মানসোল্লাস

.. মানসোল্লাস ..
.. শ্রীদক্ষিণামূর্তিস্তোত্রম্ ..
বিশ্বং দর্পণদৃশ্যমাননগরীতুল্যং নিজান্তর্গতং
পশ্যন্নাত্মনি মাযযা বহিরিবোদ্ভূতং যথা নিদ্রযা .
যঃ সাক্ষাত্কুরুতে প্রবোধসমযে স্বাত্মানমেবাদ্বযং
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ১..
বীজস্যান্তরিবাঙ্কুরো জগদিদং প্রাঙ্নির্বিকল্পং পুনঃ
মাযাকল্পিতদেশকালকলনাবৈচিত্র্যচিত্রীকৃতম্ .
মাযাবীব বিজৃম্ভযত্যপি মহাযোগীব যঃস্বেচ্ছযা
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ২..
যস্যৈব স্ফুরণং সদাত্মকমসত্কল্পার্থগং ভাসতে
সাক্ষাত্তত্ত্বমসীতি বেদবচসা যো বোধযত্যাশ্রিতান্ .
যত্সাক্ষাত্করণাদ্ভবেন্নপুনরাবৃত্তির্ভবাম্ভোনিধৌ
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৩..
নানাচ্ছিদ্রঘটোদরস্থিতমহাদীপপ্রভাভাস্বরং
জ্ঞানং যস্য তু চক্ষুরাদিকরণদ্বারা বহিঃস্পন্দতে .
জানামীতি তমেব ভান্তমনুভাত্যেতত্সমস্তং জগত্
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৪..
দেহং প্রাণমপীন্দ্রিযাণ্যপি চলাং বুদ্ধিং চ শূন্যং বিদুঃ
স্ত্রীবালান্ধজডোপমাস্ত্বহমিতি ভ্রান্তা ভৃশং বাদিনঃ .
মাযাশক্তিবিলাসকল্পিতমহাব্যামোহসংহারিণে
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৫..
রাহুগ্রস্তদিবাকরেন্দুসদৃশো মাযাসমাচ্ছাদনাত্
সন্মাত্রঃ করণোপসংহরণতো যোঽভূত্সুষুপ্তঃ পুমান্ .
প্রাগস্বাপ্সমিতি প্রবোধসমযে যঃ প্রত্যভিজ্ঞাযতে
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৬..
বাল্যাদিষ্বপি জাগ্রদাদিষু তথা সর্বাস্ববস্থাস্বপি
ব্যাবৃত্তাস্বনুবর্তমানমহমিত্যন্তঃ স্ফুরন্তং সদা .
স্বাত্মানং প্রকটীকরোতি ভজতাং যো মুদ্রযা ভদ্রযা
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৭..
বিশ্বং পশ্যতি কার্যকারণতযা স্বস্বামিসংবন্ধতঃ
শিষ্যাচার্যতযা তথৈব পিতৃপুত্রাদ্যাত্মনা ভেদতঃ .
স্বপ্নে জাগ্রতি বা এষ পুরুষো মাযাপরিভ্রামিতঃ
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৮..
ভূরম্ভাংস্যনলোঽনিলোঽম্বরমহর্নাথো হিমাংশুঃ পুমান্
ইত্যাভাতি চরাচরাত্মকমিদং যস্যৈব মূর্ত্যষ্টকম্ .
নান্যত্কিঞ্চন বিদ্যতে বিমৃশতাং যস্মাত্পরস্মাদ্বিভোঃ
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৯..
সর্বাত্মত্বমিতি স্ফুটীকৃতমিদং যস্মাদমুষ্মিংস্তবে
তেনাস্য শ্রবণাত্তদর্থমননাদ্ধ্যানাচ্চ সংকীর্তনাত্ .
সর্বাত্মত্বমহাবিভূতিসহিতং স্যাদীশ্বরত্বং স্বতঃ
সিদ্ধ্যেত্তত্পুনরষ্টধা পরিণতং চৈশ্বর্যমব্যাহতম্ .. ১০..
.. মানসোল্লাস ..
বিশ্বং দর্পণদৃশ্যমাননগরীতুল্যং নিজান্তর্গতং
পশ্যন্নাত্মনি মাযযা বহিরিবোদ্ভূতং যথা নিদ্রযা .
যঃ সাক্ষাত্কুরুতে প্রবোধসমযে স্বাত্মানমেবাদ্বযং
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ১..
মঙ্গ঳ং দিশতু মে বিনাযকো
মঙ্গ঳ং দিশতু মে সরস্বতী .
মঙ্গ঳ং দিশতু মে মহেশ্বরো
মঙ্গ঳ং দিশতু মে সদাশিবঃ .. ১..
আত্মলাভাত্পরো লাভো নাস্তীতি মুনযো বিদুঃ .
তল্লাভার্থং কবিঃ স্তৌতি স্বাত্মানং পরমেশ্বরম্ .. ২..
স্বেচ্ছযা সৃষ্টমাবিশ্য বিশ্বং যো মনসি স্থিতঃ .
স্তোত্রেণ স্তূযতেঽনেন স এব পরমেশ্বরঃ .. ৩..
অস্তি প্রকাশত ইতি ব্যবহারঃ প্রবর্ততে .
তচ্চাস্তিত্বং প্রকাশত্বং কস্মিন্নর্থে প্রতিষ্ঠিতম্ .. ৪..
কিং তেষু তেষু বাঽর্থেষু কিং বা সর্বাত্মনীশ্বরে .
ঈশ্বরত্বং চ জীবত্বং সর্বাত্মত্বং চ কীদৃশম্ .. ৫..
জানীযাত্কথং জীবঃ কিং তজ্জ্ঞানস্য সাধনম্ .
জ্ঞানাত্তস্য ফলং কিং স্যাদেকত্বং চ কথং ভবেত্ .. ৬..
সর্বজ্ঞঃ সর্বকর্তা চ কথমাত্মা ভবিষ্যতি .
শিষ্যং প্রতীত্থং পৃচ্ছন্তং বক্তুমারভতে গুরুঃ .. ৭..
অন্তরস্মিন্নিমে লোকা অন্তর্বিশ্বমিদং জগত্ .
বহির্বন্মাযযাঽঽভাতি দর্পণে স্বশরীরবত্ .. ৮..
স্বপ্নে স্বান্তর্গতং বিশ্বং যথা পৃথগিবেক্ষ্যতে .
তথৈব জাগ্রত্কালেঽপি প্রপঞ্চোঽযং বিবিচ্যতাম্ .. ৯..
স্বপ্নে স্বসত্তৈবার্থানাং সত্তা নান্যেতি নিশ্চিতা .
কো জাগ্রতি বিশেষোঽস্তি জডানামাশু নাশিনাম্ .. ১০..
স্বপ্নে প্রকাশো ভাবানাং স্বপ্রকাশান্ন হীতরঃ .
জাগ্রত্যপি তথৈবেতি নিশ্চিন্বন্তি বিপশ্চিতঃ .. ১১..
নিদ্রযা দর্শিতানর্থান্ন পশ্যতি যথোত্থিতঃ .
সম্যগ্জ্ঞানোদযাদূর্ধ্বং তথা বিশ্বং ন পশ্যতি .. ১২..
অনাদিমাযযা সুপ্তো যদা জীবঃ প্রবুধ্যতে .
অজন্মনিদ্রমস্বপ্নমদ্বৈতং বুধ্যতে তদা .. ১৩..
শ্রুত্যাঽঽচার্যপ্রসাদেন যোগাভ্যাসবশেন চ .
ঈশ্বরানুগ্রহেণাপি স্বাত্মবোধো যদা ভবেত্ .. ১৪..
ভুক্তং যথাঽন্নং কুক্ষিস্থং স্বাত্মত্বেনৈব পশ্যতি .
পূর্ণাহন্তাকব঳িতং বিশ্বং যোগীশ্বরস্তথা .. ১৫..
যথা স্বপ্নে নৃপো ভূত্বা ভুক্ত্বা ভোগান্যথেপ্সিতান্ .
চতুরঙ্গবলোপেতঃ শত্রুং জিত্বা রণাঙ্গণে .. ১৬..
পরাত্পরাজিতো ভূত্বা বনং প্রাপ্য তপশ্চরন্ .
মুহূর্তমাত্রমাত্মানং মন্যতে কল্পজীবিনম্ .. ১৭..
তথৈব জাগ্রত্কালেঽপি মনোরাজ্যং করোত্যসৌ .
কালনদ্যোঘযোগেন ক্ষীণমাযুর্ন পশ্যতি .. ১৮..
মেঘচ্ছন্নোংঽশুমালীব মাযযা মোহিতোঽধিকম্ .
কিঞ্চিত্কর্তা চ কিঞ্চিজ্জ্ঞো লক্ষ্যতে পরমেশ্বরঃ .. ১৯..
যদ্যত্করোতি জানাতি তস্মিন্তস্মিন্পরেশ্বরঃ .
রাজা বিদ্বান্ স্বসামর্থ্যাদীশ্বরোঽযমিতীর্যতে .. ২০..
জ্ঞানক্রিযে শিবেনৈক্যাত্সঙ্ক্রান্তে সর্বজনুষু .
ঈশ্বরত্বং চ জীবানাং সিদ্ধং তচ্ছক্তিসঙ্গমাত্ .. ২১..
অযং ঘটোঽযং পট ইত্যেবং নানাপ্রতীতিষু .
অর্কপ্রভেব স্বজ্ঞানং স্বযমেব প্রকাশতে .. ২২..
জ্ঞানং ন চেত্স্বযং সিদ্ধং জগদন্ধং তমো ভবেত্ .
ন চেদস্য ক্রিযা কাচিত্ ব্যবহারঃ কথং ভবেত্ .. ২৩..
ক্রিযা নাম পরিস্পন্দপরিণামস্বরূপিণী .
স্পন্দমানে বহির্জ্ঞানে তদঙ্কুরবদুদ্ভবেত্ .. ২৪..
উত্পাদ্যপ্রাপ্যসংস্কার্যবিকার্যোপাশ্রযা ক্রিযা .
করোতি গচ্ছত্যুন্মার্ষ্টি ছিনত্তীতি প্রতীযতে .. ২৫..
শিবো ব্রহ্মাদিদেহেষু সর্বজ্ঞ ইতি ভাসতে .
দেবতির্যঙ্মনুষ্যেষু কিঞ্চিজ্জ্ঞস্তারতম্যতঃ .. ২৬..
জরাযুজোঽণ্ডজশ্চৈব স্বেদজঃ পুনরুদ্ভিদঃ .
এতে চতুর্বিধাঃ দেহাঃ ক্রমশো ন্যূনবৃত্তযঃ .. ২৭..
ব্রহ্মাদিস্তম্বপর্যন্তা স্বপ্নকল্পৈব কল্পনা .
সাক্ষাত্কৃতেঽনবচ্ছিন্নপ্রকাশে পরমাত্মনি .. ২৮..
অণোরণীযান্মহতো মহীযানিতি বেদবাক্ .
রুদ্রোপনিষদপ্যেতং স্তৌতি সর্বাত্মকং শিবম্ .. ২৯..
ঈশ্বরো গুরুরাত্মেতি মূর্তিভেদবিভাগিনে .
ব্যোমবদ্ব্যাপ্তদেহায দক্ষিণামূর্তযে নমঃ .. ৩০..
ইতি শ্রীদক্ষিণামূর্তিস্তোত্রার্থপ্রতিপাদকে  .
প্রবন্ধে মানসোল্লাসে প্রথমোল্লাসসংগ্রহঃ .. ৩১.. 
বীজস্যান্তরিবাঙ্কুরো জগদিদং প্রাঙ্নির্বিকল্পং পুনঃ
মাযাকল্পিতদেশকালকলনাবৈচিত্র্যচিত্রীকৃতম্ .
মাযাবীব বিজৃম্ভযত্যপি মহাযোগীব যঃস্বেচ্ছযা
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ২..
উপাদানং প্রপঞ্চস্য সংযুক্তাঃ পরমাণবঃ .
মৃদন্বিতো ঘটস্তস্মাদ্ভাসতে নেশ্বরান্বিতঃ .. ১..
পরমাণুগতা এব গুণা রূপরসাদযঃ .
কার্যে সমানজাতীযমারভন্তে গুণান্তরম্ .. ২..
কার্যং যত্র সমন্বেতি কারণং সমবাযি তত্ .
চক্রাদ্যং সাধনং যত্তু ঘটস্যাসমবাযি তত্ .. ৩..
সমবাযিনি তিষ্ঠেদ্যত্ সমবায্যাশ্রযে তথা .
কার্যেঽবধৃতসামর্থ্যং কল্প্যতেঽসমবাযি তত্ .. ৪..
নিমিত্তং কারণং তেষামীশ্বরশ্চ কুলালবত্ .
যত্কার্যং জাযতে যস্মাত্তস্মিন্ তত্প্রতিতিষ্ঠতি .. ৫..
মৃত্তিকাযাং ঘটস্তন্তৌ পটঃ স্বর্ণেঽঙ্গুলীযকম্ .
ইতি বৈশেষিকাঃ প্রাহুস্তথা নৈযাযিকা অপি .. ৬..
রজঃ সত্ত্বং তমশ্চেতি প্রধানস্য গুণাস্ত্রযঃ .
রজো রক্তং চলং তেষু সত্ত্বং শুক্লং প্রকাশকম্ .. ৭..
তমঃ কৃষ্ণং চাবরকং সৃষ্টিস্থিত্যন্তহেতবঃ .
ইতি সাংখ্যাশ্চ ভাষন্তে তেষাং দূষণ উচ্যতে .. ৮..
অঙ্কুরাদিফলান্তেষু কার্যেষ্বস্তিত্বমিষ্যতে .
কুত আগত্য সম্বদ্ধা বটবীজেষু তে কণাঃ .. ৯..
কারণানুগতং কার্যমিতি সর্বৈশ্চ সম্মতম্ .
তস্মাত্সত্তা স্ফুরত্তা চ সর্বত্রাপ্যনুবর্ততে .. ১০..
পুষ্পে ফলত্বমাপন্নে ক্ষীরে চ দধিতাং গতে .
বিজাতীযাঃ প্রতীযন্তে গুণা রূপরসাদযঃ .. ১১..
কারণং কার্যমংশোংঽশী জাতিব্যক্তী গুণী গুণঃ .
ক্রিযা ক্রিযাবানিত্যাদ্যাঃ প্রকাশস্যৈব কল্পনাঃ .. ১২..
চৈতন্যং পরমাণূনাং প্রধানস্যাপি নেষ্যতে .
জ্ঞানক্রিযে জগত্ক্লৃপ্তৌ দৃশ্যেতে চেতনাশ্রযে .. ১৩..
কালরূপক্রিযাশক্ত্যা ক্ষীরাত্পরিণমেদ্দধি .
জ্ঞাতৃজ্ঞানজ্ঞেযরূপং জ্ঞানশক্ত্যা ভবেজ্জগত্ .. ১৪..
জ্ঞানং দ্বিধা বস্তুমাত্রদ্যোতকং নির্বিকল্পকম্ .
সবিকল্পন্তু সংজ্ঞাদিদ্যোতকত্বাদনেকধা .. ১৫..
সঙ্কল্পসংশযভ্রান্তিস্মৃতিসাদৃশ্যনিশ্চযাঃ .
ঊহোঽনধ্যবসাযশ্চ তথাঽন্যেনুভবা অপি.. ১৬..
প্রত্যক্ষমেকং চার্বাকাঃ কণাদসুগতৌ পুনঃ .
অনুমানঞ্ চ তচ্চাপি সাংখ্যাঃ শব্দং চ তে অপি .. ১৭..
ন্যাযৈকদর্শিনোপ্যবেমুপমানং চ কে চন .
অর্থাপত্ত্যা সহৈতানি চত্বার্যাহ প্রভাকরঃ .. ১৮..
অভাবষষ্ঠান্যেতানি ভাট্টা বেদান্তিনস্তথা .
সম্ভবৈতিহ্যযুক্তানি তানি পৌরাণিকা জগুঃ .. ১৯..
দ্রব্যং গুণস্তথা কর্ম সামন্যং চ বিশেষকম্ .
সমবাযং চ কাণাদাঃ পদার্থান্ষট্প্রচক্ষতে .. ২০..  
নব দ্রব্যাণি ভূতানি দিক্কালাত্মমনাংসি চ .
চতুর্বিংশতিরেব স্যুর্গুণাঃ শব্দাদিপঞ্চকম্ .. ২১..
পরিমাণং চ সঙ্খ্যা চ দ্বৌ সংযোগবিভাগকৌ .
স্বভাবতঃ পৃথক্ত্বং চ গুরুত্বং দ্রবতা পুনঃ .. ২২..
পরত্বং চাপরত্বং চ স্নেহঃ সংস্কার ইত্যপি .
ধীর্দ্বেষসুখদুঃখেচ্ছাধর্মাধর্মপ্রযত্নকাঃ .. ২৩..
সংস্কারস্ত্রিবিধো বেগ ইষ্বাদের্গতিকারণম্ .
দৃষ্টশ্রুতানুভূতার্থস্মৃতিহেতুশ্চ ভাবনা .. ২৪..
স্থিতস্থাপকতা নাম পূর্ববত্স্থিতিকারণম্ .
আকৃষ্টশাখাভূর্জাদৌ স্পষ্টমেবোপলক্ষ্যতে .. ২৫..
উত্ক্ষেপণমবক্ষেপো গমনং চ প্রসারণম্ .
আকুঞ্চনমিতি প্রাহুঃ কর্ম পঞ্চবিধং বুধাঃ .. ২৬..
সামান্যং দ্বিবিধং প্রোক্তং পরং চাপরমেব চ .
পরং সত্তৈব সর্বত্র তদনুস্যূতবর্তনম্ .. ২৭..
দ্রব্যত্বং চ গুণত্বাদ্যং সামান্যমপরং তথা .
বিশেষাঃ স্যুরনন্তাস্তে ব্যাবৃত্তিজ্ঞানহেতবঃ .. ২৮..
রূপস্যেব ঘটে নিত্যঃ সম্বন্ধঃ সমবাযকঃ .
কালাকাশদিগাত্মানো নিত্যাশ্চ বিভবশ্চ তে .. ২৯..
চতুর্বিধাঃ পরিচ্ছিন্না নিত্যাশ্চ পরমাণবঃ .
ইতি বৈশেষিকমতে পদার্থাঃ ষট্ প্রকীর্তিতাঃ .. ৩০..
মাযা প্রধানমব্যক্তমবিদ্যাঽজ্ঞানমক্ষরম্ .
অব্যাকৃতং চ প্রকৃতিঃ তম ইত্যভিধীযতে .. ৩১..
মাযাযাং ব্রহ্মচৈতন্যপ্রতিবিম্বানুষঙ্গতঃ .
মহত্কালপুমাংসঃ স্যুঃ মহত্তত্ত্বাদহংকৃতিঃ .. ৩২..
তামসাত্স্যুরহঙ্কারাত্খানিলাগ্ন্যম্বুভূমযঃ .
শব্দঃ স্পর্শশ্চ রূপং চ রসো গন্ধোপ্যনুক্রমাত্ .. ৩৩..
ইন্দ্রিযাণাং চ বিষযা ভূতানামপি তে গুণাঃ .
দেবাঃ সদাশিবশ্চেশো রুদ্রো বিষ্ণুশ্চতুর্মুখঃ .. ৩৪..
সাত্ত্বিকাত্স্যাদহঙ্কারাদন্তঃকরণধীন্দ্রিযম্ .
মনো বুদ্ধিরহঙ্কারশ্চিত্তং করণমান্তরম্ .. ৩৫..
সংশযো নিশ্চযো গর্বঃ স্মরণং বিষযা অমী .
চন্দ্রঃ প্রজাপতী রুদ্রঃ ক্ষেত্রজ্ঞ ইতি দেবতাঃ .. ৩৬..
শ্রোত্রং ত্বক্চক্ষু জিহ্বা ঘ্রাণং জ্ঞানেন্দ্রিযং বিদুঃ .
দিগ্বাতসূর্যবরুণা নাসত্যৌ দেবতাঃ স্মৃতাঃ .. ৩৭..
রাজসাত্স্যুরহঙ্কারাত্কর্মেন্দ্রিযসমীরণাঃ .
কর্মেন্দ্রিযাণি বাক্পাণিঃ পাদঃ পাযুরুপস্থকম্ .. ৩৮..
বচনাদানগমনবিসর্গানন্দসংজ্ঞকাঃ .
বিষযা দেবতাস্তেষাং বহ্নীন্দ্রোপেন্দ্রমৃত্যুকাঃ .. ৩৯..
প্রাণোপানঃ সমানশ্চোদানব্যানৌ চ বাযবঃ .
ভূতৈস্তু পঞ্চভিঃ প্রাণৈঃ চতুর্দশভিরিন্দ্রিযৈঃ .. ৪০..
চতুর্বিংশতিতত্ত্বানি সাঙ্খ্যশাস্ত্রবিদো বিদুঃ .
মহান্কালঃ প্রধানং চ মাযাবিদ্যে চ পূরুষঃ .. ৪১..
ইতি পৌরাণিকাঃ প্রাহুস্ত্রিংশত্তত্ত্বানি তৈঃ সহ .
বিন্দুনাদৌ শক্তিশিবৌ শান্তাতীতৌ ততঃ পরম্ .. ৪২..
ষট্ত্রিংশত্তত্বমিত্যুক্তং শৈবাগমবিশারদৈঃ .
সর্বে বিকল্পাঃ প্রাগাসন্ বীজেঽঙ্কুর ইবাত্মনি .. ৪৩..
ইচ্ছাজ্ঞানক্রিযারূপমাযযা তে বিজৃম্ভিতাঃ .
ইচ্ছাজ্ঞানক্রিযাপূর্বা যস্মাত্সর্বাঃ প্রবৃত্তযঃ .. ৪৪..
সর্বেঽপি জন্তবস্তস্মাদীশ্বরা ইতি নিশ্চিতাঃ .
বীজাদ্বৃক্ষস্তরোবীজং পারম্পর্যেণ জাযতে .. ৪৫..
ইতিশঙ্কানিবৃত্ত্যর্থং যোগিদৃষ্টান্তকীর্তনম্ .
বিশ্বামিত্রাদযঃ পূর্বে পরিপক্বসমাধযঃ .. ৪৬..
উপাদানোপকরণপ্রযোজনবিবার্জিতাঃ .
স্বেচ্ছযা সসৃজুঃ সর্গং সর্বভোগোপবৃংহিতম্ .. ৪৭..
ঈশ্বরোঽনন্তশক্তিত্বাত্স্বতন্ত্রোঽন্যানপেক্ষকঃ .
স্বেচ্ছামাত্রেণ সকলং সৃজত্যবতি হন্তি চ .. ৪৮..
ন কারকাণাং ব্যাপারাত্কর্তা স্যান্নিত্য ঈশ্বরঃ .
নাপি প্রমাণব্যাপরাত্ জ্ঞাতাঽসৌ স্বপ্রকাশকঃ .. ৪৯..
জ্ঞাতৃত্বমপি কর্তৃত্বং স্বাতন্ত্র্যাত্তস্য কেবলম্ .
যা চেচ্ছাশক্তিবৈচিত্রী সাঽস্য স্বচ্ছন্দকারিতা .. ৫০..
যযা কর্তুং ন বা কর্তুমন্যথা কর্তুমর্হতি .
স্বতন্ত্রামীশ্বরেচ্ছাং কে পরিচ্ছেতুমিহেশতে .. ৫১..
শ্রুতিশ্চ সোঽকামযতেতীচ্ছযা সৃষ্টিমীশিতুঃ .
তস্মাদাত্মন আকাশঃ সম্ভূত ইতি চাব্রবীত্ .. ৫২..
নিমিত্তমাত্রং চেদস্য জগতঃ পরমেশ্বরঃ .
বিকারিত্বং বিনাশিত্বং ভবেদস্য কুলালবত্ .. ৫৩..
বুদ্ধ্যাদযো নব গুণাঃ নিত্যা এবেশ্বরস্য চেত্ .
নিত্যেচ্ছাবান্ং জগত্সৃষ্টৌ প্রবতেতৈব সর্বদা .. ৫৪..
প্রবৃত্ত্যুপরমাভাবাত্সংসারো নৈব নশ্যতি .
মোক্ষোপদেশো ব্যর্থঃ স্যাদাগমোঽপি নিরর্থকঃ .. ৫৫..
তস্মান্মাযাবিলাসোঽযং জগত্কর্তৃত্বমীশিতুঃ .
বন্ধমোক্ষোপদেশাদিব্যবহারোঽপি মাযযা .. ৫৬..
ইতি শ্রীদক্ষিণামূর্তিস্তোত্রার্থপ্রতিপাদকে .
প্রবন্ধে মানসোল্লাসে দ্বিতীযোল্লাসসংগ্রহঃ .. ৫৭..
যস্যৈব স্ফুরণং সদাত্মকমসত্কল্পার্থগং ভাসতে
সাক্ষাত্তত্ত্বমসীতি বেদবচসা যো বোধযত্যাশ্রিতান্ .
যত্সাক্ষাত্করণাদ্ভবেন্নপুনরাবৃত্তির্ভবাম্ভোনিধৌ
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৩..
সত্তাস্ফুরত্তে ভাবেষু কুত আগত্য সঙ্গতে .
বিম্বাদিদর্পণন্যাযাদিত্থং পৃচ্ছন্ প্রবোধ্যতে .. ১..
অসত্কল্পেষু ভাবেষু জডেষু ক্ষণনাশিষু .
অস্তিত্বং চ প্রকাশত্বং নিত্যাত্সংক্রামতীশ্বরাত্ .. ২..
আত্মসত্তৈব সত্তৈষাং ভাবানাং ন ততোঽধিকা .
তথৈব স্ফুরণং চৈষাং নাত্মস্ফুরণতোঽধিকম্ .. ৩..
জ্ঞানানি বহুরূপাণি তেষং চ বিষযা অপি .
অহঙ্কারেঽনুষজ্যন্তে সূত্রে মণিগণা ইব .. ৪..
প্রকাশাভিন্নমেবৈতদ্বিশ্বং সর্বস্য ভাসতে .
লহরীবুদ্বুদাদীনাং সলিলান্ন পৃথক্স্থিতিঃ .. ৫..
জানামিত্যেব যজ্জ্ঞানং ভাবানাবিশ্য বর্ততে .
জ্ঞাতং মযেতি তত্পশ্চাদ্বিশ্রাম্যত্যন্তরাত্মনি .. ৬..
ঘটাদিকানি কার্যাণি বিশ্রাম্যন্তি মৃদাদিষু .
বিশ্বং প্রকাশাভিন্নত্বাদ্বিশ্রাম্যেত্পরমেশ্বরে .. ৭..
স্বগতেনৈব কা঳িম্না দর্পণং মলিনং যথা ..
অজ্ঞানেনাবৃতং জ্ঞানং তেন মুহ্যন্তি জন্তবঃ .. ৮..
ঘটাকাশো মহাকাশো ঘটোপাধিকৃতো যথা .
দেহোপাধিকৃতো ভেদো জীবাত্পরমাত্মনোঃ .. ৯..
তত্ত্বমস্যাদিবাক্যৈস্তু তযোরৈক্যং প্রদর্শ্যতে .
সোযং পুরুষ ইত্যুক্তে পুমানেকো হি দৃশ্যতে .. ১০..
যজ্জগত্কারণং তত্ত্বং তত্পদার্থঃ স উচ্যতে .
দেহাদিভিঃ পরিচ্ছিন্নো জীবস্তু ত্বংপদাভিধঃ .. ১১..
তদ্দেশকালাবস্থাদৌ দৃষ্টঃ স ইতি কথ্যতে .
তথৈতদ্দেশকালাদৌ দৃষ্টোঽযমিতি কীর্ত্যতে .. ১২..
মুখ্যং তদেতদ্বৈশিষ্ট্যং বিসৃজ্য পদযোর্দ্বযোঃ .
পুম্মাত্রং লক্ষযত্যেকং যথা সোযং পুমান্বচঃ .. ১৩..
প্রত্যক্ত্বং চ পরাক্ত্বং চ ত্যক্ত্বা তত্ত্বমসীতি বাক্ .
তথৈব লক্ষযত্যৈকং জীবাত্মপরমাত্মনোঃ .. ১৪..
সামানাধিকরণাখ্যঃ সম্বন্ধঃ পদযোরিহ .
বিশেষণবিশেষ্যত্বং সম্বন্ধঃ স্যাত্পদার্থযোঃ .. ১৫..
লক্ষ্যলক্ষণসংযোগাদ্বাক্যমৈক্যং চ বোধযেত্ .
গঙ্গাযাং ঘোষ ইতিবন্ন জহল্লক্ষণা ভবেত্ .. ১৬..
নাজহল্লক্ষণাঽপি স্যাচ্ছ্বেতোধাবতিবাক্যবত্ .
তত্ত্বমস্যাদিবাক্যানাং লক্ষণা ভাগলক্ষণা .. ১৭..
সোঽযং পুরুষ ইত্যাদিবাক্যানামিব কীর্তিতা .
ভিন্নবৃত্তিনিমিত্তানাং শব্দানামেকবস্তুনি .. ১৮..
প্রবৃত্তিস্তু সমানাধিকরণত্বমিহোচ্যতে .
পরস্যাংশো বিকারো বা জীবো বাক্যেন নোচ্যতে .. ১৯..
জীবাত্মনা প্রবিষ্ঠত্বাত্স্বমাযাসৃষ্টমূর্তিষু .
নিরংশো নির্বিকারোঽসৌ শ্রুত্যা যুক্ত্যা চ গম্যতে .. ২০..
ঘটাকাশো বিকরো বা নাংশো বা বিযতো যথা .
ত্বমিন্দ্রোসীতিবদ্বাক্যং ন খলু স্তুতিতত্পরম্ .. ২১..
ন সাদৃশ্যপরং বাক্যমগ্নির্মাণবকাদিবত্ .
ন কার্যকারণত্বস্য সাধনং মৃদ্ঘটাদিবত্ .. ২২..
ন জাতি ব্যক্তিগমকং গৌঃ খণ্ড ইতিবদ্বচঃ .
গুণগুণ্যাত্মকং বাক্যং নৈতন্নীলোত্পলাদিবত্ .. ২৩..
নোপাসনাপরং বাক্যং প্রতিমাস্বীশবুদ্ধিবত্ .
ন বৌপচারিকং বাক্যং রাজবদ্রাজপূরুষে .. ২৪..
জীবাত্মনা প্রবিষ্টোঽসাবীশ্বরঃ শ্রূযতে যতঃ .
দেহেন্দ্রিযমনোবুদ্ধিপ্রাণাহঙ্কারসংহতৌ .. ২৫..
আত্মসঙ্কলনাদজ্ঞৈরাত্মত্বং প্রতিপাদ্যতে .
বহ্নিধীঃ কাষ্ঠলোহাদৌ বহ্নিসঙ্কলনাদিব .. ২৬..
দেহমন্নমযং কোশমাবিশ্যাত্মা প্রকাশতে .
স্থূলো বালঃ কৃশঃ কৃষ্ণো বর্ণাশ্রমবিকল্পবান্ .. ২৭..
প্রাণকোশেঽপি জীবামি ক্ষুধিতোঽস্মি পিপাসিতঃ .
সংশিতো নিশ্চিতো মন্যে ইতি কোশে মনোমযে .. ২৮..
বিজ্ঞানমযকোশস্থো বিজানামীতি তিষ্ঠতি .
আনন্দমযকোশাখ্যে ত্বহঙ্কারে পুরাকৃতৈঃ .. ২৯..
পুণ্যৈরুপাসনাভিশ্চ সুখিতোঽস্মীতি মোদতে .
এবং কংচুকিতঃ কোশৈঃ কংচুকৈরিব পঞ্চভিঃ .. ৩০..
পরিচ্ছিন্ন ইবাভাতি ব্যাপ্তোঽপি পরমেশ্বরঃ .
যথা সলিলমাবিশ্য বহুধা ভাতি ভস্করঃ .. ৩১..
তথা শরীরাণ্যাবিশ্য বহুধা স্ফুরতীশ্বরঃ .
কারণত্বং চ কার্যত্বং তটস্থং লক্ষণং তযোঃ .. ৩২..
শাখাযাং চন্দ্র ইতিবন্নৈব মুখ্যমিদং মতম্ .
মহাপ্রকাশ ইত্যুক্তং স্বরূপং চন্দ্রলক্ষণম্ .. ৩৩..
সচ্চিদানন্দরূপত্বং স্বরূপং লক্ষণং তযোঃ .
একলক্ষণযোরৈক্যং বাক্যেন প্রতিপাদ্যতে .. ৩৪..
তস্মাদেকপ্রকাশত্বং সর্বাত্মত্বমিতি স্থিতম্ .
দেবতির্যঙ্মনুষ্যাণাং প্রকাশান্ন পৃথক্স্থিতিঃ .. ৩৫..
জীবঃ প্রকাশাভিন্নত্বাত্সর্বাত্মেত্যভিধীযতে .
এবং প্রকাশরূপত্বপরিজ্ঞানে দৃঢীকৃতে .. ৩৬.. 
পুনরাবৃত্তিরহিতং কৈবল্যং পদমশ্নুতে .
সকৃত্প্রসক্তমাত্রোঽপি সর্বাত্মত্ব যদৃচ্ছযা .. ৩৭..
সর্বপাপবিনির্মুক্তঃ শিবলোকে মহীযতে .
সর্বাত্মভাবনা যস্য পরিপক্বা মহাত্মনঃ .
সংসারতারকঃ সাক্ষাত্স এব পরমেশ্বরঃ .. ৩৮..
ইতি শ্রীদক্ষিণামূর্তিস্তোত্রার্থপ্রতিপাদকে .
প্রবন্ধে মানসোল্লাসে তৃতীযোল্লাসসংগ্রহঃ .. ৩৯..
নানাচ্ছিদ্রঘটোদরস্থিতমহাদীপপ্রভাভাস্বরং
জ্ঞানং যস্য তু চক্ষুরাদিকরণদ্বারা বহিঃস্পন্দতে .
জানামীতি তমেব ভান্তমনুভাত্যেতত্সমস্তং জগত্
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৪..
স্বতঃ সন্তঃ প্রকাশন্তে ভাবা ঘটপটাদযঃ .
নেশ্বরস্য সমাবেশাদিত্যস্যোত্তরমুচ্যতে .. ১..
অহমিত্যনুসন্ধাতা জানামীতি ন চেত্স্ফুরেত্ .
কস্য কো বা প্রকাশেত জগচ্চ স্যাত্সুষুপ্তবত্ .. ২..
প্রাগূর্ধ্বং চাসতাং সত্ত্বং বর্তমানেঽপি ন স্বতঃ .
তস্মাদীশে স্থিতং সত্ত্বং প্রাগূর্ধ্বত্ববিবর্জিতে .. ৩..
স্বযমেব প্রকাশেরন্ জডা যদি বিনেশ্বরম্ .
সর্বং সর্বস্য ভাসেত ন বা ভাসেত কিঞ্চন .. ৪..
তস্মাত্সর্বজ্ঞমজ্ঞং বা জগত্স্যাদেকরূপকম্ .
তুল্যে স্বযংপ্রকাশত্বে জডচেতনযোর্মিথঃ .. ৫..
তুল্যমেব প্রসজ্যেরন্ গ্রাহ্যগ্রাহকতাদযঃ .
ইন্দ্রিযাণামনিযমাচ্চাক্ষুষা স্যূ রসাদযঃ .. ৬..
মলিনামলিনাদর্শপশ্চাত্প্রাগ্ভাগতুল্যযোঃ .
ক্রিযাশক্তিজ্ঞানশক্ত্যেরন্তঃকরণভাগযোঃ .. ৭..
প্রতিবিম্বে স্ফুরন্নীশঃ কর্তা জ্ঞাতেতি কথ্যতে .
বুদ্ধিঃ সত্ত্বগুণোত্কর্ষান্নির্মলো দর্পণো যথা .. ৮..
গৃহ্ণাতি বিষযচ্ছাযামাত্মচ্ছাযানুভাবতঃ .
অন্তঃকরণসম্বন্ধান্নিখিলানীন্দ্রিযাণ্যপি .. ৯..
রথাঙ্গনেমিবলযে কীলিতা ইব কীলকাঃ .
নাড্যোঽন্তঃকরণে স্যূতা জলসংস্যূতসূত্রবত্ .. ১০..
তাভিস্তু গো঳কান্তাভিঃ প্রসর্পন্তি স্ফুলিঙ্গবত্ .
করণানি সমস্তানি যথাস্বং বিষযং প্রতি .. ১১..
দেহস্য মধ্যমং স্থানং মূলাধার ইতীর্যতে .
গুদাত্তু দ্ব্যঙ্গুলাদূর্ধ্বং মেঢ্রাত্তু দ্ব্যঙ্গুলাদধঃ .. ১২..
ত্রিকোণোঽধোমুখাগ্রশ্চ কন্যকাযোনিসন্নিভঃ .
যত্র কুণ্ডলিনী নাম পরাশক্তিঃ প্রতিষ্ঠিতা .. ১৩..
প্রাণাগ্নিবিন্দুনাদানাং সবিত্রী সা সরস্বতী .
মূলাধারাগ্রকোণস্থা সুষুম্না ব্রহ্মরন্ধ্রগা .. ১৪..
মূলেঽর্ধচ্ছিন্নবংশাভা ষডাধারসমন্বিতা .
তত্পার্শ্বকোণযোর্জাতে দ্বে ইডাপিঙ্গলে স্থিতে .. ১৫..
নাডীচক্রমিতি প্রাহুঃ তস্মান্নাড্যঃ সমুদ্গতাঃ .
গান্ধারী হস্তিজিহ্বা চ নযনান্তং প্রধাবতঃ .. ১৬..
নাডীচক্রেণ সংস্যূতে নাসিকান্তমুভে গতে .
নাভিমণ্ডলমাশ্রিত্য কুক্কুটাণ্ডমিব স্থিতম্ .. ১৭..
নাডীচক্রমিতি প্রাহুস্তস্মান্নাড্যঃ সমুদ্গতাঃ .
পূষা চালাম্বুষা নাডী কর্ণদ্বযমুপাশ্রিতে .
নাডী শুক্লাহ্বযা তস্মাদ্ ভ্রূমধ্যমুপসর্পতি .. ১৮..
সরস্বত্যাহ্বযা নাডী জিহ্বান্তা বাক্প্রসারিণী .
নাডী বিশ্বোদরী নাম ভুঙ্ক্তেঽন্নং সা চতুর্বিধম্ .. ১৯..
পীত্বা পযস্বিনী তোযং কণ্ঠস্থা কুরুতে ক্ষুতম্ .
নাডীচক্রাত্সমুদ্ভূতা নাড্যস্তিস্রস্ত্বধোমুখাঃ .. ২০..
রাকা শুক্লং সিনীবালী মূত্রং মুঞ্চেত্কুহুর্মলম্ .
ভুক্তান্নরসমাদায শঙ্খিনী ধমনী পুনঃ .. ২১..
কপালকুহরং গত্বা মূর্ধ্নি সঞ্চিনুতে সুধাম্ .
শতং চৈকা চ নাড্যঃ স্যুস্তাসামেকা শিরোগতা .. ২২..
তযোর্ধ্বমাযন্মুক্তঃ স্যাদিতি বেদান্তশাসনম্ .
যদা বুদ্ধিগতৈঃ পুণ্যৈঃ প্রেরিতেন্দ্রিযমার্গতঃ .. ২৩..
শব্দাদীন্ বিষযান্ ভুঙ্ক্তে তদা জাগরিতং ভবেত্ .
সংহৃতেষ্বিন্দ্রিযেষ্বেষু জাগ্রত্সংস্কারজান্পুমান্ .. ২৪..
মানসান্বিষযান্ভুঙ্ক্তে স্বপ্নাবস্থা তদা ভবেত্ .
মনসোপ্যুপসংহারঃ সুষুপ্তিরিতি কথ্যতে .. ২৫..
তত্র মাযাসমাচ্ছন্নঃ সন্মাত্রো বর্ততে পুমান্ .
মূঢো জডোঽজ্ঞ ইত্যেবং মাযাবেশাত্প্রকাশতে .. ২৬..
সুখমস্বাপ্সমিত্যেবং প্রবোধসমযে পুমান্ .
সচ্চিদানন্দরূপঃ সন্ সম্যগেব প্রকাশতে .. ২৭..
ইত্থং জগত্সমাবিশ্য ভাসমানে মহেশ্বরে .
সূর্যাদযোঽপি ভাসন্তে কিমুতান্যে ঘটাদযঃ .. ২৮..
তস্মাত্সত্তা স্ফুরত্তা চ ভাবানামীশ্বরাশ্রযাত্ .
সত্যং জ্ঞানমনন্তং চ শ্রুত্যা ব্রহ্মোপদিশ্যতে .. ২৯..
জাগ্রত্স্বপ্নোদ্ভবং সর্বমসত্যং জডমন্ধবত্ .
ঈশ্বরশ্চাহমিত্যেবং ভাসতে সর্বজন্তুষু .. ৩০..
নির্বিকল্পশ্চ শুদ্ধশ্চ মলিনশ্চেত্যহং ত্রিধা .
নির্বিকল্পং পরং ব্রহ্ম নির্ধূতাখিলকল্পনম্ .. ৩১..
ধূল্যন্ধকারধূমাভ্রনির্মুক্তগগনোপমম্ .
বিবেকসমযে শুদ্ধং দেহাদীনাং ব্যপোহনাত্ .. ৩২..
যথাঽন্তরিক্ষং সংক্ষিপ্তং নক্ষত্রৈঃ কিঞ্চিদীক্ষ্যতে .
দেহেন্দ্রিযাদিসংসর্গান্মলিনং কলুষীকৃতম্ .. ৩৩..
যথাঽঽকাশং তমোরূঢং স্ফুরত্যনবকাশবত্ .
অহমিত্যৈশ্বরং ভাবং যদা জীবঃ প্রবুধ্যতে .. ৩৪..
সর্বজ্ঞঃ সর্বকর্তা চ তদা জীবো ভবিষ্যতি .
মাযযাধিকসম্মূঢো বিদ্যযেশঃ প্রকাশতে .. ৩৫..
নির্বিকল্পানুসন্ধানে সম্যগাত্মা প্রকাশতে .
অবিদ্যাখ্যতিরোধানব্যপাযে পরমেশ্বরঃ .
দক্ষিণামূর্তিরূপোসৌ স্বযমেব প্রকাশতে .. ৩৬..
ইতি শ্রীদক্ষিণামূর্তিস্তোত্রার্থপ্রতিপাদকে .
প্রবন্ধে মানসোল্লাসে চতুর্থোল্লাসসংগ্রহঃ .. ৩৭..
দেহং প্রাণমপীন্দ্রিযাণ্যপি চলাং বুদ্ধিং চ শূন্যং বিদুঃ
স্ত্রীবালান্ধজডোপমাস্ত্বহমিতি ভ্রান্তা ভৃশং বাদিনঃ .
মাযাশক্তিবিলাসকল্পিতমহাব্যামোহসংহারিণে
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৫..
প্রমাণমেকং প্রত্যক্ষং তত্ত্বং ভূতচতুষ্টযম্ .
মোক্ষশ্চ মরণান্নান্যঃ কামার্থৌ পুরুষার্থকৌ .. ১..
ন হি খল্বীশ্বরঃ কর্তা পরলোককথা বৃথা .
দেহং বিনাঽস্তি চেদাত্মা কুম্ভবদ্দৃশ্যতাং পুরঃ .. ২..
হ্রস্বো দীর্ঘো যুবা বাল ইতি দেহো হি দৃশ্যতে .
অস্তি জাতঃ পরিণতো বৃদ্ধঃ ক্ষীণো জরন্মৃতঃ .. ৩..
ইত্যেবমুক্তাঃ ষড্ভাববিকারা দেহসংশ্রযাঃ .
বর্ণাশ্রমবিভাগশ্চ দেহেষ্বেব প্রতিষ্ঠিতঃ .. ৪..
জাতকর্মাদিসংস্কারো দেহস্যৈব বিধীযতে .
শতং জীবেতি দেহস্য প্রযুঞ্জন্ত্যাশিষং শুভাম্ .. ৫..
ইতি প্রপঞ্চং চার্বাকো বংচযত্যল্পচেতনঃ .
কেচিচ্ছ্বসিমি জীবামি ক্ষুধিতোস্মি পিপাসিতঃ .. ৬..
ইত্যাদিপ্রত্যযবলাত্প্তাণমাত্মেতি মন্বতে .
কেচিচ্ছৃণোমি পশ্যামি জিঘ্রাম্যা স্বাদযাম্যহম্ .. ৭..
ইতীন্দ্রিযাণামাত্মত্বং প্রতিযন্তি ততোধিকম্ .
জানামিপ্রত্যযবলাদ্বুদ্ধিরিত্যপরে জগুঃ .. ৮..
মাযাব্যামূঢচিত্তানাং তেষাং দূষণমুচ্যতে .
দেহাদীনাং জডার্থানাং পাষাণবদনাত্মনাম্ .. ৯..
কথং ভবেদহম্ভাবঃ সমাবেশং বিনেশিতুঃ .
দেহস্তাবদযং নাত্মা দৃশ্যত্বাচ্চ জডত্বতঃ .. ১০..
রূপাদিমত্ত্বাত্সাংশত্বাদ্ভৌতিকত্বাচ্চ কুম্ভবত্ ..
মূর্চ্ছাসুষুপ্তিমরণেশ্বপি দেহঃ প্রতীযতে .. ১১..
দেহাদিব্যতিরিক্তত্বাত্তদাঽঽত্মা ন প্রকাশতে .
যথা জগত্প্রবৃত্তীনামাদিকারণমংশুমান্ .. ১২..
পুমাংস্তথৈব দেহাদিপ্রবৃত্তৌ কারণং পরম্ .
মম দেহোযমিত্যেবং স্ত্রীবালান্ধাশ্চ মন্বতে .. ১৩..
দেহোহমিতি নাবৈতি কদাচিদপি কশ্চন .
ইন্দ্রিযাণ্যপি নাত্মানঃ করণত্বাত্প্রদীপবত্ .. ১৪..
বীণাদিবাদ্যবচ্ছ্রোত্রং শব্দগ্রহণসাধনম্ .
চক্ষুস্তেজস্ত্রিতযবদ্রূপগ্রহণসাধনম্ .. ১৫..
গন্ধস্য গ্রাহকং ঘ্রাণং পুষ্পসম্পুটকাদিবত্ .
রসস্য গ্রাহিকা জিহ্বা দধিক্ষৌদ্রঘৃতাদিবত্ .. ১৬..
ইন্দ্রিযাণি ন মে সন্তি মূকোন্ধো বধিরোস্ম্যহম্ .
ইত্যাহুরিন্দ্রিযৈর্হীনা জনাঃ কিং তে নিরাত্মকাঃ .. ১৭..
প্রাণোপ্যাত্মা ন ভবতি জ্ঞানাভাবাত্সুষুপ্তিষু .
জাগ্রত্স্বপ্নোপভোগোত্থশ্রমবিচ্ছিত্তিহেতবে .. ১৮..
সুষুপ্তিং পুরুষে প্রাপ্তে শরীরমভিরক্ষিতুম্ .
শেষকর্মোভোগার্থং প্রাণশ্চরতি কেবলম্ .. ১৯..
প্রাণস্য তত্রাচৈতন্যং করণোপরমে যদি .
প্রাণে ব্যাপ্রিযমাণে তু করণোপরমঃ কথম্ .. ২০..
সম্রাজি হি রণোদ্যুক্তে বিরমন্তি ন সৈনিকাঃ .
তস্মান্ন করণস্বামী প্রাণো ভবিতুমর্হতি .. ২১..
মনসঃ প্রেরকে পুংসি বিরতে বিরমন্ত্যতঃ .
করণানি সমস্তানি তেষাং স্বামী ততঃ পুমান্ .. ২২..
বুদ্ধিস্তু ক্ষণিকা বেদ্যা গমাগমসমন্বিতা .
আত্মনঃ প্রতিবিম্বেন ভাসিতা ভাসযেজ্জগত্ .. ২৩..
আত্মন্যুত্পদ্যতে বুদ্ধিরাত্মন্যেব প্রলীযতে .
প্রাগূর্ধ্বং চাসতী বুদ্ধিঃ স্বযমেব ন সিধ্যতি .. ২৪..
জ্ঞানাচ্চেত্পূর্বপূর্বস্মাদুত্তরোত্তরসম্ভবঃ .
যুগপদ্বহুবুদ্ধিত্বং প্রসজ্যেত ক্ষণে ক্ষণে .. ২৫..
বুদ্ধ্যন্তরং ন জনযেন্নাশোত্ত্রমসত্ত্বতঃ .
এষাং সঙ্ঘাত আত্মা চেদেকদেশে পৃথক্কৃতে .. ২৬..
ন চৈতন্যং প্রসজ্যেত সঙ্ঘাতাভাবতস্তদা .
ভিন্নদৃগ্গত্যভিপ্রাযে বহুচেতনপুঞ্জিতম্ .. ২৭..
সদ্যো ভিন্নং ভবেদেতন্নিষ্ক্রিযং বা ভবিষ্যতি .
দেহস্যান্তর্গতোপ্যাত্মা ব্যাপ্ত এবেতি বুধ্যতে .. ২৮..
অণুপ্রমাণশ্চেদেষ ব্যাপ্নুযান্নাখিলং বপুঃ .
দেহপ্রমাণশ্চেন্ন স্যাদ্বালস্য স্থবিরাদিতা .. ২৯..
দেহবত্পরিণামী চেত্তদ্বদেব বিনঙ্ক্ষ্যতি .
কর্মণাঅং পরিণামেন ক্রিমিহস্ত্যাদিমূর্তিষু .. ৩০..
ব্যাপ্তত্বাত্প্রবিশত্যাত্মা ঘটাদিষ্বন্তরিক্ষবত্ .
পরমাণুপ্রমাণেঽপি মনসি প্রতিভাসতে .. ৩১..
স্বপ্নে চরাচরং বিশ্বমাত্মন্যেব প্রতিষ্ঠিতম্ .
দেহাদিষ্বহমিত্যেবং ভ্রমঃ সংসারহেতুকঃ .. ৩২..
অন্তঃ প্রবিষ্টঃ শাস্তেতি মোক্ষাযোপাদিশচ্ছ্রুতিঃ .
এবমেষা মহামাযা বাদিনামপি মোহিনী .. ৩৩..
যস্মাত্সাক্ষাত্কৃতে সদ্যো লীযতে চ সদাশিবে .
দেহেন্দ্রিযাসুহীনায মানদূরস্বরূপিণে .
জ্ঞানানন্দস্বরূপায দক্ষিণামূর্তযে নমঃ .. ৩৪..
ইতি শ্রীদক্ষিণামূর্তিস্তোত্রার্থ প্রতিপাদকে .
প্রবন্ধে মানসোল্লাসে পঞ্চমোল্লাসসঙ্গ্রহঃ .. ৩৫..
রাহুগ্রস্তদিবাকরেন্দুসদৃশো মাযাসমাচ্ছাদনাত্
সন্মাত্রঃ করণোপসংহরণতো যোঽভূত্সুষুপ্তঃ পুমান্ .
প্রাগস্বাপ্সমিতি প্রবোধসমযে যঃ প্রত্যভিজ্ঞাযতে
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৬..
স্বপ্নে বিশ্বং যথাঽন্তস্থং জাগ্রত্যপি তথেতি চেত্ .
সুষুপ্তৌ কস্য কিং ভাতি কঃ স্থাযী তত্র চেতনঃ .. ১..
সর্বং চ ক্ষণিকং শূন্যং সর্বমেব স্বলক্ষণম্ .
সঙ্ঘাতঃ পরমাণূনাং মহ্যম্ব্বগ্নিসমীরণাঃ .. ২..
মনুষ্যাদিশরীরাণি স্কন্ধপংচকসংহতিঃ .
স্কন্ধাশ্চ রূপবিজ্ঞানসংজ্ঞাসংকারবেদনাঃ .. ৩..
রূপ্যন্ত ইতি রূপাণি বিষযাশ্চেন্দ্রিযাণ্যপি .
বিষযেন্দ্রিযযোর্জ্ঞানং বিজ্ঞানস্কন্ধ উচ্যতে .. ৪..
সংজ্ঞাগুণক্রিযাজাতিবিশিষ্টপ্রত্যযাত্মিকা .
পঞ্চধা কল্পনা প্রোক্তা সংজ্ঞাস্কন্ধস্য সৌগতৈঃ .. ৫..
গবাং গৌরিতি সংজ্ঞোক্তা জাতির্গোত্বং তু গোগতম্ .
গুণাঃ শুক্লাদযস্তস্য গচ্ছত্যাদ্যাস্তথা .. ৬..
শৃঙ্গী চতুষ্পাল্লাঙ্গূলী বিশিষ্টপ্রত্যযো হ্যসৌ .
এবং পঞ্চবিধা ক্লৃপ্তঃ সংজ্ঞাস্কন্ধ ইতীর্যতে .. ৭..
রাগাদ্যাঃ পুণ্যপাপে চ সংস্কারস্কন্ধ উচ্যতে .
সুখং দুঃখং চ মোক্ষশ্চ স্কন্ধঃ স্যাদ্বেদনাহ্বযঃ .. ৮..
পঞ্চভ্য এব স্কন্ধেভ্যো নান্য আত্মাস্তি কশ্চন .
ন কশ্চদীশ্বরঃ কর্তা স্বগতাতিশযং জগত্ .. ৯..
স্কন্ধেভ্যঃ পরমাণুভ্যঃ ক্ষণিকেভ্যোঽভিজাযতে .
পূর্বপূর্বক্ষণাদেব ক্ষণঃ স্যাদুত্তরোত্তরঃ .. ১০..
পূর্বস্মাদেব হি জ্ঞানাজ্জাযতে জ্ঞানমুত্তরম্ .
স এবাযমিতি জ্ঞানং সেযং জ্বালেব বিভ্রমঃ .. ১১..
অস্তি ভাতীতিধীভ্রান্তৈরাত্মানাত্মসু কল্প্যতে .
হানোপাদানরাহিত্যাদাকাশঃ কিং প্রকাশতে .. ১২..
ইত্যেবং বৌদ্ধসিদ্ধান্তী ভাষমাণো নিষিদ্ধ্যতে .
শূন্যং চেজ্জগতো হেতুঃ জগদেব ন সিদ্ধ্যতি .. ১৩..
ঘটঃ শূন্যঃ পটঃ শূন্যঃ ইতি কৈঃ প্রতিপাদ্যতে .
নৈব ভাসেত শূন্যং চেজ্জগন্নরবিষাণবত্ .. ১৪..
বস্ত্বর্থী কিমুপাদদ্যাদ্ভারার্থঃ কিং পরিত্যজেত্ .
কো বিদধ্যান্নিষিদ্ধ্যেদ্বা শূন্যত্বাত্স্বস্য চাত্মনঃ .. ১৫..
অবসীদেন্নীরাকূতং তস্মাত্সর্বমিদং জগত্ .
স্কন্ধানাং পরমাণূনাং ন সঙ্ঘাতযিতাস্তি চেত্ .. ১৬..
সঙ্ঘাতো ন বিনা হেতুং জডা ঘটপটাদযঃ .
মহানুভাবো ভূযাসমিতি ভ্রান্তশ্চ মন্যতে .. ১৭..
আত্মাপলাপকো বৌদ্ধঃ কিমর্থং চরতি ব্রতম্ .
প্রত্যভিজ্ঞা যদি ভ্রান্তিঃ ভোজনাদি কথং ভবেত্ .. ১৮..
ইষ্টসাধনমেবৈতদন্নং গতদিনান্নবত্ .
ইতি নিশ্চিত্য বালোঽপি ভোজনাদৌ প্রবর্ততে .. ১৯..
অবকাশপ্রদাতৃত্বমাকাশার্থক্রিযা যথা .
তথৈবার্থক্রিযা পুংসঃ কর্তৃত্বজ্ঞাতৃতাদিকা .. ২০..
সুষুপ্তিসমযেপ্যাত্মা সত্যজ্ঞানসুখাত্মকঃ .
সুখমস্বাপ্সমিত্যেবং প্রত্যভিজ্ঞাযতে যতঃ .. ২১..
প্রত্যভিজ্ঞাযত ইতি প্রযোগঃ কর্মকর্তরি .
আত্মা স্বযংপ্রকাশাত্বাজ্জানাত্যাত্মানমাত্মনা .. ২২..
সুষুপ্তৌ মাযযা মূঢঃ জডোন্ধ ইতি লক্ষ্যতে .
অপ্রকাশতযা ভাতি স্বপ্রকাশতযাপি চ .. ২৩..
জডাত্মনি চ দেহাদৌ সাক্ষাদীশো বিবিচ্যতে .
এষৈব মোহিনী নাম মাযাশক্তির্মহেশিতুঃ .. ২৪..
মোহাপোহঃ প্রমাতৄণাং মোক্ষ ইত্যভিধীযতে .
অবস্থাত্রযনির্মুক্তো দোষদিভিরনাবিলঃ .. ২৫..
ইষীক ইব সন্মাত্রো ন্যগ্রোধকণিকোপমঃ .
বাহ্যাবাহ্যদ঳োন্মুক্তকদ঳ীকন্দসন্নিভঃ .. ২৬..
নিরংশো নির্বিকারশ্চ নিরাভাসো নিরঞ্জনঃ .
পুরুষঃ কেবলঃ পূর্ণঃ প্রোচ্যতে পরমেশ্বরঃ .. ২৭..
বাচো যত্র নিবর্তন্তে মনো যত্র বিলীযতে .
একীভবন্তি যত্রৈব ভূতানি ভুবনানি চ .. ২৮..
সমস্তানি চ তত্ত্বানি সমুদ্রে সিন্ধবো যথা .
কঃ শোকস্তত্র কো মোহ একত্বমনুপশ্যতঃ .. ২৯..
বাচ্যবাচকরূপত্বাত্সবিকল্পোপি সন্নযম্ .
দেহাদীনাং ব্যপোহেন সম্ভবেন্নির্বিকল্পকম্ .. ৩০..
অসন্নেব ভবেদ্বিদ্বানসদ্ব্রহ্মেতি বেদ চেত্ .
অস্তি ব্রহ্মেতি চেদ্বেদ সন্তেমেনং ততো বিদুঃ .. ৩১..
ইতি শ্রীদক্ষিণামূর্তিস্তোত্রার্থপ্রতিপাদকে .
প্রবন্ধে মানসোল্লাসে ষষ্ঠোল্লাসস্য সঙ্গ্রহঃ .. ৩২..
বাল্যাদিষ্বপি জাগ্রদাদিষু তথা সর্বাস্ববস্থাস্বপি
ব্যাবৃত্তাস্বনুবর্তমানমহমিত্যন্তঃ স্ফুরন্তং সদা .
স্বাত্মানং প্রকটীকরোতি ভজতাং যো মুদ্রযা ভদ্রযা
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৭..
প্রত্যভিজ্ঞাবলাদাত্মা স্থাযী নির্ধার্যতে যদি .
কা নাম প্রত্যভিজ্ঞৈষা কিং বা তস্যাঃ প্রযোজনম্ .. ১..
প্রত্যক্ষাদিপ্রমাণেষু প্রত্যভিজ্ঞা ন পঠ্যতে .
কথং তস্যাঃ প্রমাণত্বমিতি পৃচ্ছন্ প্রবোধ্যতে .. ২..
ভাতস্য কস্য চিত্পূর্বং ভাসমানস্য সাম্প্রতম্ .
সোঽযমিত্যনুসন্ধানং প্রত্যভিজ্ঞানমুচ্যতে .. ৩..
তদ্দেশকালাকারাদীনবধূযানুষ্ঙ্গিকান্ .
যথৈকং বস্ত্বনুস্যূতং সোঽযমিত্যভিধীযতে .. ৪..
মাযানুষ্ঙ্গসঞ্জাতকিঞ্চিজ্জ্ঞত্বাদ্যপোহনাত্ .
সর্বজ্ঞত্বাদিবিজ্ঞানং প্রত্যভিজ্ঞানমাত্মনঃ .. ৫..
পূর্বজন্মানুভূতার্থস্মরণান্মৃগশাবকঃ .
জননীস্তন্যপানায স্বযমেব প্রবর্ততে .. ৬..
তস্মান্নিশ্চীযতে স্থাযীত্যাত্মা দেহান্তরেষ্বপি .
স্মৃতিং বিনা ন ঘটতে স্তন্যপানং শিশোর্যতঃ .. ৭..
পূর্বত্রানুভবে কালে স্মৃতিকালে পরত্র সন্ .
আত্মা সংস্কাররূপেণ স্মরত্যর্থং স্বনিষ্ঠিতম্ .. ৮..
প্রত্যভিজ্ঞেতি ভাবানাং স্মৃতিশ্চেদভিধীযতে .
আত্মস্থৈর্যে প্রমাণত্বং স্মৃতিশ্চ প্রাপ্নুযাত্কথম্ .. ৯..
স্মৃতৌ প্রকাশো নার্থস্য ন চাপ্যর্থস্য নিশ্চযঃ .
ন চাপ্যর্থানুভবযোরঙ্গুল্যোরিব সম্ভবেত্ .. ১০..
নানুভূতিবিশিষ্টস্য পদার্থস্য চ দণ্ডিবত্ .
সর্বত্রাপ্যেবমিত্যেবং প্রসঙ্গাদিতি চেচ্ছৃণু .. ১১..
প্রাক্তনানুভবে নষ্টে তদবষ্টম্ভসম্ভবাত্ .
সংস্কারসংজ্ঞাত্সামগ্র্যাত্ পৌরুষাজ্জাযতে স্মৃতিঃ .. ১২..
আবেদ্যানুভবে নষ্টে তদীযং বিষযং প্রতি .
অনুভাবকমাত্মানং বোধযত্যনপাযিনম্ .. ১৩..
বিষযে চ প্রমুষিতে নষ্টে বাঽনুভবে সতি .
স্ববিশ্রান্তং স্মরত্যর্থং দেবোঽপ্রমুষিতঃ সদা .. ১৪..
প্রমোষণং প্রমাতৄণাং মাযযা তমসা কৃতম্ .
মাযাবিদ্যে প্রভোঃ শক্তী ভানোশ্ছাযাপ্রভোপমে .. ১৫..
অর্থানাচ্ছদযেন্মাযা বিদ্যা ব্যাক্ষিপ্য দর্শযেত্ .
প্রত্যভিজ্ঞৈব সর্বেষাং প্রমাণানাং চ সাধনম্ .. ১৬..
ঈশ্বরোন্যোহমপ্যন্য ইতি বিচ্ছেদকারিণীম্ .
ব্যাক্ষিপ্য বিদ্যযা মাযামীশ্বরোহমিতি স্মৃতিঃ .. ১৭..
ঈষত্প্রকাশোভূদীশো মাযাযবনিকাবৃতঃ .
সম্যগাবরণাপাযে সহস্রাংশুরিব স্ফুরেত্ .. ১৮..
ন কারণানাং ব্যাপারঃ প্রমাণানাং ন বা পুনঃ .
প্রত্যভিজ্ঞাপনং নাম মোহাপসরণং পরম্ .. ১৯..
যাবন্তি সন্তি মানানি ব্যবহারপ্রবৃত্তযে .
তেষাং মোহাপসরণাদ্ব্যপারোন্যো ন বিদ্যতে .. ২০..
জডানৃতপরিচ্ছিন্নদেহধর্মাশ্চিদাত্মনি .
সত্যজ্ঞানসুখাত্মত্বং মোহাদ্দেহেঽপি কল্প্যতে .. ২১..
শুক্তৌ রজতমিত্যেবং যথা ব্যামুহ্যতেঽন্যথা .
সএব র্রূপ্যং চেদ্ভাতি বিলযস্তে ন সিধ্যতি .. ২২
নাত্যন্তাসত্প্রকাশেত নরশৃঙ্গাদিবত্ক্বচিত্ .
কান্তাকরাদৌ রজতমিতি স্যাত্স্মরণং ভ্রমে .. ২৩..
তেনেদং তুল্যমিত্যেবং স্যাত্সাদৃশ্যাদ্যদি ভ্রমঃ .
পীতঃ শঙ্খো গুডস্তিক্ত ইত্যাদৌ নাস্তি তুল্যতা .. ২৪..
তাদাত্ম্যেন স্ফুরতি চেদ্রজতত্বেন শুক্তিকা .
বিভ্রমো নিরধিষ্ঠানো বাধো নিরবধির্ভবেত্ .. ২৫..
বুদ্ধিস্থিতং চেদ্রজতং বাহ্যত্বেন প্রতীযতে .
গুঞ্জাদৌ জ্বলনারোপে দেহদাহঃ প্রসজ্যতে .. ২৬..
যুক্তিহীনপ্রকাশত্বাদ্ ভ্রান্তের্ন হ্যস্তি লক্ষণম্ .
যদি স্যাল্লক্ষণং কিংচিদ্ ভ্রান্তিরেব ন সিধ্যতি .. ২৭..
জলচন্দ্রবদেকস্মিন্নির্ভযে রজ্জুসর্পবত্ .
প্রতীযতে যথা স্বর্ণে কারণে কটকাদিবত্ .. ২৮..
উপাত্তে রূপ্যবচ্ছুক্তৌ ব্যাপ্তে যক্ষপুরীব খে .
রশ্ম্যম্বুবত্স্ফুরদ্রূপে স্থাণৌ চোরবদক্রিযে .. ২৯..
অসত্কল্পমিদং বিশ্বমাত্মন্যারোপ্যতে ভ্রমাত্ .
স্বযংপ্রকাশং সদ্রূপং ভ্রান্তিবাধবিবর্জিতম্ .. ৩০..
প্রত্যভিজ্ঞাযতে বস্তু প্রাগ্বন্মোহে ব্যপোহিতে .
দেহাদ্যুপাধৌ নির্ধূতে স্যাদাত্মৈব মহেশ্বরঃ .. ৩১..
স্মৃতিঃ প্রত্যক্ষমৈতিহ্যমিত্যাদীন্যপরাণ্যপি .
প্রমাণান্যাপ্তবাগাহ প্রত্যভিজ্ঞাপ্রসিদ্ধযে .. ৩২..
ইতি শ্রীদক্ষিণামূর্তিস্তোত্রার্থপ্রতিপাদকে .
প্রবন্ধে মানসোল্লাসে সপ্তমোল্লাসসঙ্গ্রহঃ .. ৩৩..
বিশ্বং পশ্যতি কার্যকারণতযা স্বস্বামিসংবন্ধতঃ
শিষ্যাচার্যতযা তথৈব পিতৃপুত্রাদ্যাত্মনা ভেদতঃ .
স্বপ্নে জাগ্রতি বা এষ পুরুষো মাযাপরিভ্রামিতঃ
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৮..
প্রকাশব্যতিরেকেণ পদার্থঃ কোঽপি নাস্তি চেত্ .
পরমার্থোপদেশান্তো ব্যবহারঃ কথং ভবেত্ .. ১..
কস্য বন্ধশ্চ মোক্ষশ্চ বধ্যতে কেন হেতুনা .
মাযযা লক্ষণং কিং স্যাদিত্যেবং পরিপৃচ্ছতঃ .. ২..
প্রশনঃ স্যাদুত্তরং বক্তুং প্রতিপত্তুং সুখেন চ .
উক্তোর্থঃ সপ্তভিঃ শ্লোকৈঃ পুনঃ সংক্ষিপ্য কথ্যতে .. ৩..
পৌনরুক্ত্যং ন দোষোঽত্র শব্দেনার্থেন বা ভবেত্ .
অভ্যাসেন গরীযস্ত্বমর্থস্য প্রতিপাদ্যতে .. ৪..
স্বযংপ্রকাশে সদ্রূপেঽপ্যেকস্মিন্পরমেশ্বরে .
কার্যকারণসম্বন্ধাদ্যনেকবিধকল্পনা .. ৫..
রাহোঃ শিরঃ সুষিঃ খস্য মমাত্মা প্রতিমাবপুঃ .
ইত্যাদিকল্পনা তুল্যা ন পৃথগ্বস্তুগোচরা .. ৬..
উপাস্যোপাসকত্বেন গুরুশিষ্যক্রমেণ চ .
স্বামিভৃতাদিরূপেণ ক্রীডতি স্বেচ্ছযেশ্বরঃ .. ৭..
পিতরং প্রতি পুত্রো যঃ পুত্রং প্রতি পিতৈব সঃ .
এক এব হি নানেব কল্প্যতে শব্দমাত্রতঃ .. ৮..
তস্মাত্প্রকাশ এবাস্তি পরমার্থনিরূপণে .
ভেদপ্রতীতির্মিথ্যৈব মাযযাঽঽত্মনি কল্পিতা .. ৯..
মিথ্যাত্বং নাম বাধ্যত্বং সম্যগ্জ্ঞানোদযে সতি .
শিষ্যাচার্যোপদেশাদি স্বপ্নবত্প্রতিভাসতে .. ১০..
মিথ্যাভূতোঽপি বেদান্তঃ সত্যমর্থং প্রবোধযেত্ .
দেবতাপ্রতিমাবচ্চ চিত্রবত্প্রতিবিম্ববত্ .. ১১..
সর্বোঽপি ব্যবহারোঽযং মাযযা পরিজৃম্ভণম্ .
সুষুপ্তিসদৃশী মাযা স্বপ্রবোধেন বাধ্যতে .. ১২..
যুক্তিহীনপ্রকাশস্য সংজ্ঞা মাযেতি কথ্যতে .
নাসতী দৃশ্যমানা সা বাধ্যমানা ন বা সতী .. ১৩..
ন প্রকাশাদিযং ভিন্না ছাযেবার্কস্য তামসী .
ন চাভিন্না জডত্বেন বিরোধান্নোভযাত্মিকা .. ১৪..
স্বহেত্ববযবাভাবান্নেযং সাবযবোচ্যতে .
ন চাবযবহীনা সা কার্যেষ্ববযবান্বিতা .. ১৫..
অবিচারিতসিদ্ধেযং মাযাবেশ্যাবিলাসিনী .
পুরুষং বঞ্চযত্যেব মিথ্যাভূতৈঃ স্ববিভ্রমৈঃ .. ১৬..
ন তস্যা মূলবিচ্ছেদমভিবাঞ্ছতি কেচন .
তেষাং পক্ষে কথং মোক্ষো মনসঃ সম্ভবিষ্যতি .. ১৭..
তিস্রোপ্যবস্থা মনসো জাগ্রত্স্বপ্নসুষুপ্তযঃ .
চক্রবত্পরিবর্তন্তে ভেদভ্রান্ত্যেকহেতবঃ .. ১৮..
তাভিঃ করোতি কর্মাণি পুনস্তৈর্বধ্যতে মনঃ .
মনসঃ কেবলঃ সাক্ষী ভানুবত্পুরুষঃ পরঃ .. ১৯..
যথা প্রাণিকৃতৈরর্কঃ কর্মভির্নৈব বধ্যতে .
তথা মনঃকৃতৈরাত্মা সাক্ষিত্বান্নৈব বধ্যতে .. ২০..
আত্মা করোতি কর্মাণি বধ্যতে মুচ্যতে চ তৈঃ .
ইত্যৌপচারিকী ক্লৃপ্তির্ভ্রমমাত্রৈব কেবলম্ .. ২১..
ধূমাভ্রধূলীনীহারৈরস্পৃষ্টোঽপি দিবাকরঃ .
যথা ছন্ন ইবাভাতি তথৈবাত্মাঽপি মাযযা .. ২২..
যথা লীলাবশাত্কশ্চিদ্ভ্রাম্যমাণঃ কুমারকঃ .
ভ্রমত্তত্পশ্যতি জগত্ শতচন্দ্রং নভঃস্থলম্ .. ২৩..
তথৈব মাযযা জীবো ভ্রামিতো বাসনাবশাত্ .
নানাকারমিদং বিশ্বং ভ্রমমাণং চ পশ্যতি .. ২৪..
সংসৃজ্য মনসা দেবঃ সংসরন্নিব লক্ষ্যতে .
যথাঽর্কো জলসংসর্গাচ্চলন্নানেব লক্ষ্যতে .. ২৫..
যোগাভ্যাসবশাদ্যেন মনো নির্বিষযং কৃতম্ .
নিবৃত্তঃ স পুমাংসদ্যো জীবন্মুক্তো ভবিষ্যতি .. ২৬..
দ্বা সুপর্ণৌ চ সযুজাভবন্মাযযা শিবঃ .
অজামেকাং জুষন্নেকো নানেবাসীদিতি শ্রুতিঃ .. ২৭..
ইতি শ্রীদক্ষিণামূর্তিস্তোত্রার্থপ্রতিপাদকে .
প্রবন্ধে মানসোল্লাসে অষ্টমোল্লাসসঙ্গ্রহঃ .. ২৮..
ভূরম্ভাংস্যনলোঽনিলোঽম্বরমহর্নাথো হিমাংশুঃ পুমান্
ইত্যাভাতি চরাচরাত্মকমিদং যস্যৈব মূর্ত্যষ্টকম্ .
নান্যত্কিঞ্চন বিদ্যতে বিমৃশতাং যস্মাত্পরস্মাদ্বিভোঃ
তস্মৈ শ্রী গুরুমূর্তযে নম ইদং শ্রীদক্ষিণামূর্তযে .. ৯..
কথমেবংবিধা মাযা নিবর্তেতেতি পৃচ্ছতঃ .
ঈশ্বরোপাসনারূপস্তদুপাযঃ প্রকীর্ত্যতে .. ১..
ষট্ত্রিংশত্তত্ত্বরূপাসু পরমেশ্বরমূর্তিষু .
প্রত্যক্ষেণোপলভ্যন্তে সর্বৈরপ্যষ্টমূর্তযঃ .. ২..
অমেযাসু মনঃ ক্ষিপ্রমারোঢুং নার্হতীত্যতঃ .
মূর্ত্যষ্টকমযীং ব্রূত গুরুঃ সর্বাত্মভাবনাম্ .. ৩..
বিরাট্ছরীরে ব্রহ্মাণ্ডে প্রাণিনামপি বিগ্রহে .
ষট্ত্রিংশত্তত্ত্বসঙ্ঘাতঃ সর্বত্রাপ্যনুবর্ততে .. ৪..
ব্যাপ্তির্ব্যষ্টিশরীরেঽস্মিন্মনসো ব্যষ্টিরূপিণঃ .
তস্মাত্সর্বাত্মকমিদং স্বশরীরং বিচিন্তযেত্ .. ৫..
ব্যষ্ট্যুপাসনযা পুংসঃ সমষ্টিব্যাপ্তিমাপ্নুযাত্ .
উপসংক্রামতীত্যেবং দশকৃত্ব উপাদিশত্ .. ৬..
ব্রহ্মাণ্ডস্যোদরে লোকাঃ সপ্তভূরাদযঃ স্মৃতাঃ .
মূলাদিব্রহ্মরন্ধ্রান্তেষ্বাধারেষু বসন্তি তে .. ৭..
বীণাদণ্ডো মহামেরুস্থীনি কুলপর্বতাঃ .
গঙ্গা তু পিঙ্গ঳া নাডী যমুনেডা প্রকীর্তিতা .. ৮..
সরস্বতী সুষুম্নোক্তা নাড্যোন্যাঃ পুণ্যনিম্নগাঃ .
দ্বীপাঃ স্যুর্ধাতবঃ সপ্ত স্বেদবাষ্পাদযোব্ধযঃ .. ৯..
মূলে তিষ্ঠতি কালাগ্নিরস্থিমধ্যে চ বাডবঃ .
বৈদ্যুতোগ্নিঃ সুষুম্নাযাং পার্থিবো নাভিমণ্ডলে .. ১০..
হৃদি তিষ্ঠতি সূর্যাগ্নিঃ কপালে চন্দ্রমণ্ডলম্ .
নক্ষত্রাণ্যপরাণ্যাহুর্নেত্রাদীনীন্দ্রিযাণ্যপি .. ১১..
ধার্যন্তে বাযুভির্লোকাঃ যথা প্রবহণাদিভিঃ .
প্রাণাদিভির্দশবিধৈর্ধার্যতে বাযুভির্বপুঃ .. ১২..
প্রাপ্যেডাপিঙ্গ঳ে প্রাণো মূলাত্সূর্যস্বরূপতঃ .
নাসিকাভ্যাং বহির্গত্বা লীযতে দ্বিষডঙ্গুলে .. ১৩..
অষ্টাঙ্গু঳েন সোমাত্মা নাডীভ্যামন্তরাবিশত্ .
মলমূত্রমরুচ্ছুক্রাণ্যপানো বিসৃজেদ্বহিঃ .. ১৪..
অগ্নীষোমমযো ভূত্বা সুষুম্নারন্ধ্রমাশ্রিতঃ .
আব্রহ্মরন্ধ্রমুদ্গচ্ছন্নুদানো বর্ধতে স্বযম্ .. ১৫..
ব্যাপযেদ্বপুষি ব্যানো ভুক্তান্নরসমন্বহম্ .
সন্ধুক্ষণং সমানস্তু কাযাগ্নেঃ কুরুতে সদা .. ১৬..
নাগো হিক্কাকরঃ কূর্মো নিমেষোন্মেষকারকঃ .
ক্ষুতং করোতি কৃকরো দেবদত্তো বিজৃম্ভণম্ .. ১৭..
স্থৌল্যং ধনঞ্জযঃ কুর্যান্মৃতং চাপি ন মুঞ্চতি .
আকাশো বহিরপ্যন্তরবকাশং প্রযচ্ছতি .. ১৮..
চন্দ্রার্কৌ কালনেতারৌ প্রাণাপানৌ শরীরিণাম্ .
সাক্ষী পুরুষ ইত্যেবং মূর্ত্যষ্টকমিদং বপুঃ .. ১৯..
সমনস্কমিদং যোগী সেবমান উপাসনম্ .
অষ্টাঙ্গযোগযুক্তঃ সন্নমনস্কং স গচ্ছতি . ২০..
মনঃ প্রসাদঃ সন্তোষো মৌনমিন্দ্রিযনিগ্রহঃ .
দযা দাক্ষিণ্যমাস্তিক্যমার্জবং মার্দবং ক্ষমা .. ২১..
ভাবশুদ্ধিরহিংসা চ ব্রহ্মচর্যং স্মৃতির্ধৃতিঃ .
ইত্যেবমাদযোন্যে চ মনঃ সাধ্যা যমাঃ স্মৃতাঃ .. ২২..
স্নানং শৌচং ক্রতুঃ সত্যং জপো হোমশ্চ তর্পণম্ .
তপো দানং তিতিক্ষা চ নমস্কারঃ প্রদক্ষিণম্ .. ২৩..
ব্রতোপবাসাদ্যাশ্চান্যে কাযিকা নিযমাঃ স্মৃতাঃ .
স্বস্তিকং গোমুখং পদ্যং হংসাখ্যং ব্রাহ্মমাসনম্ .. ২৪..
নৃসিংহং গরুডং কূর্মং নাগাখ্যং বৈষ্ণবাসনম্ .
বীরং মযূরং বজ্রাখ্যং সিদ্ধাখ্যং রৌদ্রমাসনম্ .. ২৫..
যোন্যাসনং বিদুঃ শাক্তং শৈবং পশ্চিমতানকম্ .
নিরালম্বনযোগস্য নিরালম্বনমাসনম্ .. ২৬..
নিরালম্বতযা ধ্যানং নিরালম্বঃ সদাশিবঃ .
রেচকঃ পূরকশ্চৈব কুম্ভকঃ প্রাণসংযমঃ .. ২৭..
ইন্দ্রিযাণাং সমস্তানাং বিষযেভ্যো নিবারণম্ .
প্রত্যাহার ইতি প্রোক্তং প্রত্যাহারার্থবেদিভিঃ .. ২৮..
আধারে ক্বাপি মনসঃ স্থাপনং ধারণোচ্যতে .
ব্রহ্মবিষ্ণুশিবাদীনাং চিন্তা ধ্যানং প্রচক্ষতে .. ২৯..
ধ্যানাদস্পন্দনং বুদ্ধেঃ সমাধিরভিধীযতে .
অমনস্কসমাধিস্তু সর্বচিন্তাবিবর্জিতম্ .. ৩০..
চিত্তে নিশ্চলতাং যাতে প্রাণো ভবতি নিশ্চলঃ .
চিত্তস্য নিশ্চলত্বায যোগং সধ্যানমভ্যসেত্ .. ৩১..
আকুঞ্চনমপানস্য প্রাণস্য চ নিরোধনম্ .
লম্বিকোপরি জিহ্বাযাঃ স্থাপনং যোগসাধনম্ .. ৩২..
চিত্তে নিশ্চলতাং যাতে প্রাণে মধ্যপথং গতে .
চিহ্নান্যেতানি জাযন্তে পঞ্চভূতজযাত্পৃথক্ .. ৩৩..
মলমূত্রকফাল্পত্বমারোগ্যং লঘুতা তনোঃ .
সুগন্ধঃ স্বর্ণ[স্বর]বর্ণত্বং প্রথমং যোগলক্ষণম্ .. ৩৪..
কণ্টকাগ্রেষ্বসঙ্গত্বং জলপঙ্কেষ্বমজ্জনম্ .
ক্ষুত্তৃডাদিসহিষ্ণুত্বং দ্বিতীযং যোগলক্ষণম্ .. ৩৫..
বহ্বন্নপানভোক্তৃত্বমাতপাগ্নিসহিষ্ণুতা .
দর্শনং শ্রবণং দূরাত্তৃতীযং যোগলক্ষণম্ .. ৩৬..
মণ্ডূকপ্লবনং ভূমৌ মর্কটপ্লবনং দ্রুমে .
আকাশগমনং চেতি চতুর্থং যোগলক্ষণম্ .. ৩৭..
জ্ঞানং ত্রিকালবিষযমৈশ্বর্যমণিমাদিকম্ .
অনন্তশক্তিমত্বং চ পঞ্চমং যোগলক্ষণম্ .. ৩৮..
প্রাণে সুষুম্নাং সংপ্রাপ্তে নাদোন্তঃ শ্রূযতেষ্টধা .
ঘণ্টাদুন্দুভিশঙ্খাব্ধিবীণাবেণ্বাদিতালবত্ .. ৩৯..
তনূনপাত্তটিত্তারাতারেশতপনোপমম্ .
ব্রহ্মনাডীং গতে প্রাণে বিম্বরূপং প্রকাশতে .. ৪০..
শ্বাসাশ্চরন্তি যাবন্তো মনুষ্যস্য দিনং প্রতি .
তাবন্তি যোজনান্যর্কঃ শ্বাসেশ্বাসে প্রধাবতি .. ৪১..
একবিংশতিসাহস্রং ষট্ছতং শ্বাসসঙ্খ্যযা .
সোঽহমিত্যুচ্চরত্যাত্মা মন্ত্রং প্রত্যহমাযুষে .. ৪২..
সকারং চ হকারং চ লোপযিত্বা প্রযোজযেত্ .
সন্ধিং বৈ পূর্বরূপাখ্যং ততোঽসৌ প্রণবো ভবেত্ .. ৪৩..
অকারশ্চাপ্যুকারশ্চ মকারো বিন্দুনাদকৌ .
পঞ্চাক্ষরাণ্যমূন্যাহুঃ প্রণবস্থানি পণ্ডিতাঃ ..
ব্রহ্মা বিষ্ণুশ্চ রুদ্রশ্চাপীশ্বরশ্চ সদাশিবঃ .
তেষ্বক্ষরেষু তিষ্ঠন্তি ষট্ত্রিংশত্তত্ত্বসংযুতাঃ .. ৪৫..
গুরুপ্রসাদাল্লভতে যোগমষ্টাঙ্গলক্ষণম্ .
শিবপ্রসাদাল্লভতে যোগসিদ্ধিং চ শাশ্বতীম্ .. ৪৬..
সচ্চিদানন্দরূপায বিন্দুনাদান্তরাত্মনে .
আদিমধ্যান্তশূন্যায গুরূণাং গুরবে নমঃ .. ৪৭..
ইতি শ্রীদক্ষিণামূর্তিস্তোত্রার্থপ্রতিপাদকে .
প্রবন্ধে মানসোল্লাসে নবমোল্লাসসঙ্গ্রহঃ .. ৪৮..
সর্বাত্মত্বমিতি স্ফুটীকৃতমিদং যস্মাদমুষ্মিংস্তবে
তেনাস্য শ্রবণাত্তদর্থমননাদ্ধ্যানাচ্চ সংকীর্তনাত্ .
সর্বাত্মত্বমহাবিভূতিসহিতং স্যাদীশ্বরত্বং স্বতঃ
সিদ্ধ্যেত্তত্পুনরষ্টধা পরিণতং চৈশ্বর্যমব্যাহতম্ .. ১০..
পরিচ্ছিন্নমহম্ভাবং পরিত্যজ্যানুষঙ্গিকম্ .
পূর্ণাহম্ভাবলাভোস্য স্তোত্রস্য ফলমুচ্যতে .. ১..
পুত্রপৌত্রগৃহক্ষেত্রধনধান্যসমৃদ্ধযঃ .
অর্বাচীনাশ্চ সিধ্যন্তি স্বর্গপাতা঳ভূমিষু .. ২..
পাকে প্রবর্তমানস্য শীতাদিপরিহারবত্ .
প্রাসঙ্গিকাশ্চ সিধ্যন্তি স্তোত্রেণানেন সর্বদা .. ৩..
ঐশ্বর্যমীশ্বরত্বং হি তস্য নাস্তি পৃথক্স্থিতিঃ .
পুরুষে ধাবমানেঽপি ছাযা তমনুধাবতি .. ৪..
অনন্তশক্তিরৈশ্বর্যং নিষ্যন্দাশ্চাণিমাদযঃ .
স্বস্যেশ্বরত্বে সংসিদ্ধে সিধ্যন্তি স্বযমেব হি .. ৫..
যদীযৈশ্বর্যবিপ্রুড্ভির্ব্রহ্মবিষ্ণুশিবাদযঃ .
ঐশ্বর্যবন্তো শাসন্তে স এবাত্মা সদাশিবঃ .. ৬..
পুষ্পমানযতা গন্ধো বিনেচ্ছামনুভূযতে .
পূর্ণাহম্ভাবযুক্তেন পরিচ্ছিন্না বিভূতযঃ .. ৭..
অণিমা মহিমা চৈব গরিমা লঘিমা তথা .
প্রাপ্তিঃ প্রাকাম্যমীশিত্বং বশিত্বং চাষ্টসিদ্ধযঃ .. ৮..
অত্যন্তমণুষু প্রাণিষ্বাত্মত্বেন প্রবেশনম্ .
অণিমাসংজ্ঞমৈশ্বর্যং ব্যাপ্তস্য পরমাত্মনঃ .. ৯..
ব্রহ্মাণ্ডাদিশিবান্তাযাঃ ষট্ত্রিংশত্তত্ত্বসংহতেঃ .
বহিশ্চ ব্যাপ্যবৃত্তিত্বমৈশ্বর্যং মহিমাহ্বযম্ .. ১০..
মহামেরুসমাঙ্গস্য সমুদ্ধরণকর্মণি .
লাঘবে তূলতুল্যত্বং লঘিমানং বিদুর্বুধাঃ .. ১১..
পরমাণুসমাঙ্গস্য সমুদ্ধরণকর্মণি .
গুরবে মেরুতুল্যত্বং গরিমাণং বিদুর্বুধাঃ .. ১২..
পাতালবাসিনঃ পুংসো ব্রহ্মলোকাবলোকনম্ .
প্রাপ্তির্নাম মহৈশ্বর্যং সুদুষ্প্রাপমযোগিনাম্ .. ১৩..
আকাশগমনাদীনামন্যাসং সিদ্ধিসম্পদাম্ .
স্বেচ্ছামাত্রেণ সংসিদ্ধিঃ প্রাকাম্যমভিধীযতে .. ১৪..
স্বশরীরপ্রকাশেন সর্বার্থানাং প্রকাশনম্ .
প্রাকাশ্যমিদমৈশ্বর্যমিতি কেচিত্প্রচক্ষতে .. ১৫..
স্বেচ্ছামাত্রেণ লোকানাং সৃষ্টিস্থিত্যন্তকর্তৃতা .
সূর্যাদিনাং নিযোক্তৃত্বমীশিত্বমভিধীযতে .. ১৬..
সলোকপালাঃ সর্বেঽপি লোকাঃ স্ববশবর্তিনঃ .
তদৈশ্বর্যং বশিত্বাখ্যং সুলভং শিবযোগিনাম্ .. ১৭..
যস্ত্বেবং ব্রাহ্মণো বেত্তি তস্য দেবা বশে স্থিতাঃ .
কিং পুনঃ ক্ষ্মাপতিব্যাঘ্রব্যা঳স্ত্রীপুরুষাদযঃ .. ১৮..
সর্বাত্মভাবসাম্রাজ্যনিরন্তরিতচেতসাম্ .
পরিপক্বসমাধীনাং কিং কিং নাম ন সিধ্যতি .. ১৯..
স্তোত্রমেতত্পঠেদ্ধীমান্সর্বাত্মত্বং চ ভাবযেত্ .
অর্বাচীনে স্পৃহাং মুক্ত্বা ফলে স্বর্গাদিসম্ভবে .. ২০..
স্বর্গাদিরাজ্যং সাম্রাজ্যং মনুতে ন হি পণ্ডিতঃ .
তদেব তস্য সাম্রাজ্যং যত্তু স্বারাজ্যমাত্মনি .. ২১..
সর্বাত্মভাবনাবন্তং সেবন্তে সর্বসিদ্ধযঃ .
তস্মাদাত্মনি সাম্রাজ্যং কুর্যান্নিযতমানসঃ .. ২২..
যস্য দেবে পরা ভক্তির্যথা দেবে তথা গুরৌ .
তস্যৈতে কথিতা হ্যর্থাঃ প্রকাশন্তে মহাত্মনঃ .. ২৩..
প্রকাশাত্মিকযা শক্ত্যা প্রকাশানাং প্রভাকরঃ .
প্রকাশযতি যো বিশ্বং প্রকাশোঽযং প্রকাশতাম্ .. ২৪..
ইতি শ্রীদক্ষিণামূর্তিস্তোত্রার্থপ্রতিপাদকে .
প্রবন্ধে মানসোল্লাসে দশম্মোল্লাসসঙ্গ্রহঃ .. ২৫..
ইতি শ্রীমচ্ছঙ্করভগবত্পাদাচার্যকৃত
দক্ষিণামূর্তিস্তোত্রভাবার্থবার্তিকং
সুরেশ্বরাচার্যকৃতং সমাপ্তম্ ..
৐ তত্ সত্ ..