অমৃতনাদ

.. অমৃতনাদোপনিষত্   ২১ ..
অমৃতনাদোপনিষত্প্রতিপাদ্যং পরাক্ষরম্ .
ত্রৈপদানন্দসাম্রাজ্যং হৃদি মে ভাতু সন্ততম্ ..
ॐ সহ নাববতু . সহ নৌ ভুনক্তু . সহ বীর্যং করবাবহৈ .
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
শাস্ত্রাণ্যধীত্য মেধাবী অভ্যস্য চ পুনঃ পুনঃ .
পরমং ব্রহ্ম বিজ্ঞায উল্কাবত্তান্যথোত্সৃজেত্ .. ১..
ওঙ্কারং রথমারুহ্য বিষ্ণুং কৃত্বাথ সারথিম্ .
ব্রহ্মলোকপদান্বেষী রুদ্রারাধনতত্পরঃ .. ২..
তাবদ্রথেন গন্তব্যং যাবদ্রথপথি স্থিতঃ .
স্থিত্বা রথপথস্থানং রথমুত্সৃজ্য গচ্ছতি .. ৩..
মাত্রালিঙ্গপদং ত্যক্ত্বা শব্দব্যঞ্জনবর্জিতম্ .
অস্বরেণ মকারেণ পদং সূক্ষ্মং চ গচ্ছতি .. ৪..
শব্দাদিবিষযাঃ পঞ্চ মনশ্চৈবাতিচঞ্চলম্ .
চিন্তযেদাত্মনো রশ্মীন্প্রত্যাহারঃ স উচ্যতে .. ৫..
প্রত্যাহারস্তথা ধ্যানং প্রাণাযামোঽথ ধারণা .
তর্কশ্চৈব সমাধিশ্চ ষডঙ্গো যোগ উচ্যতে .. ৬..
যথা পর্বতধাতূনাং দহ্যন্তে ধমনান্মলাঃ .
তথেন্দ্রিযকৃতা দোষা দহ্যন্তে প্রাণনিগ্রহাত্ .. ৭..
প্রাণাযামৈর্দহেদ্দোষান্ধারণাভিশ্চ কিল্বিষম্ .
প্রত্যাহারেণ সংসর্গাদ্ধ্যানেনানীশ্বরান্গুণান্ .. ৮..
কিল্বিষং হি ক্ষযং নীত্বা রুচিরং চৈব চিন্তযেত্ .. ৯..
রুচিরং রেচকং চৈব বাযোরাকর্ষণং তথা .
প্রাণাযামস্ত্রযঃ প্রোক্তা রেচপূরককুম্ভকাঃ .. ১০..
সব্যাহৃতিং সপ্রণবাং গাযত্রীং শিরসা সহ .
ত্রিঃ পঠেদাযতপ্রাণঃ প্রাণাযামঃ স উচ্যতে .. ১১..
উত্ক্ষিপ্য বাযুমাকাশং শূন্যং কৃত্বা নিরাত্মকম্ .
শূন্যভাবেন যুঞ্জীযাদ্রেচকস্যেতি লক্ষণম্ .. ১২..
বক্ত্রেণোত্পলনালেন তোযমাকর্ষযেন্নরঃ .
এবং বাযুর্গ্রহীতব্যঃ পূরকস্যেতি লক্ষণম্ .. ১৩..
নোচ্ছ্বসেন্ন চ নিশ্বাসেত্ গাত্রাণি নৈব চালযেত্ .
এবং ভাবং নিযুঞ্জীযাত্ কুম্ভকস্যেতি লক্ষণম্ .. ১৪..
অন্ধবত্পশ্য রূপাণি শব্দং বধিরবত্ শৃণু .
কাষ্ঠবত্পশ্য তে দেহং প্রশান্তস্যেতি লক্ষণম্ .. ১৫..
মনঃ সঙ্কল্পকং ধ্যাত্বা সংক্ষিপ্যাত্মনি বুদ্ধিমান্ .
ধারযিত্বা তথাঽঽত্মানং ধারণা পরিকীর্তিতা .. ১৬..
আগমস্যাবিরোধেন ঊহনং তর্ক উচ্যতে .
সমং মন্যেত যং লব্ধ্বা স সমাধিঃ প্রকীর্তিতঃ .. ১৭..
ভূমিভাগে সমে রম্যে সর্বদোষবিবর্জিতে .
কৃত্বা মনোমযীং রক্ষাং জপ্ত্বা চৈবাথ মণ্ডলে .. ১৮..
পদ্মকং স্বস্তিকং বাপি ভদ্রাসনমথাপি বা .
বদ্ধ্বা যোগাসনং সম্যগুত্তরাভিমুখঃ স্থিতঃ .. ১৯..
নাসিকাপুটমঙ্গুল্যা পিধাযৈকেন মারুতম্ .
আকৃষ্য ধারযেদগ্নিং শব্দমেবাভিচিন্তযেত্ .. ২০..
ওমিত্যেকাক্ষরং ব্রহ্ম ওমিত্যেকেন রেচযেত্ .
দিব্যমন্ত্রেণ বহুশঃ কুর্যাদাত্মমলচ্যুতিম্ .. ২১..
পশ্চাদ্ধ্যাযীত পূর্বোক্তক্রমশো মন্ত্রবিদ্বুধঃ .
স্থূলাতিস্থূলমাত্রাযং নাভেরূর্ধ্বরুপক্রমঃ .. ২২..
তির্যগূর্ধ্বমধো দৃষ্টিং বিহায চ মহামতিঃ .
স্থিরস্থাযী বিনিষ্কম্পঃ সদা যোগং সমভ্যসেত্ .. ২৩..
তালমাত্রাবিনিষ্কম্পো ধারণাযোজনং তথা .
দ্বাদশমাত্রো যোগস্তু কালতো নিযমঃ স্মৃতঃ .. ২৪..
অঘোষমব্যঞ্জনমস্বরং চ অকণ্ঠতাল্বোষ্ঠমনাসিকং চ .
অরেফজাতমুভযোষ্মবর্জিতং যদক্ষরং ন ক্ষরতে কদাচিত্
.. ২৫..
যেনাসৌ পশ্যতে মার্গং প্রাণস্তেন হি গচ্ছতি .
অতস্তমভ্যসেন্নিত্যং সন্মার্গগমনায বৈ .. ২৬..
হৃদ্দ্বারং বাযুদ্বারং চ মূর্ধদ্বারমতঃ পরম্ .
মোক্ষদ্বারং বিলং চৈব সুষিরং মণ্ডলং বিদুঃ .. ২৭..
ভযং ক্রোধমথালস্যমতিস্বপ্নাতিজাগরম্ .
অত্যাহরমনাহরং নিত্যং যোগী বিবর্জযেত্ .. ২৮..
অনেন বিধিনা সম্যঙ্নিত্যমভ্যসতঃ ক্রমাত্ .
স্বযমুত্পদ্যতে জ্ঞানং ত্রিভির্মাসৈর্ন সংশযঃ .. ২৯..
চতুর্ভিঃ পশ্যতে দেবান্পঞ্চভিস্তুল্যবিক্রমঃ .
ইচ্ছযাপ্নোতি কৈবল্যং ষষ্ঠে মাসি ন সংশযঃ .. ৩০..
পার্থিবঃ পঞ্চমাত্রস্তু চতুর্মাত্রাণি বারুণঃ .
আগ্নেযস্তু ত্রিমাত্রোঽসৌ বাযব্যস্তু দ্বিমাত্রকঃ .. ৩১..
একমাত্রস্তথাকাশো হ্যর্ধমাত্রং তু চিন্তযেত্ .
সিদ্ধিং কৃত্বা তু মনসা চিন্তযেদাত্মনাত্মনি .. ৩২..
ত্রিংশত্পর্বাঙ্গুলঃ প্রাণো যত্র প্রাণঃ প্রতিষ্ঠিতঃ .
এষ প্রাণ ইতি খ্যাতো বাহ্যপ্রাণস্য গোচরঃ .. ৩৩..
অশীতিশ্চ শতং চৈব সহস্রাণি ত্রযোদশ .
লক্ষশ্চৈকোননিঃশ্বাস অহোরাত্রপ্রমাণতঃ .. ৩৪..
প্রাণ আদ্যো হৃদিস্থানে অপানস্তু পুনর্গুদে .
সমানো নাভিদেশে তু উদানঃ কণ্ঠমাশ্রিতঃ .. ৩৫..
ব্যানঃ সর্বেষু চাঙ্গেষু সদা ব্যাবৃত্য তিষ্ঠতি .
অথ বর্ণাস্তু পঞ্চানাং প্রাণাদীনামনুক্রমাত্ .. ৩৬..
রক্তবর্নো মণিপ্রখ্যঃ প্রাণো বাযুঃ প্রকীর্তিতঃ .
অপানস্তস্য মধ্যে তু ইন্দ্রগোপসমপ্রভঃ .. ৩৭..
সমানস্তু দ্বযোর্মধ্যে গোক্ষীরধবলপ্রভঃ .
আপাণ্ডর উদানশ্চ ব্যানো হ্যর্চিস্সমপ্রভঃ .. ৩৮..
যস্যেদং মণ্ডলং ভিত্বা মারুতো যাতি মূর্ধনি .
যত্র তত্র ম্রিযেদ্বাপি ন স ভূযোঽবিজাযতে .
ন স ভূযোঽভিজাযত ইত্যুপনিষত্ .. ৩৯..
ॐ সহ নাববত্বিতি শান্তিঃ ..
 .. ইতি কৃষ্ণযজুর্বেদীয অমৃতনাদোপনিষত্সমাপ্তা ..