অধ্যাত্ম রামাযণ ২ – অযোধ্যাকাণ্ডম্

      .. অধ্যাত্ম রামাযণম্ ..
       .. অযোধ্যা কাণ্ডঃ ..
       .. পঞ্চমঃ সর্গঃ ..
আযান্তং নাগরা দৃষ্ট্বা মার্গে রামং সজানকীম্ .
লক্ষ্মণেন সমং বীক্ষ্য ঊচুঃ সর্বে পরস্পরম্ .. ১..
কৈকেয্যা বরদানাদি শ্রুত্বা দুঃখসমাবৃতাঃ .
বত রাজা দশরথঃ সত্যসন্ধং প্রিযং সুতম্ .. ২..
স্ত্রীহেতোরত্যজত্কামী তস্য সত্যবতা কুতঃ .
কৈকেযী বা কথং দুষ্টা রামং সত্যং প্রিযঙ্করম্ .. ৩..
বিবাসযামাস কথং ক্রূরকর্মাতিমূঢধীঃ .
হে জনা নাত্র বস্তব্যং গচ্ছমোঽদ্যৈব কাননম্ .. ৪..
যত্র রামঃ সভার্যশ্চ সানুজো গন্তুমিচ্ছতি .
পশ্যন্তু জানকীং সর্বে পাদচারেণ গচ্ছতীম্ .. ৫..
পুংভিঃ কদাচিদ্দৃষ্ট্বা বা জানকী লোকসুন্দরী .
সাপি পাদেন গচ্ছন্তী জনসঙ্ঘেষ্বনাবৃতা .. ৬..
রামোঽপি পাদচারেণ গজাশ্বাদিবিবর্জিতঃ .
গচ্ছতি দ্রক্ষ্যথ বিভুং সর্বলোকৈকসুন্দরম্ .. ৭..
রাক্ষসী কৈকেযীনাম্নী জাতা সর্ববিনাশিনী .
রামস্যাপি ভবেদ্দুঃখং সীতাযাঃ পাদযানতঃ .. ৮..
বলবান্বিধিরেবাত্র পুংপ্রযত্নো হি দুর্বলঃ .
ইতি দুঃখাকুলে বৃন্দে সাধূনাং মুনিপুঙ্গবঃ .. ৯..
অব্রবীদ্বামদেবোঽথ সাধূনাং সঙ্ঘমধ্যগঃ .
মানুশোচথ রামং বা সীতাং বা বচ্মি তত্ত্বতঃ .. ১০..
এষ রমঃ পরো বিষ্ণুরাদিনারাযণঃ স্মৃতঃ .
এষা সা জানকী লক্ষ্মীর্যোগমাযেতি বিশ্রুতা .. ১১..
অসৌ শেষস্তমন্বেতি লক্ষ্মণাখ্যশ্চ সাম্প্রতম্ .
এষ মাযাগুণৈর্যুক্তস্তত্তদাকারবানিব .. ১২..
এষ এব রজোযুক্তো ব্রহ্মাভূদ্বিশ্বভাবনঃ .
সত্ত্বাবিষ্টস্তথা বিষ্ণুস্ত্রিজগত্প্রতিপালকঃ .. ১৩..
এষ রুদ্রস্তামসোঽন্তে জগত্প্রলযকারণম্ .
এষ মত্স্যঃ পুরা ভূত্বা ভক্তং বৈবস্বতং মনুম্ .. ১৪..
নাব্যারোপ্য লযস্যান্তে পালযামাস রাঘবঃ .
সমুদ্রমথনে পূর্বং মন্দরে সুতলং গতে .. ১৫..
অধারযত্স্বপৃষ্ঠেঽদ্রিং কূর্মরূপী রঘূত্তমঃ .
মহী রসাতলং যাতা প্রলযে সূকরোঽভবত্ .. ১৬..
তোলযামাস দংষ্ট্রাগ্রে তাং ক্ষোণীং রঘুনন্দনঃ .
নারসিংহং বপুঃ কৃত্বা প্রহ্লাদবরদঃ পুরা .. ১৭..
ত্রৈলোক্যকণ্টকং রক্ষঃ পাটযামাস তন্নখৈঃ .
পুত্ররাজ্যং হৃতং দৃষ্ট্বা হ্যদিত্যা যাচিতঃ পুরা .. ১৮..
বামনত্বমুপাগম্য যাঞ্চযা চাহরত্পুনঃ .
দুষ্টক্ষত্রিযভূভারনিবৃত্ত্যৈ ভার্গবোঽভবত্ .. ১৯..
স এব জগতাং নাথ ইদানীং রামতাং গতঃ .
রাবণাদীনি রক্ষাংসি কোটিশো নিহনিষ্যতি .. ২০..
মানুষেণৈব মরণং তস্য দৃষ্টং দুরাত্মনঃ .
রাজ্ঞা দশরথেনাপি তপসারাধিতো হরিঃ .. ২১..
পুত্রত্বাকাঙ্ক্ষযা বিষ্ণোস্তদা পুত্রোঽভবদ্ধরিঃ .
স এব বিষ্ণুঃ শ্রীরামো রাবণাদিবধায হি .. ২২..
গন্তাদ্যৈব বনং রামো লক্ষ্মণেন সহাযবান্ .
এষা সীতা হরের্মাযা সৃষ্টিস্থিত্যন্তকারিণী .. ২৩..
রাজা বা কৈকেযী বাপি নাত্র কারণমণ্বপি .
পূর্বেদ্যুর্নারদঃ প্রাহ ভূভারহরণায চ .. ২৪..
রামোঽপ্যাহ স্বযং সাক্ষাচ্ছ্বো গমিষ্যাম্যহং বনম্ .
অতো রামং সমুদ্দিশ্য চিন্তাং ত্যজত বালিশাঃ .. ২৫..
রামরামেতি যে নিত্যং জপন্তি মনুজা ভুবি .
তেষাং মৃত্যু ভযাদীনি ন ভবন্তি কদাচন .. ২৬..
কা পুনস্তস্য রামস্য দুঃখশঙ্কা মহাত্মনঃ .
রামনাম্নৈব মুক্তিঃ স্যাত্কলৌ নান্যেন কেনচিত্ .. ২৭..
মাযামানুষরূপেণ বিডম্বযতি লোককৃত্ .
ভক্তানাং ভজার্থায রাবণস্য বধায চ .. ২৮..
রাজ্ঞশ্চাভীষ্টসিদ্ধ্যর্থং মানুষং বপুরাশ্রিতঃ .
ইত্যুক্ত্বা বিররামাথ বামদেবো মাহামুনিঃ .. ২৯..
শ্রুত্বা তেঽপি দ্বিজাঃ সর্বে রামং জ্ঞাত্বা হরিং বিভুম্ .
জহুর্হৃত্সংশযগ্রন্থিং রামমেবান্বচিন্তযন্ .. ৩০..
য ইদং চিন্তযেন্নিত্যং রহস্যং রামসীতযোঃ .
তস্য রামে দৃঢা ভক্তির্ভবেদ্বিজ্ঞানপূর্বিকা .. ৩১..
রহস্যং গোপনীযং বো যূযং বৈ রাঘবপ্রিযাঃ .
ইত্যুক্ত্বা প্রযযৌ বিপ্রস্তেঽপি রামং পরং বিদুঃ .. ৩২..
ততো রামঃ সমাবিশ্য পিতৃগেহমবারিতঃ .
সানুজঃ সীতযা গত্বা কৈকেযীমিদমব্রবীত্ .. ৩৩..
আগতাঃ স্মো বযং মাতস্ত্রযস্তে সম্মতং বনম্ .
গন্তুং কৃতধিযঃ শীঘ্রমাজ্ঞাপযতু নঃ পিতা .. ৩৪..
ইত্যুক্তা সহসোত্থায চীরাণি প্রদদৌ স্বযম্ .
রামায লক্ষ্মণাযাথ সীতাযৈ চ পৃথক্ পৃথক্ .. ৩৫..
রামস্তু বস্ত্রাণ্যুত্সৃজ্য বন্যচীরাণি পর্যধাত্ .
লক্ষ্মণোঽপি তথা চক্রে সীতা তন্ন বিজানতী .. ৩৬..
হস্তে গৃহীত্বা রামস্য লজ্জযা মুখমৈক্ষত .
রামো গৃহীত্বা তচ্চীরম্ংশুকে পর্যচেষ্টযত্ .. ৩৭..
তদ্ দৃষ্ট্বা রুরুদঃ সর্বে রাজদারাঃ সমন্ততঃ .
বসিষ্ঠস্তু তদাকর্ণ্য রুদিতং ভর্ত্সযন্ রুষা .. ৩৮..
কৈকেযীং প্রাহ দুর্বৃত্তে রাম এব ত্বযা বৃতঃ .
বনবাসায দুষ্টে ত্বং সীতাযৈ কিং প্রযচ্ছসি .. ৩৯..
যদি রামং সমন্বেতি সীতা ভক্ত্যা পতিব্রতা .
দিব্যাম্বরধরা নিত্যং সর্বাভরণভূষিতম্ .. ৪০..
রমযত্বনিশং রামং বনদুঃখনিবারিণী .
রাজা দশরথোঽপ্যাহ সুমন্ত্রং রথমানয .. ৪১..
রথমারুহ্য গচ্ছন্তু বনং বনচরপ্রিযাঃ .
ইত্যুক্ত্বা রামমালোক্য সীতাং চৈব সলক্ষ্মণম্ .. ৪২..
দুঃখান্নিপতিতো ভূমৌ রুরোদাশ্রুপরিপ্লুতঃ .
আরুরোহ রথং সীতা শীঘ্রং রামস্য্ পশ্যতঃ .. ৪৩..
রামঃ প্রদক্ষিণং কৃত্বা পিতরং রথমারুহত্ .
লক্ষ্মণঃ খড্গযুগলং ধনুস্তূণীযুগং তথা .. ৪৪..
গৃহীত্বা রথমারুহ্য নোদযামাস সারথিম্ .
তিষ্ঠ তিষ্ঠ সুমন্ত্রেতি রাজা দশরথোঽব্রবীত্ .. ৪৫..
গচ্ছ গচ্ছেতি রামেণ নোদিতোঽচোদযদ্রথম্ .
রামে দূরং গতে রাজা মূর্চ্ছিতঃ প্রাপতদ্ভুবি .. ৪৬..
পৌরাস্তু বালবৃদ্ধাশ্চ বৃদ্ধা ব্রাহ্মণসত্তমাঃ .
তিষ্ঠ তিষ্ঠেতি রামেতি ক্রোশন্তো রথমন্বযুঃ .. ৪৭..
রাজা রুদিত্বা সুচিরং মাং নযন্তু গৃহং প্রতি .
কৌসল্যাযা রামমাতুরিত্যাহ পরিচারকান্ .. ৪৮..
কিঞ্চিত্কালং ভবেত্তত্র জীবনং দুঃখিতস্য মে .
অত ঊর্ধ্বং ন জীবামি চিরং রামং বিনা কৃতঃ .. ৪৯..
ততো গৃহং প্রবিশ্যৈব কৌসল্যাযাঃ পপাত হ .
মূর্চ্ছিতশ্চ চিরাদুদ্ধ্বা তূষ্ণীমেবাবতস্থিবান্ .. ৫০..
রামস্তু তমসাতীরং গত্বা তত্রাবসত্সুখী .
জলং প্রাশ্য নিরাহারো বৃক্ষমূলেঽস্বপদ্বিভুঃ .. ৫১..
সীতযা সহ ধর্মাত্মা ধনুষ্পাণিস্তু লক্ষ্মণঃ .
পালযামাস ধর্মজ্ঞঃ সুমন্ত্রেণ সমন্বিতঃ .. ৫২..
পৌরাঃ সর্বে সমাগত্য স্থিতাস্তস্যাবিদূরতঃ .
শক্তা রামং পুরং নেতুং নোচেদ্গচ্ছামহে বনম্ .. ৫৩..
ইতি নিশ্চযমাজ্ঞায তেষাং রামোঽতিবিস্মিতঃ .
নাহং গচ্ছামি নগরমেতে বৈ ক্লেশভাগিনঃ .. ৫৪..
ভবিষ্যন্তীতি নিশ্চিত্য সুমন্ত্রমিদমব্রবীত্ .
ইদানীমেব গচ্ছামঃ সুমন্ত্র রথমানয .. ৫৫..
ইত্যাজ্ঞপ্তঃ সুমন্ত্রোঽপি রথং বাহৈরযোজযত্ .
আরুহ্য রামঃ সীতা চ লক্ষ্মণোঽপি যযুর্দ্রুতম্ .. ৫৬..
অযোধ্যাভিমুখং গত্বা কিঞ্চিদ্দূরং ততো যযুঃ .
তেঽপি রামমদৃষ্ট্বৈব প্রাতরুত্থায দুঃখিতাঃ .. ৫৭..
রথনেমিগতং মার্গং পশ্যন্তস্তে পুরং যযুঃ .
হৃদি রামং সসীতং তে ধ্যাযন্তস্তথুরন্বহম্ .. ৫৮..
সুমন্ত্রোঽপি রথং শীঘ্রং নোদযামাস সাদরম্ .
স্ফীতান্ জনপদান্পশ্যন্ রামঃ সীতাসমন্বিতঃ .. ৫৯..
গঙ্গাতীরং সমাগচ্ছচ্ছৃঙ্গবেরাবিদূরতঃ .
গঙ্গাং দৃষ্ট্বা নমস্কৃত্য স্নাত্বা সানন্দমানসঃ .. ৬০..
শিংশিপাবৃক্ষমূলে স নিষসাদ রঘূত্তমঃ .
ততো গুহো জনৈঃ শ্রুত্বা রামাগমমহোত্সবম্ .. ৬১..
সখাযং স্বামিনং দ্রষ্টুং হর্ষাত্তূর্ণং সমাপতত্ .
ফলানি মধুপুষ্পাদি গৃহীত্বা ভক্তিসংযুতঃ .. ৬২..
রামস্যাগ্রে বিনিক্ষিপ্য দণ্ডবত্প্রাপতদ্ভুবি .
গুহমুত্থাপ্য তং তূর্ণং রাঘবঃ পরিষস্বজে .. ৬৩..
সংপৃষ্টকুশলো রামং গুহং প্রাঞ্জলিরব্রবীত্ .
ধন্যোঽহমদ্য মে জন্ম নৈষাদং লোকপাবন .. ৬৪..
বভূব পরমানদঃ স্পৃষ্ট্বা তেঽঙ্গং রঘূত্তম .
নৈষাদরাজ্যমেতত্তে কিঙ্করস্য রঘূত্তম .. ৬৫..
ত্বদধীনং বসন্নত্র পালযাস্মান্ রঘূদ্বহ .
আগচ্ছ যামো নগরং পাবনং কুরু মে গৃহম্ .. ৬৬..
গৃহাণ ফলমূলানি ত্বদর্থং সঞ্চিতানি মে .
অনুগৃহ্ণীষ্ব ভগবন্ দাসস্তেঽহং সুরোত্তম .. ৬৭..
রামস্তমাহ সুপ্রীতো বচনং শৃণু মে সখে .
ন বেক্ষ্যামি গৃহং গ্রামং নব বর্ষাণি পঞ্চ চ .. ৬৮..
দত্তমন্যেন নো ভুঞ্জে ফলমূলাদি কিঞ্চন .
রাজ্যং মমৈতত্তং সর্বং ত্বং সখা মেঽতিবল্লভঃ .. ৬৯..
বটক্ষীরং সমানায্য জটামুকুটমাদরাত্ .
ববন্ধ লক্ষ্মণেনাথ সহিতো রথুনন্দনঃ .. ৭০..
জলমা তু সম্প্রাশ্য সীতযা সহ রাঘবঃ .
আস্তৃতং কুশপর্ণাদ্যৈঃ শযনং লক্ষ্মণেন হি .. ৭১..
উবাস তত্র নগরপ্রাসাদাগ্রে যথা পুরা .
সুষ্বাপ তত্র বৈদেহ্যা পর্যঙ্ক ইব সংস্কৃতে .. ৭২..
ততোঽবিদূরে পরিগৃহ্য চাপং
        সবাণতূণীরধনুঃ স লক্ষ্মণঃ .
ররক্ষ রামং পরিতো বিপশ্যন্
        গুহেন সার্ধং সশরাসনেন .. ৭৩..
ইতি শ্রীমদধ্যাত্মরামযণে উমামহেশ্বরসংবাদে
   অযোধ্যাকাণ্ডে পঞ্চমঃ সর্গঃ .. ৫..