কালাগ্নি

.. কালাগ্নিরুদ্রোপনিষত্ || ৩০ || ..

ব্রহ্মজ্ঞানোপাযতযা যদ্বিভূতিঃ প্রকীর্তিতা |
তমহং কালাগ্নিরুদ্রং ভজতাং স্বাত্মদং ভজে ||

ॐ সহ নাববতু সহ নৌ ভুনক্তু
সহবীর্যং করবাবহৈ
তেজস্বিনাবধীতমস্তু
মা বিদ্বিষাবহৈ
ॐ শান্তিঃ শান্তিঃ শান্তিঃ ||

ॐ অথ কালাগ্নিরুদ্রোপনিষদঃ
সংবতর্কোঽগ্নিরৃষিরনুষ্টুপ্ছন্দঃ
শ্রীকালাগ্নিরুদ্রো দেবতা
শ্রীকালাগ্নিরুদ্রপ্রীত্যর্থে
ভস্মত্রিপুণ্ড্রধারণে বিনিযোগঃ ||
অথ কালাগ্নিরুদ্রং ভগবন্তং সনত্কুমারঃ পপ্রচ্ছ
অধীহি ভগবংস্ত্রিপুণ্ড্রবিধিং সতত্ত্বং
কিং দ্রব্যং কিযত্স্থানং কতিপ্রমাণং কা রেখা
কে মন্ত্রাঃ কা শক্তিঃ কিং দৈবতং
কঃ কর্তা কিং ফলমিতি চ |
তং হোবাচ ভগবান্কালাগ্নিরুদ্রঃ
যদ্দ্রব্যং তদাগ্নেযং ভস্ম
সদ্যোজাতাদিপঞ্চব্রহ্মমন্ত্রৈঃ
পরিগৃহ্যাগ্নিরিতি ভস্ম বাযুরিতি ভস্ম জলমিতি ভস্ম
স্থলমিতি ভস্ম ব্যোমেতি ভস্মেত্যনেনাভিমন্ত্র্য
মানস্তোক ইতি সমুদ্ধৃত্য
মা নো মহান্তমিতি জলেন সংসৃজ্য
ত্রিযাযুষমিতি শিরোললাটবক্ষঃস্কন্ধেষু
ত্রিযাযুষৈস্ত্র্যম্বকৈস্ত্রিশক্তিভিস্তির্যক্তিস্রো
রেখাঃ প্রকুর্বীত ব্রতমেতচ্ছাম্ভবং
সর্বেষু দেবেষু বেদবাদিভিরুক্তং
ভবতি তস্মাত্তত্সমাচরেন্মুমুক্ষুর্ন পুনর্ভবায ||
অথ সনত্কুমারঃ পপ্রচ্ছ প্রমাণমস্য
ত্রিপুণ্ড্রধারণস্য ত্রিধা রেখা
ভবত্যাললাটাদাচক্ষুষোরামূর্ধ্নোরাভ্রুবোর্মধ্যতশ্চ
যাস্য প্রথমা রেখা সা গার্হপত্যশ্চাকারো
রজোভূর্লোকঃ স্বাত্মা ক্রিযাশক্তিরৃগ্বেদঃ
প্রাতঃসবনং মহেশ্বরো দেবতেতি যাস্য দ্বিতীযা রেখা
সা দক্ষিণাগ্নিরুকারঃ সত্বমন্তরিক্ষমন্তরাত্মা-
চেচ্ছাশক্তির্যজুর্বেদো মাধ্যংদিনং সবনং
সদাশিবো দেবতেতি যাস্য তৃতীযা রেখা সাহবনীযো মকারস্তমো
দ্যৌর্লোকঃ পরমাত্মা জ্ঞানশক্তিঃ সামবেদস্তৃতীযসবনং
মহাদেবো দেবতেতি এবং ত্রিপুণ্ড্রবিধিং ভস্মনা করোতি
যো বিদ্বান্ব্রহ্মচারী গৃহী বানপ্রস্থো যতির্বা
স মহাপাতকোপপাতকেভ্যঃ পূতো ভবতি
স সর্বেষু তীর্থেষু স্নাতো ভবতি
স সর্বান্বেদানধীতো ভবতি
স সর্বান্দেবাঞ্জ্ঞাতো ভবতি
স সততং সকলরুদ্রমন্ত্রজাপী ভবতি
স সকলভোগান্ভুঙ্ক্তে দেহং ত্যক্ত্বা শিবসাযুজ্যমেতি ন
স পুনরাবর্ততে ন স পুনরাবর্তত
ইত্যাহ ভগবান্কালাগ্নিরুদ্রঃ ||
যস্ত্বেতদ্বাধীতে সোঽপ্যেবমেব ভবতীত্যোং সত্যমিত্যুপনিষত্ || ৩০ ||

ॐ সহ নাববতু সহ নৌ ভুনক্তু
সহবীর্যং করবাবহৈ
তেজস্বিনাবধীতমস্তু
মা বিদ্বিষাবহৈ
ॐ শান্তিঃ শান্তিঃ শান্তিঃ ||

ইতি কালাগ্নিরুদ্রোপনিষত্সমাপ্তা ||