অব্যক্ত

.. অব্যক্তোপনিষত্ ..
স্বাজ্ঞানাসুররাড্গ্রাসস্বজ্ঞাননরকেসরী .
প্রতিযোগিবিনির্মুক্তং ব্রহ্মমাত্রং করোতু মাম্ ..
ॐ আপ্যাযন্তু মমাঙ্গানি বাক্প্রাণশ্চক্ষুঃ শ্রোত্রমথো
বলমিন্দ্রিযাণি চ .. সর্বাণি সর্বং ব্রহ্মোপনিষদং মাহং
ব্রহ্ম নিরাকুর্যাং মা মা ব্রহ্ম নিরাকরোদনিরাকরণ-
মস্ত্বনিরাকরণং মেস্তু তদাত্মনি নিরতে য উপনিষত্সু ধর্মাস্তে
মযি সন্তু তে মযি সন্তু .. ॐ শান্তিঃ শান্তিঃ শান্তিঃ ..
হরিঃ ॐ . পুরা কিলেদং ন কিংচন্নাসীন্ন দ্যৌর্নান্তরিক্ষং
ন পৃথিবী কেবলং জ্যোতীরূপমনাদ্যনন্তমনণ্বস্থূলরূপমরূপং
রূপবদবিজ্ঞেযং জ্ঞানরূপমানন্দমযমাসীত্ .
তদনন্যত্তদ্দ্বেধাভূদ্ধরিতমেকং রক্তমপরম্ .
তত্র যদ্রক্তং তত্পুংসো রূপমভূত্ . যদ্ধরিতং তন্মাযাযাঃ .
তৌ সমগচ্ছতঃ . তযোর্বীর্যমেবমনন্দত্ . তদবর্ধত .
তদণ্ডমভূধৈমম্ . তত্পরিণমমানমভূত্ . ততঃ
পরমেষ্ঠী ব্যজাযত . সোঽভিজিজ্ঞাসত কিং মে কুলং কিং মে
কৃত্যমিতি . তং হ বাগদৃশ্যমানাভ্যুবাচ ভোভো প্রজাপতে
ত্বমব্যক্তাদুত্পন্নোঽসি ব্যক্তং তে কৃত্যমিতি . কিমব্যক্তং
যস্মাদহমাসিষম্ . কিং তদ্ব্যক্তং যন্মে কৃত্যমিতি .
সাব্রবীদবিজ্ঞেযং হি তত্সৌম্য তেজঃ . যদবিজ্ঞেযং তদব্যক্তম্ .
তচ্চেজ্জিজ্ঞাসসি মাবগচ্ছেতি . স হোবাচ কৈষা ত্বং
ব্রহ্মবাগ্যদসি শংসাত্মানমিতি . সা ত্বব্রবীত্তপসা মাং
বিজিজ্ঞাসস্বেতি . স হ সহস্রং সমা ব্রহ্মচর্যমধ্যুবাসাধ্যুবাস .. ১..
অথাপশ্যদৃচমানুষ্টুভীং পরমাং বিদ্যাং
যস্যাঙ্গান্যন্যে মন্ত্রাঃ . যত্র ব্রহ্ম প্রতিষ্ঠিতম্ .
বিশ্বেদেবাঃ প্রতিষ্ঠিতাঃ . যস্তাং ন বেদ কিমন্যৈর্বেদৈঃ
করিষ্যতি . তাং বিদিত্বা স চ রক্তং জিজ্ঞাসযামাস .
তামেবমনূচানাং গাযন্নাসিষ্ট . সহস্রং সমা
আদ্যন্তনিহিতোঙ্কারেণ পদান্যগাযত্ . সহস্রং
সমাস্তথৈবাক্ষরশঃ . ততোঽপশ্যজ্জ্যোতির্মযং
শ্রিযালিঙ্গিতং সুপর্ণরথং শেষফণাচ্ছদিতমৌলিং
মৃগমুখং নরবপুষং শশিসূর্যহব্যবাহনাত্মকনযনত্রযম্ .
ততঃ প্রজাপতিঃ প্রণিপপাত নমোনম ইতি . তথৈবর্চাথ তমস্তৌত্ .
উগ্রমিত্যাহ উগ্রঃ খলু বা এষ মৃগরূপত্বাত্ . বীরমিত্যাহ
বীরো বা এষ বীর্যবত্ত্বাত্ . মহাবিষ্ণুমিত্যাহ মহতাং বা অযং
মহান্রোদসী ব্যাপ্য স্থিতঃ . জ্বলন্তমিত্যাহ জ্বলন্নিব খল্বসাববস্থিতঃ .
সর্বতোমুখমিত্যাহ সর্বতঃ খল্বযং মুখবান্বিশ্বরূপত্বাত্ .
নৃসিংহমিত্যাহ যথা যজুরেবৈতত্ . ভীষণমিত্যাহ ভীষা বা
অস্মাদাদিত্য উদেতি ভীতশ্চন্দ্রমা ভীতো বাযুর্বাতি ভীতোঽগ্নির্দহতি
ভীতঃ পর্জন্যো বর্ষতি . ভদ্রমিত্যাহ ভদ্রঃ খল্বযং শ্রিযা জুষ্টঃ .
মৃত্যোর্মৃত্যুমিত্যাহ মৃত্যোর্বা অযং মৃত্যুরমৃতত্বং প্রজানামন্নাদানাম্ .
নমামীত্যাহ যথা যজুরেবৈতত্ . অহমিত্যাহ যথা যজুরেবৈতত্ .. ২..
অথ ভগবাংস্তমব্রবীত্প্রজাপতে প্রীতোঽহং কিং তবেপ্সিতং
তদাশংসেতি . স হোবাচ ভগবন্নব্যক্তাদুত্পন্নোঽস্মি
ব্যক্তং মম কৃত্যমিতি পুরাশ্রাবি . তত্রাব্যক্তং ভবানিত্যজ্ঞাযি
ব্যক্তং মে কথযেতি . ব্যক্তং বৈ বিশ্বং চরাচরাত্মকম্ .
যদ্ব্যজ্যতে তদ্ব্যক্তস্য ব্যক্তত্বমিতি . স হোবাচ ন শক্নোমি
জগত্স্রষ্টুমুপাযং মে কথযেতি . তমুবাচ পুরুষঃ প্রজাপতে
শৃণু সৃষ্টেরুপাযং পরমং যং বিদিত্বা সর্বং জ্ঞাস্যসি .
সর্বত্র শক্ষ্যসি সর্বং করিষ্যসি . ময্যগ্নৌ স্বাত্মানং
হবির্ধ্যাযেত্তযৈবানুষ্টুভর্চা . ধ্যানযজ্ঞোঽযমেব .
এতদ্বৈ মহোপনিষদ্দেবানাং গুহ্যম্ . ন হ বা এতস্য সাম্না
নর্চা ন যজুষার্থো নু বিদ্যতে . য ইমা বেদ স সর্বান্কামানবাপ্য
সর্বাংল্লোকাঞ্জিত্বা মামেবাভ্যুপৈতি ন স পুনরাবর্ততে য এবং বেদেতি .. ৩..
প্রজাপতিস্তং যজ্ঞাযং বসীযাংসমাত্মানং মন্যমানো
মনোযজ্ঞেনেজে . সপ্রণবযা তযৈবর্চা হবির্ধ্যাত্বাত্মান-
মাত্মন্যগ্নৌ জুহুযাত্ . সর্বমজানাত্সর্বত্রাশকত্সর্বমকরোত্ .
য এবংবিদ্বানিমং ধ্যানযজ্ঞমনুতিষ্ঠেত্স সর্বজ্ঞোঽনন্তশক্তিঃ
সর্বকর্তা ভবতি . স সর্বাং৅ল্লোকাঞ্জিত্বা ব্রহ্ম পরং প্রাপ্নোতি .. ৪..
অথ প্রজাপতির্লোকান্সিসৃক্ষমাণস্তস্যা এব বিদ্যাযা যানি
ত্রিংশদক্ষরাণি তেভ্যস্ত্রীং৅ল্লোকান্ . অথ দ্বে দ্বে অক্ষরে
তাভ্যামুভযতো দধার . তস্যা এবর্চো দ্বাত্রিংশদ্ভিরক্ষরৈ-
স্তান্দেবান্নির্মমে . সর্বৈরেব স ইন্দ্রোঽভবত্ . তস্মাদিন্দ্রো
দেবানামধিকোঽভবত্ . য এবং বেদ সমানানামধিকো ভবেত্ .
তস্যা একাদশভিঃ পাদৈরেকাদশ রুদ্রান্নির্মমে . তস্যা
একাদশভিরেকাদশাদিত্যান্নির্মমে . সর্বৈরেব স বিষ্ণুরভবত্ .
তস্মাদ্বিষ্ণুরাদিত্যানামধিকোঽভবত্ . য এবং বেদ সমানানামধিকো
ভবেত্ . স চতুর্ভিশ্চতুর্ভিরক্ষরৈরষ্টৌ বসূনজনযত্ .
স তস্যা আদ্যৈর্দ্বাদশভিরক্ষরৈর্ব্রাহ্মণমজনযত্ .
দশভির্দশভির্বিট্ক্ষত্রে . তস্মাদ্ব্রাহ্মণো মুখ্যো ভবতি .
এবং তন্মুখ্যো ভবতি য এবং বেদ .
তূষ্ণীং শূদ্রমজনযত্তস্মাচ্ছূদ্রো নির্বিদ্যোঽভবত্ .
ন বেদং ইবা ন নক্তমাসীদব্যাবৃতম্ .
স প্রজাপতিরানুষ্টুভাভ্যামর্ধর্চাভ্যামহোরাত্রাবকল্পযত্ .
ততো ব্যৈচ্ছত্ ব্যেবাস্মা উচ্ছতি . অথো তম এবাপহতে .
ঋগ্বেদমস্যা আদ্যাত্পাদাদকল্পযত্ . যজুর্দ্বিতীযাত্ .
সাম তৃতীযাত্ . অথর্বাঙ্গিরসশ্চতুর্থাত্ যদষ্টাক্ষরপদা
তেন গাযত্রী . যদেকাদশপদা তেন ত্রিষ্টুপ্ .
যচ্চতুষ্পদা তেন জগতী যদ্দ্বাত্রিংশদক্ষরা তেনানুষ্টুপ্ .
সা বা এষা সর্বাণি ছন্দাংসি . য ইমাং সর্বাণি ছন্দাংসি বেদ .
সর্বং জগদানুষ্টুভ এবোত্পন্নমনুষ্টুপ্প্রতিষ্ঠিতং
প্রতিতিষ্ঠতি যশ্চৈবং বেদ .. ৫..
অথ যদা প্রজাঃ সৃষ্টা ন জাযন্তে প্রজাপতিঃ কথং
ন্বিমাঃ প্রজাঃ সৃজেযমিতি চিন্তযন্নুগ্রমিতীমামৃচং
গাতুমুপাক্রামত্ . ততঃ প্রথমপাদাদুগ্ররূপো দেবঃ
প্রাদুরভূত্ একঃ শ্যামঃ পুরতো রক্তঃ পিনাকী স্ত্রীপুংসরূপস্তং
বিভজ্য স্ত্রীষু তস্য স্ত্রীরূপং পুংসি চ পুংরূপং ব্যধাত্ .
উভাভ্যানংশাভ্যাং সর্বমাদিষ্টঃ . ততঃ প্রজাঃ প্রজাযন্তে .
য এবং বেদ প্রজাপতেঃ সোঽপি ত্র্যম্বক ইমামৃচমুদ্গায-
ন্নুদ্গ্রথিতজটাকলাপঃ প্রত্যগ্জ্যোতিষ্যাত্মন্যেব রন্তারমিতি .
ইন্দ্রো বৈ কিল দেবানামনুজাবর আসীত্ . তং প্রজাপতিরব্রবীদ্গচ্ছ
দেবানামধিপতির্ভবেতি . সোঽগচ্ছত্ . তং দেবা ঊচুরনুজাবরোঽসি
ত্বমস্মাকং কুতস্ত্বাধিপত্যমিতি . স প্রজাপতিমভ্যেত্যোবাচৈবং
দেবা ঊচুরনুজাবরস্য কুতস্তবাধিপত্যমিতি . তং প্রজাপতিরিন্দ্রং
ত্রিকলশৈরমৃতপূর্ণৈরানুষ্টুভাভিমন্ত্রিতৈরভিষিচ্য তং
সুদর্শনেন দক্ষিণতো ররক্ষ পাঞ্চজন্যেন বামতো দ্বযেনৈব
সুরক্ষিতোঽভবত্ . রৌক্মে ফলকে সূর্যবর্চসি মন্ত্রমানুষ্টুভং
বিন্যস্য তদস্য কণ্ঠে প্রত্যমুঞ্চত্ . ততঃ সুদুর্নিরীক্ষোঽভবত্ .
তস্মৈ বিদ্যামানুষ্টুভীং প্রাদাত্ . ততো দেবাস্তমাধিপত্যাযানুমেনিরে .
স স্বরাডভূত্ . য এবং বেদ স্বরাড্ ভবেত্ . সোঽমন্যত পৃথিবীমপি
কথমপাং জযেযমিতি . স প্রজাপতিমুপাধাবত্ .
তস্মাত্প্রজাপতিঃ কমঠাকারমিন্দ্রনাগভুজগেন্দ্রাধারং
ভদ্রাসনং প্রাদাত্ . স পৃথিবীমভ্যজযত্ . ততঃ স
উভযোর্লোকযোরধিপতিরভূত্ . য এবং বেদোভযোর্লোকযোরধিপতির্ভবতি .
স পৃথিবীং জযতি যো বা অপ্রতিষ্ঠিতং শিথিলং ভ্রাতৃবেভ্যো
বসীযান্ভবতি যশ্চৈবং বেদ যশ্চৈবং বেদ .. ৬..
য ইমাং বিদ্যামধীতে স সর্বান্বেদানধীতে . স সর্বৈঃ ক্রতুভির্যজতে .
স সর্বতীর্থেষু স্নাতি . স মহাপাতকোপপাতকৈঃ প্রমুচ্যতে . স
ব্রহ্মবর্চসং মহদাপ্নুযাত্ . আব্রহ্মণঃ পূর্বানাকল্পাঽশ্চোত্তরাংশ্চ
বংশান্পুনীতে . নৈনমপস্মারাদযো রোগা আদিধেযুঃ . সযক্ষাঃ
সপ্রেতপিশাচা অপ্যেনং স্পৃষ্ট্বা দৃষ্ট্বা শ্রুত্বা বা
পাপিনঃ পুণ্যাং৅ল্লোকানবাপ্নুযুঃ . চিন্তিতমাত্রাদস্য সর্বেঽর্থাঃ
সিদ্ধ্যেযুঃ . পিতরমিবৈনং সর্বে মন্যন্তে . রাজানশ্চাস্যাদেশকারিণো
ভবন্তি . ন চাচার্যব্যতিরিক্তং শ্রেযাংসং দৃষ্ট্বা নমস্কুর্যাত্ .
ন চাস্মাদুপাবরোহেত্ . জীবন্মুক্তশ্চ ভবতি . দেহান্তে তমসঃ পরং
ধাম প্রাপ্নুযাত্ . যত্র বিরাণ্ নৃসিংহোঽবভাসতে তত্র খলূপাসতে .
তত্স্বরূপধ্যানপরা মুনয আকল্পান্তে তস্মিন্নেবাত্মনি লীযন্তে . ন চ
পুনরাবর্তন্তে . ন চেমাং বিদ্যামশ্রদ্দধানায ব্রূযান্নাসূযাবতে
নানূচানায নাবিষ্ণুভক্তায নানৃতিনে নাতপসে নাদান্তায
নাশান্তায নাদীক্ষিতায নাধর্মশীলায ন হিংসকায নাব্রহ্মচারিণ
ইত্যেষোপনিষত্ ..
ॐ আপ্যাযন্তু মমাঙ্গানি বাক্প্রাণশ্চক্ষুঃ শ্রোত্রমথো
বলমিন্দ্রিযাণি চ .. সর্বাণি সর্বং ব্রহ্মোপনিষদং মাহং
ব্রহ্ম নিরাকুর্যাং মা মা ব্রহ্ম নিরাকরোদনিরাকরণ-
মস্ত্বনিরাকরণং মেস্তু তদাত্মনি নিরতে য উপনিষত্সু ধর্মাস্তে
মযি সন্তু তে মযি সন্তু .. ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইত্যব্যক্তোপনিষত্সমাপ্তা ..