অধ্যাত্ম রামাযণ ৩ – অরণ্যকাণ্ডম্

      .. অধ্যাত্ম রামাযণম্ ..
       .. অরণ্য কাণ্ডঃ ..
       .. ষষ্ঠঃ সর্গঃ ..
বিচিন্ত্যৈবং নিশাযাং স প্রভাতে রথমাস্থিতঃ .
রাবণো মনসা কার্যমেকং নিশ্চিত্য বুদ্ধিমান্ .. ১..
যযৌ মারীচসদনং পরং পারমুদন্বতঃ .
মারীচস্তত্র মুনিবজ্জটাবল্কলধারকঃ .. ২..
ধ্যাযন্ হৃদি পরাত্মানং নির্গুণং গুণভাসকম্ .
সমাধিবিরমেঽপশ্যদ্রাবণং গৃহমাগতম্ .. ৩..
দ্রুতমুত্থয চালিঙ্গ্য পূজযিত্বা যথাবিধি .
কৃতাতিথ্যং সুখাসীনং মারীচো বাক্যমব্রবীত্ .. ৪..
সমাগমনমেতত্তে রথেনৈকেন রাবণ .
চিন্তাপর ইবাভাসি হৃদি কার্যং বিচিন্তযন্ .. ৫..
ব্রূহি মে ন হি গোপ্যং চেত্করবাণি তব প্রিযম্ .
ন্যায্যং চেদ্ব্রূহি রাজেন্দ্র বৃজিনং মাং স্পৃশেন্নহি .. ৬..
            রাবণ উবাচ
অস্তি রাজা দশরথঃ সাকেতাধিপতিঃ কিল .
রামনামা সুতস্তস্য জ্যেষ্ঠং সত্যপরাক্রমঃ .. ৭..
বিবাসযামাস সুতং বনং বনজনপ্রিযম্ .
ভার্যযা সহিতং ভ্রাত্রা লক্ষ্মণেন সমন্বিতম্ .. ৮..
স আস্তে বিপিনে ঘোরে পঞ্চবট্যাশ্রমে শুভে .
তস্য ভার্যা বিশালাক্ষী সীতা লোকবিমোহিনী .. ৯..
রামো নিরপরাধান্মে রাক্ষসান্ ভীমবিক্রমান্ .
খরং চ হত্বা বিপিনে সুখমাস্তেঽতিনির্ভযঃ .. ১০..
ভগিন্যাঃ শূর্পণখাযা নির্দোষাযাশ্চ নাসিকাম্ .
কর্ণৌ চিচ্ছেদ দুষ্টাত্মা বনে তিষ্ঠতি নির্ভযঃ .. ১১..
অতস্ত্বযা সহাযেন গত্বা তত্প্রাণবল্লভাম্ .
আনযিষ্যামি বিপিনে রহিতে রাঘবেণ তাম্ .. ১২..
ত্বং তু মাযামৃগো ভূত্বা হ্যাশ্রমাদপনেষ্যসি .
রামং চ লক্ষ্মণং চৈব তদা সীতাং হরাম্যহম্ .. ১৩..
ত্বং তু তাবত্সহাযং মে কৃত্বা স্থাস্যসি পূর্ববত্ .
ইত্যেবং ভাষমাণং তং রাবণং বীক্ষ্য বিস্মিতঃ .. ১৪..
কেনেদমুপদিষ্টং তে মূলঘাতকরং বচঃ .
স এব শত্রুর্বধ্যশ্চ যস্ত্বন্নাশং প্রতীক্ষতে .. ১৫..
রামস্য পৌরুষং স্মৃত্বা চিত্তমদ্যাপি রাবণ .
বালোঽপি মাং কৌশিকস্য যজ্ঞসংরক্ষণায সঃ .. ১৬..
আগতস্ত্বিষুণৈকেন পাতযামাস সাগরে .
যোজনানাং শতং রামস্তদাদি ভযবিহ্বলঃ .. ১৭..
স্মৃত্বা স্মৃত্বা তদেবাহং
          রামং পশ্যামি সর্বতঃ .. ১৮..
দণ্ডকেঽপি পুনরপ্যহং বনে
          পূর্ববৈরমনুচিন্তযন্ হৃদি .
তীক্ষ্ণ শৃঙ্গমৃগরূপমেকদা
          মাদৃশৈর্বহুভিরাবৃতোঽভ্যযাম্ .. ১৯..
রাঘবং জনকজাসমন্বিতং
          লক্ষ্মণেন সহিতং ত্বরান্বিতঃ .
আগতোঽহমথ হন্তুমুদ্যতো মাং
          বিলোক্য শরমেকমক্ষিপত্ .. ২০..
তেন বিদ্ধহৃদযোঽহমুদ্ভ্রমন্
          রাক্ষসেন্দ্র পতিতোঽস্মি সাগরে .
তত্প্রভৃত্যহমিদং সমাশ্রিতঃ
          স্থানমূর্জিতমিদং ভযার্দিতঃ .. ২১..
রামমেব সততং বিভাবযে
          ভীতভীত ইব ভোগরাশিতঃ .
রাজরত্নরমণীরথাদিকং
          শ্রোত্রযোর্যদি গতং ভযং ভবেত্ .. ২২..
রাম আগত ইহেতিশঙ্কযা
          বাহ্যকার্যমপি সর্বমত্যজম্ .
নিদ্রযা পরিবৃতো যদা স্বপে
          রামমেব মনসানুচিন্তযন্ .. ২৩..
স্বপ্নদৃষ্টিগতরাঘবং তদা
          বোধিতো বিগতনিদ্রা আস্থিতঃ .
তদ্ভবাপি বিমুচ্য চাগ্রহং
          রাঘবং প্রতি গৃহং প্রযাহি ভোঃ .. ২৪..
রক্ষ রাক্ষসকুলং চিরাগতং
          তত্স্মৃতৌ সকলমেব নশ্যতি .
তব হিতং বদতো মম ভাষিতং
          পরিগৃহাণ পরাত্মনি রাঘবে .
ত্যজ বিরোধমতিং ভজ ভক্তিতঃ
          পরমকারুণিকো রঘুনন্দনঃ .. ২৫..
অহমশেষমিদং মুনিবাক্যতঃ
          অশৃণবমাদিযুগে পরমেশ্বরঃ .
ব্রহ্মণার্থিত উবাচ তং হরিঃ
          কিং তবেপ্সিতমহং করবাণি তত্ .. ২৬..
ব্রহ্মণোক্তমরবিন্দলোচন ত্বং
          প্রযাহি ভুবি মানুষং বপুঃ .
দশরথাত্মজভাবমঞ্জসা
          জহি রিপুং দশকন্ধরং হরে .. ২৭..
অতো ন মানুষো রামঃ সাক্ষান্নারাযণোঽব্যযঃ .
মাযামানুষবেষেণ বনং যাতোঽতিনির্ভযঃ .. ২৮..
ভূভারহরণার্থায গচ্ছ তাত গৃহং সুখম্ .
শ্রুত্বা মারীচবচনং রাবণঃ প্রত্যভাষত .. ২৯..
পরমাত্মা যদা রামঃ প্রার্থিতো ব্রহ্মণা কিল .
মাং হন্তুং মানুষো ভূত্বা যত্নাদিহ সমাগতঃ .. ৩০..
করিষ্যত্যচিরাদেব সত্যসঙ্কল্প ঈশ্বরঃ .
অতোঽহং যত্নতঃ সীতামানেষ্যাম্যেব রাঘবাত্ .. ৩১..
বধে প্রাপ্তে রণে বীর প্রাপ্স্যামি পরমং পদম্ .
যদ্বা রামং রণে হত্বা সীতাং প্রাপ্স্যামি নির্ভযঃ .. ৩২..
তদুত্তিষ্ঠ মহাভাগ বিচিত্রমৃগরূপধৃক্ .
রামং সলক্ষ্মণং শীঘ্রমাশ্রমাদতিদূরতঃ .. ৩৩..
আক্রম্য গচ্ছ ত্বং শীঘ্রং সুখং তিষ্ঠ যথা পুরা .
অতঃ পরং চেদ্যত্কিঞ্চিদ্ভাষসে মদ্বিভীষণম্ .. ৩৪..
হনিষ্যাম্যসিনানেন ত্বামত্রৈব ন সংশযঃ .
মারীচস্তদ্বচঃ শ্রুত্বা স্বাত্মন্যেবান্বচিন্তযত্ .. ৩৫..
যদি মাং রাঘবো হন্যাত্তদা মুক্তো ভবার্ণবাত্ .
মাং হন্যাদ্যদি চেদ্দুষ্টস্তদা মে নিরযো ধ্রুবম্ .. ৩৬..
ইতি নিশ্চিত্য মরণং রামাদুত্থায বেগতঃ .
অব্রবীদ্রাবণং রাজন্করোম্যাজ্ঞাং তব প্রভো .. ৩৭..
ইত্যুক্ত্বা রথমাস্থায গতো রামাশ্রমং প্রতি .
শুদ্বজাম্বূনদপ্রখ্যো মৃগোঽভূদ্রৌপ্যবিন্দুকঃ .. ৩৮..
রত্নশৃঙ্গো মণিখুরো নীলরত্নবিলোচনঃ .
বিদ্যুত্প্রভো বিমুগ্ধাস্যো বিচচার বনান্তরে .. ৩৯..
রামাশ্রমপদস্যান্তে সীতাদৃষ্টিপথে চরন্ .. ৪০..
ক্ষণং চ ধাবত্যবতিষ্ঠতে
          ক্ষণং সমীপমাগত্য পুনর্ভযাবৃতঃ .
এবং স মাযামৃগবেষরূপধৃক্
          চচার সীতাং পরিমোহযন্খলঃ .. ৪১..
ইতি শ্রীমদধ্যাত্মরামযণে উমামহেশ্বরসংবাদে
   অরণ্যকাণ্ডে ষষ্ঠঃ সর্গঃ .. ৬..