কৌষীতকি

.. কৌষীতকিব্রাহ্মণোপনিষত্ ..
.. কৌষীতকিব্রাহ্মণোপনিষত্ ..

শ্রীমত্কৌষীতকীবিদ্যাবেদ্যপ্রজ্ঞাপরাক্ষরম্ .
প্রতিযোগিবিনির্মুক্তব্রহ্মমাত্রং বিচিন্তযে ..
ॐ বাঙ্মে মনসি প্রতিষ্ঠিতা . মনো মে বাচি প্রতিষ্ঠিতম্ .
        আবিরাবীর্ম এধি . বেদস্য মা আণীস্থঃ . শ্রুতং মে মা
প্রহাসীঃ .
        অনেনাধীতেনাহোরাত্রান্সন্দধামি . ঋতং বদিষ্যামি
. সত্যং বদিষ্যামি .
        তন্মামবতু . তদ্বক্তারমবতু . অবতু মামবতু
বক্তারম্ ..
চিত্রো হ বৈ গার্গ্যাযণির্যক্ষমাণ আরুণিং বব্রে স হ পুত্রং
শ্বেতকেতুং প্রজিঘায যাজযেতি তং হাসীনং পপ্রচ্ছ
গৌতমস্য পুত্রাস্তে সংবৃতং লোকে যস্মিন্মাধাস্যস্যন্যমহো
বদ্ধ্বা তস্য লোকে ধাস্যসীতি স হোবাচ নাহমেতদ্বেদ
হন্তাচার্যং প্রচ্ছানীতি স হ পিতরমাসাদ্য পপ্রচ্ছেতীতি
মা প্রাক্ষীত্কথং প্রতিব্রবাণীতি স হোবাচাহমপ্যেতন্ন বেদ
সদস্যেব বযং স্বাধ্যাযমধীত্য হরামহে যন্নঃ পরে
দদত্যেহ্যুভৌ গমিষ্যাব ইতি .. স হ সমিত্পাণিশ্চিত্রং
গার্গ্যাযণিং প্রতিচক্রম উপাযানীতি তং হোবাচ ব্রহ্মার্হোসি
গৌতম যো মামুপাগা এহি ত্বা জ্ঞপযিষ্যামীতি .. ১..
স হোবাচ যে বৈকে চাস্মাল্লোকাত্প্রযন্তি চন্দ্রমসমেব তে
সর্বে গচ্ছন্তি তেষাং প্রাণৈঃ পূর্বপক্ষ
আপ্যাযতেঽথাপরপক্ষে ন প্রজনযত্যেতদ্বৈ স্বর্গস্য লোকস্য
দ্বারং যশ্চন্দ্রমাস্তং যত্প্রত্যাহ তমতিসৃজতে য এনং
প্রত্যাহ তমিহ বৃষ্টির্ভূত্বা বর্ষতি স ইহ কীটো বা
পতঙ্গো বা শকুনির্বা শার্দূলো বা সিংহো বা মত্স্যো বা
পরশ্বা বা পুরুষো বান্যো বৈতেষু স্থানেষু প্রত্যাজাযতে
যথাকর্মং যথাবিদ্যং তমাগতং পৃচ্ছতি কোঽসীতি তং
প্রতিব্রূযাদ্বিচক্ষণাদৃতবো রেত আভৃতং
পঞ্চদশাত্প্রসূতাত্পিত্র্যাবতস্তন্মা পুংসি কর্তর্যেরযধ্বং
পুংসা কর্ত্রা মাতরি মাসিষিক্তঃ স জাযমান উপজাযমানো
দ্বাদশত্রযোদশ উপমাসো দ্বাদশত্রযোদশেন পিত্রা
সন্তদ্বিদেহং প্রতিতদ্বিদেহং তন্ম ঋতবো মর্ত্যব আরভধ্বং
তেন সত্যেন তপসর্তুরস্ম্যার্তবোঽস্মি কোঽসি ত্বমস্মীতি
তমতিসৃজতে .. ২..
স এতং দেবযানং পন্থানমাসাদ্যাগ্নিলোকমাগচ্ছতি স
বাযুলোকং স বরুণলোকং স আদিত্যলোকং স ইন্দ্রলোকং স
প্রজাপতিলোকং স ব্রহ্মলোকং তস্য হ বা এতস্য
ব্রহ্মলোকস্যারোহৃদো মুহূর্তা যেষ্টিহা বিরজা নদী তিল্যো
বৃক্ষঃ সাযুজ্যং সংস্থানমপরাজিতমাযতনমিন্দ্রপ্রজাপতী
দ্বারগোপৌ বিভুং প্রমিতং বিচক্ষণাসন্ধ্যমিতৌজাঃ প্রযঙ্কঃ
প্রিযা চ মানসী প্রতিরূপা চ চাক্ষুষী
পুষ্পাণ্যাদাযাবযতৌ বৈ চ
জগত্যম্বাশ্চাম্বাবযবাশ্চাপ্সরসোংঽবযানদ্যস্তমিত্থংবিদ
অ গচ্ছতি তং ব্রহ্মাহাভিধাবত মম যশসা বিরজাং
বাযং নদীং প্রাপন্নবানযং জিগীষ্যতীতি .. ৩..
তং পঞ্চশতান্যপ্সরসাং প্রতিধাবন্তি শতং মালাহস্তাঃ
শতমাঞ্জনহস্তাঃ শতং চূর্ণহস্তাঃ শতং বাসোহস্তাঃ
শতং কণাহস্তাস্তং ব্রহ্মালঙ্কারেণালঙ্কুর্বন্তি স
ব্রহ্মালঙ্কারেণালঙ্কৃতো ব্রহ্ম বিদ্বান্ ব্রহ্মৈবাভিপ্রৈতি স
আগচ্ছত্যারং হৃদং তন্মনসাত্যেতি তমৃত্বা সংপ্রতিবিদো
মজ্জন্তি স আগচ্ছতি মুহূর্তান্যেষ্টিহাংস্তেঽস্মাদপদ্রবন্তি
স আগচ্ছতি বিরজাং নদীং তাং মনসৈবাত্যেতি
তত্সুকৃতদুষ্কৃতে ধূনুতে তস্য প্রিযা জ্ঞাতযঃ
সুকৃতমুপযন্ত্যপ্রিযা দুষ্কৃতং তদ্যথা রথেন
ধাবযন্রথচক্রে পর্যবেক্ষত এবমহোরাত্রে পর্যবেক্ষত এবং
সুকৃতদুষ্কৃতে সর্বাণি চ দ্বন্দ্বানি স এষ বিসুকৃতো
বিদুষ্কৃতো ব্রহ্ম বিদ্বান্ব্রহ্মৈবাভিপ্রৈতি ..৪..
স আগচ্ছতি তিল্যং বৃক্ষং তং ব্রহ্মগন্ধঃ প্রবিশতি স
আগচ্ছতি সাযুজ্যং সংস্থানং তং ব্রহ্ম স প্রবিশতি
আগচ্ছত্যপরাজিতমাযতনং তং ব্রহ্মতেজঃ প্রবিশতি স
আগচ্ছতীন্দ্রপ্রজাপতী দ্বারগোপৌ তাবস্মাদপদ্রবতঃ স
আগচ্ছতি বিভুপ্রমিতং তং ব্রহ্মযশঃ প্রবিশতি স
আগচ্ছতি বিচক্ষণামাসন্দীং বৃহদ্রথন্তরে সামনী
পূর্বৌ পাদৌ ধ্যৈত নৌধসে চাপরৌ পাদৌ বৈরূপবৈরাজে
শাক্বররৈবতে তিরশ্চী সা প্রজ্ঞা প্রজ্ঞযা হি বিপশ্যতি স
আগচ্ছত্যমিতৌজসং পর্যঙ্কং স প্রাণস্তস্য ভূতং চ
ভবিষ্যচ্চ পূর্বৌ পাদৌ শ্রীশ্চেরা চাপরৌ
বৃহদ্রথন্তরে অনূচ্যে ভদ্রযজ্ঞাযজ্ঞীযে
শীর্ষণ্যমৃচশ্চ সামানি চ প্রাচীনাতানং যজূংষি
তিরশ্চীনানি সোমাংশব উপস্তরণমুদ্গীথ উপশ্রীঃ
শ্রীরুপবর্হণং তস্মিন্ব্রহ্মাস্তে তমিত্থংবিত্পাদেনৈবাগ্র
আরোহতি তং ব্রহ্মাহ কোঽসীতি তং প্রতিব্রূযাত্ .. ৫..
ঋতুরস্ম্যার্তবোঽস্ম্যাকাশাদ্যোনেঃ সম্ভূতো ভার্যাযৈ রেতঃ
সংবত্সরস্য তেজোভূতস্য ভূতস্যাত্মভূতস্য ত্বমাত্মাসি
যস্ত্বমসি সোহমস্মীতি তমাহ কোঽহমস্মীতি সত্যমিতি ব্রূযাত্কিং
তদ্যত্সত্যমিতি যদন্যদ্দেবেভ্যশ্চ প্রাণেভ্যশ্চ তত্সদথ
যদ্দেবাচ্চ প্রাণাশ্চ তদ্যং তদেতযা বাচাভিব্যাহ্রিযতে
সত্যমিত্যেতাবদিদং সর্বমিদং সর্বমসীত্যেবৈনং তদাহ
তদেতচ্ছ্লোকেনাপ্যুক্তম্ .. ৬..
যজূদরঃ সামশিরা অসাবৃঙ্মূর্তিরব্যযঃ . স ব্রহ্মেতি হি
বিজ্ঞেয ঋষির্ব্রহ্মমযো মহানিতি ..
তমাহ কেন পৌংস্রানি নামান্যাপ্নোতীতি প্রাণেনেতি ব্রূযাত্কেন
স্ত্রীনামানীতি বাচেতি কেন নপুংসকনামানীতি মনসেতি কেন
গন্ধানিতি ঘ্রাণেনেতি ব্রূযাত্কেন রূপাণীতি চক্ষুষেতি কেন
শব্দানিতি শ্রোত্রেণেতি কেনান্নরসানিতি জিহ্বযেতি কেন কর্মাণীতি
হস্তাভ্যামিতি কেন সুখদুঃখে ইতি শরীরেণেতি কেনানন্দং রতিং
প্রজাপতিমিত্যুপস্থেনেতি কেনেত্যা ইতি পাদাভ্যামিতি কেন ধিযো
বিজ্ঞাতব্যং কামানিতি প্রজ্ঞযেতি প্রব্রূযাত্তমহাপো বৈ খলু
মে হ্যসাবযং তে লোক ইতি সা যা ব্রহ্মণি চিতির্যা ব্যষ্টিস্তাং
চিতিং জযতি তাং ব্যষ্টিং ব্যশ্নুতে য এবং বেদ য এবং বেদ
.. ৭.. প্রথমোঽধ্যাযঃ .. ১..

প্রাণো ব্রহ্মেতি হ স্মাহ কৌষীতকিস্তস্য হ বা এতস্য প্রাণস্য
ব্রহ্মণো মনো দূতং বাক্পরিবেষ্ট্রী চক্ষুর্গাত্রং শ্রোত্রং
সংশ্রাবযিতৃ যো হ বা এতস্য প্রাণস্য ব্রহ্মণো মনো দূতং
বেদ দূতবান্ভবতি যো বাচং পরিবেষ্ট্রীং
পরিবেষ্ট্রীমান্ভবতি তস্মৈ বা এতস্মৈ প্রাণায ব্রহ্মণ এতাঃ
সর্বা দেবতা অযাচমানা বলিং হরন্তি তথো এবাস্মৈ সর্বাণি
ভূতান্যযাচমানাযৈব বলিং হরন্তি য এবং বেদ
তস্যোপনিষন্ন যাচেদিতি তদ্যথা গ্রামং ভিক্ষিত্বা
লব্ধোপবিশেন্নাহগতো দত্তমশ্নীযামিতি য এবৈনং
পুরস্তাত্প্রত্যাচক্ষীরংস্ত এবৈনমুপমন্ত্রযন্তে দদাম ত
ইত্যেষ ধর্মো যাচতো ভবত্যনন্তরস্তেবৈনমুপমন্ত্রযন্তে
দদাম ত ইতি .. ১..
অথাত একধনাবরোধনং
যদেকধনমভিধ্যাযাত্পৌর্ণমাস্যাং বামাবাস্যাং বা
শুদ্ধপক্ষে বা পুণ্যে নক্ষত্রেঽগ্নিমুপসমাধায পরিসমুহ্য
পরিস্তীর্য পর্যুক্ষ পূর্বদক্ষিণং জান্বাচ্য স্রুবেণ বা
চমসেন বা কংসেন বৈতা আজ্যাহুতীর্জুহোতি
বাঙ্নামদেবতাবরোধিনী সা মেঽমুষ্মাদিদমবরুন্দ্ধাং তস্যৈ
স্বাহা চক্ষুর্নাম দেবতাবরোধিনী সা
মেঽমুষ্মাদিদমবরুন্দ্ধাং তস্যৈ স্বাহা শ্রোত্রং নাম
দেবতাবরোধিনী সা মেঽমুষ্মাদিদমবরুন্দ্ধাং তস্যৈ স্বাহা
মনো নাম দেবতাবরোধিনী সা মেঽমুষ্মাদিদমবরুন্দ্ধাং
তস্যৈ স্বাহৈত্যথ ধূমগন্ধং
প্রজিঘাযাজ্যলেপেনাঙ্গান্যনুবিমৃজ্য
বাচংযমোঽভিপ্রবৃজ্যার্থং ব্রবীত দূতং বা
প্রহিণুযাল্লভতে হৈব .. ৩..
অথাতো দৈবস্মরো যস্য প্রিযো বুভূষেযস্যৈ বা এষাং
বৈতেষমেবৈতস্মিন্পর্বণ্যগ্নিমুপসমাধাযৈতযৈবাবৃতৈতা
জুহোম্যসৌ স্বাহা চক্ষুস্তে মযি জুহোম্যসৌ স্বাহা প্রজ্ঞানং তে
মযি জুহোম্যসৌ স্বাহেত্যথ ধূমগন্ধং
প্রজিঘাযাজ্যলেপেনাঙ্গান্যনুবিমৃজ্য বাচংযমোঽভিপ্রবৃজ্য
সংস্পর্শং জিগমিষেদপি বাতাদ্বা
সংভাষমাণস্তিষ্ঠেত্প্রিযো হৈব ভবতি স্মরন্তি হৈবাস্য ..
৪..
অথাতঃ সাযমন্নং প্রাতর্দনমম্তরমগ্নিহোত্রমিত্যাচক্ষতে
যাবদ্বৈ
পুরুষো ভাসতে ন তাবত্প্রাণিতুং শক্নোতি প্রাণং তদা বাচি
জুহোতি
যাবদ্বৈ পুরুষঃ প্রাণিতি ন তাবদ্ভাষিতুং শক্নোতি বাচং
তদা প্রাণে জুহোত্যেতেঽনন্তেঽমৃতাহুতির্জাগ্রচ্চ স্বপংশ্চ
সন্ততমবচ্ছিন্নং জুহোত্যথ যা অন্যা আহুতযোঽন্তবত্যস্তাঃ
কর্মময্যোভবন্ত্যেতদ্ধ বৈ পূর্বে বিদ্বাংসোঽগ্নিহোত্রং
জুহবাংচক্রুঃ.. ৫..
উক্থং ব্রহ্মেতি হ স্মাহ শুষ্কভৃঙ্গরস্তদৃগিত্যুপাসীত
সর্বাণি হাস্মৈ ভূতানি শ্রৈষ্ঠ্যাযাভ্যর্চ্যন্তে
তদ্যজুরিত্যুপাসীত সর্বাণি হাস্মৈ ভূতানি শ্রৈষ্ঠ্যায
যুজ্যন্তে তত্সামেত্যুপাসীত সর্বাণি হাস্মৈ ভূতানি
শ্রৈষ্ঠ্যায সন্নমন্তে তচ্ছ্রীত্যুপাসীত তদ্যশ
ইত্যুপাসীত তত্তেজ ইত্যুপাসীত তদ্যথৈতচ্ছা স্ত্রাণা.ম্
শ্রীমত্তমং যশস্বিতমং তেজস্বিতমং ভবতি তথো এবৈবং
বিদ্বান্সর্বেষাং ভূতানাং শ্রীমত্তমো যশস্বিতমস্তেজস্বিতমো
ভবতি তমেতমৈষ্টকং কর্মমযমাত্মানমধ্বর্যুঃ সংস্করোতি
তস্মিন্যজুর্ভযং প্রবযতি যজুর্মযং ঋঙ্মযং হোতা ঋঙ্মযং
সামমযমুদ্গাতা স এষ সর্বস্যৈ ত্রযীবিদ্যাযা আত্মৈষ উত
এবাস্যাত্যৈতদাত্মা ভবতি এবং বেদ .. ৬..
অথাতঃ সর্বজিতঃ কৌষীতকেস্রীণ্যুপাসনানি ভবন্তি
যজ্ঞোপবীতং কৃত্বাপ আচম্য ত্রিরুদপাত্রং
প্রসিচ্যোদ্যন্তমাদিত্যমুপতিষ্ঠেত বর্গোঽসি পাপ্মানং মে
বৃঙ্ধীত্যেতযৈবাবৃতা মধ্যে সন্তমুদ্বর্গোঽসি পাপ্মানং ম
উদ্ধৃঙ্ধীত্যেতযৈবাবৃতাস্তে যন্তং সংবর্গোঽসি পাপ্মানং
মে সংবৃঙ্ধীতি যদহোরাত্রাভ্যাং পাপং করোতি
সন্তদ্ধৃঙ্ক্তে .. ৭..
অথ মাসি মাস্যমাবাস্যাযাং পশ্চাচ্চন্দ্রমসং
দৃশ্যমানমুপতিষ্ঠেতৈবাবৃতা হরিততৃণাভ্যামথ বাক্
প্রত্যস্যতি যত্তে সুসীমং হৃদযমধিচন্দ্রমসি শ্রিতম্ ..
তেনামৃতত্বস্যেশানং মাহং পৌত্রমঘং রুদমিতি ন
হাস্মাত্পূর্বাঃ প্রজাঃ প্রযন্তীতি ন
জাতপুত্রস্যাথাজাতপুত্রস্যাহ .. আপ্যাস্ব সমেতু তে সন্তে
পযাংসি সমুযন্তু বাজা যমাদিত্যা
অংশুমাপ্যাযযন্তীত্যেতাস্তিস্র ঋচো জপিত্বা নাস্মাকং প্রাণেন
প্রজযা পশুভিরাপ্যস্বেতি দৈবীমাবৃতমাবর্ত
আদিত্যস্যাবৃতমন্বাবর্তযতি দক্ষিণং বাহুমন্বাবর্ততে .. ৮..
অথ পৌর্ণমাস্যাং পুরস্তাচ্চন্দ্রমসং
দৃশ্যমানমুপতিষ্ঠেতৈতযৈবাবৃতা সোমো রাজাসি
বিচক্ষণঃ পঞ্চমুখোঽসি প্রজাপতির্ব্রাহ্মণস্ত একং মুখং
তেন মুখেন রাজ্ঞোঽত্সি তেন মুখেন মামন্নাদং কুরু .. রাজা
ত একং মুখং তেন মুখেন বিশোত্সি তেনৈব মুখেন মামন্নাদং
কুরু .. শ্যেনস্ত একং মুখং তেন মুখেন পক্ষিণোঽত্সি তেন
মুখেন মামন্নাদং কুরু .. অগ্নিস্ত একং মুখং তেন মুখেনেমং
লোকমত্সি তেন মুখেন মামন্নাদং কুরু .. সর্বাণি ভূতানীত্যেব
পঞ্চমং মুখং তেন মুখেন সর্বাণি ভূতান্যত্সি তেন মুখেন
মামন্নাদং কুরু .. মাস্মাকং প্রাণেন প্রজযা
পশুভিরবক্ষেষ্ঠা যোঽস্মাদ্বেষ্টি যং চ বযং
দ্বিষ্মস্তস্য প্রাণেন প্রজযা পশুভিরবক্ষীযস্বেতি
স্থিতির্দৈবীমাঅবৃতমাবর্ত আদিত্যস্যাবৃতমন্বাবর্তন্ত ইতি
দক্ষিণং বাহুমন্বাবর্ততে .. ৯..
অথ সংবেশ্যন্জাযাযৈ হৃদযমভিমৃশেত্ .. যত্তে সুসীমে
হৃদযে হিতমন্তঃ প্রজাপতৌ .. মন্যেঽহং মাং তদ্বিদ্বাংসং
মাহং পৌত্রমঘং রুদমিতি ন হাস্মত্পূর্বাঃ প্রজাঃ প্রৈতি ..
১০..
অথ প্রোষ্যান্পুত্রস্য মূর্ধানমভিমৃশতি ..
অঙ্গাদঙ্গাত্সংভবসি হৃদযাদধিজাযসে .
আত্মা বৈ পুত্রনামাসি স জীব শরদঃ শতম্ .. অসাবিতি
নামাস্য গৃহ্ণাতি . অশ্মা ভব পরশুর্ভব হিরণ্যমস্তৃতং
ভব . তেজো বৈ পুত্রনামাসি স জীব শরদঃ শতম্ .. অসাবিতি
নামাসি গৃহ্ণাতি. যেন প্রজাপতিঃ প্রজাঃ
পর্যগৃহ্ণীতারিষ্ট্যৈ তেন ত্বা পরিগৃহ্ণাম্যসাবিত্যথাস্য
দক্ষিণে কর্ণে জপতি .. অস্মে প্রযন্ধি
মঘবন্নৃজীষিন্নিতীন্দ্রশ্রেষ্ঠানি দ্রবিণানি ধেহীতি
মাচ্ছেত্তা মা ব্যথিষ্ঠাঃ শতং শরদ আযুষো জীব পুত্র
. তে নাম্না মূর্ধানমভিজিঘ্রাম্যসাবিতি ত্রিরস্য
মূর্ধানমভিজিঘ্রেদ্গবা ত্বা হিঙ্কারেণাভিহিঙ্করোমীতি
ত্রিরস্য মূর্ধানমভিহিঙ্কুর্যাত্ .. ১১..
অথাতো দৈবঃ পরিমর এতদ্বৈ ব্রহ্ম দীপ্যতে
যদগ্নির্জ্বলত্যথৈতন্ম্রিযতে
যন্ন জ্বলতি তস্যাদিত্যমেব তেজো গচ্ছতি বাযুং প্রাণ এতদ্বৈ
ব্রহ্ম
দীপ্যতে যথাদিত্যো দৃশ্যতেঽথৈতন্ম্রিযতে যন্ন দৃশ্যতে তস্য
চন্দ্রমসমেব তেজো গচ্ছতি বাযুং প্রাণ এতদ্বৈ ব্রহ্ম দীপ্যতে
যচ্চন্দ্রমা দৃশ্যতেঽথৈতন্ম্রিযতে যন্ন দৃশ্যতে তস্য
বিদ্যুতমেব তেজো
গচ্ছতি বাযুং প্রাণ এতদ্বৈ ব্রহ্ম দীপ্যতে
যদ্বিদ্যুদ্বিদ্যোততেঽথৈতন্ম্রিযতে
যন্ন বিদ্যোততে তস্য বাযুমেব তেজো গচ্ছতি বাযুং প্রাণস্তা
বা এতাঃ
সর্বা দেবতা বাযুমেব প্রবিশ্য বাযৌ সৃপ্তা ন মূর্চ্ছন্তে
তস্মাদেব
পুনরুদীরত ইত্যধিদৈবতমথাধ্যাত্মম্ .. ১২..
এতদ্বৈ ব্রহ্ম দীপ্যতে যদ্বাচা বদত্যথৈতন্ম্রিযতে যন্ন বলতি
তস্য চক্ষুরেব তেজো গচ্ছতি প্রাণং প্রাণ এতদ্বৈ ব্রহ্ম
দীপ্যতে
যচ্চক্ষুষা পশ্যত্যথৈতন্ম্রিযতে যন্ন পশ্যতি তস্য
শ্রোত্রমেব
তেজো গচ্ছতি প্রাণং প্রাণ এতদ্বৈ ব্রহ্ম দীপ্যতে যচ্ছোত্রেণ
শৃণোত্যথৈতন্ম্রিযতে যন্ন শৃণোতি তস্য মন এব তেজো
গচ্ছতি
প্রাণং প্রাণ এতদ্বৈ ব্রহ্ম দীপ্যতে যন্মনসা
ধ্যাযত্যথৈতন্ম্রিযতে
যন্ন ধ্যাযতি তস্য প্রাণমেব তেজো গচ্ছতি প্রাণং প্রাণস্তা
বা
এতাঃ সর্বা দেবতাঃ প্রাণমেব প্রবিশ্য প্রাণে সৃপ্তা ন
মূর্ছন্তে
তস্মাদ্ধৈব পুনরুদীরতে তদ্যদিহ বা এবংবিদ্বাংস উভৌ
পর্বতাবভিপ্রবর্তেযাতাং তুস্তূর্ষমাণো দক্ষিণশ্চোত্তরশ্চ
ন হৈবৈনং স্তৃণ্বীযাতামথ য এনং দ্বিষন্তি যাংশ্চ
স্বযং
দ্বেষ্টি ত এবং সর্বে পরিতো ম্রিযন্তে .. ১৩..
অথাতো নিঃশ্রেযসাদানং এতা হ বৈ দেবতা অহং শ্রেযসে
বিবদমানা অস্মাচ্ছরীরাদুচ্চক্রমুস্তদ্দারুভূতং
শিষ্যেথৈতদ্বাক্প্রবিবেশ তদ্বাচা বদচ্ছিষ্য
এবাথৈতচ্চক্ষুঃ প্রবিবেশ তদ্বাচা বদচ্চক্ষুষা
পশ্যচ্ছিষ্য এবাথৈতচ্ছ্রোত্রং প্রবিবেশ তদ্বাচা
বদচ্চক্ষুষা পশ্যচ্ছ্রোত্রেণ শৃণ্বন্মনসা
ধ্যাযচ্ছিষ্য এবাথৈতত্প্রাণঃ প্রবিবেশ তত্তত এব
সমুত্তস্থৌ তদ্দেবাঃ প্রাণে নিঃশ্রেযসং বিচিন্ত্য প্রাণমেব
প্রজ্ঞাত্মানমভিসংস্তূয সহৈতৈঃ
সর্বৈরস্মাল্লোকাদুচ্চক্রমুস্তে
বাযুপ্রতিষ্ঠাকাশাত্মানঃ স্বর্যযুস্তহো
এবৈবংবিদ্বান্সর্বেষাং
ভূতানাং প্রাণমেব প্রজ্ঞাত্মানমভিসংস্তূয সহৈতৈঃ
সর্বৈরস্মাচ্ছরীরাদুত্ক্রামতি স বাযুপ্রতিষ্ঠাকাশাত্মা
ন স্বরেতি তদ্ভবতি যত্রৈতদ্দেবাস্তত্প্রাপ্য তদমৃতো ভবতি
যদমৃতা দেবাঃ .. ১৪..
অথাতঃ পিতাপুত্রীযং সংপ্রদানমিতি চাচক্ষতে পিতা পুত্রং
প্রষ্যাহ্বযতি নবৈস্তৃণৈরগারং
সংস্তীর্যাগ্নিমুপসমাধাযোদকুম্ভং সপাত্রমুপনিধাযাহতেন
বাসসা সম্প্রচ্ছন্নঃ শ্যেত এত্য পুত্র উপরিষ্টদভিনিপদ্যত
ইন্দ্রিযৈরস্যেন্দ্রিযাণি সংস্পৃশ্যাপি বাস্যাভিমুখত
এবাসীতাথাস্মৈ সংপ্রযচ্ছতি বাচং মে ত্বযি দধানীতি পিতা
বাচং তে মযি দধ ইতি পুত্রঃ প্রাণং মে ত্বযি দধানীতি পিতা
প্রাণং তে মযি দধ ইতি পুত্রশ্চক্ষুর্মে ত্বযি দধানীতি পিতা
চক্ষুস্তে মযি দধ ইতি পুত্রঃ শ্রোত্রং মে ত্বযি দধানীতি পিতা
শ্রোত্রং তে মযি দধ ইতি পুত্রো মনো মে ত্বযি দধানীতি পিতা
মনস্তে মযি দধ ইতি পুত্রোঽন্নরসান্মে ত্বযি দধানীতি
পিতান্নরসাংস্তে মযি দধ ইতি পুত্রঃ কর্মাণি মে ত্বযি
দধানীতি পিতা কর্মাণি তে মযি দধ ইতি পুত্রঃ সুখদুঃখে মে
ত্বযি দধানীতি পিতা সুখদুঃখে তে মযি দধ ইতি পুত্র আনন্দং
রতিং প্রজাইং মে ত্বযি দধানীতি পিতা আনন্দং রতিং প্রজাতিং
তে
মযি দধ ইতি পুত্র ইত্যাং মে ত্বযি দধানীতি পিতা ইত্যাং তে মযি
দধ ইতি পুত্রো ধিযো বিজ্ঞাতব্যং কামান্মে ত্বযি দধানীতি
পিউতা
ধিযো বিজ্ঞাতব্যং কামাংস্তে মযি দধ ইতি পুত্রোঽথ
দক্ষিণাবৃদুপনিষ্ক্রামতি তং পিতানুমন্ত্রযতে যশো
ব্রহ্মবর্চসমন্নাদ্যং কীর্তিস্ত্বা জুষতামিত্যথেতরঃ
সব্যমংসমন্ববেক্ষতে পাণি নান্তর্ধায বসনান্তেন বা
প্রচ্ছদ্য স্বর্গাল্লোকান্কামানবাপ্নুহীতি স যদ্যগদঃ
স্যাত্পুত্রস্যৈশ্বর্যে পিতা বসেত্পরিবা ব্রজেদ্যযুর্বৈ
প্রেযাদ্যদেবৈনং
সমাপযতি তথা সমাপযিতব্যো ভবতি তথা সমাপযিতব্যো
ভবতি .. ১৫..  ইতি দ্বিতীযোঽধ্যাযঃ .. ২..

প্রতর্দনো হ বৈ দৈবোদাসিরিন্দ্রস্য প্রিযং ধামোপজগাম যুদ্ধেন
পৌরুষেণ চ তং হেন্দ্র উবাচ প্রতর্দন বরং তে দদানীতি স
হোবাচ প্রতর্দনস্ত্বমেব বৃণীশ্ব যং ত্বং মনুষ্যায
হিততমং
মন্যস ইতি তং হেন্দ্র উবাচ ন বৈ বরং পরস্মৈ বৃণীতে
ত্বমেব
বৃণীশ্বেত্যবরো বৈতর্হি কিল ম ইতি হোবাচ প্রতর্দনোঽথো
খল্বিন্দ্রঃ
সত্যাদেব নেযায সত্যং হীন্দ্রঃ স হোবাচ মামেব
বিজানীহ্যেতদেবাহং
মনুষ্যায হিততমং মন্যে যন্মাং বিজানীযাং ত্রিশীর্ষাণং
ত্বাষ্ট্রমহনমবাঙ্মুখান্যতীন্সালাবৃকেভ্যঃ প্রাযচ্ছং
বহ্বীঃ
সন্ধা অতিক্রম্য দিবি প্রহ্লাদীনতৃণমহমন্তরিক্ষে
পৌলোমান্পৃথিব্যাং কালকাশ্যাংস্তস্য মে তত্র ন লোম চ
নামীযতে
স যো মাং বিজানীযান্নাস্য কেন চ কর্মণা লোকো মীযতে ন
মাতৃবধেন
ন পিতৃবধেন ন স্তেযেন ন ভ্রূণহত্যযা নাস্য পাপং চ ন
চকৃষো মুখান্নীলং বেত্তীতি .. ১..
স হোবাচ প্রাণোঽস্মি প্রজ্ঞাত্মা তং
মামাযুরমৃতমিত্যুপাস্বাযুঃ
প্রাণঃ প্রাণো বা আযুঃ প্রাণ উবাচামৃতং
যাবদ্ধ্যস্মি’ ন্ছরীরে
প্রাণো বসতি তাবদাযুঃ প্রাণেন
হ্যেবামুষ্মিংল্লোকেঽমৃতত্বমাপ্নোতি
প্রজ্ঞযা সত্যসঙ্কল্পং স যো ম আযুরমৃতমিত্যুপাস্তে
সর্বমাযুরস্মিংল্লোক এবাপ্নোত্যমৃতত্বমক্ষিতিং স্বর্গে লোকে
তদ্ধৈক
আহুরেকভূযং বৈ প্রাণা গচ্ছন্তীতি ন হি কশ্চন
শক্নুযাত্সকৃদ্বাচা নাম প্রজ্ঞাপযিতুং চক্ষুষা রূপং
শ্রোত্রেণ শব্দং মনসা ধ্যানমিত্যেকভূযং বৈ প্রাণা ভূত্বা
একৈকং সর্বাণ্যেবৈতানি প্রজ্ঞাপযন্তি বাচং বদতীং সর্বে
প্রাণা
অনুবদন্তি চক্ষুঃ পশ্যত্সর্বে প্রাণা অনুপশ্যন্তি শ্রোত্রং
শৃণ্বত্সর্বে প্রাণা অনুশৃণ্বন্তি মনো ধ্যাযত্সর্বে প্রাণা
অনুধ্যাযন্তি প্রাণং প্রাণন্তং সর্বে প্রাণা
অনুপ্রাণন্তীত্যেবমুহৈবৈতদিতি হেন্দ্র উবাচাস্তীত্যেব প্রাণানাং
নিঃশ্রেযসাদানমিতি .. ২..
জীবতি বাগপেতো মূকান্বিপশ্যামো জীবতি
চক্ষুরপেতোঽন্ধান্বিপশ্যামো
জীবতি শ্রোত্রাপেতো বধিরান্বিপশ্যামো জীবতো বাহুচ্ছিন্নো
জীবত্যূরুচ্ছিন্ন ইত্যেবং হি পশ্যাম ইত্যথ খলু প্রাণ এব
প্রজ্ঞাত্মেদং শরীরং পরিগৃহ্যোত্যাপযতি
তস্মাদেতমেবোক্থমুপাসীত
যো বৈ প্রাণঃ সা প্রজ্ঞা যা বা প্রজ্ঞা স প্রাণঃ সহ
হ্যেতাবস্মিঞ্ছরীরে বসতঃ সহোত্ক্রামতস্তস্যৈষৈব
দৃষ্টিরেতদ্বিজ্ঞানং যত্রৈতত্পুরুষঃ সুপ্তঃ স্বপ্নং ন
কঞ্চন
পশ্যত্যথাস্মিন্প্রাণ এবৈকধা ভবতি তদৈনং
বাক্সর্বৈর্নামভিঃ
সহাপ্যেতি চক্ষুঃ সর্বৈ রূপৈঃ সহাপ্যেতি শ্রোত্রং সর্বৈঃ
শব্দৈঃ
সহাপ্যেতি মনঃ সর্বৈর্ধ্যাতৈঃ সহাপ্যেতি স যদা প্রতিবুধ্যতে
যথাগ্নের্জ্বলতো বিস্ফুলিঙ্গা
বিপ্রতিষ্ঠেরন্নেবমেবৈতস্মাদাত্মনঃ
প্রাণা যথাযতনং বিপ্রতিষ্ঠন্তে প্রাণেভ্যো দেবা দেবেভ্যো
লোকাস্তস্যৈষৈব সিদ্ধিরেতদ্বিজ্ঞানং যত্রৈতত্পুরুষ আর্তো
মরিষ্যন্নাবল্য ন্যেত্য মোহং নৈতি তদাহুরুদক্রমীচ্চিত্তং ন
শৃণোতি ন পশ্যতি বাচা বদত্যথাস্মিন্প্রাণ এবৈকধা ভবতি
তদৈনং বাব সর্বৈর্নামভিঃ সহাপ্যেতি চক্ষুঃ সর্বৈ রূপৈঃ
সহাপ্যেতি শ্রোত্রং সর্বৈঃ শব্দৈঃ সহাপ্যেতি মনঃ
সর্বৈর্ধ্যাতৈঃ
সহাপ্যেতি স যদা প্রতিবুধ্যতে যথাগ্নের্জ্বলতো বিস্ফুলিঙ্গা
বিপ্রতিষ্ঠেরন্নেবমেবৈতস্মাদাত্মনঃ প্রাণা যথাযতনং
বিপ্রতিষ্ঠন্তে প্রাণেভ্যো দেবা দেবেভ্যো লোকাঃ .. ৩..
স যদাস্মাচ্ছরীরাদুত্ক্রামতি বাগস্মাত্সর্বাণি
নামান্যভিবিসৃজতে বাচা সর্বাণি নামান্যাপ্নোতি
প্রাণোঽস্মাত্সর্বান্গন্ধানভিবিসৃজতে প্রাণেন
সর্বান্গন্ধানাপ্নোতি চক্ষুরস্মাত্সর্বাণি রূপাণ্যভিবিসৃজতে
চক্ষুষা সর্বাণি রূপাণ্যাপ্নোতি
শ্রোত্রমস্মাত্সর্বাঞ্ছব্দানভিবিসৃজতে শ্রোত্রেণ
সর্বাঞ্ছব্দানাপ্নোতি মনোঽস্মাত্সর্বাণি ধ্যাতান্যভিবিসৃজতে
মনসা সর্বাণি ধ্যাতান্যাপ্নোতি সৈষা প্রাণে সর্বাপ্তির্যো বৈ
প্রাণঃ সা প্রজ্ঞা যা বা প্রজ্ঞা স প্রাণঃ স হ
হ্যেতাবস্মিঞ্ছরীরে বসতঃ সহত্ক্রামতোঽথ খলু যথা
প্রজ্ঞাযাং সর্বাণি ভূতান্যেকী ভবন্তি তদ্ব্যাখ্যাস্যামঃ ..
৪..
বাগেবাস্মা একমঙ্গমুদূঢং তস্যৈ নাম পরস্তাত্প্রতিবিহিতা
ভূতমাত্রা ঘ্রাণমেবাস্যা একমঙ্গমুদূঢং তস্য গন্ধঃ
পরস্তাত্প্রতিবিহিতা ভূতমাত্রা চক্ষুরেবাস্যা
একমঙ্গমুদূঢং
তস্য রূপং পরস্তাত্প্রতিবিহিতা ভূতমাত্রা শ্রোত্রমেবাস্যা
একমঙ্গমুদূঢং তস্য শব্দঃ পরস্তাত্প্রতিবিহিতা ভূতমাত্রা
জিহ্বৈবাস্যা একমঙ্গমুদূঢং তস্যান্নরসঃ পরস্তাত্প্রতিবিহিতা
ভূতমাত্রা হস্তাবেবাস্যা একমঙ্গমুদূঢং তযোঃ কর্ম
পরস্তাত্প্রতিবিহিতা ভূতমাত্রা শরীরমেবাস্যা
একমঙ্গমুদূঢং
তস্য সুখদুঃখে পরস্তাত্প্রতিবিহিতা ভূতমাত্রা উপস্থ এবাস্যা
একমঙ্গমুদূঢং তস্যানন্দো রতিঃ প্রজাতিঃ পরস্তাত্প্রতিবিহিতা
ভূতমাত্রা পাদাবেবাস্যা একমঙ্গমুদূঢং তযোরিত্যা
পরস্তাত্প্রতিবিহিতা ভূতমাত্রা প্রজ্ঞৈবাস্যা
একমঙ্গমুদূঢং
তস্যৈ ধিযো বিজ্ঞাতব্যং কামাঃ পরস্তাত্প্রতিবিহিতা
ভূতমাত্রা .. ৫ ..
প্রজ্ঞযা বাচং সমারুহ্য বাচা সর্বাণি সামান্যাপ্নোতি
প্রজ্ঞযা প্রাণং সমারুহ্য প্রাণেন সর্বান্গন্ধানাপ্নোতি
প্রজ্ঞযা চক্ষুঃ সমারুহ্য সর্বাণি রূপাণ্যাপ্নোতি প্রজ্ঞযা
শ্রোত্রং সমারুহ্য শ্রোত্রেণ সর্বাঞ্ছব্দানাপ্নোতি প্রজ্ঞযা
জিহ্বাং সমারুহ্য জিহ্বাযা সর্বানন্নরসানাপ্নোতি প্রজ্ঞযা
হস্তৌ সমারুহ্য হস্তাভ্যাং সর্বাণি কর্মাণ্যাপ্নোতি প্রজ্ঞযা
শরীরং সমারুহ্য শরীরেণ সুখদুঃখে আপ্নোতি প্রজ্ঞযোপস্থং
সমারুহ্যোপস্থেনানন্দং রতিং প্রজাতিমাপ্নোতি প্রজ্ঞযা পাদৌ
সমারুহ্য পাদাভ্যাং সর্বা ইত্যা আপ্নোতি প্রজ্ঞযৈব ধিযং
সমারুহ্য প্রজ্ঞযৈব ধিযো বিজ্ঞাতব্যং কামানাপ্নোতি .. ৬..
ন হি প্রজ্ঞাপেতা বাঙ্নাম কিংচন প্রজ্ঞপযেদন্যত্র মে
মনোঽভূদিত্যাহ নাহমেতন্নাম প্রাজ্ঞাসিষমিতি ন হি
প্রজ্ঞাপেতঃ প্রাণো গন্ধং কংচন প্রজ্ঞপযেদন্যত্র মে
মনোঽভূদিত্যাহ নাহমেতং গন্ধং প্রাজ্ঞাসিষমিতি নহি
প্রজ্ঞাপেতং চক্ষূ রূপং কিংচন প্রজ্ঞপযেদন্যত্র মে
মনোঽভূদিত্যাহ নাহমেতদ্রূপং প্রাজ্ঞাসিষমিতি নহি
প্রজ্ঞাপেতং শ্রোত্রং শব্দং কংচন প্রজ্ঞপযেদন্যত্র মে
মনোঽভূদিত্যাহ নাহমেতং শব্দং প্রাজ্ঞাসিষমিতি নহি
প্রজ্ঞাপেতা জিহ্বান্নরসং কংচন প্রজ্ঞপযেদন্যত্র মে
মনোঽভূদিত্যাহ নাহমেতমন্নরসং প্রাজ্ঞাসিষমিতি নহি
প্রজ্ঞাপেতৌ হতৌ কর্ম কিংচন প্রজ্ঞপেতামন্যত্র মে
মনোঽভূদিত্যাহ নাহমেতত্কর্ম প্রাজ্ঞাসিষমিতি নহি
প্রজ্ঞাপেতং শরীরং সুখদুঃখং কিংচন প্রজ্ঞপযেদন্যত্র
মে মনোঽভূদিত্যাহ নাহমেতত্সুখদুঃখং প্রাজ্ঞাসিষমিতি
নহি প্রজ্ঞাপেত উপস্থ আনন্দং রতিং প্রজাতিং কংচন
প্রজ্ঞপযেদন্যত্র মে মনোঽভূদিত্যাহ নাহমেতমানন্দং রতিং
প্রজাতিং প্রাজ্ঞাসিষমিতি নহি প্রজ্ঞাপেতৌ পাদাবিত্যাং
কাংচন প্রজ্ঞপযেতামন্যত্র মে মনোঽভূদিত্যাহ
নাহমেতামিত্যাং
প্রাজ্ঞসিষমিতি নহি প্রজ্ঞাপেতা ধীঃ কাচন সিদ্ধ্যেন্ন
প্রজ্ঞাতব্যং প্রজ্ঞাযেত্ .. ৭..
ন বাচং বিজিজ্ঞাসীত বক্তারং বিদ্যান্ন গন্ধং
বিজিজ্ঞাসীত
ঘ্রাতারং বিদ্যান্ন রূপং বিজিজ্ঞাসীত রূপবিদং বিদ্যান্ন
শব্দং বিজিজ্ঞাসীত শ্রোতারং বিদ্যান্নান্নরসং
বিজিজ্ঞাসীতান্নরসবিজ্ঞাতারং বিদ্যান্ন কর্ম বিজিজ্ঞাসীত
কর্তারং বিদ্যান্ন সুখদুঃখে বিজিজ্ঞাসীত
সুখদুঃখযোর্বিজ্ঞাতারং
বিদ্যান্নানন্দং রতিং প্রজাতিং বিজিজ্ঞাসীতানন্দস্য রতেঃ
প্রজাতের্বিজ্ঞাতারং বিদ্যান্নেত্যাং বিজিজ্ঞাসীতৈতারং
বিদ্যান্ন
মনো বিজিজ্ঞাসীত মন্তারং বিদ্যাত্তা বা এতা দশৈব
ভূতমাত্রা
অধিপ্রজ্ঞং দশ প্রজ্ঞামাত্রা অধিভূতং যদ্ধি
ভূতমাত্রা ন
স্যুর্ন প্রজ্ঞামাত্রাঃ স্যুর্যদ্বা প্রজ্ঞামাত্রা ন স্যুর্ন
ভূতমাত্রাঃ
স্যুঃ .. ৮..
ন হ্যন্যতরতো রূপং কিংচন সিদ্ধ্যেন্নো এতন্নানা তদ্যথা
রথস্যারেষু নেমিরর্পিতা নাভাবরা অর্পিতা এবমেবৈতা
ভূতমাত্রাঃ
প্রজ্ঞামাত্রা স্বর্পিতাঃ প্রজ্ঞামাত্রাঃ প্রাণে অর্পিতা এষ
প্রাণ এব
প্রজ্ঞাত্মানন্দোঽজরোঽমৃতো ন সাধুনা কর্মণা ভূযান্নো
এবাসাধুনা
কর্মণা কনীযানেষ হ্যেবৈনং সাধুকর্ম কারযতি তং
যমন্বানুনেষত্যেষ এবৈনমসাধু কর্ম কারযতি তং যমেভ্যো
লোকেভ্যো
নুনুত্সত এষ লোকপাল এষ লোকাধিপতিরেষ সর্বেশ্বরঃ স
ম আত্মেতি
বিদ্যাত্স ম আত্মেতি বিদ্যাত্ .. ৯.. ইতি তৃতীযোঽধ্যাযঃ ..

গার্গ্যো হ বৈ বালাকিরনূচানঃ সংস্পষ্ট আস
সোঽযমুশিনরেষু
সংবসন্মত্স্যেষু কুরুপঞ্চালেষু কাশীবিদেহেষ্বিতি
সহাজাতশত্রুং কাশ্যমেত্যোবাচ ব্রহ্ম তে ব্রবাণীতি তং
হোবাচ
অজাতশত্রুঃ সহস্রং দদ্মস্ত এতস্যাং বাচি জনকো জনক ইতি
বা উ
জনা ধাবন্তীতি .. ১..
স হোবাচ বালাকির্য এবৈষ আদিত্যে পুরুষস্তমেবাহমুপাস ইতি
তং হোবাচাজাতশত্রুর্মামৈতস্মিন্সমবাদযিষ্ঠা
বৃহত্পাণ্ডরবাসা অতিষ্ঠাঃ সর্বেষাং ভূতানাং মূর্ধেতি
বা
অহমেতমুপাস ইতি স যো হৈতমেবমুপাস্তেঽতিষ্ঠাঃ  সর্বেষাং
ভূতানাং মূর্ধা ভবতি .. ২..
স এবৈষ বালাকির্য এবৈষ চন্দ্রমসি পুরুষস্তমেবাহং
ব্রহ্মোপাস
ইতি তং হোবাচাজাতশত্রুর্মা মৈতস্মিন্সমবাদযিষ্ঠাঃ সোমো
রাজান্নস্যাত্মেতি বা অহমেতমুপাস ইতি স যো
হৈতমেবমুপাস্তেঽন্নস্যাত্মা
ভবতি .. ৩..
সহোবাচ বালাকির্য এবৈষ বিদ্যুতি পুরুষ এতমেবাহং
ব্রহ্মোপাস
ইতি তং হোবাচাজাতশত্রুর্মা
মৈতস্মিন্সমবাদযিষ্ঠাস্তেজস্যাত্মেতি
বা অহমেতমুপাস ইতি স যো হৈতমেবমুপাস্তে তেজস্যাত্মা ভবতি
.. ৪..
স হোবাচ বালাকির্য এবৈষ স্তনযিত্নৌ পুরুষ এতমেবাহং
ব্রহ্মোপাস
ইতি তং হোবাচাজাতশত্রুর্মামৈতস্মিন্সমবাদযিষ্ঠাঃ
শব্দস্যাত্মেতি
বা অহমেতমুপাস ইতি স যো হৈতমেবমুপাস্তে শব্দস্যাত্মা
ভবতি .. ৫..
স হোবাচ বালাকির্য এবৈষ আকাশে পুরুষস্তমেবাহমুপাস
ইতি তং
হোবাচাজাতশত্রুর্মামৈতস্মিন্সমবাদযিষ্ঠাঃ
পূর্ণমপ্রবর্তি ব্রহ্মেতি
বা অহমেতমুপাস ইতি স যো হৈতমেবমুপাস্তে পূর্যতে প্রজযা
পশুভির্নো
এব স্বযং নাস্য প্রজা পুরা কালাত্প্রবর্ততে .. ৬..
স হোবাচ বালাকির্য এবৈষ বাযৌ পুরুষস্তমেবাহমুপাস
ইতি তং হোবাচাজাতশত্রুর্মামৈতস্মিন্সমবাদযিষ্ঠা ইন্দ্রো
বৈকুণ্ঠোঽপরাজিতা সেনেতি বা অহমেতমুপাস ইতি স যো
হৈতমেবমুপাস্তে জিষ্ণুর্হ বা পরাজিষ্ণুরন্যতরস্য
জ্জ্যাযন্ভবতি .. ৭..
স হোবাচ বালাকির্য এবৈষোঽগ্নৌ পুরুষস্তমেবাহমুপাস ইতি
তং
হোবাচাজাতশত্রুর্মামৈতস্মিন্সমবাদযিষ্ঠা বিষাসহিরিতি
বা
অহমেতমুপাস ইতি স যো হৈতমেবমুপাস্তে বিষাসহির্বা এষ
ভবতি .. ৮..
স হোবাচ বালাকির্য এবৈষোঽপ্সু পুরুষস্তমেবাহমুপাস ইতি
তং
হোবাচাজাতশত্রুর্মামৈতস্মিন্সমবাদযিষ্ঠা নাম্ন্যস্যাত্মেতি
বা
অহমেতমুপাস ইতি স যো হৈতমেবমুপাস্তে নাম্ন্যস্যাত্মা
ভবতীতিঅধিদৈবতমথাধ্যাত্মম্ .. ৯..
স হোবাচ বালাকির্য এবৈষ আদর্শে পুরুষস্তমেবাহমুপাস
ইতি তং
হোবাচাজাতশত্রুর্মামৈতস্মিন্সমবাদযিষ্ঠাঃ প্রতিরূপ ইতি
বা
অহমেতমুপাস ইতি স যো হৈতমেবমুপাস্তে প্রতিরূপো হৈবাস্য
প্রজাযামাজাযতে নাপ্রতিরূপঃ .. ১০..
স হোবাচ বালাকির্য এবৈষ প্রতিশ্রুত্কাযা
পুরুষস্তমেবাহমুপাস
ইতি তং হোবাচাজাতশত্রুর্মামৈতস্মিন্সমবাদযিষ্ঠা
দ্বিতীযোঽনপগ
ইতি বা অহমেতমুপাস ইতি স যো হৈতমেবমুপাস্তে বিন্দতে
দ্বিতীযাদ্দ্বিতীযবান্ভবতি .. ১১..
স হোবাচ বালাকির্য এবৈষ শব্দঃ পুরুষমন্বেতি
তমেবাহমুপাস
ইতি তং হোবাচাজাতশত্রুর্মামৈতস্মিন্সমবাদযিষ্ঠা অসুরিতি
বা
অহমেতমুপাস ইতি স যো হৈতমেবমুপাস্তে নো এব স্বযং নাস্য
প্রজা
পুরাকালাত্সংমোহমেতি .. ১২..
স হোবাচ বালাকির্য এবৈষ চ্ছাযাযাং
পুরুষস্তমেবাহমুপাস
ইতি তং
হোবাচাজাতশত্রুর্মামৈতস্মিন্সমবাদযিষ্ঠামৃত্যুরিতি
বা অহমেতমুপাস ইতি স যো হৈতমেবমুপাস্তে নো এব স্বযং নাস্য
প্রজা
পুরা কালাত্প্রমীযতে .. ১৩..
স হোবাচ বালাকির্য এবৈষ শারীরঃ পুরুষস্তমেবাহমুপাস
ইতি তং হোবাচাজাতশত্রুর্মামৈতস্মিন্সমবাদযিষ্ঠাঃ
প্রজাপতিরিতি
বা অহমেতমুপাস ইতি স যো হৈতমেবমুপাস্তে প্রজাযতে প্রজযা
পশুভিঃ .. ১৪..
স হোবাচ বালাকির্য এবৈষ প্রাজ্ঞ আত্মা যেনৈতত্সুপ্তঃ
স্বপ্নমাচরতি তমেবাহমুপাস ইতি তং
হোবাচাজাতশত্রুর্মামৈতস্মিন্সমবাদযিষ্ঠা যমো রাজেতি
বা অহমেতমুপাস ইতি স যো হৈতমেবমুপাস্তে সর্বং হাস্মা ইদং
শ্রৈষ্ঠ্যায গম্যতে .. ১৫..
স হোবাচ বালাকির্য এবৈষ
দক্ষিণেক্ষন্পুরুষস্তমেবাহমুপাস
ইতি তং হোবাচাজাতশত্রুর্মামৈতস্মিন্সমবাদযিষ্ঠা নান্ন
আত্মাগ্নিরাত্মা জ্যোতিষ্ট আত্মেতি বা অহমেতমুপাস ইতি স যো
হৈতমেবমুপাস্ত এতেষাং সর্বেষামাত্মা ভবতি .. ১৬..
স হোবাচ বালাকির্য এবৈষ সব্যেক্ষন্পুরুষস্তমেবাহমুপাস
ইতি
তং হোবাচাজাতশত্রুর্মামৈতস্মিন্সমবাদযিষ্ঠাঃ
সত্যস্যাত্মা
বিদ্যুত আত্মা তেজস আত্মেতি বা অহমেতমুপাস ইতি স যো
হৈতমেবমুপাস্ত এতেষাং সর্বেষামাত্মা ভবতীতি .. ১৭..
তত উ হ বালাকিস্তূষ্ণীমাস তং হোবাচাজাতশত্রুরেতাবন্নু
বালাকীতি এতাবদ্ধীতি হোবাচ বালাকিস্তং
হোবাচাজাতশত্রুর্মৃষা বৈ কিল মা সংবদিষ্ঠা ব্রহ্ম
তে ব্রবাণীতি হোবাচ যো বৈ বালাক এতেষাং পুরুষাণাং
কর্তা যস্য বৈতত্কর্ম স বেদিতব্য ইতি তত উ হ বালাকিঃ
সমিত্পাণিঃ প্রতিচক্রামোপাযানীতি তং হোবাচজাতশত্রুঃ
প্রতিলোমরূপমেব স্যাদ্যত্ক্ষত্রিযো ব্রাহ্মণমুপনযীতৈহি ব্যেব
ত্বা জ্ঞপযিষ্যামীতি তং হ পাণাবভিপদ্য প্রবব্রাজ তৌ
হ সুপ্তং পুরুষমীযতুস্তং হাজাতশত্রুরামন্ত্রযাংচক্রে
বৃহত্পাণ্ডরবাসঃ সোমরাজন্নিতি স উ হ তূষ্ণীমেব শিশ্যে
তত উ হৈনং যষ্ট্যা বিচিক্ষেপ স তত এব সমুত্তস্থৌ তং
হোবাচাজাতশত্রুঃ ক্বৈষ এতদ্বা লোকে পুরুষোঽশযিষ্ট
ক্বৈতদভূত্কুত এতদাগাদিতি তদু হ বালাকির্ন বিজজ্ঞৌ .. ১৮..
তং হোবাচাজাতশত্রুর্যত্রৈষ এতদ্বালাকে পুরুষোঽশযিষ্ট
যত্রৈতদভূদ্যত এতদাগাদ্ধিতা নাম হৃদযস্য নাড্যো
হৃদযাত্পুরীততমভিপ্রতন্বন্তি যথা সহস্রধা কেশো
বিপাটিতস্তাবদণ্ব্যঃ পিঙ্গলস্যাণিম্না তিষ্ঠন্তে শুক্লস্য
কৃষ্ণস্য পীতস্য লোহিতস্যেতি তাসু তদা ভবতি যদা সুপ্তঃ
স্বপ্নং ন কংচন পশ্যত্যথাস্মিন্প্রাণ এবৈকধা ভবতি
তথৈনং বাক্সর্বৈর্নামভিঃ সহাপ্যেতি মনঃ সর্বৈর্ধ্যাতৈঃ
সহাপ্যেতি চক্ষুঃ সর্বৈ রূপৈঃ সহাপ্যেতি শ্রোত্রং সর্বৈঃ
শব্দৈঃ সহাপ্যেতি মনঃ সর্বৈর্ধ্যাতৈঃ সহাপ্যেতি স যদা
প্রতিবুধ্যতে যথাগ্নের্জ্বলতো বিস্ফুলিঙ্গা
বিপ্রতিষ্ঠেরন্নেবমেবৈতস্মাদাত্মনঃ প্রাণা যথাযতনং
বিপ্রতিষ্ঠন্তে প্রাণেভ্যো দেবা দেবেভ্যো লোকাস্তদ্যথা ক্ষুরঃ
ক্ষুরধ্যানে হিতঃ স্যাদ্বিশ্বংভরো বা বিশ্বংভরকুলায
এবমেবৈষ প্রাজ্ঞ আত্মেদং শরীরমনুপ্রবিষ্ট আ লোমভ্য
আ নখেভ্যঃ .. ১৯..
তমেতমাত্মানমেতমাত্মনোঽন্ববস্যতি যথা শ্রেষ্ঠিনং
স্বাস্তদ্যথা শ্রেষ্ঠৈঃ স্বৈর্ভুঙ্ক্তে যথা বা শ্রেষ্ঠিনং
স্বা ভুঞ্জন্ত এবমেবৈষ প্রাজ্ঞ আত্মৈতৈরাত্মভির্ভুঙ্ক্তে .
যথা শ্রেষ্ঠী স্বৈরেবং বৈতমাত্মানমেত আত্মনোঽন্ববস্যন্তি
যথা শ্রেষ্ঠিনং স্বাঃ স যাবদ্ধ বা ইন্দ্র এতমাত্মানং ন
বিজজ্ঞৌ তাবদেনমসুরা অভিবভূবুঃ স যদা বিজজ্ঞাবথ
হত্বাসুরান্বিজিত্য সর্বেষাং ভূতানাং শ্রৈষ্ঠ্যং
স্বারাজ্যমাধিপত্যং পর্যেতি তথো এবৈবং বিদ্বান্সর্বেষাং
ভূতানাং শ্রৈষ্ঠ্যং স্বারাজ্যমাধিপত্যং পর্যেতি য এবং
বেদ য এবং বেদ .. ২০..   ইতি চতুর্থোঽধ্যাযঃ .. ৪..

ॐ বাঙ্মে মনসীতি শান্তিঃ ..

ইতি কৌষীতকিব্রাহ্মণোপনিষত্সমাপ্তা ..