অধ্যাত্ম রামাযণ ৩ – অরণ্যকাণ্ডম্

.. অধ্যাত্মরামাযণে অরণ্যকাণ্ডম্ ..

       .. প্রথমঃ সর্গঃ ..
          শ্রীমহাদেব উবাচ
অথ তত্র দিনং স্থিত্বা প্রভাতে রঘুনন্দনঃ .
স্নাত্বা মুনিং সমামংত্র্য প্রযাণাযোপচক্রমে .. ১..
মুনে গচ্ছামহে সর্বে মুনিমণ্ডলমণ্ডিতম্ .
বিপিনং দণ্ডকং যত্র ত্বমাজ্ঞাতুমিহার্হসি .. ২..
মার্গপ্রদর্শনার্থায শিষ্যানাজ্ঞপ্তুমর্হসি .
শ্রুত্বা রামস্য বচনং প্রহস্যাত্রির্মহাযশাঃ .
প্রাহ তত্র রঘুশ্রেষ্ঠং রাম রাম সুরাশ্রয .. ৩..
সর্বস্য মার্গদ্রষ্টা ত্বং তব কো মার্গদর্শকঃ .
তথাপি দর্শযিষ্যন্তি তব লোকানুসারিণঃ .. ৪..
ইতি শিষ্যান্সমাদিশ্য স্বযং কিংচিত্তমন্বগাত্ .
রামেণ বারিতঃ প্রীত্যা অত্রিঃ স্বভবনং যযৌ .. ৫..
ক্রোশমাত্রং ততো গত্বা দদর্শ মহতীং নদীং .
অত্রেঃ শিষ্যানুবাচেদং রামো রাজীবলোচনঃ .. ৬..
নদ্যাঃ সন্তরণে কশ্চিদুপাযো বিদ্যতে ন বা .
ঊচুস্তে বিদ্যতে নৌকা সুদৃঢা রঘুনন্দন .. ৭..
তারযিষ্যামহে যুষ্মান্বযমেব ক্ষণাদিহ .
ততো নাবি সমারোপ্য সীতাং রাঘবলক্ষ্মণৌ .. ৮..
ক্ষণাত্সন্তারযামাসুর্নদীং মুনিকুমারকাঃ .
রামাভিনন্দিতাঃ সর্বে জগ্মুরত্রেরথাশ্রমম্ .. ৯..
তাবেত্য বিপিনং ঘোরং ঝিল্লীঝঙ্কারনাদিতম্ .
নানামৃগগণাকীর্ণং সিংহব্যাঘ্রাদিভীষণম্ .. ১০..
রাক্ষসৈর্ঘোররূপৈশ্চ সেবিতং রোমহর্ষণম্ .
প্রবিশ্য বিপিনং ঘোরং রামো লক্ষ্মণমব্রবীত্ .. ১১..
ইতঃ পরং প্রযত্নেন গন্তব্যং সহিতেন মে .
ধনুর্গুণেন সংযোজ্য শরানপি করে দধত্ .. ১২..
অগ্রে যাস্যাম্যহং পশ্চাত্ত্বমন্বেহি ধনুর্ধর .
আবযোর্মধ্যগা সীতা মাযেবাত্মপরাত্মনোঃ .. ১৩..
চক্ষুশ্চারয সর্বত্র দৃষ্টং রক্ষোভযং মহত্ .
বিদ্যতে দণ্ডকারণ্যে শ্রুতপূর্বমরিন্দম .. ১৪..
ইত্যেবং ভাষমাণৌ তৌ জগ্মতুঃ সার্ধযোজনম্ .
তত্রৈকা পুষ্করিণ্যাস্তে কহ্লারকুমুদোত্পলৈঃ .. ১৫..
অম্বুজৈঃ শীতলোদেন শোভমানা ব্যদৃশ্যত .
তত্সমীপমথো গত্বা পীত্বা তত্সলিলং শুভম্ .. ১৬..
ঊষুস্তে সলিলাভ্যাসে ক্ষণং ছাযামুপাশ্রিতাঃ .
ততো দদৃশুরাযান্তং মহাসত্ত্বং ভযানকম্ .. ১৭..
করালদংষ্ট্রবদনং ভীষযন্তং স্বগর্জিতৈঃ .
বামাংসে ন্যস্তশূলাগ্রগ্রথিতানেকমানুষম্ .. ১৮..
ভক্ষযন্তং গজব্যাঘ্রমহিষং বনগোচরম্ .
জ্যারোপিতং ধনুর্ধৃত্বা রামো লক্ষ্মণমব্রবীত্ .. ১৯..
পশ্য ভ্রাতর্মহাকাযো রাক্ষসোঽযমুপাগতঃ .
আযাত্যভিমুখং নোঽগ্রে ভীরূণাং ভযমাবহন্ .. ২০..
সজ্জীকৃতধনুস্তিষ্ঠ মা ভৈর্জনকনন্দিনি .
ইত্যুক্ত্বা বাণমাদায স্থিতো রাম ইবাচলঃ .. ২১..
স তু দৃষ্ট্বা রমানাথং লক্ষ্মণং জানকীং তদা .
অট্টহাসং ততঃ কৃত্বা ভীষযন্নিদমব্রবীত্ .. ২২..
কৌ যুবাং বাণতূণীরজটাবল্কলধারিণৌ .
মুনিবেষধরৌ বালৌ স্ত্রীসহাযৌ সুদুর্মদৌ .. ২৩..
সুন্দরৌ বত মে বক্ত্রপ্রবিষ্টকবলোপমৌ .
কিমর্থমাগতৌ ঘোরং বনং ব্যালনিষেবিতম্ .. ২৪..
শ্রুত্বা রক্ষোবচো রামঃ স্মযমান উবাচ তম্ .
অহং রামস্ত্বযং ভ্রাতা লক্ষ্মণো মম সম্মতঃ .. ২৫..
এষা সীতা মম প্রাণবল্লভা বযমাগতাঃ .
পিতৃবাক্যং পুরস্কৃত্য শিক্ষণার্থং ভবাদৃশাম্ .. ২৬..
শ্রৃত্বা তদ্রামবচনমট্টহাসমথাকরোত্ .
ব্যাদায বক্ত্রং বাহুভ্যাং শূলমাদায সত্বরঃ .. ২৭..
মাং ন জানাসি রাম ত্বং বিরাধং লোকবিশ্রুতম্ .
মদ্ভযান্মুনযঃ সর্বে ত্যক্ত্বা বনমিতো গতাঃ .. ২৮..
যদি জীবিতুমিচ্ছাস্তি ত্যক্ত্বা সীতাং নিরাযুধৌ .
পলাযত ন চেচ্ছীঘ্রং ভক্ষযামি যুবামহম্ .. ২৯..
ইত্যুক্ত্বা রাক্ষসঃ সীতামাদাতুমভিদুদ্রুবে .
রামশ্চিচ্ছেদ তদ্বাহূ শরেণ প্রহসন্নিব .. ৩০..
ততঃ ক্রোধপরীতাত্মা ব্যাদায বিকটং মুখম্ .
রামমভ্যদ্রবদ্রামশ্চিচ্ছেদ পরিধাবতঃ .. ৩১..
পদদ্ব্যযং বিরাধস্য তদদ্ভুতমিবাভবত্ .. ৩২..
ততঃ সর্প ইবাস্যেন গ্রসিতুং রামমাপতত্ .
ততোঽর্ধচন্দ্রাকারেণ বাণেনাস্য মহচ্ছিরঃ .. ৩৩..
চিচ্ছেদ রুধিরৌঘেণ পপাত ধরণীতলে .
ততঃ সীতা সমালিঙ্গ্য প্রশশংস রঘূত্তমম্ .. ৩৪..
ততো দুন্দুভযো নেদুর্দিবি দেবগণেরিতাঃ .
ননৃতুশ্চাপ্সরা হৃষ্টা জগুর্গন্ধর্বকিন্নরাঃ .. ৩৫..
বিরাধকাযাদতিসুন্দরাকৃতিঃ
               বিভ্রাজমানো বিমলাম্বরাবৃতঃ .
প্রতপ্তচামীকরচারুভূষণো ব্যদৃশ্যতাগ্রে
               গগনে রবির্যথা .. ৩৬..
প্রণম্য রামং প্রণতার্তিহারিণং
               ভবপ্রবাহোপরমং ঘৃণাকরম্ .
প্রণম্য ভূযঃ প্রণনাম দণ্ডবত্
               প্রপন্নসর্বার্তিহরং প্রসন্নধীঃ .. ৩৭..
               বিরাধ উবাচ
শ্রীরাম রাজীবদলাযতাক্ষ
               বিদ্যাধরোঽহং বিমলপ্রকাশঃ .
দুর্বাসসাকারণকোপমূর্তিনা শপ্তঃ
               পুরা সোঽদ্য বিমোচিতস্ত্বযা .. ৩৮..
ইতঃ পরং ত্বচ্চরণারবিন্দযোঃ
               স্মৃতিঃ সদা মেঽস্তু ভবোপশান্তযে .
ত্বন্নামসঙ্কীর্তনমেব বাণী
               করোতু মে কর্ণপুটং ত্বদীযম্ .. ৩৯..
কথামৃতং পাতু করদ্বযং তে
               পাদারবিন্দার্চনমেব কুর্যাত্ .
শিরশ্চ তে পাদযুগপ্রণামং
               করোতু নিত্যং ভবদীযমেবম্ .. ৪০..
নমস্তুভ্যং ভগবতে বিশুদ্ধজ্ঞানমূর্তযে .
আত্মারামায রামায সীতারামায বেধসে .. ৪১..
প্রপন্নং পাহি মাং রাম যাস্যামি ত্বদনুজ্ঞযা .
দেবলোকং রঘুশ্রেষ্ঠ মাযা মাং মা বৃণোতু তে .. ৪২..
ইতি বিজ্ঞাপিতস্তেন প্রসন্নো রঘুনন্দনঃ .
দদৌ বরং তদা প্রীতো বিরাধায মহামতিঃ .. ৪৩..
গচ্ছ বিদ্যাধরাশেষমাযাদোষগুণা জিতাঃ .
ত্বযা মদ্দর্শনাত্সদ্যো মুক্তো জ্ঞানবতাং বরঃ .. ৪৪..
মদ্ভক্তিদুর্লভা লোকে জাতা চেন্মুক্তিদা যতঃ .
অতস্ত্বং ভক্তিসম্পন্নঃ পরং যাহি মমাজ্ঞযা .. ৪৫..
রামেণ রক্ষোনিধনং সুঘোরং
               শাপাদ্বিমুক্তির্বরদানমেবম্ .
বিদ্যাধরত্বং পুনরেব লব্ধং
               রামং গৃণন্নেতি নরোঽখিলার্থান্ .. ৪৬..
ইতি শ্রীমদধ্যাত্মরামাযণে উমামহেশ্বরসংবাদে
   অরণ্যকাণ্ডে প্রথমঃ সর্গঃ .. ১..