অধ্যাত্ম রামাযণ ২ – অযোধ্যাকাণ্ডম্

      .. অধ্যাত্ম রামাযণম্ ..
       .. অযোধ্যা কাণ্ডঃ ..
       .. ষষ্ঠঃ সর্গঃ ..
সুপ্তং রামং সমালোক্য গুহঃ সোঽশ্রুপরিপ্লুতঃ .
লক্ষ্মণং প্রাহ বিনযাদ্ ভ্রাতঃ পশ্যসি রাঘবম্ .. ১..
শযানং কুশপত্রৌবসংস্তরে সীতযা সহ .
যঃ শেতে স্বর্ণপর্যঙ্কে স্বাস্তীর্ণে ভবনোত্তমে .. ২..
কৈকেযী রামদুঃখস্য কারণং বিধিনা কৃতা .
মন্থরাবুদ্ধিমাস্থায কৈকেযী পাপমাচরত্ .. ৩..
তচ্ছ্রুত্বা লক্ষ্মণঃ প্রাহ সখে শৃণু বচো মম .
কঃ কস্য হেতুর্দুঃখস্য কশ্চ হেতুঃ সুখস্য চ .. ৪..
স্বপূর্বার্জিতকর্মৈব কারণং সুখদুঃখযোঃ .. ৫..
সুখস্য দুঃখস্য ন কোঽপি দাতা পরো
                দদাতীতি কুবুদ্ধিরেষা .
অহং করোমীতি বৃথভিমানঃ
                স্বকর্মসূত্রগ্রথিতো হি লোকঃ .. ৬..
সুহৃন্মিত্রার্যুদাসীনদ্বেষ্যমধ্যস্থবান্ধবাঃ .
স্বযমেবাচরন্কর্ম তথা তত্র বিভাব্যতে .. ৭..
সুখং বা যদি বা দুঃখং স্বকর্মবশগো নরঃ .
যদ্যদ্যথাগতং তত্তদ্ ভুক্ত্বা স্বস্থমনা ভবেত্ .. ৮..
ন মে ভোগাগমে বাঞ্ছা ন মে ভোগবিবর্জনে .
আগচ্ছত্বথ মাগচ্ছত্বভোগবশগো ভবেত্ .. ৯..
স্বস্মিন্ দেশে চ কালে চ যস্মাদ্বা যেন কেন বা .
কৃতং শুভাশুভং কর্ম ভোজ্যং তত্তত্র নান্যথা .. ১০..
অলং হর্ষবিষাদাভ্যাং শুভাশুভফলোদযে .
বিধাত্রা বিহিতং যদ্যত্তদলঙ্ঘ্যং সুরাসুরৈঃ .. ১১..
সর্বদা সুখদুঃখাভ্যাং নরঃ প্রত্যবরুধ্যতে .
শরীরং পুণ্যপাপাভ্যামুত্পন্নং সুখদুঃখবত্ .. ১২..
সুখস্যানন্তরং দুঃখং দুঃখস্যানন্তরং সুখম্ .
দ্বযমেতদ্ধি জন্তূনামালঙ্ঘ্য দিনরাত্রিবত্ .. ১৩..
সুখমধ্যে স্থিতং দুঃখং দুঃখমধ্যে স্থিতং সুখম্ .
দ্বযমন্যোন্যসংযুক্তং প্রোচ্যতে জলকঙ্কবত্ .. ১৪..
তস্মাদ্ধৈর্যেণ বিদ্বাংস ইষ্টানিষ্টোপপত্তিষু .
ন হৃষ্যন্তি ন মুহ্যন্তি সমং মাযেতি ভাবনাত্ .. ১৫..
গুহলক্ষ্মণযোরেবং ভাষতোর্বিমলং নভঃ .
বভূব রামঃ সলিলং স্পৃষ্ট্বা প্রাতঃ সমাহিতঃ .. ১৬..
উবাচ শীঘ্রং সুদৃঢং নাবমানয মে সখে .
শ্রুত্বা রামস্য বচনং নিষাদাধিপতির্গুহঃ .. ১৭..
স্বযমেব দৃঢং নাবমানিনায সুলক্ষণাম্ .
স্বামিন্নারুহ্যতাং নৌকাং সীতযা লক্ষ্মণেন চ .. ১৮..
বাহযে জ্ঞাতিভিঃ সার্ধমহমেব সমাহিতঃ .
তথেতি রাঘবঃ সীতামারোপ্য শুভলক্ষণাম্ .. ১৯..
গুহস্য হস্তাবালম্ব্য স্বযং চারোহদচ্যুতঃ .
আযুধাদীন্ সমারোপ্য লক্ষ্মণোঽপ্যারুরোহ চ .. ২০..
গুহস্তান্বাহযামাস জ্ঞাতিভিঃ সহিতঃ স্বযম্ .
গঙ্গামধ্যে গতাং গঙ্গাং প্রার্থযামাস জানকী .. ২১..
দেবি গঙ্গে নমস্তুভ্যং নিবৃত্তা বনবাসতঃ .
রামেণ সহিতাহং ত্বাং লক্ষ্মণেন চ পূজযে .. ২২..
সুরামাংসোপহারৈশ্চ নানাবলিভিরাদৃতা .
ইত্যুক্ত্বা পরকূলং তৌ শনৈরুত্তীর্য জগ্মতুঃ .. ২৩..
গুহোঽপি রাঘবং প্রাহ গমিষ্যামি ত্বযা সহ .
অনুজ্ঞাং দেহি রাজেন্দ্র নোচেত্প্রাণাংস্ত্যজাম্যহম্ .. ২৪..
শ্রুত্বা নৈষাদিবচনং শ্রীরামস্তমথাব্রবীত্ .
চতুর্দশ সমাঃ স্থিত্বা দণ্ডকে পুনরপ্যহম্ .. ২৫..
আযাস্যাভ্যুদিতং সত্যং নাসত্যং রামভাষিতম্ .
ইত্যুক্ত্বালিঙ্গ্য তং ভক্তং সমাশ্বাস্য পুনঃ পুনঃ .. ২৬..
নিবর্তযামাস গুহং সোঽপি কৃচ্ছ্রাদ্যযৌ গৃহম্ .. ২৭..
তত্র মেঘ্যং মৃগং হত্বা পক্ত্বা হুত্বা চ তে ত্রযঃ .
ভুক্ত্বা বৃক্ষতলে সুপ্ত্বা সুখমাসত তাং নিশাম্ .. ২৮..
ততো রামস্তু বৈদেহ্যা লক্ষ্মণেন সমন্বিতঃ .
ভরদ্বাজাশ্রমপদং গত্বা বহিরুপস্থিতঃ .
তত্রৈকং বটুকং দৃষ্ট্বা রামঃ প্রাহ চ হে বটো .. ২৯..
রামো দাশরথিঃ সীতালক্ষ্মণাভ্যাং সমন্বিতঃ .
আস্তে বহির্বনস্যেতি হ্যুচ্যতাং মুনিসন্নিধৌ .. ৩০..
তত্শ্রুত্বা সহসা গত্বা পাদযোঃ পতিতো মুনেঃ .
স্বামিন্ রামঃ সমাগত্য বনাদ্ বহিরবস্থিতঃ .. ৩১..
সভার্যঃ সানুজঃ শ্রীমানাহ মাং দেবসন্নিভঃ .
ভরদ্বাজায মুনযে জ্ঞাপযস্ব যথোচিতম্ .. ৩২..
তত্শ্রুত্বা সহসোত্থায ভরদ্বাজো মুনীশ্বরঃ .
গৃহীত্বার্ঘ্যং চ পাদ্যং চ রামসামীপ্যমাযযৌ .. ৩৩..
দৃষ্ট্বা রামং যথান্যাযং পূজযিত্বা সলক্ষ্মণম্ .
আহ মে পর্ণশালাং ভো রাম রাজীবলোচন .. ৩৪..
আগচ্ছ পাদরজসা পুনীহি রঘুনন্দন .
ইত্যুক্ত্বোটজমানীয সীতযা সহ রঘাবৌ .. ৩৫..
ভক্ত্যা পুনঃ পূজযিত্বা চকারাতিথ্যমুত্তমম্ .
অদ্যাহং তপসঃ পারং গতোঽমি তব সঙ্গমাত্ .. ৩৬..
জ্ঞাতং রাম তবোদন্তং ভূতং চাগামিকং চ যত্ .
জানামি ত্বাং পরাত্মানং মাযযা কার্যমানুষম্ .. ৩৭..
যদর্থমবতীর্ণোঽসি প্রার্থিতো ব্রহ্মণা পুরা .
যদর্থং বনবাসস্তে যত্করিষ্যসি বৈ পুনঃ .. ৩৮..
জানামি জ্ঞানদৃষ্ট্যাহং জাতযা ত্বদুপাসনাত্ .
ইতঃ পরং ত্বাং কিং বক্ষ্যে কৃতার্থোঽহং রঘূত্তম .. ৩৯..
যস্ত্বাং পশ্যামি কাকুত্স্থং পুরুষং প্রকৃতেঃ পরম্ .
রামস্তমভিবাদ্যাহ সীতালক্ষ্মণসংযুতঃ .. ৪০..
অনুগ্রাহ্যস্ত্বযা ব্রহ্মন্বযং ক্ষত্রিযবান্ধবাঃ .
ইতি সম্ভাষ্য তেঽন্যোন্যমুষিত্বা মুনিসন্নিধৌ .. ৪১..
প্রাতরুত্থায যমুনামুত্তীর্য মুনিবারকৈঃ .
কৃতাপ্লবনে মুনিনা দৃষ্টমার্গেণ রাঘবঃ .. ৪২..
প্রযযৌ চিত্রকূটাদ্রিং বাল্মীকের্যত্র চাশ্রমঃ .
গত্বা রামোঽথবাল্মীকেরাশ্রমং ঋষিসঙ্কুলম্ .. ৪৩..
নানামৃগদ্বিজাকীর্ণং নিত্যপুষ্পফলাকুলম্ .
তত্র দৃষ্ট্বা সমাসানং বাল্মীকিং মুনিসত্তমম্ .. ৪৪..
ননাম শিরসা রামো লক্ষ্মণেন চ সীতযা .
দৃষ্ট্বা রামং রমানাথং বাল্মীকির্লোকসুন্দরম্ .. ৪৫..
জানকীলক্ষ্মণোপেতং জটামুকুটমণ্ডিতম্ .
কন্দর্পসদৃশাকারং কমনীযাম্বুজেক্ষণম্ .. ৪৬..
দৃষ্ট্বৈব সহসোত্তস্থৌ বিস্মযানিমিষেক্ষণঃ .
আলিঙ্গ্য পরমানন্দং রামং হর্ষাশ্রু লোচনঃ .. ৪৭..
পূজযিত্বা জগত্পূজ্যং ভক্ত্যার্ঘ্যাদিভিরদৃতঃ .
ফলমূলৈঃ স মধুরৈর্ভোজযিত্বা চ লালিতঃ .. ৪৮..
রাঘবঃ প্রাঞ্জলিঃ প্রাহ বাল্মীকিং বিনযান্বিতঃ .
পিতুরাজ্ঞাং পুরস্কৃত্য দণ্ডকানাগতা বযম্ .. ৪৯..
ভবন্তো যদি জানন্তী কিং বক্ষ্যামোঽত্র কারণম্ .
যত্র মে সুখবাসায ভবেত্স্থানং বদস্ব তত্ .. ৫০..
সীতযা সহিতঃ কালং কিঞ্চিত্তত্র নযাম্যহম্ .
ইত্যুক্তো রাঘবেণাসৌ মুনিঃ সস্মিতমব্রবীত্ .. ৫১..
ত্বমেব সর্বলোকানাং নিবাসস্থানমুত্তমম্ .
তবাপি সর্বভূতানি নিবাসসদনানি হি .. ৫২..
এবং সাধারণং স্থানমুক্তং তে রঘুনন্দন .
সীতযা সহিতস্যেন বিশেষং পৃচ্ছতস্তব .
তদ্বক্ষ্যামি রঘুশ্রেষ্ঠ যত্তে নিযতমন্দিরম্ .. ৫৩..
শান্তানাং সমদৃষ্টীনামদ্বেষ্টণাং চ জন্তুষু .
ত্বামেব ভজতাং নিত্যং হৃদযং তেঽধিমন্দিরম্ .. ৫৪..
ধর্মাধর্মান্পরিত্যজ্য ত্বামেব ভজতোঽনিশম্ .
সীতযা সহ তে রাম তস্য হৃত্সুখমন্দিরম্ .. ৫৫..
ত্বন্মন্ত্রজাপকো যস্তু ত্বামেব শরণং গতঃ .
নির্দ্বন্দ্বো নিঃস্পৃহস্তস্য হৃদযং তে সুমন্দিরম্ .. ৫৬..
নিরহঙ্কারিণঃ শান্তা যে রাগদ্বেষবর্জিতাঃ .
সমলোষ্টাশ্মকনকাস্তেষাং তে হৃদযং গৃহম্ .. ৫৭..
ত্বযি দত্তমনোবুদ্ধির্যঃ সন্তুষ্ট সদাঃ ভবেত্ .
ত্বযি সন্ত্যক্তকর্মা যস্তন্মনস্তে শুভং গৃহম্ .. ৫৮..
যো ন দ্বেষ্ট্যপ্রিযং প্রাপ্য প্রিযং প্রাপ্য ন হৃষ্যতে .
সর্বং মাযেতি নিশ্চিত্য ত্বাং ভজেত্তন্মনো গৃহম্ .. ৫৯..
ষড্ভাবাদিবিকারান্যো দেহে পশ্যতি নাত্মনি .
ক্ষুত্তৃট্ সুখং ভযং দুঃখং প্রাণবুদ্ধ্যোর্নিরীক্ষতে .. ৬০..
সংসারধর্মৈর্নির্মুক্তস্তস্য তে মানসং গৃহম্ .. ৬১..
পশ্যন্তি যে সর্বগুহাশযস্থং ত্বাং
                চিদ্ঘনং সত্যমনন্তমেকম্ .
অলেপকং সর্বগতং বরেণ্যং তেষাং
                হৃদব্জে সহ সীতযা বস .. ৬২..
নিরন্তরাভ্যাসদৃঢীকৃতাত্মনাং
                ত্বত্পাদসেবাপরিনিষ্ঠিতানাম্ .
ত্বন্নামকীর্ত্যা হতকল্মষাণাং
                সীতাসমেতস্য গৃহং হৃদব্জে .. ৬৩..
রাম ত্বন্নামমহিমা বর্ণ্যতে কেন বা কথম্ .
যত্প্রভাবাদহং রাম ব্রহ্মর্ষিত্বমবাপ্তবান্ .. ৬৪..
অহং পুরা কিরাতেষু কিরাতৈঃ সহ বর্ধিতঃ .
জন্মমাত্রদ্বিজত্বং মে শূদ্রাচাররতঃ সদা .. ৬৫..
শূদ্রাযাং বহবঃ পুত্রা উত্পন্না মেঽজিতাত্মনঃ .
ততশ্চোরশ্চ সঙ্গম্য চৌরোঽহমভবং পুরা .. ৬৬..
ধনুর্বাণধরো নিত্যং জীবানামন্তকোপমঃ .
একদা মুনযঃ সপ্ত দৃষ্টা মহতি কাননে .. ৬৭..
সাক্ষান্মযা প্রকাশন্তো জ্বলনার্কসমপ্রভঃ .
তানন্বধাবং লোভেন তেষাং সর্বপরিচ্ছদান্ .. ৬৮..
গ্রহীতুকামস্তত্রাহং তিষ্ঠ তিষ্ঠেতি চাব্রবম্ .
দৃষ্ট্বা মাং মুনযোঽপৃচ্ছন্কিমাযাসি দ্বিজাধমা .. ৬৯..
অহং তানব্রবং কিঞ্চিদাদাতুং মুনিসত্তমাঃ .
পুত্রদারাদযঃ সন্তি বহবো মে বুভুক্ষিতাঃ .. ৭০..
তেষাং সংরক্ষণার্থায চরামি গিরিকাননে .
ততো মামূচুরব্যগ্রাঃ পৃচ্ছ গত্বা কুটুম্বকম্ .. ৭১..
যো যো মযা প্রতিদিনং ক্রিযতে পাপসঞ্চযঃ .
যূযং তদ্ভাগিনঃ কিং বা নেতি বেতিপৃথক্পৃথক্ .. ৭২..
বযং স্থাস্যামহে তাবদাগমিষ্যসি নিশ্চযঃ .
তথেত্যুক্ত্বা গৃহং গত্বা মুনিভির্যদুদীরিতম্ .. ৭৩..
অপৃচ্ছং পুত্রদারাদীংস্তৈরুক্তোঽহং রঘূত্তম .
পাপং তবৈব তত্সর্বং বযং তু ফলভাগিনঃ .. ৭৪..
তত্শ্রুত্বা জাতনির্বেদো বিচার্য পুনরাগমম্ .
মুনযো যত্র তিষ্ঠন্তি করুণাপূর্ণমানসাঃ .. ৭৫..
মুনীনাং দর্শনাদেব শুদ্ধান্তঃকরণোঽভবম্ .
ধনুরাদীন্পরিত্যজ্য দণ্ডবত্পতিতোঽস্ম্যহম্ .. ৭৬..
রক্ষধ্বং মাং মুনিশ্রেষ্ঠা গচ্ছন্তং নিরযার্ণবম্ .
ইত্যগ্রে পতিতং দৃষ্ট্বা মামূচুর্মুনিসত্তমাঃ .. ৭৭..
উত্তিষ্ঠোত্তিষ্ঠ ভদ্রং তে সফলঃ সত্সমাগমঃ .
উপদেক্ষ্যামহে তুভ্যং কিঞ্চিত্তেনৈব মোক্ষ্যসে .. ৭৮..
পরস্পরং সমালোচ্য দুর্বৃত্তোযং দ্বিজাধমঃ .
উপেক্ষ্য এব সদ্বৃত্তস্তথাপি শরণং গতঃ .
রক্ষণীযঃ প্রযত্নেন মোক্ষমার্গোপদেশতঃ .. ৭৯..
ইত্যুক্ত্বা রাম তে নাম ব্যত্যস্তাক্ষরপূর্বকম্ .
একাগ্রমনসাত্রৈব মরেতি জপ সর্বদা .. ৮০..
আগচ্ছামঃ পুনর্যাবত্তাবদুক্তং সদা জপ .
ইত্যুক্ত্বা প্রযযুঃ সর্বে মুনযো দিব্যদর্শিনাঃ .. ৮১..
অহং যথোপদিষ্টং তৈস্তথাকরবমঞ্জসা .
জপন্নেকাগ্রমনসা বাহ্যং বিস্মৃতবানহম্ .. ৮২..
এবং বহুতিথে কালে গতে নিশ্চলরূপিণঃ .
সর্বসঙ্গবিহীনস্য বল্মীকোঽভূন্মমোপরি .. ৮৩..
ততো যুগসহস্রান্তে ঋষযঃ পুনরাগমন্ .
মামূচুর্নিষ্ক্রমস্বেতি তত্শ্রুত্বা তূর্ণমুত্থিতঃ .. ৮৪..
বল্মীকান্নির্গতশ্চাহং নীহারাদিব ভাস্করঃ .
মামপ্যাহুর্মুনিগণা বাল্মীকিস্ত্বং মুনীশ্বর .. ৮৫..
বল্মীকাত্সম্ভবো যস্মাদ্ দ্বিতীযং জন্ম তেঽভবত্ .
ইত্যুক্ত্বা তে যযুর্দিব্যগতিং রঘুকুলোত্তম .. ৮৬..
অহং তে রাম নাম্নশ্চ প্রভাবাদীদৃশোঽভবম্ .
অদ্য সাক্ষাত্প্রপশ্যামি সসীতং লক্ষ্মণেন চ .. ৮৭..
রামং রাজীবপত্রাক্ষং ত্বাং মুক্তো নাত্র সংশযঃ .
আগচ্ছ রাম ভদ্রং তে স্থলং বৈ দর্শযাম্যহম্ .. ৮৮..
এবমুক্ত্বা মুনিঃ শ্রীমাঁল্লক্ষ্মণেন সমন্বিতঃ .
শিষ্যৈঃ পরিবৃতো গত্বা মধ্যে পর্বতগঙ্গযোঃ .. ৮৯..
তত্র শালাং সুবিস্তীর্ণং কারযামাস বাসভূঃ .
প্রাক্পশ্চিমং দক্ষিণোদক্ শোভনং মন্দিরদ্বযম্ .. ৯০..
জানক্যা সহিতো রামো লক্ষ্মণেন সমন্বিতঃ .
তত্র তে দেবসদৃশা হ্যবসন্ ভবনাত্তমে .. ৯১..
বাল্মীকিনা তত্র সুপূজিতোঽযং
                রামঃ সসীতঃ সহ লক্ষ্মণেন .
দেবৈর্মুনীদ্রৈঃ সহিতো মুদাস্তে
                স্বর্গে যথা দেবপতিঃ সশচ্যা .. ৯২..
ইতি শ্রীমদধ্যাত্মরামযণে উমামহেশ্বরসংবাদে
   অযোধ্যাকাণ্ডে ষষ্ঠঃ সর্গঃ .. ৬..