অধ্যাত্ম রামাযণ ২ – অযোধ্যাকাণ্ডম্

      .. অধ্যাত্ম রামাযণম্ ..
       .. অযোধ্যা কাণ্ডঃ ..
       .. নবমঃ সর্গঃ ..
অথ গত্বাঽঽশ্রমপদসমীপং ভরতো মুদা .
সীতারামপদৈর্যুক্তং পবিত্রমতিশোভনম্ .. ১..
স তত্র বজ্রাঙ্কুশবারিজাঞ্চিত
        ধ্বজাদিচিহ্নানি পদানি সর্বতঃ .
দদর্শ রামস্য ভুবোঽতিমঙ্গলানি
        অচেষ্টযত্পাদরজঃসু সানুজঃ .. ২..
অহো সুধ্ন্যোঽহমমূনি
        রামপাদারবিন্দাঙ্কিতভূতলানি .
পশ্যামি যত্পাদরজো বিমৃগ্যং
        ব্রহ্মাদিদেবৈঃ শ্রুতিভিশ্চ নিত্যম্ .. ৩..
ইত্যদ্ভুতপ্রেমরসাপ্লুতাশযো
        বিগাঢচেতা রঘুনাথভাবনে .
আনন্দজাশ্রুস্নপিতস্তনান্তরঃ
        শনৈরবাপাশ্রমসন্নিধিং হরেঃ .. ৪..
স তত্র দৃষ্ট্বা রঘুনাথমাস্থিতং
        দূর্বাদলশ্যামলমাযতেক্ষণম্ .
জটাকিরীটং নববল্কলাম্বরং
        প্রসন্নবক্ত্রং তরুণারুণদ্যুতিম্ .. ৫..
বিলোকযন্তং জনকাত্মজাং শুভাং
        সৌমিত্রিণা সেবিতপাদপঙ্কজম্ .
তদাভিদুদ্রাব রঘূত্তমং শুচা
        হর্ষাচ্চ তত্পাদযুগং ত্বরাগ্রহীত্ .. ৬..
রামস্তমাকৃষ্য সুদীর্ঘবাহুর্দোর্ভ্যাং
        পরিষ্বজ্য সিষিঞ্চ নেত্রজৈঃ .
জলৈরথাঙ্কোপরি সংন্যবেশযত্
        পুনঃ পুনঃ সংপরিষস্বজে বিভুঃ .. ৭..
অথ তা মাতরঃ সর্বাঃ সমাজগ্মুস্ত্বরান্বিতাঃ .
রাঘবং দ্রষ্টুকামাস্তাস্তৃষার্তা গৌর্যথা জলম্ .. ৮..
রামঃ স্বমাতরং বীক্ষ্য দ্রুতমুত্থায পাদযোঃ .
ববন্দে সাশ্রু সা পুত্রমালিঙ্গ্যাতীব দুঃখিতা .. ৯..
ইতরাশ্চ তথা নত্বা জননী রঘুনন্দনঃ .
ততঃ সমাগতং দৃষ্ট্বা বসিষ্ঠং মুনিপুঙ্গবম্ .. ১০..
সাষ্টাঙ্গং প্রণিপত্যাহ ধন্যোঽস্মীতি পুনঃ পুনঃ .
যথার্হমুপবেশ্যাহ সর্বানেব রঘূদ্বহঃ .. ১১..
পিতা মে কুশলী কিং বা মাং কিমাহাতিদুঃখিতঃ .
বসিষ্ঠস্তমুবাচেদং পিতা তে রঘুনন্দন .. ১২..
ত্বদ্বিযোগাভিতপ্তাত্মা ত্বামেব পরিচিন্তযন্ .
রামরামেতি সীতেতি লক্ষ্মণেতি মমার হ .. ১৩..
শ্রুত্বা তত্কর্ণশূলাভং গুরোর্বচনমঞ্জসা .
হা হতোঽস্মীতি পতিতো রুদন্ রামঃ সলক্ষ্মণঃ .. ১৪..
ততোঽনুরুরুদুঃ সর্বা মাতরশ্চ তথাপরে .
হা তাত মাং পরিত্যজ্য ক্ব গতাঽসি ঘণাকর .. ১৫..
অনাথোঽস্মি মহাবাহো মাং কো বা লালযেদিতঃ .
সীতা চ লক্ষ্মণশ্চৈব বিলেপতুরতা ভৃশম্ .. ১৬..
বসিষ্ঠঃ শান্তবচনৈঃ শমযামাস তাং শুচম্ .
ততো মন্দাকিনীং গত্বা স্নাত্বা তে বীতকল্মষাঃ .. ১৭..
রাজ্ঞে দদুর্জলং তত্র সর্বে তে জলকাঙ্ক্ষিণে .
পিণ্ডান্নির্বাপযামাস রামো লক্ষ্মণসংযুতঃ .. ১৮..
ইঙ্গুদীফলপিণ্যাকরচিতান্মধুসম্প্লুতান্ .
বযং যদন্নাঃ পিতরস্তদন্নাঃ স্মৃতিনোদিতাঃ .. ১৯..
ইতি দুখাশ্রু পূর্ণাক্ষঃ পুনঃ স্নাত্বা গৃহং যযৌ .
সর্বে রুদিত্বা সুচিরং স্নাত্বা জগ্মুস্তদাশ্রমম্ .. ২০..
তস্মিংস্তু দিবসে সর্বে উপবাসং প্রচক্রিরে .
ততঃ পরেদ্যুর্বিমলে স্নাত্বা মন্দাকিনীজলে .. ২১..
উপবিষ্টং সমাগম্য ভরতো রামমব্রবীত্ .
রাম রাম মহাভাগ স্বাত্মানমভিষেচয .. ২২..
রাজ্যং পালয পিত্র্যং তে জ্যেষ্ঠস্ত্বং মে পিতা তথা .
ক্ষত্রিযাণামযং ধর্মো যত্প্রজাপরিপালনম্ .. ২৩..
ইষ্ট্বা যজ্ঞৈর্বহুবিধৈঃ পুত্রানুত্পাদ্য তন্তবে .
রাজ্যে পুত্রং সমারোপ্য গমিষ্যসি ততো বনম্ .. ২৪..
ইদানীং বনবাসস্য কালো নৈব প্রসীদ মে .
মাতুর্মে দুষ্কৃতং কিঞ্চিত্স্মর্তুং নার্হসি পাহি নঃ .. ২৫..
ইত্যুক্ত্বা চরণৌ ভ্রাতুঃ শিরস্যাধায ভক্তিতঃ .
রামস্য পুরতঃ সাক্ষাদ্দণ্ডবত্পতিতো ভুবি .. ২৬..
উত্থাপ্য রাঘবঃ শীঘ্রমারোপ্যাঙ্কেঽতিভক্তিতঃ .
উবাচ ভরতং রামঃ স্নেহার্দ্রনযনঃ শনৈঃ .. ২৭..
শৃণু বত্স প্রবক্ষ্যামি ত্বযোক্তং যত্তথৈব তত্ .
কিন্তু মামব্রবীত্তাতো নব বর্ষাণি পঞ্চ চ .. ২৮..
উষিত্বা দণ্ডকারণে পুরং পশ্চাত্সমাবিশ .
ইদানীং ভরতাযেদং রাজ্যং দত্তং মযাখিলম্ .. ২৯..
ততঃ পিত্রৈব সুব্যক্তং রাজ্যং দত্তং তবৈব হি .
দণ্ডকারণ্যরাজ্যং মে দত্তং পিত্রা তথৈব চ .. ৩০..
অতঃ পিতুর্বচঃ কার্যমাবাভ্যামতিযত্নতঃ .
পিতুর্বচনমুল্লঙ্ঘ্য স্বতন্ত্রো যস্তু বর্ততে .. ৩১..
স জীবন্নেব মৃতকো দেহান্তে নিরযং ব্রজেত্ .
তস্মাদ্রাজ্যং প্রশাধি ত্বং বযং দণ্ডকপাকলাঃ .. ৩২..
ভরতস্ত্বব্রবীদ্রামং কামুকো মূঢধীঃ পিতা .
স্ত্রীজিতো ভ্রান্তহৃদয উন্মত্তো যদি বক্ষ্যতি .
তত্সত্যমিতি ন গ্রাহ্যং ভ্রান্তবাক্যং যথা সুধীঃ .. ৩৩..
          শ্রীরাম উবাচ
ন স্ত্রীজিতঃ পিতা ব্রূযান্ন কামী নৈব মূঢধিঃ .
পূর্বং প্রাতিশ্রুতং তস্য সত্যবাদী দদৌ ভযাত্ .. ৩৪..
অসত্যাদ্ভীতিরধিকা মহতাং নরকাদপি .
করোমীত্যহমপ্যেতত্সত্যং তস্যৈ প্রতিশ্রুতম্ .. ৩৫..
কথং বাক্যমহং কুর্যামসত্যং রাঘবো হি সন্ .
ইত্যুদীরিতমাকর্ণ্য রামস্য ভরতোঽব্রবীত্ .. ৩৬..
          শ্রীভরত উবাচ
তথৈব চীরবসনো বনে বত্স্যামি সুব্রতে .
চতুর্দশ সমাস্ত্বং তু রাজ্যং কুরু যথাসুখম্ .. ৩৭..
          শ্রীরাম উবাচ
পিত্রা দত্তং তবৈবৈতদ্রাজ্যং মহ্যং বনং দদৌ .
ব্যত্যযং যদ্যহং কুর্যামসত্যং পূর্ববত্ স্থিতম্ .. ৩৮..
অহমপ্যাগমিষ্যামি সেবে ত্বাং লক্ষ্মণো যথা .
নোচেত্প্রাযোপবেশেন ত্যজাম্যেতত্কলেবরম্ .. ৩৯..
ইত্যেবং নিশ্চযং কৃত্বা দর্ভানাস্তীর্য চাতপে .
মনসাপি বিনিশ্চিত্য প্রাঙ্মুখোপবিবেশ সঃ .. ৪০..
ভরতস্যাপি নির্বন্ধং দৃষ্ট্বা রামোঽতিবিস্মিতঃ .
নেত্রান্তসংজ্ঞাং গুরবে চকার রঘুনন্দনঃ .. ৪১..
একান্তে ভরতং প্রাহ বসিষ্ঠো জ্ঞানিনাং বরঃ .
বত্স গুহ্যং শৃণুষ্বেদং মম বাক্যাত্সুনিশ্চিতম্ .. ৪২..
রামো নারাযণঃ সাক্ষাদ্ ব্রহ্মণা যাচিতঃ পুরা .
রাবণস্য বধার্থায জাতো দশরথাত্মজঃ .. ৪৩..
যোগমাযাপি সীতেতি জাতা জনকনন্দিনী .
শেষোঽপি লক্ষ্মণো জাতো রামমন্বেতি সর্বদা .. ৪৪..
রাবণং হন্তুকামাস্তে গমিষ্যন্তি ন সংশযঃ .
কৈকেয্যা বরদানাদি যদ্যন্নিষ্ঠুরভাষণম্ .. ৪৫..
সর্বং দেবকৃতং নোচেদেবং সা ভাষযেত্কথম্ .
তস্মাত্ত্যজাগ্রহং তাত রামস্য বিনিবর্তনে .. ৪৬..
নিবর্তস্ব মহাসৈন্যৈর্ভ্রাতৃভিঃ সহিতঃ পুরম্ .
রাবণং সকুলং হত্বা শীঘ্রমেবাগমিষ্যতি .. ৪৭..
ইতি শ্রুত্বা গুরোর্বাক্যং ভরতো বিস্মযান্বিতঃ .
গত্বা সমীপং রামস্য বিস্মযোত্ফুল্ললোচনঃ .. ৪৮..
পাদুকে দেহি রাজেন্দ্র রাজ্যায তব পূজিতে .
তযোঃ সেবাং করোম্যেব যাবদাগমনং তবে .. ৪৯..
ইত্যুক্ত্বা পাদুকে দিব্যে যোজযামাস পাদযোঃ .
রামস্য তে দদৌ রামো ভরতাযাতিভক্তিতঃ .. ৫০
গৃহীত্বা পাদুকে দিব্যে ভরতো রত্নভূষিতে .
রামং পুনঃ পরিক্রম্য প্রণনাম পুনঃ পুনঃ .. ৫১..
ভরতঃ পুনরাহেদং ভক্ত্যা গদ্গদযা গিরা .
নবপঞ্চসমান্তে তু প্রথমে দিবসে যদি .. ৫২..
নাগমিষ্যসি চেদ্রাম প্রবিশ্যামি মহানলম্ .
বাঢমিত্যেব তং রামো ভরতং সংন্যবর্তযত্ .. ৫৩..
সসৈন্যঃ সবসিষ্ঠশ্চ শত্রুঘ্নসহিতঃ সুধীঃ .
মাতৃভির্মন্ত্রিভিঃ সার্ধং গমনাযোপচক্রমে .. ৫৪..
কৈকেযী রামমেকান্তে স্রবন্নেত্রজলাকুলা .
প্রাঞ্জলিঃ প্রাহ হে রাম তব রাজ্যবিঘাতনম্ .. ৫৫..
কৃতং মযা দুষ্টধিযা মাযামোহিতচেতসা .
ক্ষমস্ব মম দৌরাত্ম্যং ক্ষমাসারা হি সাধবঃ .. ৫৬..
ত্বং সাক্ষাদ্বিষ্ণুরব্যক্তঃ পরমাত্মা সনাতনঃ .
মাযামানুষরূপেণ মোহযস্যখিলং জগত্ .
ত্বযৈব প্রেরিতো লোকঃ কুরুতে সাধ্বসাধু বা .. ৫৭..
ত্বদধীনমিদং বিশ্বমস্বতন্ত্রং করোতি কিম্ .
যথা কৃত্রিমনর্তক্যো নৃত্যন্তি কুহকেচ্ছযা .. ৫৮..
ত্বদধীনা তথা মাযা নর্তকী বহুরূপিণী .
ত্বযৈব প্রেরিতাহং চ দেবকার্যং করিষ্যতা .. ৫৯..
পাপিষ্ঠং পাপমনসা কর্মাচরমরিন্দম .
অদ্য প্রতীতোঽসি মম দেবানামপ্যগোচরঃ .. ৬০..
পাহি বিশ্বেশ্বরানন্ত জগন্নাথ নমোঽস্তু তে .
ছিন্ধি স্নেহমযং পাশং পুত্রবিত্তাদিগোচরম্ .. ৬১..
ত্বজ্জ্ঞানানলখড্গেন ত্বামহং শরণং গতা .
কৈকেয্যা বচনং শ্রুত্বা রামঃ সস্মিতমব্রবীত্ .. ৬২..
যদাহ মাং মহাভাগে নানৃতং সত্যমেব তত্ .
মযৈব প্রেরিতা বাণী তব বক্ত্রাদ্বিনির্গতা .. ৬৩..
দেবকার্যার্থসিদ্ধ্যর্থমত্র দোষঃ কুতস্তব .
গচ্ছ ত্বং হৃদা মাং নিত্যং ভাবযন্তী দিবানিশম্ .. ৬৪..
সর্বত্র বিগতস্নেহা মদ্ভক্ত্যা মোক্ষ্যসেঽচিরাত্ .
অহং সর্বত্র সমদৃগ্ দ্বেষ্যো বা প্রিয এব বা .. ৬৫..
নাস্তি মে কল্পকস্যেব ভজতোঽনুভজাম্যহম্ .
মন্মাযামোহিতধিযো মামম্ব মনুজাকৃতিম্ .. ৬৬..
সুখদুঃখাদ্যনুগতং জানন্তি ন তু তত্ত্বতঃ .
দিষ্ট্যা মদ্গোচরং জ্ঞানমুত্পন্নং তে ভবাপহম্ .. ৬৭..
স্মরন্তী তিষ্ঠ ভবনে লিপ্যসে ন চ কর্মভিঃ .
ইত্যুক্তা সা পরিক্রম্য রামং সানন্দবিস্মযা .. ৬৮..
প্রণম্য শতশো ভূমৌ যযৌ গেহং মুদান্বিতা .
ভরতস্তু সহামাত্যৈর্মাতৃভির্গুরুণা সহ .. ৬৯..
অযোধ্যামগমচ্ছ্রীঘ্রং রামমেবানুচিন্তযন্ .
পৌরজানপদান্ সর্বানযোধ্যাযামুদারধীঃ .. ৭০..
স্থাপযিত্বা যথান্যাযং নন্দিগ্রামং যযৌ স্বযম্ .
তত্র সিংহাসনে নিত্যং পাদুকে স্থাপ্য ভক্তিতঃ .. ৭১..
পূজযিত্বা যথা রামং গন্ধপুষ্পাক্ষতাদিভিঃ .
রাজোপচারৈরখিলৈঃ প্রত্যহং নিযতব্রতঃ .. ৭২..
ফলমূলাশনো দান্তো জটাবল্কলধারকঃ .
অধঃশাযী ব্রহ্মচারী শত্রুঘ্নসহিতস্তদা .. ৭৩..
রাজকার্যাণি সর্বাণি যাবন্তি পৃথিবীতলে .
তানি পাদুকযোঃ সম্যঙ্নিবেদযতি রাঘবঃ .. ৭৪..
গণযন্ দিবসানি রামাগমনকাঙ্ক্ষযা .
স্থিতো রামার্পিতমনাঃসাক্ষাদ্ব্রহ্মমুনির্যথা .. ৭৫..
রামস্তু চিত্রকূটাদ্রৌ বসন্মুনিভিরাবৃতঃ .
সীতযা লক্ষ্মণেনাপি কিঞ্চিত্কালমুপাবসত্ .. ৭৬..
নাগরাশ্চ সদা যান্তি রামদর্শনলালসাঃ .
চিত্রকূটস্থিতং জ্ঞাত্বা সীতযা লক্ষ্মণেন চ .. ৭৭..
দৃষ্ট্বা তজ্জনসম্বাধং রামস্তত্যাজ তং গিরিম্ .
দণ্ডকারণ্যগমনে কার্যমপ্যনুচিন্তযন্ .. ৭৮..
অন্বগাত্সীতযা ভ্রত্রা হ্যত্রেরাশ্রমমুত্তমম্ .
সর্বত্র সুখসংবাসং জনসম্বাধবর্জিতম্ .. ৭৯..
গত্বা মুনিমুপাসীনং ভাসযন্তং তপোবনম্ .
দণ্ডবত্প্রণিপত্যাহ রামোঽহমভিবাদযে .. ৮০..
পিতুরাজ্ঞাং পুরস্কৃত্য দণ্ডকাননমাগতঃ .
বনবাসমিষেণাপি ধন্যোঽহং দর্শনাত্তব .. ৮১..
শ্রুত্বা রামস্য বচনং রামং জ্ঞাত্বা হরিং পরম্ .
পূজযামাস বিধিবদ্ভক্ত্যা পরমযা মুনিঃ .. ৮২..
বন্যৈঃ ফলৈঃ কৃতাতিথ্যমুপবিষ্টং রঘূত্তমম্ .
সীতাং চ লক্ষ্মণং চৈব সংতুষ্টো বাক্যমব্রবীত্ .. ৮৩..
ভার্যা মেঽতীব সংবৃদ্ধা হ্যনসূযেতি বিশ্রুতা .
তপশ্চরন্তী সুচিরং ধর্মজ্ঞা ধর্মবত্সলা .. ৮৪..
অন্তস্তিষ্ঠতি তাং সীতা পশ্যত্বরিনিষূদন .
তথেতি জানকীং প্রাহ রামো রাজীবলোচনঃ .. ৮৫..
গচ্ছ দেবীং নমস্কৃত্য শীঘ্রমেহি পুনঃ শুভে .
তথেতি রামবচনং সীতা চাপি তথাকরোত্ .. ৮৬..
দণ্ডবত্পতিতামগ্রে সীতাং দৃষ্ট্বাতিহৃষ্ঠধীঃ .
অনসূযা সমালিঙ্গ্য বত্সে সীতেতি সাদরম্ .. ৮৭..
দিব্যে দদৌ কুণ্ডলে দ্বে নির্মিতে বিশ্বকর্মণা .
দুকূলে দ্বে দদৌ তস্যৈ নির্মলে ভক্তিসংযুতা .. ৮৮..
অঙ্গরাগং চ সীতাযৈ দদৌ দিব্যং শুভাননা .
ন ত্যক্ষ্যতেঽঙ্গরাগেণ শোভা ত্বাং কমলাননে .. ৮৯..
পাতিব্রত্যং পুরস্কৃত্য রামমন্বেহি জানকি .
কুশলী রাঘবো যাতু ত্বযা সহ পুনর্গৃহম্ .. ৯০..
ভোজযিত্বা যথান্যাযং রামং সীতাসমন্বিতম্ .
লক্ষ্মণং চ তদা রামং পুনঃ প্রাহ কৃতাঞ্জলিঃ .. ৯১..
রাম ত্বমেব ভুবনানি বিধায তেষাং
        সংরক্ষণায সুরমানুষতির্যগাদীন্ .
দেহান্বিভর্ষি ন চ দেহগুণৈর্বিলিপ্তস্ত্বত্তো
        বিভেত্যখিলমোহকরী চ মাযা .. ৯৩..
ইতি শ্রীমদধ্যাত্মরামযণে উমামহেশ্বরসংবাদে
   অযোধ্যাকাণ্ডে নবমঃ সর্গঃ .. ৯..