অধ্যাত্ম রামাযণ ৩ – অরণ্যকাণ্ডম্

      .. অধ্যাত্ম রামাযণম্ ..
       .. অরণ্য কাণ্ডঃ ..
       .. তৃতীযঃ সর্গঃ ..
অথ রামঃ সুতীক্ষ্ণেন জানক্যা লক্ষ্মণেন চ .
অগস্ত্যস্যানুজস্থানং মধ্যাহ্নে সমপদ্যত .. ১..
তেন সম্পূজিতঃ সম্যগ্ভুক্ত্বা মূলফলাদিকম্ .
পরেদ্যুঃ প্রাতরুত্থায জগ্মুস্তেঽগস্ত্যমণ্ডলম্ .. ২..
সর্বর্তুফলপুষ্পাঢ্যং নানামৃগগণৈর্যুতম্ .
পক্ষিসঙ্ঘৈশ্চ বিবিধৈর্নাদিতং নন্দনোপমম্ .. ৩..
ব্রহ্মর্ষিভির্দেবর্ষিভিঃ সেবিতং মুনিমন্দিরৈঃ .
সর্বতোঽলঁকৃতং সাক্ষাদ্ ব্রহ্মলোকমিবাপরম্ .. ৪..
বহিরেবাশ্রমস্যাথ স্থিত্বা রামোঽব্রবীন্মুনিম্ .
সুতীক্ষ্ণ গচ্ছ ত্বং শীঘ্রমাগতং মাং নিবেদয .. ৫..
অগস্ত্যমুনিবর্যায সীতযা লক্ষ্মণেন চ .
মহাপ্রসাদ ইত্যুক্ত্বা সুতীক্ষ্ণঃ প্রযযৌ গুরোঃ .. ৬..
আশ্রমং ত্বরযা তত্র ঋষিসঙ্ঘসমাবৃতম্ .
উপবিষ্টং রামভক্তৈর্বিশেষেণ সমাযুতম্ .. ৭..
ব্যাখ্যাতরামমন্ত্রার্থশিষ্যেভ্যশ্চাতিভক্তিতঃ .
দৃষ্ট্বাগস্ত্যং মুনিশ্রেষ্ঠং সুতীক্ষ্ণঃ প্রযযৌ মুনেঃ .. ৮..
দণ্ডবত্প্রণিপত্যাহ বিনযাবনতঃ সুধীঃ .
রামো দাশরথির্ব্রহ্মন্ সীতযা লক্ষ্মণেন চ .
আগতো দর্শনার্থং তে বহিস্তিষ্ঠতি সাঞ্জলিঃ .. ৯..
          অগস্ত্য উবাচ
শীঘ্রমানয ভদ্রং তে রামং মম হৃদিস্থিতম্ .
তমেব ধ্যাযমানোঽহং কাঙ্ক্ষমাণোঽত্র সংস্থিতঃ .. ১০..
ইত্যুক্ত্বা স্বযমুত্থায মুনিভিঃ সহিতো দ্রুতম্ .
অভ্যগাত্পরযা ভক্ত্যা গত্বা রামমথাব্রবীত্ .. ১১..
আগচ্ছ রাম ভদ্রং তে দিষ্ট্যা তেঽদ্য সমাগমঃ .
প্রিযাতিথির্মম প্রাপ্তোঽস্যদ্য মে সফলং দিনম্ .. ১২..
রামোঽপি মুনিমাযান্তং দৃষ্ট্বা হর্ষসমাকুলঃ .
সীতযা লক্ষ্মণেনাপি দণ্ডবত্পতিতো ভুবি .. ১৩..
দ্রুতমুত্থাপ্য মুনিরাড্রামমালিঙ্গ্য ভক্তিতঃ .
তদ্গাত্রস্পর্শজাহ্লাদস্রবন্নেত্রজলাকুলঃ .. ১৪..
গৃহীত্ব করমেকেন করেণ রঘুনন্দনম্ .
জগাম স্বাশ্রমং হৃষ্টো মনসা মুনিপুঙ্গবঃ .. ১৫..
সুখোপবিষ্টং সম্পূজ্য পূজযা বহুবিস্তরম্ .
ভোজযিত্বা যথান্যাযং ভোজ্যৈর্বন্যৈরনেকধা .. ১৬..
সুখোপবিষ্টমেকান্তে রামং শশিনিভাননম্ .
কৃতাঞ্জলিরুবাচেদমগস্ত্যো ভগবানৃষিঃ .. ১৭..
ত্বদাগমনমেবাহং প্রতীক্ষন্সমবস্থিতঃ .
যদা ক্ষীরসমুদ্রান্তে ব্রহ্মণা প্রার্থিতঃ পুরা .. ১৮..
ভূমের্ভারাপনুত্ত্যর্থং রাবণস্য বধায চ .
তদাদি দর্শনাকাঙ্ক্ষী তব রাম তপশ্চরন্ .
বসামি মুনিভিঃ সার্ধং ত্বামেব পরিচিন্তযন্ .. ১৯..
সৃষ্টেঃ প্রাগেক এবাসীর্নির্বিকল্পোঽনুপাধিকঃ .
ত্বদাশ্রযা ত্বদ্বিষযা মাযা তে শক্তিরুচ্যতে .. ২০..
ত্বামেব নির্গুণং শক্তিরাবৃণোতি যদা তদা .
অব্যাকৃতমিতি প্রাহুর্বেদান্তপরিনিষ্ঠিতাঃ .. ২১..
মূলপ্রকৃতিরিত্যেকে প্রাহুর্মাযেতি কেচন .
অবিদ্যা সংসৃতির্বন্ধ ইত্যাদি বহুধোচ্যতে .. ২২..
ত্বযা সংক্ষোভ্যমাণা সা মহত্তত্ত্বং প্রসূযতে .
মহত্তত্ত্বাদহঙ্কারস্ত্বযা সঞ্চোদিতাদভূত্ .. ২৩..
অহঙ্কারো মহত্তত্ত্বসংবৃতস্ত্রিবিধোঽভবত্ .
সাত্ত্বিকো রাজসশ্চৈব তামসশ্চেতি ভণ্যতে .. ২৪..
তামসাত্সূক্ষ্মতন্মাত্রাণ্যাসন্ ভূতান্যতঃ পরম্ .
স্থূলানি ক্রমশো রাম ক্রমোত্তরগুণানি হ .. ২৫..
রাজসানীন্দ্রিযাণ্যেব সাত্ত্বিকা দেবতা মনঃ .
তেভ্যোঽভবত্সূত্ররূপং লিঙ্গং সর্বগতং মহত্ .. ২৬..
ততো বিরাট্ সমুত্পন্নঃ স্থূলাদ্ ভূতকদম্বকাত্ .
বিরাজঃ পুরুষাত্সর্বং জগত্স্থাবরজঙ্গমম্ .. ২৭..
দেবতির্যঙ্মনুষ্যাশ্চ কালকর্মক্রমেণ তু .
ত্বং রজোগুণতো ব্রহ্মা জগতঃ সর্বকারণম্ .. ২৮..
সত্ত্বাদ্বিষ্ণুস্ত্বমেবাস্য পালকঃ সদ্ভিরুচ্যতে .
লযে রুদ্রস্ত্বমেবাস্য ত্বন্মাযাগুণভেদতঃ .. ২৯..
জাগ্রত্স্বপ্নসুষুপ্ত্যাখ্যা বৃত্তযো বুদ্ধিজৈর্গুণৈঃ .
তাসাং বিলক্ষণো রাম ত্বং সাক্ষী চিন্মযোঽব্যযঃ .. ৩০..
সৃষ্টিলীলাং যদা কর্তুমীহসে রঘুনন্দন .
অঙ্গীকরোষি মাযাং ত্বং তদা বৈ গুণবানিব .. ৩১..
রাম মাযা দ্বিধা ভাতি বিদ্যাবিদ্যেতি তে সদা .
প্রবৃত্তিমার্গনিরতা অবিদ্যাবশবর্তিনঃ .
নিবৃত্তিমার্গনিরতা বেদান্তার্থবিচারকাঃ .. ৩২..
ত্বদ্ভক্তিনিরতা যে চ তে বৈ বিদ্যামযাঃ স্মৃতা .. ৩৩..
অবিদ্যাবশগা যে তু নিত্যং সংসারিণাশ্চ তে .
বিদ্যাভ্যাসরতা যে তু নিত্যমুক্তাস্ত এব হি .. ৩৪..
লোকে ত্বদ্ভক্তিনিরতাস্ত্বন্মন্ত্রোপাসকাশ্চ যে .
বিদ্যা প্রাদুর্ভবেত্তেষাং নেতরেষাং কদাচন .. ৩৫..
অতস্ত্বদ্ভক্তিসম্পন্না মুক্তা এব ন সংশযঃ .
ত্বদ্ভক্ত্যমৃতহীনানাং মোক্ষঃ স্বপ্নেঽপি নো ভবেত্ .. ৩৬..
কিং রাম বহুনোক্তেন সারং কিঞ্চিদ্ ব্রবীমি তে .
সাধুসঙ্গতিরেবাত্র মোক্ষহেতুরুদাহৃতা .. ৩৭..
সাধবঃ সমচিত্তা যে নিঃস্পৃহা বিগতৈষিণঃ .
দান্তাঃ প্রশান্তাস্ত্বদ্ভক্তা নিবৃত্তাখিলকামনাঃ .. ৩৮..
ইষ্টপ্রাপ্তিবিপত্ত্যোশ্চ সমাঃ সঙ্গবিবর্জিতাঃ .
সংন্যস্তাখিলকর্মাণঃ সর্বদা ব্রহ্মতত্পরাঃ .. ৩৯..
যমাদিগুণসম্পন্নাঃ সন্তুষ্টা যেন কেনচিত্ .
সত্সঙ্গমো ভবেদ্যর্হি ত্বত্কথাশ্রবণে রতিঃ .. ৪০..
সমুদেতি ততো ভক্তিস্ত্বযি রাম সনাতনে .
ত্বদ্ভক্তাবুপপন্নাযাং বিজ্ঞানং বিপুলং স্ফুটম্ .. ৪১..
উদেতি মুক্তিমার্গোঽযমাদ্যশ্চতুরসেবিতঃ .
তস্মাদ্রাঘব সদ্ভক্তিস্ত্বযি মে প্রেমলক্ষণা .. ৪২..
সদা ভূযাদ্ধরে সঙ্গস্ত্বদ্ভক্তেষু বিশেষতঃ .
অদ্য মে সফলং জন্ম ভবত্সন্দর্শনাদভূত্ .. ৪৩..
অদ্য মে ঋতবঃ সর্বে বভূবুঃ সফলাঃ প্রভো .
দীর্ঘকালং মযা তপ্তমনন্যমতিনা তপঃ .
তস্যেহ তপসো রাম ফলং তব যদর্চনম্ . ৪৪..
সদা মে সীতযা সার্ধং হৃদযে বস রাঘব .
গচ্ছতস্তিষ্ঠতো বাপি স্মৃতিঃ স্যান্মে সদা ত্বযি .. ৪৫..
ইতি স্তুত্বা রমানাথমগস্ত্যো মুনিসত্তমঃ .
দদৌ চাপং মহেন্দ্রেণ রামার্থে স্থাপিতং পুরা .. ৪৬..
অক্ষয্যৌ বাণতূণীরৌ খড্গো রত্নভূষিতঃ .
জহি রাঘব ভূভারভূতং রাক্ষসমণ্ডলম্ .
যদর্থমবতীর্ণোঽসি মাযযা মনুজাকৃতিঃ .. ৪৭..
ইতো যোজনযুগ্মে তু পুণ্যকাননমণ্ডিতঃ .
অস্তি পঞ্চবটীনাম্না আশ্রমো গৌতমীতটে .
নেতব্যস্তত্র তে কালঃ শেষো রঘুকুলোদ্বহ .. ৪৮..
তত্রৈব বহুকার্যাণি দেবানাং কুরু সত্পতে .. ৪৯..
শ্রুত্বা তদাগস্ত্যসুভাষিতং বচঃ
      স্তোত্রম্ চ তত্ত্বার্থসমন্বিতং বিভুঃ .
মুনিং সমাভাষ্য মুদান্বিতো যযৌ
      প্রদর্শিতং মার্গমশেষবিদ্ধরিঃ .. ৫০..
ইতি শ্রীমদধ্যাত্মরামযণে উমামহেশ্বরসংবাদে
   অরণ্যকাণ্ডে তৃতীযঃ সর্গঃ .. ৩..