অধ্যাত্ম রামাযণ ২ – অযোধ্যাকাণ্ডম্

      .. অধ্যাত্ম রামাযণম্ ..
       .. অযোধ্যা কাণ্ডঃ ..
       .. সপ্তমঃ সর্গঃ ..
সুমন্ত্রোঽপি তদাযোধ্যাং দিনান্তে প্রবিবেশ হ .
বস্ত্রেণ মুখমাচ্ছাদ্য বাষ্পাকুলিতলোচনঃ .. ১..
বহিরেব রথং স্থাপ্য রাজানং দ্রষ্টুমাযযৌ .
জয শব্দেন রাজানং স্তুত্বা তং প্রণনাম হ .. ২..
ততো রাজা নমন্তং তং সুমন্ত্রং বিহ্বলোঽব্রবীত্ .
সুমন্ত্র রামঃ কুত্রাস্তে সীতযা লক্ষ্মণেন চ .. ৩..
কুত্র ত্যক্তস্ত্বযা রামঃ কিং মাং পাপিনমব্রবীত্ .
সীতা বা লক্ষ্মণো বাপি নির্দযং মাং কিমব্রবীত্ .. ৪..
হা রাম হা গুণনিধে হা সীতে প্রিযবাদিনি .
দুঃখার্ণবে নিমগ্নং মাং ম্রিযমাণং ন পশ্যসি .. ৫..
বিলপ্যৈবং চিরং রাজা নিমগ্নো দুঃখসাগরে .
এবং মন্ত্রী রুদন্তং তং প্রাঞ্জলির্বাক্যমব্রবীত্ .. ৬..
রামঃ সীতা চ সৌমিত্রির্মযা নীতা রথেন তে .
শৃঙ্গবেরপুরাভ্যাশে গঙ্গাকূলে ব্যবস্থিতাঃ .. ৭..
গুহেন কিঞ্চিদানীতং ফলমূলাদিকং চ যত্ .
স্পৃষ্ট্বা হস্তেন সম্প্রীত্যা নাগ্রহীদ্বিসসর্জ তত্ .. ৮..
বটক্ষীরঃ সমানায্য গুহেন রঘুনন্দনঃ .
জটামুকুটমাবদ্ধ্য মামাহ নৃপতে স্বযম্ .. ৯..
সুমন্ত্র ব্রূহি রাজানং শোকস্তেঽস্তু ন মত্কৃতে .
সাকেতাদধিকং সৌখ্যং বিপিনে নো ভবিষ্যতি .. ১০..
মাতুর্মে বন্দনং ব্রূহি শোকং ত্যজতু মত্কৃতে .
আশ্বাসযতু রাজানং বৃদ্ধং শোকপরিপ্লুতম্ .. ১১..
সীতা চাশ্রুপরীতাক্ষী মামাহ নৃপসত্তম .
দুঃখগদ্গদযা বাচা রামং কিঞ্চিদবেক্ষতী .. ১২..
সাষ্টাঙ্গ প্রণিপাতং মে ব্রূহি শ্বশ্রোঃ পদাম্বুজে .
ইতি প্ররুদতী সীতা গতা কিঞ্চিদবাঙ্মুখী .. ১৩..
ততস্তেঽশ্রুপরীতাক্ষা নাবমারুরুহুস্তদা .
যাবদ্গঙ্গাং সমুত্তীর্য গতাস্তাবদহং স্থিতঃ .. ১৪..
ততো দুঃখেন মহতা পুনরেবাহমাগতঃ .
ততো রুদন্তী কৌসল্যা রাজনমিদমব্রবীত্ .. ১৫..
কৈকেয্যৈ প্রিযভার্যাযৈ প্রসন্নো দত্তবান্বরম্ .
ত্বং রাজ্যং দেহি তস্যৈব মত্পুত্রঃ কিং বিবাসিতঃ .. ১৬..
কৃত্বা ত্বমেব তত্সর্বমিদানীং কিং নু রোদিষি .
কৌসল্যাবচনং শ্রুত্বা ক্ষতে স্পৃষ্ট ইবাগ্নিনা .. ১৭..
পুনঃ শাকাশ্রুপূর্ণাক্ষঃ কৌসল্যামিদমব্রবীত্ .
দুঃখেন ম্রিযমাণং মাং কিং পুনর্দুঃখযস্যলম্ .. ১৮..
ইদানীমেব মে প্রাণা উত্ক্রমিষ্যন্তি নিশ্চযঃ .
শপ্তোঽহং বাল্যভাবেন কেনচিন্মুনিনা পুরা .. ১৯..
পুরাহং যৌবনে দৃপ্তচাপবাণধরো নিশি .
অচরং মৃগযাসক্তো নদ্যাস্তীরে মহাবনে .. ২০..
তত্রার্ধরাত্রসমযে মুনিঃ কশ্চিত্তৃষার্দিতঃ .
পিপাসার্দিতযোঃ পিত্রোর্জলমানেতুমুদ্যতঃ .
অপূরযজ্জলে কুম্ভং তদা শব্দোঽভবন্মহান্ .. ২১..
গজঃ পিবতি পানীযমিতি মত্বা মহানিশি .
বাণং ধনুষি সন্ধায শব্দবেধিনমক্ষিপম্ .. ২২..
হা হতোঽস্মীতি তত্রাভূচ্ছব্দো মানুষসূচকঃ .
কস্যাপি ন কৃতো দোষো মযা কেন হতো বিধে .. ২৩..
প্রতীক্ষতে মাং মাতা চ পিতা চ জলকাঙ্ক্ষযা .
তত্শ্রুত্বা ভযসন্ত্রস্তস্ততোঽহং পৌরুষং বচঃ .. ২৪..
শনৈর্গত্বাথ তত্পার্শ্বং স্বামিন্ দশরথোঽস্ম্যহম্ .
অজানতা মযা বিদ্ধস্ত্রাতুমর্হসি মাং মুনে .. ২৫..
ইত্যুক্ত্বা পাদযোস্তস্য পতিতা গদ্গদাক্ষরঃ .
তদা মামাহ স মুনির্মা ভৈষীর্নৃপসত্তম .. ২৬..
ব্রহ্মহত্যা স্পৃশেন্ন ত্বাং বৈশ্যোঽহং তপসি স্থিতঃ .
পিতরৌ মাং প্রতীক্ষেতে ক্ষুত্তৃড্ভ্যাং পরিপীডিতৌ .. ২৭..
তযোস্ত্বমুদকং দেহি শীঘ্রমেবাবিচারযন্ .
ন চেত্ত্বাং ভস্মসাত্কুর্যাত্পিতামে যদি কুপ্যতি .. ২৮..
জলং দত্বা তু তৌ নত্বা কৃতং সর্বং নিবেদয .
শল্যমুদ্ধর মে দেহাত্প্রাণাংস্ত্যক্ষ্যামি পীডিতঃ .. ২৯..
ইত্যুক্তো মুনিনা শীঘ্রং বাণমুত্পাট্য দেহতঃ .
সজলং কলশং ধৃত্বা গতোঽহং যত্র দম্পতী .. ৩০..
অতিবৃদ্ধাবন্ধদৃশৌ ক্ষুত্পিপাসার্দিতৌ নিশি .
নাযাতি সলিলং গৃহ্য পুত্রঃ কিং বাত্র কারণম্ .. ৩১..
অনন্যগতিকৌ বৃদ্ধৌ শোচ্যৌ তৃট্পরিপীডিতৌ .
আবামুপেক্ষতে কিং বা ভক্তিমানাবযোঃ সুতঃ .. ৩২..
ইতি চিন্তাব্যাকুলৌ তৌ মত্পাদন্যাসজং ধ্বনিম্ .
শ্রুত্বা প্রাহ পিতা পুত্র কিং বিলম্বঃ কৃতস্ত্বযা .. ৩৩..
দেহ্যাবযোঃ সুপানীযং পিব ত্বমপি পুত্রক .
ইত্যেবং লপতোর্ভীত্যা সকাশমগমং শনৈঃ .. ৩৪..
পাদযোঃ প্রণিপত্যাহমব্রবং বিনযান্বিতঃ .
নাহং পুত্রস্ত্বযোধ্যাযা রাজা দশরথোঽস্ম্যহম্ .. ৩৫..
পাপোঽহং মৃগযাসক্তো রাত্রৌ মৃগবিহিংসকঃ .
জলাবতারাদ্দূরেঽহং স্থিত্বা জলগতং ধ্বনিম্ .. ৩৬..
শ্রুত্বাহং শব্দবেধিত্বাদেকং বাণমথাত্যজম্ .
হতোঽস্মীতি ধ্বনিং শ্রুত্বা ভযাত্তত্রাহমাগতঃ .. ৩৭..
জটাং বিকীর্য পতিতং দৃষ্ট্বাহং মুনিদারকম্ .
ভীতো গৃহীত্বা তত্পাদৌ রক্ষ রক্ষেতি চাব্রবম্ .. ৩৮..
মা ভৈষীরিতি মাং প্রাহ ব্রহ্মহত্যাভযং ন তে .
মত্পিত্রোঃ সলিলং দত্ত্বা নত্বা প্রার্থয জীবিতম্ .. ৩৯..
ইত্যুক্তো মুনিনা তেন হ্যাগতো মুনিহিংসকঃ .
রক্ষেতাং মাং দযাযুক্তৌ যুবাং হি শরণাগতম্ .. ৪০..
ইতি শ্রুত্বা তু দুঃখার্তৌ বিলপ্য বহু শোচ্য তম্ .
পতিতৌ নৌ সুতো যত্র নয তত্রাবিলম্বযন্ .. ৪১..
ততো নীতৌ সুতো যত্র মযা তৌ বৃদ্ধদম্পতী .
স্পৃষ্ট্বা সুতং তৌ হস্তাভ্যাং বহুশোঽথ বিলেপতুঃ .. ৪২..
হাহেতি ক্রন্দমানৌ তৌ পুত্রপুত্রেত্যবোচতাম্ .
জলং দেহীতি পুত্রেতি কিমর্থং ন দদাস্যলম্ .. ৪৩..
ততো মামূচতুঃ শীঘ্রং চিতিং রচয ভূপতে .
মযা তদৈব রচিতা চিতিস্তত্র নিবেশিতাঃ .
ত্রযস্তত্রাগ্নিরুত্সৃষ্টো দগ্ধাস্তে ত্রিদিবং যযুঃ .. ৪৪..
তত্র বৃদ্ধঃ পিতা প্রাহ ত্বমপ্যেবং ভবিষ্যসি .
পুত্রশোকেন মরণং প্রাপ্স্যসে বচনান্মম .. ৪৫..
স ইদানীং মম প্রাপ্তঃ শাপকালোঽনিবারিতঃ .
ইত্যুক্ত্বা বিললাপাথ রাজা শোকসমাকুলঃ .. ৪৬..
হা রাম পুত্র হা সীতেতি লক্ষ্মণ গুণাকর .
ত্বদ্বিযোগাদহং প্রাপ্তো মৃত্যুং কৈকেযিসম্ভবম্ .. ৪৭..
বদন্নেবং দশরথঃ প্রাণাংস্ত্যক্ত্বা দিবং গতঃ .
কৌসল্যা চ সুমিত্রা চ তথান্যা রাজযোষিতঃ .. ৪৮..
চুক্রুশুশ্চ বিলেপুশ্চ উরস্তাডনপূর্বকম্ .
বসিষ্ঠঃ প্রযযৌ তত্র প্রাতর্মন্ত্রিভিরাবৃতঃ .. ৪৯..
তৈলদ্রোণ্যাং দশরথং ক্ষিত্বা দূতানাথাব্রবীত্ .
গচ্ছত ত্বরিতং সাশ্বা যুধাজিন্নগরং প্রতি .. ৫০..
তত্রাস্তে ভরতঃ শ্রীমাঞ্ছত্রুঘ্নসহিতঃ প্রভুঃ .
উচ্যতাং ভরতঃ শীঘ্রমাগচ্ছেতি মমাজ্ঞযা .. ৫১..
অযোধ্যাং প্রতি রাজানং কৈকেযীং চাপি পশ্যতু .
ইত্যুক্ত্বাস্ত্বরিতং দূতা গত্বা ভরতমাতুলম্ .. ৫২..
যুধাজিতং প্রণম্যোচুর্ভরতং সানুজং প্রতি .
বসিষ্ঠস্ত্বব্রবীদ্রাজন্ ভরতঃ সানুজঃ প্রভুঃ .. ৫৩..
শীঘ্রমাগচ্ছতু  পুরীমযোধ্যামবিচারযন্ .
ইত্যাজ্ঞপ্তোঽথ ভরতস্ত্বরিতং ভযবিহ্বলঃ .. ৫৪..
আযযৌ গুরুণাদিষ্ঠঃ সহ দূতৈস্তু সানুজঃ .
রাজ্ঞো বা রাঘবস্যাপি দুঃখং কিঞ্চিদুপস্থিতম্ .. ৫৫..
ইতি চিন্তাপরো মার্গে চিন্তযন্নগরং যযৌ .
নগরং ভ্রষ্টলক্ষ্মীকং জনসম্বাধবর্জিতম্ .. ৫৬..
উত্সবৈশ্চ পরিত্যক্তং দৃষ্ট্বা চিন্তাপরোঽভবত্ .
প্রবিশ্য রাজভবনং রাজলক্ষ্মীবিবর্জিতম্ .. ৫৭..
উপশ্যত্কৈকেযীং তত্র একামেবাসনে স্থিতম্ .
ননাম শিরসা পাদৌ মাতুর্ভক্তিসমন্বিতঃ .. ৫৮..
আগতং ভরতং দৃষ্ট্বা কৈকেযী প্রেমসম্ভ্রমাত্ .
উত্থাযালিঙ্গ্য রভসা স্বাঙ্কমারোপ্য সংস্থিতা .. ৫৯..
মূর্ধ্ন্যবঘ্রায পপ্রচ্ছ কুশলং স্বকুলস্য সা .
পিতা মে কুশলো ভ্রাতা মাতা চ শুভলক্ষণা .. ৬০..
দিষ্ট্যা ত্বমদ্য কুশলী মযা দৃষ্টোঽসি পুত্রক .
ইতি পৃষ্টঃ স ভরতো মাত্রা চিন্তাকুলেন্দ্রিযঃ .. ৬১..
দূযমানেন মনসা মাতরং সমপৃচ্ছত .
মাতঃ পিতা মে কুত্রাস্তে একা ত্বমিহ সংস্থিতা .. ৬২..
ত্বযা বিনা ন মে তাতঃ কদাচিদ্রহসি স্থিতঃ .
ইদানীং দৃশ্যতে নৈব কুত্র তিষ্ঠতি মে বদ .. ৬৩..
অদৃষ্ট্বা পিতরং মেঽদ্য ভযং দুঃখং চ জাযতে .
অথাহ কৈকেযী পুত্র কিং দুঃখেন তবানঘ .. ৬৪..
যা গতির্ধর্মশীলানামশ্বমেধাদিযাজিনাম্ .
তাং গতিং গতবানদ্য পিতা তে পিতৃবত্সল .. ৬৫..
তত্শ্রুত্বা নিপপাতোর্ব্যাং ভরতঃ শোকবিহ্বলঃ .
হা তাত ক্ব গতোঽসি ত্বং ত্যক্ত্বা মাং বৃজিনার্ণবে .. ৬৬..
অসমর্প্যৈব রামায রাজ্ঞে মাং ক্ব গতোঽসি ভোঃ .
ইতি বিলপিতং পুত্রং পতিতং মুক্তমূর্ধজম্ .. ৬৭..
উত্থাপ্যামৃজ্য নযনে কৈকেযী পুত্রমব্রবীত্ .
সমাশ্বসিহি ভদ্রং তে সর্বং সম্পাদিতং মযা .. ৬৮..
তামাহ ভরতস্তাতো ম্রিযমাণঃ কিমব্রবীত্ .
তমাহ কৈকেযী দেবী ভরতং ভযবর্জিতা .. ৬৯..
হা রাম রাম সীতেতি লক্ষ্মণেতি পুনঃ পুনঃ .
বিলপন্নেব সুচিরং দেহং ত্যক্ত্বা দিবং যযৌ .. ৭০..
তামাহ ভরতো হেঽম্ব রামঃ সন্নিহিতো ন কিম্ .
তদানীং লক্ষ্মণো বাপি সীতা বা কুত্র তে গতাঃ .. ৭১..
রামস্য যৌবরাজ্যার্থং পিত্রা তে সম্ভ্রমঃ কৃতঃ .
তব রাজ্যপ্রদানায তদাহং বিঘ্নমাচরম্ .. ৭২..
রজ্ঞা দত্তং হি মে পূর্বং বরদেন বরদ্বযম্ .
যাচিতং তদিদানীং মে তযোরেকেন তেঽখিলম্ .. ৭৩..
রাজ্যং রামস্য চৈকেন বনবাসো মুনিব্রতম্ .
ততঃ সত্যপরো রাজ্যং দত্ত্বা তদৈব হি .. ৭৪..
রামং সম্প্রেষযামাস বনমেব পিতা তব .
সীতাপ্যনুগতা রামং পাতিব্রত্যমুপাশ্রিতা .. ৭৫..
সৌভ্রাত্রং দর্শযন্রামমনুযাতোঽপি লক্ষ্মণঃ .
বনং গতেষু সর্বেষু রাজা তানেব চিন্তযন্ .. ৭৬..
প্রলপন্ রামরামেতি মমার নৃপসত্তমঃ .
ইতি মাতুর্বচঃ শ্রুত্বা বজ্রাহত ইব দ্রুমঃ .. ৭৭..
পপাত ভূমৌ নিঃসংজ্ঞস্তং দৃষ্ট্বা দুঃখিতা তদা .
কৈকেযী পুনরপ্যাহ বত্স শোকেন কিং তব .. ৭৮..
রাজ্যে মহতি সম্প্রাপ্তে দুঃখস্যাবসরঃ কুতঃ .
ইতি ব্রুবন্তীমালোক্য মাতরং প্রদহন্নিব .. ৭৯..
অসম্ভাষ্যাসি পাপে মে ঘোরে ত্ব ভর্তৃঘাতিনী .
পাপে ত্বদ্গর্ভজাতোঽহং পাপবানস্মি সাম্প্রতম্ .
অহমগ্নিং প্রবক্ষ্যামি বিষং বা ভক্ষযাম্যহম্ .. ৮০..
খড্গেন বাথ চাত্মানং হত্বা যামি যমক্ষযম্ .
ভর্তৃঘাতিনি দুষ্টে ত্বং কুম্ভীপাকং গমিষ্যসি .. ৮১..
ইতি নির্ভর্ত্স্য কৈকেযীং কৌসল্যাভবনং যযৌ .
সাপি তং ভরতং দৃষ্ট্বা মুক্তকণ্ঠা রুরোদ হ .. ৮২..
পাদযোঃ পতিতস্তস্যা ভরতোঽপি তদারুদত্ .
আলিঙ্গ্য ভরতং সাধ্বী রামমাতা যশস্বিনী .
কৃশাতিদীনবদনা সাশ্রুনেত্রেদমব্রবীত্ .. ৮৩..
পুত্র ত্বযি গতে দূরমেবং সর্বমভূদিদম্ .
উক্তং মাত্রা শ্রুতং সর্বং ত্বযা তে মাতৃচেষ্টিতম্ .. ৮৪..
পুত্রঃ সভার্যো বনমেব যাতঃ
        সলক্ষ্মণো মে রঘুরামচন্দ্রঃ .
চীরাম্বরো বদ্ধজটাকলাপঃ
        সন্ত্যজ্য মাং দুঃখসমুদ্রমগ্নাম্ .. ৮৫..
হা রাম হা মে রঘুবংশনাথ
        জাতোঽসি মে ত্বং পরতঃ পরাত্মা .
তথাপি দুঃখং ন জহাতি মাং বৈ
        বিধির্বলীযানিতি মে মনীষা .. ৮৬..
স এবং ভরতো বীক্ষ্য বিলপন্তীং ভৃশং শুচা .
পাদৌ গৃহীত্বা প্রাহেদং শৃণু মাতর্বচা  মম .. ৮৭..
কৈকেয্যা যত্কৃতং কর্ম রামরাজ্যাভিষেচনে .
অন্যদ্বা যদি জানামি সা মযা নোদিতা যদি .. ৮৮..
পাপং মেঽস্তু তদা মাতর্ব্রহ্মহত্যাশতোদ্ভবম্ .
হত্বা বসিষ্ঠং খড্গেন অরুন্ধত্যা সমন্বিতম্ .. ৮৯..
ভূযাত্তত্পাপমখিলং মম জানামি যদ্যহম্ .
ইত্যেবং শপথং কৃত্বা রুরোদ ভরতস্তদা .. ৯০..
কৌসল্যা তমথালিঙ্গ্য পুত্র জানামি মা শুচঃ .
এতস্মিন্নন্তরে শ্রুত্বা ভরতস্য সমাগমম্ .. ৯১..
বসিষ্ঠো মন্ত্রিভিঃ সার্ধং প্রযযৌ রাজমন্দিরম্ .
রুদন্তং ভরতং দৃষ্ট্বা বসিষ্ঠঃ প্রাহ সাদরম্ .. ৯২..
বৃদ্ধো রাজা দশরথো জ্ঞানী সত্যপরাক্রমঃ .
ভুক্ত্বা মর্ত্যসুখং সর্বমিষ্ট্বা বিপুলদক্ষিণৈঃ .. ৯৩..
অশ্বমেধাদিভির্যজ্ঞৈর্লব্ধ্বা রামং সুতং হরিম্ .
অন্তে জগাম ত্রিদিবং দেবেন্দ্রার্দ্ধাসনং প্রভুঃ .. ৯৪..
তং শোচসি বৃথৈব ত্বমশোচ্যং মোক্ষভাজনম্ .
আত্মা নিত্যোঽব্যযঃ শুদ্ধো জন্মনাশাদিবর্জিতঃ .. ৯৫..
শরীরং জডমত্যর্থমপবিত্রং বিনশ্বরম্ .
বিচার্যমাণে শোকস্য নাবকাশঃ কথঞ্চন .. ৯৬..
পিতা বা তনযো বাপি যদি মৃত্যুবশং গতঃ .
মূঢাস্তমনুশোচন্তি স্বাত্মতাডনপূর্বকম্ .. ৯৭..
নিঃসারে খলু সংসারে বিযোগো জ্ঞানিনাং যদা .
ভবেদ্বৈরাগ্যহেতুঃ স শান্তিসৌখ্যং তনোতি চ .. ৯৮..
জন্মবান্যদি লোকেঽস্মিংস্তর্হি তং মৃত্যুরন্বগাত্ .
তস্মাদপরিহার্যোঽযং মৃত্যুর্জন্মবতাং সদা .. ৯৯..
স্বকর্মবশতঃ সর্বজন্তূনাং প্রভবাপ্যযৌ .
বিজানন্নপ্যবিদ্বান্যঃ কথং শোচংতি বান্ধবান্ .. ১০০..
ব্রহ্মাণ্ডকোটযো নষ্টাঃ সৃষ্টযো বহুশো গতাঃ .
শুষ্যন্তি সাগরাঃ সর্বে কৈবাস্থা ক্ষণজীবিতে .. ১০১..
চলপত্রান্তলগ্নাম্বুবিন্দুবত্ক্ষণভঙ্গুরম্ .
আযুস্ত্যজত্যবেলাযাং কস্তত্র প্রত্যযস্তব .. ১০২..
দেহী প্রাক্তনদেহোত্থকর্মণা দেহবান্পুনঃ .
তদ্দেহোত্থেন চ পুনরেবং দেহঃ সদাত্মনঃ .. ১০৩..
যথা ত্যজতি বৈ জীর্ণং বাসো গৃহ্ণাতি নূতনম্ .
তথা জীর্ণং পরিত্যজ্য দেহী দেহং পুনর্নবম্ .. ১০৪..
ভজত্যেব সদা তত্র শোকস্যাবসরঃ কুতঃ .
আত্মা ন ম্রিযতে জাতু  জাযতে ন চ বর্ধতে .. ১০৫..
ষড্ভাবরহিতোঽনন্তঃ  সত্যপ্রজ্ঞানবিগ্রহঃ .
আনন্দরূপো বুদ্ধ্যাদিসাক্ষী লযবিবর্জিতঃ .. ১০৬..
এক এব পরো হ্যাত্মা
        হ্যদ্বিতীযঃ সমঃ স্থিতঃ .
ইত্যাত্মানং দৃঢং
        জ্ঞাত্বা ত্যক্ত্বা শোকং কুরু ক্রিযাম্ .. ১০৭..
তৈলদ্রোণ্যাঃ পিতুর্দেহমুদ্ধৃত্য সচিবৈঃ সহ .
কৃত্যং কুরু যথান্যাযমস্মাভিঃ কুলনন্দন .. ১০৮..
ইতি সম্বোধিতঃ সাক্ষাদ্ গুরুণা ভরতস্তদা .
বিসৃজ্যাজ্ঞানজং শোকং চক্রে সবিধিবত্ক্রিযাম্ .. ১০৯..
গুরুণোক্তপ্রকারেণ আহিতাগ্নের্যথাবিধি .
সংস্কৃত্য স পিতুর্দেহং বিধিদৃষ্টেন কর্মণা .. ১১০..
একাদশেঽহনি প্রাপ্তে ব্রাহ্মণান্বেদপারগান্ .
ভোজযামাস বিধিবচ্ছতশোঽথ সহস্রশঃ .. ১১১..
উদ্দিশ্য পিতরং তত্র ব্রাহ্মণেভ্যো ধনং বহু .
দদৌ গবাং সহস্রাণি গ্রামান্ রত্নাম্বরাণি চ .. ১১২..
অবসত্স্বগৃহে যত্র রামমেবানুচিন্তযন্ .
বসিষ্ঠেন সহ ভ্রাত্রা মন্ত্রিভিঃ পরিবারিতঃ .. ১১৩..
রামেঽরণ্যং প্রযাতে সহ জনকসুতা লক্ষ্মণাভ্যাং সুঘোরং
মাতা মে রাক্ষসীব প্রদহতি হৃদযং দর্শনাদেব সদ্যঃ .
গচ্ছাম্যারণ্যমদ্য স্থিরমতিরখিলং দূরতোঽপাস্য রাজ্যং
রামং সীতাসমেতং স্মিতরুচিরমুখং নিত্যমেবানুসেবে .. ১১৪..
ইতি শ্রীমদধ্যাত্মরামযণে উমামহেশ্বরসংবাদে
   অযোধ্যাকাণ্ডে সপ্তমঃ সর্গঃ .. ৭..