রামস্তোত্রম্ ইন্দ্র কৃতং

.. ইন্দ্র কৃতং রামস্তোত্রম্ ..

ইন্দ্র উবাচ
ভজেঽহং সদা রামমিন্দীবরাভং ভবারণ্যদাবানলাভাভিধানম্ |
ভবানীহৃদা ভাবিতানন্দরূপং ভবাভাবহেতুং ভবাদিপ্রপন্নম্ || ১||
সুরানীকদুঃখৌঘনাশৈকহেতুং নরাকারদেহং নিরাকারমীড্যম্ |
পরেশং পরানন্দরূপং বরেণ্যং হরিং রামমীশং ভজে ভারনাশম্ || ২||
প্রপন্নাখিলানন্দদোহং প্রপন্নং প্রপন্নার্তিনিঃশেষনাশাভিধানম্ |
তপোযোগযোগীশভাবাভিভাব্যং কপীশাদিমিত্রং ভজে রামমিত্রম্ || ৩||
সদা ভোগভাজাং সুদূরে বিভান্তং সদা যোগভাজামদূরে বিভান্তম্ |
চিদানন্দকন্দং সদা রাঘবেশং বিদেহাত্মজানন্দরূপং প্রপদ্যে || ৪||
মহাযোগমাযাবিশেষানুযুক্তো বিভাসীশ লীলানরাকারবৃত্তিঃ |
ত্বদানন্দলীলাকথাপূর্ণকর্ণাঃ সদানন্দরূপা ভবন্তীহ লোকে || ৫||
অহং মানপানাভিমত্তপ্রমত্তো ন বেদাখিলেশাভিমানাভিমানঃ |
ইদানীং ভবত্পাদপদ্মপ্রসাদাত্ত্রিলোকাধিপত্যাভিমানো বিনষ্টঃ || ৬||
স্ফুরদ্রত্নকেযূরহারাভিরামং ধরাভারভূতাসুরানীকদাবম্ |
শরচ্চন্দ্রবক্ত্রং লসত্পদ্মনেত্রং দুরাবারপারং ভজে রাঘবেশম্ || ৭||
সুরাধীশনীলাভ্রনীলাঙ্গকান্তিং বিরাধাদিরক্ষোবধাল্লোকশান্তিম্ |
কিরীটাদিশোভং পুরারাতিলাভং ভজে রামচন্দ্রং রঘূণামধীশম্ || ৮||
লসচ্চন্দ্রকোটিপ্রকাশাদিপীঠে সমাসীনমঙ্কে সমাধায সীতাম্ |
স্ফুরদ্ধেমবর্ণাং তডিত্পুঞ্জভাসাং ভজে রামচন্দ্রং নিবৃত্তার্তিতন্দ্রম্ || ৯||
|| ইতি শ্রীমদধ্যাত্মরামাযণে যুদ্ধকাণ্ডে ত্রযোদশসর্গে
ইন্দ্রকৃতশ্রীরামস্তোত্রং সম্পূর্ণম্ ||