অধ্যাত্ম রামাযণ ৩ – অরণ্যকাণ্ডম্

      .. অধ্যাত্ম রামাযণম্ ..
       .. অরণ্য কাণ্ডঃ ..
       .. নবমঃ সর্গঃ ..
        শ্রীমহাদেব উবাচ
ততো রামো লক্ষ্মণেন জগাম বিপিনান্তরম্ .
পুনর্দুঃখং সমাশ্রিত্য সীতান্বেষণতত্পরঃ .. ১..
তত্রাদ্ভুতসমাকারো রাক্ষসঃ প্রত্যদৃশ্যত .
বক্ষস্যেব মহাবক্ত্রশ্চক্ষুরাদিবিবর্জিতঃ .. ২..
বাহূ যোজনমাত্রেণ ব্যাপৃতৌ তস্য রক্ষসঃ .
কবন্ধো নাম দৈত্যেন্দ্রঃ সর্বসত্ত্ববিহিংসকঃ .. ৩..
তদ্বাহ্বোর্মধ্যদেশে তৌ চরন্তৌ রামলক্ষ্মণৌ .
দদর্শতুর্মহাসত্ত্বং তদ্বাহুপরিবেষ্টিতৌ .. ৪..
রামঃ প্রোবাচ বিহসন্পশ্য লক্ষ্মণ রাক্ষসম্ .
শিরঃপাদবিহীনোঽযং যস্য বক্ষসি চাননম্ .. ৫..
বাহুভ্যাং লভ্যতে যদ্যত্তত্তদ্ভক্ষন্ স্থিতো ধ্রুবম্ .
আবামপ্যেতযোর্বাহ্বোর্মধ্যে সঙ্কলিতৌ ধ্রুবম্ .. ৬..
গন্তুমন্যত্র মার্গো ন দৃশ্যতে রঘুনন্দন .
কিং কর্তব্যমিতোঽস্মাভিরিদানীং ভক্ষযেত্স নৌ .. ৭..
লক্ষ্মণস্তমুবাচেদং কিং বিচারেণ রাঘব .
আবামেকৈকমব্যগ্রৌ ছিন্দ্যাবাস্য ভুজৌ ধ্রুবম্ .. ৮..
তথেতি রামঃ খড্গেন ভুজং দক্ষিণমচ্ছিনত্ .
তথৈব লক্ষ্মণো বামং চিচ্ছেদ ভুজমঞ্জসা .. ৯..
ততোঽতিবিস্মিতো দৈত্যঃ কৌ যুবাং সুরপুঙ্গবৌ .
মদ্বাহুচ্ছেদকৌ লোকে দিবি দেবেষু বা কুতঃ .. ১০..
ততোঽব্রবীদ্ধসন্নেব রামো রাজীবলোচনঃ .
অযোধ্যাধিপতিঃ শ্রীমান্ রাজা দশরথো মহান্ .. ১১..
রামোঽহং তস্য পুত্রোঽসৌ ভ্রাতা মে লক্ষ্মণঃ সুধীঃ .
মম ভার্যা জনকজা সীতা ত্রৈলোক্যসুন্দরী .. ১২..
আবাং মৃগযযা যাতৌ তদা কেনাপি রক্ষসা .
নীতাং সীতাং বিচিন্বন্তৌ চাগতৌ ঘোরকাননে .. ১৩..
বাহুভ্যাং বেষ্টিতাবত্র তব প্রাণরিরক্ষযা .
ছিন্নৌ তব ভুজৌ ত্বং চ কো বা বিকটরূপধৃক্ .. ১৪..
            কবন্ধ উবাচ
ধন্যোঽহং যদি রামস্ত্বমাগতোঽসি মমান্তিকম্ .
পুরা গন্ধর্বরাজোঽহং রূপযৌবনদর্পিতঃ .. ১৫..
বিচরঁল্লোকমখিলং বরনারীমনোহরঃ .
তপসা ব্রহ্মণো লব্ধমবধ্যত্বং রঘূত্তম .. ১৬..
অষ্টাবক্রং মুনিং দৃষ্ট্বা কদাচিদহসং পুরা .
ক্রুদ্ধোঽসাবাহ দুষ্ট ত্বং রাক্ষসো ভব দুর্মতে .. ১৭..
অষ্টাবক্রঃ পুনঃ প্রাহ বন্দিতো মে দযাপরঃ .
শাপস্যান্তং চ মে প্রাহ তপসা দ্যোতিতপ্রভঃ .. ১৮..
ত্রেতাযুগে দাশরথির্ভূত্বা নারাযণঃ স্বযম্ .
আগমিষ্যতি তে বাহূ ছিদ্যেতে যোজনাযতৌ .. ১৯..
তেন শাপাদ্বিনির্মুক্তো ভবিষ্যসি যথা পুরা .
ইতি শপ্তোঽহমদ্রাক্ষং রাক্ষসীং তনুমাত্মনঃ .. ২০..
কদাচিদ্দেবরাজানমভ্যাদ্রাবমহং রুষা .
সোঽপি বজ্রেণ মাং রাম শিরোদেশেঽভ্যতাডযত্ .. ২১..
তদা শিরো গতং কুক্ষিং পাদৌ চ রঘুনন্দন .
ব্রহ্মদত্তবরান্মৃত্যুর্নাভূন্মে বজ্রতাডনাত্ .. ২২..
মুখাভাবে কথং জীবেদযমিত্যমরাধিপম্ .
ঊচুঃ সর্বে দযাবিষ্টা মাং বিলোক্যাস্যবর্জিতম্ .. ২৩..
ততো মাং প্রাহ মঘবা জঠরে তে মুখং ভবেত্ .
বাহূ তে যোজনাযামৌ ভবিষ্যত ইতো ব্রজ .. ২৪..
ইত্যুক্তোঽত্রবসন্নিত্যং বাহুভ্যাং বনগোচরান্ .
ভক্ষযাম্যধুনা বাহূ খণ্ডিতৌ মে ত্বযানঘ .. ২৫..
ইতঃ পরং মাং শ্বভ্রাস্যে নিক্ষিপাগ্নীন্ধনাবৃতে .
অগ্নিনা দহ্যমানোঽহং ত্বযা রঘুকুলোত্তম .. ২৬..
পূর্বরূপমনুপ্রাপ্য ভার্যামার্গং বদামি তে .. ২৭..
ইত্যুক্তে লক্ষ্মণেনাশু শ্বভ্রং নির্মিত্য তত্র তম্ .
নিক্ষিপ্য প্রাদহত্কাষ্ঠৈস্ততো দেহাত্সমুত্থিতঃ .
কন্দর্পসদৃশাকারঃ সর্বাভরণভূষিতঃ .. ২৮..
রামং প্রদক্ষিণং কৃত্বা সাষ্টাঙ্গং প্রণিপত্য চ .
কৃতাঞ্জলিরুবাচেদং ভক্তিগদ্গদযা গিরা .. ২৯..
            গন্ধর্ব উবাচ
স্তোতুমুত্সহতে মেঽদ্য মনো রামাতিসম্ভ্রমাত্ .
ত্বামনন্তমনাদ্যন্তং মনোবাচামগোচরম্ .. ৩০..
সূক্ষ্মং তে রূপমব্যক্তং দেহদ্বযবিলক্ষণম্ .
দৃগ্রূপমিতরত্সর্বং দৃশ্যং জডমনাত্মকম্ .
তত্কথং ত্বাং বিজানীযাদ্ব্যতিরিক্তং মনঃ প্রভো .. ৩১..
বুদ্ধ্যাত্মাভাসযোরৈক্যং জীব ইত্যভিধীযতে .
বুদ্ধ্যাদি সাক্ষী ব্রহ্মৈব তস্মিন্নির্বিষযেঽখিলম্ .. ৩২..
আরোপ্যতেঽজ্ঞানবশান্নির্বিকারেঽখিলাত্মনি .
হিরণ্যগর্ভস্তে সূক্ষ্মং দেহং স্থূলং বিরাট্ স্মৃতম্ .. ৩৩..
ভাবনবিষযো রাম সূক্ষ্মং তে ধ্যাতৃমঙ্গলম্ .
ভূতং ভব্যং ভবিষ্যচ্চ যত্রেদং দৃশ্যতে জগত্ .. ৩৪..
স্থূলেঽণ্ডকোশে দেহে তে মহদাদিভিরাবৃতে .
সপ্তভিরুত্তরগুণৈর্বৈরাজো ধারণাশ্রযঃ .. ৩৫..
ত্বমেব সর্বকৈবল্যং লোকাস্তেঽবযবাঃ স্মৃতাঃ .
পাতালং তে পাদমূলং পার্ষ্ণিস্তব মহাতলম্ .. ৩৬..
রসাতলং তে গুল্ফৌ তু তলাতলমিতীর্যতে .
জানুনী সুতলং রাম ঊরূ তে বিতলং তথা .. ৩৭..
অতলং চ মহী রাম জঘনং নাভিগং নভঃ .
উরঃস্থলং তে জ্যোতীংষি গ্রীবা তে মহ উচ্যতে .. ৩৮..
বদনং জনলোকস্তে তপস্তে শঙ্খদেশগম্ .
সত্যলোকো রঘুশ্রেষ্ঠ শীর্ষণ্যাস্তে সদা প্রভো .. ৩৯..
ইন্দ্রাদযো লোকপালা বাহবস্তে দিশঃ শ্রুতী .
অশ্বিনৌ নাসিকে রাম বক্ত্রং তেঽগ্নিরুদাহৃতঃ .. ৪০..
চক্ষুস্তে সবিতা রাম মনশ্চন্দ্র উদাহৃতঃ .
ভ্রূ ভঙ্গ এব কালস্তে বুদ্ধিস্তে বাক্পতির্ভবেত্ .. ৪১..
রুদ্রোঽহঙ্কাররূপস্তে বাচশ্ছন্দাংসি তেঽব্যয .
যমস্তে দংষ্টৃদেশস্থো নক্ষত্রাণি দ্বিজালযঃ .. ৪২..
হাসো মোহকরী মাযা সৃষ্টিস্তেঽপাঙ্গমোক্ষণম্ .
ধর্মঃ পুরস্তেঽধর্মশ্চ পৃষ্ঠভাগ উদীরিতঃ .. ৪৩..
নিমিষোন্মেষণে রাত্রির্দিবা চৈব রঘূত্তম .
সমুদ্রাঃ সপ্ত তে কুক্ষির্নাড্যো নদ্যস্তব প্রভো .. ৪৪..
রোমাণি বৃক্ষৌষধযো রেতো বৃষ্টস্তব প্রভো .
মহিমা জ্ঞানশক্তিস্তে এবং স্থূলং বপুস্তব .. ৪৫..
যদস্মিন্ স্থূলরূপে তে মনঃ সন্ধার্যতে নরৈঃ .
অনাযাসেন মুক্তিঃ স্যাদতোঽন্যন্নহি কিঞ্চন .. ৪৬..
অতোঽহং রাম রূপং তে স্থূলমেবানুভাবযে .
যস্মিন্ ধ্যাতে প্রেমরসঃ সরোমপুলকো ভবেত্ .. ৪৭..
তদৈব মুক্তিঃ স্যাদ্রাম যদা তে স্থূলভাবকঃ .
তদপ্যাস্তাং তবেবাহমেতদ্রূপং বিচিন্তযে .. ৪৮..
ধনুর্বাণধরং শ্যামং জটাবল্কলভূষিতম্ .
অপীচ্যবযসং সীতাং বিচিন্বন্তং সলক্ষ্মণম্ .. ৪৯..
ইদমেব সদা মে স্যান্মানসে রঘুনন্দন .. ৫০..
সর্বজ্ঞঃ শঙ্করঃ সাক্ষাত্পার্বত্যা সহিতঃ সদা .
ত্বদ্রূপমেবং সততং ধ্যাযন্নাস্তে রঘূত্তম .
মুমূর্ষূণাং তদা কাশ্যাং তারকং ব্রহ্মবাচকম্ .. ৫১..
রামরামেত্যুপদিশন্সদা সন্তুষ্টমানসঃ .
অতস্ত্ত্বং জানকীনাথ পরমাত্মা সুনিশ্চিতঃ .. ৫২..
সর্বে তে মাযযা মূঢাস্ত্বাং ন জানন্তি তত্ত্বতঃ .
নমস্তে রামভদ্রায বেধসে পরমাত্মনে .. ৫৩..
অযোধ্যাধিপতে তুভ্যং নমঃ সৌমিত্রিসেবিত .
ত্রাহি ত্রাহি জগন্নাথ মাং মাযা নাবৃণোতু তে .. ৫৪..
            শ্রীরাম উবাচ
তুষ্টোঽহং দেবগন্ধর্ব ভক্ত্যা স্তুত্যা চ তেঽনঘ .
যাহি মে পরমং স্থানং যোগিগম্যং সনাতনম্ .. ৫৫..
জপন্তি যে নিত্যমনন্যবুদ্ধ্যা
          ভক্ত্যা ত্বদুক্তং স্তবমাগমোক্তুম্ .
তেঽজ্ঞানসম্ভূতভবং বিহায
          মাং যান্তি নিত্যানুভবানুমেযম্ .. ৫৬..
ইতি শ্রীমদধ্যাত্মরামযণে উমামহেশ্বরসংবাদে
   অরণ্যকাণ্ডে নবমঃ সর্গঃ .. ৯..