শিবতাণ্ডবস্তোত্রং

 .. শিবতাণ্ডবস্তোত্রং ( রাবণ ) ..

          শিবতাণ্ডবস্তোত্রম্

          .. অথ রাবণকৃতশিবতাণ্ডবস্তোত্রম্ ..
               .. শ্রীগণেশায নমঃ ..

জটাটবীগলজ্জলপ্রবাহপাবিতস্থলে
   গলেঽবলম্ব্য লম্বিতাং ভুজঙ্গতুঙ্গমালিকাম্ .
ডমড্ডমড্ডমড্ডমন্নিনাদবড্ডমর্বযং
   চকার চণ্ড্তাণ্ডবং তনোতু নঃ শিবঃ শিবম্ .. ১..

জটাকটাহসংভ্রমভ্রমন্নিলিম্পনির্ঝরী-
     -বিলোলবীচিবল্লরীবিরাজমানমূর্ধনি .
ধগদ্ধগদ্ধগজ্জ্বলল্ললাটপট্টপাবকে
      কিশোরচন্দ্রশেখরে রতিঃ প্রতিক্ষণং মম .. ২..

ধরাধরেন্দ্রনংদিনীবিলাসবন্ধুবন্ধুর
      স্ফুরদ্দিগন্তসন্ততিপ্রমোদমানমানসে .
কৃপাকটাক্ষধোরণীনিরুদ্ধদুর্ধরাপদি
      ক্বচিদ্দিগম্বরে(ক্বচিচ্চিদংবরে)মনো বিনোদমেতু বস্তুনি .. ৩..

জটাভুজঙ্গপিঙ্গলস্ফুরত্ফণামণিপ্রভা
      কদম্বকুঙ্কুমদ্রবপ্রলিপ্তদিগ্বধূমুখে .
মদান্ধসিন্ধুরস্ফুরত্ত্বগুত্তরীযমেদুরে
     মনো বিনোদমদ্ভুতং বিভর্তু ভূতভর্তরি .. ৪..

সহস্রলোচনপ্রভৃত্যশেষলেখশেখর
     প্রসূনধূলিধোরণী বিধূসরাঙ্ঘ্রিপীঠভূঃ .
ভুজঙ্গরাজমালযা নিবদ্ধজাটজূটক
     শ্রিযৈ চিরায জাযতাং চকোরবন্ধুশেখরঃ .. ৫..

ললাটচত্বরজ্বলদ্ধনঞ্জযস্ফুলিঙ্গভা-
    -নিপীতপঞ্চসাযকং নমন্নিলিম্পনাযকম্ .
সুধামযূখলেখযা বিরাজমানশেখরং
     মহাকপালিসম্পদেশিরোজটালমস্তু নঃ  .. ৬..

করালভালপট্টিকাধগদ্ধগদ্ধগজ্জ্বল-
     দ্ধনঞ্জযাহুতীকৃতপ্রচণ্ডপঞ্চসাযকে .
ধরাধরেন্দ্রনন্দিনীকুচাগ্রচিত্রপত্রক-
    -প্রকল্পনৈকশিল্পিনি ত্রিলোচনে রতির্মম … ৭..

নবীনমেঘমণ্ডলী নিরুদ্ধদুর্ধরস্ফুরত্-
     কুহূনিশীথিনীতমঃ প্রবন্ধবদ্ধকন্ধরঃ .
নিলিম্পনির্ঝরীধরস্তনোতু কৃত্তিসিন্ধুরঃ
     কলানিধানবন্ধুরঃ শ্রিযং জগদ্ধুরংধরঃ .. ৮..

প্রফুল্লনীলপঙ্কজপ্রপঞ্চকালিমপ্রভা-
    -বলম্বিকণ্ঠকন্দলীরুচিপ্রবদ্ধকন্ধরম্ .
স্মরচ্ছিদং পুরচ্ছিদং ভবচ্ছিদং মখচ্ছিদং
     গজচ্ছিদাংধকছিদং তমংতকচ্ছিদং ভজে .. ৯..

অখর্ব(অগর্ব)সর্বমঙ্গলাকলাকদংবমঞ্জরী
     রসপ্রবাহমাধুরী বিজৃংভণামধুব্রতম্ .
স্মরান্তকং পুরান্তকং ভবান্তকং মখান্তকং
     গজান্তকান্ধকান্তকং তমন্তকান্তকং ভজে .. ১০..

জযত্বদভ্রবিভ্রমভ্রমদ্ভুজঙ্গমশ্বস-
    -দ্বিনির্গমত্ক্রমস্ফুরত্করালভালহব্যবাট্ .
ধিমিদ্ধিমিদ্ধিমিধ্বনন্মৃদঙ্গতুঙ্গমঙ্গল
     ধ্বনিক্রমপ্রবর্তিত প্রচণ্ডতাণ্ডবঃ শিবঃ .. ১১..

দৃষদ্বিচিত্রতল্পযোর্ভুজঙ্গমৌক্তিকস্রজোর্-
    -গরিষ্ঠরত্নলোষ্ঠযোঃ সুহৃদ্বিপক্ষপক্ষযোঃ .
তৃষ্ণারবিন্দচক্ষুষোঃ প্রজামহীমহেন্দ্রযোঃ
     সমপ্রবৃতিকঃ (সমং প্রবর্তযন্মনঃ)কদা সদাশিবং ভজে .. ১২..

কদা নিলিম্পনির্ঝরীনিকুঞ্জকোটরে বসন্
     বিমুক্তদুর্মতিঃ সদা শিরঃ স্থমঞ্জলিং বহন্ .
বিমুক্তলোললোচনো ললামভাললগ্নকঃ
     শিবেতি মংত্রমুচ্চরন্ কদা সুখী ভবাম্যহম্ .. ১৩..

ইদম্ হি নিত্যমেবমুক্তমুত্তমোত্তমং স্তবং
     পঠন্স্মরন্ব্রুবন্নরো বিশুদ্ধিমেতিসংততম্ .
হরে গুরৌ সুভক্তিমাশু যাতি নান্যথা গতিং
     বিমোহনং হি দেহিনাং সুশঙ্করস্য চিংতনম্ .. ১৪..

পূজাবসানসমযে দশবক্ত্রগীতং যঃ
     শংভুপূজনপরং পঠতি প্রদোষে .
তস্য স্থিরাং রথগজেন্দ্রতুরঙ্গযুক্তাং
     লক্ষ্মীং সদৈব  সুমুখিং প্রদদাতি শংভুঃ .. ১৫..

   .. ইতি শ্রীরাবণবিরচিতং শিবতাণ্ডবস্তোত্রং সংপূর্ণম্ ..