শরণাগতি গদ্যং ভগবদ্রামানুজ বিরচিত

.. শরণাগতি গদ্যম্ ..
|| শ্রীমতে রামানুজায নমঃ ||

যো নিত্যমচ্যুতপদাম্বুজযুগ্মরুক্ম –
ব্যামোহতস্তদিতরাণি তৃণায মেনে |
অস্মদ্গুরোর্ভগবতোঽস্য দযৈকসিন্ধোঃ
রামানুজস্য চরণৌ শরণং প্রপদ্যে ||

বন্দে বেদান্ত কর্পূর চামীকরকরণ্ডকম্
রামানুজার্যমার্যাণাং চূডামণি মহর্নিশম্ ||

শ্রী রঙ্গনাযিকা রামানুজ সংবাদঃ ||
শ্রী রামানুজঃ – – –

ভগবন্নারাযণাভিমতানুরূপ স্বরূপরূপ গুণবিভব ঐশ্বর্য
শীলাদ্যনবধিকাতিশয অসংখ্যেয কল্যাণগুণগণাং পদ্মবনালযাং ভগবতীং
শ্রিযং দেবীং নিত্যানপাযিনীং নিরবদ্যাং দেবদেবদিব্যমহিষীম্
অখিলজগন্মাতরম্ অস্মন্মাতরম্ অশরণ্যশরণ্যাম্ অনন্যশরণঃ
শরণমহং প্রপদ্যে ||

পারমার্থিক ভগবচ্চরণারবিন্দযুগ঳ ঐকান্তিকাত্যন্তিক পরভক্তি পরজ্ঞান
পরমভক্তিকৃত পরিপূর্ণানবরত নিত্যবিশদতম অনন্যপ্রযোজন
অনবধিকাতিশযপ্রিয ভগবদনুভবজনিত অনবধিকাতিশয প্রীতিকারিত
অশেষাবস্থোচিত অশেষশেষতৈকরতিরূপ নিত্যকৈঙ্কর্যপ্রাপ্ত্যপেক্ষযা
পারমার্থিকী ভগবচ্চরণারবিন্দ শরণাগতিঃ যথাবস্থিতা অবিরতাঽস্তু মে ||

শ্রী রঙ্গনাযিকা – – –

অস্তু তে | তযৈব সর্বং সংপত্স্যতে ||

|| শ্রী রঙ্গনাথ রামানুজ সংবাদঃ ||

শ্রী রামানুজঃ – – –

অখিলহেযপ্রত্যনীক কল্যাণৈকতান ! স্বেতর সমস্তবস্তুবিলক্ষণ
অনন্তজ্ঞানানন্দৈকস্বরূপ ! স্বাভিমতানুরূপ একরূপ অচিন্ত্য দিব্যাদ্ভুত
নিত্যনিরবদ্য নিরতিশয ঔজ্জ্বল্য সৌন্দর্য সৌগন্ধ্য সৌকুমার্য লাবণ্য
যৌবনাদ্যনন্তগুণনিধিদিব্যরূপ !

স্বাভাবিকানবধিকাতিশয জ্ঞানবলৈশ্বর্য বীর্যশক্তি তেজস্সৌশীল্য
বাত্সল্য মার্দব আর্জব সৌহার্দ সাম্য কারুণ্য মাধুর্য গাম্ভীর্য ঔদার্য
চাতুর্য স্থৈর্য ধৈর্য শৌর্য পরাক্রম সত্যকাম সত্যসঙ্কল্প কৃতিত্ব
কৃতজ্ঞতাদ্যসংখ্যেয কল্যাণগুণগণৌঘমহার্ণব !

স্বোচিতবিবিধবিচিত্র অনন্তাশ্চর্য নিত্য নিরবদ্য নিরতিশযসুগন্ধ
নিরতিশযসুখস্পর্শ নিরতিশযৌজ্জ্বল্য কিরীট মকুট চূডাবতংস
মকরমুণ্ডল গ্রৈবেযক হার কেযূর কটক শ্রীবত্স কৌস্তুভ মুক্তাদাম
উদরবন্ধন পীতাম্বর কাঞ্চীগুণ নূপুরাদ্যপরিমিত দিব্যভূষণ ! স্বানুরূপ
অচিন্ত্যশক্তি শঙ্খচক্র গদাসি শার্ঙ্গদ্যসংখ্যেয নিত্যনিরবদ্য নিরতিশয
কল্যাণদিব্যাযুধ !

স্বাভিমত নিত্যনিরবদ্যানুরূপ স্বরূপ রূপ গুণ বিভব ঐশ্বর্য
শীলাদ্যনবধিকাতিশয অসংখ্যেয কল্যাণগুণগণশ্রীবল্লভ !
এবংভূতভূমিনী঳ানাযক !

স্বচ্ছন্দানুবর্তি স্বরূপস্থিতিপ্রবৃত্তিভেদ অশেষশেষতৈকরতিরূপ
নিত্যনিরবদ্যনিরতিশয জ্ঞানক্রিযৈশ্চর্যাদ্যনন্ত কল্যাণগুণগণ শেষ শেষাশন
গরুডপ্রমুখ নানাবিধ অনন্তপরিজন পরিচারিকা পরিচরিত চরণযুগ঳ !

পরমযোগিবাঙ্মনসাঽপরিচ্ছেদ্য স্বরূপস্বভাব স্বাভিমত
বিবিধবিচিত্রানন্ত ভোগ্য ভোগোপকরণ ভোগস্থানসমৃদ্ধ অনন্তাশ্চর্য
অনন্তমহাবিভব অনন্তপরিমাণ নিত্য নিরবদ্য নিরতিশয শ্রীবৈকুণ্ঠনাথ !

স্বসঙ্কল্পানুবিধাযি স্বরূপস্থিতিপ্রবৃত্তি স্বশেষতৈকস্বভাব প্রকৃতি পুরুষ
কালাত্মক বিবিধ বিচিত্রানন্ত ভোগ্য ভোক্তৃবর্গ ভোগোপকরণ ভোগস্থানরূপ
নিখিলজগদুদয বিভব লযলীল !

সত্যকাম! সত্যসঙ্কল্প ! পরব্রহ্মভূত ! পুরুষোত্তম মহাবিবূতে ! শ্রীমন্!
নারাযণ! বৈকুণ্ঠনাথ !

অপার কারুণ্য সৌশীল্য বাত্সল্য ঔদার্য ঐশ্বর্য সৌন্দর্য মহোদধে !
অনালোচিতবিশেষ অশেষলোকশরণ্য ! প্রণতার্তিহর !
আশ্রিতবাত্সল্যৈকজলধে! অনবরতবিদিত নিখিলভূতজাতযাথাত্ম্য!
অশেষচরাচরভূত নিখিলনিযমননিরত! অশেষচিদচিদ্বস্তু শেষিভূত!
নিখিলজগদাধার! অখিলজগত্স্বামিন্! অস্মত্স্বামিন্! সত্যকাম!
সত্যসঙ্কল্প! সকলেতরবিলক্ষণ! অর্থিকল্পক! আপত্সখ! শ্রীমন্!
নারাযণ! অশরণ্যশরণ্য! অনন্যশরণঃ ত্বত্পাদারবিন্দযুগ঳ং  শরণমহং প্রপদ্যে ||

অত্র দ্বয( মনুসন্দেয) ম্ |

“পিতরং মাতরং দারান্ পুত্রান্ বন্ধূন্ সখীন্ গুরূন্ |
রত্নানি ধনধান্যানি ক্ষেত্রাণি চ গৃহাণি চ ||

সর্বধর্মাশ্চ সংত্যজ্য সর্বকামাংশ্চ সাক্ষরান্ |
লোকবিক্রান্তচরণৌ শরণং তেঽব্রজং বিভো! || ”

“ত্বমেব মাতা চ পিতা ত্বমেব ত্বমেব বন্ধুশ্চ গুরুস্ত্বমেব |
ত্বমেব বিদ্যা দ্রবিণং ত্বমেব ত্বমেব সর্বং মম দেবদেব ||

পিতাঽসি লোকস্য চরাচরস্য ত্বমস্য পূজ্যশ্চ গুরুর্গরীযান্ |
ন ত্বত্সমোঽস্ত্যভ্যধিকঃ কুতোঽন্যো লোকত্র যেঽপ্যপ্রতিমপ্রভাব ! || ”

“তস্মাত্ প্রণম্য প্রণিধায কাযং প্রসাদযে ত্বামহমীশমীড্যম্ |
পিতেব পুত্রস্য সখেব সখ্যুঃ প্রিযঃ প্রিযাযার্হসি দেব সোঢুম্ || ”

মনোবাক্কাযৈরনাদিকালপ্রবৃত্ত অনন্ত অকৃত্যকরণ কৃত্যাকরণ ভগবদপচার
ভাগবতাপচার অসহ্যাপচাররূপ নানাবিধ অনন্তাপচারান্
আরব্ধকার্যান্ , অনারব্ধকার্যান্ , কৃতান্ , ক্রিযমাণান্ , করিষ্যমাণাংশ্চ
সর্বান্ অশেষতঃ ক্ষমস্ব |

অনাদিকালপ্রবৃত্তবিপরীতজ্ঞানং , আত্মবিষযং   কৃত্স্নজগদ্বিষযং চ ,
বিপরীতবৃত্তং চ অশেষবিষযং , অদ্যাপি বর্তমানং বর্তিষ্যমাণং চ সর্বং ক্ষমস্ব ||

মদীযানাদিকর্মপ্রবাহপ্রবৃত্তাং , ভগবত্স্বরূপতিরোধানকরীং ,
বিপরীতজ্ঞানজননীং , স্ববিষযাযাশ্চ ভোগ্যবুদ্ধের্জননীং , দেহেন্দ্রিযত্বেন
ভোগ্যত্বেন সূক্ষ্মরূপেণ চ অবস্থিতাং , দৈবীং গুণমযীং মাযাম্ ,
 
 ” দাসভূতঃ শরণাগতোঽস্মি তবাস্মি দাসঃ, ”

 ইতি বক্তারং মাং তারয |

“তেষাং জ্ঞানী নিত্যযুক্তঃ একভক্তির্বিশিষ্যতে |
প্রিযো হি জ্ঞানিনোঽত্যর্থমহং স চ মম প্রিযঃ ||

উদারাঃ সর্ব এবৈতে জ্ঞানী ত্বাত্মৈব মে মতম্ |
আস্থিতঃ স হি যুক্তাত্মা মামেবানুত্তমাং গতিম্ ||

বহূনাং জন্মনামস্তে জ্ঞানবান্ মাং প্রপদ্যতে |
বাসুদেবঃ সর্বমিতি স মহাত্মা সুদুর্লভঃ ” ||

ইতি শ্লোকত্রযোদিতজ্ঞানিনং মাং কুরুষ্ব |

” পুরুষঃ স পরঃ পার্থ ! ভক্ত্যা লভ্যস্ত্বনন্যযা ” , “ভক্ত্যা
ত্বনন্যযা শক্যঃ”, “মদ্ভক্তিং লভতে পরাম্”

ইতি স্থানত্রযোদিতপরভক্তিযুক্তং মাং কুরুষ্ব |

পরভক্তিপরজ্ঞানপরমভক্ত্যেকস্বভাবং মাং কুরুষ্ব |

পরভক্তি পরজ্ঞান পরমভক্তিকৃত পরিপূর্ণানবরত নিত্যবিশদতম
অনন্যপ্রযোজন অনবধিকাতিশযপ্রিয ভগবদনুভবোঽহং , তথাবিধ
ভগবদনুভবজনিত অনবধিকাতিশয প্রীতিকারিত অশেষাবস্থোচিত
অশেষশেষতৈকরতিরূপ নিত্যকিঙ্করো ভবানি |

শ্রী রঙ্গনাথঃ – – – –
এবংভূত মত্কৈঙ্কর্যপ্রাপ্ত্যুপাযতযা অবকৢপ্তসমস্তবস্তুবিহীনোঽপি , অনন্ত
তদ্বিরোধিপাপাক্রান্তোঽপি , অনন্ত মদপচারযুক্তোঽপি , অনন্ত
মদীযাপচারযুক্তোঽপি , অনন্ত অসহ্যাপচারযুক্তোঽপি , এতত্কর্যকারণভূত
অনাদি বিপরীতাহঙ্কার বিমূঢাত্মস্বভাবোঽপি , এতদুভযকার্যকারণভূত
অনাদি বিপরীতবাসনাসংবদ্ধোঽপি , এতদনুগুণ প্রকৃতিবিশেষসংবদ্ধোঽপি ,
এতন্মূল আধ্যাত্মিক আধিভৌতিক আধিদৈবিক সুখদুঃখ তদ্ধেতু
তদিতরোপেক্ষণীয বিষযানুভব জ্ঞানসংকোচরূপ মচ্চরণারবিন্দযুগ঳
একান্তিকাত্যন্তিক পরভক্তি পরজ্ঞান পরমভক্তিবিঘ্নপ্রতিহতোঽপি ,
যেনকেনাপি প্রকারেণ দ্বযবক্তা ত্বম্ , কেবলং মদীযযৈব দযযা , নিশ্শেষবিনষ্ট
সহেতুক মচ্চরণারবিন্দযুগ঳ একান্তিকত্যন্তিক পরভক্তি পরজ্ঞান
পরমভক্তিবিঘ্নঃ , মত্প্রসাদলব্ধ মচ্চরণারবিন্দযুগ঳ একান্তিকাত্যন্তিক
পরভক্তি পরজ্ঞান পরমভক্তিঃ , মত্প্রসাদাদেব সাক্ষাত্কৃত যথাবস্থিত
মত্স্বরূপরূপগুণবিভূতি লীলোপকরণবিস্তারঃ , অপরোক্ষসিদ্ধ মন্নিযাম্যতা
মদ্দাস্যৈকরসাত্মস্বভাবাত্মস্বরূপঃ , মদেকানুভবঃ , মদ্দাস্যৈকপ্রিযঃ ,
পরিপূর্ণানবরত নিত্যবিশদতম অনন্যপ্রযোজন অনবধিকাতিশযপ্রিয
মদনুভবস্ত্বং তথাবিধ মদনুভবজনিত অনবধিকাতিশয প্রীতিকারিত
অশেষাবস্থোচিত অশেষশেষতৈকরতিরূপ নিত্যকিংকরো ভব |

এবংভূতোঽসি |

আধ্যাত্মিক আধিভৌতিক আধিদৈবিক দুঃখবিঘ্নগন্ধরহিতস্ত্বং
দ্বযমর্থানুসন্ধানেন সহ সদৈবং বক্তা যাবচ্ছ রীরপাতং অত্রৈব শ্রীরঙ্গে
সুখমাস্ব ||

শরীরপাতসমযে তু কেবলং মদীযযৈব দযযা অতিপ্রবুদ্ধঃ , মামেবাবলোকযন্ ,
অপ্রচ্যুত পূর্বসংস্কারমনোরথঃ , জীর্ণমিব বস্ত্রং সুখেন ইমাং প্রকৃতিং

স্থূলসূক্ষ্মরূপাং বিসৃজ্য , তদানীমেব মত্প্রসাদলব্ধ মচ্চরণারবিন্দযুগ঳
একান্তিকাত্যন্তিক পরভক্তি পরজ্ঞান পরমভক্তিকৃত পরিপূর্ণানবরত নিত্য
বিশদতম অনন্যপ্রযোজন অনবধিকাতিশযপ্রিয মদনুভবস্ত্বং তথাবিধ
মদনুভবজনিত অনবধিকাতিশয প্রীতিকারিত অশেষাবস্থোচিত
অশেষশেষতৈকরতিরূপ নিত্যকিঙ্করো ভবিষ্যসি ||

মাতেঽভূদত্র সংশযঃ |
“অনৃতং নোক্তপূর্বং মে ন চ বক্ষ্যে কদাচন |”
” রামো দ্বির্নাভিভাষতে |”
” সকৃদেব প্রপন্নায তবাস্মীতি চ যাচতে |
অভযং সর্বভূতেভ্যো দদাম্যেতদ্ ব্রতং মম ||”
” সর্বধর্মান্ পরিত্যজ্য মামেকং শরণং ব্রজ |
অহং ত্বা সর্বপাপেভ্যো মোক্ষযিষ্যামি মা শুচঃ ||”
ইতি মযৈব হ্যুক্তম্ |

অতস্ত্বং তব তত্ত্বতো মদ্জ্ঞানদর্শন প্রাপ্তিষু নিস্সংশযঃ সুখমাস্ব ||

অন্ত্যকালে স্মৃতির্যাতু তব কৈঙ্কর্যকারিতা |
তামেনাং ভগবন্নদ্য ক্রিযামাণাং কুরুষ্ব মে ||

ইতি শ্রী ভগবদ্রামানুজ বিরচিতে গদ্যত্রয প্রবন্ধে শরণাগতি গদ্যম্

সর্বং শ্রী কৃষ্ণার্পণমস্তু