অধ্যাত্ম রামাযণ ২ – অযোধ্যাকাণ্ডম্

      .. অধ্যাত্ম রামাযণম্ ..
       .. অযোধ্যা কাণ্ডঃ ..
       .. চতুর্থঃ সর্গঃ ..
ততঃ সুমিত্রা দৃষ্ট্বৈনং রামং রাজ্ঞীং সসম্ভ্রমা .
কৌসল্যাং বোধযামাস রামোঽযং সমুপস্থিতঃ .. ১..
শ্রুত্বৈব রামনামৈষা বহির্দৃষ্টিপ্রবাহিতা .
রামং দৃষ্ট্বা বিশালাক্ষমালিঙ্গ্যাঙ্কে ন্যবেশযত্ .. ২..
মূর্ধ্ন্যবঘ্রায পস্পর্শ গাত্রং নীলোত্পলচ্ছবি .
ভুঙ্ক্ষ্ব পুত্রেতি চ প্রাহ মিষ্টমন্নং ক্ষুধার্তিতঃ .. ৩..
রামঃ প্রাহ ন মে মাতর্ভোজনাবসরঃ কুতঃ .
দণ্ডকাগমনে শীঘ্রং মম কালোঽদ্য নিশ্চিতঃ .. ৪..
কৈকেযীবরদানেন সত্যসন্ধঃ পিতা মম .
ভরতায দদৌ রাজ্যং মমাপ্যারণ্যমুত্তমম্ .. ৫..
চতুর্দশ সমাস্তত্র হ্যুষিত্বা মুনিবেষধৃক্ .
আগমিষ্যে পুনঃ শীঘ্রং ন চিন্তাং কর্তুমর্হসি .. ৬..
তত্শ্রুত্বা সহসোদ্বিগ্না মূর্চ্ছিতা পুনরুত্থিতা .
আহ রামং সুদুঃখার্তা দুঃখসাগরসংপ্লুতা .. ৭..
যদি রাম বনং সত্যং যাসি চেন্নয মামপি .
ত্বদ্বিহীনা ক্ষণাদর্থং বা জীবিতং ধারযে কথম্ .. ৮..
যথা গৌর্বালকং বত্সং ত্যক্ত্বা তিষ্ঠেন্ন কুত্রচিত্ .
তথৈব ত্বাং ন শক্নোমি ত্যক্তুং প্রাণাত্প্রিযং সুতম্ .. ৯..
ভরতায প্রসন্নশ্চেদ্রাজ্যং রাজা প্রযচ্ছতু .
কিমর্থং বনবাসায ত্বামাজ্ঞাপযতি প্রিযম্ .. ১০..
কৈকেয্যা বরদো রাজা সর্বস্বং বা প্রযচ্ছতু .
ত্বযা কিমপরাদ্ধং হি কৈকেয্যা বা নৃপস্য বা .. ১১..
পিতা গুরুর্যথা রাম তবাহমধিকা ততঃ .
পিত্রাঽঽজ্ঞপ্তো বনং গন্তুং বারযেযমহং সুতম্ .. ১২..
যদি গচ্ছসি মদ্বাক্যমুল্লঙ্ঘ্য নৃপবাক্যতঃ .
তদা প্রাণান্পরিত্যজ্য গচ্ছামি যমসাদনম্ .. ১৩..
লক্ষ্মণোঽপি ততঃ শ্রুত্বা কৌসল্যাবচনং রুষা .
উবাচ রাঘবং বীক্ষ্য দহন্নিব জগত্ত্রযম্ .. ১৪..
উন্মত্তং ভ্রান্তমনসং কৈকেযীবশবর্তিনম্ .
বদ্ধ্বা নিহন্মি ভরতং তদ্বন্ধূন্মাতুলানপি .. ১৫..
অদ্য পশ্যন্তু মে শৌর্যং লোকান্প্রদহতঃ পুরা .
রাম ত্বমভিষেকায কুরু যত্নমরিন্দম .. ১৬..
ধনুষ্পাণিরহং তত্র নিহন্ত্য বিঘ্নকারিণঃ .
ইতি ব্রুবন্তং সৌমিত্রিমালিঙ্গ্য রঘুনন্দনঃ .. ১৭..
শূরোঽসি রঘুশার্দূল মমাত্যন্তহিতে রতঃ .
জানামি সর্বং তে সত্যং কিন্তু তত্সমযো ন হি .. ১৮..
যদিদং দৃশ্যতে সর্বং রাজ্যং দেহাদিকং চ যত্ .
যদি সত্যং ভবেত্তত্র আযাসঃ সফলশ্চ তে .. ১৯..
ভোগা মেঘবিতানস্যবিদ্যুল্লেখেব চঞ্চলাঃ .
আযুরপ্যগ্নিসন্তপ্তলোহস্যজলবিন্দুবত্ .. ২০..
যথা ব্যালগলস্যোঽপি ভেকো দংশানপেক্ষতে .
তথা কালাহিনা গ্রস্তো লোকো ভোগানশাশ্বতান্ .. ২১..
করোতি দুঃখেন হি কর্মতন্ত্রং
        শরীরভোগার্থমহর্নিশং নরঃ .
দেহস্তু ভিন্নঃ পুরুষাত্সমীক্ষ্যতে
        কো বাত্র ভোগঃ পুরুষেণ ভুজ্যতে .. ২২..
পিতৃমাতৃসুতভ্রাতৃদারবন্ধবাদিসংগমঃ .
প্রপাযামিব জন্তূনাং নদ্যাং কাষ্ঠৌদ্যবচ্চলঃ .. ২৩..
ছাযেব লক্ষ্মীশ্চপলা প্রতীতা
        তারুণ্যমম্বূর্মিবদধ্রুবং চ .
স্বপ্নোপমং স্ত্রীসুখমাযুরল্পং
        তথাপি জন্তোরভিমান এষঃ .. ২৪..
সংসৃতিঃ স্বপ্নসদৃশী সদা রোগাদিসঙ্কুলা .
গান্ধরবনগরপ্রখ্যা মূঢস্তামনুবর্ততে .. ২৫..
আযুষ্যং ক্ষীযতে যস্মাদাদিত্যস্য গতাগতৈঃ .
দৃষ্ট্বান্যেষাং জরামৃত্যূ কথঞ্চিন্নৈব বুধ্যতে .. ২৬..
স এব দিবসঃ সৈব রাত্রিরিত্যেব মূঢধীঃ .
ভোগাননুপতত্যেব কালবেগং ন পশ্যতি .. ২৭..
প্রতিক্ষণং ক্ষরত্যেতদাযুরামঘটাম্বুবত্ .
সপত্না ইব রোগৌঘাঃ শরীরং প্রহরন্ত্যহো .. ২৮..
জরা ব্যাঘ্রীব পুরতস্তর্জযন্ত্যবতিষ্ঠতে .
মৃত্যুঃ সহৈব যাত্যেষ সমযং সম্প্রতীক্ষতে .. ২৯..
দেহেঽহংভাবমাপন্নো রাজাহং লোকবিশ্রুতঃ .
ইত্যস্মিন্মনুতে জন্তুঃ কৃমিবিঙ্ভস্মসংজ্ঞিতে .. ৩০..
ত্বগস্থিমাংসবিণ্মূত্ররেতোরক্তাদিসংযুতঃ .
বিকারী পরিণামী চ দেহ আত্মা কথং বদ .. ৩১..
যমাস্থায ভবাঁল্লোকে দগ্ধুমিচ্ছতি লক্ষ্মণ .
দেহাভিমানিনঃ সর্বে দোষাঃ প্রাদুর্ভবন্তি হি .. ৩২..
দেহোঽহমিতি যো বুদ্ধিরবিদ্যা সা প্রকীর্তিতা .
নাহং দেহশ্চিদাত্মেতি বুদ্ধির্বিদ্যেতি ভণ্যতে .. ৩৩..
অবিদ্যা সংসৃতের্হেতুর্বিদ্যা তস্যা নিবর্তিকা .
তস্মাদ্যত্নঃ সদা কার্যো বিদ্যাভ্যাসে মুমুক্ষুভিঃ .
কামক্রোধাদযস্তত্র শত্রবঃ শত্রুসূদন .. ৩৪..
তত্রাপি ক্রোধ এবালং মোক্ষবিঘ্নায সর্বদা .
যেনাবিষ্টঃ পুমান্হন্তি পিতৃভ্রাতৃসুহৃত্সখীন্ .. ৩৫..
ক্রোধমূলো মনস্তাপঃ ক্রোধঃ সংসারবন্ধনম্ .
ধর্মক্ষযকরঃ ক্রোধস্তস্মাত্ক্রোধং পরিত্যজ .. ৩৬..
ক্রোধ এষ মহান্ শত্রুস্তৃষ্ণা বৈতরণী নদী .
সন্ত্তোষো নন্দনবনং শান্তিরেব হি কামধুক্ .. ৩৭..
তস্ম্মচ্ছান্তিং ভজস্বাদ্য শত্রুরেবং ভবেন্ন তে .
দেহেন্দ্রিযমনঃপ্রাণবুদ্ধ্যাদিভ্যো বিলক্ষণঃ .. ৩৮..
আত্মা শুদ্ধঃ স্বযংজ্যোতিরবিকারী নিরাকৃতিঃ .
যাবদ্দেহেন্দ্রিযপ্রাণৈর্ভিন্নত্বং নাত্মনো বিদুঃ .. ৩৯..
তাবত্সংসারদুঃখৌঘৈঃ পীড্যন্তে মৃত্যুসংযুতাঃ .
তস্মাত্ত্বং সর্বদা ভিন্নমাত্মানং হৃদি ভাবয .. ৪০..
বুদ্ধ্যাদিভ্যো বহিঃ সর্বমনুবর্তস্ব মা খিদঃ .
ভুঞ্জন্প্রারব্ধমখিলং সুখং বা দুঃখমেব বা .. ৪১..
প্রবাহপতিতং কার্যং কুর্বন্নপি ন লিপ্যসে .
বাহ্যে সর্বত্র কর্তৃত্বমাবহন্নপি রাঘব .. ৪২..
অন্তঃশুদ্ধস্বভাবস্ত্বং লিপ্যসে ন চ কর্মভিঃ .
এতন্মযোদিতং কৃত্স্নং হৃদি ভাবয সর্বদা .. ৪৩..
সংসারদুঃখৈরখিলৈর্বাধ্যসে ন কদাচন .
ত্বমপ্যম্ব মমাঽঽদিষ্টং হৃদি ভাবয নিত্যদা .. ৪৪..
সমাগমং প্রতীক্ষম্ব ন দুঃখৈঃ পীড্যসে চিরম্ .
ন সদৈকত্র সংবাসঃ কর্মমার্গানুবর্তিনাম্ .. ৪৫..
যথা প্রবাহপতিতপ্লবানাং সরিতাং তথা .
চতুর্দশসমাসঙ্খ্যা ক্ষণার্দ্ধমিব জাযতে .. ৪৬..
অনুমন্যস্ব মামম্ব দুঃখং সন্ত্যজ্য দূরতঃ .
এবং চেত্সুখসংবাসো ভবিষ্যতি বনে মম .. ৪৭..
ইত্যুক্ত্বা দণ্ডবন্মাতুঃ পাদযোরপতচ্চিরম্ .
উত্থাপ্যাঙ্কেসমাবেশ্য আশীর্ভিরভ্যনন্দযত্ .. ৪৮..
সর্বে দেবাঃ সগন্ধর্বা ব্রহ্মবিষ্ণুশিবাদযঃ .
রক্ষন্তু ত্বাং সদা যান্তং তিষ্ঠন্তং নিদ্রযাযুতম্ .. ৪৯..
ইতি প্রস্থাপযামাস সমালিঙ্গ্য পুনঃ পুনঃ .
লক্ষ্মণোঽপি তদা রামং নত্বা হর্ষাশ্রুগদ্গদঃ .. ৫০..
আহ রাম মমান্তঃস্থঃ সংশযোঽযং ত্বযা হৃতঃ .
যাস্যামি পৃষ্ঠতো রাম সেবাং কর্তুং তদাদিশ .. ৫১..
অনুগৃহ্ণীষ্ব মাং রাম নোচেত্প্রাণাংস্ত্যজাম্যহম্ .
তথেতিরাঘবোঽপ্যাহলক্ষ্মণং যাহি মা চিরম্ .. ৫২..
প্রতস্থে তাং সমাধাতুং গতঃ সীতাপতির্বিভুঃ .
আগতং পতিমালোক্য সীতা সুস্মিতভাষিণী .. ৫৩..
স্বর্ণপাত্রস্থসলিলৈঃ পাদৌ প্রক্ষাল্য ভক্তিতঃ .
পপ্রচ্ছ পতিমালোক্য দেব কিং সেনযা বিনা .. ৫৪
আগতোঽসি গতঃ কুত্র শ্বেতচ্ছত্রং চ তে কুতঃ .
বাদিত্রাণি ন বান্দ্যতে কিরীটাদিবিবর্জিতঃ .. ৫৫..
সামন্তরাজসহিতঃ সম্ভ্রমান্নাগতোঽসি কিম্ .
ইতি স্মসীতযা পৃষ্টো রামঃ সস্মিতমব্রবীত্ .. ৫৬..
রাজ্ঞা মে দণ্ডকারণ্যে রাজ্যং দত্তং শুভেঽখিলম্ .
অতস্তত্পালনার্থায শীঘ্রং যাস্যামি ভামিনি .. ৫৭..
অদ্যৈব যাস্যামি বনং ত্বং তু শ্বশ্রূসমীপগা .
শুশ্রূষাং কুরু মে মাতুর্ন মিথ্যাবাদিনো বযম্ .. ৫৮..
ইতি ব্রুবন্তং শ্রীরামং সীতা ভীতাব্রবীদ্বচঃ .
কিমর্থং বনরাজ্যং তে পিত্রা দত্তং মহাত্মনা .. ৫৯..
তামাহ রামঃ কৈকেয্যৈ রাজা প্রীতো বরং দদৌ .
ভরতায দদৌ রাজ্যং বনবাসং মমানঘে .. ৬০..
চতুর্দশ সমাস্তত্র বাসো মে কিল যাচিতঃ .
তযা দেব্যা দদৌ রাজা সত্যবাদী দযাপরঃ .. ৬১..
অতঃ শীঘ্রং গমিষ্যামি মা বিঘ্নং কুরু ভামিনি .
শ্রুত্বা তদ্রামবচনং জানকী প্রীতিসংযুতা .. ৬২..
অহমগ্রে গমিষ্যামি বনং পশ্চাত্ত্বমেষ্যসি .
ইত্যাহ মাং বিনা গন্তুং তব রাঘব নোচিতম্ .. ৬৩..
তামাহ রাঘবঃ প্রীতঃ স্বপ্রিযাং প্রিযবাদিনীম্ .
কথং বনং ত্বাং নেষ্যেঽহং বহুব্যাঘ্রমৃগাকুলম্ .. ৬৪..
রাক্ষসা ঘোররূপাশ্চ সন্তি মানুষভোজিনঃ .
সিংহব্যাঘ্রবরাহাশ্চ সঞ্চরন্তি সমন্ততঃ .. ৬৫..
কট্বম্লফলমূলানি ভোজনার্থং সুমধ্যমে .
অপূপানপি ব্যঞ্জনানি বিদ্যন্তে ন কদাচন .. ৬৬..
কালে কালে ফলং বাপি বিদ্যতে কুত্র সুন্দরি .
মার্গো ন দৃশ্যতে ক্বাপি শর্করাকণ্টকান্বিতঃ .. ৬৭..
গুহাগহ্বরসম্বাধং ঝল্লীদংশাদিভির্যুতম্ .
এবং বহুবিধং দোষং বনং দণ্ডকসজ্ঞিতম্ .. ৬৮..
পাদচারেণ গন্তব্যং শীতবাতাতপাদিমত্ .
রাক্ষসাদীন্বনে দৃষ্ট্বা জীবিতং হাস্যসেঽচিরাত্ .. ৬৯..
তস্মাদ্ভদ্রে গৃহে তিষ্ঠ শীঘ্রং দ্রক্ষ্যসি মাং পুনঃ .
রামস্য বচনং শ্রুত্বা সীতা দুঃখসমন্বিতা .. ৭০..
প্রত্যুবাচ স্ফুরদ্বক্ত্রা কিঞ্চিত্কোপসমন্বিতা .
কথং মামিচ্ছসে ত্যক্তুং ধর্মপত্নীং পতিব্রতাম্ .. ৭১..
ত্বদনন্যামদোষাং মাং ধর্মজ্ঞোঽসি দযাপরঃ .
ত্বত্সমীপে স্থিতাং রাম কো বা মাং ধর্ষযেদ্বনে .. ৭২..
ফলমূলাদিকং যদ্যত্তব ভুক্তাবশেষিতম্ .
তদেবামৃততুল্যং মে তেন তুষ্টা রমাম্যহম্ .. ৭৩..
ত্বযা সহ চরন্ত্যা মে কুশাঃ কাশাশ্চ কণ্টকাঃ .
পুষ্পাস্তরণতুল্যা মে ভবিষ্যন্তি ন সংশযঃ .. ৭৪..
অহং ত্বাং ক্লেশযে নৈব ভবেযং কার্যসাধিনী .
বাল্যে মাং বীক্ষ্য কশ্চিদ্বৈজ্যোতিঃশাস্ত্রবিশারদঃ .. ৭৫..
প্রাহ তে বিপিনে বাসঃ পত্যা সহ ভবিষ্যতি .
সত্যবাদী দ্বিজো ভূযাদ্গমিষ্যামি ত্বযা সহ .. ৭৬..
অন্যত্কিঞ্চিত্প্রবক্ষ্যামি শ্রুত্বা মাং নয কাননম্ .
রামাযণানি বহুশঃ শ্রুতানি বহুভির্দ্বিজৈঃ .. ৭৭..
সীতাং বিনা বনং রামো গতঃ কিং কুত্রচিদ্বদ .
অতস্ত্বযা গমিষ্যামি সর্বথা ত্বত্সহাযিনী .. ৭৮..
যদিগচ্ছসি মং ত্যত্ক্ত্বা প্রাণাংস্ত্যক্ষ্যামি তেঽগ্রতঃ .
ইতি তং নিশ্চযং জ্ঞাত্বা সীতাযা রঘুনন্দনঃ .. ৭৯..
অব্রবীদ্দেবি গচ্ছ ত্বং বনং শীঘ্রং মযা সহ .
অরুন্ধত্যৈ প্রযচ্ছাশু হারানাভরণানি চ .. ৮০..
ব্রাহ্মণেভ্যো ধনং সর্বং দত্ত্বা গচ্ছামহে বনম্ .
ইত্যুক্ত্বা লক্ষ্মণেনাশু দ্বিজানাহূয ভক্তিতঃ .. ৮১..
দদৌ গবাং বৃন্দশতং ধনানি
        বস্ত্রাণি দিব্যানি বিভূষণানি .
কুটুম্ববদ্ভ্যঃ শ্রুতশীলবদ্ভ্যো
        মুদা দ্বিজেভ্যো রঘুবংশকেতুঃ .. ৮২..
অরুন্ধত্যৈ দদৌ সীতা মুখ্যান্যাভরণানি চ .
রামো মাতুঃ সেবকেভ্যো দদৌ ধনমনেকধা .. ৮৩..
স্বকান্তঃপুরবাসিভ্যঃ সেবকেভ্যস্তথৈব চ .
পৌরজানপদেভ্যশ্চ ব্রাহ্মণেভ্যঃ সহস্রশঃ .. ৮৪..
লক্ষ্মণোঽপি সুমিত্রাং তু কৌসল্যাযৈ সমর্পযত্ .
ধনুষ্পাণিঃ সমাগত্য রামস্যাগ্রে ব্যবস্থিতঃ .. ৮৫..
রামঃ সীতা লক্ষ্মণশ্চ জগ্মুঃ সর্বে নৃপালযম্ .. ৮৬..
শ্রীরামঃ সহ সীতযা নৃপপথে গচ্ছন্ শনৈঃ সানুজঃ .
পৌরান্ জানপদ্দ্কুতূহলদৃশঃ সানন্দমুদ্বীক্ষযন্ .
শ্যামঃ কামসহস্রসুন্দরবপুঃ কান্ত্যা দিশো ভাসযন্ .
পাদন্যাসপবিত্রিতাখিলজগত্ প্রাপালযং তত্পিতুঃ .. ৮৭..
ইতি শ্রীমদধ্যাত্মরামযণে উমামহেশ্বরসংবাদে
   অযোধ্যাকাণ্ডে চতুর্থঃ সর্গঃ .. ৪..