বিশ্বনাথাষ্টকম্

বাচামগোচরমনেকগুণস্বরূপং
বাগীশবিষ্ণুসুরসেবিতপাদপীঠম্ |
বামেনবিগ্রহবরেণকলত্রবন্তং
বারাণসীপুরপতিং ভজ বিশ্বনাথম্ ||

ভূতাধিপং ভুজগভূষণভূষিতাংগং
ব্যাঘ্রাজিনাংবরধরং জটিলং ত্রিনেত্রম্ |
পাশাংকুশাভযবরপ্রদশূলপাণিং
বারাণসীপুরপতিং ভজ বিশ্বনাথম্ |

শীতাংশুশোভিতকিরীটবিরাজমানং
ভালেক্ষণানলবিশোষিতপংচবাণম্ |
নাগাধিপারচিতভাসুরকর্ণপূরং
বারাণসীপুরপতিং ভজ বিশ্বনাথম্ ||

পংচাননং দুরিতমত্তমতঙ্গজানাং
নাগান্তকং দনুজপুংগবপন্নগানাম্ |
দাবানলং মরণশোকজরাটবীনাং
বারাণসীপুরপতিং ভজ বিশ্বনাথম্ ||

তেজোমযং সগুণনির্গুণমদ্বিতীযং
আনন্দকন্দমপরাজিতমপ্রমেযম্ |
নাগাত্মকং সকলনিষ্কলমাত্মরূপং
বারাণসীপুরপতিং ভজ বিশ্বনাথম্ ||

রাগাদিদোষরহিতং স্বজনানুরাগং
বৈরাগ্যশান্তিনিলযং গিরিজাসহাযম্ |
মাধুর্যধৈর্যসুভগং গরলাভিরামং
বারাণসীপুরপতিং ভজ বিশ্বনাথম্ ||

আশাং বিহায পরিহৃত্য পরস্য নিন্দাং
পাপে রতিং চ সুনিবার্য মনঃ সমাধৌ |
আদায হৃত্কমলমধ্যগতং পরেশং
বারাণসীপুরপতিং ভজ বিশ্বনাথম্ ||

বারাণসীপুরপতেঃ স্তবনং শিবস্য
ব্যাখ্যাতমষ্টকমিদং পঠতে মনুষ্যঃ |
বিদ্যাং শ্রিযং বিপুলসৌখ্যমনন্তকীর্তিং
সম্প্রাপ্য দেহবিলযে লভতে চ মোক্ষম্ ||

বিশ্বনাথাষ্টকমিদং যঃ পঠেচ্ছিবসন্নিধৌ |
শিবলোকমবাপ্নোতি শিবেন সহ মোদতে ||