কৌল

 .. কৌল উপনিশদ্ ..

          .. কৌলোপনিষত্ ..

.. শ্রীঃ ..
কৌলোপনিষত্ .
শন্নঃ কৌলিকঃ শন্নো বারুণী শন্নঃ শুদ্ধিঃ শন্নোঽঅগ্নিশ্শন্নঃ
সর্বং সমভবত্ .
নমো ব্রহ্মণে নমঃ পৃথিব্যৈ নমোঽদ্ভ্যো নমোঽগ্নযে নমো বাযবে নমো গুরুভ্যঃ .
ত্বমেব প্রত্যক্ষং সৈবাসি .
ত্বামেব প্রত্যক্ষং তাং বদিষ্যামি .
ঋতং বদিষ্যামি .
সত্যং বদিষ্যামি .
তন্মামবতু .
তদ্বক্তারমবতু .
অবতু মাম্ .
অবতু বক্তারম্ .
ॐ শান্তিঃ শান্তিঃ শান্তিঃ .
অথাতো ধর্ম্মজিজ্ঞাসা .
জ্ঞানং বুদ্ধিশ্চ .
জ্ঞানং মোক্ষৈককারণম্ .
মোক্ষস্সর্বাত্মতাসিদ্ধিঃ .
পঞ্চ বিষযাঃ প্রপঞ্চঃ .
তেষাং জ্ঞানস্বরূপাঃ .
যোগো মোক্ষঃ .
অধর্ম্মকারণাজ্ঞানমেব জ্ঞানম্ .
প্রপঞ্চ ঈশ্বরঃ .
অনিত্যং নিত্যম্ .
অজ্ঞানং জ্ঞানম্ .
অধর্ম্ম এব ধর্ম্মঃ .
এষ মোক্ষঃ .
পঞ্চ বন্ধা জ্ঞানস্বরূপাঃ .
পিণ্ডাজ্জননম্ .
তত্রৈব মোক্ষঃ .
এতজ্জ্ঞানম্ .
সর্বেন্দ্রিযাণাং নযনং প্রধানম্ .
ধর্ম্মবিরুদ্ধাঃ কার্য্যাঃ .
ধর্ম্মবিহিতা ন কার্য্যাঃ .
সর্বং শাম্ভবীরূপম্ .
আম্নাযা ন বিদ্যন্তে .
গুরুরেকঃ .
সর্বৈক্যতাবুদ্ধিমন্তে .
আমন্ত্রসিদ্ধেঃ .
মদাদিস্ত্যাজ্যঃ .
প্রাকট্যং ন কুর্য্যাত্ .
ন কুর্য্যাত্পশুসম্ভাষণম্ .
অন্যাযো ন্যাযঃ .
ন গণযেত্কমপি .
আত্মরহস্যং ন বদেত্ .
শিষ্যায বদেত্ .
অন্তঃ শাক্তঃ .
বহিঃ শৈবঃ .
লোকে বৈষ্ণবঃ .
অযমেবাচারঃ .
আত্মজ্ঞানান্মোক্ষঃ .
লোকান্ন নিন্দ্যাত্ .
ইত্যধ্যাত্মম্ .
ব্রতং ন চরেত্ .
ন তিষ্ঠেন্নিযমেন .
নিযমান্ন মোক্ষঃ .
কৌলপ্রতিষ্ঠাং ন কুর্য্যাত্ .
সর্বসমো ভবেত্ .
স মুক্তো ভবতি .
পঠেদেতানি সূত্রাণি প্রাতরুত্থায দেশিকঃ .
আজ্ঞাসিদ্ধির্ভবেত্তস্য ইত্যাজ্ঞা পারমেশ্বরী .
যশ্চাচারবিহীনোঽপি যো বা পূজাং ন কুর্বতে .
যদি জ্যেষ্ঠং ন মন্যেত নন্দতে নন্দনে বনে .
শন্নঃ কৌলিকঃ .
ॐ শান্তিঃ শান্তিঃ শান্তিঃ .
.. কৌলোপনিষত্সমাপ্তা ..

          .. ইতি কৌলোপনিষত্ ..