অধ্যাত্ম রামাযণ ৩ – অরণ্যকাণ্ডম্

      .. অধ্যাত্ম রামাযণম্ ..
       .. অরণ্য কাণ্ডঃ ..
       .. দ্বিতীযঃ সর্গঃ ..
          শ্রীমহাদেব উবাচ
বিরাধে স্বর্গতে রামো লক্ষ্মণেন চ সীতযা .
জগাম শরভঙ্গস্য বনং সর্বসুখাবহম্ .. ১..
শরভঙ্গস্ততো দৃষ্ট্বা রামং সৌমিত্রিণা সহ .
আযান্তং সীতযা সার্ধং সম্ভ্রমাদুত্থিতঃ সুধীঃ .. ২..
অভিগম্য সুসম্পূজ্য বিষ্টরেষূপবেশযত্ .
আতিথ্যমকরোত্তেষাং কন্দমূলফলাদিভিঃ .. ৩..
প্রীত্যাহ শরভঙ্গোঽপি রামং ভক্তিপরাযণম্ .
বহুকালমিহৈবাসং তপসে কৃতনিশ্চযঃ .. ৪..
অদ্য মত্তপসা সিদ্ধং যত্পুণ্যং বহু বিদ্যতে .
তত্সর্বং তব দাস্যামি ততো মুক্তিং ব্রজাম্যহং .. ৫..
সমর্প্য রামস্য মহত্সুপুণ্যফলং
               বিরক্তঃ শরভঙ্গযোগী .
চিতিং সমারোহযদপ্রমেযং রামং
               সসীতং সহসা প্রণম্য .. ৬..
ধ্যাযংশ্চিরং রামমশেষহৃত্স্থং
               দূর্বাদলশ্যামলমম্বুজাক্ষম্ .
চীরাম্বরং স্নিগ্ধজটাকলাপং
               সীতাসহাযং সহলক্ষ্মণং তম্ .. ৭..
কো বা দযালুঃ স্মৃতকামধেনুরন্যো
               জগত্যাং রঘুনাযকাদহো .
স্মৃতো মযা নিত্যমনন্যভাজা
               জ্ঞাত্বা স্মৃতিং মে স্বযমেব যাতঃ .. ৮..
পশ্যত্বিদানীং দেবেশো রামো দাশরথিঃ প্রভুঃ .
দগ্ধ্বা স্বদেহং গচ্ছামি ব্রহ্মলোকমকল্মষঃ .. ৯..
অযোধ্যাধিপতির্মেঽস্তু হৃদযে রাঘবঃ সদা .
যদ্বামাঙ্কে স্থিতা সীতা মেঘস্যেব তটিল্লতা .. ১০..
ইতি রামং চিরং ধ্যাত্বা দৃষ্ট্বা চ পুরতঃ স্থিতম্ .
প্রজ্বাল্য সহসা বহ্নিং দগ্ধ্বা পঞ্চাত্মকং বপুঃ .. ১১..
দিব্যদেহধরঃ সাক্ষাদ্যযৌ লোকপতেঃ পদম্ .
ততো মুনিগণাঃ সর্বে দণ্ডকারণ্যবাসিনঃ .
আজগ্মূ রাঘবং দ্রষ্টুং শরভঙ্গনিবেশনম্ .. ১২..
দৃষ্ট্বা মুনিসমূহং তং জানকীরামলক্ষ্মণাঃ .
প্রণেমুঃ সহসা ভূমৌ মাযামানুষরূপিণঃ ..১৩..
আশীর্ভিরভিনন্দ্যাথ রামং সর্বহৃদি স্থিতম্ .
ঊচুঃ প্রাঞ্জলযঃ সর্বে ধনুর্বাণধরং হরিম্ .. ১৪..
ভূমের্ভারাবতারায জাতোঽসি ব্রহ্মণার্থিতঃ .
জানীমস্ত্বাং হরিং লক্ষ্মীং জানকীং লক্ষ্মণং তথা .. ১৫..
শেষাংশং শঙ্খচক্রে দ্বে ভরতং সানুজং তথা .
অতশ্চাদৌ ঋষীণাং ত্বং দুঃখং ভোক্তুমিহার্হসি .. ১৬..
আগছ যামো মুনিসেবিতানি
               বনানি সর্বাণি রঘূত্তম ক্রমাত্ .
দ্রষ্টুং সুমিত্রাসুতজানকীভ্যাং
               তদা দযাস্মাসু দৃঢা ভবিষ্যতি .. ১৭..
ইতি বিজ্ঞাপিতো রামঃ কৃতাঞ্জলিপুটৈর্বিভুঃ .
জগাম মুনিভিঃ সার্থং দ্রষ্টুং মুনিবনানি সঃ .. ১৮..
দদর্শ তত্র পতিতান্যনেকানি শরাংসি সঃ .
অস্থিভূতানি সর্বত্র রামো বচনমব্রবীত্ .. ১৯..
অস্থীনি কেষামেতানি কিমর্থং পতিতানি বৈ .
তমূচুর্মুনযো রাম ঋণীণাং মস্তকানি হি .. ২০..
রাক্ষসৈর্ভক্ষিতানীশ প্রমত্তানাং সমাধিতঃ ..
অন্তরাযং মুনীনাং তে পশ্যন্তোঽনুচরন্তি হি .. ২১..
শ্রুত্বা বাক্যং মুনীনাং স ভযদৈন্যসমন্বিতম্ .
প্রতিজ্ঞামকরোদ্রামো বধাযাশেষরক্ষসাম্ .. ২২..
পূজ্যমানঃ সদা তত্র মুনিভির্বনবাসিভিঃ .
জানক্যা সহিতো রামো লক্ষ্মণেন সমন্বিতঃ .. ২৩..
উবাস কতিচিত্তত্র বর্ষাণি রঘুনন্দনঃ .
এবং ক্রমেণ সংপশ্যন্নৃষীণামাশ্রমান্বিভুঃ .. ২৪..
সুতীক্ষ্ণস্যাশ্রমং প্রাগাত্প্রখ্যাতমৃষিসঙ্কুলম্ .
সর্বর্তুগুণসম্পন্নং সর্বকালসুখাবহম্ .. ২৫..
রামমাগতমাকর্ণ্য সুতীক্ষ্ণঃ স্বযমাগতঃ .
অগস্ত্যশিষ্যো রামস্য  মন্ত্রোপাসনতত্পরঃ .
বিধিবত্পূজযামাস ভক্ত্যুত্কণ্ঠিতলোচনঃ .. ২৬..
               সুতীক্ষ্ণ উবাচ
ত্বন্মন্ত্রজাপ্যহমনন্তগুণাপ্রমেয
               সীতাপতে শিববিরিঞ্চিসমাশ্রিতাঙ্ঘ্রে .
সংসারসিন্ধুতরণামলপোতপাদ
               রামাভিরাম সততং তব দাসদাসঃ .. ২৭..
মামদ্য সর্বজগতামবিগোচরস্ত্বং
               ত্বন্মাযযা সুতকলত্রগৃহান্ধকূপে .
মগ্নং নিরীক্ষ্য মলপুদ্গলপিণ্ডমোহ
               পাশানুবদ্ধহৃদযং স্বযমাগতোঽসি .. ২৮..
ত্বং সর্বভূতহৃদযেষু কৃতালযোপি
               ত্বন্মন্ত্রজাপ্যবিমুখেষু তনোষি মাযাম্ .
ত্বন্মন্ত্রসাধনপরেষ্বপযাতি মাযা
               সেবানুরূপফলদোঽসি যথা মহীপঃ .. ২৯..
বিশ্বস্য সৃষ্টিলযসংস্থিতিহেতুরেকঃ
               ত্বং মাযযা ত্রিগুণযা বিধিরীশবিষ্ণূ .
ভাসীশ মোহিতধিযাং বিবিধাকৃতিস্ত্বং
               যদ্বদ্রবিঃ সলিলপাত্রগতো হ্যনেকঃ .. ৩০..
প্রত্যক্ষতোঽদ্য ভবতশ্চরণারবিন্দং
               পশ্যামি রাম তমসঃ পরতঃ স্থিতস্য .
দৃগ্রূপতস্বমসতামবিগোচরোঽপি
               ত্বন্মন্ত্রপূতহৃদযেষু সদা প্রসন্নঃ .. ৩১..
পশ্যামি রাম তব রূপমরূপিণোঽপি
               মাযাবিডম্বনকৃতং সুমনুষ্যবেষং .
কন্দর্পকোটিসুভগং কমনীযচাপবাণং
               দযার্দ্রহৃদযং স্মিতচারুবক্ত্রং .. ৩২..
সীতাসমেতমজিনাম্বরমপ্রধৃষ্যং
               সৌমিত্রিণা নিযতসেবিতপাদপদ্মং .
নীলোত্পলদ্যুতিমনন্তগুণং প্রশান্তং
               মদ্ভাগধেযমনিশং প্রণমামি রামং .. ৩৩..
জানন্তু রাম তব রূপমশেষদেশ
               কালাদ্যুপাধিরহিতং ঘনচিত্প্রকাশং .
প্রত্যক্ষতোঽদ্য মম গোচরমেতদেব
               রূপং বিভাতু হৃদযে ন পরং বিকাঙ্ক্ষে .. ৩৪..
ইত্যেবং স্তুবস্তস্য রামঃ সুস্মিতমব্রবীত্ .
মুনে জানামি তে চিত্তং নির্মলং মদুপাসনাত্ .. ৩৫..
অতোঽহমাগতো দ্রষ্টুং মদৃতে নান্য সাধনং .
মন্মন্ত্রোপাসকা লোকে মামেব শরণং গতাঃ .. ৩৬..
নিরপেক্ষানান্যগতাস্তেষাং দৃশ্যোঽহমন্বহং .
স্তোত্রমেতত্পঠেদ্যস্তু ত্বত্কৃতং মত্প্রিযং সদা .. ৩৭..
সদ্ভক্তির্মে ভবেত্তস্য জ্ঞানং চ বিমলং ভবেত্ .
ত্বং মামোপাসনাদেব বিমুক্তোঽসীহ সর্বতঃ .. ৩৮..
দেহান্তে মম সাযুজ্যং লপ্স্যসে নাত্র সংশযঃ .
গুরুং তে দ্রষ্টুমিচ্ছামি হ্যগস্ত্যং মুনিনাযকং .
কিঞ্চিত্কালং তত্র বস্তুং মনো মে ত্বরযত্যলং .. ৩৯..
সুতীক্ষ্ণোঽপি তথেত্যাহ শ্বো গমিষ্যসি রাঘব .
অহমপ্যাগমিষ্যামি চিরাদ্ দৃষ্টো মহামুনিঃ .. ৪০..
অথ প্রভাতে মুনিনা সমেতো
               রামঃ সসীতঃ সহ লক্ষ্মণেন .
অগস্ত্যসম্ভাষণলোলমানসঃ
               শনৈরগস্ত্যানুজমন্দিরং যযৌ .. ৪১..
ইতি শ্রীমদধ্যাত্মরামাযণে উমামহেশ্বরসংবাদে
   অরণ্যকাণ্ডে দ্বিতীযঃ সর্গঃ .. ২..