কালভৈরবাষ্টকং

.. শ্রী কালভৈরবাষ্টকং ..

দেবরাজসেব্যমানপাবনাংঘ্রিপঙ্কজং
ব্যালযজ্ঞসূত্রমিন্দুশেখরং কৃপাকরম্ .
নারদাদিযোগিবৃন্দবন্দিতং দিগংবরং
কাশিকাপুরাধিনাথকালভৈরবং ভজে .. ১..
ভানুকোটিভাস্বরং ভবাব্ধিতারকং পরং
নীলকণ্ঠমীপ্সিতার্থদাযকং ত্রিলোচনম্ .
কালকালমংবুজাক্ষমক্ষশূলমক্ষরং
কাশিকাপুরাধিনাথকালভৈরবং ভজে .. ২..
শূলটংকপাশদণ্ডপাণিমাদিকারণং
শ্যামকাযমাদিদেবমক্ষরং নিরামযম্ .
ভীমবিক্রমং প্রভুং বিচিত্রতাণ্ডবপ্রিযং
কাশিকাপুরাধিনাথকালভৈরবং ভজে .. ৩..
ভুক্তিমুক্তিদাযকং প্রশস্তচারুবিগ্রহং
ভক্তবত্সলং স্থিতং সমস্তলোকবিগ্রহম্ .
বিনিক্বণন্মনোজ্ঞহেমকিঙ্কিণীলসত্কটিং
কাশিকাপুরাধিনাথকালভৈরবং ভজে .. ৪..
ধর্মসেতুপালকং ত্বধর্মমার্গনাশনং
কর্মপাশমোচকং সুশর্মধাযকং বিভুম্ .
স্বর্ণবর্ণশেষপাশশোভিতাংগমণ্ডলং
কাশিকাপুরাধিনাথকালভৈরবং ভজে .. ৫..
রত্নপাদুকাপ্রভাভিরামপাদযুগ্মকং
নিত্যমদ্বিতীযমিষ্টদৈবতং নিরংজনম্ .
মৃত্যুদর্পনাশনং করালদংষ্ট্রমোক্ষণং
কাশিকাপুরাধিনাথকালভৈরবং ভজে .. ৬..
অট্টহাসভিন্নপদ্মজাণ্ডকোশসংততিং
দৃষ্টিপাত্তনষ্টপাপজালমুগ্রশাসনম্ .
অষ্টসিদ্ধিদাযকং কপালমালিকাধরং
কাশিকাপুরাধিনাথকালভৈরবং ভজে .. ৭..
ভূতসংঘনাযকং বিশালকীর্তিদাযকং
কাশিবাসলোকপুণ্যপাপশোধকং বিভুম্ .
নীতিমার্গকোবিদং পুরাতনং জগত্পতিং
কাশিকাপুরাধিনাথকালভৈরবং ভজে .. ৮..
          .. ফল শ্রুতি ..
কালভৈরবাষ্টকং পঠংতি যে মনোহরং
জ্ঞানমুক্তিসাধনং বিচিত্রপুণ্যবর্ধনম্ .
শোকমোহদৈন্যলোভকোপতাপনাশনং
প্রযান্তি কালভৈরবাংঘ্রিসন্নিধিং নরা ধ্রুবম্
.. ইতি শ্রীমছংকরাচার্যবিরচিতং
শ্রী কালভৈরবাষ্টকং সংপূর্ণম্ ..