শিব কবচম্

 .. শিব কবচম্  ..
  

অস্য শ্রী শিবকবচ স্তোত্রমহামন্ত্রস্য
ঋষভযোগীশ্বর ঋষিঃ .
অনুষ্টুপ্ ছন্দঃ .
শ্রীসাম্বসদাশিবো দেবতা .

ওং বীজম্ .
নমঃ শক্তিঃ .
শিবাযেতি কীলকম্ .
মম সাম্বসদাশিবপ্রীত্যর্থে জপে বিনিযোগঃ .

করন্যাসঃ

ওং সদাশিবায অংগুষ্ঠাভ্যাং নমঃ .
নং গংগাধরায তর্জনীভ্যাং নমঃ .
মং মৃত্যুঞ্জযায মধ্যমাভ্যাং নমঃ .
শিং শূলপাণযে অনামিকাভ্যাং নমঃ .
বাং পিনাকপাণযে কনিষ্ঠিকাভ্যাং নমঃ .
যং উমাপতযে করতলকরপৃষ্ঠাভ্যাং নমঃ .

হৃদযাদি অংগন্যাসঃ

ওং সদাশিবায হৃদযায নমঃ .
নং গংগাধরায শিরসে স্বাহা .
মং মৃত্যুঞ্জযায শিখাযৈ বষট্ .
শিং শূলপাণযে কবচায হুং .
বাং পিনাকপাণযে নেত্রত্রযায বৌষট্ .
যং উমাপতযে অস্ত্রায ফট্ .
ভূর্ভুবস্সুবরোমিতি দিগ্বন্ধঃ ..

ধ্যানম্

বজ্রদংষ্ট্রং ত্রিনযনং কালকণ্ঠ মরিংদমম্ .
সহস্রকরমত্যুগ্রং বন্দে শংভুং উমাপতিম্ ..

রুদ্রাক্ষকঙ্কণলসত্করদণ্ডযুগ্মঃ
  পালান্তরালসিতভস্মধৃতত্রিপুণ্ড্রঃ .
পঞ্চাক্ষরং পরিপঠন্ বরমন্ত্ররাজং
  ধ্যাযন্ সদা পশুপতিং শরণং ব্রজেথাঃ ..

অতঃ পরং সর্বপুরাণগুহ্যং
  নিঃশেষপাপৌঘহরং পবিত্রম্ .
জযপ্রদং সর্ববিপত্প্রমোচনং
  বক্ষ্যামি শৈবম্ কবচং হিতায তে ..

পঞ্চপূজা

লং পৃথিব্যাত্মনে গন্ধং সমর্পযামি .
হং আকাশাত্মনে পুষ্পৈঃ পূজযামি .
যং বায্বাত্মনে ধূপম্ আঘ্রাপযামি .
রং অগ্ন্যাত্মনে দীপং দর্শযামি .
বং অমৃতাত্মনে অমৃতং মহানৈবেদ্যং নিবেদযামি .
সং সর্বাত্মনে সর্বোপচারপূজাং সমর্পযামি ..

মন্ত্রঃ

ঋষভ উবাচ – – –
নমস্কৃত্য মহাদেবং বিশ্বব্যাপিনমীশ্বরম্ .
বক্ষ্যে শিবমযং বর্ম সর্বরক্ষাকরং নৃণাম্ .. ১..

শুচৌ দেশে সমাসীনো যথাবত্কল্পিতাসনঃ .
জিতেন্দ্রিযো জিতপ্রাণশ্চিন্তযেচ্ছিবমব্যযম্ .. ২..

হৃত্পুণ্ডরীকান্তরসন্নিবিষ্টং
  স্বতেজসা ব্যাপ্তনভোঽবকাশম্ .
অতীন্দ্রিযং সূক্ষ্মমনন্তমাদ্যং
  ধ্যাযেত্ পরানন্দমযং মহেশম্ ..

ধ্যানাবধূতাখিলকর্মবন্ধ-
  শ্চিরং চিদানন্দ নিমগ্নচেতাঃ .
ষডক্ষরন্যাস সমাহিতাত্মা
  শৈবেন কুর্যাত্কবচেন রক্ষাম্ ..

মাং পাতু দেবোঽখিলদেবতাত্মা
  সংসারকূপে পতিতং গভীরে .
তন্নাম দিব্যং পরমন্ত্রমূলং
  ধুনোতু মে সর্বমঘং হৃদিস্থম্ ..

সর্বত্র মাং রক্ষতু বিশ্বমূর্তি-
  র্জ্যোতির্মযানন্দঘনশ্চিদাত্মা .
অণোরণিযানুরুশক্তিরেকঃ
  স ঈশ্বরঃ পাতু ভযাদশেষাত্ ..

যো ভূস্বরূপেণ বিভর্তি বিশ্বং
  পাযাত্স ভূমের্গিরিশোঽষ্টমূর্তিঃ .
যোঽপাং স্বরূপেণ নৃণাং করোতি
  সংজীবনং সোঽবতু মাং জলেভ্যঃ ..

কল্পাবসানে ভুবনানি দগ্ধ্বা
  সর্বাণি যো নৃত্যতি ভূরিলীলঃ .
স কালরুদ্রোঽবতু মাং দবাগ্নেঃ
  বাত্যাদিভীতেরখিলাচ্চ তাপাত্ ..

প্রদীপ্তবিদ্যুত্কনকাবভাসো
  বিদ্যাবরাভীতি কুঠারপাণিঃ .
চতুর্মুখস্তত্পুরুষস্ত্রিনেত্রঃ
  প্রাচ্যাং স্থিতো রক্ষতু মামজস্রম্ ..

কুঠারখেটাঙ্কুশ শূলঢক্কা-
  কপালপাশাক্ষ গুণান্দধানঃ .
চতুর্মুখো নীলরুচিস্ত্রিনেত্রঃ
  পাযাদঘোরো দিশি দক্ষিণস্যাম্ ..

কুন্দেন্দুশঙ্খস্ফটিকাবভাসো
  বেদাক্ষমালা বরদাভযাঙ্কঃ .
ত্র্যক্ষশ্চতুর্বক্ত্র উরুপ্রভাবঃ
  সদ্যোঽধিজাতোঽবতু মাং প্রতীচ্যাম্ ..

বরাক্ষমালাভযটঙ্কহস্তঃ
  সরোজকিঞ্জল্কসমানবর্ণঃ .
ত্রিলোচনশ্চারুচতুর্মুখো মাং
  পাযাদুদীচ্যাং দিশি বামদেবঃ ..

বেদাভযেষ্টাঙ্কুশটঙ্কপাশ-
  কপালঢক্কাক্ষরশূলপাণিঃ .
সিতদ্যুতিঃ পঞ্চমুখোঽবতান্মাং
  ঈশান ঊর্ধ্বং পরমপ্রকাশঃ ..

মূর্ধানমব্যান্মম চন্দ্রমৌলিঃ
  ভালং মমাব্যাদথ ভালনেত্রঃ .
নেত্রে মমাব্যাদ্ভগনেত্রহারী
  নাসাং সদা রক্ষতু বিশ্বনাথঃ ..

পাযাচ্ছ্রুতী মে শ্রুতিগীতকীর্তিঃ
  কপোলমব্যাত্সততং কপালী .
বক্ত্রং সদা রক্ষতু পঞ্চবক্ত্রো
  জিহ্বাং সদা রক্ষতু বেদজিহ্বঃ ..

কণ্ঠং গিরীশোঽবতু নীলকণ্ঠঃ
  পাণিদ্বযং পাতু পিনাকপাণিঃ .
দোর্মূলমব্যান্মম ধর্মবাহুঃ
  বক্ষঃস্থলং দক্ষমখান্তকোঽব্যাত্ ..

মমোদরং পাতু গিরীন্দ্রধন্বা
  মধ্যং মমাব্যান্মদনান্তকারী .
হেরম্বতাতো মম পাতু নাভিং
  পাযাত্কটিং ধূর্জটিরীশ্বরো মে ..

ঊরুদ্বযং পাতু কুবেরমিত্রো
  জানুদ্বযং মে জগদীশ্বরোঽব্যাত্ .
জঙ্ঘাযুগং পুঙ্গবকেতুরব্যাত্
  পাদৌ মমাব্যাত্সুরবন্দ্যপাদঃ ..

মহেশ্বরঃ পাতু দিনাদিযামে
  মাং মধ্যযামেঽবতু বামদেবঃ .
ত্রিলোচনঃ পাতু তৃতীযযামে
  বৃষধ্বজঃ পাতু দিনান্ত্যযামে ..

পাযান্নিশাদৌ শশিশেখরো মাং
  গঙ্গাধরো রক্ষতু মাং নিশীথে .
গৌরীপতিঃ পাতু নিশাবসানে
  মৃত্যুঞ্জযো রক্ষতু সর্বকালম্ ..

অন্তঃস্থিতং রক্ষতু শংকরো মাং
  স্থাণুঃ সদা পাতু বহিঃস্থিতং মাম্ .
তদন্তরে পাতু পতিঃ পশূনাং
  সদাশিবো রক্ষতু মাং সমন্তাত্ ..

তিষ্ঠন্তমব্যাদ্ ভুবনৈকনাথঃ
  পাযাদ্ব্রজন্তং প্রমথাধিনাথঃ .
বেদান্তবেদ্যোঽবতু মাং নিষণ্ণং
  মামব্যযঃ পাতু শিবঃ শযানম্ ..

মার্গেষু মাং রক্ষতু নীলকণ্ঠঃ
  শৈলাদিদুর্গেষু পুরত্রযারিঃ .
অরণ্যবাসাদি মহাপ্রবাসে
  পাযান্মৃগব্যাধ উদারশক্তিঃ ..

কল্পান্তকালোগ্রপটুপ্রকোপ-
 স্ফুটাট্টহাসোচ্চলিতাণ্ডকোশঃ .
ঘোরারিসেনার্ণব দুর্নিবার-
 মহাভযাদ্রক্ষতু বীরভদ্রঃ ..

পত্ত্যশ্বমাতঙ্গরথাবরূথিনী-
  সহস্রলক্ষাযুত কোটিভীষণম্ .
অক্ষৌহিণীনাং শতমাততাযিনাং
  ছিন্দ্যান্মৃডো ঘোরকুঠার ধারযা ..

নিহন্তু দস্যূন্প্রলযানলার্চিঃ
  জ্বলত্ত্রিশূলং ত্রিপুরান্তকস্য .
শার্দূলসিংহর্ক্ষবৃকাদিহিংস্রান্
  সংত্রাসযত্বীশধনুঃ পিনাকঃ ..

দুঃ স্বপ্ন দুঃ শকুন দুর্গতি দৌর্মনস্য-
  দুর্ভিক্ষ দুর্ব্যসন দুঃসহ দুর্যশাংসি .
উত্পাততাপবিষভীতিমসদ্গ্রহার্তিং
  ব্যাধীংশ্চ নাশযতু মে জগতামধীশঃ ..

৐ নমো ভগবতে সদাশিবায
সকলতত্বাত্মকায
সর্বমন্ত্রস্বরূপায 
সর্বযন্ত্রাধিষ্ঠিতায
সর্বতন্ত্রস্বরূপায
সর্বতত্ববিদূরায 
ব্রহ্মরুদ্রাবতারিণে
নীলকণ্ঠায
পার্বতীমনোহরপ্রিযায
সোমসূর্যাগ্নিলোচনায
ভস্মোদ্ধূলিতবিগ্রহায
মহামণি মুকুটধারণায
মাণিক্যভূষণায
সৃষ্টিস্থিতিপ্রলযকাল-
রৌদ্রাবতারায
দক্ষাধ্বরধ্বংসকায
মহাকালভেদনায
মূলধারৈকনিলযায 
তত্বাতীতায
গংগাধরায
সর্বদেবাদিদেবায
ষডাশ্রযায
বেদান্তসারায
ত্রিবর্গসাধনায
অনন্তকোটিব্রহ্মাণ্ডনাযকায
অনন্ত বাসুকি তক্ষক-
কর্কোটক শঙ্খ কুলিক-
পদ্ম মহাপদ্মেতি-
অষ্টমহানাগকুলভূষণায
প্রণবস্বরূপায
চিদাকাশায
আকাশ দিক্ স্বরূপায
গ্রহনক্ষত্রমালিনে
সকলায
কলঙ্করহিতায
সকললোকৈককর্ত্রে
সকললোকৈকভর্ত্রে
সকললোকৈকসংহর্ত্রে
সকললোকৈকগুরবে 
সকললোকৈকসাক্ষিণে
সকলনিগমগুহ্যায
সকলবেদান্তপারগায 
সকললোকৈকবরপ্রদায
সকললোকৈকশংকরায
সকলদুরিতার্তিভঞ্জনায
সকলজগদভযংকরায
শশাঙ্কশেখরায
শাশ্বতনিজাবাসায
নিরাকারায
নিরাভাসায
নিরামযায
নির্মলায
নির্মদায
নিশ্চিন্তায
নিরহংকারায
নিরংকুশায
নিষ্কলঙ্কায
নির্গুণায
নিষ্কামায
নিরূপপ্লবায
নিরুপদ্রবায
নিরবদ্যায
নিরন্তরায
নিষ্কারণায
নিরাতংকায
নিষ্প্রপঞ্চায
নিস্সঙ্গায
নির্দ্বন্দ্বায
নিরাধারায
নীরাগায
নিষ্ক্রোধায
নির্লোপায
নিষ্পাপায
নির্ভযায
নির্বিকল্পায
নির্ভেদায
নিষ্ক্রিযায
নিস্তুলায
নিঃসংশযায
নিরংজনায
নিরুপমবিভবায
নিত্যশুদ্ধবুদ্ধমুক্তপরিপূর্ণ-
সচ্চিদানন্দাদ্বযায
পরমশান্তস্বরূপায
পরমশান্তপ্রকাশায
তেজোরূপায
তেজোমযায
তেজোঽধিপতযে

জয জয রুদ্র
মহারুদ্র
মহারৌদ্র
ভদ্রাবতার
মহাভৈরব
কালভৈরব
কল্পান্তভৈরব
কপালমালাধর
খট্বাঙ্গ চর্মখড্গধর পাশাঙ্কুশ-
ডমরূশূল চাপবাণগদাশক্তিভিংদিপাল-
তোমর মুসল মুদ্গর পাশ পরিঘ-
ভুশুণ্ডী শতঘ্নী চক্রাদ্যাযুধভীষণাকার-
সহস্রমুখদংষ্ট্রাকরালবদন
বিকটাট্টহাস বিস্ফারিত ব্রহ্মাণ্ডমণ্ডল
নাগেন্দ্রকুণ্ডল
নাগেন্দ্রহার 
নাগেন্দ্রবলয
নাগেন্দ্রচর্মধর
নাগেন্দ্রনিকেতন
মৃত্যুঞ্জয 
ত্র্যম্বক
ত্রিপুরান্তক
বিশ্বরূপ
বিরূপাক্ষ
বিশ্বেশ্বর 
বৃষভবাহন
বিষবিভূষণ
বিশ্বতোমুখ
সর্বতোমুখ
মাং রক্ষ রক্ষ
জ্বলজ্বল
প্রজ্বল প্রজ্বল
মহামৃত্যুভযং শময শময
অপমৃত্যুভযং নাশয নাশয
রোগভযং উত্সাদযোত্সাদয
বিষসর্পভযং শময শময
চোরান্ মারয মারয 
মম শত্রূন্ উচ্চাটযোচ্চাটয
ত্রিশূলেন বিদারয বিদারয 
কুঠারেণ ভিন্ধি ভিন্ধি
খড্গেন ছিন্দ্দি ছিন্দ্দি
খট্বাঙ্গেন বিপোধয বিপোধয
মুসলেন নিষ্পেষয নিষ্পেষয
বাণৈঃ সংতাডয সংতাডয
যক্ষ রক্ষাংসি ভীষয ভীষয
অশেষ ভূতান্ বিদ্রাবয বিদ্রাবয 
কূষ্মাণ্ডভূতবেতালমারীগণ-
ব্রহ্মরাক্ষসগণান্ সংত্রাসয সংত্রাসয
মম অভযং কুরু কুরু
মম পাপং শোধয শোধয
বিত্রস্তং মাং আশ্বাসয আশ্বাসয
নরকমহাভযান্ মাং উদ্ধর উদ্ধর
অমৃতকটাক্ষবীক্ষণেন মাং-
আলোকয আলোকয সংজীবয সংজীবয
ক্ষুত্তৃষ্ণার্তং মাং আপ্যাযয আপ্যাযয
দুঃখাতুরং মাং আনন্দয আনন্দয
শিবকবচেন মাং আচ্ছাদয আচ্ছাদয

 হর হর মৃত্যুংজয ত্র্যম্বক সদাশিব পরমশিব নমস্তে নমস্তে নমঃ ..

    পূর্ববত্ – হৃদযাদি ন্যাসঃ . পঞ্চপূজা ..
    ভূর্ভুবস্সুবরোমিতি দিগ্বিমোকঃ ..

 ফল শ্রুতিঃ

ঋষভ উবাচ – – –
ইত্যেতত্পরমং শৈবং কবচং ব্যাহৃতং মযা .
সর্ব বাধা প্রশমনং রহস্যং সর্ব দেহিনাম্ ..

যঃ সদা ধারযেন্মর্ত্যঃ শৈবং কবচমুত্তমম্ .
ন তস্য জাযতে কাপি ভযং শংভোরনুগ্রহাত্ ..

ক্ষীণাযুঃ প্রাপ্তমৃত্যুর্বা মহারোগহতোঽপি বা .
সদ্যঃ সুখমবাপ্নোতি দীর্ঘমাযুশ্চ বিন্দতি ..

সর্বদারিদ্রযশমনং সৌমাঙ্গল্যবিবর্ধনম্ .
যো ধত্তে কবচং শৈবং স দেবৈরপি পূজ্যতে ..

মহাপাতকসঙ্ঘাতৈর্মুচ্যতে চোপপাতকৈঃ .
দেহান্তে মুক্তিমাপ্নোতি শিববর্মানুভাবতঃ ..

ত্বমপি শ্রদ্দযা বত্স শৈবং কবচমুত্তমম্ .
ধারযস্ব মযা দত্তং সদ্যঃ শ্রেযো হ্যবাপ্স্যসি ..

শ্রীসূত উবাচ – – –
ইত্যুক্ত্বা ঋষভো যোগী তস্মৈ পার্থিব সূনবে .
দদৌ শঙ্খং মহারাবং খড্গং চ অরিনিষূদনম্ ..

পুনশ্চ ভস্ম সংমংত্র্য তদঙ্গং পরিতোঽস্পৃশত্ .
গজানাং ষট্সহস্রস্য ত্রিগুণস্য বলং দদৌ ..

ভস্মপ্রভাবাত্ সংপ্রাপ্তবলৈশ্বর্য ধৃতি স্মৃতিঃ .
স রাজপুত্রঃ শুশুভে শরদর্ক ইব শ্রিযা ..

তমাহ প্রাঞ্জলিং ভূযঃ স যোগী নৃপনন্দনম্ .
এষ খড্গো মযা দত্তস্তপোমন্ত্রানুভাবতঃ ..

শিতধারমিমং খড্গং যস্মৈ দর্শযসে স্ফুটম্ .
স সদ্যো ম্রিযতে শত্রুঃ সাক্ষান্মৃত্যুরপি স্বযম্ ..

অস্য শঙ্খস্য নির্হ্রাদং যে শৃণ্বন্তি তবাহিতাঃ .
তে মূর্চ্ছিতাঃ পতিষ্যন্তি ন্যস্তশস্ত্রা বিচেতনাঃ ..

খড্গশঙ্খাবিমৌ দিব্যৌ পরসৈন্যবিনাশকৌ .
আত্মসৈন্যস্বপক্ষাণাং শৌর্যতেজোবিবর্ধনৌ ..

এতযোশ্চ প্রভাবেন শৈবেন কবচেন চ .
দ্বিষট্সহস্র নাগানাং বলেন মহতাপি চ ..

ভস্মধারণ সামর্থ্যাচ্ছত্রুসৈন্যং বিজেষ্যসে .
প্রাপ্য সিংহাসনং পিত্র্যং গোপ্তাঽসি পৃথিবীমিমাম্ ..

ইতি ভদ্রাযুষং সম্যগনুশাস্য সমাতৃকম্ .
তাভ্যাং সংপূজিতঃ সোঽথ যোগী স্বৈরগতির্যযৌ ..

.. .. ইতি শ্রীস্কন্দমহাপুরাণে ব্রহ্মোত্তরখণ্ডে শিবকবচ প্রভাব বর্ণনং নাম দ্বাদশোঽধ্যাযঃ সংপূর্ণঃ ..
..