অধ্যাত্ম রামাযণ ৩ – অরণ্যকাণ্ডম্

      .. অধ্যাত্ম রামাযণম্ ..
       .. অরণ্য কাণ্ডঃ ..
       .. সপ্তমঃ সর্গঃ ..
        শ্রীমহাদেব উবাচ
অথ রামোঽপি তত্সর্বং জ্ঞাত্বা রাবণচেষ্টিতম্ .
উবাচ সীতামেকান্তে শৃণু জানকি মে বচঃ .. ১..
রাবণো ভিক্ষুরূপেণ আগমিষ্যতি তেঽন্তিকম্ .
ত্বং তু ছাযাং ত্বদাকারাং স্থাপযিত্বোটজে বিশ .. ২..
অগ্নাবদৃশ্যরূপেণ বর্ষং তিষ্ঠ মমাজ্ঞযা .
রাবণস্য বধান্তে মাং পূর্ববত্প্রাপ্স্যসে শুভে .. ৩..
শ্রুত্বা রামোদিতং বাক্যং সাপি তত্র তথাকরোত্ .
মাযাসীতাং বহিঃ স্থাপ্য স্বযমন্তর্দধেঽনলে .. ৪..
মাযাসীতা তদাপশ্যন্মৃগং মাযাবিনির্মিতম্ .
হসন্তী রামমভ্যেত্য প্রোবাচ বিনযান্বিতা .. ৫..
পশ্য রাম মৃগং চিত্রং কানকং রত্নভূষিতম্ .
বিচিত্রবিন্দুভির্যুক্তং চরন্তমকুতোভযম্ .
বদ্ধ্বা দেহি মম ক্রীডামৃগো ভবতু সুন্দরঃ .. ৬..
তথেতি ধনুরাদায গচ্ছন্ লক্ষ্মণমব্রবীত্ .
রক্ষ ত্বমতিযত্নেন সীতাং মত্প্রাণবল্লভাম্ .. ৭..
মাযিনঃ সন্তি বিপিনে রাক্ষসা ঘোরদর্শনাঃ .
অতোঽত্রাবহিতঃ সাধ্বীং রক্ষ সীতামনিন্দিতাম্ .. ৮..
লক্ষ্মণো রামমাহেদং দেবাযং মৃগরূপধৃক্ .
মারীচোঽত্র ন সন্দেহ এবংভূতো মৃগঃ কুতঃ .. ৯..
          শ্রীরাম উবাচ
যদি মারীচ এবাযং তদা হন্মি ন সংশযঃ .
মৃগশ্বেদানযিষ্যামি সীতাবিশ্রমহেতবে .. ১০..
গমিষ্যামি মৃগং বদ্ধ্বা হ্যানযিষ্যামি সত্বরঃ .
ত্বং প্রযত্নেন সন্তিষ্ঠ সীতাসংরক্ষণোদ্যতঃ .. ১১..
ইত্যুক্ত্বা প্রযযৌ রামো মাযামৃগমনুদ্রুতঃ .
মাযা যথাশ্রযা লোকমোহিনী জগদাকৃতিঃ .. ১২..
নির্বিকারশ্চিদাত্মাপি পূর্ণোঽপি মৃগমন্বগাত্ .
ভক্তানুকম্পী ভগবানিতি সত্যং বচো হরিঃ .. ১৩..
কর্তুং সীতাপ্রিযার্থায জানন্নপি মৃগং যযৌ .
অন্যথা পূর্ণকামস্য রামস্য বিদিতাত্মনঃ .. ১৪..
মৃগেণ বা স্ত্রিযা বাপি কিং কার্যং পরমাত্মনঃ .. ১৫.
কদাচিদ্ দৃশ্যতেঽভ্যাশে ক্ষণং ধাবতি লীযতে .
দৃশ্যতে চ ততো দূরাদেবং রামমপাহরত্ .
ততো রামোঽপি বিজ্ঞায রাক্ষসোঽযমিতি স্ফুটম্ .. ১৬..
বিব্যাধ শরমাদায রাক্ষসং মৃগরূপিণম্ .
পপাত রুধিরাক্তাস্যা মারীচঃ পূর্বরূপধৃক্ .. ১৭..
হা হতোঽস্মি মহাবাহো ত্রাহি লক্ষ্মণ মাং দ্রুতম্ .
ইত্যুক্ত্বা রামবদ্বাচা পপাত রুধিরাশনঃ .. ১৮..
যন্নামাজ্ঞোঽপি মরণে স্মৃত্বা তত্সাম্যমাপ্নুযাত্ .
কিমুতাগ্রে হরিং পশ্যংস্তেনৈব নিহতোঽসুরঃ .. ১৯..
তদ্দেহাদুত্থিতং তেজঃ সর্বলোকস্য পশ্যতঃ .
রামমেবাবিশদ্দেবা বিস্মযং পরমং যযুঃ .. ২০..
কিং কর্ম কৃত্বা কিং প্রাপ্তঃ পাতকী মুনিহিংসকঃ .
অথবা রাঘবস্যাযং মহিমা নাত্র সংশযঃ .. ২১..
রামবাণেন সংবিদ্ধঃ পূর্বং রামমনুস্মরন্ .
ভযাত্সর্বং পরিত্যজ্য গৃহবিত্তাদিকং চ যত্ .. ২২..
হৃদি রামং সদা ধ্যাত্বা নির্ধূতাশেষকল্মষঃ .
অন্তে রামেণ নিহতঃ পশ্যন্ রামমবাপ সঃ .. ২৩..
দ্বিজো বা রাক্ষসো বাপি পাপী বা ধার্মিকোঽপি বা .
ত্বজন্কলেবরং রামং স্মৃত্বা যাতি পরং পদম্ .. ২৪..
ইতি তেঽন্যোন্যমাভাষ্য ততো দেবা দিবং যযুঃ .. ২৫..
রামস্তচ্চিন্তযামাস ম্রিযমাণোঽসুরাধমঃ .
হা লক্ষ্মণেতি মদ্বাক্যমনুকুর্বন্মমার কিম্ .
শ্রুত্বা মদ্বাক্যসদৃশং বাক্যং সীতাপি কিং ভবেত্ .. ২৬..
ইতি চিন্তাপরীতাত্মা রামো দূরান্ন্যবর্তত .. ২৭..
সীতা তদ্ভাষিতং শ্রুত্বা মারীচস্য দুরাত্মনঃ .
ভীতাতিদুঃখসংবিগ্না লক্ষ্মণং ত্বিদমব্রবীত্ .
গচ্ছ লক্ষ্মণ বেগেন ভ্রাতা তেঽসুরপীডিতঃ .. ২৮..
হা লক্ষ্মণেতি বচনং ভ্রাতুস্তে ন শৃণোষি কিম্ .
তামাহ লক্ষ্মণো দেবি রামবাক্যং ন তদ্ভবেত্ .. ২৯..
যঃ কশ্চিদ্রাক্ষসো দেবি ম্রিযমাণোঽব্রবীদ্বচঃ .
রামস্ত্রৈলোক্যমপি যঃ ক্রুদ্ধো নাশযতি ক্ষণাত্ .. ৩০..
স কথং দীনবচনং ভাষিতেঽমরপূজিতঃ .
ক্রুদ্ধা লক্ষ্মণমালোক্য সীতা বাষ্পবিলোচনা .. ৩১..
প্রাহ লক্ষ্মণ দুর্বুদ্ধে ভ্রাতুর্ব্যসনমিচ্ছসি .
প্রেষিতো ভরতেনৈব রামনাশাভিকাঙ্ক্ষিণা .. ৩২..
মাং নেতুমাগতোঽসি ত্বং রামনাশ উপস্থিতে .
ন প্রাপ্স্যসে ত্বং মামদ্য পশ্য প্রাণাংস্ত্যজাম্যহম্ .. ৩৩..
ন জানাতীদৃশং রামস্ত্বাং ভার্যাহরণোদ্যতম্ .
রামাদন্যং ন স্পৃশামি ত্বাং বা ভরতমেব বা .. ৩৪..
ইত্যুক্ত্বা বধ্যমানা সা স্ববাহুভ্যাং রুরোদ হ .
তত্শ্রুত্বা লক্ষ্মণঃ কর্ণো পিধাযাতীব দুঃখিতঃ .. ৩৫..
মামেবং ভাষসে চণ্ডি ধিক্ ত্বাং নাশমুপৈষ্যসি .
ইত্যুক্ত্বা বনদেবীভ্যঃ সমর্প্য জনকাত্মজাম্ .. ৩৬..
যযৌ দুঃখাতিসংবিগ্নো রামমেব শনৈঃ শনৈঃ .
ততোঽন্তরং সমালোক্য রাবণো ভিক্ষুবেষধৃক্ .. ৩৭..
সীতাসমীপমাগমত্ স্ফুরদ্দণ্ডকমণ্ডলুঃ .
সীতা তমবলোক্যাশু নত্বা সম্পূজ্য ভক্তিতঃ .. ৩৮..
কন্দমূলফলাদীনি দত্ত্বা স্বাগতমব্রবীত্ .
মুনে ভুঙ্ক্ষ্ব ফলাদীনি বিশ্রমস্ব যথাসুখম্ .. ৩৯..
ইদানীমেব ভর্তা মে হ্যাগমিষ্যসি তে প্রিযম্ .
করিষ্যতি বিশেষেণ তিষ্ঠ ত্বং যদি রোচতে .. ৪০..
          ভিক্ষরুবাচ
কা ত্বং কমলপত্রাক্ষি কো বা ভর্তা তবানঘে .
কিমর্থমত্র তে বাসো বনি রাক্ষসসেবিতে .
ব্রূহি ভদ্রে ততঃ সর্বং স্ববৃত্তান্তং নিবেদযে .. ৪১..
            সীতোবাচ
অযোধ্যাধিপতিঃ শ্রীমান্ রাজা দশরথো মহান্ .
তস্য জ্যেষ্ঠঃ সুতো রামঃ সর্বলক্ষণলক্ষিতঃ .. ৪২..
তস্যাহং ধর্মতঃ পত্নী সীতা জনকনন্দিনী .
তস্য ভ্রাতা কনীযাংশ্চ্ লক্ষ্মণো ভ্রাতৃবত্সলঃ .. ৪৩..
পিতুরাজ্ঞাং পুরস্কৃত্য দণ্ডকে বস্তুমাগতঃ .
চতুর্দশ সমাস্ত্বাং তু জ্ঞাতুমিচ্ছামি মে বদ .. ৪৪..
          ভিক্ষরুবাচ
পৌলস্ত্যতনযোঽহং তু রাবণো রাক্ষসাধিপঃ .
ত্বত্কামপরিতপ্তোঽহং ত্বাং নেতুং পুরমাগতঃ .. ৪৫..
মুনিবেষেণ রামেণ কিং করিষ্যসি মাং ভজ .
ভুঙ্ক্ষ্ব ভোগান্মযা সার্ধং ত্যজ দুঃখং বনোদ্ভবম্ .. ৪৬..
শ্রুত্বা তদ্বচনং সীতা ভীতা কিঞ্চিদুবাচ তম্ .
যদ্যেবং ভাষসে মাং ত্বং নাশমেষ্যসি রাঘবাত্ .. ৪৭..
আগমিষ্যতি রামোঽপি ক্ষণং তিষ্ঠ সহানুজঃ .
মাং কো ধর্ষযিতুং শক্তো হরের্ভার্যাং শশো যথা .. ৪৮..
রামবাণৈর্বিভিন্নস্ত্বং পতিষ্যসি মহীতলে .. ৪৯..
ইতি সীতাবচঃ শ্রুত্বা রাবণঃ ক্রোধমূর্চ্ছিতঃ .
স্বরূপং দর্শযামাস মহাপর্বতসন্নিভম্ .
দশাস্যং বিংশতিভুজং কালমেঘসমদ্যুতিম্ .. ৫০..
তদ্দৃষ্ট্বা বনদেব্যশ্চ ভূতানি চ বিতত্রসুঃ .
ততো বিদার্য ধরণীং নখৈরুদ্ধৃত্য বাহুভিঃ .. ৫১..
তোলযিত্বা রথে ক্ষিপ্ত্বা যযৌ ক্ষিপ্রং বিহাযসা .
হা রাম হা লক্ষ্মণেতি রুদতী জনকাত্মজা .. ৫২..
ভযোদ্বিগ্নমনা দীনা পশ্যন্তী ভুবমেব সা .
শ্রুত্বা তত্ক্রন্দিতং দীনং সীতাযাঃ পক্ষিসত্তমঃ .. ৫৩..
জটাযুরুত্থিতঃ শীঘ্রং নগাগ্রাত্তীক্ষ্ণতুণ্ডকঃ .
তিষ্ঠ তিষ্ঠেতি তং প্রাহ কো গচ্ছতি মমাগ্রতঃ .. ৫৪..
মুষিত্বা লোকনাথস্য ভার্যাং শূন্যাদ্বনালযাত্ .
শুনকো মন্ত্রপূতং ত্বং পুরোডাশমিবাধ্বরে .. ৫৫..
ইত্যুক্ত্বা তীক্ষ্ণতুণ্ডেন চূর্ণযামাস তদ্রথম্ .
বাহান্বিভেদ পাদাভ্যাং চূর্ণযামাস তদ্ধনুঃ .. ৫৬..
ততঃ সীতাং পরিত্যজ্য রাবণঃ খড্গমাদদে .
চিচ্ছেদ পক্ষৌ সামর্ষঃ পক্ষিরাজস্য ধীমতঃ .. ৫৭..
পপাত কিঞ্চিচ্ছেষেণ প্রাণেন ভুবি পক্ষিরাত্ .
পুনরন্যরথেনাশু সীতামাদায রাবণঃ .. ৫৮..
ক্রোশন্তী রামরামেতি ত্রাতারং নাধিগচ্ছতি .
হা রাম হা রাম জগন্নাথ মাং ন পশ্যসি দুঃখিতাম্ .. ৫৮..
রক্ষসা নীযমানাং স্বাং ভার্যাং মোচয রাঘব .
হা লক্ষ্মণ মহাভাগ ত্রাহি মামপরাধিনীম্ .. ৬০..
বাক্শরেণ হরস্ত্বং মে ক্ষন্তুমর্হসি দেবর .
ইত্যেবং ক্রোশমানাং তাং রামাগমনশঙ্কযা .. ৬১..
জগাম বাযুবেগেন সীতামাদায সত্বরঃ .. ৬২..
বিহাযসা নীযমানা সীতাপশ্যদধোমুখী .
পর্বতাগ্রে স্থিতান্পঞ্চ বানরান্বারিজাননা .
উত্তরীযার্ধখড্গেন বিমুচ্যাভরণাদিকম্ .. ৬৩..
বদ্ধ্বা চক্ষেপি রামায কথযন্ত্বিতি পর্বতে .. ৬৪..
ততঃ সমুদ্রমুল্লঙ্ঘ্য লক্ঙ্কাং গত্বা স রাবণঃ .
স্বান্তঃপুরে রহস্যেতামশোকবিপিনেঽক্ষিপত্ .
রাক্ষসীভিঃ পরিবৃতাং মাতৃবুদ্ধ্যান্বপালযত্ .. ৬৫..
কৃশাতিদীনা পরিকর্মবর্জিতা
        দুঃখেন শুষ্যদ্বদনাতিবিহ্বলা .
হা রাম রামেতি বিলপ্যমানা
        সীতা স্থিতা রাক্ষসবৃন্দমধ্যে .. ৬৬..
ইতি শ্রীমদধ্যাত্মরামযণে উমামহেশ্বরসংবাদে
   অরণ্যকাণ্ডে সপ্তমঃ সর্গঃ .. ৭..