অধ্যাত্ম রামাযণ ৩ – অরণ্যকাণ্ডম্

      .. অধ্যাত্ম রামাযণম্ ..
       .. অরণ্য কাণ্ডঃ ..
       .. পঞ্চমঃ সর্গঃ ..
        শ্রী মহাদেব উবাচ
তস্মিন্ কালে মহারণ্যে রাক্ষসী কামরূপিণী .
বিচচার মহাসত্ত্বা জনস্থাননিবাসিনী .. ১..
একদা গৌতমীতীরে পঞ্চবট্যাং সমীপতঃ .
পদ্মবজ্রাঙ্কুশাঙ্গানি পদানি জগতীপতেঃ .. ২..
দৃষ্ট্বা কামপরীতাত্মা পাদসৌন্দর্যমোহিতা .
পশ্যন্তী সা শনৈরাযাদ্রাঘবস্য নিবেশনম্ .. ৩..
তত্র সা তং রমানাথং সীতযা সহ সংস্থিতম্ .
কন্দর্পসদৃশং রামং দৃষ্ট্বা কামবিমোহিতা .. ৪..
রাক্ষসী রাঘবং প্রাহ কস্য ত্বং কঃ কিমাশ্রমে .
যুক্তো জটাবল্কলাদ্যৈঃ সাধ্যং কিং তেঽত্র মেবদ .. ৫..
অহং শূর্পণখা নাম রাক্ষসী কামরূপিণী .
ভগিনী রাক্ষসেন্দ্রস্য রাবণস্য মহাত্মনঃ .. ৬..
খরেণ সহিতা ভ্রাত্রা বসাম্যত্রৈব কাননে .
রাজ্ঞা দত্তং চ মে সর্বং মুনিভক্ষা বসাম্যহং .. ৭..
ত্বাং তু বেদিতুমিচ্ছামি বদ মে বদতাং বর .
তামাহ রামনামাহমযোধ্যাধিপতেঃ সুতঃ .. ৮..
এষা মে সুন্দরী ভার্যা সীতা জনকনন্দিনী .
স তু ভ্রাত্রা কনীযান্মেলক্ষ্মণো.স্তীবসুন্দরঃ .. ৯..
কিং কৃত্যং তে মযা ব্রূহি কার্যং ভুবনসুন্দরি .
ইতি রামবচঃ শ্রুত্বা কামার্তা সাব্রবীদিদম্ .. ১০..
এহি রাম মযা সার্ধং রমস্ব গিরিকাননে .
কামার্তাহং ন শক্নোমি ত্যক্তুং ত্বাং কমলেক্ষণম্ .. ১১..
রামঃ সীতাং কটাক্ষেণ পশ্যন্ সস্মিতমব্রবীত্ .
ভার্যা মমৈষা কল্যাণী বিদ্যতে হ্যনপাযিনী .. ১২..
ত্বং তু সাপত্ন্যদুঃখেন কথং স্থাস্যসি সুন্দরি .
বহিরাস্তে মম ভ্রাতা লক্ষ্মণোঽতীব সুন্দরঃ .. ১৩..
তবানুরূপো ভবিতা পতিস্তেনৈব সঞ্চর .
ইত্যুক্ত্বা লক্ষ্মণং প্রাহ পতির্মে ভব সুন্দর .. ১৪..
ভ্রাতুরাজ্ঞাং পুরস্কৃত্য সঙ্গচ্ছাবোঽদ্য মা চিরম্ .
ইত্যাহ রাক্ষসী ঘোরা লক্ষ্মণং কামমোহিতা .. ১৫..
তামাহ লক্ষ্মণঃ সাধ্বি দাসোঽহং তস্য ধীমতঃ .
দাসী ভবিষ্যসি ত্বং তু ততো দুঃখতরং নু কিম্ .. ১৬..
তমেব গচ্ছ ভদ্রং তে স তু রাজাখিলেশ্বরঃ .
তত্শ্রুত্বা পুনরপ্যাগাদ্রাঘবং দুষ্টমানসা .. ১৭..
ক্রোধাদ্রাম কিমর্থং মাং ভ্রামযস্যনবস্থিতঃ .
ইদানীমেব তাং সীতাং ভক্ষযামি তবাগ্রতঃ .. ১৮..
ইত্যুক্ত্বা বিকটাকরা জানকীমনুধাবতি .
ততো রামাজ্ঞযা খড্গমাদায পরিগৃহ্য তাম্ .. ১৯..
চিচ্ছেদ নাসাং কর্ণৌ চ লক্ষ্মণোঽলঘুবিক্রমঃ .
ততো ঘোরধ্বনিং কৃত্বা রুধিরাক্ত্তবপুর্দ্রুতম্ .. ২০..
ক্রন্দমানা পপাতাগ্রে খরস্য পরুষাক্ষরা .
কিমেতদিতি তামাহ খরঃ খরতরাক্ষরঃ .. ২১..
কেনৈবং কারিতাসি ত্বং মৃত্যোর্বক্ত্রানুবর্তিনা .
বদ মে তং বধিষ্যামি কালকল্পমপি ক্ষণাত্ .. ২২..
তমাহ রাক্ষসী রামঃ সীতালক্ষ্মণসংযুতঃ .
দণ্ডকং নির্ভযং কুর্বন্নাস্তে গোদাবরীতটে .. ২৩..
মামেবং কৃতবাংস্তস্য ভ্রাতা তেনৈব চোদিতঃ .
যদি ত্বং কুলজাতোঽসি বীরোঽসি জহি তৌ রিপূ .. ২৪..
তযোস্তু রুধিরং পাস্যে ভক্ষযৈতৌ সুদুর্মদৌ .
নো চেত্প্রাণান্পরিত্যজ্য যাস্যামি যমসাদনম্ .. ২৫..
তত্শ্রুত্বা ত্বরিতং প্রাগাত্খরঃ ক্রোধেন মূর্চ্ছিতঃ .
চতুর্দশ সহস্রাণি রক্ষসাং ভীমকর্মণাম্ .. ২৬..
চোদযামাস রামস্য সমীপং বধকাঙ্ক্ষযা .
খরস্য ত্রিশিরাশ্চৈব দূষণশ্চৈব রাক্ষসঃ .. ২৭..
সর্বে রামং যযুঃ শীঘ্রং নানাপ্রহরণোদ্যুতাঃ .
শ্রুত্বা কোলাহলং তেষাং রামঃ সৌমিত্রিমব্রবীত্ .. ২৮..
শ্রূযতে বিপুলঃ শব্দো নূনমাযান্তি রাক্ষসাঃ .
ভবিষ্যতি মহদ্যুদ্ধং নূনমদ্য মযা সহ .. ২৯..
সীতাং নীত্বা গুহাং গত্বা তত্র তিষ্ঠ মহাবল .
হন্তুমিচ্ছাম্যহং সর্বান্ রাক্ষসান্ ঘোররূপিণঃ .. ৩০..
অত্র কিঞ্চিন্ন বক্তব্যং শাপিতোঽসি মমোপরি .
তথেতি সীতামাদায লক্ষ্মণো গহ্বরং যযৌ .. ৩১..
রামঃ পরিকরং ভদ্ধ্বা ধনুরাদায নিষ্ঠুরম্ .
তূণীরাবক্ষযশরৌ বদ্ধ্বাযত্তোঽভবত্প্রভুঃ .. ৩২..
তত আগত্য রক্ষাংসি রামস্যোপরি চিক্ষিপুঃ .
আযুধানি বিচিত্রাণি পাষাণান্পাদপানপি .. ৩৩..
তানি চিচ্ছেদ রামোঽপি লীলযা তিলশঃ ক্ষণাত্ .
ততো বাণসহস্রেণ হত্বা তান্ সর্বরাক্ষসান্ .. ৩৪..
খরং ত্রিশিরসং চৈব দূষণং চৈব রাক্ষসম্ .
জঘান প্রহরার্ধেন সর্বানেব রঘূত্তমঃ .. ৩৫..
লক্ষ্মণোঽপি গুহামধ্যাত্সীতামাদায রাঘবে .
সমর্প্য রাক্ষসান্দৃষ্ট্বা হতান্বিস্মযমাযযৌ .. ৩৬..
সীতা রামং সমালিঙ্গ্য প্রসন্নমুখপঙ্কজা .
শস্ত্রব্রণানি চাঙ্গেষু মমার্জ জনকাত্মজা .. ৩৭..
সাপি দুদ্রাব দৃষ্ট্বা তান্হতান্ রাক্ষসপুঙ্গবান্ .
লঙ্কাং গত্বা সভামধ্যে ক্রোশন্তী পাদসন্নিধৌ .. ৩৮..
রাবণস্য পপাতোর্ব্যাং ভগিনী তস্য রক্ষসঃ .
দৃষ্ট্বা তাং রাবণঃ প্রাহ ভগিনীং ভযবিহ্বলাম্ .. ৩৯..
উত্তিষ্ঠোত্তিষ্ঠ বত্সে ত্বং বিরূপকরণং তব .
কৃতং শক্রেণ বা ভদ্রে যমেন বরুণেন বা .. ৪০..
কুবেরেণাথবা ব্রূহি ভস্মীকুর্যাং ক্ষণেন তম্ .
রাক্ষসী তমুবাচেদং ত্বং প্রমত্তো বিমূঢধীঃ .. ৪১..
পানাসক্তঃ স্ত্রীবিজিতঃ ষণ্ঢঃ সর্বত্র লক্ষ্যসে .
চারচক্ষূর্বিহীনস্ত্বং কথং রাজা ভবিষ্যসি .. ৪২..
খরশ্চ নিহতঃ সঙ্খ্যে দূষণস্ত্রিশিরাস্তথা .
চতুর্দশ সহস্ত্রাণি রাক্ষসানাং মহাত্মনাম্ .. ৪৩..
নিহতানি ক্ষণেনৈব রামেণাসুরশত্রুণা .
জনস্থানমশেষেণ মুনীনাং নির্ভযং কৃতম্ .
ন জানাসি বিমূঢস্ত্বমত এব মযোচ্যতে .. ৪৪..
            রাবণ উবাচ
কো বা রামঃ কিমর্থং বা কথং তেনাসুরা হতাঃ .
সম্যক্কথয মে তেষাং মূলঘাতং করোম্যহম্ .. ৪৫..
           শূর্পণখোবাচ
জনস্থানাদহং যাতা কদাচিত্ গৌতমীতটে .
তত্র পঞ্চবটী নাম পুরা মুনিজনাশ্রযা .. ৪৬..
তত্রাশ্রমে মযা দৃষ্টো রামো রাজীবলোচনঃ .
ধনুর্বাণধরঃ শ্রীমান্ জটাবল্কলমণ্ডিতঃ .. ৪৭..
কনীযাননুজস্তস্য লক্ষ্মণোঽপি তথাবিধঃ .
তস্য ভার্যা বিশালাক্ষী রূপিণী শ্রীরিবাপরা .. ৪৮..
দেবগন্ধর্বনাগানাং মনুষ্যাণাং তথাবিধা .
ন দৃষ্টা ন শ্রুতা রাজন্দ্যোতযন্তী বনং শুভা .. ৪৯..
আনেতুমহমুদ্যুক্তা তাং ভার্যার্থং তবানঘ .
লক্ষ্মণো নাম তদ্ভ্রাতা চিচ্ছেদ মম নাসিকাম্ .. ৫০..
কর্ণৌ চ নোদিতস্তেন রামেণ স মহাবলঃ .
ততোঽহমতিদুঃখেন রুদতী খরমন্বগাম্ .. ৫১..
সোঽপি রামং সমাসাদ্য যুদ্ধং রাক্ষসযূথপৈঃ .
অতঃ ক্ষণেন রামেণ তেনৈব বলশালিনা .. ৫২..
সর্বে তেন বিনষ্টা বৈ রাক্ষসা ভীমবিক্রমাঃ .
যদি রামো মনঃ কুর্যাত্ত্রৈলোক্যং নিমিষার্ধতঃ .. ৫৩..
ভস্মীকুর্যান্ন সন্দেহ ইতি ভাতি মম প্রভো .
যদি সা তব ভার্যা স্যাত্সফলং তব জীবিতম্ .. ৫৪..
অতো যতস্তব রাজেন্দ্র যথা তে বল্লভা ভবেত্ .
সীতা রাজীবপত্রাক্ষী সর্বলোকৈকসুন্দরী .. ৫৫..
সাক্ষাদ্রামস্য পুরতঃ স্থাতুং ত্বং ন ক্ষমঃ প্রভো .
মাযযা মোহযিত্বা তু প্রাপ্স্যসে তাং রঘূত্তমম্ .. ৫৬..
শ্রুত্বা তত্সূক্তবাক্যৈশ্চ দানমানাদিভিস্তথা .
আশ্বাস্য ভগিনীং রাজা প্রবিবেশ স্বকং গৃহম্ .
তত্র চিন্তাপরো ভূত্বা নিদ্রাং রাত্রৌ ন লব্ধবান্ .. ৫৭..
একেন রামেণ কথং
      মনুষ্যমাত্রেণ নষ্টঃ সবলঃ খরো মে .
ভ্রাতা কথং মে
      বলবীর্যদর্পযুতো বিনষ্টো বত রাঘবেণ .. ৫৮..
যদ্বা ন রামো মনুজঃ পরেশো
      মাং হন্তুকামঃ সবলং বলৌঘৈঃ .
সম্প্রার্থিতোঽযং দ্রুহিণেনপূর্বং
      মনুষ্যরূপোঽদ্য রঘোঃ কুলেঽভূত্ .. ৫৯..
বধ্যো যদি স্যাং পরমাত্মনাহং
      বৈকুণ্ঠরাজ্যং পরিপালযেঽহম্ .
নো চেদিদং রাক্ষসরাজ্যমেব
      ভোক্ষ্যে চিরং রামমতো ব্রজামি .. ৬০..
ইত্থং বিচিন্ত্যাখিলরাক্ষসেন্দ্রো
      রামং বিদিত্বা পরমেশ্বরং হরিং .
বিরোধবুদ্ধ্যৈব হরিং প্রযামি
      দ্রুতং ন ভক্ত্যা ভগবান্ প্রসীদেত্ .. ৬১..
ইতি শ্রীমদধ্যাত্মরামযণে উমামহেশ্বরসংবাদে
   অরণ্যকাণ্ডে পঞ্চমঃ সর্গঃ .. ৫..