অধ্যাত্ম রামাযণ ৩ – অরণ্যকাণ্ডম্

      .. অধ্যাত্ম রামাযণম্ ..
       .. অরণ্য কাণ্ডঃ ..
       .. চতুর্থঃ সর্গঃ ..
          শ্রী মহাদেব উবাচ
মার্গে ব্রজন্দদর্শাথ শৈলশৃঙ্গমিব স্থিতম্ .
বৃদ্ধং জটাযুষং রামঃ কিমেতদিতি বিস্মিতঃ .. ১..
ধনুরানয সৌমিত্রে রাক্ষসোঽযং পুরঃ স্থিতঃ .
ইত্যাহ লক্ষ্মণং রামো হনিষ্যামৃষিভক্ষকম্ .. ২..
তত্শ্রুত্বা রামবচনং গৃধ্ররাড্ ভযপীডিতঃ .
বধার্হোঽহং ন তে রাম পিতুস্তেঽহং প্রিযঃ সখা .. ৩..
জটাযুর্নাম ভদ্রং তে গৃধ্রোঽহং প্রিযকৃত্তব .. ৪..
পঞ্চবট্যামহং বত্স্যে তবৈব প্রিযকাম্যযা .
মৃগযাযাং কদাচিত্তু প্রিযাতে লক্ষ্মণেঽপি চ .. ৫..
সীতা জনককন্যা মে রক্ষিতব্যা প্রযত্নতঃ .
শ্রুত্বা তদ্গৃধ্রবচনং রামঃ সস্নেহমব্রবীত্ .. ৬..
সাধু গৃধ্র মহারাজ তথৈব কুরু মে প্রিযম্ .
অত্রৈব মে সমীপস্থো নাতিদূরে বনে বসন্ .. ৭..
ইত্যামন্ত্রিতমালিঙ্গ্য যযৌ পঞ্চবটীং প্রভুঃ .
লক্ষ্মণেন সহ ভ্রত্রা সীতযা রঘুনন্দনঃ .. ৮..
গত্বা তে গৌতমীতীরং পঞ্চবট্যাং সুবিস্তরম্ .
মন্দিরং কারযামাস লক্ষ্মণেন সুবুদ্ধিনা .. ৯..
তত্র তে ন্যবসন্সর্বে গঙ্গাযা উত্তরে তটে .
কদম্বপনসাম্রাদিফলবৃক্ষসমাকুলে .. ১০..
বিবিক্তে জনসবাধবর্জিতে নীরুজস্থলে .
বিনোদযন্ জনকজাং লক্ষ্মণেন বিপশ্চিতা .. ১১..
অধ্যুবাস সুখং রামো দেবলোক ইবাপরঃ .
কন্দমূলফলাদীনি লক্ষ্মণোঽনুদিনং তযোঃ .. ১২..
আনীয প্রদদৌ রামসেবাতত্পরমানসঃ .
ধনুর্বাণধরো নিত্যং রাত্রৌ জাগর্তি সর্বতঃ .. ১৩..
স্নানং কুর্বন্ত্যনুদিনং ত্রযস্তে গৌতমীজলে .
উভযোর্মধ্যগা সীতা কুরুতে চ গমাগমৌ .. ১৪..
আনীয সলিলং নিত্যম্ লক্ষ্মণঃ প্রীতমানসঃ .
সেবিতেঽহরহঃ প্রীত্যা এবমাসন্ সুখং ত্রযঃ .. ১৫..
একদা লক্ষ্মণো রামমেকান্তে সমুপস্থিতম্ .
বিনযাবনতো ভূত্বা পপ্রচ্ছ পরমেশ্বরম্ .. ১৬..
ভগবন্ শ্রোতুমিচ্ছামি মোক্ষস্যৈকান্তিকীং গতিম্ .
ত্বত্তঃ কমলপত্রাক্ষ সংক্ষেপাদ্বক্তুমর্হসি .. ১৭..
জ্ঞানং বিজ্ঞানসহিতং ভক্তিবৈরাগ্যবৃংহিতম্ .
আচক্ষ্ব মে রঘুশ্রেষ্ঠ বক্তা নান্যোঽস্তি ভূতলে .. ১৮..
          শ্রীরাম উবাচ
শৃণু বক্ষ্যামি বত্স গুহ্যাদ্গুহ্যতরং পরম্ .
যদ্বিজ্ঞায নরো জহ্যাত্সদ্যো বৈকল্পকং ভ্রমম্ .. ১৯..
আদৌ মাযাস্বরূপং তে বক্ষ্যামি তদনন্তরম্ .
জ্ঞানস্য সাধনং পশ্চাজ্জ্ঞান বিজ্ঞানসংযুতম্ .. ২০..
জ্ঞেযং চ পরমাত্মানং যজ্জ্ঞাত্বা মুচ্যতে ভযাত্ .
অনাত্মনি শরীরাদাবাত্মবুদ্ধিস্তু যা ভবেত্ .. ২১..
সৈব মাযা তযৈবাসৌ সংসারঃ পরিকল্প্যতে .
রূপে দ্বে নিশ্চিতে পূর্বে মাযাযাঃ কুলনন্দন .. ২২..
বিক্ষেপাবরণে তত্র প্রথমং কল্পযেজ্জগত্ .
লিঙ্গাদ্যব্রহ্মপর্যন্তং স্থূলসূক্ষ্মবিভেদতঃ .. ২৩..
অপরং ত্বখিলং জ্ঞানরূপমাবৃত্য তিষ্ঠতি .
মাযযা কল্পিতং বিশ্বং পরমাত্মনি কেবলে .. ২৪..
রজ্জৌ ভুজঙ্গবদ্ভ্রান্ত্যা বিচারে নাস্তি কিঞ্চন .
শ্রূযতে দৃশ্যতে যদ্যত্স্মর্যতে বা নরৈঃ সদা .. ২৫..
অসদেব হি তত্সর্বং যথা স্বপ্নমনোরথৌ .
দেহ এব হি সংসারবৃক্ষমূলং দৃঢং স্মৃতম্ .. ২৬..
তন্মূলঃ পুত্র দারাদিবন্ধঃ কিং তেঽন্যথাত্মনঃ .. ২৭..
দেহস্তু স্থূলভূতানাং পঞ্চ তন্মাত্রপঞ্চকম্ .
অহংকারশ্চ বুদ্ধিশ্চ ইন্দ্রিযাণি তথা দশ .. ২৮..
চিদাভাসো মনশ্চৈব মূলপ্রকৃতিরেব চ .
এতত্ক্ষেত্রমিতি জ্ঞেযং দেহ ইত্যভিধীযতে .. ২৯..
এতৈর্বিলক্ষণো জীবঃ পরমাত্মা নিরামযঃ .
তস্য জীবস্য বিজ্ঞানে সাধনান্যপি মে শৃণু .. ৩০..
জীবশ্চ পরমাত্মা চ পর্যাযো নাত্র ভেদধীঃ .
মানাভাবস্তথা দম্ভহিংসাদিপরিবর্জনম্ .. ৩১..
পরাক্ষেপাদিসহনং সর্বত্রাবক্রতা তথা .
মনোবাক্কাযসদ্ভক্ত্যা সদ্গুরোঃ পরিসেবনম্ .. ৩২..
বাহ্যাভ্যন্তরসংশুদ্ধিঃ স্থিরতা সত্ক্রিযাদিষু .
মনোবাক্কাযদণ্ডশ্চ বিষযেষু নিরীহতা .. ৩৩..
নিরহঙ্কারতা জন্মজরাদ্যালোচনং তথা .
অস্ক্তিঃ স্নেহশূন্যত্বং পুত্রদারধনাদিষু .. ৩৪..
ইষ্টানিষ্টগমে নিত্যং চিত্তস্য সমতা তথা .
মযি সর্বাত্মকে রামে হ্যনন্যবিষযা মতিঃ .. ৩৫..
জনসম্বাধরহিতশুদ্ধদেশনিষেবণম্ .
প্রাকৃতৈর্জনসঙ্ঘৈশ্চ হ্যরতিঃ সর্বদা ভবেত্ .. ৩৬..
আত্মজ্ঞানে সদোদ্যোগো বেদান্তার্থাবলোকনম্ .
উক্তৈরেতৈর্ভবেজ্জ্ঞানং বিপরীতৈর্বিপর্যযা .. ৩৭..
বুদ্ধিপ্রাণমনোদেহাহংকৃতিভ্যো বিলক্ষণঃ .
চিদাত্মাহং নিত্যশুদ্ধো বুদ্ধ এবেতি নিশ্চযম্ .. ৩৮..
যেন জ্ঞানেন সংবিত্তে তজ্জ্ঞানং নিশ্চিতং চ মে .
বিজ্জ্ঞানং চ তদৈবৈতত্সাক্ষাদনুভবেদ্যদা .. ৩৯..
আত্মা সর্বত্র পূর্ণঃ স্যাচ্চিদানন্দাত্মকোঽব্যযঃ .
বুদ্ধ্যাদ্যুপাধিরহিতঃ পরিণামাদিবর্জিতঃ .. ৪০..
স্বপ্রকাশেন দেহাদীন্ ভাসযন্ননপাবৃতঃ .
এক এবাদ্বিতীযশ্চ সত্যজ্ঞানাদিলক্ষণঃ .. ৪১..
অসঙ্গঃ স্বপ্রভো দ্রষ্টা বিজ্ঞানেনাবগম্যতে .
আচার্যশাস্ত্রোপদেশাদ্যৈক্যজ্ঞানং যদা ভবেত্ .. ৪২..
আত্মনোর্জীবপরযোর্মূলাবিদ্যা তদৈব হি .
লীযতে কার্যকরণৈঃ সহৈব পরমাত্মনি .. ৪৩..
সাবস্থা মুক্তিরিত্যুক্তা হ্যুপচারোঽযমাত্মনি .
ইদং মোক্ষস্বরূপং তে কথিতং রঘুনন্দন .. ৪৪..
জ্ঞানবিজ্ঞানবৈরাগ্যসহিতং মে পরাত্মনঃ .
কিন্ত্বেতদ্দুর্লভং মন্যেমদ্ভক্তিবিমুখাত্মনাম্ .. ৪৫..
চক্ষুষ্মতামপি তথা রাত্রৌ সম্যঙ্ ন দৃশ্যতে .
পদং দীপসমেতানাং দৃশ্যতে সম্যগেব হি .. ৪৬..
এবং মদ্ভক্তিযুক্তানামাত্মা সম্যক্ প্রকাশতে .
মদ্ভক্তেঃ কারণং কিঞ্চিদ্বক্ষ্যামি শৃণু তত্ত্বতঃ .. ৪৭..
মদ্ভক্তসঙ্গো মত্সেবা মদ্ভক্তানাং নিরন্তরং .
একাদশ্যুপবাসাদি মম পর্বানুমোদনম্ .. ৪৮..
মত্কথাশ্রবণে পাঠে ব্যাখ্যানে সর্বদা রতিঃ .
মত্পূজাপরিনিষ্ঠা চ মম নামানুকীর্তনম্ .. ৪৯..
এবং সততযুক্তানাং ভক্তিরব্যভিচারিণী .
মযি সঞ্জাযতে নিত্যং ততঃ কিমবশিষ্যতে .. ৫০..
অতো মদ্ভক্তিযুক্তস্য জ্ঞানং বিজ্ঞানমেব চ .
বৈরাগ্যং চ ভবেচ্ছীঘ্রং ততো মুক্তিমবাপ্নুযাত্ .. ৫১..
কথিতং সর্বমেতত্তে তব প্রশ্নানুসারতঃ .
অস্মিন্মনঃ সমাধায যস্তিষ্ঠেত্স তু মুক্তিভাক্ .. ৫২..
ন বক্তব্যমিদং যত্নান্মদ্ভক্তিবিমুখায হি .
মদ্ভক্তায প্রদাতব্যমাহূযাপি প্রযত্নতঃ .. ৫৩..
য ইদং তু পঠেন্নিত্যং শ্রদ্ধাভক্তিসমন্বিতঃ .
অজ্ঞানপটলধ্বান্তং বিধূয পরিমুচ্যতে .. ৫৪..
ভক্তানাং মম যোগিনাং সুবিমলস্বান্তাতিশান্তাত্মনাঁ
মত্সেবাভিরতাত্মনাং চ বিমলজ্ঞানাত্মনাং সর্বদা .
সঙ্গং যঃ কুরুতে সদোদ্যতমতিস্তত্সেবনানন্যধীঃ
মোক্ষস্তস্য করে স্থিতোঽহমনিশং দৃশ্যো ভবে নান্যথা .. ৫৫..
ইতি শ্রীমদধ্যাত্মরামযণে উমামহেশ্বরসংবাদে
   অরণ্যকাণ্ডে চতুর্থঃ সর্গঃ .. ৪..