অধ্যাত্ম রামাযণ ৩ – অরণ্যকাণ্ডম্

      .. অধ্যাত্ম রামাযণম্ ..
       .. অরণ্য কাণ্ডঃ ..
       .. অষ্টমঃ সর্গঃ ..
        শ্রীমহাদেব উবাচ
রামো মাযাবিনং হত্বা রাক্ষসং কামরূপিণম্ .
প্রতস্থে স্বাশ্রমং গন্তুং ততো দূরাদ্দদর্শ তম্ .. ১..
আযান্তং লক্ষ্মণং দীনং মুখেন পরিশুষ্যতা .
রাঘবশ্চিন্তযামাস স্বাত্মন্যেব মহামতিঃ .. ২..
লক্ষ্মণস্তন্ন জানাতি মাযা সীতাং মযা কৃতম্ .
জ্ঞাত্বাপ্যেনং বঞ্চযিত্বা শোচামি প্রাকৃতো যথা .. ৩..
যদ্যহং বিরতো ভূত্বা তূষ্ণীং স্থাস্যামি মন্দিরে .
তদা রাক্ষসকোটীনাং বধোপাযঃ কথং ভবেত্ .. ৪..
যদি শোচামি তাং দুঃখসন্তপ্তঃ কামুকো যথা .
তদা ক্রমেণানুচিন্বন্সীতাং যাস্যেঽসুরালযম্ .
রাবণং সকুলং হত্বা সীতামগ্নৌ স্থিতাং পুনঃ .. ৫..
মযৈব স্থাপিতাং নীত্বা যাতাযোধ্যামতন্দ্রিতঃ .. ৬..
অহং মনুষ্যভাবেন জাতোঽস্মি ব্রহ্মণার্থিতঃ .
মনুষ্যভাবমাপন্নঃ কিঞ্চিত্কালং বসামি কৌ .
ততো মাযামনুষ্যস্য চরিতং মেঽনুশৃণ্বতাম্ .. ৭..
মুক্তিঃ স্যাদপ্রযাসেন ভক্তিমার্গানুবর্তিনাম্ .
নিশ্চিত্যৈবং তদা দৃষ্ট্বা লক্ষ্মণং বাক্যমব্রবীত্ .. ৮..
কিমর্থমাগতোঽসি ত্বং সীতাং ত্যক্ত্বা মম প্রিযাম্ .
নীতা বা ভক্ষিতা বাপি রাক্ষসৈর্জনকাত্মজা .. ৯..
লক্ষ্মণঃ প্রঞ্জলিঃ প্রাহ সীতাযা দুর্বচো রুদন্ .
হ্যা লক্ষ্মণেতি বচনং রাক্ষসোক্তং শ্রুতং তযা .. ১০..
ত্বদ্বাক্যসদৃশং শ্রুত্বা মাং গচ্ছেতি ত্বরাব্রবীত্ .
রুদন্তী সা মযা প্রোক্তা দেবি রাক্ষসভাষিতম্ .
নেদং রামস্য বচনং স্বস্থা ভব শুচিস্মিতে .. ১১..
ইত্যেবং সান্বিতা সাধ্বী মযা প্রোবাচ মাং পুনঃ .
যদুক্তং দুর্বচো রাম ন বচ্যং পুরতস্তব .. ১২..
কর্ণৌ পিধায নির্গত্য যাতোঽহং ত্বাং সমীক্ষিতুম্ .. ১৩..
রামস্তু লক্ষ্মণং প্রাহ তথাপ্যনুচিতং কৃতম্ .
ত্বযা স্ত্রীভাষিতং সত্যং কৃত্বা ত্যক্তা শুভাননা .
নীতা বা ভক্ষিতা বাপি রাক্ষসৈর্নাত্র সংশযঃ .. ১৪..
ইতি চিন্তাপরো রামঃ স্বাশ্রমং ত্বরিতো যযৌ .
তত্রাদৃষ্ট্বা জনকজাং বিললাপাতিদুঃখিতঃ .. ১৫..
হা প্রিযে ক্ব গতাসি ত্বং নাসি পূর্ববদাশ্রমে .
অথবা মদ্বিমোহার্থং লীলযা ক্ব বিলীযসে .. ১৬..
ইত্যাচিন্বন্বনং সর্বং নাপশ্যজ্জানকীং তদা .
বনদেব্যঃ কুতঃ সীতাং ব্রুবন্তু মম বল্লভাম্ .. ১৭..
মৃগাশ্চ পক্ষিণো বৃক্ষা দর্শযন্তু মম প্রিযাম্ .
ইত্যেবং বিলপন্নেব রামঃ সীতাং ন কুত্রচিত্ .. ১৮..
সর্বজ্ঞঃ সর্বথা ক্বাপি নাপশ্যদ্রঘুনন্দনঃ .
আনন্দোঽপ্যন্বশোচত্তামচলোঽপ্যনুধাবতি .. ১৯..
নির্মমো নিরহঙ্কারোঽপ্যখণ্ডানন্দরূপবান্ .
মম জাযেতি সীতেতি বিললাপাতিদুঃখিতঃ .. ২০..
এবং মাযামনুচরন্নসক্তোঽপি রঘূত্তমঃ .
আসক্ত এব মূঢানাং ভাতি তত্ত্ববিদাং ন হি .. ২১..
এবং বিচিন্বন্সকলং বনং রামঃ সলক্ষ্মণঃ .
ভগ্নং রথং ছত্রচাপং কূবরং পতিতং ভুবি .. ২২..
দৃষ্ট্বা লক্ষ্মণমাহেদং পশ্য লক্ষ্মণ কেনচিত্ .
নীযমানাং জনকজাং তং জিত্বান্যো জহার তাম্ .. ২৩..
ততঃ কঞ্চিদ্ভবো ভাগং গত্বা পর্বতসন্নিভম্ .
রুধিরাক্তবপুর্দৃষ্ট্বা রামো বাক্যমথাব্রবীত্ .. ২৪..
এষ বৈ ভক্ষযিত্বা তাং জানকীং শুভদর্শনম্ .
শেতে বিবিক্তেঽতিতৃপ্তঃ পশ্য হন্মি নিশাচরম্ .. ২৫..
চাপমানয শীঘ্রং মে বাণং চ রঘুনন্দন .
তত্শ্রুত্বা রামবচনং জটাযুঃ প্রাহ ভীতবত্ .. ২৬..
মাং ন মারয ভদ্রং তে ম্রিযমাণং স্বকর্মণা .
অহং জটাযুস্তে ভার্যাহারিণং সমনুদ্রুতঃ .. ২৭..
রাবণং তত্র যুদ্ধং মে বভূবারিবিমর্দন .
তস্য বাহান্ রথং চাপং ছিত্ত্বাহং তেন ঘাতিতঃ .. ২৮..
পতিতোঽস্মি জগন্নাথ প্রাণাংস্ত্যক্ষ্যামি পশ্য মাম্ .
তত্শ্রুত্বা রাঘবো দীনং কণ্ঠপ্রাণং দদর্শ হ .. ২৯..
হস্তাভ্যাং সংস্পৃশন্ রামো দুঃখাশ্রুবৃতলোচনঃ .. ৩০..
জটাযো ব্রূহি মে ভার্যা কেন নীতা শুভাননা .
মত্কার্যার্থং হতোঽসি ত্বমতো মে প্রিযবান্ধবঃ .. ৩১..
জটাযুঃ সন্নযা বাচা বক্ত্রাদ্রক্তং সমুদ্বসন্ .
উবাচ রাবণো রাম রাক্ষসো ভীমবিক্রমঃ .. ৩২..
আদায মৈথিলীং সীতাং দক্ষিণাভিমুখো যযৌ .
ইতো বক্তুং ন মে শক্তিঃ প্রাণাংস্ত্যক্ষ্যামি তেঽগ্রতঃ .. ৩৩..
দিষ্ট্যা দৃষ্টোঽসি রাম ত্বং ম্রিযমাণেন মেঽনঘ .
পরমাত্মাসি বিষ্ণুস্ত্বং মাযামনুজরূপধৃক্ .. ৩৪..
অন্তকালেঽপি দৃষ্ট্বা ত্বাং মুক্তোঽহং রঘুসত্তম .
হস্তাভ্যাং স্পৃশ মাং রাম পুনর্যাস্যামি তে পদম্ .. ৩৫..
তথেতি রামঃ পস্পর্শ তদঙ্গং পাণিনা স্মযন্ .
ততঃ প্রাণান্পরিত্যজ্য জটাযুঃ পতিতো ভুবি .. ৩৬..
রামস্তমনুশোচিত্বা বন্ধুবত্সাশ্রুলোচনঃ .
লক্ষ্মণেন সমানায্য কাষ্ঠানি প্রদদাহ তম্ ..৩৭..
স্নাত্বা দুঃখেন রামোঽপি লক্ষ্মণেন সমন্বিতঃ .
হত্বা বনে মৃগং তত্র মাংসখণ্ডান্সমন্ততঃ .. ৩৮..
শাদ্বলে প্রাক্ষিপদ্রামঃ পৃথক্ পৃথগনেকধা .
ভক্ষন্তু পক্ষিণঃ সর্বে তৃপ্তো ভবতু পক্ষিরাট্ .. ৩৯..
ইত্যুক্ত্বা রাঘবঃ প্রাহ জটাযো গচ্ছ মত্পদম্ .
মত্সারূপ্যং ভজস্বাদ্য সর্বলোকস্য পশ্যতঃ .. ৪০..
ততোঽনন্তরমেবাসৌ দিব্যরূপধরঃ শুভঃ .
বিমানবরমারুহ্য ভাস্বরং ভানুসন্নিভম্ .. ৪১..
শঙ্খচক্রগদাপদ্মকিরীটবরভূষণৈঃ .
দ্যোতযন্স্বপ্রকাশেন পীতাম্বরধরোঽমলঃ .. ৪২..
চতুর্ভিঃ পার্ষদৈর্বিষ্ণোস্তাদৃশৈরভিপূজিতঃ .
স্তূযমানো যোগিগণৈঃ রামমাভাষ্য সত্বরঃ .
কৃতাঞ্জলিপুটো ভূত্বা তুষ্টাব রঘুনন্দনম্ .. ৪৩..
          জটাযু উবাচ
অগণিতগুণমপ্রমেযমাদ্যং
        সকলজগত্স্থিতিসংযমাদিহেতুম্ .
উপরমপরং পরাত্মভূতং
        সততমহং প্রণতোঽস্মি রামচন্দ্রম্ .. ৪৪..
নিরবধিসুখমিন্দিরাকটাক্ষং
        ক্ষপিতসুরেন্দ্রচতুর্মুখাদিদুঃখম্ .
নরবরমনিশং নতোঽস্মি রামং
        বরদমহং বরচাপবাণহস্তম্ .. ৪৫..
ত্রিভুবনকমনীযরূপমীড্যং
        রবিশতভাসুরমীহিতপ্রদানম্ .
শরণদমনিশং সুরাগমূলে
        কৃতনিলযং রঘুনন্দনং প্রপদ্যে .. ৪৬..
ভববিপিনদবাগ্নিনামধেযং
        ভবমুখদৈবতদৈবতং দযালুম্ .
দনুজপতিসহস্রকোটিনাশং
        রবিতনযাসদৃশং হরিং প্রপদ্যে .. ৪৭..
অবিরতভবভাবনাতিদূরং
        ভববিমুখৈর্মুনিভিঃ সদৈব দৃশ্যম্ .
ভবজলধিসুতারণাঙ্ঘ্রিপোতং
        শরণমহং রঘুনন্দনং প্রপদ্যে .. ৪৮..
গিরিশগিরিসুতামনোনিবাসং
        গিরিবরধারিণমীহিতাভিরামম্ .
সুরবরদনুজেন্দ্রসেবিতাঙ্ঘ্রিং
        সুরবরদং রঘুনাযকং প্রপদ্যে .. ৪৯..
পরধনপরদারবর্জিতানাং
        পরগুণভূতিষু তুষ্টমানসানাম্ .
পরহিতনিরতাত্মনাং সুসেব্যং
        রঘুবরমম্বুজলোচনং প্রপদ্যে .. ৫০..
স্মিতরুচিরবিকাসিতাননাব্জমতিসুলভং
        সুররাজনীলনীলম্ .
সিতজলরুহচারুনেত্রশোভং
        রঘুপতিমীশগুরোর্গুরুং প্রপদ্যে .. ৫১..
হরিকমলজশম্ভুরূপভেদাত্ত্বমিহ
        বিভাসি গুণাত্রযানুবৃত্তঃ .
রবিরিব জলপূরিতোদপাত্রেষু
        অমরপতিস্তুতিপাত্রমীশমীডে .. ৫২..
রতিপতিশতকোটিসুন্দরাঙ্গ
        শতপথগোচরভাবনাবিদূরম্ .
যতিপতিহৃদযে সদা বিভাতং
        রঘুপতিমার্তিহরং প্রভুং প্রপদ্যে .. ৫৩..
ইত্যেবং স্তুবস্তস্য প্রসন্নোঽভূদ্রঘূত্তমঃ .
উবাচ গচ্ছ ভদ্রং তে মম বিষ্ণোঃ পরং পদম্ .. ৫৪..
শৃণোতি য ইদং স্তোত্রং লিখেদ্বা নিযতঃ পঠেত্ .
স যাতি মম সারূপ্যং মরণে মত্স্মৃতিং লভেত্ .. ৫৫..
ইতি রাঘবভাষিতং তদা শ্রুতবান্
        হর্ষসমাকুলো দ্বিজঃ .
রঘুনন্দনসাম্যমাস্থিতঃ প্রযযৌ
        ব্রহ্মসুপূজিতং পদম্ .. ৫৬..
ইতি শ্রীমদধ্যাত্মরামযণে উমামহেশ্বরসংবাদে
   অরণ্যকাণ্ডে অষ্টমঃ সর্গঃ .. ৮..