কঠরুদ্র

.. কঠরুদ্রোপনিষত্   ..

পরিব্রজ্যাধর্মপূগালংকারা যত্পদং যযুঃ .
তদহং কঠবিদ্যার্থং রামচন্দ্রপদং ভজে ..
ॐ সহনাববতু সহ নৌ ভুনক্তু সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
হরিঃ ॐ .. দেবা হ বৈ ভগবন্তমব্রুবন্নধীহি ভগবন্ব্রহ্মবিদ্যাম্ .
স প্রজাপতিরব্রবীত্সশিখান্কেশান্নিষ্কৃত্য বিসৃজ্য যজ্ঞোপবীতং
নিষ্কৃত্য পুত্রং দৃষ্ট্বা ত্বং ব্রহ্মা ত্বং যজ্ঞস্ত্বং বষট্কার-
স্ত্বমোঙ্কারস্ত্বং স্বাহা ত্বং স্বধা ত্বং ধাতা ত্বং বিধাতা ত্বং
প্রতিষ্ঠাঽসীতি বদেত্ . অথ পুত্রো বদত্যহং ব্রহ্মাহং যজ্ঞোঽহং
বষট্কারোঽহমোংকারোঽহং স্বাহাহং স্বধাহং ধাতাহং
বিধাতাহং ত্বষ্টাহং প্রতিষ্ঠাস্মীতি .
তান্যেতান্যনুব্রজন্নাশ্রুমাপাতযেত্ .
যদশ্রুমাপাতযেত্প্রজাং বিচ্ছিন্দ্যাত্ .
প্রদক্ষিণমাবৃত্ত্যৈতচ্চৈতচ্চানবেক্ষমাণাঃ প্রত্যাযন্তি .
স স্বর্গ্যো ভবতি ব্রহ্মচারী বেদমধীত্য বেদোক্তাচরিতব্রহ্মচর্যো
দারানাহৃত্য পুত্রানুত্পাদ্য তাননুপাদিভির্বিতত্যেষ্ট্বা চ
শক্তিতো যজ্ঞৈঃ . তস্য সংন্যাসো গুরুভিরনুজ্ঞাতস্য বান্ধবৈশ্চ .
সোঽরণ্যং পরেত্য দ্বাদশরাত্রং পযসাগ্নিহোত্রং জুহুযাত্ .
দ্বাদশরাত্রং পযোভক্ষা স্যাত্ . দ্বাদশরাত্রস্যান্তে
অগ্নযে বৈশ্বানরায প্রজাপতযে চ প্রাজাপত্যং চরুং
বৈষ্ণবং ত্রিকপালমগ্নিং সংস্থিতানি পূর্বাণি দারুপাত্রাণ্যাগ্নৌ
জুহুযাত্ . মৃণ্মযান্যপ্সু জুহুযাত্ . তৈজসানি গুরবে দদ্যাত্ .
মা ত্বং মামপহায পরাগাঃ . নাহং ত্বামপহায পরাগামিতি .
গার্হপত্যদক্ষিণাগ্ন্যাহবনীযেষ্বরণিদেশাদ্ভস্মমুষ্টিং
পিবেদিত্যেকে . সশিখান্কেশান্নিষ্কৃত্য বিসৃজ্য যজ্ঞোপবীতং
ভূঃস্বাহেত্যপ্সু জুহুযাত্ . অত ঊর্ধ্বমনশনমপাং প্রবেশ-
মগ্নিপ্রবেশং বীরাধ্বানং মহাপ্রস্থানং বৃদ্ধাশ্রমং বা
গচ্ছেত্ . পযসা যং প্রাশ্নীযাত্সোঽস্য সাযংহোমঃ . যত্প্রাতঃ
সোঽযং প্রাতঃ . যদ্দর্শে তদ্দর্শনম্ . যত্পৌর্ণমাস্যে  তত্পৌর্ণমাস্যম্ .
যদ্বসন্তে কেশশ্মশ্রুলোমনখানি বাপযেত্সোঽস্যাগ্নিষ্টোমঃ .
সংন্যস্যাগ্নিং ন পুনরাবর্তযেন্মৃত্যুর্জযমাবহমিত্যধ্যাত্ম-
মন্ত্রান্পঠেত্ . স্বস্তি সর্বজীবেভ্য ইত্যুক্ত্বাত্মানমনন্যং ধ্যাযন্ তদূর্ধ্ববাহুর্বিমুক্তমার্গো ভবেত্ .
অনিকেতশ্চরেত্ . ভিক্ষাশী যত্কিংচিন্নাদ্যাত্ . লবৈকং ন ধাবযেজ্জন্তুসংরক্ষণার্থং বর্ষবর্জমিতি . তদপি শ্লোকা ভবন্তি .
কুণ্ডিকাং চমসং শিক্যং ত্রিবিষ্টমুপানহৌ .
শীতোপঘাতিনীং কন্থাং কৌপীনাচ্ছাদনং তথা .. ১..
পবিত্রং জ্ঞানশাটীং চ উত্তরাসঙ্গমেব চ .
যজ্ঞোপবীতং বেদাংশ্চ সর্বং তদ্বর্জযেদ্যতিঃ .. ২..
স্নানং পানং তথা শৌচমদ্ভিঃ পূতাভিরাচরেত্ .
নদীপুলিনশাযী স্যাদ্দেবাগারেষু বা স্বপেত্ .. ৩..
নাত্যর্থং সুখদুঃখাভ্যাং শরীরমুপতাযেত্ .
স্তূযমানো ন তুষেত নিন্দিতো ন শপেত্পরান্ .. ৪..
ব্রহ্মচর্যেণ সংতিষ্ঠেদপ্রমাদেন মস্করী .
দর্শনং স্পর্শনং কেলিঃ কীর্তনং গুহ্যভাষণম্ .. ৫..
সংকল্পোঽধ্যবসাযশ্চ ক্রিযান্নির্বৃত্তিরেব চ .
এতন্মৈথুনমষ্টাঙ্গং প্রবদন্তি মনীষিণঃ .. ৬..
বিপরীতং ব্রহ্মচর্যমনুষ্ঠেযং মুমুক্ষুভিঃ .
যজ্জগদ্ভাসকং ভানং নিত্যং ভাতি স্বতঃ স্ফুরত্ .. ৭..
স এব জগতঃ সাক্ষী সর্বাত্মা বিমলাকৃতিঃ .
প্রতিষ্ঠা সর্বভূতানাং প্রজ্ঞানঘনলক্ষণঃ .. ৮..
ন কর্মণা ন প্রজযা ন চান্যেনাপি কেচিত্ .
ব্রহ্মবেদনমাত্রেণ ব্রহ্মাপ্নোত্যেব মানবঃ .. ৯..
তদ্বিদ্যা বিষযং ব্রহ্ম সত্যজ্ঞানসুখাদ্বযম্ .
সংসারে চ গুহাবাচ্যে মাযাজ্ঞানাদিসংজ্ঞকে .. ১০..
নিহিতং ব্রহ্ম যো বেদ পরমে ব্যোম্নি সংজ্ঞিতে .
সোঽশ্নুতে সকলান্কামান্ক্রমেণৈব দ্বিজোত্তমঃ .. ১১..
প্রত্যগাত্মানমজ্ঞানমাযাশক্তেশ্চ সাক্ষিণম্ .
একং ব্রহ্মাহমস্মীতি ব্রহ্মৈব ভবতি স্বযম্ .. ১২..
ব্রহ্মভূতাত্মনস্তস্মাদেতস্মাচ্ছ্ক্তিমিশ্রিতাত্ .
অপঞ্চীকৃত আকাশসংভূতো রজ্জুসর্পবত্ .. ১৩..
আকাশাদ্বাযুসংজ্ঞস্তু স্পর্শোঽপঞ্চীকৃতঃ পুনঃ .
বাযোরগ্নিস্তথা চাগ্নেরাপ অদ্ভ্যো বসুন্ধরা .. ১৪..
তানি ভূতানি সূক্ষ্মাণি পঞ্চীকৃত্যেশ্বরস্তদা .
তেভ্য এব বিসৃষ্টং তদ্ব্রহ্মাণ্ডাদি শিবেন হ .. ১৫..
ব্রহ্মাণ্ডস্যোদরে দেবা দানবা যক্ষকিন্নরাঃ .
মনুষ্যাঃ পশুপক্ষ্যাদ্যাস্তত্তত্কর্মানুসারতঃ .. ১৬..
অস্থিস্নায্বাদিরূপোঽযং শরীরং ভাতি দেহিনাম্ .
যোঽযমন্নমযো হ্যাত্মা ভাতি সর্বশরীরিণঃ .. ১৭..
ততঃ প্রাণমযো হ্যাত্মা বিভিন্নশ্চান্তরঃ স্থিতঃ .
ততো বিজ্ঞান আত্মা তু ততোঽন্যশ্চান্তরঃ স্বতঃ .. ১৮..
আনন্দময আত্মা তু ততোঽন্যশ্চান্তরস্থিতঃ .
যোঽযমন্নমযঃ সোঽযং পূর্ণঃ প্রাণমযেন তু .. ১৯..
মনোমযেন প্রাণোঽপি তথা পূর্ণঃ স্বভাবতঃ .
তথা মনোমযো হ্যাত্মা পূর্ণো জ্ঞানমযেন তু .. ২০..
আনন্দেন সদা পূর্ণঃ সদা জ্ঞানমযঃ সুখম্ .
তথানন্দমযশ্চাপি ব্রহ্মণোঽন্যেন সাক্ষিণা .. ২১..
সর্বান্তরেণ পূর্ণশ্চ ব্রহ্ম নান্যেন কেনচিত্ .
যদিদং ব্রহ্মপুচ্ছাখ্যং সত্যজ্ঞানদ্বযাত্মকম্ .. ২২..
সারমেব রসং লব্ধ্বা সাক্ষাদ্দেহী সনাতনম্ .
সুখী ভবতি সর্বত্র অন্যথা সুখতা কুতঃ .. ২৩..
অসত্যস্মিন্পরানন্দে স্বাত্মভূতেঽখিলাত্মনাম্ .
কো জীবতি নরো জন্তুঃ কো বা নিত্যং বিচেষ্টতে .. ২৪..
তস্মাত্সর্বাত্মনা চিত্তে ভাসমানো হ্যসৌ নরঃ .
আনন্দযতি দুঃখাঢ্যং জীবাত্মানং সদা জনঃ .. ২৫..
যদা হ্যেবৈষ এতস্মিন্নদৃশ্যত্বাদিলক্ষণে .
নির্ভেদং পরমাদ্বৈতং বিন্দতে চ মহাযতিঃ .. ২৬..
তদেবাভযমত্যন্তকল্যাণং পরমামৃতম্ .
সদ্রূপং পরমং ব্রহ্ম ত্রিপরিচ্ছেদবর্জিতম্ .. ২৭..
যদা হ্যেবৈষ এতস্মিন্নল্পমপ্যন্তরং নরঃ .
বিজানাতি তদা তস্য ভযং স্যান্নাত্র সংশযঃ .. ২৮..
অস্যৈবানন্দকোশেন স্তম্বান্তা বিষ্ণুপূর্বকাঃ .
ভবন্তি সুখিনো নিত্যং তারতম্যক্রমেণ তু .. ২৯..
তত্তত্পদবিরক্তস্য শ্রোত্রিযস্য প্রসাদিনঃ .
স্বরূপভূত আনন্দঃ স্বযং ভাতি পরে যথা .. ৩০..
নিমিত্তং কিংচিদাশ্রিত্য খলু শব্দঃ প্রবর্ততে .
যতো বাচো নিবর্তন্তে নিমিত্তানামভবতঃ .. ৩১..
নির্বিশেষে পরানন্দে কথং শব্দঃ প্রবর্ততে .
তস্মাদেতন্মনঃ সূক্ষ্মং ব্যাবৃতং সর্বগোচরম্ .. ৩২..
যস্মাচ্ছ্রোত্রত্বগক্ষ্যাদিখাদিকর্মেন্দ্রিযাণি চ .
ব্যাবৃত্তানি পরং প্রাপ্তুং ন সমর্থানি তানি তু .. ৩৩..
তদ্ব্রহ্মানন্দমদ্বন্দ্বং নির্গুণং সত্যচিদ্ঘনম্ .
বিদিত্বা স্বাত্মরূপেণ ন বিভেতি কুতশ্চন .. ৩৪..
এবং যস্তু বিজানাতি স্বগুরোরুপদেশতঃ .
স সাধ্বাসাধুকর্মভ্যাং সদা ন তপতি প্রভুঃ .. ৩৫..
তাপ্যতাপকরূপেণ বিভাতমখিলং জগত্ .
প্রত্যগাত্মতযা ভাতি জ্ঞানাদ্বেদান্তবাক্যজাত্ .. ৩৬..
শুদ্ধমীশ্বরচৈতন্যং জীবচৈতন্যমেব চ .
প্রমাতা চ প্রমাণং চ প্রমেযং চ ফলং তথা .. ৩৭..
ইতি সপ্তবিধং প্রোক্তং ভিদ্যতে ব্যবহারতঃ .
মাযোপাধিবিনির্মুক্তং শুদ্ধমিত্যভিধীযতে .. ৩৮..
মাযাসংবন্ধতশ্চেশো জীবোঽবিদ্যাবশস্তথা .
অন্তঃকরণসংবন্ধাত্প্রমাতেত্যভিধীযতে .. ৩৯..
তথা তদ্বৃত্তিসংবন্ধাত্প্রমাণমিতি কথ্যতে .
অজ্ঞাতমপি চৈতন্যং প্রমেযমিতি কথ্যতে .. ৪০..
তথা জ্ঞাতং চ চৈতন্যং ফলমিত্যভিধীযতে .
সর্বোপাধিবিনির্মুক্তং স্বাত্মানং ভাবযেত্সুধীঃ .. ৪১..
এবং যো বেদ তত্ত্বেন ব্রহ্মভূযায কল্পতে .
সর্ববেদান্তসিদ্ধান্তসারং বচ্মি যথার্থতঃ .. ৪২..
স্বযং মৃত্বা স্বযং ভূত্বা স্বযমেবাবশিষ্যতে .. ইত্যুপনিষত্ ..
ॐ সহনাববতু সহ নৌ ভুনক্তু সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি কঠরুদ্রোপনিষত্সমাপ্তা ..