রবব্রজতুঃ || ৮. ৮. ৩||

তৌ হান্বীক্ষ্য প্রজাপতিরুবাচানুপলভ্যাত্মানমননুবিদ্য
ব্রজতো যতর এতদুপনিষদো ভবিষ্যন্তি দেবা বাসুরা বা তে
পরাভবিষ্যন্তীতি স হ শান্তহৃদয এব
বিরোচনোঽসুরাঞ্জগাম তেভ্যো হৈতামুপনিষদং
প্রোবাচাত্মৈবেহ মহয্য আত্মা পরিচর্য আত্মানমেবেহ
মহযন্নাত্মানং পরিচরন্নুভৌ লোকাববাপ্নোতীমং চামুং চেতি
|| ৮. ৮. ৪||

তস্মাদপ্যদ্যেহাদদানমশ্রদ্দধানমযজমানমাহুরাসুরো
বতেত্যসুরাণাঁ হ্যেষোপনিষত্প্রেতস্য শরীরং ভিক্ষযা
বসনেনালংকারেণেতি সঁস্কুর্বন্ত্যেতেন হ্যমুং লোকং
জেষ্যন্তো মন্যন্তে || ৮. ৮. ৫||

|| ইতি অষ্টমঃ খণ্ডঃ ||

|| নবমঃ খণ্ডঃ ||

অথ হেন্দ্রোঽপ্রাপ্যৈব দেবানেতদ্ভযং দদর্শ যথৈব
খল্বযমস্মিঞ্ছরীরে সাধ্বলংকৃতে সাধ্বলংকৃতো ভবতি
সুবসনে সুবসনঃ পরিষ্কৃতে পরিষ্কৃত
এবমেবাযমস্মিন্নন্ধেঽন্ধো ভবতি স্রামে স্রামঃ পরিবৃক্ণে
পরিবৃক্ণোঽস্যৈব শরীরস্য নাশমন্বেষ নশ্যতি
নাহমত্র ভোগ্যং পশ্যামীতি || ৮. ৯. ১||

স সমিত্পাণিঃ পুনরেযায তঁ হ প্রজাপতিরুবাচ
মঘবন্যচ্ছান্তহৃদযঃ প্রাব্রাজীঃ সার্ধং বিরোচনেন
কিমিচ্ছন্পুনরাগম ইতি স হোবাচ যথৈব খল্বযং
ভগবোঽস্মিঞ্ছরীরে সাধ্বলংকৃতে সাধ্বলংকৃতো ভবতি
সুবসনে সুবসনঃ পরিষ্কৃতে পরিষ্কৃত
এবমেবাযমস্মিন্নন্ধেঽন্ধো ভবতি স্রামে স্রামঃ
পরিবৃক্ণে পরিবৃক্ণোঽস্যৈব শরীরস্য নাশমন্বেষ
নশ্যতি নাহমত্র ভোগ্যং পশ্যামীতি  || ৮. ৯. ২||

এবমেবৈষ মঘবন্নিতি হোবাচৈতং ত্বেব তে
ভূযোঽনুব্যাখ্যাস্যামি বসাপরাণি দ্বাত্রিঁশতং বর্ষাণীতি
স হাপরাণি দ্বাত্রিঁশতং বর্ষাণ্যুবাস তস্মৈ হোবাচ
|| ৮. ৯. ৩||

|| ইতি নবমঃ খণ্ডঃ ||

|| দশমঃ খণ্ডঃ ||

য এষ স্বপ্নে মহীযমানশ্চরত্যেষ আত্মেতি
হোবাচৈতদমৃতমভযমেতদ্ব্রহ্মেতি স হ শান্তহৃদযঃ
প্রবব্রাজ স হাপ্রাপ্যৈব দেবানেতদ্ভযং দদর্শ
তদ্যদ্যপীদঁ শরীরমন্ধং ভবত্যনন্ধঃ স ভবতি যদি
স্রামমস্রামো নৈবৈষোঽস্য দোষেণ দুষ্যতি || ৮. ১০. ১||

ন বধেনাস্য হন্যতে নাস্য স্রাম্যেণ স্রামো ঘ্নন্তি ত্বেবৈনং
বিচ্ছাদযন্তীবাপ্রিযবেত্তেব ভবত্যপি রোদিতীব নাহমত্র
ভোগ্যং পশ্যামীতি || ৮. ১০. ২||

স সমিত্পাণিঃ পুনরেযায তঁ হ প্রজাপতিরুবাচ
মঘবন্যচ্ছান্তহৃদযঃ প্রাব্রাজীঃ কিমিচ্ছন্পুনরাগম
ইতি স হোবাচ তদ্যদ্যপীদং ভগবঃ শরীরমন্ধং ভবত্যনন্ধঃ
স ভবতি যদি স্রামমস্রামো নৈবৈষোঽস্য দোষেণ দুষ্যতি
|| ৮. ১০. ৩||

ন বধেনাস্য হন্যতে নাস্য স্রাম্যেণ স্রামো ঘ্নন্তি ত্বেবৈনং
বিচ্ছাদযন্তীবাপ্রিযবেত্তেব ভবত্যপি রোদিতীব নাহমত্র
ভোগ্যং পশ্যামীত্যেবমেবৈষ মঘবন্নিতি হোবাচৈতং ত্বেব তে
ভূযোঽনুব্যাখ্যাস্যামি বসাপরাণি দ্বাত্রিঁশতং বর্ষাণীতি
স হাপরাণি দ্বাত্রিঁশতং বর্ষাণ্যুবাস তস্মৈ হোবাচ
|| ৮. ১০. ৪||

|| ইতি দশমঃ খণ্ডঃ ||

|| একাদশঃ খণ্ডঃ ||

তদ্যত্রৈতত্সুপ্তঃ সমস্তঃ সংপ্রসন্নঃ স্বপ্নং ন বিজানাত্যেষ
আত্মেতি হোবাচৈতদমৃতমভযমেতদ্ব্রহ্মেতি স হ শান্তহৃদযঃ
প্রবব্রাজ স হাপ্রাপ্যৈব দেবানেতদ্ভযং দদর্শ নাহ
খল্বযমেবঁ সংপ্রত্যাত্মানং জানাত্যযমহমস্মীতি
নো এবেমানি ভূতানি বিনাশমেবাপীতো ভবতি নাহমত্র
ভোগ্যং পশ্যামীতি || ৮. ১১. ১||

স সমিত্পাণিঃ পুনরেযায তঁ হ প্রজাপতিরুবাচ
মঘবন্যচ্ছান্তহৃদযঃ প্রাব্রাজীঃ কিমিচ্ছন্পুনরাগম ইতি
স হোবাচ নাহ খল্বযং ভগব এবঁ সংপ্রত্যাত্মানং
জানাত্যযমহমস্মীতি নো এবেমানি ভূতানি
বিনাশমেবাপীতো ভবতি নাহমত্র ভোগ্যং পশ্যামীতি
|| ৮. ১১. ২||

এবমেবৈষ মঘবন্নিতি হোবাচৈতং ত্বেব তে
ভূযোঽনুব্যাখ্যাস্যামি নো এবান্যত্রৈতস্মাদ্বসাপরাণি
পঞ্চ বর্ষাণীতি স হাপরাণি পঞ্চ বর্ষাণ্যুবাস
তান্যেকশতঁ সংপেদুরেতত্তদ্যদাহুরেকশতঁ হ বৈ বর্ষাণি
মঘবান্প্রজাপতৌ ব্রহ্মচর্যমুবাস তস্মৈ হোবাচ || ৮. ১১. ৩||

|| ইতি একাদশঃ খণ্ডঃ ||

|| দ্বাদশঃ খণ্ডঃ ||

মঘবন্মর্ত্যং বা ইদঁ শরীরমাত্তং মৃত্যুনা
তদস্যামৃতস্যাশরীরস্যাত্মনোঽধিষ্ঠানমাত্তো বৈ
সশরীরঃ প্রিযাপ্রিযাভ্যাং ন বৈ সশরীরস্য সতঃ
প্রিযাপ্রিযযোরপহতিরস্ত্যশরীরং বাব সন্তং ন
প্রিযাপ্রিযে স্পৃশতঃ || ৮. ১২. ১||

অশরীরো বাযুরভ্রং বিদ্যুত্স্তনযিত্নুরশরীরাণ্যেতানি
তদ্যথৈতান্যমুষ্মাদাকাশাত্সমুত্থায পরং জ্যোতিরুপসংপদ্য
স্বেন রূপেণাভিনিষ্পদ্যন্তে || ৮. ১২. ২|||

এবমেবৈষ সংপ্রসাদোঽস্মাচ্ছরীরাত্সমুত্থায পরং
জ্যোতিরুপসংপদ্য স্বেন রূপেণাভিনিষ্পদ্যতে স উত্তমপুরুষঃ
স তত্র পর্যেতি জক্ষত্ক্রীডন্রমমাণঃ স্ত্রীভির্বা যানৈর্বা
জ্ঞাতিভির্বা নোপজনঁ স্মরন্নিদঁ শরীরঁ স যথা
প্রযোগ্য আচরণে যুক্ত এবমেবাযমস্মিঞ্ছরীরে
প্রাণো যুক্তঃ || ৮. ১২. ৩||

অথ যত্রৈতদাকাশমনুবিষণ্ণং চক্ষুঃ স চাক্ষুষঃ
পুরুষো দর্শনায চক্ষুরথ যো বেদেদং জিঘ্রাণীতি স আত্মা
গন্ধায ঘ্রাণমথ যো বেদেদমভিব্যাহরাণীতি স
আত্মাভিব্যাহারায বাগথ যো বেদেদঁ শৃণবানীতি
স আত্মা শ্রবণায শ্রোত্রম্ || ৮. ১২. ৪||

অথ যো বেদেদং মন্বানীতি সাত্মা মনোঽস্য দৈবং চক্ষুঃ
স বা এষ এতেন দৈবেন চক্ষুষা মনসৈতান্কামান্পশ্যন্রমতে
য এতে ব্রহ্মলোকে || ৮. ১২. ৫||

তং বা এতং দেবা আত্মানমুপাসতে তস্মাত্তেষাঁ সর্বে চ
লোকা আত্তাঃ সর্বে চ কামাঃ স সর্বাঁশ্চ লোকানাপ্নোতি
সর্বাঁশ্চ কামান্যস্তমাত্মানমনুবিদ্য বিজানাতীতি হ
প্র্জাপতিরুবাচ প্রজাপতিরুবাচ || ৮. ১২. ৬||

|| ইতি দ্বাদশঃ খণ্ডঃ ||

|| ত্রযোদশঃ খণ্ডঃ ||

শ্যামাচ্ছবলং প্রপদ্যে শবলাচ্ছ্যামং প্রপদ্যেঽশ্ব
ইব রোমাণি বিধূয পাপং চন্দ্র ইব রাহোর্মুখাত্প্রমুচ্য
ধূত্বা শরীরমকৃতং কৃতাত্মা
ব্রহ্মলোকমভিসংভবামীত্যভিসংভবামীতি || ৮. ১৩. ১||

|| ইতি ত্রযোদশঃ খণ্ডঃ ||

|| চতুর্দশঃ খণ্ডঃ ||

আকাশো বৈ নাম নামরূপযোর্নির্বহিতা তে যদন্তরা
তদ্ব্রহ্ম তদমৃতঁ স আত্মা প্রজাপতেঃ সভাং বেশ্ম প্রপদ্যে
যশোঽহং ভবামি ব্রাহ্মণানাং যশো রাজ্ঞাং যশোবিশাং
যশোঽহমনুপ্রাপত্সি স হাহং যশসাং যশঃ
শ্যেতমদত্কমদত্কঁ শ্যেতং লিন্দু মাভিগাং লিন্দু
মাভিগাম্ || ৮. ১৪. ১||

|| ইতি চতুর্দশঃ খণ্ডঃ ||

|| পঞ্চদশঃ খণ্ডঃ ||

তধৈতদ্ব্রহ্মা প্রজাপতযৈ উবাচ প্রজাপতির্মনবে মনুঃ
প্রজাভ্যঃ আচার্যকুলাদ্বেদমধীত্য যথাবিধানং গুরোঃ
কর্মাতিশেষেণাভিসমাবৃত্য কুটুম্বে শুচৌ দেশে
স্বাধ্যাযমধীযানো ধর্মিকান্বিদধদাত্মনি সর্বৈন্দ্রিযাণি
সংপ্রতিষ্ঠাপ্যাহিঁসন্সর্ব ভূতান্যন্যত্র তীর্থেভ্যঃ
স খল্বেবং বর্তযন্যাবদাযুষং ব্রহ্মলোকমভিসংপদ্যতে
ন চ পুনরাবর্ততে ন চ পুনরাবর্ততে || ৮. ১৫. ১||

|| ইতি পঞ্চদশঃ খণ্ডঃ ||

 || ইতি অষ্টমোঽধ্যাযঃ ||
——————————————————————————–

ॐ  আপ্যাযন্তু মমাঙ্গানি বাক্প্রাণশ্চ্ক্ষুঃ
শ্রোত্রমথো বলমিন্দ্রিযাণি চ সর্বাণি |
সর্বং ব্রহ্মৌপনিষদং মাহং ব্রহ্ম নিরাকুর্যাং মা মা ব্রহ্ম
নিরাকরোদনিকারণমস্ত্বনিকারণং মেঽস্তু |
তদাত্মনি নিরতে য উপনিষত্সু ধর্মাস্তে
মযি সন্তু তে মযি সন্তু ||

|| ॐ শান্তিঃ শান্তিঃ শান্তিঃ ||

|| ইতি ছান্দোগ্যোঽপনিষদ্ ||