গোপালতাপিনি

.. গোপালতাপিন্যুপনিষত্ ..

শ্রীমত্পঞ্চপদাগারং সবিশেষতযোজ্জ্বলম্ .
প্রতিযোগিবিনির্মুক্তং নির্বিশেষং হরিং ভজে ..
ॐ ভদ্রং কর্ণেভিঃ শৃণুযাম দেবাঃ .. ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ .. ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .. স্বস্তি নঃ পূষা বিশ্ববেদাঃ ..
স্বস্তি নস্তার্ক্ষ্যো অরিষ্টনেমিঃ .. স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
গোপালতাপনং কৃষ্ণং যাজ্ঞবল্ক্যং বরাহকম্ .
শাট্যাযনী হযগ্রীবং দত্তাত্রেযং চ গারুডম্ ..
হরিঃ ॐ সচ্চিদানন্দরূপয কৃষ্ণাযাক্লিষ্টকর্মণে .
নমো বেদান্তবেদ্যায গুরবে বুদ্ধিসাক্ষিণে ..
মুনযো হ বৈ ব্রাহ্মণমূচুঃ . কঃ পরমো দেবঃ কুতো মৃত্যুর্বিভেতি .
কস্য বিজ্ঞানেনাখিলং বিজ্ঞাতং ভবতি . কেনেদং বিশ্বং সংসরতীতি .
তদুহোবাচ ব্রাহ্মণঃ . কৃষ্ণো বৈ পরমং দৈবতম্ .
গোবিন্দান্মৃত্যুর্বিভেতি . গোপীজনবল্লভজ্ঞানেনৈতদ্বিজ্ঞাতং ভবতি .
স্বাহেদং বিশ্বং সংসরতীতি . তদুহোচুঃ . কঃ কৃষ্ণঃ . গোবিন্দশ্চ
কোঽসাবিতি . গোপীজনবল্লভশ্চ কঃ . কা স্বাহেতি . তানুবাচ ব্রাহ্মণঃ .
পাপকর্ষণো গোভূমিবেদবেদিতো গোপীজনবিদ্যাকলাপপ্রেরকঃ .
তন্মাযা চেতি সকলং পরং ব্রহ্মৈব তত্ . যো ধ্যাযতি রসতি ভজতি
সোঽমৃতো ভবতীতি . তে হোচুঃ . কিং তদ্রূপং কিং রসনং কিমাহো
তদ্ভজনং তত্সর্বং বিবিদিষতামাখ্যাহীতি . তদুহোবাচ হৈরণ্যো
গোপবেষমভ্রামং কল্পদ্রুমাশ্রিতম্ . তদিহ শ্লোকা ভবন্তি ..
সত্পুণ্ডরীকনযনং মেঘাভং বৈদ্যুতাম্বরম্ .
দ্বিভুজং জ্ঞানমুদ্রাঢ্যং বনমালিনমীশ্বরম্ .. ১..
গোপগোপীগবাবীতং সুরদ্রুমতলাশ্রিতম্ .
দিব্যালংকরণোপেতং রত্নপঙ্কজমধ্যগম্ .. ২..
কালিন্দীজলকল্লোলসঙ্গিমারুতসেবিতম্ .
চিন্তযঞ্চেতসা কৃষ্ণং মুক্তো ভবতি সংসৃতেঃ .. ৩.. ইতি..
তস্য পুনা রসনমিতিজলভূমিং তু সংপাতাঃ . কামাদি কৃষ্ণাযেত্যেকং
পদম্ . গোবিন্দাযেতি দ্বিতীযম্ . গোপীজনেতি তৃতীযম্ . বল্লভেতি তুরীযম্ .
স্বাহেতি পঞ্চমমিতি পঞ্চপদং জপন্পঞ্চাঙ্গং দ্যাবাভূমী
সূর্যাচন্দ্রমসৌ তদ্রূপতযা ব্রহ্ম সংপদ্যত ইতি . তদেষ শ্লোকঃ
ক্লীমিত্যেতদাদাবাদায কৃষ্ণায গোবিন্দায গোপীজনবল্লভাযেতি
বৃহন্মানব্যাসকৃদুচ্চরেদ্যোঽসৌ গতিস্তস্যাস্তি মঙ্ক্ষু নান্যা
গতিঃ স্যাদিতি . ভক্তিরস্য ভজনম্ . এতদিহামুত্রোপাধিনৈরাশ্যে-
নামুষ্মিন্মনঃকল্পনম্ . এতদেব চ নৈষ্কর্ম্যম্ .
কৃষ্ণং তং বিপ্রা বহুধা যজন্তি
     গোবিন্দং সন্তং বহুধা আরাধযন্তি .
গোপীজনবল্লভো ভুবনানি দধ্রে
     স্বাহাশ্রিতো জগদেতত্সুরেতাঃ .. ১..
বাযুর্যথৈকো ভুবনং প্রবিষ্টো
     জন্যেজন্যে পঞ্চরূপো বভূব .
কৃষ্ণস্তদেকোঽপি জগদ্ধিতার্থং
     শব্দেনাসৌ পঞ্চপদো বিভাতি .. ২.. ইতি..
তে হোচুরুপাসনমেতস্য পরমাত্মনো গোবিন্দস্যাখিলাধারিণো
ব্রূহীতি . তানুবাচ যত্তস্য পীঠং হৈরণ্যাষ্টপলাশমম্বুজং
তদন্তরাধিকানলাস্ত্রযুগং তদন্তরালাদ্যর্ণাখিলবীজং কৃষ্ণায
নম ইতি বীজাঢ্যং সব্রহ্মা ব্রাহ্মণমাদাযানঙ্গগাযত্রীং
যথাবদালিখ্য ভূমণ্ডলং শূলবেষ্টিতং কৃত্বাঙ্গবাসুদেবাদি-
রুক্মিণ্যাদিস্বশক্তিং নন্দাদিবসুদেবাদিপার্থাদিনিধ্যাদিবীতং
যজেত্সন্ধ্যাসু প্রতিপত্তিভিরুপচারৈঃ . তেনাস্যাখিলং ভবত্যখিলং
ভবতীতি .. ২.. তদিহ শ্লোকা ভবন্তি .
একো বশী সর্বগঃ কৃষ্ণ ঈড্য
     একোঽপি সন্বহুধা যো বিভাতি .
তং পীঠং যেঽনুভজন্তি ধীরা-
     স্তেষাং সিদ্ধিঃ শাশ্বতী নেতরেষাম্ .. ৩..
নিত্যো নিত্যানাং চেতনশ্চেতনানা-
     মেকো বহূনাং যো বিদধাতি কামান্ .
তং পীঠগং যেঽনুভজন্তি ধীরা-
     স্তেষাং সুখং শাশ্বতং নেতরেষাম্ .. ৪..
এতদ্বিষ্ণোঃ পরমং পদং যে
     নিত্যোদ্যুক্তাস্তং যজন্তি ন কামাত্ .
তেষামসৌ গোপরূপঃপ্রযত্না-
     ত্প্রকাশযেদাত্মপদং তদেব .. ৫..
যো ব্রহ্মাণং বিদধাতি পূর্বং
     যো বিদ্যাং তস্মৈ গোপযতি স্ম কৃষ্ণঃ .
তং হ দেবমাত্মবুদ্ধিপ্রকাশং
     মুমুক্ষুঃ শরণং ব্রজেত্ .. ৬..
ওঙ্কারেণান্তরিতং যে জপন্তি
     গোবিন্দস্য পঞ্চপদং মনুম্ .
তেষামসৌ দর্শযেদাত্মরূপং
     তস্মান্মুমুক্ষুরভ্যসেন্নিত্যশান্তিঃ .. ৭..
এতস্মা এব পঞ্চপদাদভূব-
     ন্গোবিন্দস্য মনবো মানবানাম্ .
দশার্ণাদ্যাস্তেঽপি সংক্রন্দনাদ্যৈ-
     রভ্যস্যন্তে ভূতিকামৈর্যথাবত্ .. ৮..
পপ্রচ্ছুস্তদুহোবাচ ব্রহ্মসদনং চরতো মে ধ্যাতঃ
স্তুতঃ পরমেশ্বরঃ পরার্ধান্তে সোঽবুধ্যত . কোপদেষ্টা
মে পুরুষঃ পুরস্তাদাবির্বভূব . ততঃ প্রণতো মাযানুকূলেন
হৃদা মহ্যমষ্টাদশার্ণস্বরূপং সৃষ্টযে দত্ত্বান্তর্হিতঃ .
পুনস্তে সিসৃক্ষতো মে প্রাদুরভূবন্ .
তেষ্বক্ষরেষু বিভজ্য ভবিষ্যজ্জগদ্রূপং প্রাকাশযম্ .
তদিহ কাদাকালাত্পৃথিবীতোঽগ্নির্বিন্দোরিন্দুস্তত্সংপাতাত্তদর্ক ইতি .
ক্লীংকারাদজস্রং কৃষ্ণাদাকাশং খাদ্বাযুরুত্তরাত্সুরভিবিদ্যাঃ
প্রাদুরকার্ষমকার্ষমিতি . তদুত্তরাত্স্ত্রীপুংসাদিভেদং
সকলমিদং সকলমিদমিতি .. ৩..
এতস্যৈব যজনেন চন্দ্রধ্বজো গতমোহমাত্মানং বেদযতি .
ওঙ্কারালিকং মনুমাবর্তযেত্ . সঙ্গরহিতোভ্যানযত্ . তদ্বিষ্ণোঃ
পরমং পদং সদা পশ্যন্তি সূরযঃ . দিবীব চক্ষুরাততম্ .
তস্মাদেনং নিত্যমাবর্তবেন্নিত্যমাবর্তযেদিতি . ..৪..
তদাহুরেকে যস্য প্রথমপদাদ্ভূমির্দ্বিতীযপদাজ্জলং
তৃতীযপদাত্তেজশ্চতুর্থপদাদ্বাযুশ্চরমপদাদ্ব্যোমেতি .
বৈষ্ণবং পঞ্চব্যাহৃতিমথং মন্ত্রং কৃষ্ণাবভাসকং
কৈবল্যস্য সৃত্যৈ সততমাবর্তযেত্সততমাবর্তযেদিতি .. ৫..
তদত্র গাথাঃ
যস্য চাদ্যপদাদ্ভূমির্দ্বিতীযাত্সলিলোদ্ভবঃ .
তৃতীযাত্তেজ উদ্ভূতং চতুর্থাদ্গন্ধবাহনঃ .. ১..
পঞ্চমাদম্বরোত্পত্তিস্তমেবৈকং সমভ্যসেত্ .
চন্দ্রধ্বজোঽগমদ্বিষ্ণোঃ পরমং পদমব্যযম্ .. ২..
ততো বিশুদ্ধং বিমলং বিশোক-
     মশেষলোভাদিনিরস্তসঙ্গম্ .
যত্তত্পদং পঞ্চপদং তদেব
     স বাসুদেবো ন যতোঽন্যদস্তি .. ৩..
তমেকং গোবিন্দং সচ্চিদানন্দবিগ্রহং পঞ্চপদং
বৃন্দাবনসুরভূরুহতলাসীনং সততং মরুদ্গণোঽহং
পরমযা স্তুত্যা স্তোষ্যামি ..
ॐ নমো বিশ্বস্বরূপায বিশ্বস্থিত্যন্তহেতবে .
বিশ্বেশ্বরায বিশ্বায গোবিন্দায নমোনমঃ .. ১..
নমো বিজ্ঞানরূপায পরমানন্দরূপিণে .
কৃষ্ণায গোপীনাথায গোবিন্দায নমোনমঃ .. ২..
নমঃ কমলনেত্রায নমঃ কমলমালিনে .
নমঃ কমলনাভায কমলাপতযে নমঃ .. ৩..
বর্হাপীডাভিরামায রামাযাকুণ্ঠমেধসে .
রমামানসহংসায গোবিন্দায নমোনমঃ .. ৪..
কংসবংশবিনাশায কেশিচাণূরঘাতিনে .
বৃষভধ্বজবন্দ্যায পার্থসারথযে নমঃ .. ৫..
বেণুনাদবিনোদায গোপালাযাহিমর্দিনে .
কালিন্দীকূললোলায লোলকুণ্ডলধারিণে .. ৬..
পল্লবীবদনাম্ভোজমালিনে নৃত্তশালিনে .
নমঃ প্রণতপালায শ্রীকৃষ্ণায নমোনমঃ .. ৭..
নমঃ পাপপ্রণাশায গোবর্ধনধরায চ .
পূতনাজীবিতান্তায তৃণাবর্তাসুহারিণে .. ৮..
নিষ্কলায বিমোহায শুদ্ধাযাশুদ্ধবৈরিণে .
অদ্বিতীযায মহতে শ্রীকৃষ্ণায নমোননমঃ .. ৯..
প্রসীদ পরমানন্দ প্রসীদ পরমেশ্বর .
আধিব্যাধিভুজঙ্গেন দষ্টং মামুদ্ধর প্রভো .. ১০..
শ্রীকৃষ্ণ রুক্মিণীকান্ত গোপীজনমনোহর .
সংসারসাগরে মগ্নং মামুদ্ধর জগদ্গুরো .. ১১..
কেশব ক্লেশহরণ নারাযণ জনার্দন .
গোবিন্দ পরমানন্দ মাং সমুদ্ধর মাধব .. ১২..
অথৈবং স্তুতিভিরারাধযামি . তথা যূযং পঞ্চপদং জপন্তঃ
শ্রীকৃষ্ণং ধ্যাযন্তঃ সংসৃতিং তরিষ্যথেতি হোবাচ
হৈরণ্যগর্ভঃ . অমুং পঞ্চপদং মনুমার্তযেযেদ্যঃ স
যাত্যনাযাসতঃ কেবলং তত্পদং তত্ . অনেজদেকং মনসো জবীযো
নৈনদ্দেবা আপ্নুবন্পূর্বমর্ষদিতি . তস্মাত্কৃষ্ণ এব পরমং
দেবস্তং ধ্যাযেত্ . তং রসযেত্ . তং যজেত্ . তং ভজেত্ .
ॐ তত্সদিত্যুপনিষত্ ..
ॐ ভদ্রং কর্ণেভিঃ শৃণুযাম দেবাঃ .. ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ .. ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .. স্বস্তি নঃ পূষা বিশ্ববেদাঃ ..
স্বস্তি নস্তার্ক্ষ্যো অরিষ্টনেমিঃ .. স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
ইতি গোপালপূর্বতাপিন্যুপনিষত্সমাপ্তা ..
ॐ একদা হি ব্রজস্ত্রিযঃ সকামাঃ শর্বরীমুষিত্বা
সর্বেশ্বরং গোপালং কৃষ্ণমূচিরে . উবাচ তাঃ
কৃষ্ণ অমুকস্মৈ ব্রাহ্মণায ভৈক্ষ্যং দাতব্যমিতি
দুর্বাসস ইতি . কথং যাস্যামো জলং তীর্ত্বা যমুনাযাঃ .
যতঃ শ্রেযো ভবতি কৃষ্ণেতি ব্রহ্মচারীত্যুক্ত্বা মার্গং
বো দাস্যতি . যং মাং স্মৃত্বাঽগাধা গাধা ভবতি .
যং মাং স্মৃত্বাঽপূতঃ পূতো ভবতি . যং মাং স্মৃত্বাঽব্রতী
ব্রতী ভবতি . যং মাং স্মৃত্বা সকামো নিষ্কামো ভবতি .
যং মাং স্মৃত্বাঽশ্রোত্রিযঃ শ্রোত্রিযো ভবতি . যং মাং
স্মৃত্বাঽগাধতঃ স্পর্শরহিতাপি সর্বা সরিদ্গাধা ভবতি .
শ্রুত্বা তদ্বাক্যং হি বৈ রৌদ্রং স্মৃত্বা তদ্বাক্যেন তীর্ত্বা
তত্সৌর্যাং হি বৈ গত্বাশ্রমং পুণ্যতমং হি বৈ নত্বা মুনিং
শ্রেষ্ঠতমং হি বৈ রৌদ্রং চেতি . দত্ত্বাস্মৈ ব্রাহ্মণায
ক্ষীরমযং ঘৃতমযমিষ্টতমং হি বৈ মৃষ্টতমং
হি তুষ্টঃ স্নাত্বা ভুক্ত্বা হিত্বশিষং প্রযুজ্যান্নং জ্ঞাত্বাদাত্ .
কথং যাস্যামো তীর্ত্বা সৌর্যাম্ . স হোবাচ মুনির্দুর্বাসনং
মাং স্মৃত্বা বো দাস্যতীতি মার্গম্ . তাসাং মধ্যে হি শ্রেষ্ঠা
গান্ধর্বী হ্যুবাচ তং তং হি বৈ তামিঃ . এবং কথং কৃষ্ণো
ব্রহ্মচারী . কথং দুর্বাসনো মুনিঃ . তাং হি মুখ্যাং বিধায
পূর্বমনুকৃত্বা তূষ্ণীমাসুঃ . শব্দবানাকাশঃ শব্দাকাশাভ্যাং
ভিন্নঃ . তস্মিন্নাকাশস্তিষ্ঠতি . আকাশে তিষ্ঠতি
স হ্যাকাশস্তং ন বেদ . স হ্যাত্মা .
অহং কথং ভোক্তা ভবামি . রূপবদিদং তেজো রূপাগ্নিভ্যাং
ভিন্নম্ . তস্মিন্নগ্নিস্তিষ্ঠতি . অগ্নৌ তিষ্ঠতি অগ্নিস্তং
ন বেদ . স হ্যাত্মা . অহং কথং ভোক্তা ভবামি . রসবত্য
আপো রসাদ্ভ্যাং ভিন্নাঃ . তাস্বাপস্তিষ্ঠন্তি . অপ্সু
ভূমির্গন্ধভূমিভ্যাং ভিন্না . তস্যাং ভূমিস্তিষ্ঠতি .
ভূমৌ তিষ্ঠতি . ভূমিস্তং ন বেদ . স হ্যাত্মা . অহং কথং
ভোক্তা ভবামি . ইদং হি মনসৈবেদং মনুতে . তানিদং হি গৃহ্ণাতি .
যত্র সর্বমাত্মৈবাভূত্তত্র কুত্র বা মনুতে . কথং বা গচ্ছতীতি .
স হ্যাত্মা . অহং কথং ভোক্তা ভবামি . অযং হি কৃষ্ণো যো হি
প্রেষ্ঠঃ শরীরদ্বযকারণং ভবতি . দ্বা সুপর্ণা ভবতো
ব্রহ্মণোঽহং সংভূতস্তথেতরো ভোক্তা ভবতি . অন্যো হি সাক্ষী
ভবতীতি . বৃক্ষধর্মে তৌ তিষ্ঠতঃ . অতোও ভোক্তভোক্তারৌ . পূর্বো
হি ভোক্তা ভবতি . তথেতরোঽভোক্তা কৃষ্ণো ভবতীতি . যত্র বিদ্যাবিদ্যে
ন বিদাম . বিদ্যাবিদ্যাভ্যাং ভিন্নো বিদ্যামযো হি যঃ কথং বিষযী
ভবতীতি . যো হ বৈ কামেন কামান্কামযতে স কামী ভবতি . যো হ বৈ
ত্বকামেন কামান্কামযতে সোঽকামী ভবতি . জন্মজরাভ্যাং
ভিন্নঃ স্থাণুরযমচ্ছেদ্যোঽযং যোঽসৌ সূর্যে তিষ্ঠতি যোঽসৌ
গোষু তিষ্ঠতি . যোঽসৌ গোপান্পালযতি . যোঽসৌ সর্বেষু দেবেষু
তিষ্ঠতি . যোঽসৌ সর্বৈর্দেবৈর্গীযতে . যোঽসৌ সর্বেষু ভূতেষ্বাবিশ্য
ভূতানি বিদধাতি স বো হি স্বামী ভবতি . সা হোবাচ গান্ধর্বী .
কথং বাস্মাসু জাতো গোপালঃ কথং বা জ্ঞাতোঽসৌ ত্বযা মুনে কৃষ্ণঃ .
কো বাস্য মন্ত্রঃ কিং স্থানম্ . কথং বা দেবক্যা জাতঃ . কো বাস্য
জাযাগ্রামো ভবতি . কীদৃশী পূজাস্য গোপালস্য ভবতি . সাক্ষাত্প্রকৃতি-
পরোঽযমাত্মা গোপালঃ কথং ত্ববতীর্ণো ভূম্যাং হি বৈ
সা গান্ধর্বী মুনিমুবাচ . স হোবাচ তাং হি বৈ পূর্বং নারাযণো
যস্মিংল্লোকা ওতাশ্চ প্রোতাশ্চ তস্য হৃত্পদ্মাজাতোঽব্জযোনিস্তপস্তপস্তপ্ত্বা
তস্মৈ হ বরং দদৌ . স কামপ্রশ্নমেব বব্রে . তং হাস্মৈ দদৌ .
স হোবাচাব্জযোনিঃ যো বাবতারাণাং মধ্যে শ্রেষ্ঠোঽবতারঃ
কো ভবতি . যেন লোকাস্তুষ্টা ভবন্তি . যং স্মৃত্বা মুক্তা
অস্মাত্সংসারাদ্ভবন্তি . কথং বাস্যাবতারস্য ব্রহ্মতা ভবতি .
স হোবাচ তং হি বৈ নারাযণো দেবঃ . সকাম্যা মেরোঃ শৃঙ্গে
যথা সপ্তপুর্যো ভবন্তি তথা নিষ্কাম্যাঃ সকাম্যা
ভূগোপালচক্রে সপ্তপুর্যো ভবন্তি . তাসাং মধ্যে সাক্ষাদ্ব্রহ্ম
গোপালপুরী ভবতি . সকাম্যা নিষ্কাম্যা দেবানাং সর্বেষাং
ভূতানাং ভবতি . অথাস্য ভজনং ভবতি . যথা হি বৈ সরসি
পদ্মং তিষ্ঠতি তথা ভূম্যাং তিষ্ঠতি . চক্রেণ রক্ষিতা
মথুরা . তস্মাদ্গোপালপুরী ভবতি বৃহদ্বৃহদ্বনং মধোর্মধুবনং
তালস্তালবনং কাম্যং কাম্যবনং বহুলা বহুলবনং কুমুদঃ
কুমুদবনং খদিরঃ খদিরবনং ভদ্রো ভদ্রবনং ভাণ্ডীর ইতি
ভাণ্ডীরবনং শ্রীবনং লোহবনং বৃন্দাবনমেতৈরাবৃতা পুরী
ভবতি . তত্র তেষ্বেব গগনেশ্বেবং দেবা মনুষ্যা গন্ধর্বা নাগাঃ
কিংনরা গাযন্তি নৃত্যন্তীতি . তত্র দ্বাদশাদিত্যা একাদশ রুদ্রা
অষ্টৌ বসবঃ সপ্ত মুনযো ব্রহ্মা নারদশ্চ পঞ্চ বিনাযকা
বীরেশ্বরো রুদ্রেশ্বরোঽম্বিকেশ্বরো গণেশ্বরো নীলকণ্ঠেশ্বরো বিশ্বেশ্বরো
গোপালেশ্বরো ভদ্রেশ্বর ইত্যষ্টাবন্যানি লিঙ্গানি চতুর্বিংশতির্ভবন্তি .
দ্বে বনে স্তঃ কৃষ্ণবনং ভদ্রবনম্ . তযোরন্তর্দ্বাদশ বনানি
পুণ্যানি পুণ্যতমানি . তেশ্বেব দেবাস্তিষ্ঠন্তি . সিদ্ধাঃ সিদ্ধিং প্রাপ্তাঃ .
তত্র হি রামস্য রামমূর্তিঃ প্রদ্যুম্নস্য প্রদ্যুম্নমূর্তিরনিরুদ্ধস্য-
অনিরুদ্ধমূর্তিঃ কৃষ্ণস্য কৃষ্ণমূর্তিঃ . বনেশ্বেবং মথুরাস্বেবং
দ্বাদশ মূর্তযো ভবন্তি . একাং হি রুদ্রা যজন্তি . দ্বিতীযাং হি ব্রহ্মা যজতি .
তৃতীযাং ব্রহ্মজা যজন্তি . চতুর্থীং মরুতো যজন্তি . পঞ্চমীং বিনাযকা
যজন্তি . ষষ্ঠীং চ বসবো যজন্তি . সপ্তমীমৃষযো যজন্তি .
নবমীমপ্সরসো যজন্তি . দশমী বৈ হ্যন্তর্ধানে তিষ্ঠতি . একাদশীতি-
স্বপদানুগা . দ্বাদশীতি ভূম্যাং তিষ্ঠতি . তাং হি যে যজন্তি তে
মৃত্যুং তরন্তি . মুক্তিং লভন্তে . গর্ভজন্মজরামরণতাপত্রযাত্মকদুঃখং
তরন্তি . তদপ্যেতে শ্লোকা ভবন্তি .
সংপ্রাপ্য মথুরা রম্যাং সদা ব্রহ্মাদিবন্দিতাম্ .
শঙ্খচক্রগদাশার্ঙ্গরক্ষিতাং মুসলাদিভিঃ .. ১..
যত্রাসৌ সংস্থিতঃ কৃষ্ণঃ স্ত্রীভিঃ শক্ত্যা সমাহিতঃ .
রমানিরুদ্ধপ্রদ্যুম্নৈ রুক্মিণ্যা সহিতো বিভুঃ .. ২..
চতুঃশব্দো ভবেদেকো হ্যোংকারশ্চ উদাহৃতঃ . তস্মাদেব
পরো রজসেতি সোঽহমিত্যবধার্যাত্মানং গোপালোঽহমিতি ভাবযেত্ .
স মোক্ষমশ্নুতে . স ব্রহ্মত্বমধিগচ্ছতি . স ব্রহ্মবিদ্ভবতি .
স গোপাঞ্জীবানাত্মত্বেন সৃষ্টিপর্যন্তমালাতি . স গোপালো
হ্যোং ভবতি . তত্সত্সোঽহম্ . পরং ব্রহ্ম কৃষ্ণাত্মকো
নিত্যানন্দৈক্যস্বরূপঃ সোঽহম্ . তত্সদ্গোপালোঽহমেব . পরং
সত্যমবাধিতং সোঽহমিত্যত্মানমাদায মনসৈক্যং কুর্যাত্ .
আত্মানং গোপালোঽহমিতি ভাবযেত্ . স এবাব্যক্তোঽনন্তো নিত্যো গোপালঃ .
মথুরাযাং স্থিতির্ব্রহ্মন্সর্বদা মে ভবিষ্যতি .
শঙ্খচক্রগদাপদ্মবনমালাধরস্য বৈ .. ১..
বিশ্বরূপং পরংজ্যোতিঃ স্বরূপং রূপবর্জিতম্ .
মথুরামণ্ডলে যস্তু জম্বূদ্বীপে স্থিতোঽপি বা .. ২..
যোঽর্চযেত্প্রতিমাং মাং চ স মে প্রিযতরো ভুবি .
তস্যামধিষ্ঠিতঃ কৃষ্ণরূপী পূজ্যস্ত্বযা সদা .. ৩..
চতুর্ধা চাস্যাবতারভেদত্বেন যজন্তি মাম্ .
যুগানুবর্তিনো লোকা যজন্তীহ সুমেধসঃ .. ৪..
গোপালং সানুজং কৃষ্ণং রুক্মিণ্যা সহ তত্পরম্ .
গোপালোঽহমজো নিত্যঃ প্রদ্যুম্নোঽহং সনাতনঃ .. ৫..
রামোঽহমনিরুদ্ধোঽহমাত্মানং চার্চযেদ্বুধঃ .
মযোক্তেন স ধর্মেণ নিষ্কামেন বিভাগশঃ .. ৬..
তৈরহং পূজনীযো হি ভদ্রকৃষ্ণনিবাসিভিঃ .
তদ্ধর্মগতিহীনা যে তস্যাং মযি পরাযণাঃ .. ৭..
কলিনা গ্রসিতা যে বৈ তেষাং তস্যামবস্থিতিঃ .
যথা ত্বং সহ পুত্রৈস্তু যথা রুদ্রো গণৈঃ সহ .. ৮..
যথা শ্রিযাভিযুক্তোঽহং তথা ভক্তো মম প্রিযঃ .
স হোবাচাব্জযোনিশ্চতুর্ভির্দেবৈঃ কথমেকো দেবঃ স্যাত্ .
একমক্ষরং যদ্বিশ্রুতমনেকাক্ষরং কথং সংভূতম্ .
স হোবাচ হি তং পূর্বমেকমেবাদ্বিতীযং ব্রহ্মাসীত্ .
তস্মাদব্যক্তমেকাক্ষরম্ . তস্মদক্ষরান্মহত্ .
মহতোঽহঙ্কারঃ . তস্মাদহঙ্কারাত্পঞ্চ তন্মাত্রাণি .
তেভ্যো ভূতানি . তৈরাবৃতমক্ষরম্ .
অক্ষরোঽহমোংকারোঽযমজরোঽমরোঽভযোঽমৃতো ব্রহ্মাভযং হি বৈ .
স মুক্তোঽহমস্মি . অক্ষরোঽহমস্মি .
সত্তামাত্রং চিত্স্বরূপং প্রকাশং ব্যাপকং তথা .. ৯..
একমেবাদ্বযং ব্রহ্ম মাযযা চ চতুষ্টযম্ .
রোহিণীতনযো বিশ্ব অকারাক্ষরসংভবঃ .. ১০..
তৈজসাত্মকঃ প্রদ্যুম্ন উকারাক্ষরসংভবঃ .
প্রাজ্ঞাত্মকোঽনিরুদ্ধোঽসৌ মকারাক্ষরসংভবঃ .. ১১..
অর্ধমাত্রাত্মকঃ কৃষ্ণো যস্মিন্বিশ্বং প্রতিষ্ঠিতম্ .
কৃষ্ণাত্মিকা জগত্কর্ত্রী মূলপ্রকৃতী রুক্মিণী .. ১২..
ব্রজস্ত্রীজনসংভূতঃ শ্রুতিভ্যো জ্ঞানসংগতঃ .
প্রণবত্বেন প্রকৃতিত্বং বদন্তি ব্রহ্মবাদিনঃ .. ১৩..
তস্মাদোংকারসংভূতো গোপালো বিশ্বসংস্থিতঃ .
ক্লীমোংকারস্যৈকতত্বং বদন্তি ব্রহ্মবাদিনঃ .. ১৪..
মথুরাযাং বিশেষেণ মাং ধ্যাযন্মোক্ষমশ্নুতে .
অষ্টপত্রং বিকসিতং হৃত্পদ্মং তত্র সংস্থিতম্ .. ১৫..
দিব্যধ্বজাতপত্রৈস্তু চিহ্নিতং চরণদ্বযম্ .
শ্রীবত্সলাঞ্ছনং হৃত্স্থং কৌস্তুভং প্রভযা যুতম্ .. ১৬..
চতুর্ভুজং শঙ্খচক্রশার্ঙ্গপদ্মগদান্বিতম্ .
সুকেযূরান্বিতং বাহুং কণ্ঠমালসুশোভিতম্ .. ১৭..
দ্যুমত্কিরীটমভযং স্ফুরন্মকরকুণ্ডলম্ .
হিরণ্মযং সৌম্যতনুং স্বভক্তাযাভযপ্রদম্ .. ১৮..
ধ্যাযেন্মনসি মাং নিত্যং বেণুশৃঙ্গধরং তু বা .
মথ্যতে তু জগত্সর্বং ব্রহ্মজ্ঞানেন যেন বা .. ১৯..
মত্সারভূতং যদ্যত্স্যান্মথুরা সা নিগদ্যতে .
অষ্টদিক্পালকৈর্ভূমিপদ্মং বিকসিতং জগত্ .. ২০..
সংসারার্ণবসংজাতং সেবিতং মম মানসে .
চন্দ্রসূর্যত্বিষো দিব্যা ধ্বজা মেরুর্হিরণ্মযঃ .. ২১..
আতপত্রং ব্রহ্মলোকমথোর্ধ্বং চরণং স্মৃতম্ .
শ্রীবত্সস্য স্বরূপং তু বর্ততে লাঞ্ছনৈঃ সহ .. ২২..
শ্রীবত্সলক্ষণং তস্মাত্কথ্যতে ব্রহ্মবাদিভিঃ .
যেন সূর্যাগ্নিবাক্চন্দ্রতেজসা স্বস্বরূপিণা .. ২৩..
বর্ততে কৌস্তুভাখ্যমণিং বদন্তীশমানিনঃ .
সত্ত্বং রজস্তম ইতি অহংকারশ্চতুর্ভুজঃ .. ২৪..
পঞ্চভূতাত্মকং শঙ্খং করে রজসি সংস্থিতম্ .
বালস্বরূপমিত্যন্তং মনশ্চক্রং নিগদ্যতে .. ২৫..
আদ্যা মাযা ভবেচ্ছার্ঙ্গং পদ্মং বিশ্বং করে স্থিতম্ .
আদ্যা বিদ্যা গদা বেদ্যা সর্বদা মে করে স্থিতা .. ২৬..
ধর্মার্থকামকেযূরৈর্দিব্যৈর্দিব্যমযেরিতৈঃ .
কণ্ঠং তু নির্গুণং প্রোক্তং মাল্যতে আদ্যযাঽজযা .. ২৭..
মালা নিগদ্যতে ব্রহ্মংস্তব পুত্রৈস্তু মানসৈঃ .
কূটস্থং সত্ত্বরূপং চ কিরীটং প্রবদন্তি মাম্ .. ২৮..
ক্ষীরোত্তরং প্রস্ফুরন্তং কুণ্ডলং যুগলং স্মৃতম্ .
ধ্যাযেন্মম প্রিযং নিত্যং স মোক্ষমধিগচ্ছতি .. ২৯..
স মুক্তো ভবতি তস্মৈ স্বাত্মানং তু দদামি বৈ .
এতত্সর্বং মযা প্রোক্তং ভবিষ্যদ্বৈ বিধে তব .. ৩০..
স্বরূপং দ্বিবিধং চৈব সগুণং নির্গুণাত্মকম্ .. ৩১..
স হোবাচাব্জযোনিঃ . ব্যক্তীনাং মূর্তীনাং প্রোক্তানাং কথং
চাভরণানি ভবন্তি . কথং বা দেবা যজন্তি . রুদ্রা যজন্তি .
ব্রহ্মা যজতি . ব্রহ্মজা যজন্তি . বিনাযকা যজন্তি . দ্বাদশাদিত্যা
যজন্তি . বসবো যজন্তি . গন্ধর্বা যজন্তি . সপদানুগা অন্তর্ধানে
তিষ্ঠন্তি . কাং মনুষ্যা যজন্তি . সহোবাচ তং হি বৈ নারাযণো
দেব আদ্যা ব্যক্তা দ্বাদশ মূর্তযঃ সর্বেষু লোকেষু সর্বেষু
দেবেষু সর্বেষু মনুষ্যেষু তিষ্ঠন্তীতি . রুদ্রেষু রৌদ্রী
ব্রহ্মাণীষু ব্রাহ্মী দেবেষু দৈবী মনুষ্যেষু মানবী বিনাযকেষু
বিঘ্নবিনাশিনী আদিত্যেষু জ্যোতির্গন্ধর্বেষু গান্ধর্বী অপ্সরঃস্বেবং
গৌর্বসুষ্বেবং কাম্যা অন্তর্ধানেষ্বপ্রকাশিনী আবির্ভাবতিরোভাবা
স্বপদে তিষ্ঠন্তি . তামসী রাজসী সাত্ত্বিকী মানুষী বিজ্ঞানঘন
আনন্দসচ্চিদানন্দৈকরসে ভক্তিযোগে তিষ্ঠতি .
ॐ প্রাণাত্মনে ॐ তত্সদ্ভূর্ভুবঃ সুবস্তস্মৈ প্রাণাত্মনে নমোনমঃ .. ১..
ॐ শ্রীকৃষ্ণায গোবিন্দায গোপীজনবল্লভায ॐ তত্সদ্ভূর্ভুবঃ সুবস্তস্মৈ নমোনমঃ .. ২..
ॐঅপানাত্মনে ॐ তত্সদ্ভূর্ভুবঃ সুবস্তস্মৈ অপানাত্মনে নমোনমঃ .. ৩..
ॐ শ্রীকৃষ্ণাযানিরুদ্ধায ॐ তত্সদ্ভূর্ভুবঃ সুবস্তস্মৈ বৈ নমোনমঃ .. ৪..
ॐ ব্যানাত্মনে ॐ তত্সদ্ভূর্ভুবঃ সুবস্তস্মৈ ব্যানাত্মনে নমোনমঃ .. ৫..
ॐ শ্রীকৃষ্ণায রামায ॐ তত্সদ্ভূর্ভুবঃ সুবস্তস্মৈ বৈ নমোনমঃ .. ৬..
ॐউদানাত্মনে ॐ তত্সদ্ভূর্ভুবঃ সুবস্তস্মৈ উদানাত্মনে নমোনমঃ .. ৭..
ॐ শ্রীকৃষ্ণায দেবকীনন্দনায ॐ তত্সদ্ভূর্ভুবঃ সুবস্তস্মৈ বৈ নমোনমঃ .. ৮..
ॐ সমানাত্মনে ॐ তত্সদ্ভূর্ভুবঃ সুবস্তস্মৈ সমানাত্মনে নমোনমঃ .. ৯..
ॐ শ্রীগোপালায নিজস্বরূপায ॐ তত্সদ্ভূর্ভুবঃ সুবস্তস্মৈ বৈ নমোনমঃ .. ১০..
ॐ যোঽসৌ প্রধানাত্মা গোপাল ॐ তত্সদ্ভূর্ভুবঃ সুবস্তস্মৈ বৈ নমোনমঃ .. ১১..
ॐ যোঽসাবিন্দ্রিযাত্মা গোপাল ॐ তত্সদ্ভূর্ভুবঃ সুবস্তস্মৈ বৈ নমোনমঃ .. ১২..
ॐ যোঽসৌ ভূতাত্মা গোপাল ॐ তত্সদ্ভূর্ভুবঃ সুবস্তস্মৈ বৈ নমোনমঃ .. ১৩..
ॐ যোঽসাবুত্তমপুরুষো গোপাল ॐ তত্সদ্ভূর্ভুবঃ সুবস্তমৈ বৈ নমোনমঃ .. ১৪..
ॐ যোঽসৌ ব্রহ্ম পরং বৈ ব্রহ্ম ॐ তত্সদ্ভূর্ভুবঃ সুবস্তস্মৈ বৈ নমোনমঃ .. ১৫..
ॐ যোঽসৌ সর্বভূতাত্মা গোপাল ॐ তত্সদ্ভূর্ভুবঃ সুবস্তস্মৈ নমোনমঃ .. ১৬..
ॐ জাগ্রত্স্বপ্নসুষুপ্তিতুরীযতুরীযাতীতোঽন্তর্যামী গোপাল ॐ তত্সদ্ভূর্ভুবঃ সুবস্তস্মৈ বৈ নমোনমঃ .. ১৭..
একো দেবঃ সর্বভূতেষু গূঢঃ
      সর্বব্যাপী সর্বভূতান্তরাত্মা .
কর্মাধ্যক্ষঃ সর্বভূতাধিবাসঃ
     সাক্ষী চেতা কেবলো নির্গুণশ্চ .. ১৮..
রুদ্রায নমঃ . আদিত্যায নমঃ . বিনাযকায নমঃ . সূর্যায নমঃ .
বিদ্যাযৈ নমঃ . ইন্দ্রায নমঃ . অগ্নযে নমঃ . যমায নমঃ .
নিরৃতযে নমঃ . বরুণায নমঃ . বাযবে নমঃ . কুবেরায নমঃ .
ঈশানায নমঃ . সর্বেভ্যো দেবেভ্যো নমঃ .
দত্ত্বা স্তুতিং পুণ্যতমাং ব্রহ্মণে স্বস্বরূপিণে .
কর্তৃত্বং সর্বভূতানামন্তর্ধানো বভূব সঃ .. ১৯..
ব্রহ্মণে ব্রহ্মপুত্রেভ্যো নারদাত্তু শ্রুতং মুনে .
তথা প্রোক্তং তু গান্ধর্বি গচ্ছ ত্বং স্বালযান্তিকম্ .. ২০.. ইতি..
ॐ ভদ্রং কর্ণেভিঃ শৃণুযাম দেবাঃ .. ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ .. ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .. স্বস্তি নঃ পূষা বিশ্ববেদাঃ ..
স্বস্তি নস্তার্ক্ষ্যো অরিষ্টনেমিঃ .. স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি গোপালোত্তরতাপিন্যুপনিষত্সমাপ্তা ..