অধ্যাত্ম রামাযণ ২ – অযোধ্যাকাণ্ডম্

      .. অধ্যাত্ম রামাযণম্ ..
       .. অযোধ্যা কাণ্ডঃ ..
       .. অষ্টমঃ সর্গঃ ..
বসিষ্ঠো মুনিভিঃ সার্ধং মন্ত্রিভিঃ পরিবারিতঃ .
রাজ্ঞঃ সভাং দেবসভাসন্নিভামবিশদ্বিভুঃ .. ১..
তত্রাসনে সমাসীনশ্চতুর্মুখ ইবাপরঃ .
আনীয ভরতং তত্র উপবেশ্য সহানুজম্ .. ২..
অব্রবীদ্বচনং দেশকালোচিতমরিন্দমম্ .
বত্স রাজ্যেঽভিষেক্ষ্যামস্ত্বামদ্য পিতৃশাসনাত্ .. ৩..
কৈকেয্যা যাচিতং রাজ্যং ত্বদর্থে পুরুষর্ষভ .
সত্যসন্ধো দশরথঃ প্রতিজ্ঞায দদৌ কিল .. ৪..
অভিষেকো ভবত্বদ্য মুনিভির্মন্ত্রপূর্বকম্ .
তত্শ্রুত্বা ভরতোঽপ্যাহ মম রাজ্যেন কিং মুনে .. ৫..
রামো রাজাধিরাজশ্চ বযং তস্যৈব কিঙ্করাঃ .
শ্বঃ প্রভাতে গমিষ্যামো রামমানেতুমঞ্জসা .. ৬..
অহং যূযং মাতরশ্চ কৈকেযীং রাক্ষ্যসীং বিনা .
হনিষ্যাম্যধুনৈবাহং কৈকেযীং মাতৃগন্ধিনীম্ .. ৭..
কিন্তু মাং নো রঘুশ্রেষ্ঠঃ স্ত্রীহন্তারং সহিষ্যতে .
তচ্ছ্বো ভূতে গমিষ্যামি পাদচারেণ দণ্ডকান্ .. ৮..
শত্রুঘ্নসহিতস্তূর্ণং যূযমাযাত বা ন বা .
রামো যথা বনে যাতস্তথাহং বল্কলাম্বরঃ .. ৯..
ফলমূলকৃতাহারঃ শত্রুঘ্নসহিতো মুনে .
ভূমিশাযী জটাধারী যাবদ্রামো নিবর্ততে .. ১০..
ইতি নিশ্চিত্য ভরতস্তূষ্ণীমেবাবতস্থিবান্ .
সাধুসাধ্বিতি তং সর্বে প্রশশংসুর্মুদান্বিতাঃ .. ১১..
ততঃ প্রভাতে ভরতং গচ্ছন্তং সর্বসৈনিকাঃ .
অনুজগ্মুঃ সুমন্ত্রেণ নোদিতাঃ সাশ্বকুঞ্জরাঃ .. ১২..
কৌসল্যাদ্যা রাজদারা বসিষ্ঠপ্রমুখা দ্বিজাঃ .
ছাদযন্তো ভুবং সর্বে পৃষ্ঠতঃ পার্শ্বতোঽগ্রতঃ .. ১৩..
শৃঙ্গবেরপুরং গত্বা গঙ্গাকূলে সমন্ততঃ .
উবাস মহতী সেনা শত্রুঘ্নপরিচোদিতা .. ১৪..
আগতং ভরতং শ্রুত্বা গুহঃ শঙ্কিতমানসঃ .
মহত্যা সেনযা সার্ধমাগতো ভরতঃ কিল .. ১৫..
পাপং কর্তুং ন বা যাতি রামস্যাবিদিতাত্মনঃ .
গত্বা তদ্ধৃদযং জ্ঞেযং যদি শুদ্ধস্তরিষ্যতি .. ১৬..
গঙ্গা নোচেত্সমাকৃষ্য নাবস্তিষ্ঠন্তু সাযুধাঃ .
জ্ঞাতযো মে সমাযত্তাঃ পশ্যন্তঃ সর্বতোদিশম্ .. ১৭..
ইতি সর্বান্সমাদিশ্য গুহো ভরতমাগতঃ .
উপাযনানি সংগৃহ্য বিবিধানি বহূন্যপি .. ১৮..
প্রযযৌ জ্ঞাতিভিঃ সার্ধং বহুভির্বিবিধাযুধৈঃ .
নিবেদ্যোপযানান্যগ্রে ভরতস্য সমন্ততঃ .. ১৯..
দৃষ্ট্বা ভরতমাসীনং সানুজং সহ মন্ত্রিভিঃ .
চীরাম্বরং ঘনশ্যামং জটামুকুটধারিণম্ .. ২০..
রামমেবানুশোচন্তং রামরামেতি বাদিনম্ .
ননাম শিরসা ভূমৌ গুহোঽহমিতি চাব্রবীত্ .. ২১..
শীঘ্রমুত্থাপ্য ভরতো গাঢমালিঙ্গ্য সাদরম্ .
পৃষ্ট্বা নামযমব্যগ্রঃ সখাযমিদমব্রবীত্ .. ২২..
ভ্রাতস্ত্বং রাঘবেণাত্র সমেতঃ সমবস্থিতঃ .
রামেণালিঙ্গিতঃ সার্দ্রনযনেনামলাত্মনা .. ২৩..
ধন্যোঽসি কৃতকৃত্যোঽসি যত্ত্বযা পরিভাষিতঃ .
রামো রাজীবপত্রাক্ষো লক্ষ্মণেন চ সীতযা .. ২৪..
যত্র রামস্ত্বযা দৃষ্টস্তত্র মাং নয সুব্রত .
সীতযা সহিতো যত্র সুপ্তস্তদ্দর্শযস্ব মে .. ২৫.
ত্বং রামস্য প্রিযতমো ভক্তিমানসি ভাগ্যবান্ .
ইতি সংস্মৃত্য সংস্মৃত্য রামং সাশ্রুবিলোচনঃ .. ২৬..
গুহেন সহিতস্তত্র যত্র রামঃ স্থিতো নিশি .
যযৌ দদর্শ শযনস্থলং কুশসমাস্তৃতম্ .. ২৭..
সীতাঽঽভরণসংলগ্নস্বর্ণবিন্দুভিরর্চিতম্ .
দুঃখসন্তপ্তহৃদযো ভরতঃ পর্যদেবযত্ .. ২৮..
অহোঽতিসুকুমারী যা সীতা জনকনন্দিনী .
প্রাসাদে রত্নপর্যঙ্কে কোমলাস্তরণে শুভে .. ২৯..
রামেণ সহিতা শেতে সা কথং কুশবিষ্টরে .
সীতা রামেণ সহিতা দুঃখেন মম দোষতঃ .. ৩০..
ধিঙ্মাং জাতোঽস্মি কৈকেয্যা পাপরাশিসমানতঃ .
মন্নিমিত্তমিদং ক্লেশং রামস্য পরমাত্মনঃ .. ৩১..
অহোঽতিসফলং জন্ম লক্ষ্মণস্য মহাত্মনঃ .
রামমেব সদান্বেতি বনস্থমপি হৃষ্টধীঃ .. ৩২..
অহং রামস্য দাসা যে তেষাং দাসস্য কিঙ্করঃ .
যদি স্যাং সফলং জন্ম মম ভূযান্ন সংশযঃ .. ৩৩..
ভ্রাতর্জানাসি যদি তত্কথযস্ব মমাখিলম্ .
যত্র তিষ্ঠতি তত্রাহং গচ্ছাম্যানেতুমঞ্জসা .. ৩৪..
গুহস্তং শুদ্ধহৃদযং জ্ঞাত্বা সস্নেহমব্রবীত্ .
দেব ত্বমেব ধন্যোঽসি যস্য তে ভক্তিরীদৃশী .. ৩৫..
রামে রাজীবপত্রাক্ষে সীতাযাং লক্ষ্মণে তথা .
চিত্রকূটাদ্রিনিকটে মন্দাকিন্যাবিদূরতঃ .. ৩৬..
মুনীনামাশ্রমপদে রামস্তিষ্ঠতি সানুজঃ .
জানক্যা সহিতো নন্দাত্সুখমাস্তে কিল প্রভুঃ .. ৩৭..
তত্র গচ্ছামহে শীঘ্রং গঙ্গাং তর্তুমিহার্হসি .
ইত্যুক্ত্বা ত্বরিতং গত্বা নাবঃ পঞ্চশতানি হ .. ৩৮..
সমানযত্সসৈন্যস্য তর্তুং গঙ্গাং মহানদীম্ .
স্বযমেবানিনাযৈকাং রাজ্নাবং গুহস্তদা .. ৩৯..
আরোপ্য ভরতং তত্র শত্রুঘ্নং রামমাতরম্ .
বসিষ্ঠং চ তথান্যত্র কৈকেযীং চান্যযোষিতঃ .. ৪০..
তীর্ত্বা গঙ্গাং যযৌ শীঘ্রং ভরদ্বাজাশ্রমং প্রতি .
দূরে স্থাপ্য মহাসৈন্যং ভরতঃ সানুজো যযৌ .. ৪১..
আশ্রমে মুনিমাসীনং জ্বলন্তমিব পাবকম্ .
দৃষ্ট্বা ননাম ভরতঃ সাষ্টাঙ্গমতিভক্তিতঃ .. ৪২..
জ্ঞাত্বা দাশরথিং প্রীত্যা পূজযামাস মৌনিরাট্ .
পপ্রচ্ছ কুশলং দৃষ্ট্বা জটাবল্কলধারিণম্ .. ৪৩..
রাজ্যং প্রশাসতস্তেঽদ্য কিমেতদ্বল্কলাদিকম্ .
আগতোঽসি কিমর্থং ত্বং বিপিনং মুনিসেবিতম্ .. ৪৪..
ভরদ্বাজবচঃ শ্রুত্বা ভরতঃ সাশ্রুলোচনঃ .
সর্বং জানাসি ভগবন্ সর্বভূতাশযস্থিতঃ .. ৪৫..
তথাপি পৃচ্ছসে কিঞ্চিত্তদনুগ্রহ এব মে .
কৈকেয্যা মত্কৃতং কর্ম রামরাজ্যবিঘাতনম্ .. ৪৬..
বনবাসাদিকং বাপি ন হি জানামি কিঞ্চন .
ভবত্পাদযুগং মেঽদ্য প্রমাণং মুনিসত্তম .. ৪৭..
ইত্যুক্ত্বা পাদযুগলং মুনেঃ স্পৃষ্ট্বাঽর্ত্তমানসঃ .
জ্ঞাতুমর্হসি মাং দেব শুদ্ধো বাশুদ্ধ এব বা .. ৪৮..
মম রাজ্যেন কিং স্বামিন্ রামে তিষ্ঠতি রাজনি .
কিঙ্করোঽহং মুনিশ্রেষ্ঠ রামচন্দ্রস্য শাশ্বতঃ .. ৪৯..
অতো গত্বা মুনিশ্রেষ্ঠ রামস্য চরণান্তিকে .
পতিত্বা রাজ্যসম্ভারান্ সমর্প্যাত্রৈব রাঘবম্ .. ৫০..
অভিষেক্ষ্যে বসিষ্ঠাদ্যৈঃ পৌরজানপদৈঃ সহ .
নেষ্যেঽযোধ্যাং রমানাথং দাসঃ সেবেতিনীচবত্ .. ৫১..
ইত্যুদীরিতমাকর্ণ্যং ভরতস্য বচো মুনিঃ .
আলিঙ্গ্য মূর্ধ্ন্যবঘ্রায প্রশশংস সবিস্মযঃ .. ৫২..
বত্স জ্ঞাতং পুরৈবৈতদ্ভবিষ্যং জ্ঞানচক্ষুষা .
মা শুচস্ত্বং পরো ভক্তঃ শ্রীরামে লক্ষ্মণাদপি .. ৫৩..
আতিথ্যং কর্তুমিচ্ছামি সসৈন্যস্য তবানঘ .
অদ্য ভুক্ত্বা সসৈন্যস্ত্বং শ্বো গন্তা রামসন্নিধিম্ .. ৫৪..
যথাঽঽজ্ঞাপযতি ভবাংস্তথেতি ভরতোঽব্রবীত্ .
ভরদ্বাজস্ত্বপঃ স্পৃষ্ট্বা মৌনী হোমগৃহে স্থিতঃ .. ৫৫..
দধ্যৌ কামদুঘাং কামবর্ষিণীং কামদো মুনিঃ .
অসৃজত্কামধুক্ সর্বং যথাকামমলৌকিকম্ .. ৫৬..
ভরতস্য সসৈন্যস্য যথেষ্টং চ মনোরথম্ .
যথা ববর্ষ সকলং তৃপ্তাস্তে সর্বসৈনিকাঃ .. ৫৭..
বসিষ্ঠং পূজযিত্বাগ্রে শাস্ত্রদৃষ্টেন কর্মণা .
পশ্চাত্সসৈন্যং ভরতং তর্পযামাস যোগিরাট্ .. ৫৮..
উষিত্বা দিনমেকং তু আশ্রমে স্বর্গসন্নিভে .
অভিবাদ্য পুনঃ প্রাতর্ভরদ্বাজং সহানুজঃ .. ৫৯..
ভরতস্তু কৃতানুজ্ঞঃ প্রযযৌ রামসন্নিধিম্ .
চিত্রকূটমনুপ্রাপ্য দূরে সংস্থাপ্য সৈনিকান্ .
রামসংদর্শনাকাঙ্ক্ষী প্রযযৌ ভরতঃ স্বযম্ .. ৬০..
শত্রুঘ্নেন সুমন্ত্রেণ গুহেন চ পরন্তপঃ .
তপস্বিমণ্ডলং সর্বং বিচিত্বানো ন্যববর্ত .. ৬১..
অদৃষ্ট্বা রামভবনমপৃচ্ছদৃষিমণ্ডলম্ .
কুত্রাস্তে সীতযা সার্ধং লক্ষ্মণেন রঘূত্তমঃ .. ৬২..
ঊচুরগ্রে গিরেঃ পশ্চাদ্গঙ্গাযা উত্তরে তটে .
বিবিক্তং রামসদনং রম্যং কাননমণ্ডিতম্ .. ৬৩..
সফলৈরাম্রপনসৈঃ কদলীখণ্ডসংবৃতম্ .
চম্পকৈঃ কোবিদারৈশ্চ পুন্নাগৈর্বিপুলৈস্তথা .. ৬৪..
এবং দর্শিতমালোক্য মুনিভির্ভরতোঽগ্রতঃ .
হর্ষাদ্ যযৌ রঘুশ্রেষ্ঠভবনং মন্ত্রিণা সহ .. ৬৫..
দদর্শ দূরাদতিভাসুরং শুভং
        রামস্য গেহং মুনিবৃন্দসেবিতম্ .
বৃক্ষাগ্রসংলগ্নসুবল্কলাজিনং
        রামাভিরামং ভরতঃ সহানুজঃ .. ৬৬..
ইতি শ্রীমদধ্যাত্মরামযণে উমামহেশ্বরসংবাদে
   অযোধ্যাকাণ্ডে অষ্টমঃ সর্গঃ .. ৮..