অধ্যাত্ম রামাযণ ২ – অযোধ্যাকাণ্ডম্

      .. অধ্যাত্ম রামাযণম্ ..
       .. অযোধ্যা কাণ্ডঃ ..
       .. তৃতীযঃ সর্গঃ ..
ততো দশরথো রাজা রামাভ্যুদযকারণাত্ .
আদিশ্য মন্ত্রিপ্রকৃতীঃ সানন্দো গৃহমাবিশত্ .. ১..
তত্রাদৃষ্ট্বা প্রিযাং রাজা কিমেতদিতি বিহ্বলঃ .
যা পুরা মন্দিরং তস্যাঃ প্রবিষ্টে মযি শোভনা .. ২..
হসন্তী মামুপাযাতি সা কিং নৈবাদ্য দৃশ্যতে .
ইত্যাত্মন্যেব সংচিন্ত্য মনসাতিবিদূযতা .. ৩..
পপ্রচ্ছ দাসীনিকরং কুতো বঃ স্বামিনী শুভা .
নাযাতি মাং যথাপূর্বং মত্প্রিযা প্রিযদর্শনা .. ৪..
তা ঊচুঃ ক্রোধভবনং প্রবিষ্টা নৈব বিদ্মহে .
কারণং তত্র দেব ত্বং গচ্ছ নিশ্চেতুমর্হসি .. ৫..
ইত্যুক্তো ভযসন্ত্রস্তো রাজা তস্যাঃ সমীপগঃ .
উপবিশ্য শনৈর্দেহং স্পৃশন্বৈ পাণিনাব্রবীত্ .. ৬..
কিং শেষে বসুধাপৃষ্টে পর্যঙ্কাদীন্ বিহায চ .
মাং ত্বং খেদযসে ভীরু যতো মাং নাবভাষসে .. ৭..
অলঙ্কারং পরিত্যজ্য ভূমৌ মলিনবাসসা .
কিমর্থং ব্রূহি সকলং বিধাস্যে তব বাঞ্ছিতম্ .. ৮..
কো বা তবাহিতং কর্তা নারী বা পুরুষোঽপি বা .
স মে দণ্ড্যশ্চ বধ্যশ্চ ভবিষ্যতি ন সংশযঃ .. ৯..
ব্রূহি দেবি যথা প্রীতিস্তদবশ্যং মমাগ্রতঃ .
তদিদানীং সাধযিষ্যে সুদুর্লভমপি ক্ষণাত্ .. ১০..
জানাসি ত্বং মম স্বান্তং প্রিযং মাং স্ববশে স্থিতম্ .
তথাপি মাং খেদযসে বৃথা তব পরিশ্রমঃ .. ১১..
ব্রূহি কিং ধনিনং কুর্যাং দরিদ্রং তে প্রিযঙ্করম্ .
ধনিনং ক্ষণমাত্রেণ নির্ধনং চ তবাহিতম্ .. ১২..
ব্রূহি কিং বা বধিষ্যামি বধার্হো বা বিমোক্ষ্যসে .
কিমত্র বহুনোক্তেন প্রাণান্দাস্যামি তে প্রিযে .. ১৩..
মম প্রাণাত্প্রিযতরো রামো রাজীবলোচনঃ .
তস্যোপরি শপে ব্রূহি ত্বদ্ধিতং তত্করোম্যহম্ .. ১৪..
ইতি ব্রুবাণং রাজানং শপন্তং রাঘবোপরি .
শনৈর্বিমৃজ্য নেত্রে সা রাজানং প্রত্যভাষত .. ১৫..
যদি সত্যপ্রতিজ্ঞোঽসি শপথং কুরুষে যদি .
যাচ্ঞ্চাং মে সফলাং কর্তুং শীঘ্রমেব ত্বমর্হসি .. ১৬..
পূর্বং দেবাসুরে যুদ্ধে মযা ত্বং পরিরক্ষিতঃ .
তদা বরদ্বযং দত্তং ত্বযা মে তুষ্টচেতসা .. ১৭..
তদ্দ্বযং ন্যাসভূতং মে স্থাপিতং ত্বযি সুব্রত .
তত্রৈকেন বরেণাশু ভরতং মে প্রিযং সুতম্ .. ১৮..
এভিঃ সংভৃতসংভারৈর্যৌবরাজ্যেঽভিষেচয .
অপরেণ বরেণাশু রামো গচ্ছতু দণ্ডকান্ .. ১৯..
মুনিবেষধরঃ শ্রীমান্ জটাবল্কলভূষণঃ .
চতুর্দশ সমাস্তত্র কন্দমূলফলাশনঃ .. ২০..
পুনরাযাতু তস্যান্তে বনে বা তিষ্ঠতু স্বযম্ .
প্রভাতে গচ্ছতু বনং রামো রাজীবলোচনঃ .. ২১..
যদি কিঞ্চিদ্বিলম্বেত প্রাণাংস্ত্যক্ষ্যে তবাগ্রতঃ .
ভব সত্যপ্রতিজ্ঞস্ত্বমেতদেব মম প্রিযম্ .. ২২..
শ্রুত্বৈতদ্দারুণং বাক্যং কৈকেয্যা রোমহর্ষণম্ .
নিপপাত মহীপালো বজ্রাহত ইবাচলঃ .. ২৩..
শনৈরুন্মীল্য নযনে বিমৃজ্য পরযা ভিযা .
দুঃস্বপ্নো বা মযা দৃষ্টোহ্যথবা চিত্তবিভ্রমঃ .. ২৪..
ইত্যালোক্য পুরঃ পত্নীং ব্যাঘ্রীমিব পুরঃ স্থিতম্ .
কিমিদং ভাষসে ভদ্রে মম প্রাণহরং বচঃ .. ২৫..
রামঃ কমপরাধং তে কৃতবান্কমলেক্ষণঃ .
মমাগ্রে রাঘবগুণান্বর্ণযস্যনিশং শুভান্ .. ২৬..
কৌসল্যাং মাং সমং পশ্যন্ শুশ্রূষা কুরুতে সদা .
ইতি ব্রুবন্তী ত্বং পূর্বমিদানীং ভাষসেঽন্যথা .. ২৭..
রাজ্যং গৃহাণ পুত্রায রামস্তিষ্ঠতু মন্দিরে .
অনুগৃহ্ণীষ্ব মাং বামে রামান্নাস্তি ভযং তব .. ২৮..
ইত্যুক্ত্বাশ্রুপরীতাক্ষঃ পাদযোর্নিপপাত হ .
কৈকেযী প্রত্যুবাচেদং সাপি রক্তান্তলোচনা .. ২৯..
রাজেন্দ্র কিং ত্বং ভ্রান্তোঽসি উক্তং তদ্ভাষসেঽন্যথা .
মিথ্যা করোষি চেত্স্বীযং ভাষিতং নরকো ভবেত্ .. ৩০..
বনং ন গচ্ছেদ্যদি রামচন্দ্রঃ
        প্রভাতকালেঽজিনচীরযুক্তঃ .
উদ্বন্ধনং বা বিষভক্ষণং বা
        কৃত্বা মরিষ্যে পুরতস্তবাহম্ .. ৩১..
সত্যপ্রতিজ্ঞোঽহমিতীহ লোকে
        বিডম্বসে সর্বসভান্তরেষু .
রামোপরি ত্বং শপথং চ কৃত্বা
        মিথ্যাপ্রতিজ্ঞো নরকং প্রযাহি .. ৩২..
ইত্যুক্তঃ প্রিযযা দীনো মগ্নো দুঃখার্ণবে নৃপঃ .
মূর্চ্ছিতঃ পতিতো ভূমৌ বিসংজ্ঞো মৃতকো যথা .. ৩৩..
এবং রাত্রিগতা তস্য দুঃখাত্স্ংবত্সরোপমা .
অরুণোদযকালে তু বন্দিনো গাযকা জগুঃ .. ৩৪..
নিবারযিত্বা তান্ সর্বান্কৈকেযী রোষমাস্থিতা .
ততঃ প্রভাতসমযে মধ্যকক্ষমুপস্থিতাঃ .. ৩৫..
ব্রাহ্মণাঃ ক্ষত্রিযা বৈশ্যা ঋষযঃ কন্যকাস্তথা .
ছত্রং চ চামরং দিব্যং গজো বাজী তথৈব চ .. ৩৬..
অন্যাশ্চ বারমুখ্যা যাঃ পৌরজানপদাস্তথা .
বসিষ্ঠেন যথাজ্ঞপ্তং তত্সর্বং তত্র সংস্থিতম্ .. ৩৭..
স্ত্রিযো বালাশ্চ বৃদ্ধাশ্চ রাত্রৌ নিদ্রাং ন লেভিরে .
কদা দ্রক্ষ্যামহে রামং পীতকৌশেযবাসসম্ .. ৩৮..
সর্বাভরণসম্পন্নং কিরীটকটকোজ্জ্বলম্ .
কৌস্তুভাভরণং শ্যামং কন্দর্পশতসুন্দরম্ .. ৩৯..
অভিষিক্তং সমাযাতং গজারূঢং স্মিতাননম্ .
শ্বেতচ্ছত্রধরং তত্র লক্ষ্মণং লক্ষণান্বিতম্ .. ৪০..
রামং কদা বা দ্রক্ষ্যামঃ প্রভাতং বা কদা ভবেত্ .
ইত্যুত্সুকধিযঃ সর্বে বভূবুঃ পুরবাসিনঃ .. ৪১..
নেদানীমুত্থিতো রাজা কিমর্থং চেতি চিন্তযন্ .
সুমন্ত্রঃ শনকৈঃ প্রাযাদ্যত্র রাজাবতিষ্ঠতে .. ৪২..
বর্ধযন্ জযশব্দেন প্রণমন্শিরসা নৃপম্ .
অতিখিন্নং নৃপং দৃষ্ট্বা কৈকেযীং সমপৃচ্ছত .. ৪৩..
দেবি কৈকেযি বর্ধস্ব কিং রাজা দৃশ্যতেঽন্যথা .
তমাহ কৈকেযী রাজা রাত্রৌ নিদ্রাং ন লব্ধবান্ .. ৪৪..
রাম রামেতি রামেতি রামমেবানুচিন্তযন্ .
প্রজাগরেণ বৈ রাজা হ্যস্বস্থ ইব লক্ষ্যতে .
রামমানয শীঘ্রং ত্বং রাজা দ্রষ্টুমিহেচ্ছতি .. ৪৫..
অশ্রুত্বা রাজবচনং কথং গচ্ছামি ভামিনি .
তত্শ্রুত্বা মন্ত্রিণো বাক্যং রাজা মন্ত্রিণমব্রবীত্ .. ৪৬..
সুমন্ত্র রামং দ্রক্ষ্যামি শীঘ্রমানয সুন্দরম্ .
ইত্যুক্ত্বস্ত্বরিতং গত্বা সুমন্ত্রো রামমন্দিরম্ .. ৪৭..
অবারিতঃ প্রবিষ্টোঽযং ত্বরিতং রামমব্রবীত্ .
শীঘ্রমাগচ্ছ ভদ্রং তে রাম রাজীবলোচন .. ৪৮..
পিতুর্গেহং মযা সার্ধং রাজা ত্বাং দ্রষ্টুমিচ্ছতি .
ইত্যুক্তো রথমারুহ্য সম্ভ্রমাত্ত্বরিতো যযৌ .. ৪৯..
রামঃ সারথিনা সার্ধং লক্ষ্মণেন সমন্বিতঃ .
মধ্যকক্ষে বসিষ্টাদীন্ পশ্যন্নেব ত্বরান্বিতঃ .. ৫০..
পিতুঃ সমীপং সঙ্গম্য ননাম চরণৌ পিতুঃ .
রামমালিলিঙ্গ্য রাজা সমুত্থায সসম্ভ্রমঃ .. ৫১..
বাহূ প্রসার্য রামেতি দুঃখান্মধ্যে পপাত হ .
হ্বাহেতি রামস্তং শীঘ্রমালিঙ্গ্যাঙ্কেন্যবেশযত্ .. ৫২..
রাজানং মূর্চ্ছিতং দৃষ্ট্বা চুক্রুশুঃ সর্বযোষিতঃ .
কিমর্থং রোদনমিতি বসিষ্টোঽপি সমাবিশত্ .. ৫৩..
রামঃ পপ্রচ্ছ কিমিদং রাজ্ঞো দুঃখ্যস্য কারণম্ .
এবং পৃচ্ছতি রামে সা কৈকেযী রামমব্রবীত্ .. ৫৪..
ত্বমেব কারণং হ্যত্র রাজ্ঞো দুঃখোপশান্তযে .
কিঞ্চিত্কার্যং ত্বযা রাম কর্তব্যং নৃপতের্হিতম্ .. ৫৫..
কুরু সত্যপ্রতিজ্ঞস্ত্বং রাজানং সত্যবাদিনম্ .
রাজ্ঞা বরদ্বযং দত্তং মম সন্তুষ্টচেতসা .. ৫৬..
ত্বদধীনং তু তত্সর্বং বক্তুং ত্বাং লজ্জতে নৃপঃ .
সত্যপাশেন সম্বদ্ধং পিতরং ত্রাতুমর্হসি .. ৫৭..
পুত্রশব্দেন চৈতদ্ধি নরকাত্ত্রাযতে পিতা .
রামস্তযোদিতং শ্রুত্বা শূলেনাভিহতো যথা .. ৫৮..
ব্যথিতঃ কৈকেযীং প্রাহ কিং মামেবং প্রভাষসে .
পিত্রার্থে জীবিতং দাস্যে পিবেযং বিষমুল্বণম্ .. ৫৯..
সীতাং ত্যক্ষ্যেঽথ কৌসল্যাং রাজ্যং চাপি ত্যজাম্যহম্ .
অনাজ্ঞপ্তোঽপি কুরুতে পিতুঃ কার্যং স উত্তমঃ .. ৬০..
উক্তঃ করোতি যঃ পুত্রঃ স মধ্যম উদাহৃতঃ .
উক্তোঽপি কুরুতে নৈব স পুত্রো মল উচ্যতে .. ৬১..
অতঃ করোমি তত্সর্বং যন্মামাহ পিতা মম .
সত্যং সত্যং করোম্যেব রামো দ্বির্নাভিভাষতে .. ৬২..
ইতি রামপ্রতিজ্ঞাং সা শ্রুত্বা বক্তুং প্রচক্রমে .
রাম ত্বদ্ভিষেকার্থং সংভারাঃ সংভৃতাশ্চ যে .. ৬৩..
তৈরেব ভরতোঽবশ্যমভিষেচ্যঃ প্রিযো মম .
অপরেণ বরেণাশু চীরবাসা জটাধরঃ .. ৬৪..
বনং প্রযাহি শীঘ্রং ত্বমদ্যৈব পিতুরাজ্ঞযা .
চতুর্দশ সমাস্তত্র বস মুন্যন্নভোজনঃ .. ৬৫..
এতদেব পিতুস্তেঽদ্য কার্যং ত্বং কর্তুমর্হসি .
রাজা তু লজ্জতে বক্তুং ত্বামেবং রঘুনন্দন .. ৬৬..
          শ্রীরাম উবাচ
ভরতস্যৈব রাজ্যং স্যাদহং গচ্ছামি দণ্ডকান্ .
কিন্তু রাজা ন বক্তীহ মাং ন জানেঽত্র কারণম্ .. ৬৭..
শ্রুত্বৈতদ্রামবচনং দৃষ্ট্বা রামং পুরঃ স্থিতম্ .
প্রাহ রাজা দশরথো দুঃখিতো দুঃখিতং বচঃ .. ৬৮..
স্ত্রীজিতং ভ্রান্তহৃদযমুন্মার্গপরিবর্তিনম্ .
নিগৃহ্য মাং গৃহাণেদং রাজ্যং পাপং ন তদ্ভবেত্ .. ৬৯..
এবং চেদনৃতং নৈব মাং স্পৃশেদ্রঘুনন্দন .
ইত্যুক্ত্বা দুঃখসন্তপ্তো বিললাপ নৃপস্তদা .. ৭০..
হা রামা হা জগন্নাথ হা মম প্রাণবল্লভ .
মাং বিসৃজ্য কথং ঘোরং বিপিনং গন্তুমর্হসি .. ৭১..
ইতি রামং সমালিঙ্গ্য মুক্তকণ্ঠো রুরোদ হ .
বিসৃজ্য নযনে রামঃ পিতুঃ সজলপাণিনা .. ৭২..
আশ্বাসযামাস নৃপং শনৈঃ স নযকোবিদঃ .
কিমত্র দুঃখেন বিভো রাজ্যং শাস্তু মেঽনুজঃ .. ৭৩..
অহং প্রতিজ্ঞাং নিস্তীর্য পুনর্যাস্যামি তে পুরম্ .
রাজ্যাত্কোটিগুণং সৌখ্যং মম রাজন্বনে সতঃ .. ৭৪..
ত্বত্সত্যপালনং দেব কার্যং চাপি ভবিষ্যতি .
কৈকেয্যাশ্চ প্রিযো রাজন্বনবাসো মহাগুণঃ .. ৭৫..
ইদানীং গন্তুমিচ্ছামি ব্যেতু মাতুশ্চ হৃজ্জ্বরঃ .
সম্ভারশ্চোপহীযন্তামভিষেকার্থমাহৃতাঃ .. ৭৬..
মাতরং চ সমনুশ্বাস্য অনুনীয চ জানকীম্ .
আগত্য পাদৌ বন্দিত্বা তব যাস্যে সুখং বনম্ .. ৭৭..
ইত্যুক্ত্বা তু পরিক্রম্য মাতরং দ্রষ্টুমাযযৌ .
কৌসল্যাপি হরেঃ পূজাং কুরুতে রামকারণাত্ .. ৭৮..
হোমং চ কারযামাস ব্রাহ্মণেভো দদৌ ধনম্ .
ধ্যাযতে বিষ্ণুমেকাগ্রমনসা মৌনমাস্থিতা .. ৭৯..
অন্তঃস্থমেকং ঘনচিত্প্রকাশং
        নিরস্তসর্বাতিশযস্বরূপম্ .
বিষ্ণুং সদানন্দমযং হৃদব্জে সা
        ভাবযন্তী ন দদর্শ রামম্ .. ৮০..
ইতি শ্রীমদধ্যাত্মরামযণে উমামহেশ্বরসংবাদে
   অযোধ্যাকাণ্ডে তৃতীযঃ সর্গঃ .. ৩..