কালিসন্তরণ

.. কলিসন্তরন ..

কলিসন্তরনোপনিষত্

ॐ সহ নাববতু . সহ নৌ ভুনক্তু .
সহ বীর্যংকরবাবহৈ .
তেজস্বিনাবধীতমস্তু মা বিদ্বিষাবহৈ .
ॐ শান্তিঃ শান্তিঃ শান্তিঃ .

হরিঃ ॐ . দ্বাপরান্তে নারদো ব্রহ্মাণং জগাম কথং ভগবন্ গাং
পর্যটন্ কলিং সন্তরেযমিতি .
স হোবাচ ব্রহ্মা সাধু পৃষ্টোঽস্মি সর্বশ্রুতিরহস্যং গোপ্যং
তচ্ছৃণু যেন কলিসংসারং তরিষ্যসি .
ভগবত আদিপুরুষস্য নারাযনস্য নামোচ্চারণমাত্রেণ
নির্ধৃতকলির্ভবতীতি .. ১..

নারদঃ পুনঃ পপ্রচ্ছ তন্নাম কিমিতি . স হোবাচ হিরণ্যগর্ভঃ .

হরে রাম হরে রাম রাম রাম হরে হরে .

হরে কৃষ্ণ হরে কৃষ্ণ কৃষ্ণ কৃষ্ণ হরে হরে ..

ইতি ষোডশকং নাম্নাং কলিকল্মষনাশনম্ .

নাতঃ পরতরোপাযঃ সর্ববেদেষু দৃশ্যতে ..

ষোডশকলাবৃতস্য জীবস্যাবরণবিনাশনম্ .
ততঃ প্রকাশতে পরং ব্রহ্ম মেঘাপাযে রবিরশ্মিমণ্ডলীবেতি .. ২..

পুনর্নারদঃ পপ্রচ্ছ ভগবন্ কোঽস্য বিধিরিতি .
তং হোবাচ নাস্য বিধিরিতি .
সর্বদা শুচিরশুচির্বা পঠন্ ব্রাহ্মণঃ সলোকতাং সমীপতাং
সরূপতাং সাযুজ্যমেতি .
যদাস্য ষোডশকস্য সার্ধত্রিকোটীর্জপতি তদা ব্রহ্মহত্যাং তরতি .
তরতি বীরহত্যাম্ .
স্বর্ণস্তেযাত্ পূতো ভবতি .
বৃষলীগমনাত্ পূতো ভবতি .
পিতৃদেবমনুষ্যাণামপকারাত্ পূতো ভবতি .
সর্বধর্মপরিত্যাগপাপাত্ সদ্যঃ শুচিতামাপ্নুযাত্ .
সদ্যো মুচ্যতে সদ্যো মুচ্যতে ইত্যুপনিষত্ .. ৩..

ॐ সহ নাববতু . সহ নৌ ভুনক্তু .
সহ বীর্যংকরবাবহৈ .
তেজস্বিনাবধীতমস্তু মা বিদ্বিষাবহৈ .
ॐ শান্তিঃ শান্তিঃ শান্তিঃ .