অধ্যাত্ম রামাযণ ২ – অযোধ্যাকাণ্ডম্

      .. অধ্যাত্ম রামাযণম্ ..
       .. অযোধ্যা কাণ্ডঃ ..
       .. দ্বিতীযঃ সর্গঃ ..
অথ রাজা দশরথঃ কদাচিদ্রহসি স্থিতঃ .
বসিষ্ঠং স্বকুলাচার্যমাহূযেদমভাষত .. ১..
ভগবন্ রামমখিলাঃ প্রশংসন্তি মুহুর্মুহুঃ .
পৌরাশ্চ নিগমা বৃদ্ধা মন্ত্রিণশ্চ বিশেষতঃ .. ২..
ততঃ সর্বগুণোপেতং রামং রাজীবলোচনম্ .
জ্যেষ্ঠং রাজ্যেঽভিষেক্ষ্যামি বৃদ্ধোঽহং মুনিপুঙ্গব .. ৩..
ভরতো মাতুলং দ্রষ্টুং গতঃ শত্রুঘ্নসংযুতঃ .
অভিষেক্ষ্যে শ্ব এবাশু ভবাংস্তচ্চানুমোদতাম্ .. ৪..
সম্ভারাঃ সম্ভ্রিযন্তাং চ গচ্ছ মন্ত্রয রাঘবম্ .
উচ্ছ্রীযন্তাং পতাকাশ্চ নানাবর্ণাঃ সমন্ততঃ .. ৫..
তোরণানি বিচিত্রাণি স্বর্ণমুক্তামযানি বৈ .
আহূয মন্ত্রিণাং রাজা সুমন্ত্রং মন্ত্রিসত্তমম্ ..৬..
আজ্ঞাপযতি যদ্যত্ত্বাং মুনিস্তত্তত্সমানয .
যৌবরাজ্যেঽভিষেক্ষ্যামি শ্বোভূতে রঘুনন্দনম্ .. ৭..
তথেতে হর্ষাত্স মুনিং কিং করোমীত্যভাষত .
তমুবাচ মহাতেজা বসিষ্ঠো জ্ঞানিনাং বরঃ .. ৮..
শ্বঃ প্রভাতে মধ্যকক্ষে কন্যকাঃ স্বর্ণভূষিতাঃ .
তিষ্ঠন্তু ষোডশ গজাঃ স্বর্ণরত্নাদি ভূষিতাঃ .. ৯..
চতুর্দন্তঃ সমাযাতু ঐরাবতকুলোদ্ভবঃ .
নানাতীর্থোদকৈঃ পূর্ণাঃ স্বর্ণকুম্ভাঃ সহস্রশঃ .. ১০..
স্থাপ্যন্তাং নববৈযাঘ্রচর্মাণি ত্রীণি চানয .
শ্বেতচ্ছত্রং রত্নদণ্ডং মুক্তামণিবিরাজিতম্ .. ১১..
দিব্যমাল্যানি বস্ত্রাণি দিব্যান্যাভরণানি চ .
মুনযঃ সত্কৃতাস্তত্র তিষ্ঠন্তু কুশপাণযঃ .. ১২..
নর্তক্যো বারমুখ্যাশ্চ গাযকা বেণুকাস্তথা .
নানাবাদিত্রকুশলা বাদযন্তু নৃপাঙ্গণে .. ১৩..
হস্ত্যশ্বরথপাদাতা বহিস্তিষ্ঠন্তু সাযুধাঃ .
নগরে যানি তিষ্ঠন্তি দেবতাযতনানি চ .. ১৪..
তেষু প্রবর্ততাং পূজা নানাবলিভিরাবৃতা .
রাজানঃ শীঘ্রমাযান্তু নানোপাযনপাণযঃ .. ১৫..
ইত্যাদিশ্য মুনিঃ শ্রীমান্ সুমন্ত্রং নৃপমন্ত্রিণম্ .
স্বযং জগাম ভবনং রাঘবস্যাতিশোভনম্ .. ১৬..
রথমারুহ্য ভগবান্ব্সিষ্ঠো মুনিসত্তমঃ .
ত্রীণি কক্ষাণ্যতিক্রম্য রথাত্ক্ষিতিমবাতরত্ .. ১৭..
অন্তঃ প্রবিশ্য ভবনং স্বাচার্যত্বাদবারিতঃ .
গুরুমাগতমাজ্ঞায রামস্তূর্ণঃ কৃতাঞ্জলিঃ .. ১৮..
প্রত্যুদ্গম্য নমস্কৃত্য দণ্ডবদ্ ভক্তিসংযুতঃ .
স্বর্ণপাত্রেণ পানীযমানিনাযাশু জানকী .. ১৯..
রত্নাসনে সমাবেশ্য পাদৌ প্রক্ষাল্য ভক্তিতঃ .
তদপঃ শিরসা ধৃত্বা সীতাযা সহ রাঘবঃ .. ২০..
ধন্যোঽস্মীত্যব্রবীদ্রামস্তব পাদাম্বুধারণাত্ .
শ্রীরামেণৈবমুক্তস্তু প্রহসন্মুনিরব্রবীত্ .. ২১..
ত্বত্পাদসলিলং ধৃত্বা ধন্যোঽভূদ্গিরিজাপতিঃ
ব্রহ্মাপি মত্পিতা তে হি পাদতীর্থহতাশুভঃ .. ২২..
ইদানীং ভাষসে যত্ত্বং লোকানামুপদেশকৃত্ .
জানামি ত্বাং পরাত্মানং লক্ষ্ম্যা সংজাতমীশ্বরম্ .. ২৩..
দেবকার্যার্থসিদ্ধ্যর্থং ভক্তানাং ভক্তিসিদ্ধযে .
রাবণস্য বধার্থায জাতং জানামি রাঘব .. ২৪..
তথাপি দেবকার্যার্থ্ং গুহ্যং নোদ্ঘাটযাম্যহম্ .
তথা ত্বং মাযযা সর্বং করোষি রঘুনন্দন .. ২৫..
তথৈবানুবিধাস্যেঽহং শিষ্যস্ত্বং গুরুরপ্যহম্ .
গুরুর্গুরূণাং ত্বং দেব পিতৄণাং ত্বং পিতামহঃ .. ২৬..
অন্তর্যামী জগদ্যাত্রাবাহকস্ত্বমগোচরঃ .
শুদ্ধসত্ত্বমযং দেহং ধৃত্বা স্বাধীনসম্ভবম্ .. ২৭..
মনুষ্য ইব লোকেঽস্মিন্ ভাসি ত্বং যোগমাযযা .
পৌরোহিত্যমহং জানে বিগর্হ্যং দূষ্যজীবনম্ .. ২৮..
ইক্ষ্বাকূণাং কুলে রামঃ পরমাত্মা জনিষ্যতে .
ইতি জ্ঞাতং মযা পূর্বং ব্রহ্মণা কথিতং পুরা .. ২৯..
ততোঽহমাশযা রাম তব সম্বন্ধকাঙ্ক্ষযা .
অকার্ষং গর্হিতমপি তবাচার্যত্বসিদ্ধযে .. ৩০..
ততো মনোরথো মেঽদ্য ফলিতো রঘুনন্দন .
ত্বদধীনা মহামাযা সর্বলোকৈকমোহিনী .. ৩১..
মাং যথা মোহযেন্নৈব তথা কুরু রঘূদ্বহ .
গুরুনিষ্কৃতিকামস্ত্বং যদি দেহ্যেতদেব মে .. ৩২..
প্রসঙ্গাত্সর্বমপ্যুক্তং ন বাচ্যং কুত্রচিন্মযা .
রাজ্ঞা দশরথেনাহং প্রেষিতোঽস্মি রঘূদ্বহ .. ৩৩..
ত্বামামন্ত্রযিতুং রাজ্যে শ্বোঽভিষেক্ষ্যতি রাঘব .
অদ্য ত্বং সীতযা সার্ধমুপবাসং যথাবিধি .. ৩৪..
কৃত্বা শুচির্ভূমিশাযী ভব রাম জিতেন্দ্রিযঃ .
গচ্ছামি রাজসান্নিধ্যং ত্বং তু প্রাতর্গমিষ্যসি .. ৩৫..
ইত্যুক্ত্বা রথমারুহ্য যযৌ রাজগুরুর্দ্রুতম্ .
রামোঽপি লক্ষ্মণং দৃষ্ট্বা প্রহসন্নিদমব্রবীত্ .. ৩৬..
সৌমিত্রে যৌবরাজ্যে মে শ্বোঽভিষেকো ভবিষ্যতি .
নিমিত্তমাত্রমেবাহং কর্তা ভোক্তা ত্বমেব হি .. ৩৭
মম ত্বং বহিঃ প্রাণো নাত্র কার্যা বিচারণা .
ততো বসিষ্ঠেন যথা ভাষিতং তত্তথাকরোত্ .. ৩৮..
বসিষ্ঠোঽপি নৃপং গত্বা কৃতং সর্বং ন্যবেদযত্ .
বসিষ্ঠস্য পুরো রাজ্ঞা হ্যুক্তং রামাভিষেচনম্ .. ৩৯..
যদা তদৈব নগরে শ্রুত্বা কশ্চিত্পুমান্ জগৌ .
কৌসল্যাযৈ রামমাত্রে সুমিত্রাযৈ তথৈব চ .. ৪০..
শ্রুত্বা তে হর্ষসম্পূর্ণে দদতুর্হারমুত্তমম্ .
তস্মৈ ততঃ প্রীতমানা কৌসল্যা পুত্রবত্সলা .. ৪১..
লক্ষ্মীং পর্যচরদ্দেবীং রামস্যার্থপ্রসিদ্ধযে .
সত্যবাদী দশরথঃ করোত্যেব প্রতিশ্রুতম্ .. ৪২..
কৈকেযীবশগঃ কিন্তু কামুকঃ কিং করিষ্যতি .
ইতি ব্যাকুলচিত্তা সা দুর্গাং দেবীমপূজযত্ .. ৪৩..
এতস্মিন্নন্তরে দেবা দেবীং বাণীমচোদযন্ .
গচ্ছ দেবি ভুবো লোকমযোধ্যাযাং প্রযত্নতঃ .. ৪৪..
রামাভিষেকবিঘ্নার্থং যতস্বং ব্রহ্মবাক্যতঃ .
মন্থরাং প্রবিশস্বাদৌ কৈকেযীং চ ততঃ পরম্ .. ৪৫..
ততো বিঘ্নে সমুত্পন্নে পুনরেহি দিবিং শুভে .
তথেত্যুক্ত্বা তথা চক্রে প্রবিবেশাথ মন্থরাম্ .. ৪৬..
সাপি কুব্জা ত্রিবক্রা তু প্রাসাদাগ্রমথারুহত্ .
নগরং পরিতো দৃষ্ট্বা সর্বতঃ সমলংকৃতম্ .. ৪৭..
নানাতোরণসম্বাধং পতাকাভিরলংকৃতম্ .
দানোত্সবসমাযুক্তা কৌসল্যা চাতিহর্ষিতা .. ৪৮..
ধাত্রীং পপ্রচ্ছ মাতঃ কিং নগরং সমলংকৃতম্ .
দানোত্সবসমাযুক্তা কৌসল্যা চাতিহর্ষিতা .. ৪৯..
দদাতি বিপ্রমুখ্যেভো বস্ত্রাণি বিবিধানি চ .
তামুবাচ তদা ধাত্রী রামচন্দ্রাভিষেচনম্ .. ৫০..
শ্বো ভবিষ্যতি তেনাদ্য সর্বতোঽলংকৃতং পুরম্ .
তত্শ্রুত্বা ত্বরিতং গত্বা কৈকেযীং বাক্যমব্রবীত্ .. ৫১..
পর্যঙ্কস্থাং বিশালাক্ষীমেকান্তে পর্যবস্থিতাম্ .
কিং শেষে দুর্ভগে মূঢে মহদ্ভযমুপস্থিতম্ .. ৫২..
ন জানীষেঽতিসৌন্দর্যমানিনী মত্তগামিনী .. ৫৩..
রামস্যানুগ্রহাদ্রাজ্ঞঃ শ্বোঽভিষেকো ভবিষ্যতি .
তত্শ্রুত্বা সহসোত্থায কৈকেযী প্রিযবাদিনী .. ৫৪..
তস্যৈ দিব্যং দদৌ স্বর্ণনূপুরং রত্নভূষিতম্ .
হর্ষস্থানে কিমিতি মে কথ্যতে ভযমাগতম্ .. ৫৫..
ভরতাধিকো রামঃ প্রিযকৃন্মে প্রিযংবদঃ .
কৌসল্যাং মাং সমং পশ্যন্ সদা শুশ্রূষতে হি মাম্ .. ৫৬..
রামাদ্ভযং কিমাপন্নং তব মূঢে বদস্ব মে .
তত্শ্রুত্বা বিষসাদাথ কুব্জাকারণবৈরিণী .. ৫৭..
শৃণু মদ্বচনং দেবি যথার্থং তে মহদ্ভযম্ .
ত্বাং তোষযন্ সদা রাজা প্রিযবাক্যানি ভাষতে .. ৫৮..
কামুকোঽতথ্যবাদী চ ত্বাং বাচা পরিতোষযন্ .
কার্যং করোতি তস্যা বৈ রামমাতুঃ সুপুষ্কলম্ .. ৫৯..
মনস্যেতন্নিধাযৈব প্রেষযামাস তে সুতম্ .
ভরতং মাতুলকুলে প্রেষযামাস সানুজম্ .. ৬০..
সুমিত্রাযাঃ সমীচীনং ভবিষ্যতি ন সংশযঃ .
লক্ষ্মণো রামমন্বেতি রাজ্যং সোঽনুভবিষ্যতি .. ৬১..
ভরতো রাঘবস্যাগ্রে কিঙ্করো বা ভবিষ্যতি .
বিবাস্যতে বা নগরাত্প্রাণৈর্বা হাযতেঽচিরাত্ .. ৬২..
ত্বং তু দাসীব কৌসল্যাং নিত্যং পরিচরিষ্যসি .
ততোঽপি মরণং শ্রেযো যত্সপত্ন্যাঃ পরাভবঃ .. ৬৩..
অতঃ শীঘ্রং যতস্বাদ্য ভরতস্যাভিষেচনে .
রামস্য বনবাসার্থং বর্ষাণি নব পঞ্চ চ .. ৬৪..
ততো রূঢোঽভযে পুত্রস্তব রাজ্ঞি ভবিষ্যতি .
উপাযং তে প্রবক্ষ্যামি পূর্বমেব সুনিশ্চিতম্ .. ৬৫..
পুরা দেবাসুরে যুদ্ধে রাজা দশরথঃ স্বযম্ .
ইন্দ্রেণ যাচিতো ধন্বী সহাযার্থং মহারথঃ .. ৬৬..
জগাম সেনযা সার্ধং ত্বযা সহ শুভাননে .
যুদ্ধং প্রকুর্বতস্তস্য রাক্ষসৈঃ সহ ধন্বিনঃ .. ৬৭..
তদাক্ষকীলো ন্যপতচ্ছিন্নস্তস্য ন বেদ সঃ .
ত্বং তু হস্তং সমাবেশ্য কীলরন্ধ্রেঽতিধৈর্যতঃ .. ৬৮..
স্থিতবত্যসিতাপাঙ্গি পতিপ্রাণপরীপ্সযা .
ততো হত্বাসুরান্সর্বান্ দদর্শ ত্বামরিন্দমঃ .. ৬৯..
আশ্চর্যং পরমং লেভে ত্বামালিঙ্গ্য মুদান্বিতঃ .
বৃণীষ্ব যত্তে মনসি বাঞ্ছিতং বরদোঽস্ম্যহম্ .. ৭০..
বরদ্বযং বৃণীষ্ব ত্বমেবং রাজাবদত্স্বযম্ .
ত্বযোক্তো বরদো রাজন্যদি দত্তং বরদ্বযম্ .. ৭১..
ত্বয্যেব তিষ্ঠতু চিরং ন্যাসভূতং মমানঘ .
যদা মেঽবসরো ভূযাত্তদা দেহি বরদ্বযম্ .. ৭২..
তথেত্যুক্ত্বা স্বযং রাজা মন্দিরং ব্রজ সুব্রতে .
ত্বত্তঃ শ্রুতং মযা পূর্বমিদানীং স্মৃতিমাগতম্ .. ৭৩..
অতঃ শীঘ্রং প্রবিশ্যাদ্য ক্রোধাগারং রুষান্বিতা .
বিমুচ্য সর্বাভরণং সর্বতো বিনিকীর্য চ .. ৭৪..
ভূমাবেব শযানা ত্বং তূষ্ণীমাতিষ্ঠ ভামিনি .
যাবত্সত্যং প্রতিজ্ঞায রাজাভীষ্টং করোতি তে .. ৭৫..
শ্রুত্বা ত্রিবক্রযোক্তং তত্তদা কেকযনন্দিনী .
তথ্যমেবাখিলং মেনে দুঃসঙ্গাহিতবিভ্রমা .. ৭৬..
তামাহ কৈকেযী দুষ্টা কুতস্তে বুদ্ধিরীদৃশী .
এবং ত্বাং বুদ্ধিসম্পন্নাং ন জানে বক্রসুন্দরি .. ৭৭..
ভরতো যদি মে ভবিষ্যতি সুতঃ প্রিযঃ .
গ্রামান্ শতং প্রদাস্যামি মম ত্বং প্রাণবল্লভা .. ৭৮..
ইত্যুক্ত্বা কোপভবনং প্রবিশ্য সহসা রুষা .
বিমুচ্য সর্বাভরণং পরিকীর্য সমন্ততঃ .. ৭৯..
ভূমৌ শযানা মলিনা মলিনাম্বরধারিণী .
প্রোবাচ শৃণু মে কুব্জে যাবদ্রামো বনং ব্রজেত্ .. ৮০..
প্রাণাংস্ত্যক্ষ্যেঽথ বা বক্রে শযিষ্যে তাবদেব হি .
নিশ্চযং কুরু কল্যাণি কল্যাণং তে ভবিষ্যসি .. ৮১..
ইত্যুক্ত্বা প্রযযৌ কুব্জা গৃহং সাপি তথাকরোত্ .. ৮২..
ধীরোঽত্যন্তদযান্বিতোঽপি সগুণাচারান্বিতো বাথবা
       নীতিজ্ঞো বিধিবাদদেশিকপরো বিদ্যাবিবেকোঽথবা .
দুষ্টানামতিপাপভাবিতধিযাং সঙ্গং সদা বেদ্ভজেত্তদ্বুদ্ধ্যা
      পরিভাবিতো ব্রজতি তত্ সাম্যং ক্রমেণ স্ফুটম্ .. ৮৩..
অত সঙ্গঃ পরিত্যাজ্যো দুষ্টানাং সর্বদৈব হি .
দুঃসঙ্গী চ্যবতে স্বার্থাদ্যথেযং রাজকন্যকা .. ৮৪..
ইতি শ্রীমদধ্যাত্মরামযণে উমামহেশ্বরসংবাদে
   অযোধ্যাকাণ্ডে দ্বিতীযঃ সর্গঃ .. ২..