অধ্যাত্ম রামাযণ ৩ – অরণ্যকাণ্ডম্

      .. অধ্যাত্ম রামাযণম্ ..
       .. অরণ্য কাণ্ডঃ ..
       .. দশমঃ সর্গঃ ..
        শ্রীমহাদেব উবাচ
লব্ধ্বা বরং স গন্ধর্বঃ প্রযাস্যন্ রামমব্রবীত্ .
শবর্যাস্তে পুরোভাগে আশ্রমে রঘুনন্দন .. ১..
ভক্ত্যা ত্বত্পাদকমলে ভক্তিমার্গবিশারদা .
তাং প্রযাহি মহাভাগ সর্বং তে কথযিষ্যতি .. ২..
ইত্যুক্ত্বা প্রযযৌ সোঽপি বিমানেনার্কবর্চসা .
বিষ্ণোঃ পদং রামনামস্মরণে ফলমীদৃশম্ .. ৩..
ত্যক্ত্বা তদ্বিপিনং ঘোরং সিংহব্যাঘ্রাদিদূষিতম্ .
শনৈরথাশ্রমপদং শবর্যা রঘুনন্দনঃ .. ৪..
শবরী রামমালোক্য লক্ষ্মণেন সমন্বিতম্ .
আযান্তমারাদ্ধর্ষেণ প্রত্যুত্থাযাচিরেণ সা .. ৫..
পতিত্বা পাদযোরাগ্রে হর্ষপূর্ণাশ্রুলোচনা .
স্বাগতেনাভিনন্দ্যাথ স্বাসনে সংন্যবেশযত্ .. ৬..
রামলক্ষ্মণযোঃ সম্যক্পাদৌ প্রক্ষাল্য ভক্তিতঃ .
তজ্জলেনাভিষিচ্যাঙ্গমথার্ঘ্যাদিভিরাদৃতা .. ৭..
সম্পূজ্য বিধিবদ্রামং সসৌমিত্রিং সপর্যযা .
সঙ্গৃহীতানি দিব্যানি রামার্থং শবরী মুদা .. ৮..
ফলান্যমৃতকল্পানি দদৌ রামায ভক্তিতঃ .
পাদৌ সম্পূজ্য কুসুমৈঃ সুগন্ধৈঃ সানুলেপনৈঃ .. ৯..
কৃতাতিথ্যং রঘুশ্রেষ্ঠমুপবিষ্টং সহানুজম্ .
শবরী ভক্তিসম্পন্না প্রাঞ্জলির্বাক্যমব্রবীত্ .. ১০..
অত্রাশ্রমে রঘুশ্রেষ্ঠ গুরবো মে মহর্ষযঃ .
স্থিতাঃ শুশ্রূষণং তেষাং কুর্বতী সমুপস্থিতা .. ১১..
বহুবর্ষসহস্রাণি গতাস্তে ব্রহ্মণঃ পদম্ .
গমিষ্যন্তোঽব্রুবন্মাং ত্বং বসাত্রৈব সমাহিতা .. ১২..
রামো দাশরথির্জাতঃ পরমাত্মা সনাতনঃ .
রাক্ষসানাং বধার্থায ঋষীণাং রক্ষণায চ .. ১৩..
আগমিষ্যতি চৈকাগ্রধ্যাননিষ্ঠা স্থিরা ভব .
ইদানীং চিত্রকূটাদ্রাবাশ্রমে বসতি প্রভুঃ .. ১৪..
যাবদাগমনং তস্য তাবদ্রক্ষ কলেবরম্ .
দৃষ্ট্বৈব রাঘবং দগ্ধ্বা দেহং যাস্যসি তত্পদম্ .. ১৫..
তথৈবাকরবং রাম ত্বদ্ধ্যানৈকপরাযণা .
প্রতীক্ষ্যাগমনং তেঽদ্য সফলং গুরুভাষিতম্ .. ১৬..
তব সন্দর্শনং রাম গুরূণামপি মে ন হি .
যোষিন্মূঢাপ্রমেযাত্মন্ হীনজাতিসমুদ্ভবা .. ১৭..
তব দাসস্য দাসানাং শতশঙ্ঘ্যোত্তরস্য বা .
দাসীত্বে নাধিকারোঽস্তি কুতঃ সাক্ষাত্তবেব হি .. ১৮..
কথং রামাদ্য মে দৃষ্টস্ত্বং মনোবাগগোচরঃ .
স্তোতুং ন জানে দেবেশ কিং করোমি প্রসীদ মে .. ১৯..
            শ্রীরাম উবাচ
পুংস্ত্বে স্ত্রীত্বে বিশেষো বা জাতিনামাশ্রমাদযঃ .
ন কারণং মদ্ভজনে ভক্তিরেব হি কারণম্ .. ২০..
যজ্ঞদানতপোভির্বা বেদাধ্যযনকর্মভিঃ .
নৈব দ্রষ্টুমহং শক্যো মদ্ভক্তিবিমুখৈঃ সদা .. ২১..
তস্মাদ্ভামিনি সঙ্ক্ষেপাদ্বক্ষ্যেঽহং ভক্তিসাধনম্ .. ২২..
সতাং সঙ্গতিরেবাত্র সাধনং প্রথমং স্মৃতম্ .
দ্বিতীযং মত্কথালাপস্তৃতীযং মদ্গুণেরণম্ .
ব্যাখ্যাতৃত্বং মদ্বচসাং চতুর্থং সাধনং ভবেত্ .. ২৩..
আচার্যোপাসনং ভদ্রে মদ্বুদ্ধ্যামাযযা সদা .
পঞ্চমং পুণ্যশীলত্বং যমাদি নিযমাদি চ .. ২৪..
নিষ্ঠা মত্পূজনে নিত্যং ষষ্ঠং সাধনমীরিতম্ .
মম মন্ত্রোপাসকত্বং সাঙ্গং সপ্তমমুচ্যতে .. ২৫..
মদ্ভক্তেষ্বধিকা পূজা সর্বভূতেষু মন্মতিঃ .
বাহ্যার্থেষু বিরাগিত্বং শমাদিসহিতং তথা .. ২৬..
অষ্টমং নবমং তত্ত্ববিচারো মম ভামিনি .
এবং নববিধা ভক্তিঃ সাধনং যস্য কস্য বা .. ২৭..
স্ত্রিযো বা পুরুষস্যাপি তির্যগ্যোনিগতস্য বা .
ভক্তিঃ সঞ্জাযতে প্রেমলক্ষণা শুভলক্ষণে .. ২৮..
ভক্তৌ সঞ্জাতমাত্রাযাং মত্তস্বানুভবস্তদা .
মমানুভবসিদ্ধস্য মুক্তিস্তত্রৈব জন্মনি .. ২৯..
স্যাত্তস্মাত্কারণং ভক্তির্মোক্ষস্যেতি সুনিশ্চিতম্ .
প্রথমং সাধনং যস্য ভবেত্তস্য ক্রমেণ তু .. ৩০..
ভবেত্সর্বং ততো ভক্তির্মুক্তিরেব সুনিশ্চিতম্ .
যস্মান্মদ্ভক্তিযুক্তা ত্বং ততোঽহং ত্বামুপস্থিতঃ .. ৩১..
ইতো মদ্দর্শনান্মুক্তিস্তব নাস্ত্যত্র সংশযঃ .
যদি জানাসি মে ব্রূহি সীতা কমললোচনা .. ৩২..
কুত্রাস্তে কেন বা নীতা প্রিযা মে প্রিযদর্শনা .. ৩৩..
            শবর্যুবাচ
দেব জানাসি সর্বজ্ঞ সর্বং ত্বং বিশ্বভাবন .
তথাপি পৃচ্ছসি যন্মাং লোকাননুসৃতঃ প্রভো .. ৩৪..
ততোঽহমভিধাস্যামি সীতা যত্রাধুনা স্থিতা .
রাবণেন হৃতা সীতা লঙ্কাযাং বর্ততেঽধুনা .. ৩৫..
ইতঃ সমীপে রামাস্তে পম্পানাম সরোবরম্ .
ঋষ্যমূকগিরির্নাম তত্সমীপে মহানগঃ .. ৩৬..
চতুর্ভির্মন্ত্রিভিঃ সার্ধং সুগ্রীবো বানরাধিপঃ .
ভীতভীতঃ সদা যত্র তিষ্ঠত্যতুলবিক্রমঃ .. ৩৭..
বালিনশ্চ ভযাদ্ ভ্রাতুস্তদগম্যমৃষের্ভযাত্ .
বালিনস্তত্র গচ্ছ ত্বং তেন সখ্যং কুরু প্রভো .. ৩৮..
সুগ্রীবেণ স সর্বং তে কার্যং সম্পাদযিষ্যতি .
অহমগ্নিং প্রবেক্ষ্যামি তবাগ্রে রঘুনন্দন .. ৩৯..
মুহূর্তং তিষ্ঠ রাজেন্দ্র যাবদ্দগ্ধ্বা কলেবরম্ .
যাস্যামি ভগবন্ রাম তব বিষ্ণোঃ পরং পদম্ .. ৪০..
ইতি রামং সমামন্ত্র্য প্রবিবেশ হুতাশনম্ .
ক্ষণান্নির্ধূয সকলমবিদ্যাকৃতবন্ধনম্ .
রামপ্রসাদাচ্ছবরী মোক্ষং প্রাপাতিদুর্লভম্ .. ৪১..
কিং দুর্লভং জগন্নাথে শ্রীরামে ভক্তবত্সলে .
প্রসন্নেঽধমজন্মাপি শবরী মুক্তিমাপ সা .. ৪২..
কিং পুনর্ব্রহ্মণা মুখ্যাঃ পুণ্যাঃ শ্রীরামচিন্তকাঃ .
মুক্তিং যান্তীতি তদ্ভক্তির্মুক্তিরেব ন সংশযঃ .. ৪৩..
ভক্তির্মুক্তিবিধাযিনী ভগবতঃ শ্রীরামচন্দ্রস্য হে
লোকাঃ কামদুঘাঙ্ঘ্রিপদ্মযুগলং সেবধ্বমত্যুত্সুকাঃ .
নানাজ্ঞানবিশেষমন্ত্রবিততিং ত্যক্ত্বা সুদূরে ভৃশং
রামং শ্যামতনুং স্মরারিহৃদযে ভান্তং ভজধ্বং বুধাঃ .. ৪৪..
ইতি শ্রীমদধ্যাত্মরামযণে উমামহেশ্বরসংবাদে
   অরণ্যকাণ্ডে দশমঃ সর্গঃ .. ১০..